1. Jo ahudhere wodhela Yehova nimakalelo baani?

 MAKALELO aamatene othapanya Jo anniyena okuma ehimaye, wahikalawo othapanya wimodha waali wa vayekiwa — othapanya anniyena ni Yehova Mulugu. Mudhidhi yole, Yehova omuloba wihina Jo asugwe pamadhene dhopaddusa dhaye. Werana eyo, yere omukavihera Jo ororomela thotho dha Yehova ni kopolo anniyena yowasamalela adhaari aye. Motajhiha, Jo ahihudhera wihina Yehova onowasamalela anenyama. Mwaha wa yeyo, oliye owonelamo wihina Yehova eere omusamalela. (Jó 38:39-41; 39:1, 5, 13-16) Teto, Jo ahihudhera dhikalelo dhapama dha Yehova wodhela opendda dhopaddusa dhaye.

2. Mwahaya bwaddi egakala ninga soorusa ohudhera ni dhopaddusa dha Yehova?

² Iyo podi ohudhera dhithu dhowinjhiva wodhela Yehova, naasugwaga dhithu oliye apaddusiliye. Mbwenye werana eyo, podi okala ethu yorusa. Akala we onakala musidadi opwasedha woona dhopaddusa podi ohikala ethu yokweya. Obe, akala onakala murudda wili dhopaddusa dhohiyana-iyana, podi wera kunakanna mudhidhi wopendda. Bumwahaya, nnere woona mwahaya bwaddi ekala yathima waaja mudhidhi ni wilibihedha wihina nipendde dhopaddusa. Nnere woona nimakalelo baani Yehova vamodha ni mwanaye Yesu elabihedhiwa dhopaddusa wihina yahudhihena athu ni ethu nnahowelihu werana wihina nihudhere dhithu dhowinjhiva ni dhopaddusa.

3. Enoniha ddi wihina Yehova afuna wi Adawu atikinege dhopaddusa?

³ Yehova afuna wihina Adawu atikinege dhopaddusa. Yehova  nuupaddusa Adawu, oliye omuhiya mparayizuni ni onvaha mabasa osamalela ni wunnuwiha mundda wa Edeni. (Gén. 2:8, 9, 15) Kubuwela makalelo aali Adawu, nuwoona thanga emelaga ni makupu ekumaga fulori. Osamalela mundda wo Edeni waali mutholo wathima avahiwe Adawu. Teto, Yehova ahimuloba Adawu wihina aavahe mandina anenyama. (Gén. 2:19, 20) Yehova ahafune eere wavaha mandina anenyama ale, mbwenye oliye omwihiyedha mutholo yola Adawu. Mohanganyedha, podi wera Adawu ahinathi wavaha mandina anenyama, oliye ahahudhera nuupwaseya ni ahapendda makalelo ali kadda mwanenyama. Mwebaribarene, wapara mabasa ala yomuhagalasa vanlubale Adawu. Teto, eyo yahimukavihera Adawu omoona Yehova ninga mpaddusi a thotho anaanda opaddusa dhithu mwamakalelo ootikiniha.

4. a) Enanthukulele ddi opendda dhopaddusa? b) Yopaddusa baani ya Yehova onathabwiwe otikina?

⁴ Ethu enanthukulele otikina dhopaddusa, fuunona wi Yehova anafuna wihina iyo neregena ndho. Isaías 40:26 anihina. ‘Musugwe odhulu moone.’ Yehova anna onikogomedha. Apaddunse dhithu ndha baani?’ Yowakulaya sokweya. Elabo yodhulu, yavati ni muniya Yehova uhekamo dhithu dhotikiniha apaddusiliye. Teto, dhopaddusa dhendha dhinonihudhiha dhithu dhowinjhiva wodhela oliye. (Sal. 104:24) Vano kubuwela, Yehova anipaddusile ni ekalelo yootikina dhopaddusa, mbwenye nnanda werana eyo, mwaha Yehova anipaddusile ni dhikalelo tanu dhinanikavihera otikina dhopaddusa. Ninga — mento, mabaru, mada, nlumi ni puna.

5. Mowiwanana ni Romanos 1:20, mwahaya bwaddi ekala ya thima ohudhera ni dhopaddusa?

⁵ Bibiliya onowoga ethu emodha ya thima enanthulela iyo ohudhera dhopaddusa. Dhopaddusa dhinonihudhiha wodhela dhikalelo dha Yehova. (Omwileri Romanos 1:20.) Motajhiha, kasugwa dhithu dhili mwilaboni ni makalelo ootikiniha dhipaddusiwiwa, dhithu dhendha dhinowoniha makalelo Yehova aliye Mulugu thotho. Teto, kubuwela dhoojha dhohiyana-iyana dhiliwo, eyo yowoniha wa odhivela wa Mulugu anniyena ni iyo. Naapenddaga dhikalelo dha Yehova wodhela dhithu apaddusiliye, nnowanda omunona pama ni nnowandana ni oliye. Vano nnere woona makalelo Yehova alabihedhiye dhopaddusa wihina anihudhihe dhithu dha thima.

6. Nnahudhera ddi ni akwaare yegeredheliwe mudhidhi wowedda olenddo wewa?

⁶ Yehova uhegeredha wihina kadda ethu ekanne mudhidhi wewa. Motajhiha, yaka dhatedhene omagomihedho wa mweri wa Fevereiro ni vaari va mweri wa Mayo, yaali yokweya  amwaana Ezarayeli wawoona akwaare evavaga. Balame ndha dhadhowa epaddi yoNorti. Yehova owoga ni amwaana Ezarayeli egi: ‘Akwaare enavava odhulu ehinona mudhidhi wewa wofwanelela.’ (Jer. 8:7) Yehova uhegeredha mudhidhi wihina balame nda dheeddege oledo wewa. Nimakalelo mamodhave, Yehova uhegeredha mudhidhi wihina amudhena Armagedon. Malabo aamatene woonaga balame dheddaga olendo wewa, Kuddiwale wihina Yehova uhegeredha mudhidhi waye wihina amarihe dhithu dhatedhene dhabure dhinapadduwa mwilaboni muna. — Hab. 2:3.

7. Makalelo enavava apangwe enanihudhiha ddi? (Isaías 40:31)

⁷ Yehova onowavaha kopolo adhaari aye. Wodhela namavuhulela Izayiya, Yehova opaganya wihina onowavaha kopolo adhaari aye wihina ‘evave ninga pangwe’ yafwanyiwaga makathamiho. (Omwileri Isaías 40:31.) Yaali yokweya, amwaana Ezarayeli wawoona apangwe evavaga odhulu yahagumanihe mampelo, naarive wigaali nipevo ninlubale. Eyo enowoniha wihina akala Yehova onowavaha kopolo apangwe wihina evave, naarive efwanyiwaga makathamiho manlubale, oliye aneere wavaha kopolo adhaari aaye! Malabo aamatene woonaga balame dhivavaga ni dhithabwaga odhowa odhulu dhahigumanihe mampelo, kuddiwale, Yehova aneere wuvaha kopolo wihina wawanena makathamiho aawo.

8. Jo ahudhere ddi ni dhopaddusa dha Yehova, Ki eyo enanihudhiha ddi?

⁸ Nnohowela omuroromela Yehova. Yehova omukavihera Jo wonelamo wi ohowela omuroromela. (Jó 32:2; 40:6-8) Mudhidhi ethapanyaga, Yehova owoga wodhela dhopaddusa dhohiyana-iyana, ninga thendderi, murabo ni muthethela wanduwa. Teto, Yehova ahiwoga wodhela anenyama ninga nari ni kavalo. (Jó 38:32-35; 39:9, 19, 20) Dhithu dhatedhene ndha dhahimuhudhiha Jo ohiya kopolove, mbwenye thotho ni odhivela anna Yehova. Nuumala othapanya, Jo obajha omuroromela Yehova ni murima waye waatene. (Jó 42:1-6) Ni makalelo mamodhave, nahudheraga dhopaddusa nnowanda wonelamo wihina Yehova Mulugu akopolo dhatedhene ni athotho onikwaranya iyo. Teto, eyo enoniroromeliha wihina oliye onofuna ni anere wamariha makathamiho ehu. Onona ebaribari ela, eneere onikavihera omuroromela Yehova ni murima wehu waatene.

9-10. Nduwa ni muzongwe dhinanihudhiha ddi wodhela Yehova?

⁹ Yesu ahinona pamadhene dhopaddusa. Bibiliya onomwinthana Yesu ninga ‘namalaba ororomeleya,’ mwaha oliye ahikanna gari yomukavihera baabe mudhidhi epaddusaga elabo ni dhatedhene dhilimo. (Pro. 8:30) Bumwahaya, Yesu nuudha velaboni ya vati, oliye oolabihedhesa dhopaddusa wihina ahudhihe anamahara aye wodhela Yehova. Vano, nnere woona dhopaddusa oliye alabihedhiye wihina ahudhihena athu.

¹⁰ Yehova onowawoniha odhivela athu aatene. Mudhidhi awogaga mwaha wa vamwagoni, Yesu ahiwoga ni anamahara aye wodhela dhithu biili Yehova apaddusiliye. Teto, athu owinjhiva kinavaha thima dhithu dhendha: nduwa ni muzongwe. Dhithudhendha biili, dhinohoweleya negi nikalewo. Teto, Yehova ahafune kaavaha nduwa ni muzongwe athu abure. Mbwenye, mwaha odhivela, Yehova onowavaha dhithu dhendha athu aatene. (Mat. 5:43-45) Yesu aalabihendhe yotajhiha ya nduwa ni muzongwe, wihina ahudhihe anamahara aye wi yohowela wawoniha odhivela athu aatene. Vano noonaga nduwa nimothelagamo obe nafwanyiwaga enyenye ya yoridhela ya muzongwe, iyo podi opendde wodhela odhivela wahinna nsakulo wa Yehova. Makalelo otajhiha odhivela wahinna  nsakulo wa Yehova, fuudhela walaleya athu aatene.

11. Nnande aavi wilibiha nasugwaga balame dhinavava odhulu?

¹¹ Yehova ononisamalela epaddi yomwilini. Awogaga mwaha waye wa vamwangoni, Yesu owoga egi: ‘Kasugwani balame dhodhulu, kadhinaala, kadhinahadda newene kadhinalogolela yoojha vasasarani, mbwenye Babinyu oodhulu anojhiha.’ Podi wera mudhidhi yole Yesu awogaga, athu yaali murudda yoole yowanda woona balame dhivavaga odhulu. Bumwahaya, Yesu adhe akohege: ‘Nyu ni balame anna thima baani, kahi nyu?’ (Mat. 6:26) Ni makalelo yala, Yesu ohunikavihera wonelamo wi Yehova aneere onivaha, dhatedhene nnahoweligihu epaddi yomwilini! (Mat. 6:31, 32) Madhu ala a Yesu ofiyedha peeno, enowalibiha adhaari a Yehova. Namwali dhaala, ali piyonera elabo yo Espanya aali owukuwene mwaha kaanda ofwanya mburo wapama vokala. Vano, nusugwa balame dhajha thanga ni dhithu dhimodha, oliye olibiheya. Murogola ola onowoga egi: “Woona balame ndhe, wahigikavihera wonelamo wi akala Yehova onosamalela balame, anere ogisamalela.” Nuuvira mudhidhi vang’ono murogola ole ofwanya mburo vokala.

12. Mowiwanana ni Matewuji 10:29-31, pera dhinanihudhiha ddi wodhela Yehova?

¹² Kadda muthu wa iyo nili athima vamentoni va Yehova. Ahinaarume anamahara aye wihina yalaleye, Yesu wakavihere aliwa ogonjhiha woova woharahariwa. (Omwileri Matewuji 10:29-31.) Oliye erilena eyo, alabihedhaga yoladdaniha ya balame yathabwile ononiwa wIzarayeli: pera. Malabo a Yesu, balame ndha kadhanna thima. Mbwenye oliye ahiwoga ni anamahara aye egi: ‘Naari dhigaali ndo kidha emothela vati newene emodha, babinyu ahinonne.’ Voharela Yesu wera: ‘nyu muhukanna thima okwaranya pera dhowinjhiva.’ Ni madhu yala, Yesu aharoromeliha anamahara aye wihina Yehova owavaha thima kadda muthu wa aliwa, ni wihina aliwa kayahowela woova oharahariwa. Malabo aamatene, aliwa yagumanana pera mudhidhi yalaleyaga mudila obe nyumba ni nyumba, mohanganyedha aliwa yowawubuwela madhu Yesu asorihiliye. Ni makalelo mamodhave, malabo aamatene onagumanegiwena balame dhohiyana-iyana, kuddiwale, we oli athima vamentoni va Yehova. Mwaha we ‘oli athima okwaranya pera dhowinjhiva.’ Nnikavihero na Yehova we podi ogonjhiha oharahariwa ni nroromelo. — Sal. 118:6.

13. Negi nihudhere wodhela Yehova nilabihedhaga dhopaddusa nnahowela neere ddi?

¹³ Iyo podi ohudhera dhithu dhowinjhiva nlabihedhaga dhopaddusa. Nnande aavi? Ethu yobajha, nnohowela ogula mudhidhi wihina nisugwe dhopaddusa, voharela nnohowela opendda wihina ninone ethu baani enanihudhihiwa wodhela Yehova. Mbwenye, iyo podi woonaga ninga kahi ethu yokweya werana eyo. Murogola dhaala anakala elabo yo kamaroji, anithaniwa Géraldine anihina: “Miyo gunuwale musidadi, bumwahaya, gegi gipendde dhopaddusa gohowela  wilibihedha vanlubale.” Teto namaholela mulogo dhaala anithaniwa Alfonso onowoga egi: “Gihudhera wihina ginohowela ogula mudhidhi wihina gisugwe dhopaddusa ni ginone ethu baani enagihudhihiwa wodhela Yehova.”

14. Dhithu baani Davidi ahudheriye aapenddaga dhopaddusa dha Mulugu?

¹⁴ Va Salmos 8:3, 4 Davidi ohuleba egi: ‘Gasugwaga odhulu, mabasa a madinyu, mweri ni thendderi mpaddusinyu, iyo nili aani wi munubuwelege, ki mwaana muthu baani wi mmukabelelege?’ Davidi oogula mudhidhi wihina apendde dhopaddusa dha Yehova. Asugwaga odhulu wigadhanle thendderi owoona dhithu dhotikiniha, teto, owanda woona ethu baani dhithu ndhe dhamuhudhihiwa wodhela Yehova. Ohiya eyo, oliye ohudhera wodhela kopolo anna Yehova. Davidi opendda wodhela makalelo ootikiniha egeredhiwiye agaali mbani mwa amaye. Mwebaribarene apendda dhithu dhatedhene ndha, yomuthukulela oliye otikina thotho dha Yehova. — Sal. 139:14-17.

15. Owoge dhotajhiha wodhela dhikalelo dha Yehova nnahudherihu ni dhopaddusa. (Salmos 148:7-10)

¹⁵ Ninga Davidi podi weera kahi ethu yorusa ofwanya yopaddusa enanthukulela iyo opendda. Teto, iyo podi woona thotho dha Yehova naasugwaga dhopaddusa dhinaddamele. Motajhiha, kasugwa kopolo anna Yehova mudhidhi wavihedhiwaga mwaha wa nduwa. (Jer. 31:35) Teto, opwasedhe woona thotho anna Yehova woonaga balame esasanyaga ethunjhi, obe osugwe makalelo Yehova aliye Mulugu oteyiha wamonaga mwanabwa awereweraga mwila waye, ni omutamalelege Yehova wodhela odhivela waye wamonaga mayi amwaredhagana mwanaye. Mwebaribarene, nihikanna dhithu dhowinjhiva, dhinanihudhiha wodhela Yehova. Dhatedhene oliye apaddusiliye naarive dhigaali dhing’ono obe dhinddimuwa, dhinaddamele obe dhilapele ni iyo, dhinomuthithimiha Yehova. — Omwileri Salmos 148:7-10.

16. Nithome wera ddi?

¹⁶ Mulugu ehu da thotho, odhivela, akopolo dhatedhene, teto dhatedhene anasasanyiye sapama. Iyo podi woona dhikalelo ndha ni dhimodha nasugwaga dhopaddusa dhaye. Bumwahaya, nnohowela ogula mudhidhi malabo aamatene wihina nipendde dhopaddusa ni dhithu dhinanihudhihiwa wodhela oliye. Nnerana ndo, nnere wanda okanna wandana wapama ni mpaddusi ehu. (Tia. 4:8) Ohudhera winaharela, nnere woona nimakalelo baani abaabi, enalabihedhiwa dhopaddusa wihina yakavihere aniwa wandana ni Yehova.