1. Mâ ǀgaub ǃnâb ge Joba Jehovaba ǃgâise ǂan tsoatsoa?

 HOA ǁgamǀhaodi hînab ge Joba ǁîb ûib ǃnâ ūhâ i di xas, ge ǀguisa ge mâǂoa. Jehova Elob ǀkhab ge ūhâ i ǁgamǀhaosa. ǁNā ǁgamǀhaos ǃnâb ge Jehovaba, Jobi di ǂgomǃgâsiba ǁîb di gā-aisib ǃnâ gere ǀgaiǀgai. Tsîb ǁkhāsiba ūhâsa ǁîb di ǃoaba-aona kōǃgâsa. Jehovab ge ǀnî xūn hînab kurus ǃnâ ra mâǂoa kaina ǃoa ge ǁnaeǁgau. Aiǁgauseb ge Eloba Joba gere ǂâiǂâiǃnâ, ǁîb xamanina ra kōǃgâsa. Tsîb Jobi tsîna a kōǃgâ ǁkhāsa. (Job. 38:39-41; 39:1, 5, 13-16) Kurus di aiǁgaudi xa ǂâiǃnâs ǃnâ-ūb ge Joba, ǃgâise Elob di ǀgaugu xa ge ǁkhāǁkhāsen.

2. Jehovab kurusa ôaǃnâsa tae-i ǃaroma ǀnî ǁaega a ǃgomba da ǁkhā?

² Sada tsîn ge Elob xa ǃnāsase a ǁkhāǁkhāsen ǁkhā, ǁîb ge kuru xūna da ga ôaǃnâ o. Xawe î ge ǁnāsa dīsa ǀnî ǁaegu ai a ǃgomba da ǁkhā. Kai ǃās ǃnâ da ga hâ o, o da ge ǀnîsi Jehovab ge a kuru ǂgui xūna tsēs hoasa mû ǁkhā tide. Kai ǃās ǃauga da ga hâ xawe da ge ǀnîsi a tsâ ǁkhā, ǂkhari ǁaeroba da ūhâsa Jehovab di kurusa ôaǃnâsa. Hā re î da ǃhoaǃgao tae-i ǃaroma i a ǃgâisa, ǁaeba ǁamaǂui tsî Jehovab di kurusa ǃoa kōsa. ǃHoaǃgao da ge nî matib ge Jehovab tsî Jesub tsîna kurusa sîsenū tsî gere ǁkhāǁkhāsa. Tsî tae-i tsîna da a dī ǁkhāsa, î da ǃnāsase kurusa xu ǁkhāǁkhāsen.

3. Tae-e ra ǁgau, Jehovab ge ǂhâba hâ isa îb Adamma kurus ǃnâ ǃgâiaǂgao?

³ Jehovab ge ge ǂhâba hâ i, îra ǂguro khoera kurus ǃnâ ǃgâiaǂgao. Jehovab ge Adamma a kuru, ob ge îxa ǃhanaba  ge mābi îb ǁan ǃnâ. Tsî sîsenni tsîna îb ǃhanaba kōǃgâ tsî Paradaisa khoraǂui. (Gen. 2:8, 9, 15) Mûnan-ai re Adammi ge mati gere ǃgâiaǂgaosa ǃkhomdi ra ǂoaxa tsî blomdi ra ǁhao ǀgausab gere mû o. Adammi ge kai aiǂhanuba ge ūhâ i, Edenni ǃhanaba kōǃgâs diba. Jehovab ge Adammi tsîna ge ǂgan, îb ǃkharagaǃnâgu xamanina ǀonde mā. (Gen. 2:19, 20) Jehovab ge mâ ǀons hoasa aitsama ga ǁhûi hâ xaweb ge Adamma ǁnā sîsen-e ge mā. Ama as ge Adammi ge ǀondeb nî mās aiǃâ, xamanin īsiba ǃoa kō tsî ǁîn tanisen ǀgaub tsîna gere ôaǃnâsa. Nēsa dīsab ge Adamma gere ǃgâiaǂgao. ǁÎba î ge ge hui Jehovab mati a gā-ai ǀgauba ǁnâuǃāsa. Tsî mati i ǁîb ge kuru xūna a îxasa.

4. (a) Mâpa a ǀgui ǃaroma kurusa da nî ôaǃnâba? (b) Mâ xū-i hîna ge kuruhe-e du ǀō-aisase ra ǃgôaǃgâ?

⁴ ǀGui ǃaromas kurusa da nî ôaǃnâs dib ge Jehovab ǁnāsa sida xu ra ǂgaoǀkhā amaga. “Mûdi âdo ǃhâkhâi, î ǀgapiseb ǃoa kō!” ǁkhau da tsîb ge ra dî: “Tariba ǃāǂuisab ai hân hoana ge kuruba?” ǃEreams ge a ǃgāsa. (Jes. 40:26) Jehovab ge hoa xūna ǀhommi, ǃhūbaib tsî hurib ǃnâs tsîna ge kuru. Hîna ǁîb xa ra ǁkhāǁkhāda na. (Psa. 104:24, 25) Elob ge kuru da ǀgaub xas tsîna ǂâi re. ǁÎb ge ge īǁkhā kai, î da kurub ge xūn ǃnâs tsîna ǃgâiaǂgao. ǁÎb ge ǁkhāsiba ge māda, î da ǃkharagagu xūna mû, ǁnâu, tsâǀkhā, tsâ tsî ham ǁkhā. Hîna ra īǁkhā kaina î da ǁîb ge kuru xūn xa ǃgâibahe.

5. Romeǁîn 1:20 ǃoagu da mati ǃgâiba ra hō, Jehovab di kurus xa da ga ǁkhāǁkhāsen o?

⁵ Elobmîs ge ǀnî hâ ǂhâǂhâsa ǃaromasa ra mîba da, tae-i ǃaroma da kurusa nî ôaǃnâsa. Nēs ge Jehovab di ǀgaugu xa ra ǁkhāǁkhāda. (Khomai re Romeǁîn 1:20 sa.) Aiǁgause, Jehovab ge kuru xūna kō tsî mû re ǁîn ge îxase a kuruhe ǀgauba. ǁÎna Elob gā-aisiba ǁgau tama hâ? ǃKharagagu ǂûn hîna a ǁkhoaxan xa ǂâi re. ǁNā î ge ǃnāsase ra ǁgau, ǀnammi hînab khoena ūba hâba. Jehovab ge kuru xuna xu da ga ǁîb ǀgauba a mû o, o da ge ra ǂkhâǃnâhe ǁîba ǃnāsase ǂansa. Tsî ǁîba ǃoa ǀgūsa. Ha re, î da ǀnî ǀgauga kō Jehovab ge kurusa a sîsenūga îb ǂhâǂhâsa xūna ǁkhāǁkhāda.

6. Tae-e da anin ra doemâ ǀgauba xu a ǁkhāǁkhāsen ǁkhā?

⁶ Jehovab ge ǁaeba mâiǂui hâ în xūna īǁkhā. Febraurib ǀunis tsî Meib ǁaegub ǃnân ge, kurib hoaba Israelǁîna kai anina  gere mû. ǁÎn noordesa ǃoa ra ǁkhana hîna. “Oefari ǀhommi ǃnâ hâb tsîn ge ǂnûibaheb hâ ǁaeba a ǂan.” Tib ge Eloba Israelǁîna ge mîba. (Jer. 8:7) Jehovab ǁaeba nē anina ra ǂnûiǂuiba khamib ge ǁîba ǀgoraǃgâs di ǁaeba ǂnûiǂui hâ. Nētsē da ga anin ra ǁhana ǀgauba ga ra mû o, o da ge ra ǂâiǂâiǃnâhe. Jehovab “mîmâisa ǁaeba” ūhâsa, îb nē ǁgai ǃhūbaiba ǀamǀam.—Hab. 2:3.

7. Tae-e da anin ra ǁkhana ǀgauba xu a ǁkhāǁkhāsen ǁkhā? (Jesajab 40:31)

⁷ Jehovab ge ǁîb di ǃoaba-aona ǀgaiba ra mā. Kēbo-aob Jesajab ǃnâ-ūb ge Jehovaba ge mîmâi. ǁÎb di khoenab nî ǀgaiǀgaisa tsîn ǁîna ‘kai-anidi ǁgabogu ǁkhas khami nî ǁkhanasa.’ ǂKhabusasen ga tsâ tamas ka io ǂkhabuǂâin ga ra o. (Khomai re Jesajab 40:31 sa.) Israelǁaes ge hoaǁae kai anidi, mati ǂoab xa ra ūkhâihe ǀgauba gere mû. Tsîn ge ǁnāsa ǂkhari sîsenni ǀkha gere dī. ǁNās ge ǃgâi ǂâiǂâiǃnâsa. Jehovab ǁnā anina ǀgaiba ra mās ǁkhas khamib ge ǁîb di ǃoaba-aon tsîna nî ǀgaiǀgai. ǁKhawa du ga anina ga mû o, hîna ǂoab xa ǀgapise ra ī-ūhena ǁîn di ǁgabuga ǂnau tamase. O du ge ǂâis ǃnâ nî ūhâ, Jehovab sadu tsîna ǀgaiba a mā ǁkhāsa. Î du sadu ǃgomsin ǀgapise hâ.

8. Joba tae-e ge ǁkhāǁkhāsen, Elob di kurusa kōsa xu? Tsî da sida ǁnāpaxu tae-e a ǁkhāǁkhāsen ǁkhā?

⁸ Jehovab ge sida ǂgomǃgâsiba anu hâ. Jehovab ge Joba ge hui, îb ǁîb ǃnâ ǂgomǃgâsiba omkhâi. (Job. 32:2; 40:6-8) Jobi ǀkhab ge ūhâ i ǁgamǀhaos ǃnâb ge Eloba, ǁîb ge kuru xūna ǃoa gere ǁnaeǁgau. Aiǁgause, ǀgamirodi, ǃâudi tsî lapap khami. Jehovab tsîn ge xamanin xa gere ǃhoa, ǃgārob gomab tsî hāb khami. (Job. 38:32-35; 39:9, 19, 20) Nē xūn hoan ge Elob di ǀgaib xa ǁgauǁgaus ase ǀgui hâ tama hâ. Xawe ǁîb di gā-aisib tsî ǀnammi xas tsîna. Nē ǁgamǀhaos xa huihe hâseb ge Joba, Jehovab ǃnâ ǃnāsa ǂgomsa ge omkhâi. (Job. 42:1-6) ǁNā ǀgaub ǃnâ da ga kurus xa ga ra ǁkhāǁkhāsen o, o da ge ra ǂâiǂâiǃnâ-e Jehovab sada xa a ǀgaisasa. Tsîb ge ǁîba sada ǃgomsina a ǀam kai ǁkhā. Tsîb ge nî ǀam kai nî. Nēsa ǂans ge sida ǃnâb ūhâ ǂgomǃgâsiba nî ǀgaiǀgai.

9-10. Sores tsî ǀanuba tae-e Jehovab xa ra mîba da?

⁹ Jesub ge kuruhe ge xūna ǃgâise ge ǂan-i. “Dana xūkuru-aob” aseb ge ǁîba, aiǂhanuba ge ūhâ i, îb ǁîb ǁGûb ǀkha ǀhommi tsî ǃhūbaiba kuru. (ǂKhm. 8:30) Ēgab ge Jesuba ǃhūbaib aib ge hā o, kurusa ge sîsenū ǁîb ǁGūb xa ǁîb di ǁkhāǁkhāsabena ǁkhāǁkhāsa. ǀNî xūn hînab ge ǁkhāǁkhāna kō re.

¹⁰ Jehovab ge ǁîb di ǀnamma hoa khoena ra ǁgau. ǃHommi aoǁnâs dawab ge Jesuba ǁîb di saosaben di ǂâisa, 2 xūn kuruhe gen ai ge ǂnui kai. Hîna hoaǁae ra kō ǃkharuhena: Sores di ǃnâb tsî ǀanus tsîna. Nē hoa 2 xūn ge a ǂhâǂhâsa, ûib ǃaroma. Jehovab ga ǂhâba hâ o i ge ǁîba ǃoaba tama hâ khoena nē 2 xūna xū ǃgâiba ga hō tama hâ. Xaweb ge ǀnamxaǃnâse hoa khoena sores di ǃnâb tsî ǀanuba ra mā. (Mat. 5:43-45) Jesub ge nē xūna ge sîsenū îb ǁîb di saosabena ǁkhāǁkhā, Jehovab ra ǂhâbasa în hoa khoena ǀnamma ǁgau. Sores îxase ra ǂgâ ǀgauba du ga mû tamas ka io ǁkhoaxase î ra ǀapi ǁaeba. O Jehovab di ǀnammi hînab hoa khoena ra ǁgauba ǂâis ǃnâ ūhâ re. ǁÎb di aiǁgaus ge nî ǂkhâǃnâ da î da ǁkhā ǀnamma khoena ǁgau, aoǁnâba nîs ǃnâ-ū.

11. Mati da ra ǂkhâǃnâhe, ǀhommi anirona da ga kō o?

 ¹¹ Jehovab ge sida di sorosi ǂhâsiga ra kōǃgâ. ǁNā ǀhommi aoǁnâs ǃnâs tsînab ge Jesuba ge mî: “ǀHomanirona kō re, ǁîn ge tsoro, ǃgao tsî ǃhorosâuǃnâ-ommi ǃnâ sâubasen tama hâ, xawen ge Elob xa ra ǂûmāhe.” ǀNîsi î ge Jesuba gere ǃgâ khoena, anin mati ǁîn ǀgapise ra ǁkhana ǀgauba ge mû. Saora dîsab ge dî o: “Sado kha nē ǀhomaniron xa ǃnāsase ǂhâǂhâsa tama hâ?” (Mat. 6:26) Kaise ǀnamxaǃnâ ǀgaub ge ǂâiǂâiǃnâ dasa, Jehovab sida sorosi ǂhâsiga nî kōǃgâsa. (Mat. 6:31, 32) Nē kurusa xu ge ūhe ǁkhāǁkhās ge nētsēs tsîna, ǂgomǂgomsa ǃoaba-aona ra ǂkhâǃnâ. ǂKham ǃgâsas hîna Spanjeb ǃnâ aimâba-aose ra ǃoabas ge, gere ǂkhabuǂâi ǃgâi hâǃnâ ǃkhaihes ge hō ǁoa i amaga. Xawes ge mû o, matin anirona ǃkhomron tsî ǁnāpa ge hâ i xūna gere ǂûsa os ge ǃnomsase ge tsâ tsoatsoa. ǁÎs ge ra mî, “ǁnā aniron ge ge ǂâiǂâiǃnâte, Jehovab ǁîna ra kōǃgâsa. Tsîb tita tsîna nî kōǃgâsa.” ǁAeroba ǃkharu hâses ge ǃgâsasa, ǃamku hâ ǃkhaisa ge hō.

12. Mateub 10:29-31 ǃoagu, i ǀhomanirona tae-e Jehovab xa ra mîba du?

¹² Mâ khoe-i hoa-i ge Jehovaba a ǀō-aisaba. ǁÎb di apostelgab aoǁnâ sîsenni ǃnâ nî sîǂoas aiǃâb ge Jesuba ǁîga ge hui, î gu tā mâǃoa gu nî khoena ǃao. (Khomai re Mateub 10:29-31 sa.) ǁÎb ge ǁnāsa ge dī, Israeli ǃnâ a ǂanǂansa anisa ǃoa ra ǁnaeǁgause: ǀHomanirosa. ǁNā anirodi ge Jesub di tsēdi ǃnâ ǂgui mari-e ge ǂan tama hâ i. Xaweb ge ǁîb di ǁkhāǁkhāsabega ge mîba: “Tsî ǀgui-i xare-i ge sadu Îb di ǂâis ose ǃhūb ai ǁnā tama hâ.” Tsîb ge ge ǀaro: “ǂGui ǀhomaniron xa ǃnāsase a ama-ai.” ǁNās ǃnâ-ūb ge Jesuba ǁîb di ǁkhāǁkhāsabega, ge ǂâiǂâiǃnâ Jehovab ǁîga ǀō-aisase ra mûsa. Tsî gu ge ǃaromasa ūhâ tide mâǃoahesa ǃaosa. ǁKhāǁkhāsabe gu ge Jesub di mîde ge ǂâi oa, aoǁnâ gu ra hîna gu ge ǀhom anirode a mû o ǃādi tsî ǃgāro ǃādi ǃnâs tsîna. ǁKhawa du ga ǃgārob anirode a mû, o ǂâis ǃnâ ūhâ re Jehovaba du a ǀō-aisabasa. Tsî du “ǂgui ǀhomaniron xa ǃnāsase a ama-ai” sa. Jehovab di huib ǀkha î ge ǃaosa ǂhâbasa tama hâ, nau khoen gara mâǃoa du o.—Psa. 118:6.

13. Tae-e nî hui da, î da kurusa xu ǁkhāǁkhāsen?

¹³ ǂGui ǃkharagagu xūna da ge Jehovab xa kurusa xu a ǁkhāǁkhāsen ǁkhā. Mati? ǂGurose da ge ǁaeba nî ǁamaǂui, î da kurusa kō. ǁNāpaxu da ge nēs tae-e Jehovab xa ra ǁkhāǁkhā dasa nî ǂâi. Hoaǁae î ge supu tide ǁnāsa dīsa. ǃGâsas Geraldines hîna Kameroeni ǃnâ ra hâs ge ra mî: “Tita ge kai ǃās ǃnâ ge kai. Tsî ta ge ge mûǂan, ǃgarise ta nî dītsâsa î ta kurusa kō.” ǀHaohâb ǃûi-aob Alfonso ti ǀon hâb ge ra mî: “ǁKhāǁkhāsen ta ge ge î ta ǁaeba ǁamaǂui tsî ǀguri hâse  Jehovab di kurusa kō. Tsî ǂâiǃgâ tae-e i ǁîb xa ra ǁkhāǁkhātesa.”

14. Daviba tae-e ge ǁkhāǁkhāsen Elob di kurus xab ge ǂâiǃgâ o?

¹⁴ Davib ge ǃgamse Jehovab kurus xa gere ǂâi. ǁÎb ge Jehovaba ge mîba: “ǀHommi sats ge kurub, ǁkhâb tsî ǀgamiron, ǁîn ǃkhaidi aits ge ǂnûina ta ga kō-o; tare xū-e khoe-e, ots ra ǁî-i xa ǂâi.” (Psa. 8:3, 4) Îo, Davib ge ǃuia ǀhomma ǃoa a kō khâi, ob ge ǁî-i di ǀgaib ǀguiba ge ǃgôaǃgâ tama hâ i. Xaweb ge ǀgamiron Elob xa ra ǁkhāǁkhābi xū-i xas tsîna gere ǂâiǃgâ. ǁÎb ge Jehovab di kaisib xa ge ǁkhāǁkhāsen. ǀKhara ǁaegu aib ge Daviba, ǁîb di soros mati mamasas di ǁhoms ǃnâ gere kai ǀgaub xa ge ǂâi. Nē xūn di îxasib xab gere ǂâiǃgâ hîna, î ge Jehovab di gā-aisib xab ūhâ ǃgôaǃgâsiba kais ǀguisa gere di.—Psa. 139:14-17.

15. Aiǁgaude mā re, mati du Jehovab di ǀgauga ǁîb kurus ǃnâ-ū ra mûsa. (Psalmdi 148:7-10)

¹⁵ Davib khami da ge a supubahe ǁkhā, kurus ǃnâ xū-e hōsa hîna da ǂâiǃgâ ǁkhā-e. ǂGui xūn ge sada ǂnāmipe hâ, hîna a hui da ǁkhāna î da Jehovaba ǃgâise ǂan. Aiǁgause da ge Jehovab di ǀgaiba ra mû, sores ǀgama da ga sada sorodi ai a hōǃâ o. (Jer. 31:35) Elob gā-aisib xa ǂâi re, aniros ǁîs omsa ra om ǀgauba du ga mû o. Jehova Elob matikōse a ǂkhîsa ǀgaub xa ǂâi re, arirob ǁîb ǂareroba ra sauru ǀgauba du ga mû o. Jehovaba ǁîb ǀnammi ǃaroma gangan re, mamasas ǁîs ǀgôaro-i ǀkha ra ǀhuru ǀgauba du ga mû o. ǂGui ǃēde da ge ūhâ Jehovab xa ǁkhāǁkhāsensa ǁîb kurus ǃaroma. Kai tsî ǂkhariro, ǀgū tsî ǃnū-i ga xawe î ge Jehovaba koasa ra mā.—Khomai re Psalmdi 148:7-10 sa.

16. Tae-e da nî mîǁgui dīsa?

¹⁶ Elob ge gā-ai, ǀnamxaǃnâ, ǀgaisa tsî ǁîb ra kuru xū-i hoa-i ge a îxa. Nē ǀgaugu hoa gu xa da ge a ǁkhāǁkhāsen ǁkhā. Tsî ǁnā-i xa ǃnāsase Jehovab kurus, sida ǂnamipe hâsa da ga ǀgūse ga ra kō o. Sada hoada ge ǁaeba nî ǁamaǂui, î da ǃgâiba hō kurus ǃnâ. Tsî ǂâi tae-e i Jehovab xa ra ǁkhāǁkhā dasa. ǁNāsa da ga dī, o da ge sada kuru-aob tawa nî ǀgū. (Jak. 4:8) Saora ǁkhāǁkhāǃâs ǃnâ da ge nî mû, matin ǁgûna ǁîn ǀgôana nî huisa în kurus ǃnâ-ū Jehovab tawa ǀgū.