1. Mujila muka Yopa atachikijililemo kanawa Yehova?

 YOPA ashimutwililenga navakwavo mapapa kakavulu mukuyoya chenyi, oloze kushimutwila chakulipwila shina chize apwile nacho naYehova Kalunga. Yehova alwezele Yopa atale vyuma vyakukomwesa atenga mangana amukafwe atachikize kutohwa chamangana enyi nangolo jenyi. Echi chakafwile Yopa afwelele chikupu ngwenyi Yehova nahase kuhana vangamba jenyi vyuma vyosena navasakiwa. Chakutalilaho, Kalunga anukishile Yopa ngwenyi eji kuhananga tunyama vyuma veji kusakiwanga, kaha nahase kulinga mwomumwe nakuli Yopa. (Yopa 38:39-41; 39:1, 5, 13-16) Yopa alinangwile vyavivulu havilinga vyaKalunga kuhichila mukushinganyeka havyuma atenga.

2. Mwomwo ika chinahase kutukaluhwila kukekesanga vyuma atenga Yehova?

² Nayetu nawa tunahase kulinangula vyavivulu hali Kalunga ketu hakukekesanga vyuma atenga. Chipwe ngocho, lwola lumwe chinahase kutukaluhwila kulinga ngocho. Chakutalilaho, nge twatwama mumbaka, kaha chinahase kutukaluhwila kumonanga vyuma vyavivulu vize atenga Yehova mukuyoya chetu chahakumbi hakumbi. Kaha nawa numba nge twatwama kwakamwihi navyuma vize atenga Yehova, tunahase kushinganyeka ngwetu katweshi nalwola lwakulinangula vyuma kanako. Shikaho tushimutwilenu jino ovyo chapwila chachilemu kuwanangako lwola nakufwila kuzata nangolo mangana tukekesenga vyuma atenga Kalunga. Natushimutwila nawa omwo Yehova naYesu vazachishile vyuma vyakutenga hakunangula vatu, navyuma twatela kulinga mangana tulinangule vyavivulu kuvyuma vyakutenga.

3. Chuma muka chasolola nge Yehova asakile Alama alivwise kuwaha vyuma atenga?

³ Yehova asakile mutu watete alivwise kuwaha vyuma atenga. Omu Kalunga atengele Alama, amuhanyine palachise yamwaza mangana alivwiseyo kuwaha, kaha amuhanyine mulimo wakuyilima nakuyitohwesa. (Kupu. 2:8, 9, 15) Achishinganyekenu kuwaha evwile Alama hakumona jimbuto jili nakusoka, jitemo nawa jili nakufukula. Chikupu vene, Alama apwile nakutokwa chachinene chakuzakama milemba yaEtene. Yehova ahanyine nawa Alama mulimo wakuluka tunyama majina. (Kupu. 2:19, 20) Nge Yehova azangile, kachi avalukile ivene, oloze mulimo kana auhanyine Alama. Twafwelela chikupu ngwetu, shimbu kanda Alama aluke kanyama hikanyama, avangililenga kukekesa omwo vasolokelenga navilinga vyavo. Chasoloka nge Alama alivwishile kuwaha kuzata mulimo kana. Wamukafwile chikuma atachikize ngwenyi Yehova atwama namangana, kaha nawa vyuma atenga vyapwa vyamwaza.

4. (a) Chuma muka chimwe chatela kutulingisa tukekesenga vyuma atenga Kalunga? (b) Vyuma muka atenga Kalunga vize mweji kulivwisanga chikuma kuwaha?

⁴ Chuma chimwe chatela kutulingisa tukekesenga vyuma atenga Yehova shina, mwomwo ikiye atulweza tulingenga ngocho. Atulweza ngwenyi, “Andulenu meso enu mutale mwilu mumone.” Kaha atuhulisa ngwenyi: “Iyaze natenge vyuma vyosenevi?” Twatachikiza owo avitenga. (Isa. 40:26) Yehova atengele vyuma vyavivulu vyamwilu nahano hamavu, vize tunahase kulinangulako vishina vimwe. (Samu 104:24, 25) Achishinganyekenu nawa hajila Kalunga atutengelamo. Atutenga namuchima wakulivwisa kuwaha kumona vyuma vyamwaza. Atutenga nawa nauhashi wakutukafwa tulivwise kuwaha vyuma atenga kuhichila mukumona nakwivwa nakukwata nakumakila nakuhumbika.

5. Kweseka nachisoneka chaWavaka-Loma 1:20, tweji kunganyalanga ngachilihi hakukekesa vyuma atenga Yehova?

⁵ Mbimbiliya yasolola chuma chikwavo chachilemu chize chatela kutulingisa tukekese vyuma vyakutenga. Vyeji kutunangulanga vilinga vyaYehova. (Tangenu Wavaka-Loma 1:20.) Chakutalilaho, achitalenu havyuma atenga Yehova vize atenga mujila yakukomwesa. Vyuma kana vyasolola nge Kalunga apwa wamangana chikuma. Kaha nawa achishinganyekenu havyakulya vyakulisezaseza vize tunahase kulivwisa kuwaha. Echi chasolola hatoma nge azanga chikuma vatu. Nge natumona vilinga vyaYehova muvyuma atenga, kaha natumutachikiza kanawa nakutulingisa tupandame chikuma kuli ikiye. Tutalenu hajijila jimwe jize Yehova nazachisanga vyuma vyakutenga mangana anangule vatu vishina vyavilemu.

6. Vyuma muka natulinangula kutujila vaze veji kutukanga nakuya kuchihela cheka?

⁶ Yehova anoneka lwola navikasoloka vyuma. Mwaka himwaka, kufuma kusongo yakakweji waFebruary nakuheta mukachi kaMay, vaIsalele vamwenenga vandalangimbu vali nakutuka nakuya kunote yalifuchi. Kalunga alwezele vaIsalele ngwenyi: “Ndalangimbu atachikiza ngonde yenyi.” (Yele. 8:7) Ngana muze Yehova anoneka lwola lwavava tujila, ngocho anoneka nawa lwola lwakusopesa vaka-kuhuka. Makumbi ano, omu tweji kumonanga tujila vali nakutuka nakuya kungalila yeka, tweji kufwelelanga ngwetu Yehova ‘atongola lwola’ lwakukanongesa kano kaye kakuhuka.—Hamba. 2:3.

7. Uno kumona kajila ali nakutuka nachitukolezeza ngachilihi? (Isaya 40:31)

⁷ Yehova eji kujikijisanga vangamba jenyi. Yehova ashikile kuhichila muli Isaya ngwenyi, nge vatu jenyi vanazeye nakuhomba, mwakavajikijisa mangana ‘vakatuke namavava nge vangonga.’ (Tangenu Isaya 40:31.) VaIsalele vamwenenga vangonga vali nakutuka helu chakuzeneka kupupumwiza chikuma mavava avo mwomwo yakuzachisa peho. Echi chatukafwa tutachikize ngwetu hakuwana nge Yehova ahana ngolo tujila kana, ngocho nahase nawa kuhana ngolo vangamba jenyi. Kachi nge namumona kajila wangolo ali nakutuka nakuya helu chikuma, chakuzeneka kupupumwiza mavava, kaha fwelelenu ngwenu Yehova nahase kumihana ngolo jakumikafwa mumike muukalu wenu.

8. Vyuma muka alinangwile Yopa hakushinganyeka havyuma atenga Kalunga, kaha vyuma muka natulinangulako?

⁸ Yehova atamo kumufwelela. Yehova akafwile Yopa mangana amufwelele chikuma. (Yopa 32:2; 40:6-8) Omu Kalunga ashimutwilile naYopa, avulukile vatanganyika namavwi namiveso navyuma vyeka vize atenga. Yehova ahanjikile nawa hatunyama vavanene vakufwana nge ngombe wamuchipapa nakavalu. (Yopa 38:32-35; 39:9, 19, 20) Vyuma vyosenevi vyasolwele ngolo jaKalunga jakukomwesa nazangi yenyi namangana enyi akukomwesa. Kushimutwila kana chakafwile Yopa afwelele chikuma Yehova. (Yopa 42:1-6) Chochimwe nawa, nge natukekesanga vyuma vyakutenga, kaha natumona ngwetu Yehova atwama namangana chikuma nangolo kuhambakana etu. Kaha nawa nahase kufumisako ukalu wosena nakuukumisa. Echi chinahase kutukafwa tufwelele chikuma Yehova.

9-10. Uno musana navula vyatunangula vyuma muka hali Yehova?

⁹ Yesu atachikijile vyavivulu havyuma vyakutenga. Hakupwa “kuluwa muka-kuzata,” azachilile hamwe naIse hakutenga vyuma vyamwilu nahamavu. (Vishi. 8:30) Kaha omu apwile hano hamavu, azachishile vyuma vyakutenga mangana anangule tumbaji twenyi hali Ise. Achitalenu havishina vimwe anangwile.

¹⁰ Yehova eji kusolwelanga vatu vosena zangi. MuChihande ChahaPili, Yesu alingishile tumbaji twenyi vashinganyeke havyuma vivali vyakutenga vize vatu vavavulu kavahaka manganako. Vyuma kana shina musana navula. Vyuma kana vyapwa vyavilemu chikuma mwomwo vyeji kutukafwanga tuyoye. Yehova pamo kachi kahanyine vyuma kana kuli vatu vaze kavamuzachilako. Oloze ahana musana navula kuvatu vosena. (Mateu 5:43-45) Yesu azachishile chishina kana mangana anangule tumbaji twenyi vatachikize ngwavo Yehova asaka tusolwelenga zangi vatu vosena. Nge tunamono likumbi lili nakulauka chipwe kavula kali nakunoka, tweji kushinganyekanga hazangi yaYehova yize eji kusolwelanga vatu vosena. Chakutalilaho chaYehova chinahase kutukunyula tumulondezezenga hakusolola zangi kuhichila mukwambulila vatu vosena.

11. Uno kushinganyeka hatujila vamwilu nachitukolezeza ngachilihi?

 ¹¹ Yehova eji kutuhananga vyakulikafwa navyo mukuyoya. Muchihande chochimwe, Yesu ahanjikile nawa ngwenyi: “Achitalenu kanawa tujila vahelu. Vakiko kaveshi kukuvako, chipwe kwahako, chipwe kukungulwila muviseteko, oloze Senu wamwilu eji kuvalisanga.” Chasoloka nge vaka-kumwivwilila vapwile nakumona tujila vali nakuhita helu, omu Yesu avahulishile ngwenyi: “Uno enu kamwalema kuvahambakanako numba?” (Mateu 6:26) Eyi hijila yazangi yize Yesu atukafwilamo tutachikize ngwetu Yehova mwatuhananga vyakulikafwa navyo mukuyoya. (Mateu 6:31, 32) Echi chishina twalinangula kuvyuma vyakutenga cheji kukafwanga vangamba jaYehova vakushishika. Chakutalilaho, mwanapwevo umwe uze apwa payiniya, ahombele chikuma mwomwo ahonene kuwana kwakutwama. Oloze omu amwene tujila vali nakulya mikoswa namihako, kahombele chekako. Ambile ngwenyi, “Vaze tujila vangukafwile ngumone ngwami Yehova avazakama, kaha nayami mwanguzakama.” Kutwala muze ou ndumbwetu awanyine kwakutwama.

12. Kweseka naMateu 10:29-31, tujilili vasolola vyuma muka hali Yehova?

¹² Yehova amona mutu himutu kupwa wamulemu. Shimbu kanda Yesu atume vaposetolo jenyi kuya nakwambulula, avakafwile vahone kwivwa woma vaka-kuvafumbukila. (Tangenu Mateu 10:29-31.) Alingile ngocho hakuhanjika hakajila umwe vatachikijile chikuma vatu muIsalele. Kajila kana shina kajilili. Tujila kana vapwilenga vandando yayindende mumakumbi aYesu. Oloze Yesu alwezele tumbaji twenyi ngwenyi: “Naumwe wauchi mwaholokela hamavu chakuzeneka Senu kutachikizako.” Ambile nawa ngwenyi: “Enu mwapwa muvavalemu kuhambakana tujilili vavavulu.” Shikaho Yesu afwelelesele tumbaji twenyi ngwenyi Yehova avamona kupwa vavalemu mutu himutu, ngocho kavatela kwivwa woma vaka-kuvayanjisako. Tunafwelela ngwetu omu tumbaji vapwilenga nakwambulila mujimbaka namumembo, vanukilenga mazu aYesu omu vamwenenga tujilili. Shikaho nge munamono kakajila kakandende, kaha anukenu ngwenu Yehova amimona kupwa muvavalemu haukawenu mwomwo nayenu “mwapwa muvavalemu kuhambakana tujilili vavavulu.” Mwamikafwa muhone kwivwa woma vaka-kumifumbukila.—Samu 118:6.

13. Chuma muka nachitukafwa tulinangulenga vishina kuvyuma vyakutenga?

¹³ Tunahase kulinangula nawa vishina vikwavo hali Yehova kuhichila muvyuma atenga. Mujila muka? Chatete, twatela kuwanangako lwola lwakukekesa vyuma atenga. Chamuchivali, twatela kushinganyekanga havyuma vyatunangula hali Yehova. Shimbu jimwe chinahase kutukaluhwila kulinga vyuma kana. Ndumbwetu wapwevo Géraldine, wakuCameroon, ambile ngwenyi, “Hakuwana nge ngwakolelelele mumbaka, ngwamwene ngwami chasakiwa kukilikita numba tukekesenga vyuma vyakutenga.” Kaha Alfonso uze apwa mukulwane muchikungulwilo alumbunwine ngwenyi, “Ngunalinangula nge ngwatela kunonekanga lwola lwakutwama ukawami nakukekesa vyuma atenga Yehova nakuhunanana havyuma vyangunangula hali ikiye.”

14. Chishina muka alinangwile Ndavichi omu atalilenga vyuma atenga Kalunga?

 ¹⁴ Ndavichi ahunananyine chikuma havyuma atenga Kalunga. Ahanjikile kuli Yehova ngwenyi: “Omu ngweji kutalanga melu ove, milimo yaminwe yove, kakweji navatanganyika evi unatenge, mutu ikiye iyaze numba umwanukenga?” (Samu 8:3, 4) Chikupu vene, omu Ndavichi atalilenga mwilu naufuku, kakuminyinyinenga kaha hakwivwa chiseke kutala vatanganyikako, oloze ahunananyinenga nawa havyuma vize vatanganyika vamunangwile hali Yehova. Amwene chikupu ngwenyi Yehova apwa wamunene. Shimbu jeka nawa Ndavichi ashinganyekelenga omwo mujimba wenyi walitungile mujimo lyanaye. Omu ashinganyekelenga hajila yakukomwesa vatungilamo mujimba wenyi, amwenenga jino ngwenyi Yehova atwama namangana amanene.—Samu 139:14-17.

15. Hanenu vyakutalilaho vyakusolola omwo munalinangula vilinga vyaYehova kuvyuma atenga. (Samu 148:7-10)

¹⁵ Ngana mwaNdavichi, nayetu chapwa chachashi kuwana vyuma vyakutenga vize tunahase kukekesa nakuhunananaho. Kuli vyuma vyavivulu vize vinahase kutukafwa tutachikize kanawa Yehova. Chakutalilaho, kuzuma chamusana chatela kumikafwa mumone ngwenu Yehova atwama nangolo. (Yele. 31:35) Shinganyekenunga hamangana aKalunga nge munamono kajila ali nakutunga uswa. Nge munamono mwanakawa nawahilila, kaha mwatela kumona ngwenu Yehova apwa Kalunga wakuwahilila. Sakwililenunga nawa Yehova hazangi yenyi, kachi nge munamono chisemi ali nakuhema namwanenyi wakemba. Tuli najijila jajivulu jakulinangwilamo hali Yehova mwomwo vyuma vyosena atenga, numba vyavinene chipwe vyavindende, vyahakamwihi chipwe vyahahasuku, vyosena vyeji kumwalisanga.—Tangenu Samu 148:7-10.

16. Chuma muka twatela kufwila kulinga?

¹⁶ Kalunga ketu apwa wamangana, nazangi nangolo kaha vyuma atenga vyapwa vyamwaza. Tunahase kulinangula vilinga kanevi navyeka kuhichila muvyuma atenga Kalunga, chikalu kaha nge natuvikekesanga. Shikaho, tuvosena tuwanenungako lwola lwakulivwisa kuwaha kutala vyuma vyakutenga nakushinganyeka havyuma tweji kulinangulanga hali Yehova kuvyuma kana. Nge natulinga ngocho, kaha natupandama kuli Tengi yetu. (Yako. 4:8) Muchihande chinakavangizaho, natumona omwo visemi vanahase kuzachisa vyuma atenga Kalunga mangana vakafwe vana vavo vapandame kuli Yehova.