1. Ino ninshila yomwi Jobo mbwakeeya shiinji pali Yehova?

 JOBO wakabandika abantu bapusenepusene mubuumi bwakwe. Sombi mubandi ngwaakalinga kucite a Yehova wakalinga uyandika abuumbi. Yehova wakalwiita Jobo kulangilisha pashintu shimwi nshaakalenga, kwaamba ayi amucaafwe kushoma mubusongo ankusu nshaacite shakulama basebenshi bakwe. Kucakubonenaako, Jobo wakashiba ayi Lesa inga wamulama mukwiinga wakabona Lesa mbwasanina shinyama. (Jobo 38:39-41; 39:1, 5, 13-16) Jobo wakeeya shiinji pamibo Lesa njaacite kwiinda mukuyeeya pashintu shimwi nshaakalenga.

2. Ino nceebonshi inga catubeta ciyumu kulangilisha shintu Yehova nshaakalenga?

² Aswebo inga tweeya shiinji pali Lesa wesu kwiinda mukulangilisha cakubikila maano shintu nshaakalenga. Nacibi boobo, teshi lyoonse ndyeenga catubeta cuubu kucita boobo. Na tulekala mutauni, mpashi teshi lyoonse ndyeenga katubona shintu shiinji Yehova nshaakalenga. Alimwi nabi kwaamba ayi tulekala kumushi, mpashi inga katutacaniiwo ciindi cakulangilisha cakubikila maano shintu Yehova nshaakalenga. Aboobo amuleke tubandike ncotuyandikila kucana ciindi akweelesha cankusu kweebela shilengwa. Tutokwiiya Yehova a Yesu mbobakasebensesha shilengwa kwiisha bantu ansheenga twaciita kwaamba ayi twiiye shiinji kuswa ku shilengwa.

3. Ino nshiinshi shitondesha ayi Yehova wakalinga kusuni kwaamba ayi Adamu anoosangalala kweebela shilengwa?

³ Yehova wakalinga kusuni kwaamba ayi muntu wakutaanguna anoosangalala kwiinda mukweebela shilengwa. Lesa ndyaakalenga Adamu, wakamupa musena ubotu wakukalaamo alimwi wakamupa  ncito yakulama musena uyo akuukomenesha. (Mata. 2:8, 9, 15) Amuyeeyebo Adamu mbwakasangalala ndyaakalinga kubona mbuto kashimena amaluba kaasapuka. Adamu wakalinga kucite coolwe cilibetele cakulama muunda wa Edeni! Alimwi Yehova wakapa Adamu mukuli wakutumba meena shinyama. (Mata. 2:19, 20) Yehova naakwiinga wakalinga kusuni, naakwiinga mwiine wakatumba meena shinyama. Sombi wakasalaawo kupa mukuli uyu kuli Adamu. Ncakutatoonsha kwaamba ayi Adamu kaatana kutumba liina cinyama comwi acomwi, wakalinga kucilangilisha cakubikila maano, kubona mbociboneka ambocakalinga kucita shintu. Adamu alyeelete wakasangalala kusebensa ncito iyi. Incito iyi yakacafwa Adamu kushiba kwaamba ayi Yehova ngumusongo, shintu nshaakalenga nshibotu alimwi ayi shilasangalasha.

4. (a) Ino nceebonshi comwi ceelete kutupa kulangilisha cakubikila maano shintu Lesa nshaakalenga? (b) Ino nshintu nshi Lesa nshaakalenga nshomusuni bunene?

⁴ Ino nceebonshi comwi ceelete kutupa kulangilisha cakubikila maano shintu Yehova nshaakalenga? Nceebo cakwaamba ayi alisuni ayi tunoocita boobo. Wakatulwiita ayi: “Amwiinune mitwi akulanga kwiculu. Ngani wakalenga shintu shoonse ishi shiliimo?” Tulicishi kabotu cikumbulo kumwiipusho uyu. (Isa. 40:26) Yehova ngowakalenga shintu shoonse shili kwiculu, pacishi capanshi alimwi amu lweenge. Wakacita boobo kwaamba ayi twiiye shiinji pali nguwe. (Kulu. 104:24, 25) Alimwi amuyeeyebo Lesa mbwaakatulenga. Wakatulenga munshila yakwaamba ayi tunoosangalala kulangilisha shilengwa. Alimwi wakatupa ankusu shakucikonsha kubona, kunyumfwa, kucata, kunyumfwa shakulya mboshitonyufwika akunyumfwa bweema, kwaamba ayi tunoosangalala pashintu shipusenepusene nshaakalenga.

5. Kweelana a Bene Loma 1:20, ino kwiiya pashintu Yehova nshaakalenga kulatucafwa buyani?

⁵ Baibo ilatulwiita ceebo acimwi ciyandika ceelete kutupa kulangilisha cakubikila maano shintu Lesa nshaakalenga. Shintu nshaakalenga shilatwiisha shiinji pamibo njaacite. (Amubelenge Bene Loma 1:20.) Kucakubonenaako, na mwalangilisha shintu Yehova nshaakalenga, mulabona kwaamba ayi wakashilenga munshila ikankamika abuumbi. Ici cilatwiisha ayi Lesa alicite busongo bwiinditeewo. Alimwi amuyeeyebo pashakulya shipusenepusene nshotusangalala kulya. Ici cilatondesha patuba kwaamba ayi Lesa alitusuni abuumbi. Na twabona mibo Yehova njaacite kwiinda mushintu nshaakalenga, tulamushiba kabotu, akusuna kuba abushicibusa buyumu anguwe. Ano amuleke tubandike nshila shimwi Yehova mbwaakasebensesha shilengwa kwiisha bantu shiiyo shiyandika.

6. Ino nciiyo nshi nceenga tweeya na twaboona tuyuni katulonga?

⁶ Yehova wakabika ciindi shintu shimwi ndyesheelete kucitika. Mwaaka amwaaka, kumamanino  amweenshi wa February kushika pakati ka mweenshi wa May, bene Isilaeli bakalinga kubona matongola ciindi ndyaakalinga kulonga kuya kumatwa. Lesa wakalwiita bene Isilaeli ayi: ‘Matongola alicishi ciindi ncaeelete kuboolelamo.’ (Jele. 8:7) Bweenka Yehova mbwaakabika ciindi matongola ndyaeelete kulonga, wakabika aciindi ndyeshi akalete boomboloshi pacishi. Munshiku shino, na twaboona tuyuni katulonga tulashoma cakutatonsha ayi Yehova wakabika ciindi ndyeshi akalete mamanino acishi cino cibiibi.​—Abaku. 2:3.

7. Ino nshiinshi nsheenga tweeya na twaboona bayuni mbobooluka? (Isaya 40:31)

⁷ Yehova alabapa nkusu basebenshi bakwe. Kwiinda mumushinshimi Isaya, Yehova wakashomesha basebenshi bakwe ayi alaakubapa nkusu sha ‘kuuluka anga ngumumbankwashi’ na balinyumfwa kulefuka. (Amubelenge Isaya 40:31.) Liinji bene Isilaeli bakalinga kubona bamumbankwashi mbobakalinga kuuluka mwiculu kwiinda mukusebensesha muuwo ulungula, kwakubula kusebensesha nkusu shiinji. Ici cilatwiibalusha ayi Yehova inga watupa nkusu bweenka mbwaapa nkusu bamumbankwashi! Lyoonse na mwaboona ciyuni cinene kacuuluka mwiculu kwakubula kusebensesha nkusu shiinji, munookwiibaluka ayi Yehova inga wamupa nkusu shakucikonsha kuliyumya mumapensho ngomutokwiindaamo.

8. Ino nshiinshi Jobo nshakeeya kwiinda mukuyeeya pashintu Lesa nshaakalenga, alimwi ino nshiinshi nsheenga tweeya?

⁸ Yehova inga twamushoma. Yehova wakacafwa Jobo kunoomushoma abuumbi. (Jobo 32:2; 40:6-8) Lesa ndyaakalinga kubandika a Jobo wakaamba pashintu shiinji nshaakalenga mbuli nyenyeenshi, makumbi alimwi akubeeka kwa mfula. Kwiilikaawo, wakaamba a pashinyama mbuli inyati alimwi a liaki. (Jobo 38:32-35; 39:9, 19, 20) Shoonse ishi shakatondesha patuba kwaamba ayi Lesa alicite nkusu shiinji abuumbi, alitusuni alimwi alicite busongo bwiinditeewo. Pesule lya mubandi uyu, Jobo wakatalika kushoma Yehova abuumbi. (Jobo 42:1-6) Aswebo na katwiiya pashintu Yehova nshaakalenga, tulesa mukushiba ayi alicite busongo bwiinditeewo alimwi alicite nkusu abuumbi kwiinda ndiswe. Alimwi alaakumana mapensho oonse ngotwiindaamo. Ici cilyeelete kutupa kunoomushoma abuumbi.

9-10. Ino lisuba amfuula shilatwiisha nshi pali Yehova?

⁹ Yesu wakalinga kucishi shiinji pashintu Lesa nshaakalenga. Mbuli ‘musebenshi ucishi kabotu ncito,’ wakalinga kucite coolwe cakusebensela pomwi a Baishi ndyebakalinga kulenga shintu. (Tus. 8:30) Lyalo Yesu ndyaakalinga pacishi capanshi, wakeesha bashikwiiya bakwe pali Baishi kwiinda mukusebensesha shilengwa. Amuleke tubandikebo pashakubonenaako shiniini.

¹⁰ Yehova alatondesha lusuno kubantu boonse. Mu Likani lya Pakalundu Yesu ndyaakaamba, wakalwiita bashikwiiya bakwe pashintu shobilo Lesa nshaakalenga bantu baanji nshobatabikiliko maano. Shintu ishi ndisuba alimwi amfuula. Shoonse shobilo shilayandika kwaamba ayi tutolelele kuba abuumi. Naakwiinga Yehova kaasuni, naakwiinga wakapa kwaamba ayi lisuba kalitabali alimwi amfuula kaitaloki pabaabo batamusebenseli. Muciindi cakucita boobo, alapa kwaamba ayi lisuba libale amfuula iloke pabantu boonse. (Mate. 5:43-45) Yesu wakaamba pamakani aya kwaamba ayi acafwe bashikwiiya bakwe kushiba ayi Yehova alisuni ayi tunootondesha lusuno kubantu boonse. Tulasangalala na twabona lisuba mboliboneka kabotu ndyelitooya mukupila alimwi a na imfula yaloka. Ici cilatupa kuyeeya ayi Yehova alatondesha lusuno kubantu boonse. Aswebo inga twakonkela cakubonenaako cakwe cakutondesha lusuno kwiinda mukushimikila bantu boonse.

11. Ino kulangilisha tuyuni inga kwatuyuminisha buyani?

¹¹ Yehova alatupa nshetuyandika lwakumubili. Mu Likani lya Pakalundu Yesu ndyakaamba, wakeelikaawo akwaamba ayi: “Amubone bayuni, tabashangi, tabatebuli nabi kubika mumatala. Nakubi boobo, Ishiwanu uli kwiculu ulabasanina.” Mpashi bantu bakalinga kukutika kuli Yesu  bakalinga kubona bayuni kabooluka mwiculu ndyaakabeepusha ayi: “Sa mwebo tamuyandiki kwiinda bayuni?” (Mate. 6:26) Iyi ni nshila ya lusuno Yesu mbwakatucafwa kushiba ayi Yehova alaakutupa nshetuyandika lwakumubili! (Mate. 6:31, 32) Makani aya Yesu ngakaamba pashilengwa atolelela kuyuminisha basebenshi bashomeka bakwe Yehova. Nankashi wacanike ukala ku Spain usebensa mbuli painiya, wakalefuka ceebo cakwaamba ayi taakalinga kucikonsha kucana ŋanda ibotu yakukalaamo. Sombi pesule lyakubona tuyuni katulya nseke amalubeni, wakayuminishikwa. Wakaamba ayi: “Ishi shakanjibalusha kwaamba ayi Yehova alatubikilako maano tuyuni alimwi ayi anebo alaakumbikilako maano.” Tapana kwiinda aciindi cilaamfu, nankashi uyu wakacana ŋanda ibotu yakukalaamo.

12. Kweelana a Mateyo 10:29-31, ino tutiinga tulatwiisha nshi pali Yehova?

¹² Yehova alabikila maano kumuntu womwi awomwi. Yesu kaatana kutuma batumwi bakwe kuya mukushimikila, wakabacafwa kukoma boowa bwa kuloonda bantu beenga babapikisha. (Amubelenge Mateyo 10:29-31.) Wakacita boobo kwiinda mukwaamba pa tutiinga, tuyuni twakalinga kushibikitwe abuumbi mu Isilaeli. Tuyuni utu twakalinga kucite mpindu iniini abuumbi paciindi cilya. Sombi Yesu wakalwiita bashikwiiya bakwe ayi: “Taaku kanga tiinga nabi komwi keenga kalokela panshi kwakuteshiba Ishiwanu.” Lyalo wakeelikaawo akwaamba ayi: “Mwebo mulayandika kwiinda tutiinga tuunji.” Yesu wakacafwa bashikwiiya bakwe kushiba kwaamba ayi Yehova alabikila maano kumuntu womwi awomwi, aboobo tabakalinga kweelete kuloonda bakalinga kubapensha. Ncakutatoonsha kwaamba ayi bashikwiiya bakwe Yesu bakalinga kwiibaluka maswi ngaakabalwiita na babona tutiinga ndyebakalinga kushimikila mumandabala amumishi. Amwebo lyoonse na mwaboona kayuni kaniini abuumbi, munookwiibaluka ayi Yehova alamubona ayi “mulayandika kwiinda tutiinga tuunji.” Kwiinda mulucafwo lwakwe, tamweelete kuloonda na bamwi batomupikisha.​—Kulu. 118:6.

13. Ino nshiinshi sheenga shatucafwa kwaamba ayi twiiye shiinji pali Yehova kuswa ku shilengwa?

¹³ Kuli ashimwi shiinji nsheenga tweeya pali Yehova kuswa kushintu nshaakalenga. Munshila nshi? Cakutaanguna, tulyeelete kucana ciindi cakulangilisha shilengwa. Lyalo tulayandika kuyeeya nshetutokwiiya pali Yehova kuswa kucilengwa ico. Teshi lyoonse ndyeenga catubeta cuubu kucita boobo. Nankashi waliina lya Géraldine ukala ku Cameroon, wakaamba ayi: “Ndakakulila mutauni. Aboobo ndakalinga kuyandika kweelesha cankusu kwaamba ayi ndangilishe shilengwa.” Munene waliina lya Alfonso wakaamba ayi: “Ndakeeya kwaamba ayi ndayandika kucana ciindi cakuba neenka kwaamba ayi ndangilishe shintu Yehova nshaakalenga alimwi akukutumana kuyeeya nsheenga ndeeya pali nguwe kuswa ku shilengwa isho.”

14. Ino nshiinshi Defedi nshakeeya ndyaakalinga kukutumana kuyeeya pashintu Lesa nshaakalenga?

¹⁴ Defedi wakalinga kuyeeya cakubikila maano pashintu Lesa nshaakalenga. Wakalwiita Yehova ayi: “Ndimbona mwiculu umo momwakalenga, mweenshi anyenyeenshi nshimwakabika mumisena, anu muntu nciinshi ngweenga kamuyeeya?” (Kulu. 8:3, 4) Ncakwiila, Defedi ndyaakalinga  kulangilisha mwiculu mashiku, taakalinga kunyumfwabo kabotu kulangilisha nyenyeenshi shoonse. Sombi wakalinga kukutumana akuyeeya nsheenga weeya pali Lesa kuswa ku nyenyeenshi. Wakeeya kwaamba ayi Yehova aliinditeewo. Pashiindi shimwi, Defedi wakalinga kuyeeya mubili wakwe mbowakalinga kupangwa, paciindi ndyaakalinga mumala muli banyina. Ndyaakayeeya pa mubili wakwe mbowakalengwa munshila ikankamika, wakatalika kulumba Yehova abuumbi pabusongo mbwaacite.​—Kulu. 139:14-17.

15. Amwaambe mibo Yehova njaacite njemwakabona mushintu nshaakalenga. (Kulumbaisha 148:7-10)

¹⁵ Bweenka mbocakalinga kuli Defedi, aswebo mpashi ncuubu kubona shintu Lesa nshaakalenga akukutumana kuyeeyawo cakubikila maano. Kuli shintu shiinji Yehova nshaakalenga sheenga shatucafwa kushiba mibo njaacite. Kucakubonenaako, na mwanyumfwa cikasaashi calumwi, amushibe kwaamba ayi Yehova alicite nkusu. (Jele. 31:35) Na mwacaana kayuni kakapanga ciinswa, amushibe kwaamba ayi Lesa ngumusongo. Na mwabona kabwa kakasekanya mucila wankako, amushibe kwaamba ayi Yehova ngu Lesa usangalete. Alimwi na mwabona mushali mwanakashi kaasekana amwanaakwe kateta, amulumbe Yehova palusuno ndwaacite. Tulicite coolwe ca kwiiya shiinji pali Yehova mukwiinga shintu shoonse nshaakalenga—inga caba ayi nshintu shinene, shiniini, shili pafwiifwi na shili kulaale—shilamulumbaisha.​—Amubelenge Kulumbaisha 148:7-10.

16. Ino nshiinshi nshotweelete kuba bashinishite kucita?

¹⁶ Lesa wesu ngumusongo, ngushilusuno, ngushinkusu alimwi shoonse nshaakalenga nshibotu. Inga tweeya shiinji pamibo iyi alimwi amibo imwi, na katulangilisha cakubikila maano shintu shoonse Lesa nshaakalenga. Amuleke soonse tunoocana ciindi cakusangalala kulangilisha shilengwa akuyeeya nsheenga tweeya pali Yehova kuswa kushilengwa isho. Na katucita boobo, tulaakuba abushicibusa buyumu a Mulengi wesu. (Jemu. 4:8) Mumutwi utokonkelaawo, tulaakwiiya mbweenga bashali bacafwa bana babo kuba abushicibusa buyumu a Yehova, kwiinda mukusebensesha shilengwa.