1. Iobu ese Iehova e dibaia namonamo dalana ta be dahaka?

 IOBU ena mauri lalonai ia na taunimanima ida e herevaherevava, to ia ese se laloaboio ḡauna na, Iehova Dirava ida e herevahereva karana. Una herevahereva lalonai Iehova ese e hamaoroa Ia e kara ḡaudia baine itadia, unu amo baine abia dae momokani Iehova ena aonega na bada bona iena hesiai taudia na baine naridia diba. Heḡereḡere, Iobu e hamaoroa Ia ese animal e naridiamu heḡereḡerena, ia danu baine naria diba. (Iobu 38:39-41; 39:1, 5, 13-16) Iobu ese Dirava e kara ḡaudia e lalodia neganai, ena kara namodia momo e dibadia.

2. Dahaka dainai nega haida Iehova e kara ḡaudia baita stadilai na auka?

² Ita danu Dirava baita dibaia namonamo totona, ia e kara ḡaudia idauidau baita stadilaidia. To, nega haida unu baita kara tomamu na auka. Bema ita na siti ai ta nohomu, reana dina ta ta Dirava e kara ḡaudia na asita itadiamu. Eiava eda noho gabunai Dirava e kara ḡaudia na ta itadiamu to asi eda nega baita stadilaidia. Ina atikol ai baita itaiamu, dahaka dainai nega baita ato bona baita hekwarahi Dirava e havara ḡaudia baita stadilai. Danu, Iehova bona Iesu ese havara ḡaudia amo taunimanima e hadibadia daladia baita herevalaimu, bona ita be dahaka baita kara unu havara ḡaudia amo diba ma haida baita abi.

3. Dahaka ese e hahedinaraia Iehova na e ura Adam ese ia e kara ḡaudia baine moalelai?

³ Iehova na e ura Adam ese Ia e kara ḡaudia baine moalelai. Ia ese Adam e karaia neganai, paradaiso hairaina e henia baine  noholaia, baine biru henia, bona baine reḡua. (Gen. 2:8, 9, 15) Adam ese uhe e tubuva bena flaoadia e hekarava e itadia neganai, e moale dikadika. Eden umana inarina ḡaukarana na hahenamo badana Adam enai! Danu, Iehova ese Adam e hamaoroa animal idauidau ladadia baine heni. (Gen. 2:19, 20) Iehova sibona ese animal ladadia na bema heni diba, to una ḡaukara na Adam e henia. Adam ese animal ladadia do se heni neganai, e stadilaidia namonamo, unu amo toadia bona edia kara e dibadia. Una ese e durua e laloparara Iehova ena aonega na bada herea, e kara ḡaudia na idauidau, bona mai hairaidia.

4. (a) Dahaka dainai Iehova ese e havara ḡaudia baita stadilai? (b) Iehova ese e havara ḡaudia amo edena o moalelaiamu?

⁴ Iehova na e uramu Ia e havara ḡaudia baita stadilai. Una dainai e hamaorodamu: “Ba gaga dae, ba itaia.” Bena ma e nanadaidamu: “Unu hisiu na daika ese e karadia?” Haere na vada dibada. (Isa. 40:26) Iehova ese guba, tanobada, bona davara ai ḡau iboudiai e karadia, unu amo ia ta dibaiamu. (Sal. 104:24, 25) Mani ita e karadia dalana a laloa. Ia ese e havara ḡaudia hairaidia ta itamu neganai ta moalemu, ani? Danu, ita e karada neganai ḡau idauidau baita ita, baita kamonai, baita dogotao, baita mami, bona baita hairu diba.

5. Roma 1:20 heḡereḡerena, Iehova e kara ḡaudia baita stadilai ena namo be dahaka?

⁵ Baibul ese e hahedinaraiamu Iehova e kara ḡaudia baita stadilai na mai anina bada, badina unu amo Iena kara namodia baita dibamu. (Roma 1:20 ba duahia.) Heḡereḡere, Iehova e kara ḡaudia bo itadiamu neganai mai hairaidia. Idia ese iena aonega e hahedinaraiamu, ani? Bona ta moalelaimu anianidia idauidau mani a lalodia. Unu ese iena lalokau ita edai e hahedinaraiamu. Iehova e kara ḡaudia baita haerodiamu neganai, ia baita dibaiamu bona turana ai baita laomu. Hari, Iehova ese e kara ḡaudia amo mai anidia bada ḡaudia e hadibadamu daladia haida baita herevalaimu.

6. Gabu ma ta e roho laomu manudia amo dahaka ta dibamu?

⁶ Bae vara ḡaudia edia nega na Iehova ese vada e abi hidi. Laḡani ta ta February ela May lalodiai, Israel taudia ese boḡe manudia (stork) e itadiava not kahana e roho laova. Dirava ese Israel taudia e hamaorodia: “Boḡe na atai ai e nohomu, bona ena nega dibana.” (Ier. 8:7) Iehova ese unu manu edia roho negana e abia hidi heḡereḡerena, ia ese ena hahemaoro negana na vada e abia hidi. Manu na  edia nega korikori ai gabu ma ta e roho laomu ta itadiamu neganai, ta dibamu Iehova ese “ena nega” korikori ai kara dika taudia baine haoredia.​—Hab. 2:3.

7. Manu ta ena roho dalana o itaiamu neganai dahaka o dibamu? (Isaia 40:31)

⁷ Iehova ese ena hesiai taudia na goada e henidiamu. Iehova na Isaia amo e gwauhamata, ena taunimanima e lalo manokamu neganai, goada baine henidia, ugava na heheto “hanidia amo bae roho dae.” (Isaia 40:31 ba duahia.) Israel taudia na nega momo ugava manudia e itadiava; unu manu na atai herea ai e rohomu neganai hanidia na se hamarere momomu, badina hodahoda siahuna ese e durudiamu. Iehova ese unu manu goada e henidiamu heḡereḡerena, ena hesiai taudia danu goada baine henidia diba! Manu ta o itaiamu neganai, ba helalotao, Iehova ese goada baine henimu diba emu hekwakwanai ba hanaidia totona.

8. Iobu na Dirava e kara ḡaudia amo dahaka e diba, bona ita be dahaka ta dibamu?

⁸ Iehova baita abidadama henia diba. Iehova ese Iobu e durua Ia baine abidadama henia totona. (Iobu 32:2; 40:6-8) Dirava ese Iobu e hereva henia neganai, e kara ḡaudia momo e herevalai, heḡereḡere hisiu, ori, bona kevaru. Bona animal haida, heḡereḡere uda boromakauna bona hosi e herevalaidia danu. (Iobu 38:32-35; 39:9, 19, 20) Unu iboudiai ese Dirava ena siahu, lalokau bona aonega bada e hahedinaraidia. Una herevahereva karana amo Iobu ena abidadama Iehova enai na e goada. (Iobu 42:1-6) Una heḡereḡerena, ita ese Iehova e kara ḡaudia baita stadilaimu neganai, baita dibamu Iehova ena aonega bona siahu na bada herea. Bona iseda hekwakwanai iboudiai baine haoredia diba. Una ese eda abidadama ia enai e hagoadaiamu.

9-10. Dina bona medu amo Iehova enai be dahaka ta dibamu?

⁹ Iesu na Dirava e havara ḡaudia na mai dibana namonamo. Ia na “ḡaukara idibaka tauna na heto,” Tamana ida e ḡaukara hebou iunives e karaia. (Her. 8:30) Gabeai, tanobada ema neganai, havara ḡaudia amo Tamana ena kara na ena hahediba taudia e hadibalaidia. Mani unu ḡau haida aita lalodia.

¹⁰ Iehova na taunimanima iboudiai e lalokau henidiamu. Ororo Harorona ai, Iesu ese ena hahediba ediai dina bona medu e herevalaidia, unu ḡau ruaosi na momo ese asie lalodia badamu. Baita mauri totona dina bona medu na mai anidia bada. Iehova bema ura unu na ia asie hesiai heniamu taudia basinema henidia, to mai lalokauna ida taunimanima iboudiai ediai dina e hadaeamu bona medu e hadihoamu. (Mat. 5:43-45) Iesu ese unu e herevalai badina na e ura ena hahediba baine hadibadia Iehova ena ura na taunimanima iboudiai baita lalokau henidia. Dina e dihomu hairaina ta moalelaiamu bona medu ta itaiamu neganai, Iehova ena lalokau ta laloamu. Iehova ena kara ta tohotohoamu dainai taunimanima iboudiai ta haroro henidiamu.   

11. Manu ta itadiamu neganai, edena dala ai e hagoadadamu?

¹¹ Iehova ese eda dabu ḡaudia e henimu. Ororo Harorona ai Iesu na ma eto: “Atai manudia ba itadia: idia na asie hadohadomu, asie taboromu, roge ai asie haboumu; a Tamamui guba ai e nohomu ese e ubudiamu.” Reana Iesu e herevava lalonai manu na e hanaiva, bena kamonai taudia e nanadaidia: “Umui ese idia asio hereadiamu a?” (Mat. 6:26) Iesu ena hereva amo ta dibamu  Iehova ese eda dabu ḡaudia na be heni dibamu! (Mat. 6:31, 32) Una ese Dirava ena hesiai taudia edia abidadama na e hagoadaiamu. Spain ai, painia taihuna ta na noho gabuna ta se davaria dainai e lalomanoka. To gabeai manu e itadia, uhe bona au huahua e aniva, bona una ese e hagoadaia. Ia na e gwa: “Unu manu na itadia neganai, na lalo, bema Iehova ese idia na e naridiamu, lau danu baine narigu diba.” Se daudau, una taihu na noho gabuna ta e davaria.

12. Mataio 10:29-31 heḡereḡerena, bisini amo Iehova enai be dahaka ta dibamu?

¹² Iehova ese ita ta ta na e laloda badamu. Iesu ese ena aposetolo na haroro totona do se siaidia neganai, e hagoadadia taunimanima garidia basie gari. (Mataio 10:29-31 ba duahidia.) Ia ese bisini e herevalaia, una na Israel ai momo mai dibadia manuna ta. Iesu ena negai momo ese unu manu na asie lalodia badava. To Iesu eto: “Idia ta tano ai basine moru, Tamamui na basine ura negana ai.” Ma eto: “Umui ese bisini diaḡau o hereadiamu.” Unu hereva amo Iesu na ena hahediba e hagoadadia, Iehova ese idia ta ta na e lalodia badamu, una dainai taunimanima garidia basie gari. Hahediba na taoni bona hanua ai e harorova lalonai bisini e itadiava neganai, Iesu ena hereva e laloava. Oi danu manu maraḡina ta o itaiamu neganai, ba lalotao Iehova ese oi na e lalomu badamu badina oi “ese bisini diaḡau o hereadiamu.” Ia ese be durumumu dainai, e inai henimumu taudia garidia na basio gari.​—Sal. 118:6.

13. Edena dala ai Dirava ese e kara ḡaudia amo diba ma haida baita abi?

¹³ Iehova ese e kara ḡaudia amo iena kara ma haida baita dibamu. Edena dala ai? Ginigunana na, nega baita ato Dirava ese e kara ḡaudia baita itadia. Iharuana na, baita lalohadailaidia, unu ese Iehova enai ita be dahaka e hadibadamu. Nega haida unu baita kara tomamu na auka. Cameroon ai, taihu ta ladana Géraldine na e gwa: “Lau na siti ai na bada dainai, na dibamu namona na baina hekwarahi Dirava ese e kara ḡaudia baina stadilai.” Elda ta ladana Alfonso na e gwaumu: “Na dibamu namona na nega baina ato sibogu ese Iehova e kara ḡaudia baina itadia bona baina lalodia dobu unu amo iena kara baina dibadia.”

14. David ese Dirava e kara ḡaudia e lalodia dobu neganai, dahaka e diba?

¹⁴ David ese Dirava e kara ḡaudia e lalodia dobu. Iehova e hamaoroa, eto: “Emu guba name itaia, oi imamu kwakikwakidia ese e karaia, hua bona hisiu danu oi ese o atodia: Taunimanima be dahaka oi ese o laloamu?” (Sal. 8:3, 4) David na hanuaboi ai hisiu e itadia bona e moalelai, dia una mo, to unu hisiu amo Dirava ena kara namodia e haerodia. E diba Iehova na Dirava hereadaena. Nega ma ta ai,  David na sinana bogana ai e hekara dalana e laloa. Tauanina e karaia dalana e lalohadailaia neganai, Iehova ena aonega e hoalaia.​—Sal. 139:14-17.

15. Iehova e kara ḡaudia amo o dibamu ḡaudia haida mani a herevalai. (Salamo 148:7-10)

¹⁵ David heḡereḡerena, oi ese Dirava e kara ḡaudia idauidau na bo itadiamu bona bo lalodia dobu dibamu. Unu ese be durumumu Iehova ena kara namodia momo bo dibamu. Heḡereḡere, dina siahuna o mamiamu neganai, Iehova ena siahu ba laloa. (Ier. 31:35) Manu ta ruma e karaiamu o itaiamu neganai, Dirava ena aonega ba laloa. Danu, sisia maraḡina na iuna e uramu baine koria oi itaiamu neganai o kirimu, unu amo o dibamu Iehova na moale Diravana. Bona sina ta o itaiamu ena beibi e gadara heniamu neganai, Iehova ba hanamoa ena lalokau dainai. Iehova baita dibaia namonamo daladia na momo, badina e kara ḡaudia iboudiai​—badadia, maraḡidia, ita badidai bona gabu daudaudia ai​—ese ia e imodaiamu.​—Salamo 148:7-10 ba duahidia.

16. Namona na laloda baita hadai dahaka baita kara?

¹⁶ Eda Dirava na aonega, lalokau bona siahu ibounai Diravana, bona e kara ḡaudia iboudiai na mai hairaidia. Unu kara bona kara ma haida baita dibadiamu bema e havara ḡaudia baita stadilai namonamomu. Namona na hanaihanai nega baita ato Iehova ese e havara ḡaudia baita moalelaidia bona ia enai ta dibamu ḡaudia baita lalodia. Unu baita kara tomamu neganai, Ihavarada Diravana baita raka henia kahimu. (Iak. 4:8) Stadi gabena ai, tama sina ese Dirava e kara ḡaudia amo natudia bae durudia Iehova bae raka henia kahi daladia baita herevalaimu.