တၢ်မၤလိ ၁၂
ကွၢ်ဒီးဆိမိၣ်ထံ တၢ်ဘၣ်တ့ ဒီးမၤလိအါထီၣ် ယဟိဝၤယွၤအဂ့ၢ်
“စးထီၣ်လၢ ကစၢ်ယွၤတ့လီၤ ဟီၣ်ခိၣ်လံၤလံၤန့ၣ် အတၢ်ဂ့ၤတၢ်ဝါလၢ ပထံၣ်အီၤ တသ့ဘၣ်တဖၣ်အံၤ အိၣ်ဖျါထီၣ်ဝဲ ပျီပျီလီၤ. ဒီးခီဖျိလၢ တၢ်လၢ အတ့လီၤဝဲတဖၣ်အဃိ ပနၢ်ပၢၢ်လၢ အဝဲမ့ၢ်ပှၤဒ်လဲၣ် တဂၤလဲၣ်.”—ရိမ့ၤ ၁:၂၀.
တၢ်သးဝံၣ် ၆ မူခိၣ်လီၣ်ဖျါထီၣ်ယွၤအလၤကပီၤ
တၢ်မၤလိအံၤ အတၢ်တိာ်ပာ် a
၁. စီၤယိၤဘး သ့ၣ်ညါအါထီၣ် ယဟိဝၤယွၤ အဂ့ၢ်ဒ်လဲၣ်.
ဖဲစီၤယိၤဘး အိၣ်မူအခါန့ၣ် အတဲသကီးဘၣ်တၢ်ဒီး ပှၤဂၤဒီဒူၣ်ညါ. ဘၣ်ဆၣ် အတဲသကီးဘၣ်တၢ်ဒီး ယဟိဝၤယွၤန့ၣ် ထုးန့ၢ်အသးဒိၣ်ကတၢၢ်လီၤ. ဖဲယဟိဝၤယွၤ တဲတၢ်ဒီး စီၤယိၤဘးအခါ ယဟိဝၤယွၤ မၢစီၤယိၤဘးကွၢ်ဝဲ အတၢ်ဘၣ်တ့တဖၣ်. ယဟိဝၤယွၤ မၢစီၤယိၤဘး မၤဝဲဒ်အံၤန့ၣ် ဒ်သိး အကမၤစၢၤ စီၤယိၤဘးလၢ အကနာ်ဝဲလၢ ယဟိဝၤယွၤန့ၣ် အအိၣ်ဒီးတၢ်ကူၣ်သ့ ဒီးအမၤလၢပှဲၤန့ၢ် အခ့အပှၤ တၢ်လိၣ်ဘၣ် သ့ခဲလၢာ်. အဒိ ယဟိဝၤယွၤ ဒုးသ့ၣ်နီၣ် စီၤယိၤဘးလၢ အကွၢ်ထွဲ ဒီးဒုးအီၣ်ဒုးအီ ဆၣ်ဖိကီၢ်ဖိအဃိ အကကွၢ်ထွဲအီၤနီၢ်ကီၢ်. (ယိၤဘး ၃၈:၃၉-၄၁; ၃၉:၁, ၅, ၁၃-၁၆) စီၤယိၤဘး ဆိမိၣ်ထံ တၢ်ဘၣ်တ့အဂ့ၢ် အဃိ အသ့ၣ်ညါထီၣ် ယဟိဝၤယွၤ အတၢ်ဂ့ၤတၢ်ဝါအါမး.
၂. ဘၣ်မနုၤအဃိ ပကွၢ်ဒီးဆိမိၣ်ထံ တၢ်ဘၣ်တ့အဂ့ၢ် တညီဘၣ်လဲၣ်.
၂ ပဝဲစ့ၢ်ကီး ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့အဂ့ၢ်န့ၣ် ပကသ့ၣ်ညါထီၣ် ယဟိဝၤယွၤ အဂ့ၢ်အါမး. ဘၣ်ဆၣ် တဘျီတခီၣ် ပကကွၢ်ဒီးဆိမိၣ်ထံ တၢ်ဘၣ်တ့အဂ့ၢ်န့ၣ် တညီဘၣ်. အဒိ ပမ့ၢ်အိၣ်လၢ ဝ့ၢ်ပူၤန့ၣ် ဘၣ်သ့ၣ်သ့ၣ် ပတထံၣ်ဘၣ် ယဟိဝၤယွၤ အတၢ်ဘၣ်တ့ အါအါဘၣ်. ဒီးပမ့ၢ်အိၣ်လၢ သဝီပူၤနာ်က့ ဘၣ်သ့ၣ်သ့ၣ် ပကွၢ်ဒီးဆိမိၣ်ထံ တၢ်ဘၣ်တ့အဂ့ၢ် တချုးအါအါဘၣ်. အဃိ ပကတဲသကီး ဘၣ်ဃးဒီး ပမ့ၢ်ပာ်လီၤ တၢ်ဆၢကတီၢ်လၢ ပကကွၢ်ဒီးဆိမိၣ်ထံ တၢ်ဘၣ်တ့အဂ့ၢ်န့ၣ် ဘၣ်မနုၤအဃိ အကကဲဘျုး လၢပဂီၢ်လဲၣ်. တကးဒံးဘၣ် ပကတဲသကီး ဘၣ်ဃးဒီး ယဟိဝၤယွၤ ဒီးယ့ၣ်ၡူး သူဝဲတၢ်ဘၣ်တ့ လၢအကသိၣ်လိပှၤဒ်လဲၣ်. ဒီးပကမၤလိန့ၢ်တၢ်လၢ တၢ်ဘၣ်တ့အအိၣ်အဂီၢ် ပကဘၣ်မၤဒ်လဲၣ်.
ဘၣ်မနုၤအဃိ ပဘၣ်ကွၢ်ဒီးဆိမိၣ်ထံ တၢ်ဘၣ်တ့အဂ့ၢ်လဲၣ်
ဖဲစီၤအၤဒၣ် ကွၢ်တၢ်ဘၣ်တ့အခါ ယဟိဝၤယွၤ ဘၣ်သးလၢ အကသးခု ဒီးယဟိဝၤယွၤမၢ အကီးန့ၢ် ဆၣ်ဖိကီၢ်ဖိအမံၤ (ကွၢ်လံာ်အဆၢ ၃)
၃. ဖဲစီၤအၤဒၣ် ကွၢ်တၢ်ဘၣ်တ့အခါ ယဟိဝၤယွၤ ဘၣ်သးလၢ အကသးခုန့ၣ် ပသ့ၣ်ညါဘၣ်ဒ်လဲၣ်.
၃ ဖဲစီၤအၤဒၣ် ကွၢ်တၢ်ဘၣ်တ့အခါ ယဟိဝၤယွၤ ဘၣ်သးလၢ အကသးခု. ယဟိဝၤယွၤ ဒုးအိၣ်စီၤအၤဒၣ်လၢ ကရၢၢ်ဃံလၤ လၢအမ့ၢ်ပၤရဒံစူး ဒီးအမၢစီၤအၤဒၣ် ကွၢ်ထွဲ ဒီးမၤလဲၢ်ထီၣ် ကရၢၢ်ဃံလၤအံၤ. (၁ မိၤၡ့ ၂:၈, ၉, ၁၅) ဆိမိၣ်ကွၢ် ဖဲစီၤအၤဒၣ် ထံၣ်ဘၣ်ဝဲ တၢ်ချံတၢ်သၣ်မဲထီၣ် ဒီးဖီတဖၣ် ဘိၣ်ထီၣ်ဖးထီၣ်အခါ အကသးခုဒိၣ်မး. စီၤအၤဒၣ် န့ၢ်ဘၣ်တၢ်ခွဲးတၢ်ယာ်လၢ ကကွၢ်ထွဲဝဲ ဧ့ၤဒ့ၣ်တၤသၣ်လီၢ် ဒီးယဟိဝၤယွၤ မၢစီၤအၤဒၣ် ကီးန့ၢ်ဝဲ ဆၣ်ဖိကီၢ်ဖိအမံၤ. (၁ မိၤၡ့ ၂:၁၉, ၂၀) ယဟိဝၤယွၤ မ့ၢ်ကီးန့ၢ်ဝဲ ဆၣ်ဖိကီၢ်ဖိအမံၤသ့ နာ်က့ အမၢဝဲလၢ စီၤအၤဒၣ် ကီးန့ၢ်ဝဲ ဆၣ်ဖိကီၢ်ဖိအမံၤ. အဃိ တချုးလၢ စီၤအၤဒၣ် ကီးန့ၢ်ဝဲ ဆၣ်ဖိကီၢ်ဖိအမံၤဒံးဘၣ်န့ၣ် အကကွၢ်ဒီးဆိမိၣ်ထံဝဲ ဆၣ်ဖိကီၢ်ဖိတဖၣ် အတၢ်အိၣ်ထီၣ်အိၣ်လီၤ မူာ်မူာ်နီၢ်နီၢ်. စီၤအၤဒၣ် မၤဘၣ်ဝဲဒ်အံၤအဃိ အကသးခုဖးဒိၣ်ညါ. ဒီးခီဖျိလၢ အကွၢ်ဒီးဆိမိၣ်ထံဝဲ တၢ်ဘၣ်တ့အဂ့ၢ်အဃိ အထံၣ်ဘၣ်လၢ ယဟိဝၤယွၤန့ၣ် အကူၣ်တၢ်သ့ဒိၣ်မး ဒီးအတၢ်ဘၣ်တ့တဖၣ်န့ၣ် လီၤထုးန့ၢ်သးဒီးအဂ့ၤခဲလၢာ်.
၄. (က) ဘၣ်မနုၤအဃိ ပကဘၣ် ကွၢ်ဒီးဆိမိၣ်ထံ ကစၢ်ယွၤ အတၢ်ဘၣ်တ့လဲၣ်. (ခ) ကစၢ်ယွၤ အတၢ်ဘၣ်တ့အကျါန့ၣ် နဘၣ်သူၣ်ဘၣ်သး အဒိၣ်ကတၢၢ် ဖဲလဲၣ်တခါလဲၣ်.
၄ ယဟိဝၤယွၤ ဘၣ်သးဝဲလၢ ပကကွၢ်ဒီးဆိမိၣ်ထံ အတၢ်ဘၣ်တ့တဖၣ်. အဃိ အတဲပှၤလၢ “ကျ့ၣ်ထီၣ်သုမဲာ်လၢ မူခိၣ် ဒီးကွၢ်.” ဒီးအဆဲးတဲဝဲလၢ “မတဂၤတ့လီၤ ဆၣ်တဖၣ်အံၤလဲၣ်.” ပသ့ၣ်ညါလၢ ပှၤလၢအတ့လီၤ ဆၣ်တဖၣ်အံၤန့ၣ် ကဲဝဲယဟိဝၤယွၤ. (ယၡါယၤ ၄၀:၂၆) ပမ့ၢ်ကွၢ်ဒီးဆိမိၣ်ထံ ယဟိဝၤယွၤ အတၢ်ဘၣ်တ့ လၢမူခိၣ်, လၢဟီၣ်ခိၣ် ဒီးလၢပီၣ်လဲၣ်ပူၤန့ၣ် ပကသ့ၣ်ညါအါထီၣ် ယဟိဝၤယွၤအဂ့ၢ်. (စံးထီၣ်ပတြၢၤ ၁၀၄:၂၄, ၂၅) ယဟိဝၤယွၤ တ့လီၤပှၤဒ်သိး ပကသးခုအဃိ ပမ့ၢ်ထံၣ်ဘၣ် တၢ်ဘၣ်တ့ဃံလၤန့ၣ် ပသးခု. ဖဲယဟိဝၤယွၤ တ့လီၤပှၤအခါ အဟ့ၣ်ပှၤ တၢ်သ့တၢ်ဘၣ်လၢ ပကထံၣ်တၢ်, နၢ်ဟူတၢ်, ထိးဘၣ်တၢ်, နၢဘၣ်တၢ် ဒီးလ့ၣ်ကွၢ် တၢ်အီၣ်အဝံၣ်အဘဲ. တၢ်သ့တၢ်ဘၣ်တဖၣ်အံၤ မၤစၢၤပှၤဒ်သိး ပကသးခုလၢ ယဟိဝၤယွၤ အတၢ်ဘၣ်တ့ ကီးမံၤဒဲး.
၅. ဒ်ရိမ့ၤ ၁:၂၀ ပာ်ဖျါထီၣ်ဝဲအသိး ပမ့ၢ်မၤလိ ကစၢ်ယွၤ အတၢ်ဘၣ်တ့အဂ့ၢ်န့ၣ် ကမၤစၢၤပှၤ ဒ်လဲၣ်.
၅ လံာ်စီဆှံ ပာ်ဖျါထီၣ်ဝဲလၢ ပမ့ၢ်မၤလိ တၢ်ဘၣ်တ့အဂ့ၢ်န့ၣ် ပကသ့ၣ်ညါအါထီၣ် ယဟိဝၤယွၤ အတၢ်ဂ့ၤတၢ်ဝါ. (ဖး ရိမ့ၤ ၁:၂၀.) အဒိ ပမ့ၢ်ကွၢ် ကစၢ်ယွၤ အတၢ်ဘၣ်တ့န့ၣ် ပထံၣ်ဘၣ်လၢ ကစၢ်ယွၤ တ့လီၤတၢ် လီၤဆီဂ့ၤမး ဒီးပသ့ၣ်ညါဘၣ်လၢ ကစၢ်ယွၤန့ၣ် အအိၣ်ဒီးတၢ်ကူၣ်သ့အါမး. ကစၢ်ယွၤ တ့လီၤဝဲ တၢ်အီၣ်တၢ်အီ အကလုာ်ကလုာ် ဒ်သိးကမၤသးခု ပှၤဟီၣ်ခိၣ်ဖိအသး အဃိ ပသ့ၣ်ညါဘၣ်လၢ ကစၢ်ယွၤ အဲၣ်ပှၤဟီၣ်ခိၣ်ဖိဒိၣ်မး. တၢ်ဘၣ်တ့လၢ ပထံၣ်ဘၣ်တဖၣ်အံၤ မၤစၢၤပှၤလၢ ပကသ့ၣ်ညါအါထီၣ် ယဟိဝၤယွၤ အတၢ်ဂ့ၤတၢ်ဝါ ဒီးမၤစၢၤပှၤလၢ ပကအဲၣ်အီၤဒိၣ်ထီၣ်. ခီဖျိလၢ ပသ့ၣ်ညါ ယဟိဝၤယွၤအဂ့ၢ် အါထီၣ်အဃိ ပတၢ်ရ့လိာ်သးဒီးအီၤ ဂ့ၤဒိၣ်ထီၣ်. ခဲအံၤန့ၣ် ပကတဲသကီး တၢ်ဘၣ်တ့တနီၤ လၢယဟိဝၤယွၤသူဝဲ ဒ်သိးအကသိၣ်လိပှၤ တၢ်ဂ့ၢ်လၢအရ့ဒိၣ်.
ယဟိဝၤယွၤသူဝဲ အတၢ်ဘၣ်တ့လၢ ကသိၣ်လိပှၤ ဘၣ်ဃးဒီးအဂ့ၢ်
၆. ထိၣ်တဖၣ် သုးလီၢ်သုးကျဲအဂ့ၢ်န့ၣ် ပမၤလိန့ၢ်ဘၣ်မနုၤလဲၣ်.
၆ ယဟိဝၤယွၤ ပာ်ပနီၣ် တၢ်ဆၢကတီၢ်လၢ အကမၤတၢ်အဂီၢ်. ကစၢ်ယွၤ တဲဘၣ် ပှၤအံၣ်စရ့လးဖိလၢ “ထိၣ်ထီကိာ်တဖၣ်ဒၣ်လဲာ် သ့ၣ်ညါ တၢ်ဆၢကတီၢ်လၢ အကဘၣ် သုးလီၢ်သုးကျဲ.” (ယံးရမံယၤ ၈:၇) အဃိ ကိးနံၣ်ဒဲး ဖဲလါဖ့ၤဘြူၤအါရံၤ ဘူးကလၢာ် တုၤလၢ လါမ့ၤလီၤတဝာ်န့ၣ် ပှၤအံၣ်စရ့လးဖိ ထံၣ်ဘၣ်ဝဲ ထိၣ်ထီကိာ်တဖၣ် က့ၤယူၤလၢ ကလံၤစိးတခီ. ပမၤလိဘၣ်လၢ ဒ်သိးယဟိဝၤယွၤ ပာ်ပနီၣ် တၢ်ဆၢကတီၢ်လၢ ထိၣ်ထီကိာ်အဂီၢ်န့ၣ် ယဟိဝၤယွၤ ပာ်ပနီၣ် တၢ်ဆၢကတီၢ်လၢ အကစံၣ်ညီၣ်တၢ် အဂီၢ်စ့ၢ်ကီး. ပဝဲစ့ၢ်ကီး ပမ့ၢ်ကွၢ်ဒီးဆိမိၣ်ထံ တၢ်ဆၢကတီၢ်လၢ ထိၣ်တဖၣ် သုးလီၢ်သုးကျဲန့ၣ် ကမၤစၢၤပှၤဒ်သိး ပကနီၣ်ဘၣ်က့ၤလၢ ယဟိဝၤယွၤ ဃုထၢပာ် “တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ” လၢအကမၤဟးဂီၤ တၢ်အၢတၢ်သီလၢ ဟီၣ်ခိၣ်ချၢန့ၣ်ဝံၤလံ.—ဃဘးကူာ် ၂:၃.
၇. ဘၣ်ဃးဒီး ထိၣ်ယူၤလၢတၢ်ဖးဖီအဂ့ၢ်န့ၣ် ပန့ၢ်ဘၣ်တၢ်မၤလိဒ်လဲၣ်. (ယၡါယၤ ၄၀:၃၁)
၇ ယဟိဝၤယွၤ ကဟ့ၣ်အခ့အပှၤ တၢ်ဂံၢ်တၢ်ဘါ. ဝံယၡါယၤ တဲဝဲလၢ ဖဲယဟိဝၤယွၤ အခ့အပှၤ အသးဂံၢ်ဘါလီၤစၢ်အခါ ယဟိဝၤယွၤ အၢၣ်လီၤအဝဲသ့ၣ်လၢ အကဟ့ၣ်အဝဲသ့ၣ် တၢ်ဂံၢ်တၢ်ဘါ ဒ်သိး အဝဲသ့ၣ်က “ယူၤထီၣ်ဖးထီ လီၤဂာ်ဒ်သိးဒီး အအိၣ်ဒီး လံာ်ကြီကြာ်အဒံး.” (ဖး ယၡါယၤ ၄၀:၃၁.) ပှၤအံၣ်စရ့လးဖိတဖၣ် ထံၣ်ဘၣ်ဝဲလၢ လံာ်ကြီကြာ်တဖၣ် ယူၤလၢတၢ်ဖးဖီ မၢ်မၢ်လီၤ. လံာ်ကြီကြာ်တဖၣ်အံၤ ယူၤလၢကလံၤကျိၤအဃိ အတလိၣ်မၤဟူးအဒံး အါအါဘၣ်. ပထံၣ်ဘၣ်လၢ ဒ်ယဟိဝၤယွၤ ဟ့ၣ်ထိၣ်တဖၣ်အံၤ တၢ်ဂံၢ်တၢ်ဘါအသိး အကဟ့ၣ်ပှၤ တၢ်ဂံၢ်တၢ်ဘါနီၢ်ကီၢ်. အဃိ ဖဲနထံၣ် ထိၣ်ယူၤလၢတၢ်ဖးဖီအခါ သ့ၣ်နီၣ်လၢ နၤစ့ၢ်ကီး ဒ်သိးနလဲၤခီဖျိ နတၢ်ကီတၢ်ခဲ ကန့ၢ်အဂီၢ် ယဟိဝၤယွၤ ကဟ့ၣ်နၤတၢ်ဂံၢ်တၢ်ဘါ.
၈. စီၤယိၤဘး ကွၢ်ဒီးဆိမိၣ်ထံ တၢ်ဘၣ်တ့အဂ့ၢ်အဃိ မၤစၢၤအီၤဒ်လဲၣ် ဒီးပန့ၢ်ဘၣ် တၢ်မၤလိဒ်လဲၣ်.
၈ ပနာ်န့ၢ် ယဟိဝၤယွၤ သ့နီၢ်ကီၢ်. ယဟိဝၤယွၤ မၤစၢၤစီၤယိၤဘး ဒ်သိး အတၢ်နာ်န့ၢ်အီၤ ကအါထီၣ်. (ယိၤဘး ၃၂:၂; ၄၀:၆-၈) ဖဲယဟိဝၤယွၤ တဲတၢ်ဒီး စီၤယိၤဘးအခါ အတဲ ဘၣ်ဃးဒီး အတၢ်ဘၣ်တ့အဂ့ၢ်ဒီဒူၣ် ဒ်သိးဒီး ဆၣ်, တၢ်အၢၣ် ဒီးလီဝၢ်ဒံး. ဒီးယဟိဝၤယွၤ တဲဘၣ်ဃးဒီး ဆၣ်ဖိကီၢ်ဖိအဂ့ၢ် ဒ်သိးဒီး ကျီၢ်ဖါမံၤ ဒီးကသ့ၣ်. (ယိၤဘး ၃၈:၃၂-၃၅; ၃၉:၉, ၁၉, ၂၀) ယဟိဝၤယွၤ အတၢ်ဘၣ်တ့တဖၣ်အံၤ ပာ်ဖျါထီၣ်ဝဲ အတၢ်စိတၢ်ကမီၤ, အတၢ်အဲၣ် ဒီးအတၢ်ကူၣ်သ့အဂ့ၢ်. ခီဖျိလၢ ယဟိဝၤယွၤ တဲဘၣ်စီၤယိၤဘးလၢ အတၢ်ဘၣ်တ့အဂ့ၢ်အဃိ စီၤယိၤဘး နာ်န့ၢ်အီၤအါန့ၢ်ဒံးလၢညါ. (ယိၤဘး ၄၂:၁-၆) ပဝဲစ့ၢ်ကီး ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့အဂ့ၢ်န့ၣ် ပကသ့ၣ်ညါဘၣ်လၢ ယဟိဝၤယွၤန့ၣ် အတၢ်စိတၢ်ကမီၤ အိၣ်အါမး ဒီးအကူၣ်တၢ်သ့ဒိၣ်ကတၢၢ်. တကးဒံးဘၣ် ပတၢ်ကီတၢ်ခဲတဖၣ်န့ၣ် အမၤလီၤမၢ်ကွံာ်ဝဲသ့ ဒီးအကမၤဝဲနီၢ်ကီၢ်. ပသ့ၣ်ညါဘၣ်ဒ်အံၤအဃိ မၤစၢၤပှၤလၢ ပကနာ်န့ၢ်အါထီၣ် ယဟိဝၤယွၤ.
ယ့ၣ်ၡူးသူဝဲ တၢ်ဘၣ်တ့လၢ ကသိၣ်လိပှၤ ဘၣ်ဃးဒီးအပါအဂ့ၢ်
၉-၁၀. မုၢ်အတၢ်ကပီၤ ဒီးတၢ်စူၤထံန့ၣ် သိၣ်လိပှၤ ဘၣ်ဃးဒီး ယဟိဝၤယွၤ အဂ့ၢ်ဒ်လဲၣ်.
၉ ယ့ၣ်ၡူး သ့ၣ်ညါဝဲ တၢ်ဘၣ်တ့အဂ့ၢ် လီၤတံၢ်လီၤဆဲး. ဖဲယဟိဝၤယွၤ တ့လီၤ မူခိၣ်ဟီၣ်ခိၣ်အခါ ယ့ၣ်ၡူးမၤသကီးတၢ်ဒီးအီၤ ဒီးယ့ၣ်ၡူးကဲဝဲ “ပှၤမၤတၢ်သ့ဂ့ၤဂ့ၤတဂၤ.” (ကတိၤဒိ ၈:၃၀) လၢခံ ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အသူဝဲ တၢ်ဘၣ်တ့လၢ ကသိၣ်လိအပျဲၢ်အဘီၣ် ဘၣ်ဃးဒီး အပါအဂ့ၢ်. ပကတဲသကီး တၢ်ဘၣ်တ့အဂ့ၢ်တနီၤ လၢယ့ၣ်ၡူးသိၣ်လိဝဲ.
၁၀ ယဟိဝၤယွၤ အဲၣ်ပှၤကီးဂၤဒဲး. ဖဲယ့ၣ်ၡူး စံၣ်တဲၤတဲလီၤတၢ်လၢ ကစၢၢ်ဒီခိၣ်အခါ အသိၣ်လိ အပျဲၢ်အဘီၣ် ဘၣ်ဃးဒီး တၢ်ဂ့ၢ်ယိယိဖိ ဒ်သိးဒီး မုၢ်အတၢ်ကပီၤ ဒီးတၢ်စူၤထံအဂ့ၢ်လၢ ပှၤတဆိမိၣ်ထံဝဲ အါအါဘၣ်. နီၢ်ကီၢ်န့ၣ် တၢ်ဘၣ်တ့ခံခါအံၤ အရ့ဒိၣ်လၢ ပကမူအဂီၢ်. ဒီးယဟိဝၤယွၤ မ့ၢ်ဟ့ၣ် မုၢ်အတၢ်ကပီၤ ဒီးတၢ်စူၤထံ ထဲလၢ ပှၤလၢအဘူၣ်ထီၣ်ဘါထီၣ်အီၤန့ၣ်သ့. ဘၣ်ဆၣ် ခီဖျိလၢ အအဲၣ် ပှၤကီးဂၤဒဲးအဃိ အဟ့ၣ်ဝဲ ပှၤကီးဂၤဒဲး. (မးသဲ ၅:၄၃-၄၅) ယ့ၣ်ၡူးသူဝဲ တၢ်ဘၣ်တ့အဂ့ၢ်အံၤ ဒ်သိး ကသိၣ်လိ အပျဲၢ်အဘီၣ်လၢ ယဟိဝၤယွၤ ဘၣ်သးလၢ ပကအဲၣ်ပှၤကီးဂၤဒဲး. ပမ့ၢ်ထံၣ်ဘၣ် မုၢ်လီၤနုာ် ဃံဃံလၤလၤ ဒီးထံၣ်ဘၣ် တၢ်စူၤထံ မၤကဆှီထီၣ် သ့ၣ်ဖိဝၣ်ဖိ တဘျီဂ့ၤတဘျီဂ့ၤန့ၣ် ပကဘၣ် နီၣ်ဘၣ်လၢ ယဟိဝၤယွၤ အဲၣ်ပှၤကီးဂၤဒဲး. ဒီးပကွၢ်လိ ယဟိဝၤယွၤ သ့ခီဖျိ ပစံၣ်တဲၤတဲလီၤ ပှၤကီးဂၤဒဲး.
၁၁. ပမ့ၢ်ကွၢ်ဒီးဆိမိၣ်ထံ ထိၣ်တဖၣ်အဂ့ၢ်န့ၣ် ကမၤစၢၤပှၤဒ်လဲၣ်.
၁၁ ယဟိဝၤယွၤဟ့ၣ်ပှၤ တၢ်လၢပလိၣ်ဘၣ် လၢပတၢ်အိၣ်မူပူၤ. ဖဲယ့ၣ်ၡူး စံၣ်တဲၤတဲလီၤတၢ်လၢ ကစၢၢ်ခိၣ်အခါ အတဲစ့ၢ်ကီးဝဲလၢ “ကွၢ်ထိၣ်လၢ တၢ်ဖးဖီတဖၣ်န့ၣ် ထံထံဆးဆးတက့ၢ်. ထိၣ်တဖၣ်န့ၣ် တဖှံတၢ်ချံ ဒီးတကူးတၢ် ဒီးတပာ်ဖှိၣ်တၢ်လၢ ဘုဖီပူၤဘၣ်. ဘၣ်ဆၣ် သုပၢ်အိၣ်လၢ မူခိၣ်န့ၣ် ဒုးအီၣ်ဒုးအီ အဝဲသ့ၣ်.” ဒီးဘၣ်သ့ၣ်သ့ၣ် ပှၤလၢအကနၣ် ယ့ၣ်ၡူးအတၢ်စံၣ်တဲၤတဲလီၤန့ၣ် ကထံၣ်ဘၣ်ဝဲ ထိၣ်တဖၣ် ယူၤဝ့ၤဝီၤအဃိ ယ့ၣ်ၡူး တဲအဝဲသ့ၣ်လၢ “သုဝဲသ့ၣ်အံၤ သုလုၢ်ဒိၣ်ပှ့ၤဒိၣ်န့ၢ်ဒံး ထိၣ်တဖၣ်အံၤ တမ့ၢ်ဧီၤ.” (မးသဲ ၆:၂၆) ယ့ၣ်ၡူး အတၢ်သိၣ်လိအံၤ ဒုးသ့ၣ်ညါပှၤလၢ ယဟိဝၤယွၤ ကကွၢ်ထွဲပှၤ ဒီးအကဟ့ၣ်ပှၤ တၢ်လၢပလိၣ်ဘၣ်နီၢ်ကီၢ်. (မးသဲ ၆:၃၁, ၃၂) ဒီးယ့ၣ်ၡူး အတၢ်သိၣ်လိအံၤ မၤဆူၣ်ထီၣ်ဝဲ ယဟိဝၤယွၤအခ့အပှၤ လၢအသးတီတဖၣ် အတၢ်နာ် တုၤလၢခဲအံၤဒံး. အဒိ ဒီပုၢ်ဝဲၢ်မုၣ်လၢ အမၤပှၤလဲၤလၢညါ ဒီးအအိၣ်လၢစပ့ၣ်ကီၢ်န့ၣ် အသးလီၤစၢ် ခီဖျိလၢ အဃုတၢ်လီၢ် လၢအကအိၣ်ဝဲအဂီၢ် တဘၣ်ဘၣ်. ဘၣ်ဆၣ် ဖဲအထံၣ်ဘၣ်ဝဲလၢ ထိၣ်တဖၣ် ဃုအီၣ်ဝဲ တၢ်ချံတၢ်သၣ်အခါ အသးမုာ်ထီၣ်က့ၤ. ဒီပုၢ်ဝဲၢ်မုၣ်အံၤ တဲဝဲလၢ “ဖဲယကွၢ် ထိၣ်တဖၣ်အံၤအခါ ယနီၣ်ဘၣ်လၢ ယဟိဝၤယွၤ ဒုးအီၣ်ဒုးအီ အဝဲသ့ၣ် အဃိ ယနာ်လၢ ယဟိဝၤယွၤ ကကွၢ်ထွဲယၤ ဒီးကဟ့ၣ်ယၤ တၢ်လၢယလိၣ်ဘၣ်.” လၢခံတယံာ်ဘၣ်န့ၣ် ဒီပုၢ်ဝဲၢ်မုၣ်အံၤ အဃုအိၣ်ဟံၣ်ဘၣ်.
၁၂. ထိၣ်ဖှံးဖိအဂ့ၢ်လၢ ပဖးဘၣ်ဖဲ မးသဲ ၁၀:၂၉-၃၁ န့ၣ်သိၣ်လိပှၤ ယဟိဝၤယွၤ အဂ့ၢ်ဒ်လဲၣ်.
၁၂ ယဟိဝၤယွၤ ပာ်လုၢ်ပာ်ပှ့ၤ ပဝဲတဂၤဘၣ်တဂၤ. တချုးယ့ၣ်ၡူး မၢအပျဲၢ်အဘီၣ် လဲၤစံၣ်တဲၤတဲလီၤတၢ်ဒံးဘၣ်န့ၣ် ယ့ၣ်ၡူး မၤစၢၤအဝဲသ့ၣ် ဒ်သိး အဝဲသ့ၣ်တပျံၤ ပှၤလၢအထီဒါ အဝဲသ့ၣ်တဂ့ၤ. (ဖး မးသဲ ၁၀:၂၉-၃၁.) ယ့ၣ်ၡူး တဲပၠးအဝဲသ့ၣ် ဘၣ်ဃးဒီး ထိၣ်ဖှံးဖိအဂ့ၢ်. လၢအံၣ်စရ့လး အကီၢ်န့ၣ် ထိၣ်တကလုာ်အံၤ အိၣ်အါမး. ဒီးဖဲယ့ၣ်ၡူးအစိၤန့ၣ် ထိၣ်တကလုာ်အံၤ အပှ့ၤဘၣ်ဘၣ်ဖိလီၤ. ဘၣ်ဆၣ် ယ့ၣ်ၡူး တဲဘၣ်အပျဲၢ်အဘီၣ်လၢ “ထိၣ်ဖှံးဖိတဘ့ၣ်ဒၣ်လဲာ် မ့ၢ်လီၤတဲာ်လၢ ဟီၣ်ခိၣ်လိၤန့ၣ် သုပၢ်သ့ၣ်ညါဝဲ.” ဝံၤဒီး ယ့ၣ်ၡူး ဆဲးတဲဝဲလၢ “သုလုၢ်သုပှ့ၤဒိၣ်န့ၢ်ဒံး ထိၣ်ဖှံးဖိအါဘ့ၣ်.” ဖဲအံၤပထံၣ်ဘၣ်လၢ ယ့ၣ်ၡူး မၤစၢၤ အပျဲၢ်အဘီၣ်တဖၣ် ဒ်သိးအဝဲသ့ၣ် တလိၣ်ပျံၤလၢ ပှၤကမၤအၢမၤနး အဝဲသ့ၣ်ဘၣ် ဒီးကနာ်ဝဲလၢ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ် တဂၤဘၣ်တဂၤ. အဃိ ဖဲအဝဲသ့ၣ် လဲၤစံၣ်တဲၤတဲလီၤတၢ်လၢ ဝ့ၢ်ပူၤဒီးသဝီပူၤ ဒီးဖဲအဝဲသ့ၣ်ထံၣ်ဘၣ် ထိၣ်ဖှံးဖိတဖၣ်အခါ အဝဲသ့ၣ် ကနီၣ်ဘၣ်က့ၤ ယ့ၣ်ၡူးအတၢ်ကတိၤ. နၤစ့ၢ်ကီး ဖဲနထံၣ်ဘၣ် ထိၣ်ဆံးဆံးဖိအခါ သ့ၣ်နီၣ်ထီၣ်လၢ ယဟိဝၤယွၤ ပာ်လုၢ်ပာ်ပှ့ၤနၤ ဒီး ‘နလုၢ်နပှ့ၤဒိၣ်န့ၢ်ဒံး ထိၣ်ဖှံးဖိအါဘ့ၣ်.’ အဃိ ပှၤမ့ၢ်ထီဒါနၤနာ်က့ နတလိၣ်ပျံၤတၢ်ဘၣ်. ယဟိဝၤယွၤ ကမၤစၢၤနၤ သပှၢ်တၢၢ်.—စံးထီၣ်ပတြၢၤ ၁၁၈:၆.
မၤလိအါထီၣ် ယဟိဝၤယွၤအဂ့ၢ် လၢအတၢ်ဘၣ်တ့
၁၃. ပမၤလိအါထီၣ် ယဟိဝၤယွၤအဂ့ၢ်လၢ အတၢ်ဘၣ်တ့အအိၣ် ကသ့ဒ်လဲၣ်.
၁၃ ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့အဂ့ၢ်န့ၣ် ပမၤလိအါထီၣ် ယဟိဝၤယွၤအဂ့ၢ် သ့ဒီဒူၣ်. အဆိကတၢၢ်န့ၣ် ပကဘၣ် ပာ်လီၤတၢ်ဆၢကတီၢ်လၢ ပကဃုသ့ၣ်ညါ ကစၢ်ယွၤ အတၢ်ဘၣ်တ့အဂ့ၢ်. ဝံၤဒီး ပကဘၣ် ဆိမိၣ်ထံလၢ တၢ်ဘၣ်တ့တဖၣ်အံၤ သိၣ်လိပှၤ ယဟိဝၤယွၤအဂ့ၢ်ဒ်လဲၣ်. သနာ်က့ ပကမၤဒ်န့ၣ်န့ၣ် တဘျီတခီၣ် တညီဘၣ်. အဒိ ဒီပုၢ်ဝဲၢ်မုၣ် ကၠၢၤရဲဒံၤနံၤန့ၣ် အအိၣ်လၢ ကီၢ်ခဲမရူ ဒီးအတဲဝဲလၢ “ယဒိၣ်ထီၣ်ဘၣ်လၢ ဝ့ၢ်ပူၤအဃိ ယကပာ်လီၤတၢ်ဆၢကတီၢ်လၢ ယကကွၢ်ဒီးဆိမိၣ်ထံ ကစၢ်ယွၤ အတၢ်ဘၣ်တ့အဂီၢ်န့ၣ် ယဘၣ်ကျဲးစၢးသပှၢ်.” ဒီပုၢ်ဝဲၢ်ခွါ အီၤဖါစိၤ လၢအကဲ တၢ်အိၣ်ဖှိၣ်သးပှၢ်န့ၣ် အတဲဝဲလၢ “ဒ်သိး ယကကွၢ် ယဟိဝၤယွၤ အတၢ်ဘၣ်တ့ ဒီးဆိမိၣ်ထံလၢ တၢ်ဘၣ်တ့တဖၣ်အံၤ သိၣ်လိယၤ ယဟိဝၤယွၤ အဂ့ၢ်ဒ်လဲၣ်အဂီၢ် ယသ့ၣ်ညါဘၣ်လၢ ယကဘၣ်ပာ်လီၤတၢ်ဆၢကတီၢ် မူာ်မူာ်နီၢ်နီၢ်.”
ဖဲစီၤဒၤဝံး ကွၢ်ဝဲ တၢ်ဘၣ်တ့လၢ အခိၣ်အဃၢၤအခါ အဆိမိၣ်ထံဝဲလၢ တၢ်ဘၣ်တ့တဖၣ်အံၤ သိၣ်လိအီၤ ယဟိဝၤယွၤ အဂ့ၢ်ဒ်လဲၣ် (ကွၢ်လံာ်အဆၢ ၁၄)
၁၄. စီၤဒၤဝံး ဆိမိၣ်ထံ ယဟိဝၤယွၤ အတၢ်ဘၣ်တ့အဂ့ၢ်အဃိ အသ့ၣ်ညါအါထီၣ် မနုၤလဲၣ်.
၁၄ စီၤဒၤဝံးန့ၣ် အဆိမိၣ်ထံဝဲ ကစၢ်ယွၤ အတၢ်ဘၣ်တ့အဂ့ၢ် မူာ်မူာ်နီၢ်နီၢ်. စီၤဒၤဝံး တဲဘၣ် ယဟိဝၤယွၤလၢ “ဖဲယကွၢ်ထီၣ်မူခိၣ် လၢနတ့လီၤအီၤ ဒီးလါဒီးဆၣ်တဖၣ်လၢ အမ့ၢ်နစု အတၢ်ဘၣ်တ့တဖၣ်အခါ ယဆိကမိၣ်ထီၣ်လၢ ပှၤဟီၣ်ခိၣ်ဖိ မ့ၢ်တၢ်မနုၤလၢ နကသ့ၣ်နီၣ်အီၤလဲၣ်.” (စံးထီၣ်ပတြၢၤ ၈:၃, ၄) လၢမုၢ်နၤခီ ဖဲစီၤဒၤဝံး ကွၢ်ထီၣ်ဆၣ်တဖၣ်အခါ အထံၣ်ဘၣ်လၢ တၢ်ဘၣ်တ့လၢမူခိၣ်န့ၣ် လီၤကမၢကမၣ်ဒိၣ်မး. တကးဒံးဘၣ် အဆိမိၣ်ထံ ဆၣ်တဖၣ်အဂ့ၢ် ဒီး ဆိမိၣ်ထံဝဲလၢ ဆၣ်တဖၣ်အံၤ သိၣ်လိအီၤ ယဟိဝၤယွၤအဂ့ၢ်. အဃိ အသ့ၣ်ညါဘၣ်လၢ ယဟိဝၤယွၤန့ၣ် အစိကမီၤဒိၣ်မး. စီၤဒၤဝံး ဆိမိၣ်ထံစ့ၢ်ကီး ဘၣ်ဃးဒီး ယဟိဝၤယွၤ တ့လီၤအီၤအဂ့ၢ် ဖဲအဒိၣ်ထီၣ်လၢ အမိဒၢလီၢ်ပူၤအခါ. စီၤဒၤဝံး ဆိမိၣ်ထံ ယဟိဝၤယွၤ အတၢ်ဘၣ်တ့အဂ့ၢ် အဃိ အသ့ၣ်ညါဘၣ်လၢ ယဟိဝၤယွၤန့ၣ် အကူၣ်တၢ်သ့ဒိၣ်မး ဒီးအပာ်လုၢ်ပာ်ပှ့ၤအါထီၣ် ယဟိဝၤယွၤ အတၢ်ကူၣ်သ့.—စံးထီၣ်ပတြၢၤ ၁၃၉:၁၄-၁၇.
၁၅. နထံၣ်ဘၣ်လၢ တၢ်ဘၣ်တ့တဖၣ် ပာ်ဖျါထီၣ် ယဟိဝၤယွၤ အတၢ်ဂ့ၤတၢ်ဝါဒ်လဲၣ်. ဟ့ၣ်တၢ်အဒိ. (စံးထီၣ်ပတြၢၤ ၁၄၈:၇-၁၀)
၁၅ စီၤဒၤဝံး ကဆိမိၣ်ထံ ယဟိဝၤယွၤ အတၢ်ဘၣ်တ့အဂီၢ် အတလိၣ်လဲၤလၢ တၢ်လီၢ်ဖးယံၤဘၣ်. ပဝဲစ့ၢ်ကီး ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့လၢ အအိၣ်လၢ ပခိၣ်ပဃၢၤန့ၣ် ကမၤစၢၤပှၤလၢ ပကသ့ၣ်ညါအါထီၣ် ယဟိဝၤယွၤအဂ့ၢ်. အဒိ ဖဲမုၢ်ဆဲးလီၤဘၣ်ပဘ့ၣ်အခါ ပဘ့ၣ်ကလၢၤထီၣ်အဃိ မုၢ်အသဟီၣ်အံၤ ဒုးသ့ၣ်ညါပှၤလၢ ယဟိဝၤယွၤန့ၣ် အအိၣ်ဒီး တၢ်စိတၢ်ကမီၤ. (ယံးရမံယၤ ၃၁:၃၅) ဒီးဖဲပထံၣ် ထိၣ်တဘ့ၣ် တ့ထီၣ်အကသွံအခါ ပသ့ၣ်ညါဘၣ်လၢ ယဟိဝၤယွၤ ဟ့ၣ်ထိၣ်တဖၣ်အံၤ တၢ်သ့တၢ်ဘၣ်အဃိ ပသ့ၣ်ညါဘၣ်လၢ ယဟိဝၤယွၤန့ၣ် အအိၣ်ဒီးတၢ်ကူၣ်သ့. တကးဒံးဘၣ် ဖဲပထံၣ် ထွံၣ်ဖိလိၣ်ကွဲ ဒီးအ့ၣ်လီၤအခံမဲၢ်အခါ ပသ့ၣ်ညါဘၣ်လၢ ယဟိဝၤယွၤ မၤလီၤနံၤတၢ်သ့မး. ဒီးဖဲပထံၣ်ဘၣ် မိတဂၤအဲၣ်ဂာ်အဖိအခါ အဒုးသ့ၣ်နီၣ်ထီၣ်ပှၤလၢ ယဟိဝၤယွၤ အတၢ်အဲၣ် ဒီးအတၢ်ကဟုကယာ်အဂ့ၢ်. အဃိ ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့ အဒိၣ်မ့ၢ်ဂ့ၤ, အဆံးမ့ၢ်ဂ့ၤ, အအိၣ်ဘူးဒီးပှၤမ့ၢ်ဂ့ၤ အိၣ်ယံၤဒီးပှၤမ့ၢ်ဂ့ၤ အဂ့ၢ်န့ၣ် ပကထံၣ်ဘၣ်လၢ တၢ်ဘၣ်တ့တဖၣ်အံၤ စံးထီၣ်ပတြၢၤ ယဟိဝၤယွၤ. ဒီးတၢ်ဘၣ်တ့တဖၣ်အံၤ မၤစၢၤပှၤဒ်သိး ပကမၤလိအါထီၣ် ယဟိဝၤယွၤအဂ့ၢ် ဒီးစံးထီၣ်ပတြၢၤအီၤ.—ဖး စံးထီၣ်ပတြၢၤ ၁၄၈:၇-၁၀.
၁၆. ပကဘၣ်ပာ်လီၤ တၢ်ဆၢကတီၢ်လၢ ပကမၤမနုၤလဲၣ်.
၁၆ ယဟိဝၤယွၤန့ၣ် အအိၣ်ဒီး တၢ်ကူၣ်သ့, တၢ်အဲၣ်, တၢ်စိတၢ်ကမီၤ ဒီးတၢ်လၢအတ့လီၤဝဲ ခဲလၢာ်န့ၣ် ဃံလၤဒိၣ်မး. ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့တဖၣ်လၢ ပခိၣ်ပဃၢၤန့ၣ် ပကထံၣ်ဘၣ် ယဟိဝၤယွၤ အတၢ်ဂ့ၤတၢ်ဝါတဖၣ်အံၤ ဒီးပကသ့ၣ်ညါအါထီၣ် အတၢ်ဂ့ၤတၢ်ဝါ လၢအဂၤဒီဒူၣ်ဒံး. အဃိ ပကဘၣ်ပာ်လီၤ တၢ်ဆၢကတီၢ်လၢ ပကကွၢ် ယဟိဝၤယွၤ အတၢ်ဘၣ်တ့ ဒီးဆိမိၣ်ထံလၢ တၢ်ဘၣ်တ့တဖၣ်အံၤ သိၣ်လိပှၤ ယဟိဝၤယွၤ အဂ့ၢ်ဒ်လဲၣ်. ပမ့ၢ်မၤဒ်န့ၣ်န့ၣ် ပတၢ်ရ့လိာ်သးဒီး ပတၢ်ဘၣ်တ့ကစၢ် ကဂ့ၤဒိၣ်ထီၣ်. (ယၤကိာ် ၄:၈) တၢ်မၤလိ လၢခံတခါန့ၣ် ပကတဲသကီး ဘၣ်ဃးဒီး မိပါတဖၣ် သိၣ်လိၣ်အဖိလၢ တၢ်ဘၣ်တ့အဂ့ၢ် ဒီးမၤစၢၤအဖိလၢ အဝဲသ့ၣ်တၢ်ရ့လိာ်သး ဒီးယဟိဝၤယွၤ ဂ့ၤဒိၣ်ထီၣ် ကသ့ဒ်လဲၣ်.
တၢ်သးဝံၣ် ၅ ယွၤအတၢ်မၤလၢအလီၤလိၢ်လီၤလး
a ယဟိဝၤယွၤ အတၢ်ဘၣ်တ့န့ၣ် လီၤကမၢကမၣ်ဒိၣ်မး. အဒိ ပမ့ၢ်ကွၢ်မုၢ်န့ၣ် အသဟီၣ်ဆူၣ်ဒိၣ်မး ဒီးမ့မ့ၢ်လၢဖီတဖၣ်န့ၣ် အအိၣ်ဒီး အကဘျံးဘူဘူဖိ ဒီးကဖီလီဖိ. တၢ်ဘၣ်တ့တဖၣ်အံၤ အဒိၣ်မ့ၢ်ဂ့ၤ အဆံးမ့ၢ်ဂ့ၤ လီၤကမၢကမၣ်ဘၣ်ပှၤခဲလၢာ်. ဒီးပမ့ၢ်ကွၢ်တၢ်လၢ ယဟိဝၤယွၤတ့လီၤဝဲန့ၣ် ပကသ့ၣ်ညါဘၣ် ယဟိဝၤယွၤ အဂ့ၢ်အါမး. လၢတၢ်မၤလိတခါအံၤ ပကတဲသကီး ဘၣ်မနုၤအဃိ ပဘၣ်ပာ်လီၤတၢ်ဆၢကတီၢ်လၢ ပကကွၢ်ဒီးဆိမိၣ်ထံ တၢ်ဘၣ်တ့အဂ့ၢ်လဲၣ်. ပမ့ၢ်မၤဒ်န့ၣ်န့ၣ် ကမၤစၢၤပှၤဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤထီၣ်ဒ်လဲၣ်.