1. Njilanyi yimu yamukwashili Yoba kumwiluka Yehova chiwahi?

 HAMPANJI jahanjekeliyi Yoba nawakwawu muchihandilu chindi chejima, mpanji yahanjekeliyi naYehova Nzambi diyabadikili. Yehova washimwini yuma yimu yakuhayamisha yamwekanaña muyileñaleña hakumukolesha Yoba kulonda akuhweleli mumaana aNzambi nimuwuswa wakwakamena ambuñindi. Chakutalilahu, Yoba amwanukishili nawu Nzambi wakamenaña anyama, dichi niyena nateli kumwakamena. (Yoba 38:39-41; 39:1, 5, 13-16) Kuhitila mukutoñojoka hayakutalilahu yayileñaleña, Yoba welukili yuma yayivulu hayilwilu yikwetiyi Nzambi yindi.

2. Muloñadi chichinateli kutukalila kwikala nampinji yakushinshika yileñaleña yaYehova?

² Ninetu tunateli kwiluka yuma yayivulu hadi Nzambi yetu neyi tushinshikaña hayuma yaleñayi. Hela chochu, mpinji yikwawu chinateli kutukalila kwila mwenimu. Neyi twashakamaña mutawuni, hefuku-hefuku tukumonaña hohu yuma yantesha hayuma yaleñayi Yehova. Hela chakwila twashakamaña kwakwihi nayileñaleña, tunateli kumona netu tudana mpinji yakuyitala. Dichi tuhanjekenu hachichalemena kwikala nampinji nikuzata nañovu kulonda tushinshikeña yileñaleña. Tukuhanjeka hadi Yehova niYesu chazatishiliwu yileñaleña hakudizisha antu nichitunateli kwila hakwila tudizili yuma yayivulu kuyileñaleña.

3. Yumanyi yinakumwekesha nawu Yehova wakeñeleña nindi Adama adiluñisheña kutala yileñaleña?

³ Yehova wakeñeleña antu atachi adiluñisheña kutala yileñaleña yindi. Nzambi chamuleñeliyi Adama, wamwinkeli paradisa yayiwahi kulonda ashakameñamu nawa wamwinkeli nindi ayidimeña nikuyitohesha. (Kutach. 2:8, 9, 15) Fwikijenu owu muzañalu watiyiliyi Adama hakumona mbutu chijameneneña ninkenu chijakenukileña. Iku kwadiña hikukooleka kweneni chikupu kudi Adama kwakwakamena itempa daEdeni! Yehova wamulejeli cheñi Adama kutuumba anyama amboka-mboka majina. (Kutach. 2:19, 20) Yehova wadi kuyituumba yomwenindi majina; ilaña wamwinkeli Adama iwu mudimu. Chakadi nikujina henohu kanda ayituumbi majina, Adama wadizili chikupu chekalawu awa anyama, nakuyishinshika chamwekanañawu niyuma yelañawu. Adama watiyili kuwaha kuzata iwu mudimu. Chakadi nikujina, chumichi chamukwashili kusakilila chikupu hamaana aTata yindi nihalubanji lwayuma yaleñeliyi.

4. (a) Chumanyi chimu chinateli kutuletesha kwikala nampinji yakushinshika yileñaleña? (b) Yileñaleñanyi yayitiyishaña kuwaha?

⁴ Chuma chimu chikuletesha twikaleña nampinji yakushinshika yileñaleña chidi chakwila nawu Yehova wakeñaña nindi twileña mwenimu. Watulejaña nindi: “Fumbulenu mesu enu mwiwulu mumoni.” Kuhiñahu wehulaña nindi: “Hinyi waleña yuma yejimiyi?” Ñakwilu yakuyamba wanyi. (Isa. 40:26) Yehova wenzesha mumawulu, hamaseki nimutuluñalwiji yileñaleña yayivulu yakuhayamisha yitwatela kudizilaku. (Mas. 104:24, 25) Nawa toñojokenu hohu hachatuleñayi Nzambi. Watuleña namuchima wakusakilila halubanji lwayileñaleña. Watuleña cheñi munjila yakwila tudiluñisheña yuma yashiyashana yaleñayi kuhitila mukutwinka wuswa wakumona, kutiya, kukwata, kutompa nikwipula ivumba.

5. Kwesekeja naARoma 1:20, yumanyi yayiwahi yafumañamu neyi tushinshikaña chekala yileñaleña yaYehova?

⁵ Bayibolu yashimuna cheñi chuma chikwawu chalema chinateli kutuletesha twikaleña nampinji yakushinshika yileñaleña. Yatudizishaña hayilwilu yaYehova. (Tañenu ARoma 1:20.) Chakutalilahu, toñojokenu hachaleñawu yileñaleña chiwahi. Komana yamwekeshaña wanyi maana aNzambi? Nawa toñojokenu hayakuda yayiwahi yitwadiluñishaña. Iwu diwunsahu wamwekeshaña nawu wayikeña antu. Neyi tumwiluka Yehova chekalayi kuhitila muyuma yaleñeliyi, chatukwashaña kumwiluka chiwahi nawa twaswinaña kwakwihi nayena. Ichi dinu tuhanjekenu  hanjila jimu mwazatishilañayi Yehova yileñaleña kulonda adizishi antu yuma yalema.

6 Yumanyi yitukwiluka neyi tushinshikaña atuda atuntukaña?

⁶ Yehova washaku mpinji yayuma yejima. Hachaaka-hachaaka kukumana kwaFebruary nakushika hakachi kaMay, aIsarela amweneña tukumbikumbi chitwatuukileña mwiwulu iku tunakutuntuka nakuya kukabeta kakuchimunswa. Nzambi wayilejeli aIsarela nindi: “[Kakumbikumbi] muluzwizu keluka yilaaka yaku.” (Yere. 8:7) Neyi chashaku Yehova mpinji yakutuntukilamu itu tuda nakuya kwiluña dikwawu, munjila yoyimu Yehova washaku mpinji yakuletelamu wunsompeshi windi. Makonu neyi tumona tuda tunakutuntuka nakuya kwiluña dacheñi, chatwanukishaña nawu twatela kumukuhwelela Yehova netu ‘watoñola dehi mpinji’ yakakisañanayi akanu kaayi katama.—Hab. 2:3.

7. Chumanyi chitunateli kwiluka neyi tumona kada wunakutuuka? (Isaya 40:31)

⁷ Yehova wayinkaña ambuñindi ñovu. Kuhitila mudi Isaya, Yehova wakanini nindi wakayikoleshaña antu Jindi kulonda “[akaleleña] nampuula neyi ambuulu” hampinji yinazeyiwu hela yinaneñiwu. (Tañenu Isaya 40:31.) AIsarela kakavulu amweneña ambuulu anakulela mwiwulu chakadi kuzatisha nankashi mpuula jawu. Chumichi chatwanukishaña nawu neyi chenkayi Yehova awa atuda ñovu, nateli kwinka niambuñindi ñovu! Chimwamona kada weneni nakulela mwiwulu chakadi kuzatisha mpuula jindi nankashi, anukenuña nenu Yehova nateli kuyinka ñovu yakuumika kukala kwejima kumunakumona.

8. Chumanyi chelukiliyi Yoba hanyima yakutoñojoka hayileñaleña yaNzambi, nawa chumanyi chitukudizilaku?

⁸ Twatela kumukuhwelela Yehova. Yehova wamukwashili Yoba kulonda asweji kumukuhwelela. (Yoba 32:2; 40:6-8) Hampinji yahanjekeleñayi naYoba, Nzambi wateneni yileñaleña yayivulu, kushilahu tutumbwa, mavu nikukenashana. Yehova wahosheli cheñi hadi anyama, chidi neyi iboñu dañombi nikawalu. (Yoba 38:32-35; 39:9, 19, 20) Yuma yejimiyi hiyamwekesheli hohu ñovu yabadika yikwetiyi Nzambiku, ilaña yamwekesheli cheñi kukeña kwindi nimaana indi asweja. Muloña waniyi mpanji, Yoba wamukuhweleleli Yehova chikupu. (Yoba 42:1-6) Munjila yoyimu, neyi tushinshikaña chekala yileñaleña, twelukaña netu Yehova wukweti maana niñovu jasweja kubadika etu. Nateli cheñi kumanisha kukala kwejima kutwamonaña nawa wakakumanisha. Chumichi chinateli kutukwasha kumukuhwelela chikupu.

9-10. Itena ninvula jatukwashaña kwiluka nawu Yehova wekala ñahi?

⁹ Yesu welukili nsañu yayivulu kutalisha hayileñaleña. Hakwikala “mukawukalawenu,” Yesu wazatili hamu naTata yindi hakuleña yuma yamwiwulu niyahamaseki. (Yish. 8:30) Nkumininaku, Yesu hadiñayi hamaseki, wazatishili yileñaleña kulonda adizishi atumbanji twindi amwiluki Tata yindi. Talenu yuma yantesha yatañishiliyi.

¹⁰ Yehova wamwekeshelaña antu ejima kukeña. Mumpanji yaHampidi, Yesu wayikwashili atumbanji twindi kwiluka kulema kwayileñaleña yiyedi yabulaña kushaku antu amavulu maana: chejeji chetena ninvula. Yuma yejimiyi yalema muloña yatukwashaña kutwalekahu kuhanda. Yehova wadi kufuukulahu kuyikiisha antu abulaña kumukalakela iyi yuma. Ilaña muloña wakukeña, wayituntwishilaña antu ejima itena nikuyinokeshela nvula. (Mat. 5:43-45) Yesu wazatishili ichi chuma chalema kulonda ayidizishi atumbanji twindi nindi Yehova wakeñaña  tumwekesheleña antu ejima kukeña. Mpinji yejima yitunakumona itena dinakuhuma hela nvula yinakusosota, twatela kutoñojoka hakukeña kwaYehova kwakubula chaambu. Kukeña kwindi kukutuletesha kumwekesha kukeña kwokumu kuhitila mukushimwina kudi antu ejima.

11. Kushinshika atuda amuluzwizu kunateli kutukolesha ñahi?

¹¹ Yehova watwinkaña yuma yakumujimba. Mumpanji yoyimu, Yesu wahosheli cheñi nindi: “Shinshikenu chiwahi atuda amuluzwizu; hiyakuwaña mbutu, kumuna hela kusha munkalañaku, ilaña Tata yenu wekala mwiwulu wayidiishaña.” Hadaha antu alejeleñayi Yesu amweneña atuda anakuhita mwiwulu hayihwileñayi nindi: “Komana enu himwayibadika kulemaku?” (Mat. 6:26) Chumichi chikutukwasha kwiluka netu Yehova wukutwinkaña yuma yakumujimba! (Mat. 6:31, 32) Ichi chuma chalema chakudizila kuyileñaleña chinatwalekihu kuyikolesha ambuña aNzambi ashinshika. Muhela payiniya wakansi kuSpain waneñeleña muloña hatwesheli kuwana itala dadiwahi dakushakamaku. Ilaña chamweniyi atuda anakuda nyikaabu, wakolesheweli chikupu. Wahosheli nindi, “Ana atuda añanukishili nawu Yehova wayakamenaña nawa ninami wukuñakamena.” Hashimbwili wanyi, iwu muhela wawanini kwakushakama.

12. Kwesekeja naMatewu 10:29-31, anzwimba atukwashaña kwiluka nawu Yehova wekala ñahi?

¹² Yehova watulemesha hamuntu-hamuntu. Henohu kanda ayitemeshi apostolu indi kuya nakushimwina, Yesu wayikwashili kulonda abuleña kutiya woma ikañesha. (Tañenu Matewu 10:29-31.) Wayikwashili kuhitila mukuhosha hadi atuda elukishiliwu muIsarela: anzwimba. Mumafuku aYesu, awa atuda ayimweneña neyi alema wanyi. Ilaña wayilejeli atumbanji twindi nindi: “Kwosi niwumu wunateli kuholoka heseki chakadi Tata yenu kwilukaku.” Kuhiñahu wabombelelihu nindi: “Enu mwalema kubadika anzwimba amavulu.” Muniyi njila Yesu wayikwashili atumbanji twindi kwiluka nawu Yehova wayilemesheli hamuntu-hamuntu, dichi hiyateleleli kutiya woma ikabishaku. Chakadi nikujina, atumbanji anukileña mazu aYesu neyi amona anzwimba hampinji yinakushimwinawu mumatawuni nimunyikala. Mpinji yejima yimukumona kada kanyanya, anukenuña nenu Yehova wayilemesha halwenu muloña ninenu “mwalema kubadika anzwimba amavulu.” Nawukwashu windi, munateli kuumika ikañesha chakadi kutiya woma.—Mas. 118:6.

13. Chumanyi chikutukwasha kudizila kuyileñaleña?

¹³ Yileñaleña yinateli kutukwasha kwiluka yuma yikwawu hachekalayi Yehova. Twatela kwila ñahi? Chatachi, twatela kwikala nampinji yakushinshika yileñaleña. Kuhiñahu, twatela kutoñojoka chiyinakutudizisha hachekalayi Yehova. Hichinateli kutupelela mpinji yejima kwila mwenimuku. Géraldine, muhela wakuCameroon, wahosheli nindi, “Nakulilili kutawuni, dichi nazatileña nañovu  hakwila nikaleña nampinji yakushinshika yileñaleña.” Manakwetu Alfonso mukulumpi walumbulwili nindi, “Neluki nami natela kufuukwila chadimu mpinji yakwikala kwakankawami kulonda nishinshikeña yileñaleña yaYehova nikutoñojoka chikupu chiyinakundizisha hadi yena.”

14. Chumanyi chelukiliyi Davidi hatoñojokeleñayi chikupu hayileñaleña yaNzambi?

¹⁴ Davidi watoñojokeleña chikupu hayileñaleña yaNzambi. Wamulejeli Yehova nindi: “Chinamona mawulu eyi, nyidimu yanyinu yeyi, kakweji nitutumbwa tuwaloñesha, indi muntu wafwaña diyinyi mwaka wumwanukeña?” (Mas. 8:3, 4) Mwamweni, Davidi chatalileñayi mumawulu nawufuku, hakuminineña dakusakilila halubanji lwayuma yamumawuluku. Cheñi watoñojokeleña chikupu hatutumbwa chitwamudizishileña hachekalayi Nzambi. Welukili Yehova chabadikayi. Mpinji jikwawu, Davidi watoñojokeleña hachatuñikileña mujimba windi mwivumu damama yindi. Chatoñojokeleñayi chikupu hayumiyi yakuhayamisha, waswejeleleñaku kusakilila hamaana aYehova.—Mas. 139:14-17.

15. Shimunenu yakutalilahu yinayikwashi kumona yilwilu yaYehova muyileñaleña. (Isamu 148:7-10)

¹⁵ Kufwana Davidi, hichikukeñeka etu kuya kumaluña akwakulehi kulonda tuwani yileñeleña yitwatela kutoñojokahu chikupuku. Hohenohu himudi neyi mutalatala, mukumona yuma yayivulu yamwekeshaña yilwilu yaYehova. Chakutalilahu, munateli kwiluka ñovu jaYehova neyi mutiya iyena detena hekowa denu. (Yere. 31:35) Toñojokenu hamaana aNzambi neyi mumona kada kanakutuña chisakala. Toñojokenu hamaana aYehova chimwamona mwana kakawa nakuhema namukila windi. Nawa musakililenuña Yehova mpinji yejima yimunamoni mama yawantu nakuhema namwanindi wanyanya. Tukweti njila jajivulu jakumushimekelamu Yehova muloña yileñaleña yindi—yamaneni niyanyanya, yekala kwakulehi nimukamwihi—yejima yamushimekaña.—Tañenu Isamu 148:7-10.

16. Chumanyi chitwatela kufwilaña kwila?

¹⁶ Nzambi yetu wukweti maana chikupu, wakamenaña, weluka kuleña nawa wukweti ñovu. Tunateli kwiluka iyi yilwilu kushilahu niyilwilu yikwawu yayivulu neyi twikalaña nampinji yakushinshika chikupu yileñaleña. Dichi wejima wetu twikaleña nampinji yakushinshika yileñaleña nawa tutoñojokeña chiyatudizishaña hachekalayi Yehova. Neyi twilaña mwenimu, tukuswina chikupu kwakwihi naNleñi yetu. (Yak. 4:8) Muchibaaba chinalondelihu, twakahanjeka chinateli kuzatishawu anvwali yileñaleña hakukwasha anyanawu kuswina kwakwihi naYehova.