1. Jobe wadilongo kyavulu yalungu ni Jihova bhukaxi ihi?

 KU MWENYU wê, Jobe wa dizwelesele kyá ni athu avulu, maji o kithangana kya zuwela ni Jihova, kyene kyabetele dingi kota. Mu kithangana kyenyókyo, Jihova wabhingi kwa Jobe phala kutonginina o ibhangelu. O kubhanga kiki, kyakwatekesa Jobe kudyelela dingi mu unjimu wa Jihova ni mukutena kwê kwa kulanga o jiselevende jê. Mu kifika, Jobe wadilongo kwila Jihova ulanga kyambote o yama, kyenyiki weji mulanga we kyambote. (Jobe 38:39-41; 39:1, 5, 13-16) Jobe wa dilongo yalungu ni Jihova mu kutala o ibhangelu yê.

2. Mukonda dyahi sayi ithangana kitena kubhonza kutonginina o ibhangelu ya Jihova?

² Etu we tutena kudilonga dingi kyambote yalungu ni Jihova mukutonginina o ibhangelu yê. Maji phe, sayi ithangana nange o kubhanga kiki kutena kubhonza. Se eye watungu mu mbanza yadikota, nange ki wene mumona ibhangelu yavulu ya Jihova izuwa yoso. Kumbandu yamukwá, né mwene se watungu mu kadyembu kofele, mwala ibhangelu yavulu ya Jihova, nange udivwa kwila kiwala ni kithangana kaysoko phala ku itonginina. Mu kiki phe tumone se mukonda dyahi kima kyambote kubhanga nguzu ni kukatula kithangana phala kutonginina o ibhangelu ya Jihova. Twanda mona kyebhi Jihova ni Jezú kyalongo o athu mukuta ifika yalungu ni ibhangelu, ni ihi itutena kubhanga phala kudilonga dingi ni ibhangelu yiyi.

3. Mukonda dyahi tutena kuzuwela kwila Jihova wamesenene kwila Adá usanguluka ni ibhangelu?

³ Jihova wamesenene kwila, Adá usanguluka ni ibhangelu Yê. Kyoso Jihova kyabhange Adá, Mwene wamute mu palayizu,  yu wamubhana o kikalakalu kyakulanga ni kusanzumuna o njaludim ya Edene. (Dim. 2:8, 9, 15) Xinganeka kyebhi kyadivu Adá mukumona o jimbutu kusabhuka ni itulu kubwingita. O kulanga o njaludim ya Edene kyexile ujitu wadikota phala Adá! Jihova wabhingi we kwa Adá phala kubhana majna ku yama yoso. (Dim. 2:19, 20) Jihova hinu mwene wasolo o majina phala kubhana ku yama, maji muveji dya kiki, mwene wabhana o ujitu yú kwa Adá. Sé phata ande dyakubhana o majina ku yama, Adá watonginina kyambote yu wamono o ukexilu wâ ni idifwa yâ. Adá nange wasangulukile mukubhanga o kikalakalu kiki. Sé phata, kiki kyakwatekesa Adá kutendela kwila, Jihova ngijiye yakatunda, ni kwila o ibhangelu yê yafwama.

4. (a) Kima kyahi kitubhangesa kutonginina o ibhangelu? (b) Kibhangelu kyebhi kya Jihova ki wawabhela dingi?

⁴ Kima kimoxi kitubhangesa kutonginina o ibhangelu, o kwijiya kuma Jihova wamesena kwila tubhanga kyenyiki. Mwene wambe: “Bhetulenu-phe o mesu menu bhulu, mutalese. Nanyi wa bhanga o ima yoso yiyi?” O kitambwiji kya kibhwidisu kiki, ki kibhonzo. (Iza. 40:26) Jihova wezalesa o dyulu, o ixi, ni musanza wakalunga, ni ibhangelu yê itubhangesa kudiwana, yene we itulonga ima yavulu yalungu ni mwene. (Jisá. 104:24, 25) Xinganeka ngó mu ukexilu watubhange Nzambi. Mwene watubhange ni kutena kwakutonginina o kuwabha kwa ima yala mu ngongo. Twene mutena kubhanga ngó kiki, mukonda Jihova watubhange ni kutena kwa kutala, kwivwa, kubabata, kwivwa o kutowala ni kulula, ni kwivwa o dizumba.

5. Kala kilondekesa Loma 1:20, mukonda dyahi kima kyambote kudilonga yalungu ni ihangelu ya Jihova?

⁵ O Bibidya itutangela dingi kima kyamukwa kyakatunda kyalungu ni ibhangelu. O ibhangelu itulonga yalungu ni idifwa ya Jihova. (Tanga Loma 1:20.) Mu kifika, tala kyebhi Jihova kyasokejeka o ima mu ngongo itubhangesa kudiwana. Kiki kilondekesa kwila, o Nzambi yetu mukwa unjimu. Xinganeka mu makudya avulu kadifu ala mu ngongo. Kiki kilondekesa kwila, Jihova watuzolo. Kyoso kitumona o idifwa ya Jihova bhukaxi ka ima yahange, tumwijiya dingi kyambote, kiki kitubhangesa kumuzukama dingi. Kindala twandamona kyebhi Jihova kyatulonga madisá ambote bhukaxi ka ibhangelu yê.

6. Ihi itutena kudilonga kyoso kitumona o jinjila kutunda kididi, phala kuya kididi kyengi?

⁶ Jihova waxindi o kithangana phala o ima yoso. Mivu yoso, ku disukilu dya mbeji ya Kawana  ni mukaxi ka mbeji ya Kasambwadi, o akwa Izalayele exile mumona jinyange kubhita bhulu, o jinjila jiji jexile muya kumbandu ya thunda. Jihova wambe kiki ku akwa Izalayele: ‘Katé ni nyange bhulu wejiya o kithangana kyê kyamuxindila.’(Jel. 8:7) Jihova waxindi o kithangana phala o jinjila jiji kuya kididi kyengi. Kyene we kimoxi, mwene waxindi o ‘kithangana phala o kizuwa kyê’ kya kufundisa. Kyoso kitumona o jinjila kutunda kididi, phala kuya kididi kyengi, tulembalala kwila tutena kudyelela kuma Jihova waxindi o kithangana kyê phala kubheka o dizubhilu dya mundu yu wayibha.—Haba. 2:3.

7. Kidyelelu kyahi kitutena kukala nakyu kyoso kitumona o jinjila kubhita bhulu? (Izaya 40:31)

⁷ Jihova ubhana nguzu ku jiselevende jê. Bhukaxi ka polofeta Izaya, Jihova wakanena kwila weji ‘bhana nguzu ku jiselevende jê n’atene kudileka bhulu kala jiholokoko, kyoso kya divwa kwila kala ni nguzu mba aluwala. (Tanga Izaya 40:31.) Mu ithangana yavulu, o akwa Izalayele exile mumona o joholokoko kutuka bhulu sé kuphupha kyavulu o mabhabha. Kiki kilondekesa kwila, kala kibhita ni jiholokoko Jihova ujibhana nguzu, kyene we kimoxi mwene utena kutubhana nguzu! Kyenyiki kyoso ki tumona o jinjila kubhita bhulu sé kuphupha o mabhabha, tulembalala kwila Jihova utena kutubhana nguzu phala kudibhana ni ibhidi yetu.

8. Ihi yadilongo Jobe ku ibhangelu ya Jihova? Ni ihi itutena kudilonga?

⁸ Tutena kudyelela kwa Jihova. Jihova wakwatekesa Jobe kumona kwila, mwene utena kumudyelela. (Jobe 32:2; 40:6-8) Kyoso kyazubha kuzwela ni Jobe, Jihova watumbula ima yavulu yabhange, kala o jithéthembwa, o matuta, ni jinzaji. Jihova wazwela we yalungu ni yama, kala o phakasa, ni kabalu. (Jobe 38:32-35; 39:9, 19, 20) O ima yoso yiyi yakwatekesa Jobe kumona, kana ngó o kutena kwa Nzambi, maji we o henda yê ni kwijiya kwê. Kiki kyabhangesa Jobe kudyelela dingi kwa Nzambi mu ukulu ndenge. (Jobe 42:1-6) Kyene kimoxi we n’etu, kyoso kitudilonga yalungu ni ibhangelu, tumona kwila Jihova wabeta kota mu kwijiya etu ndenge. Mwene we utena, yu wanda zubha o hadi yetu yoso. O kwijiya o kidi kiki kyanda tukwatekesa kumudyelela dingi.

9-10. O mwanya ni mvula, itulonga ihi yalungu ni Jihova?

⁹ Jezú wejidile kyambote o ibhangelu ya Jihova. O Bibidya ixana Jezú kala, ‘dixibulu dya Jihova,’ mukonda mwene wexile ni ujitu wakukalakala ni Tat’ê kyoso kyabhange o ima yoso mu ngongo. (Jisa. 8:30) Kyoso kya kexile mu ixi, Jezú walongo yalungu ni Jihova bhukaxi ka ibhangelu. Tumone bhofele o ima yalongo mwene.

¹⁰ Jihova ulondekesa o henda yê ku athu oso. Mu diskulusu dyabhange ku Mulundu, Jezú wazwela ni maxibulu mê yalungu ni ima iyadi yabhnage Jihova, o athu kene muyibhana valolo yavulu: O mwanya ni mvula. O ima iyadi yiyi, twayibhindamena kyavulu ku mwenyu wetu. Jihova hinu wejibhana ngo o ima yiyi kujiselevende jê. Maji mu hende yê, mwene ubhana o mvula ni mwanya ku athu oso. (Mat. 5:43-45) Jezú walongo o maxibulu mê bhukaxi ka ibhangelu yiyi, phala ku tukwatekesa kumona kwila Jihova wamesena kuma tulondekesa o henda ku athu oso. Kyenyiki kyoso kitumona o dikumbi dyamuboba, mba o mvula yamunoka, tutena kuxinganeka mu henda ilondekesa Jihova sé katombo. Ukexilu umoxi wakukayela o henda ya Jihova, o kubokela o athu oso.

11. Ihi itutena kudilonga mukutala o jinjila?

¹¹ Jihova utubhana o ima itwabhindamena  phala kukala ku mwenyu. Mu diskulusu dyabhange ku mulundu, Jezú wambe we: “Talesenu kyambote o jinjila ji bhita bhulu, ki jene mu kuna jimbutu, ki jene mu bhongolola, mba ku ji tula mu ididi ya kubhaka o idima, maji Tat’enu-phe wene ku dyulu u ji dikila.” Nange kyoso Jezú kyexile muzuwela, o athu exile mumona o jinjila jexile mubhita bhulu, mwene phe yu wa ebhwidisa: “Kifwa enu ki mwa betakota, o jinjila ndenge?” (Mat. 6:26) Mu ukexilu yu wa henda, Jezú watukwatekesa kumona kwila, Jihova wanda langa o ibhindamu yetu yoso. (Mat. 6:31, 32) O izwelu yiyi ya Jezú yene muswinisa hanji o jiselenvende javulu ja fiyele ja Jihova. Sayi phang’yetu ya muhatu mu ixi ya Espanha waluwalele kyavulu mukonda kexile musanga inzo yafwama phala kukalamu. Maji kyoso kyamono o jinjila kudya o jimbutu ni ibundu, wamateka kudivwa kyambote. Mwene wambe: “O kumona o jinjila jiji, kwa ngilembalesa kwila se Jihova ulanga o ibhindamu yâ, mwene wandatena we ku ngilanga.” Mukubhita kithangana, o phang’yetu watena kusanga kididi phala kukalamu.

12. Kala kilondekesa Matesu 10:29-31, ihi itutena kudilonga yalungu ni jihva bhukaxi ka tudyédye?

¹² Kala muthu mu dyetu, wala ni valolo yavulu kwa Jihova. Ande dyakutumikisa o maxibulu mê phala kuboka, Jezú wa akwatekesa kutolola o woma wa izukutisu. (Tanga Matesu 10:29-31.) Mwene wabhange kiki mukuzwela yalungu ni kanjila akejidile kyambote ku akwa Izalayele, o kadyédye. Mu izuwa ya Jezú, o tunjila tutu ki twexile ni valolo yavulu. Maji mwene watangela o maxibulu mê: “Maji kadyédye kamoxi ki ka lawuka bhoxi, sé Tat’enu ku kijiya.” Mwene wambe dingi: “Enu mwa betakota o tudyédye twavulu ndenge.” Ni izwelu yiyi, Jezú wadyelelesa o maxibulu mê kwila, Jihova ubhana valolo kala muthu mu madyâ, kyenyiki kabhingile kukala ni woma wa izukutisu. Kyoso o maxibulu kyexile mumona o tudyédye, nange kyoso kyexile muboka mu jimbanza, mba mu madyembu, sé phata exile mudilembalala o izuwelu ya Jezú. Kyene kimoxi we kyoso ki umona kanjila, lembalala kwila, eye wala ni valolo yavulu kwa Jihova mukonda, eye “wabetakota o tudyédye twavulu ndenge.” Ni kikwatekesu kya Jihova, eye utena kudibhana ni kibhidi kyosokyoso ni kidyelelu.—Jisá. 118:6.

13. Ihi itwatokala o kubhanga phala kudilonga dingi yalungu ni Jihova bhukaxi ka ibhangelu?

¹³ Etu tutena kudiloga dingi ima yavulu yamukwá, yalungu ni Jihova bhukaxi ka ibhangelu. Kyebhi? Kyadyanga, twatokala kukatula kithangana phala kutonginina o ibhangelu. Kayadi, twatokala kuxinganeka se ihi itulonga o ibhangelu yiyi yalungu ni Jihova. Maji sayi bhabha o kubhanga o ima yiyi kutena kubhonza. Sayi phange ya muhatu watokala ku ixi ya Camarões, a mwixana Géraldine, wambe: “Eme ngakudila ku mbanza yadikota,  kyenyiki phala kutonginina o ibhangelu, ngabhingi kubhanga nguzu.” Sayi kafunga a mwixana Alfonso wambe: “Ngadilongo kwila ngatokala kukatula kithangana phala kutonginina o ibhangelu ni kuxinganeka se ihi ingilonga o ibhangelu yiyi yalungu ni Jihova.”

14. Ihi yadilongo Davidi mukuxinganeka mu ibhangelu ya Jihova?

¹⁴ Mu Jisálamu 8:3, 4, Davidi wambe: “Kyoso ki ng’ila ngi talesa ku dyulu, ku ufunu wa milembu yé, ku mbeje ni jithéthembwa ji wa yudika, ng’amba, ngixi: Muthu mwene wa soko kyebhi phala eye ku mu suwa?.” Davidi wexile muxinganeka mu ibhangelu ya Jihova. Kyoso kyexile mutala kudyulu mu usuku, mwene kexile ngó mumona o jithéthembwa, maji wexile mumona we se ihi ilonga o ibhangelu yiyi yalungu ni Jihova. Mwene wadilongo kuma Jihhova muthu wonene. Davidi wexile muxinganeka we mu ukexilu wakatunda wexile mukula kyoso kyakexile mu mala a manya. O kuxinganeka mu ima yoso yiyi, sé phata kwabhangesa Davidi kudiwana kyavulu ni kwijiya kwa Jihova.—Jisá. 139:14-17.

15. Bhana phangu ya idifwa ya Jihova itutena kudilonga bhukaxi ka ibhangelu. (Jisálamu 148:7-10)

¹⁵ Kala Davidi, nange ki kitubhonzo we kusanga kima mu ibhangelu ya Jihova phala kuxinganeka. Sé phata tutena kumona o idifwa ya Jihova bhukaxi ka ibhangelu yatukondoloka. Mu kifika, tala o kutena kwa Jihova kyoso ki wivwa o kutema kwa mwanya ku mukutu wé. (Jel. 31:35) Xinganeka mu unjimu wa Jihova kyoso ki umona njila yamutunga kikalanga. Xinganeka mu ukexilu wa Jihova wa kumesena ku twolelesa, kyoso ki umona o imbwa ya musota ku kwata o mukila wê. Sakidila Jihova kyoso ki umona mama wamutonoka ni kabwetelekê. Etu twala ni ima yavulu phala kudilonga yalungu ni Jihova. Yoso yabhange mwene, kikale o ima yamakota mba yofele, yala bhwazukama mba dikanga, imuximana.—Tanga Jisálamu 148:7-10.

16. Ihi itwatokala o kubhanga?

¹⁶ O Nzambi yetu, njimu, mukwa henda, wala ni kutena, yoso ibhanga mwene ifwama. Tutena kumona o idifwa yiyi ya Jihova ni ya mukwa, kyoso kitutonginina o ibhangelu. Mu kiki, twatokala kukatula mwene kithangana phala kutonginina o ibhangelu, ni kuxinganeka se ihi itulonga yalungu ni Jihova. Mukubhanga kiki, twanda zukama dingi kwa Mubhangi wetu. (Tiy. 4:8) Mu milongi yakayela twanda mona kyebhi o jitata kyatena kukwatekesa o twana twâ bhukaxi ka ibhangelu.