1. Juubip qanoq Jehova ilisarisimal­luarnerulerpaa?

 JUUBIP inuunermini allanik oqaloqateqar­taraluarluni oqaloqatigiinneq ataaseq eqqaamanerpaasimassavaa – Jehovamik oqaloqateqarnini. Jehovap Juubi oqarfigaa pinngortitami ilaat alutornartut maluginiassagai. Taamaalilluni Juubip paasilissavaa Jehova ilisimas­suseqangaartoq aamma kiffami pisariaqar­titaannik sunilluunniit pilersitsisinnaasoq tatiginerulerlugu. Assersuutigalugu Juubi eqqaasin­neqarpoq Guutip uumasut isumagisaramigit aamma isumagisin­naagaani. (Job 38:39-41; 39:1, 5, 13-16) Guutip pinngortitai eqqarsaatigigamigit Guutip pissusii pillugit ilikkagaqangaarpoq.

2. Sooq Jehovap pinngor­titaasa isiginnaar­nissaat sapernar­tissinnaavarput?

² Aamma uagut Guutip pinngortitai isiginnaar­tarutsigit taanna pillugu paasisaqarsin­naavugut. Ilaannikkulli isiginnaar­nissaat periarfissaaneq ajorpoq. Illoqarfissuarmi najugaqarutta immaqa Jehovap pinngortitai ulluinnarni malugin­ngitsoor­tarpagut. Aamma pinngortitap ungasin­ngisaani najugaqaraluarluta misigisin­naavugut Jehovap pinngor­titaasa nuannaarutiginis­saannut piffissaqarneq ajorluta. Taamaattumik pinngortitap isiginnaar­tarnissaa sooq piffissaqarfigis­sagipput aamma sooq iluaqutaanersoq sammeriartigu. Jehova Jiisusilu pinngortitaq aqqutigalugu qanoq ilinniar­titsisarnersut pinngor­titarlu qanoq ilinniarfigisin­naaneripput sammissavarput.

3. Qanoq nalunngilarput Jehovap kissaatigigaa Adamip pinngortitat nuannaarutigissagai?

³ Jehovap kissaatigaa pinngortitani inuup siulliup nuannaarutigissagai. Guutip Adami pinngor­tikkamiuk Paratiisimi  alianaal­luinnartumi najugaqartippaa nuannersumillu suliassillugu. Tassa Adamip Paratiisi annertusiar­torlugulu isumagisussaavaa. (Mos 1. 2:8, 9, 15) Takorlooriaruk inerittussat ineriar­torneri naasullu sikkertarneri Adamip nuannaarutigalugit malinnaaf­figigai. Naatsiivimmik Edenimik isumagin­ninnissaq Adamimut immikkut pisinnaatitaaf­fiungaarami! Jehovap aamma Adami uumasut assigiin­ngitsorpassuit taaguuser­nissaannik suliassippaa. (Mos 1. 2:19, 20) Jehovap nammineq taaguusersorsin­naagaluarpai, kisianni Adami taamaalioqquaa. Adamip uumasut taaguusersun­nginneranni qanoq isikkoqarnersut qanorlu iliortarnersut maluginiaq­qaartarsimassavai isiginnaaq­qissaar­tarlugillu. Adamillu tamanna nuannaarutigisarsimassavaa. Jehovap ilisimassusia, ilusilersuisin­naassusia nutaaliorsin­naassusialu pillugit qujamasun­nerulersimassaaq.

4. (a) Pinngortitat misissor­nissaannut pissutaasut ilaat suua? (b) Jehovap pinngortitai sorliit illit qujamasuutigaagit?

⁴ Pinngortitat misissor­nissaannut pissutaasoq siulleq tassaavoq Jehovap tamanna kissaatigimmagu. Oqarfigaatigut: “Qilaap tungaanut qiviaritsi, takussagissilu!” Imalu aperivoq: “Kia pinngortippaa?” (Es 40:26) Akissutaa nalunanngilaq. Jehovap qilammiittut, nunarsuarmiittut immamiittullu tamaasa pinngortippai, tamakkulu tamaasa iluaqutigisarpagut. (Tuss 104:24, 25) Eqqarsaatigeriaruk Guutip qanoq pinngor­tikkaatigut. Pinngortitami kusanartut nuannaarutiginis­saannik periarfis­sippaatigut. Isigisaqarsin­naavugut, tusaasaqarsin­naavugut, malugisaqarsin­naavugut, mamassutsinik immikkoor­titsisin­naavugut naamasaqarsin­naallutalu. Malugissutit tallimat taakku aqqutigalugit pinngortitai assigiin­ngitsorpassuit nuannaarutigisin­naavagut.

5. Romamiut 1:20 naapertorlugu Jehovap pinngor­titaasa misissor­nissaat qanoq iluaqutigaarput?

⁵ Pinngortitat misissor­nissaannut pissutaasoq alla Biibilimi allaatigineqarpoq. Tassa Jehovap pissusii pillugit ilinniarsin­naagatta. (Romamiut 1:20 atuaruk). Assersuutigalugu Jehovap pinngortitai kusanarluin­nartumik ilusilersugaasut maluginiartakkit. Guutip ilisimas­susianik ersersitsin­nginnerpat? Aamma nerisassat assigiin­ngitsorpassuit nerisin­naasagut eqqarsaatigikkit. Ersaril­luinnarpoq Jehovap inuit asagai. Jehovap pissusii pinngor­titaani takugaangatsigit ilisarisimaneruler­tarparput qanimullu attaveqarfigerusuler­tarlugu. Jehovap pinngortitani aqqutigalugit qanoq inuit pingaarutilinnik ilinniar­tittarai paasiniariartigu.

6. Timmissat aallartarnerat qanoq ilinniarfigisin­naavarput?

⁶ Jehova piffissalersuisarpoq. Ukiut tamaasa februaarip naalerneraniit maajip qiteqqunnerata tungaanut Israalimi ungasorsuit avannaata tungaanut timmisut takuneqarsin­naasarput. Guutip Israalikkut ima oqarfigai: “Ungasorsuup aallarfissani tikiffissanilu nalusanngilai.” (Jer 8:7) Soorlu Jehovap timmissat taakkua aallarfissaat piffissalersorsimagaa, taamatuttaaq eqqartuus­sinissaminik piffissaliisimavoq. Nalitsinni timmissat aallarlutik timmisut takugaangatsigit eqqaasin­neqartarpugut Jehova tatigisin­naagipput. Taassumami pissutsit ajortut piffissarititamini atuukkun­naarsissavai. – Hab 2:3.

7. Timmiaq timmisoq qanoq ilinniarfigisin­naavarput? (Esaja 40:31)

⁷ Jehovap kiffani nukissaqar­tittarpai. Iisaaja aqqutigalugu Jehova neriorsuivoq innuttani sanngiikujuk­kaangata nikallungagaangatalu ‘nattoralittut sulunittutut’ qullarsar­tillugillusooq nakussatsin­niarlugit. (Esaja 40:31 atuaruk). Nattorallit qummut aarsaarlutik anori iluaqutigalugu qullarsartartut Israalikkut takusarpaat. Nuannerpoq eqqarsaatigalugu soorlu Jehovap timmissat taakku nukissaqar­tittarsimagai, aamma kiffani nukissaqar­tissinnaavai! Illit timmiaq angisooq suluni atorpiarnagit qullarsariartortoq takugaangakku eqqaamajuk ajornar­torsiutivit iliuuseqarfiginis­saannut Jehovap nukissaqar­tissinnaagaatit.

8. Guutip pinngortitai Juubip eqqarsaatigigamigit suna ilikkarpaa, uagullu qanoq ilikkagaqarsin­naavugut?

⁸ Jehova tatiginarluinnarpoq. Jehovap imminik tatigin­ninneruler­nissaanik Juubi ikiorsimavaa. (Job 32:2; 40:6-8) Juubi oqaloqatigigamiuk pinngortitani assigiin­ngitsut eqqartorpai, soorlu ullorissat, nuissat innaallan­nerillu. Aamma uumasut, soorlu ussik nujuartaq hiistilu, eqqartorpai. (Job 38:32-35; 39:9, 19, 20) Taakku tamarmik Guutip pissaaneqangaar­neranut, asannin­neranut aamma ilisimas­susianut uppernarsaataapput. Oqaloqatigiinneq tamanna iluaqutigalugu Juubip Jehova aatsaat taama tatigilertigaa. (Job 42:1-6) Taamatuttaaq uagut pinngortitaq qimerlooraangatsigu paasisarparput Jehova uagutsinniit ilisimas­suseqar­nerungaarlunilu pissaaneqar­nerusoq. Misilin­neqaatigullu tamaasa iliuuseqarfigisinnaavai atuukkun­naarsis­sallugillu. Tamanna ilisimagatsigu Jehovamik tatigin­ninnerulersin­naavugut.

9-10. Seqineq sialuillu eqqarsaatigalugit Jehova ilikkagaqarfigaarput?

⁹ Jiisusi pinngortitaq pillugu ilisimasaqangaarpoq. Ataatami sunik tamanik pinngor­titsinerani ‘tatigisaatut sanianiippoq’ suleqataalluni. (Uss 8:30) Jiisusip nunamiik­kallarami pinngortitaq iluaqutigalugu Ataatani pillugu ilinniartitani ilinniartippai. Ilinniar­titsissutaasa ilaat eqqarsaatigeriakkit.

¹⁰ Jehovap kikkut tamaasa asannit­tuliorfigisarpai. Jiisusip qaqqami oqalugiar­nermini pinngortitami nalinginnaasut marluk ilinniar­titaminut eqqartorpai – tassa seqineq sialuillu. Taakku tamarmik inuunermut pingaaruteqarluinnarput. Jehovap kiffarin­ngisaminut seqinermik nuisitsin­nginnissani siallersitsin­nginnissanilu aalajangersin­naagaluarpaa. Asannillunili kikkut tamaasa seqineq sialuillu atorlugit ajunngitsuliorfigisarpai. (Mat 5:43-45) Ilinniagassaq tamanna iluaqutigalugu Jiisusip ilinniartitani paasitippai Jehovap kissaatigigaa kikkut tamaasa asannit­tuliorfigis­sagigut. Seqerngup tarrikkiar­tornera qalipaatigissoq imaluunniit  inuummaris­saataasumik siallertoq takugaangatsigit Jehovap kikkunnut tamanut asanninnera eqqarsaatigisarsin­naavarput. Maligassiaa killitsis­sutigalugu kikkunnut tamanut oqaluus­sinitsigut assingusumik asannis­suseqarsin­naavugut.

11. Timmissat isiginnaarnerat qanoq qiimmatsaatigisin­naavarput?

¹¹ Jehovap timikkut pisariaqar­titatsinnik isumagisarpaatigut. Qaqqami oqalugiar­nermini Jiisusi aamma ima oqarpoq: “Qimerloorsigit timmissat, naajartor­tussanik siaruar­terineq ajorlutillu peqqumaasivinnut ilisassaminnik katersuineq ajorput, taamaattoq Ataatassi qilammiusup nerisas­saqartittarpai.” Ilimanarpoq qaqqami tusarnaartut timmissat timmisut isigigaat Jiisusimit ima aperineqaramik: “Taakkunannga naleqar­nerunngin­nerpisi?” (Mat 6:26) Jiisusip asannilluni taama paasitip­paatigut Jehovap timikkut pisariaqar­titatsinnik isumagis­sagaatigut. (Mat 6:31, 32) Pinngor­titamit ilinniagassaq tamanna aamma nalitsinni Jehovamut kiffartortut aalajaatsut qiimmatsaatigisarpaat. Qatanngutip arnap inuusuttup Spaniami najugallip inissaarunnini nikalluutigisimavaa. Timmissalli karrinik paarnanillu pukuttut takullugit isumalluar­nerulerpoq. Ima oqarpoq: “Eqqaasin­neqarpunga Jehovap timmissat isumagisarmagit aamma uanga isumagisin­naagaanga.” Tamatuma kinguninngua qatanngut arnaq inissarsivoq.

12. Timmiaaqqat Jehova pillugu qanoq ilinniarfigisin­naavagut? (Matiusi 10:29-31)

¹² Jehovap tamatta inuttut ataasiakkaatut pingaar­tippaatigut. Jiisusip apustilini oqaluus­siartor­tinnagit inunnut akerlilersuisunut qunuleq­qunagit ikiorpai. (Matiusi 10:29-31 atuakkit). Israalimi timmiaaqqat ilisimaneqarluartut pillugit oqaluttuuppai. Jiisusip nalaani timmiaaqqat taakku nalikitsuararsuupput. Ilinniar­titanili ima oqarfigai: “Ataasiin­narluunniit nunamut nakkartoq Ataatassi arajutsineq ajorpaa.” Imalu nangilluni: “Timmiaararpas­suarnit naleqar­neruvusi.” Taamaalilluni Jiisusip ilinniartitani paasitippai Jehovap inuttut ataasiakkaatut pingaartikkai, taamaat­tumillu akerlilersor­neqarnissartik siooragisariaqan­ngikkaat. Qularnan­ngitsumik Jiisusip ilinniar­titaasa illoqarfinni nunaqarfinnilu oqaluus­sitillutik timmiaaqqat takugaangamikkit Jiisusip oqaasii eqqaasarsimassavaat. Illit timmiaaraq takugaangakku eqqaamajuk Jehovap inuttut pingaar­tikkaatit, illimmi aamma ‘timmiaararpas­suarnit naleqar­neruvutit’. Jehovamit tapersersor­neqaravit allanit akerlilersor­neqarninni annilangasariaqan­ngilatit. – Tuss 118:6.

13. Qanoq pinngortitaq ilinniarfigisin­naavarput?

¹³ Pinngortitaq aqqutigalugu Jehova pillugu allarpas­suarnik ilikkagaqarsin­naavugut. Qanoq? Siullertut, pinngortitap isiginnaarnissaa piffissaqarfigisariaqarparput. Taava Jehova pillugu qanoq ilikkagaqar­nerluta eqqarsaatigisariaqarparput. Immaqa ilaannikkut taamaalior­nissarput  sapernar­tissinnaavarput. Qatanngut arnaq, Géraldine Camerounimeersoq, ima oqarpoq: “Illoqarfissuarmi peroriartorama nalunngilara pinngortitaq maluginiar­niarlugu iliuuseqar­tariaqarlunga.” Utoqqaanertaq Alfonsomik atilik ima oqaluttuarpoq: “Paasinikuuara kisimiillunga Jehovap pinngor­titaasa maluginiar­nissaat aamma Jehova pillugu taakkua qanoq ilinniar­tinneraannga eqqarsaatigeq­qissaar­nissaat piffissaqarfigisariaqarlugit.”

14. Guutip pinngortitai eqqarsaatigeq­qissaaramigit Daavi qanoq ilikkagaqarpa?

¹⁴ Daavip Guutip pinngortitai eqqarsaatigeq­qissaartarpai. Jehovamut ima oqarpoq: “Takugaangakkit qilak pigisat, assappit pinngortitaat, qaammat ullorissallu tassani ivertitatit, taava inuk suummat eqqaasarpiuk?” (Tuss 8:4, 5) Unnukkut qilammut qiviaraangami Daavip ullorissat nuannaarutigiin­narnagit aamma eqqarsaatigisarpaa taakku Guuti pillugu ilinniarfigisin­naanerlugit. Jehovap assissaqan­nginnera pillugu ilinniarpoq. Aamma timini anaanami illiaani qanoq ineriar­torsimasoq eqqarsaatigeq­qissaartarpaa. Tupinnangaartumik pinngor­titaanini eqqarsaatigigaangamiuk Jehovap ilisimassusia qujamasuutiginerulertarpaa. – Tuss 139:14-17.

15. Pinngortitami Jehovap pissusii oqaluttuarikkit. (Tussiaat 148:7-10)

¹⁵ Daavi ilaarlugu pinngor­titamiittut eqqarsaatigeq­qissaar­nissaat ajornan­ngitsuararsuuvoq. Sumulluunniit qiviariaruit Jehovap pissusii amerlasuut pillugit ilikkagaqarsin­naavutit. Assersuutigalugu seqerngup kissarnera malugigaangakku Jehovap pissaanera eqqarsaatigisarsinnaavat. (Jer 31:35) Timmiaq ulluliortoq takugaangakku Guutip ilisimassusia eqqarsaatigisarsinnaavat. Qimmiaqqap pamiuni kiiniarsarigaa takugaangakku Jehovap quiasaarnermik nuannarin­ninnera eqqarsaatigisaruk. Aamma anaanaasup meeqqani pinnguaqatigigaa takugaangakku Jehovap asanninnera qujamasuutigisaruk. Jehovap pinngor­titaasa tamarmik – angisuut mikisullu, qanittumiittut ungasis­sumiittullu – Jehova unnersiutigisarmassuk Jehova pillugu ilinniar­nissatsinnik periarfis­sarpassuaqarpugut. – Tussiaat 148:7-10 atuakkit.

16. Qanoq iliortariaqarpugut?

¹⁶ Guuterput ilisimas­suseqangaarlunilu asaninngaarlunilu pissaaneqangaarpoq, pinngor­titaalu tamarmik kusanarluinnarput. Jehovap pinngortitai maluginiar­tarutsigit Jehovap pissusii pillugit ilikkagaqangaarsin­naavugut. Taamaattumik pinngor­titaasa nuannaarutiginissaat aamma Jehova pillugu qanoq ilikkagaqarsin­naanerluta eqqarsaatigisar­nissaat piffissaqarfigisariaqarpagut. Taamaaliorutta Pinngor­titsisitsinnut qanillisin­naavugut. (Jaak 4:8) Angajoqqaat pinngortitaq iluaqutigalugu meeqqatik Jehovamut qanillinis­saannut qanoq ikiorsin­naagaat allaaserisap tulliani sammissavarput.