1. Nkedi musinke zimwe omu Joba ga divire nawa Jehova?

 JOBA vanzi ga uyungire nawo meparu lyendi nalinye. Nye nzogera zomulyo po unene ezi ga kere nazo kuna kara apa ga uyungire naJehova Karunga. Monzogera ozo, Jehova kwa tanterere Joba a tarurure koyininke yoyiwa eyi ga sita. Eyi kwa vaterere Joba a dive omu Jehova ga kara nonondunge ntani nokunkondopeka ehuguvaro lyendi mwaJehova pokudiworoka asi Jehova kupa vakareli vendi nayinye eyi vana hepa. Pasihonena, Jehova kwa diworokesere Joba asi age kupakera mbili yikorama ntani nage kumupakera hena mbili. (Joba 38:39-41; 39:1, 5, 13-16) Pokugazadara ko koyininke yokulisiga-siga eyi ga sita Jehova, Joba ga lirongerere ko koyikara yaKarunga.

2. Morwasinke pamwe ayi tu digoperere kutara koyininke eyi ga sita Jehova?

² Nose kuvhura tu lironge yoyinzi kuhamena Karunga nsene tu tara koyininke eyi ga sita. Nye poyiruwo yimwe kapi ayi tu karere ureru kuyirugana oyo. Nsene ose kwa tunga mositata, ose kuvhura tu dire kumona yininke yoyinzi nkenye ezuva eyi ga sita Jehova. Nampili ose kwa tunga konomukunda ,kuvhura tu lizuvhe asi kapi tuna kara nosiruwo sosinzi sokutara yininke eyi ga sita Jehova. Yipo nye, tu zeni tu ka lironge eyi ya karera nomulyo kulitulira po siruwo sokutara kounsitwe. Natu ka lironga omu Jehova naJesus va ruganesere unsitwe yipo va ronge vantu ntani neyi natu rugana yipo tu lirongere ko yoyinzi kounsitwe.

3. Yisinke yina kulikida asi Jehova kwa here Adamu a hafere yininke eyi ga sita?

³ Jehova kwa here vantu wokuhova va hafere yininke eyi ga  sita. Apa Jehova ga sitire Adamu, age kwa mu pere embo lyewa lyoparadisa ntani nokumupa situmbukira sokuninka evhu nalinye li kare paradisa. (Gen. 2:8, 9, 15) Gazadara ko omu ga hefe Adamu apa ga mwene yimeno omu yina kukura ntani omu nombya dina kutemuna. Azo kwa kere mfumwa kwaAdamu mokupakera mbili sikunino saEdeni. Jehova kwa pulire hena Adamu a ruke yikorama yokulisiga-siga. (Gen. 2:19, 20) Jehova ngano ga yi rukire mwene nye mevango lyoyo, age kwa pere situmbukira oso kwaAdamu. Tuna si huguvara asi komeho Adamu a tokore kuruka yikorama oyo madina, age kwa lirongere yikorama oyo nawa nokuyitara omu ya fana ntani nonkareso zayo. Adamu nampo kwa haferere kurugana yininke oyo. Yosili ayo kwa mu vaterere yipo a kwate egano omu Jehova ga kara nonondunge ntani omu ya wapa yininke eyi ga sita.

4. (a) Konda musinke zimwe zeyi natu tarera kounsitwe? (b) Yininke musinke eyi ga sita Karunga o hafere?

⁴ Konda zimwe zeyi natu tarera kounsitwe kuna kara asi morwa Jehova kuna hara tu yi rugane ngoso. Age kututantera asi: “Kotara si keguru, yilye ogu ga sita dina nombungururu ono kumona?” Elimbururo lyazera nawa-nawa. (Jes. 40:26) Jehova yige ga sita yininke nayinye yemeguru kukwatera mo neyi yepevhu neyi yemefuta, ano yininke nayinye eyi kuturonga kumuhamena. (Epis. 104:24, 25) Ntani gazadara ko monkedi omu Karunga ga tu sita. Age kwa yi tu rerupikira tu hafere kutara koyininke yoyiwa mounsitwe. Age kwa tu pa evhuliko lyokumona, lyokuzuvha nokukwata, nokumakera ntani nokufumbwira. Yininke eyi kutuvatera tu hafere yininke yokulisiga-siga eyi ga sita.

5. Kuliza noVaroma 1:20, uwa musinke atu gwanene mo apa atu tara koyininke eyi ga sita Jehova?

⁵ Bibeli kututantera konda zimwe hena zomulyo zeyi twa hepera kutara koyininke eyi ga sita Karunga. Yininke eyi ga sita Jehova kuturonga kuhamena yikara yendi. (Resa Varoma 1:20.) Pasihonena, tara koyininke eyi ga sita Jehova ntani nokudimburura asi ayo kwa yi sita nawa. Ayo kuturonga asi Karunga kwa kara nounongo wounzi. Ntani gazadara ko konondya dokulisiga-siga edi atu hafere kulya. Eyi kulikida nawa-nawa asi age kwa hara unene vantu. Apa atu mono yikara yaJehova moyininke eyi ga sita, ose kumudiva nawa ntani kutuhedesera pepi nage. Ngesi tu zeni tu ka lironge nonkedi dimwe omu Jehova ga ruganesa yininke eyi ga sita yipo a ronge vantu yirongwa yomulyo.

6. Sirongwa musinke natu lirongera ko koyidira eyi ayi dirauka?

⁶ Jehova kwa tura po elikwamo lyoyihorokwa.  Nkenye mvhura kehagero lyokwedi kwaMurongankuru ntani pokatji kokwedi kwaKudumonkuru, Vaisraeli ngava mono vasamunkoma kuna kupita keguru va vyuke komuzogo. Karunga kwa tanterere Vaisraeli asi: “NaSamunkoma googu ga diva ruveze rokutengura.” (Jer. 8:7) Ngwendi moomu Jehova ga tura po siruwo soyidira eyi yipo yi diruke, mokulifana age kwa tura po siruwo esi nga reta mpanguro zendi. Ngomu atu tara neina omu yidira yina kudiruka, ayo kutudiworokesa tu huguvare mwaJehova asi: “Age kwa tura po ruveze rokukareta uhura kouzuni ou woudona.”—Hab. 2:3.

7. Yisinke natu lirongera monkedi omu sidira asi tuka? (Jesaya 40:31)

⁷ Jehova kunkondopeka vakareli vendi. Kupitira mwaJesaya, Jehova kwa tumbwidilire asi nga nkondopeka vantu vendi va ‘tukise mavava ngwendi makuvi’ apa va lizuvhire asi kapi vana kara nononkondo ndi vana guwu. (Resa Jesaya 40:31.) Yikando yoyinzi Vaisraeli ngava mono makuvi kuna kutuka meguru ga hana kuruganesa unene mavava gago pokugazanza. Ayo kuyirugana eyi pokutuka nompepo zonene. Eyi kutudiworokesa asi ngwendi moomu tupu Jehova ga gava nonkondo koyidira oyo, age kuvhura hena kugava nonkondo kovakareli vendi. Apa o mono sidira kuna kutuka meguru sa hana kuruganesa mavava gaso, diworoka asi Jehova kuvhura kukupa nonkondo yipo o li didimikire maudigu goge.

8. Yisinke ga lirongerere ko Joba koyininke eyi ga sita Karunga ntani yisinke natu lirongera ko?

⁸ Jehova ya mu fira tu mu huguvare. Jehova kwa vaterere Joba yipo a huguvare unene mwendi. (Joba 32:2; 40:6-8) Monzogera zendi naJoba, Jehova kwa tumbwire yininke yoyinzi eyi ga sita, kukwatera mo nombungururu, maremo ntani maruvadi gokuvema. Jehova kwa uyungire hena kuhamena yikorama ngwendi nyatji zontwedu ntani nkambe. (Joba 38:32-35; 39:9, 19, 20) Yininke nayinye eyi kapi ya gava tupu umbangi kuhamena nonkondo daKarunga nye hena eharo lyendi nounongo wendi wounzi. Nzogera ezi ga kere nazo Joba kumwe naJehova kwa mu vaterere a huguvare unene mwaJehova. (Joba 42:1-6) Mokulifana apa atu tara kounsitwe, ayo kutudiworokesa asi Jehova ga kara nonondunge ntani nononkondo dononene kupitakana nkenye ogu. Age hena nga ka hagekesa po maudigu getu nagenye. Sitwa esi kutuvatera tu mu huguvare unene.

9-10. Yisinke a zi tu rongo mvhura nezuva kuhamena Jehova?

⁹ Jesus ga divire yoyinzi kuhamena unsitwe. “Ngonkurungu” age kwa rugene kumwe noGuhwe apa va sitire uzuni. (Yis. 8:30) Ano konyima apa Jesus ga kere pevhu, age kwa ruganesere unsitwe a ronge varongwa vendi kuhamena oGuhwe. Tu zogereni ko yirongwa yongandi eyi ga rongere Jesus.

¹⁰ Jehova kulikida eharo kwankenye ogu. PEudiso lyendi lyopoNdundu, Jesus kwa rongere varongwa vendi kuhamena ezuva ntani mvhura, yininke eyi ava tara sinzi sovantu asi kwato mulyo. Yininke nayinye eyi mulyo unene mokuninka asi tu twikire kuparuka. Jehova ngano ga nyokere kugava yininke eyi kovantu ava ava dili kumukarera. Nye mevango lyoyo, age kulikida eharo pokugava ezuva nomvhura kovantu navenye. (Mat. 5:43-45) Jesus kwa ruganesere sirongwa esi mokuronga varongwa vendi asi Jehova ana hara tu likide eharo kovantu navenye. Apa atu hafere kutara omu ezuva lina ka toka ntani nomu zina kuroka mvhura zongwa, ayo kutuninkisa tu gazadare omu Jehova a likida eharo lyendi kovantu navenye. Sihonena sendi kuvhura kututumangeda tu likide eharo pokuzuvhisira vantu navenye.

11. Ngapi omu kutara koyidira nayi tu korangeda?

 ¹¹ Jehova kutupa yihepwa yetu yopanyama. Peudiso lyokulifana, Jesus kwa tente hena asi: “Tareni si yidira, ayo kapi ayi kunu, kapi ayi zangura, kapi hena ayi pongaikire moyihete, nye Guhyeni gemeguru kuyirera.” Nampo vantu ava va purakenene kwaJesus kwa mwene yidira omu yina kupita apa ga va pulire asi: “One nani kapi mwa yi pitakana momulyo?” (Mat. 6:26) Eyi kutuhuguvaresa asi Jehova nga tu vatera noyihepwa yetu yopanyama. (Mat. 6:31, 32) Sirongwa esi atu lirongera ko kounsitwe kutwikira kukorangeda vanavazinyetu wovalimburukwi. Munazinyetu gomukadi gomudinkantu, muzuvhisi gokukarerera ogu ga tunga moSpain kwa dompere mutjima morwa kapi ga gwene evango lyewa oku na tunga. Nye konyima zapa ga mwene yidira kuna kulya nontanga ntani nomahoro, ayo kwa mu korangedere. Age kwa tante asi: “Yidira oyo kwa diworokesere nge asi Jehova kuyipakera mbili ntani name nga pakera nge mbili.” Konyima zoyo, munazinyetu ogo kwa gwene evango oku na tunga.

12. Kuliza naMateusa 10:29-31, yisinke aga likida manzunge kuhamena Jehova?

¹² Jehova kutara nkenye gumwe gwetu pamundinda asi age mulyo. Komeho Jesus a tume vapositoli vendi va ka zuvhise, age kwava vaterere va dire kutjira vantu ava va ka zuvhisilire. (Resa Mateusa 10:29-31.) Age kwa yi rugene oyo pokuuyunga kuhamena rudi rumwe royidira oru rwa vhukire unene moIsraeli eyi ava tambura asi manzunge. Yidira oyo kwa kere nomulyo gomusesu momazuva gaJesus. Nye Jesus kwa tanterere varongwa vendi asi: “Nalimwe si ali gwire pevhu, age Guhyeni ga hana kuyidiva.” Makura yiyo ga gwederere ko asi: “Yeeyi one mulyo unene kupitakana manzunge gomanzi.” Monkedi ezi, Jesus kwa huguvaresere varongwa vendi asi Jehova kwa va tere asi awo mulyo pamundinda gwawo, yipo nye kapi va kere nokonda zokutjira mahepeko. Varongwa vaJesus va diworokere nonkango dendi apa va zuvhisilire monodoropa nomonomukunda. Nkenye apa no mona sidiragona, diworoka asi Jehova kukutara asi ove mulyo unene pamundinda, morwa ove mulyo unene “kupitakana manzunge gomanzi.” Nevatero lyendi, kapisi hepero o tjire wopeke nsene tava ku rwanesa.—Epis. 118:6.

13. Yisinke nayi tu vatera tu lirongere ko kounsitwe?

¹³ Ose kuvhura kulironga yirongwa yapeke kuhamena Jehova kupitira mounsitwe. Monkedi musinke natu yi rugana? Sokuhova, twa hepa kulitulira po siruwo sokutara kounsitwe. Ano sauvali, twa hepa kugazadara ko eyi yina kuturonga kuhamena Jehova. Poyiruwo yimwe, yininke eyi kuvhura nampo kutukarera udigu kuyirugana. Munazinyetu gomukadi Géraldine ogu ga tunga moCameroon kwa tanta asi: “Ame kwa kulira mositata, yipo nye ame kwa hetekerere ko kulitulira po siruwo sokutara kounsitwe.” Mukuronambunga gedina Alfonso, kwa  faturura asi: “Ame na ya dimbwilire asi na hepere kulitulira po siruwo sokukara nyamelike yipo ni tare kounsitwe waJehova ntani nokuteda ko eyi ayi rongo nge kumuhamena.”

14. Yisinke ga lirongere Ndafita apa ga tedere ko kounsitwe waKarunga?

¹⁴ Ndafita nga gazadara ko unene kounsitwe waKarunga. Age kwa tanterere Jehova asi: “Nsene ni tara eguru, yirugana yomawoko goge, kwedi nonombungururu edi wa wapaikira pomavango gayo, muntu ngano yinke nye, o ka mu gazare?” (Epis. 8:3, 4) Ngomu Ndafita ga tere konombungururu masiku, age kapi tupu ga haferere kutara konombungururu. Age hena kwa gazadarere ko eyi da mu rongere nombungururu kuhamena Karunga. Age kwa lirongere omu Jehova ga kara nononkondo dononene. Poyiruwo yimwe, Ndafita nga gazadara ko omu rutu rwendi rwa li foromene mezimo lyozina. Apa ga tedere ko kuhamena omu rutu rwendi va ru sita, age kwa kere norupandu rorunene kounongo waJehova.—Epis. 139:14-17.

15. Gava yihonena omu wa limonena yikara yaJehova kupitira mounsitwe. (Episarome 148:7-10)

¹⁵ Ngwendi Ndafita, ayo ureru kwetu mokugwana yininke younsitwe eyi natu vhura kugazadara ko. Yininke yinzi eyi nayi tu vatera yipo tu dive nawa Jehova. Pasihonena, ove kuvhura o dimburure nonkondo daJehova apa o zuvhu upyu wezuva posipapa soge. (Jer. 31:35) Gazadara ko kounongo waJehova apa no mona sidira kuna kutunga sikorogo saso. Gazadara ko omu Jehova ga kara noruhafo apa o mono simbwagona kuna kutjida musira gwaso. Ntani pandura Jehova keharo lyendi nkenye apa nomona zinya kuna kuhempa mukeke gwendi. Twa kara nonompito dononzi dokulironga kuhamena Jehova morwa yininke eyi ga sita kumuhamberera yi kare asi yoyinunu ndi yoyinene ndi yokoure ndi yopopepi.—Resa Episarome 148:7-10.

16. Yisinke twa hepa kutokomena kurugana?

¹⁶ Karunga gwetu ga kara nonondunge, neharo, nononkondo ntani nayinye eyi a rugana yiwa. Yikara eyi ntani nayimwe yoyinzi kuyimonenena mounsitwe. Ngano natuvenye tu litulire po nkenye apa siruwo sokutara kounsitwe ntani noku gazadara ko eyi ayi tu rongo kuhamena Jehova. Pokurugana ngoso, ose ngatu hedera unene pepi Musiti gwetu. (Jak. 4:8) Mosirongwa sokukwama ko ngatu ka zogera omu vakurona nava ruganesa unsitwe yipo va vatere vana vawo va hedere pepi Jehova.