1. Wa a wan sitn we Juob did du so dat im kuda did get fi nuo Jeuova beta?

 OUTA aal a di taak we Juob taak wid difrant difrant piipl iina im laif, di taim wen im an Jeuova did chat wuda bi wan big ting fi im. Wen Jeuova did a taak tu Juob, im tel im fi luk pan som a di nais ting dem we im mek. A dem sitn ya Jeuova yuuz fi elp Juob fi si se nobadi no waiz laik Im an se nobadi kyaahn tek kier a Im piipl dem beta dan Im. Laik wen Jeuova memba Juob se a im gi di animal dem we dem niid, dat mek Juob si se Jeuova kuda tek kier a im tu. (Juob 38:39-41; 39:1, 5, 13-16) Wen Juob tingk bout di ting dem we Jeuova mek, dem mek im lorn nof bout Jeuova wiez dem.

2. Wa mek it mait-a aad fi wi fi peni di ting dem we Jeuova mek?

² Wen wi spen di taim fi tek iin di ting dem we Jeuova mek, dem kyan mek wi nuo nof bout im tu. Bot somtaim wi mait-a fain dis aad fi du. Laik ef wi liv somwe laik iina wan big siti, wi mait no si uol iip a di ting dem we Jeuova mek, an iivn ef wi liv a konchri, wi mait-a no fiil se wi av di taim fi sidong an peni di ting dem we Gad mek. So wi a-go luk pan wa mek it gud fi spen taim fi tek iin di sitn dem we Jeuova mek, an wi a-go luk pan ou Jeuova an Jiizas yuuz di sitn dem we Jeuova mek fi tiich wi, an wi a-go si wa els wi kyan lorn fram di ting dem we Gad mek.

3. Ou wi nuo se Jeuova did waahn Adam fi enjai di sitn dem we Im mek?

³ Jeuova did waahn di fos man an uman fi enjai di sitn dem we im mek. So wen im mek Adam, im put im iina wan  priti priti gyaadn an gi im di wok fi plaant it op an mek di gyaadn biga. (Jen. 2:8, 9, 15) It mos did nais fi Adam fi luk an si ou di siid dem gruo an ou di flowaz dem bluum. An da wok ya fi tek kier a di gyaadn mos did mek Adam api. An Jeuova did mek Adam niem aal a di animal dem. (Jen. 2:19, 20) An fi gi di difrant difrant animal dem wan niem we wuda mach dem, Adam wuda afi sidong an tek iin evri likl ting bout evri wan a dem. Da wok de mos did swiit Adam kaa im get di chaans fi si se Jeuova waiz an im kyan mek tingz gud, an di ting dem we im mek luk gud tu.

4. (a) Wa a wan a di riizn dem wa mek wi fi peni di ting dem we Gad mek? (b) Outa aal a di sitn dem we Jeuova mek, wich wan a dem yu lov di muos?

⁴ Wan a di riizn wa mek wi fi peni di ting dem we Jeuova mek a dat a Jeuova waahn wi fi du it. Wi nuo dis kaa im se: “Luk op iina di skai an tel mi wa yu si. A uu mek dem sitn ya?” An wi nuo se a im. (Aiz. 40:26) Jeuova mek shuor se di skai, di ort, an di sii ful op a difrant difrant tingz we im mek we kyan tiich wi bout im. (Sa. 104:24, 25) An im mek wi iina wan wie we mek wi lov fi luk pan di priti sitn dem we im mek. Bot a no onggl dat, im mek wi so das wi kyan si, ier, fiil, ties, an sumel difrant difrant tingz so dat wi kyan enjai di difant difrant ting dem we im mek.

5. Azkaadn tu Ruoman 1:20, ou it elp wi wen wi tek di taim fi tek iin di sitn dem we Jeuova mek?

⁵ Wan neda riizn wa mek wi fi peni di ting dem we Jeuova mek a dat dem kyan tiich wi bout Jeuova wiez dem. (Riid Ruoman 1:20.) Tingk bout di difrant difrant sitn dem we wi si we Jeuova mek, yu no si ou dem mek wi si ou Jeuova waiz? An wen wi tingk bout di difrant difrant kain-a fuud we wi kyan nyam, dat no mek yu nuo se Jeuova lov wi? Ye man, wen wi luk pan di sitn dem we Jeuova mek, wi kyan get fi nuo im muor an it kyan mek wi waahn fi jraa niera tu im tu. Mek wi luk pan som a di wie dem we Jeuova yuuz di sitn dem we im mek fi tiich wi bout im.

6. Wen wi si som bod a flai fram wan plies fi go a wan neda plies, wa wi kyan lorn fram dat?

⁶ Jeuova av im taim fi du evriting. Fram di laas paat a Febiweri tu di migl paat a Mie, di Izrel piipl dem yuus tu si som bod we niem staak a flai go naat uova di lan wich paat dem liv. Jeuova did tel di Izrelait dem se dem bod de nuo wen a taim fi dem flai go a wan neda plies. (Jer. 8:7) Jos laik ou Jeuova set wan taim fi dem  bod ya flai we dem a go a ier taim, a sed so im set wan taim fi wen im a-go don di wikid piipl dem. So evritaim wi si som bod a flai fram wan plies fi go a wan neda plies, it mek wi nuo se Jeuova av wan taim wen im a-go don da wikid worl ya.​—Aba. 2:3.

7. Wen wi luk pan ou di iigl flai iina di skai, wa dat kyan tiich wi? (Aizaiya 40:31)

⁷ Jeuova mek di wan dem we a sorv im get chrang. Jeuova yuuz di prafit we did niem Aizaiya fi mek di piipl dem nuo se wen dem fiil taiyad an laik dem kyaahn go no muor, Im a-go mek dem “av powa fi kip dem a go op an op laik se dem av iigl wing.” (Riid Aizaiya 40:31.) Di Izrelait dem wuda aalwiez a si di iigl dem a flai aiya an aiya op iina di skai an nat iivn a muuv dem wing kaa dem did a flai pan tap a di at ier we did a push dem aiya an aiya. A sopm nais fi memba se jos laik ou Jeuova gi di iigl dem di chrent fi flai, a siem so Jeuova kyan mek di wan dem we de sorv im get chrang. So wen yu si dem bod de a flai aiya an aiya iina di skai an nat iivn afi muuv dem wing tuu moch, yu fi memba se a siem so Jeuova kyan elp yu fi diil wid yu prablem dem.

8. Wa Juob did lorn wen im tingk bout di sitn dem we Gad mek, an wa wi kyan lorn wen wi tingk bout dem tu?

⁸ Jeuova shuo wi se wi kyan chos im. Jeuova did elp Juob fi chos iina im muor. (Juob 32:2; 40:6-8) Wen Jeuova did a taak tu Juob, im tel im bout di difrant sitn dem we Im mek, laik di staar dem, di kloud dem, an di laitnin an tonda. An Jeuova did tel im bout som difrant difrant animal, laik di wail bulkou an di aas. (Juob 38:32-35; 39:9, 19, 20) Aal a dem sitn ya we Jeuova tel Juob bout mek wi si se Jeuova powaful, an im lov wi, an im waiz kyaahn don. Siek-a dat, Juob did chos iina Jeuova muor an muor. (Juob 42:1-6) A siem so wen wi tek di taim fi tek iin di ting dem we Jeuova mek, it kyan mek wi memba se wi kyaahn waiz an powaful laik Jeuova, an se im a-go get rid a aal a wi prablem dem an im av di powa fi dwi’it tu. Dem sitn ya kyan elp wi fi chos iina im muor.

9-10. Wen di son shain an di rien faal, wa dat mek wi nuo bout Jeuova?

⁹ Jiizas did nuo nof bout di sitn dem we Gad mek. Matarafak a ‘im did a elp Faada Gad fi mek evriting.’ (Pr. 8:30) An wen Jiizas did kom pan di ort, im did yuuz di sitn dem we Gad mek fi tiich im falara dem bout im Faada. Mek wi luk pan som a dem lesn ya we Jiizas did tiich im falara dem bout.

¹⁰ Jeuova lov evribadi. Iina di sorman pan di mountn, Jiizas did tel im falara dem bout ou Jeuova mek di son shain an ou Im mek di rien faal, an dem tuu sitn ya a tuu sitn we piipl no tingk nof bout. Wi niid dem tuu sitn ya fi liv. An Jeuova kuda no mek di son shain an di rien faal pan di wikid piipl dem, bot a no dat im du, im mek di son shain an di rien faal pan evribadi. (Mat. 5:43-45) Jiizas did yuuz da lesn ya fi tiich im falara dem se Jeuova waahn wi fi shuo lov tu evribadi. So enitaim wi si di son a set an it luk priti ar wi get a nais showa a rien, wi kyan sidong an tingk bout ou Jeuova lov aal a wi. Kaa wen wi si umoch Jeuova lov aal a wi, a dat a-go mek wi lov evribadi an go priich tu dem.

11. Wen wi spen taim an tek iin wa a gwaan wid di bod dem, ou dat kyan elp wi?

¹¹ Jeuova gi wi wa wi niid fi liv. Iina di siem sorman pan di mountn, Jiizas did se dem fi “tingk bout di bod dem. Dem no plaant, dem no riip, an dem no stuor op  stuor op fuud, an Gad fiid dem, duohn?” An dem piipl de we did a lisn tu im mait-a kuda si di bod dem a flai iina di skai wen im aks dem se: “Den unu no wot uol iip muo tu Gad dan dem?” (Mat. 6:26) Wa Jiizas se ya-so mek wi nuo se Jeuova a-go tek kier a wi. (Mat. 6:31, 32) Dis we Jiizas tiich wi bout ou Jeuova tek kier a di sitn dem we im mek stil a elp di wan dem we a sorv Jeuova ya nou. Laik wan yong sista, we liv iina Spien we a paiyanier, did fiil sad wen shi kudn fain somwe gud fi liv. Bot wen shi si ou di bod dem fain siid an ada tingz fi nyam, it mek ar tap wori wori op arself. Shi se: “Dem bod de mek mi memba se a Jeuova a tek kier a dem an im a-go tek kier a mi tu.” An no lang afta dat di sista fain somwe fi liv.

12. Azkaadn tu Matyu 10:29-31, wa di likl bod dem mek wi nuo bout Jeuova?

¹² Evri singgl wan a wi wot nof tu Jeuova. Bifuo Jiizas sen out im apasl dem fi go priich, im elp dem fi no fiil fried wen piipl a fait gens dem kaaz a wa dem biliiv iina. (Riid Matyu 10:29-31.) Wa im did du a dat im did tel dem bout wan likl bod, we evribadi we did liv iina Izrel did nuo bout, we dem kaal sparo. Dem de bod de neva did wot nof iina Jiizas taim. Bot im tel im falara dem se: “No iivn wan a dem jrap a grong ef di Faada no se a so it fi go. . . . Tu Gad unu wot muo dan nof nof bod.” So Jiizas did yuuz dem bod ya fi mek im falara dem nuo se evri singgl wan a dem wot nof tu Jeuova, so dem na’afi fried ef piipl du som bad tingz tu dem kaaz a wa dem biliiv iina. So enitaim dem wuda si dem likl bod de wen dem a go bout an a priich, dem wuda memba wa Jiizas did se. A siem so enitaim yu si wan likl bod, yu fi memba se evri singgl wan a wi wot nof tu Jeuova “kaaz tu Gad [yu] wot muo dan nof nof bod.” Kaa a Jeuova a elp yu, yu na’afi fried wen piipl a fait gens yu kaaz a wa yu biliiv iina.​—Sa. 118:6.

13. Wa kyan elp wi fi lorn fram di sitn dem we Gad mek?

¹³ Wi kyan lorn uol iip a ada sitn bout Jeuova fram di ting dem we im mek. Fi lorn dem ada sitn ya, di fos ting wi fi du a spen taim fi tek iin di ting dem we im mek. Den wi afi spen taim fi tingk bout wa it tiich wi bout Jeuova. Bot fi du dem sitn ya naa go aalwiez iizi. Laik wan sista we niem Géraldine fram Kyamaruun se: “Mi did gruo op iina di siti, so mi did afi chrai aad fi spen taim an tek iin di sitn dem we Jeuova mek.” An wan elda we niem Alfonso se: “Mi si se mi did niid fi spen somtaim bai miself fi luk pan di sitn dem we Jeuova mek an tingk bout wa dem tiich mi se bout im.”

14. Wen Dievid sidong an tingk bout di sitn dem we Gad mek, wa a som a di sitn dem we im lorn?

 ¹⁴ Dievid tingk aad aad bout di sitn dem we Gad mek. Im se tu Jeuova se: “Wen mi luk op iina di skai an si di tingz we yu mek wid yu an dem, di muun an di staar dem we yu mek, a uu wi bi dat yu kip wi pan yu main?” (Sa. 8:3, 4) Ye man, wen Dievid did a luk op iina di skai a nait, im neehn onggl sidong a luk pan di priti staar dem bot im did a chrai fi si wa im kyan lorn bout Jeuova wen im luk pan di staar dem. An im lorn se Jeuova big an powaful. An Dievid did tingk bout tu wen im did a gruo iina im mada beli, an wen im si an nuo ou Gad mek im badi gud, it mek im big op Jeuova muor fi ou waiz im bi.​—Sa. 139:14-17.

15. Tel wi bout sitn we Jeuova mek we mek yu si ou im stie. (Saam 148:7-10)

¹⁵ Jos laka Dievid, no mata wich paat yu liv, yu kyan si sitn we Jeuova mek. An wen yu sidong an tingk bout dem yu kyan get fi si som a im gud wiez dem. Laik wen yu fiil ou at di son bi, it mek yu tingk bout ou powaful Jeuova bi. (Jer. 31:35) An wen yu si wan bod a mek op im nes, it mek yu tingk ou waiz Jeuova bi. An wen yu si wan popi a ron roun a chrai kech im uona tiel, dat mek wi si se Jeuova a wan api Gad. An wen yu si wan mada a plie wid ar likl biebi yu jos afi tangk Jeuova kaaz dis mek wi si se im lov wi. Wi av uol iip a sitn roun wi we kyan mek wi lorn bout Jeuova kaa evriting we im mek, no mata ef it likl ar it big ar it de wich paat wi de ar it no de wich paat wi de, di uol a dem a big op Jeuova.​—Riid Saam 148:7-10.

16. Wa wi fi mek op wi main fi du?

¹⁶ Wi Gad Jeuova waiz muor dan evribadi els, im kier bout wi, im kyan mek tingz, an di sitn dem we im mek luk gud tu, an im chrang bad. An wen wi luk pan di sitn dem we im mek wi kyan si dat, an wi kyan si se im av nof muor nais wie bout im. So wi fi tek di taim fi enjai di sitn dem we Jeuova mek an tingk bout wa dem tiich wi bout im. Wen wi du dat, wi a-go jraa niera an niera tu im. (Jmz. 4:8) Iina di neks lesn, wi a-go luk pan ou di mada an faada dem kyan yuuz di sitn dem we Jeuova mek fi elp di pikni dem fi jraa niera an niera tu im.