ບົດຄວາມສຶກສາທີ 12
ຮຽນຮູ້ກ່ຽວກັບພະເຢໂຫວາຫຼາຍຂຶ້ນໂດຍເບິ່ງຈາກສິ່ງທີ່ເພິ່ນສ້າງ
“ເຖິງວ່າມະນຸດບໍ່ສາມາດເຫັນພະເຈົ້າໄດ້ ແຕ່ເມື່ອພວກເຂົາສັງເກດເບິ່ງສິ່ງທີ່ພະອົງສ້າງໄວ້ກໍຈະເຫັນຄຸນລັກສະນະຕ່າງໆຂອງພະອົງຢ່າງຈະແຈ້ງ ຕັ້ງແຕ່ການສ້າງໂລກເປັນຕົ້ນມາ.”—ຣມ. 1:20
ເພງ 6 ທ້ອງຟ້າປະກາດສະຫງ່າລາສີຂອງພະເຈົ້າ
ໃຈຄວາມສຳຄັນ a
1. ວິທີໜຶ່ງທີ່ຊ່ວຍໂຢບໃຫ້ຮູ້ຈັກພະເຢໂຫວາດີຂຶ້ນແມ່ນຫຍັງ?
ຕະຫຼອດຊີວິດຂອງໂຢບ ລາວໄດ້ມີໂອກາດລົມກັບຫຼາຍຄົນ. ແຕ່ມີຜູ້ໜຶ່ງທີ່ລາວໄດ້ລົມນຳເຊິ່ງລາວຈະບໍ່ມີວັນລືມ ນັ້ນກໍຄືການໄດ້ລົມກັບພະເຢໂຫວາ. ໃນການສົນທະນາຄັ້ງນັ້ນ ພະເຢໂຫວາໄດ້ບອກໃຫ້ໂຢບເບິ່ງບາງຢ່າງທີ່ເພິ່ນສ້າງເຊິ່ງເປັນຕາໜ້າງຶດງໍ້ຫຼາຍ ເພື່ອເຮັດໃຫ້ໂຢບຮູ້ວ່າເພິ່ນເປັນພະເຈົ້າທີ່ມີສະຕິປັນຍາຫຼາຍຂະໜາດໃດ ແລະເພື່ອໃຫ້ໂຢບໝັ້ນໃຈວ່າເພິ່ນສາມາດເບິ່ງແຍງຜູ້ຮັບໃຊ້ຂອງເພິ່ນໄດ້. ຕົວຢ່າງເຊັ່ນ: ພະເຢໂຫວາບອກໃຫ້ໂຢບຮູ້ວ່າເພິ່ນເບິ່ງແຍງສັດຕ່າງໆແນວໃດ ເພິ່ນກໍຈະເບິ່ງແຍງໂຢບແບບນັ້ນຄືກັນ. (ໂຢບ 38:39-41; 39:1, 5, 13-16) ເມື່ອໂຢບເບິ່ງສິ່ງຕ່າງໆທີ່ພະເຢໂຫວາສ້າງ ລາວກໍໄດ້ຮຽນຮູ້ວ່າພະເຢໂຫວາເປັນພະເຈົ້າທີ່ມີຄຸນລັກສະນະທີ່ດີຫຼາຍແທ້ໆ.
2. ເປັນຫຍັງບາງເທື່ອຈຶ່ງບໍ່ງ່າຍທີ່ເຮົາຈະສັງເກດເບິ່ງສິ່ງຕ່າງໆທີ່ພະເຢໂຫວາສ້າງ?
2 ເຮົາກໍສາມາດຮຽນຮູ້ກ່ຽວກັບພະເຢໂຫວາໄດ້ຄືກັນເມື່ອເຮົາສັງເກດເບິ່ງສິ່ງຕ່າງໆທີ່ເພິ່ນສ້າງ. ແຕ່ບາງເທື່ອມັນກໍບໍ່ງ່າຍທີ່ຈະເຮັດແບບນັ້ນ ເຊັ່ນ ຖ້າເຮົາອາໄສຢູ່ໃນເມືອງເຮົາອາດຈະບໍ່ຄ່ອຍໄດ້ເຫັນສິ່ງທີ່ພະເຢໂຫວາສ້າງ. ແລະເຖິງວ່າເຮົາຈະອາໄສຢູ່ນອກເມືອງ ເຮົາກໍອາດບໍ່ຄ່ອຍມີເວລາຄິດເຖິງສິ່ງທີ່ພະເຢໂຫວາສ້າງປານໃດ. ໃນບົດຄວາມນີ້ເຮົາຈະມາເບິ່ງວ່າ ເປັນຫຍັງຈຶ່ງເປັນເລື່ອງທີ່ດີທີ່ເຮົາຈະໃຊ້ເວລາແລະພະຍາຍາມສັງເກດເບິ່ງສິ່ງທີ່ພະເຢໂຫວາສ້າງ. ແລະນອກຈາກນັ້ນ ເຮົາຍັງຈະມາເບິ່ງອີກວ່າພະເຢໂຫວາແລະພະເຢຊູໃຊ້ສິ່ງທີ່ຢູ່ໃນທຳມະຊາດເພື່ອສອນເຮົາແນວໃດ ແລະເຮົາຕ້ອງເຮັດຫຍັງເພື່ອຈະໄດ້ບົດຮຽນຈາກສິ່ງເຫຼົ່ານັ້ນ.
ເປັນຫຍັງເຮົາຄວນສັງເກດເບິ່ງສິ່ງທີ່ພະເຢໂຫວາສ້າງ?
ພະເຢໂຫວາຢາກໃຫ້ອາດາມມີຄວາມສຸກກັບສິ່ງທີ່ເພິ່ນສ້າງຂຶ້ນມາແລະໃຫ້ລາວຕັ້ງຊື່ສັດຕ່າງໆ (ເບິ່ງຂໍ້ 3)
3. ສິ່ງໃດສະແດງໃຫ້ເຫັນວ່າພະເຢໂຫວາຢາກໃຫ້ອາດາມມີຄວາມສຸກກັບສິ່ງທີ່ເພິ່ນສ້າງ?
3 ພະເຢໂຫວາຢາກໃຫ້ມະນຸດຄົນທຳອິດມີຄວາມສຸກກັບສິ່ງທີ່ເພິ່ນສ້າງ. ຕອນທີ່ເພິ່ນສ້າງອາດາມ ເພິ່ນໄດ້ໃຫ້ລາວຢູ່ໃນສວນອຸທິຍານທີ່ສວຍງາມແລະມອບໝາຍໃຫ້ລາວເບິ່ງແຍງແລະຂະຫຍາຍສວນນັ້ນອອກໄປຈົນເຕັມໂລກ. (ປຖກ. 2:8, 9, 15) ລອງຄິດເບິ່ງວ່າ ອາດາມຈະຮູ້ສຶກຕື່ນເຕັ້ນຂະໜາດໃດທີ່ລາວໄດ້ເຫັນເມັດພືດງອກອອກມາແລະດອກໄມ້ຄ່ອຍໆເບັ່ງບານ. ອາດາມມີສິດທິພິເສດຫຼາຍແທ້ໆທີ່ໄດ້ເບິ່ງແຍງສວນເອເດນ! ແລະພະເຢໂຫວາຍັງໄດ້ໃຫ້ລາວຕັ້ງຊື່ໃຫ້ສັດຕ່າງໆນຳ. (ປຖກ. 2:19, 20) ທີ່ຈິງ ພະເຢໂຫວາຈະເຮັດວຽກນີ້ເອງກໍໄດ້ ແຕ່ເພິ່ນໄດ້ມອບວຽກນີ້ໃຫ້ອາດາມເຮັດ. ແນ່ນອນວ່າກ່ອນທີ່ອາດາມຈະຕັ້ງຊື່ໃຫ້ສັດແຕ່ລະໂຕ ລາວຕ້ອງເບິ່ງວ່າພວກມັນມີລັກສະນະເດັ່ນຫຍັງແລະມີນິດໄສແບບໃດ. ວຽກນີ້ຄືຊິເຮັດໃຫ້ອາດາມມີຄວາມສຸກຫຼາຍແທ້ໆແລະຄືຊິເຮັດໃຫ້ລາວເຂົ້າໃຈຫຼາຍຂຶ້ນວ່າພະເຢໂຫວາເປັນພະເຈົ້າທີ່ມີສະຕິປັນຍາ ມີຄວາມສາມາດແລະມີຄວາມຄິດສ້າງສັນຫຼາຍຂະໜາດໃດ.
4. (ກ) ເຫດຜົນໜຶ່ງທີ່ເຮົາຄວນສັງເກດເບິ່ງສິ່ງທີ່ພະເຢໂຫວາສ້າງແມ່ນຫຍັງ? (ຂ) ໃນສິ່ງຕ່າງໆທີ່ພະເຢໂຫວາສ້າງ ເຈົ້າມັກຫຍັງເປັນພິເສດ?
4 ເຫດຜົນໜຶ່ງທີ່ເຮົາຄວນສັງເກດເບິ່ງສິ່ງທີ່ພະເຢໂຫວາສ້າງກໍຍ້ອນວ່າເພິ່ນຢາກໃຫ້ເຮົາເຮັດແບບນັ້ນ. ພະເຢໂຫວາບອກກັບເຮົາວ່າ “ແຫງນໜ້າເບິ່ງທ້ອງຟ້າແມ້” ແລະຈາກນັ້ນເພິ່ນກໍຖາມວ່າ “ໃຜເປັນຜູ້ສ້າງດວງດາວເຫຼົ່ານີ້?” ເຮົາທຸກຄົນຄືຊິຮູ້ຄຳຕອບນີ້ຢູ່ແລ້ວ. (ອຊຢ. 40:26, ລ.ມ.) ພະເຢໂຫວາບໍ່ພຽງແຕ່ສ້າງສິ່ງຕ່າງໆຢູ່ເທິງຟ້າສະຫວັນເທົ່ານັ້ນ ແຕ່ເພິ່ນຍັງສ້າງສິ່ງຕ່າງໆທີ່ມະຫັດສະຈັນຢູ່ໃນໂລກນີ້ແລະໃນທະເລນຳ ເຊິ່ງສິ່ງເຫຼົ່ານີ້ເຮັດໃຫ້ເຮົາຮູ້ຫຼາຍຢ່າງກ່ຽວກັບເພິ່ນ. (ເພງ. 104:24, 25) ນອກຈາກນັ້ນ ລອງຄິດເຖິງວິທີທີ່ພະເຢໂຫວາສ້າງຕົວເຮົາ. ເພິ່ນສ້າງເຮົາໃຫ້ສາມາດຊື່ນຊົມກັບສິ່ງທີ່ສວຍງາມທີ່ຢູ່ໃນທຳມະຊາດໄດ້. ແລະພະເຢໂຫວາຍັງໃຫ້ເຮົາມີປະສາດສຳຜັດທັງ 5 ນັ້ນກໍຄື: ການເບິ່ງເຫັນ ການໄດ້ຍິນ ການສຳຜັດ ການຊີມລົດຊາດ ແລະການດົມກິ່ນ ເຊິ່ງເຮັດໃຫ້ເຮົາມີຄວາມສຸກກັບສິ່ງຕ່າງໆທີ່ເພິ່ນສ້າງ.
5. ຕາມໂຣມ 1:20 ເຮົາໄດ້ປະໂຫຍດຫຍັງຈາກການເບິ່ງສິ່ງທີ່ພະເຢໂຫວາສ້າງ?
5 ຄຳພີໄບເບິນຍັງບອກໃຫ້ເຮົາຮູ້ອີກເຫດຜົນໜຶ່ງວ່າເປັນຫຍັງເຮົາຕ້ອງສັງເກດເບິ່ງສິ່ງຕ່າງໆທີ່ພະເຢໂຫວາສ້າງ. ກໍຍ້ອນວ່າສິ່ງເຫຼົ່ານັ້ນສອນເຮົາໃຫ້ຮູ້ກ່ຽວກັບຄຸນລັກສະນະຕ່າງໆຂອງພະເຢໂຫວາ. (ອ່ານໂຣມ 1:20) ຕົວຢ່າງເຊັ່ນ: ເມື່ອເຮົາເບິ່ງການອອກແບບທີ່ມີຢູ່ໃນທຳມະຊາດ ເຮັດໃຫ້ເຮົາຮູ້ວ່າພະເຢໂຫວາເປັນພະເຈົ້າທີ່ມີສະຕິປັນຍາຫຼາຍແມ່ນບໍ? ແລະເມື່ອເຮົາຄິດເຖິງອາຫານຊະນິດຕ່າງໆຢູ່ໃນໂລກນີ້ ເຮັດໃຫ້ເຮົາຮູ້ບໍວ່າພະເຢໂຫວາຮັກມະນຸດຫຼາຍແທ້ໆ? ເມື່ອເຮົາເຫັນຄຸນລັກສະນະຕ່າງໆຂອງພະເຢໂຫວາໃນສິ່ງທີ່ເພິ່ນສ້າງ ເຮົາກໍຈະຮູ້ຈັກເພິ່ນດີຂຶ້ນແລະເຮັດໃຫ້ເຮົາຢາກສະໜິດກັບເພິ່ນຫຼາຍຂຶ້ນ. ຕອນນີ້ໃຫ້ເຮົາມາເບິ່ງວ່າພະເຢໂຫວາໃຊ້ສິ່ງຕ່າງໆທີ່ເພິ່ນສ້າງສອນຫຍັງເຮົາ.
ພະເຈົ້າສອນເຮົາໃຫ້ຮູ້ກ່ຽວກັບເພິ່ນໂດຍໃຊ້ສິ່ງທີ່ເພິ່ນສ້າງ
6. ເຮົາໄດ້ບົດຮຽນຫຍັງຈາກການອົບພະຍົບຂອງນົກ?
6 ພະເຢໂຫວາມີເວລາທີ່ກຳນົດໄວ້ແລ້ວ. ຊາວອິດສະຣາເອນຈະເຫັນນົກກະສາບິນອົບພະຍົບຂຶ້ນໄປທາງເໜືອໃນລະຫວ່າງທ້າຍເດືອນກຸມພາເຖິງກາງເດືອນພຶດສະພາຂອງທຸກໆປີ. ພະເຢໂຫວາບອກຊາວອິດສະຣາເອນວ່າ “ນົກກະສາໃນທ້ອງຟ້າກໍຮູ້ເວລາຂອງມັນ.” (ຢເຣ. 8:7, ລ.ມ.) ຄືກັບທີ່ພະເຢໂຫວາໄດ້ກຳນົດເວລາໃຫ້ນົກເຫຼົ່ານັ້ນວ່າຈະອົບພະຍົບເມື່ອໃດ ເພິ່ນກໍກຳນົດເວລາທີ່ຈະພິພາກສາໂລກຊົ່ວນີ້ໄວ້ແລ້ວຄືກັນ. ໃນທຸກມື້ນີ້ ເມື່ອເຮົາເຫັນນົກບິນອົບພະຍົບ ກໍເຮັດໃຫ້ເຮົາໝັ້ນໃຈວ່າພະເຢໂຫວາຈະທຳລາຍໂລກຊົ່ວນີ້ຕາມ “ເວລາທີ່ກຳນົດໄວ້” ແນ່ນອນ.—ຮບກ. 2:3, ລ.ມ.
7. ເຮົາໄດ້ບົດຮຽນຫຍັງເມື່ອເຮົາເຫັນນົກບິນຢູ່ເທິງທ້ອງຟ້າ? (ເອຊາຢາ 40:31)
7 ພະເຢໂຫວາໃຫ້ກຳລັງກັບຜູ້ຮັບໃຊ້ຂອງເພິ່ນ. ພະເຢໂຫວາສັນຍາຜ່ານທາງຜູ້ພະຍາກອນເອຊາຢາວ່າ ເພິ່ນຈະໃຫ້ກຳລັງກັບຜູ້ຮັບໃຊ້ຂອງເພິ່ນທີ່ທໍ້ໃຈແລະໝົດແຮງໃຫ້ “ບິນໄດ້ສູງໆຄືກັບນົກອິນຊີ.” (ອ່ານເອຊາຢາ 40:31, ລ.ມ.) ຊາວອິດສະຣາເອນເຫັນນົກອິນຊີບິນຢູ່ເທິງທ້ອງຟ້າໄດ້ສູງຫຼາຍໂດຍອາໄສແຮງຂອງລົມແລະພວກມັນເກືອບຈະບໍ່ໄດ້ໃຊ້ແຮງຂອງຕົວເອງເລີຍ. ນົກອິນຊີເຫຼົ່ານີ້ເຕືອນເຮົາໃຫ້ຮູ້ວ່າ ຖ້າພະເຢໂຫວາໃຫ້ກຳລັງກັບນົກເຫຼົ່ານີ້ ເພິ່ນກໍແຮ່ງຕ້ອງໃຫ້ກຳລັງກັບເຮົາທີ່ເປັນຜູ້ຮັບໃຊ້ຂອງເພິ່ນ. ເມື່ອໃດທີ່ເຮົາເຫັນນົກບິນຂຶ້ນສູງໆຢູ່ເທິງທ້ອງຟ້າຈົນເກືອບບໍ່ຕ້ອງພັບປີກ ຂໍໃຫ້ຈື່ໄວ້ວ່າພະເຢໂຫວາຈະໃຫ້ກຳລັງກັບເຮົາເພື່ອໃຫ້ຜ່ານບັນຫາຕ່າງໆໄປໄດ້.
8. ໂຢບໄດ້ບົດຮຽນຫຍັງຈາກການຄິດເຖິງສິ່ງທີ່ພະເຢໂຫວາສ້າງ? ແລະເຮົາໄດ້ຮຽນຮູ້ຫຍັງຈາກເລື່ອງນີ້?
8 ພະເຢໂຫວາເປັນພະເຈົ້າທີ່ເຮົາໄວ້ໃຈໄດ້. ພະເຢໂຫວາໄດ້ຊ່ວຍໂຢບໃຫ້ໄວ້ໃຈເພິ່ນຫຼາຍຂຶ້ນ. (ໂຢບ 32:2; 40:6-8) ຕອນທີ່ພະເຢໂຫວາລົມກັບໂຢບ ເພິ່ນໄດ້ເວົ້າເຖິງຫຼາຍຢ່າງທີ່ເພິ່ນສ້າງ ເຊັ່ນ: ດວງດາວ ຂີ້ເຝື້ອ ແລະສາຍຟ້າ. ແລະເພິ່ນຍັງໄດ້ເວົ້າເຖິງສັດຕ່າງໆນຳ ເຊັ່ນ: ງົວປ່າແລະມ້າ. (ໂຢບ 38:32-35; 39:9, 19, 20) ສິ່ງເຫຼົ່ານີ້ບໍ່ພຽງແຕ່ເຮັດໃຫ້ເຮົາເຫັນວ່າພະເຢໂຫວາມີພະລັງອຳນາດຫຼາຍຂະໜາດໃດ ແຕ່ຍັງເຮັດໃຫ້ເຮົາຮູ້ວ່າພະເຢໂຫວາເປັນພະເຈົ້າທີ່ມີຄວາມຮັກແລະມີສະຕິປັນຍາອັນເລີດລ້ຳ. ຈາກການລົມກັນຂອງໂຢບແລະພະເຢໂຫວາເທື່ອນັ້ນ ເຮັດໃຫ້ໂຢບໄວ້ໃຈພະເຢໂຫວາຫຼາຍຂຶ້ນ. (ໂຢບ 42:1-6) ຄ້າຍຄືກັນ ເມື່ອເຮົາສຶກສາຄົ້ນຄວ້າກ່ຽວກັບສິ່ງທີ່ພະເຢໂຫວາສ້າງ ເຮົາກໍຈະເຫັນວ່າພະເຢໂຫວາມີສະຕິປັນຍາແລະອຳນາດຫຼາຍກວ່າເຮົາ ແລະເພິ່ນສາມາດກຳຈັດບັນຫາແລະຄວາມທຸກທັງໝົດໄດ້ ແລະເພິ່ນຈະເຮັດແບບນັ້ນແທ້ໆ. ນີ້ຈຶ່ງເຮັດໃຫ້ເຮົາໄວ້ໃຈເພິ່ນຫຼາຍຂຶ້ນ.
ພະເຢຊູໃຊ້ສິ່ງທີ່ພະເຈົ້າສ້າງເພື່ອສອນເຮົາກ່ຽວກັບພະເຢໂຫວາ
9-10. ແສງແດດແລະຝົນສອນໃຫ້ເຮົາຮູ້ຫຍັງກ່ຽວກັບພະເຢໂຫວາ?
9 ພະເຢຊູຄຸ້ນເຄີຍກັບສິ່ງທີ່ຢູ່ໃນທຳມະຊາດເປັນຢ່າງດີ. ຍ້ອນພະເຢຊູເປັນ “ນາຍຊ່າງ” ເພິ່ນຈຶ່ງໄດ້ຮ່ວມເຮັດວຽກກັບພໍ່ເພິ່ນຕອນທີ່ສ້າງສິ່ງຕ່າງໆໃນເອກະພົບ. (ສຸພາ. 8:30, ລ.ມ.) ແລ້ວຕອນທີ່ເພິ່ນຢູ່ເທິງໂລກນີ້ ເພິ່ນໄດ້ໃຊ້ສິ່ງຕ່າງໆທີ່ຢູ່ໃນທຳມະຊາດເພື່ອສອນພວກລູກສິດໃຫ້ຮູ້ກ່ຽວກັບພະເຢໂຫວາ. ໃຫ້ເຮົາມາເບິ່ງບາງຕົວຢ່າງທີ່ພະເຢຊູໃຊ້ນຳກັນ.
10 ພະເຢໂຫວາສະແດງຄວາມຮັກຕໍ່ທຸກຄົນ. ໃນຄຳບັນຍາຍເທິງພູເຂົາ ພະເຢຊູໄດ້ສອນພວກລູກສິດໂດຍໃຊ້ຕົວຢ່າງຂອງແສງແດດແລະຝົນ ເຊິ່ງເປັນສິ່ງທີ່ຫຼາຍຄົນບໍ່ໄດ້ຄິດເຖິງ. ແຕ່ສອງຢ່າງນີ້ພັດເປັນສິ່ງທີ່ຈຳເປັນຫຼາຍສຳລັບສິ່ງທີ່ມີຊີວິດ. ທີ່ຈິງ ພະເຢໂຫວາບໍ່ໃຫ້ແສງເດດແລະຝົນກັບຜູ້ທີ່ບໍ່ໄດ້ຮັບໃຊ້ເພິ່ນກໍໄດ້. (ມທ. 5:43-45) ແຕ່ເພິ່ນກໍຍັງໃຫ້ສິ່ງເຫຼົ່ານີ້ກັບເຂົາເຈົ້າ. ພະເຢຊູຈຶ່ງໃຊ້ເລື່ອງນີ້ເພື່ອສອນພວກລູກສິດວ່າ ພະເຢໂຫວາຢາກໃຫ້ເຮົາສະແດງຄວາມຮັກກັບທຸກຄົນ ບໍ່ວ່າເຂົາເຈົ້າຈະແມ່ນໃຜ. ເມື່ອເຮົາເຫັນທຳມະຊາດທີ່ສວຍງາມ ເຊັ່ນ: ຕາເວັນຕົກດິນຫຼືເຫັນຝົນຕົກຄ່ອຍໆທີ່ເຮັດໃຫ້ສົດຊື່ນ ສິ່ງເຫຼົ່ານີ້ເຮັດໃຫ້ເຮົາຄິດເຖິງຄວາມຮັກທີ່ພະເຢໂຫວາມີຕໍ່ມະນຸດທຸກຄົນ. ຕົວຢ່າງນີ້ເຮັດໃຫ້ເຮົາຢາກຈະສະແດງຄວາມຮັກແບບດຽວກັນໂດຍປະກາດກັບທຸກຄົນ.
11. ເຮົາໄດ້ກຳລັງໃຈແນວໃດເມື່ອເຮົາເຫັນນົກບິນຢູ່ເທິງທ້ອງຟ້າ?
11 ພະເຢໂຫວາເບິ່ງແຍງເຮົາໂດຍໃຫ້ມີສິ່ງຈຳເປັນໃນຊີວິດ. ໃນຄຳບັນຍາຍເທິງພູເຂົາພະເຢຊູຍັງບອກວ່າ “ເບິ່ງນົກໃນທ້ອງຟ້າແມ້ ພວກມັນບໍ່ໄດ້ຫວ່ານຫຼືເກັບກ່ຽວຫຼືສະສົມເມັດພືດໄວ້ໃນເລົ້າເຂົ້າ ແຕ່ພະເຈົ້າຜູ້ເປັນພໍ່ຂອງເຈົ້າໃນສະຫວັນກໍຍັງລ້ຽງພວກມັນ.” ໃນຕອນນັ້ນ ຄົນທີ່ຟັງພະເຢຊູອາດແນມເຫັນນົກທີ່ບິນໄປມາຢູ່ເທິງທ້ອງຟ້າ. ເພິ່ນຈຶ່ງຖາມເຂົາເຈົ້າວ່າ “ພວກເຈົ້າມີຄ່າຫຼາຍກວ່ານົກບໍ່ແມ່ນບໍ?” (ມທ. 6:26) ຕົວຢ່າງທີ່ພະເຢຊູໃຊ້ຊ່ວຍເຮົາໃຫ້ໝັ້ນໃຈວ່າພະເຢໂຫວາຈະເບິ່ງແຍງເຮົາໃຫ້ມີສິ່ງຈຳເປັນໃນຊີວິດ. (ມທ. 6:31, 32) ແລະຕົວຢ່າງນີ້ກໍໃຫ້ກຳລັງໃຈຜູ້ຮັບໃຊ້ທີ່ສັດຊື່ຂອງພະເຢໂຫວາໃນທຸກມື້ນີ້ນຳ ເຊັ່ນ: ພີ່ນ້ອງຍິງທີ່ຍັງໜຸ່ມຜູ້ໜຶ່ງທີ່ເປັນໄພໂອເນຍເຊິ່ງຢູ່ປະເທດແອັດສະປາຍຮູ້ສຶກທໍ້ໃຈຫຼາຍທີ່ຫາບ່ອນຢູ່ທີ່ເໝາະສົມບໍ່ໄດ້. ແຕ່ເມື່ອລາວແນມເຫັນນົກຈິກກິນເມັດພືດແລະໝາກໄມ້ ກໍເຮັດໃຫ້ລາວມີກຳລັງໃຈ. ລາວບອກວ່າ “ຖ້າພະເຢໂຫວາເບິ່ງແຍງນົກເຫຼົ່ານີ້ ເພິ່ນກໍຕ້ອງເບິ່ງແຍງຂ້ອຍຄືກັນ.” ແລ້ວມັນກໍເປັນແບບນັ້ນແທ້. ບໍ່ດົນ ພີ່ນ້ອງຍິງຄົນນີ້ກໍຫາບ່ອນຢູ່ໄດ້.
12. ຕົວຢ່າງເລື່ອງນົກກະຈອກໃນມັດທາຍ 10:29-31 ສອນຫຍັງເຮົາກ່ຽວກັບພະເຢໂຫວາ?
12 ພະເຢໂຫວາເຫັນຄ່າເຮົາແຕ່ລະຄົນ. ກ່ອນທີ່ພະເຢຊູຈະສົ່ງພວກອັກຄະສາວົກໄປປະກາດ ເພິ່ນໄດ້ຊ່ວຍເຂົາເຈົ້າບໍ່ໃຫ້ຢ້ານການຕໍ່ຕ້ານ. (ອ່ານມັດທາຍ 10:29-31) ເພິ່ນໄດ້ຍົກຕົວຢ່າງຂອງນົກຊະນິດໜຶ່ງທີ່ເຫັນໄດ້ທົ່ວໆໄປໃນອິດສະຣາເອນ ນັ້ນກໍຄືນົກກະຈອກ. ໃນສະໄໝຂອງພະເຢຊູ ນົກກະຈອກມີລາຄາຖືກຫຼາຍ ແຕ່ເພິ່ນບອກກັບພວກລູກສິດວ່າ “ບໍ່ມີຈັກໂຕຈະຕົກເຖິງດິນໂດຍທີ່ພະເຈົ້າຜູ້ເປັນພໍ່ຂອງພວກເຈົ້າບໍ່ຮູ້ຈັກ.” ແລະເພິ່ນຍັງເວົ້າຕໍ່ວ່າ “ພວກເຈົ້າມີຄ່າຫຼາຍກວ່ານົກກະຈອກຫຼາຍໂຕລວມກັນ.” ຄຳເວົ້າຂອງພະເຢຊູເຮັດໃຫ້ພວກລູກສິດໝັ້ນໃຈວ່າ ພະເຢໂຫວາເຫັນຄ່າເຂົາເຈົ້າແຕ່ລະຄົນ. ດັ່ງນັ້ນ ເຂົາເຈົ້າຈຶ່ງບໍ່ຢ້ານການຂົ່ມເຫງ. ທຸກຄັ້ງທີ່ເຂົາເຈົ້າໄປປະກາດຕາມບ້ານແລະຕາມເມືອງຕ່າງໆແລ້ວເຫັນນົກກະຈອກ ເຂົາເຈົ້າຄົງຈະຄິດເຖິງຄຳເວົ້າຂອງພະເຢຊູ. ຄ້າຍຄືກັນ ເມື່ອໃດທີ່ເຈົ້າເຫັນນົກໂຕນ້ອຍໆຂໍໃຫ້ຈື່ໄວ້ວ່າພະເຢໂຫວາເຫັນຄ່າເຈົ້າ ເພາະເຈົ້າ “ມີຄ່າຫຼາຍກວ່ານົກກະຈອກຫຼາຍໂຕລວມກັນ.” ແລະຖ້າເຈົ້າເຈິການຕໍ່ຕ້ານກໍບໍ່ຕ້ອງຢ້ານ ເພາະພະເຢໂຫວາຈະຊ່ວຍເຈົ້າແນ່ນອນ.—ເພງ. 118:6
ເຮົາຈະຮຽນຮູ້ກ່ຽວກັບພະເຢໂຫວາຫຼາຍຂຶ້ນໂດຍເບິ່ງຈາກສິ່ງທີ່ເພິ່ນສ້າງແນວໃດ?
13. ເພື່ອຈະຮຽນຮູ້ຈາກສິ່ງທີ່ພະເຢໂຫວາສ້າງ ເຮົາຕ້ອງເຮັດຫຍັງ?
13 ເຮົາສາມາດຮຽນຮູ້ຫຼາຍຢ່າງກ່ຽວກັບພະເຢໂຫວາຈາກສິ່ງທີ່ເພິ່ນສ້າງ. ເຮົາຈະເຮັດແບບນັ້ນໄດ້ແນວໃດ? ກ່ອນອື່ນ ເຮົາຕ້ອງຫາເວລາສັງເກດເບິ່ງສິ່ງທີ່ຢູ່ໃນທຳມະຊາດ. ຈາກນັ້ນ ກໍໃຫ້ຄິດວ່າສິ່ງນັ້ນສອນຫຍັງເຮົາກ່ຽວກັບພະເຢໂຫວາ. ແຕ່ບາງເທື່ອອາດບໍ່ງ່າຍທີ່ຈະເຮັດແບບນັ້ນ. ເຈໂຣດິນພີ່ນ້ອງຍິງຈາກກາເມີຣຸນເວົ້າວ່າ “ຍ້ອນຂ້ອຍເຕີບໃຫຍ່ຢູ່ໃນເມືອງ ຂ້ອຍກໍເລີຍຕ້ອງພະຍາຍາມຫຼາຍເພື່ອຈະສັງເກດເບິ່ງສິ່ງທີ່ຢູ່ໃນທຳມະຊາດ.” ຜູ້ດູແລທີ່ຊື່ເອວຟອນໂຊບອກວ່າ “ຂ້ອຍຕ້ອງຈັດເວລາທີ່ຈະຢູ່ຄົນດຽວແລະສັງເກດເບິ່ງສິ່ງທີ່ພະເຢໂຫວາສ້າງ ແລ້ວຄິດວ່າມັນສອນຫຍັງຂ້ອຍກ່ຽວກັບພະເຢໂຫວາ.”
ເມື່ອດາວິດເບິ່ງສິ່ງຕ່າງໆທີ່ຢູ່ອ້ອມໂຕລາວ ລາວກໍໄດ້ຄິດຕຶກຕອງວ່າສິ່ງນັ້ນສອນຫຍັງລາວກ່ຽວກັບພະເຢໂຫວາ (ເບິ່ງຂໍ້ 14)
14. ດາວິດໄດ້ຮຽນຮູ້ຫຍັງເມື່ອລາວຄິດຕຶກຕອງກ່ຽວກັບສິ່ງທີ່ພະເຢໂຫວາສ້າງ?
14 ດາວິດໄດ້ຄິດຕຶກຕອງຢ່າງເລິກເຊິ່ງກ່ຽວກັບສິ່ງຕ່າງໆທີ່ພະເຢໂຫວາສ້າງ. ລາວເວົ້າກັບພະເຢໂຫວາວ່າ “ເມື່ອຂ້ອຍແນມເບິ່ງທ້ອງຟ້າເຊິ່ງເປັນຜົນງານຂອງພະອົງ ແລະດວງເດືອນກັບດວງດາວທີ່ພະອົງສ້າງໄວ້ ຂ້ອຍກໍຄິດວ່າ ມະນຸດເປັນໃຜພະອົງຈຶ່ງຄິດເຖິງລາວ ແລະລູກມະນຸດເປັນໃຜທີ່ພະອົງຕ້ອງເບິ່ງແຍງລາວ?” (ເພງ. 8:3, 4, ລ.ມ.) ດາວິດບໍ່ພຽງແຕ່ມັກເບິ່ງທ້ອງຟ້າທີ່ສວຍງາມໃນຕອນກາງຄືນ ແຕ່ຍັງຄິດວ່າດວງດາວຕ່າງໆນັ້ນສອນຫຍັງລາວກ່ຽວກັບພະເຢໂຫວາ. ລາວໄດ້ຮຽນຮູ້ວ່າພະເຢໂຫວາເປັນພະເຈົ້າທີ່ຍິ່ງໃຫຍ່ແລະມີສະຕິປັນຍາຫຼາຍ. ນອກຈາກນັ້ນ ດາວິດຍັງໄດ້ເວົ້າເຖິງຮ່າງກາຍຂອງລາວເອງທີ່ຖືກສ້າງຢ່າງໜ້າອັດສະຈັນຢູ່ໃນທ້ອງແມ່. ເມື່ອລາວຄິດວ່າຮ່າງກາຍຂອງລາວຖືກສ້າງຢ່າງໜ້າອັດສະຈັນແນວໃດ ລາວກໍແຮ່ງຮູ້ສຶກປະທັບໃຈໃນສະຕິປັນຍາຂອງພະເຢໂຫວາ.—ເພງ. 139:14-17
15. ຂໍໃຫ້ຍົກຕົວຢ່າງວ່າ ເຈົ້າເຫັນຄຸນລັກສະນະຫຍັງແດ່ຂອງພະເຢໂຫວາຈາກສິ່ງທີ່ເພິ່ນສ້າງ. (ຄຳເພງ 148:7-10)
15 ເຈົ້າກໍສາມາດເຮັດຄ້າຍຄືກັບດາວິດໄດ້ ໂດຍທີ່ບໍ່ຈຳເປັນຕ້ອງເດີນທາງໄກໄປຊົມທຳມະຊາດເພື່ອຈະຄິດຕຶກຕອງກ່ຽວກັບພະເຢໂຫວາ. ພຽງເຈົ້າເບິ່ງໄປອ້ອມຮອບຕົວ ເຈົ້າກໍສາມາດຮຽນຮູ້ກ່ຽວກັບຄຸນລັກສະນະຕ່າງໆຂອງພະເຢໂຫວາໄດ້. ຕົວຢ່າງເຊັ່ນ: ເມື່ອເຈົ້າສຳຜັດກັບແສງແດດ ເຈົ້າຄົງຈະຄິດເຖິງພະລັງອຳນາດອັນຍິ່ງໃຫຍ່ຂອງພະເຢໂຫວາ. (ຢເຣ. 31:35) ຫຼືເມື່ອເຈົ້າເຫັນນົກເຮັດຮັງ ເຈົ້າຄົງຈະຄິດເຖິງສະຕິປັນຍາຂອງພະເຢໂຫວາ. ຫຼືເມື່ອເຈົ້າເຫັນໝານ້ອຍໄລ່ກັດຫາງຂອງໂຕເອງ ເຈົ້າຄົງຈະຮູ້ວ່າພະເຢໂຫວາເປັນພະເຈົ້າທີ່ມີອາລົມຂັນ. ຫຼືຕອນທີ່ເຈົ້າເຫັນແມ່ກຳລັງຫຼິ້ນກັບລູກນ້ອຍ ເຈົ້າຄົງຈະເຫັນຄ່າຄວາມຮັກຂອງພະເຢໂຫວາແລະຮູ້ສຶກຂອບໃຈເພິ່ນຫຼາຍແທ້ໆ. ເຮົາເຫັນໄດ້ເລີຍວ່າ ມີຫຼາຍຢ່າງທີ່ເຮົາສາມາດຮຽນຮູ້ກ່ຽວກັບພະເຢໂຫວາຈາກສິ່ງທີ່ເພິ່ນສ້າງໄດ້ ບໍ່ວ່າສິ່ງນັ້ນຈະນ້ອຍຫຼືໃຫຍ່ ຢູ່ໃກ້ຫຼືໄກ ກໍເຮັດໃຫ້ພະເຢໂຫວາໄດ້ຮັບການຍົກຍ້ອງສັນລະເສີນ.—ອ່ານຄຳເພງ 148:7-10
16. ເຮົາຄວນຕັ້ງໃຈທີ່ຈະເຮັດຫຍັງ?
16 ພະເຢໂຫວາເປັນພະເຈົ້າທີ່ມີສະຕິປັນຍາ ຮັກພວກເຮົາ ມີພະລັງອຳນາດ ແລະທຸກສິ່ງທີ່ເພິ່ນສ້າງສວຍງາມຫຼາຍ. ເຮົາສາມາດເຫັນຄຸນລັກສະນະທັງໝົດນີ້ລວມເຖິງຄຸນລັກສະນະອື່ນໆອີກໃນທຳມະຊາດຖ້າເຮົາສັງເກດເບິ່ງດີໆ. ຂໍໃຫ້ເຮົາຈັດເວລາເພື່ອຈະສັງເກດເບິ່ງສິ່ງທີ່ພະເຢໂຫວາສ້າງແລະຄິດວ່າສິ່ງນັ້ນສອນຫຍັງເຮົາກ່ຽວກັບພະເຢໂຫວາ. ເມື່ອເຮົາເຮັດແບບນີ້ ເຮົາກໍຈະສະໜິດກັບພະເຢໂຫວາຫຼາຍຂຶ້ນ. (ຢກບ. 4:8) ໃນບົດຄວາມຕໍ່ໄປເຮົາຈະມາເບິ່ງວ່າ ພໍ່ແມ່ຈະໃຊ້ສິ່ງຕ່າງໆທີ່ພະເຢໂຫວາສ້າງເພື່ອຊ່ວຍລູກໃຫ້ສະໜິດກັບພະເຢໂຫວາຫຼາຍຂຶ້ນໄດ້ແນວໃດ.
ເພງ 5 ຜົນງານອັນລ້ຳເລີດຂອງພະເຈົ້າ
a ສິ່ງຕ່າງໆທີ່ພະເຢໂຫວາສ້າງຂຶ້ນມາເປັນຕາໜ້າປະທັບໃຈຫຼາຍແທ້ໆ. ນັບຕັ້ງແຕ່ດວງຕາເວັນທີ່ມີພະລັງງານອັນມາຫະສານຈົນເຖິງສິ່ງທີ່ບອບບາງຄືກີບດອກໄມ້. ສິ່ງຕ່າງໆທີ່ພະເຢໂຫວາສ້າງຍັງຊ່ວຍເຮົາໃຫ້ຮູ້ວ່າ ພະເຢໂຫວາເປັນພະເຈົ້າແບບໃດ. ໃນບົດຄວາມນີ້ເຮົາຈະມາເບິ່ງວ່າ ເປັນຫຍັງເຮົາຄວນໃຊ້ເວລາທີ່ຈະສັງເກດເບິ່ງສິ່ງຕ່າງໆທີ່ພະເຢໂຫວາສ້າງ ແລະການເຮັດແບບນີ້ຈະຊ່ວຍເຮົາໃຫ້ສະໜິດກັບພະເຢໂຫວາຫຼາຍຂຶ້ນໄດ້ແນວໃດ.
