1. Jobe wakaitisa kudini kuti ajijire zvakawanda ngo pamusoro pa Jehovha?

 JOBE wakabhuya no vandhu vakawanda maningi mu upenyu hwake. Asi amwe o mabhuyo akava anosisira maningi ngo aakaita na Jehovha. Pa mabhuyo aya, Jehovha wakavhunja Jobe kuti asotesese zviro zvakasikwa. Kuita izvi kwakabesera Jobe kuti athembe uzivi huna Jehovha. No kuthembazve kuti iyena anokwanisa kutaja vashandiri vake. Jobe wakajijira kuti Jehovha waikwanisa kutaja zvinyama, izvi zvakamuita kuti iyena athembe kuti Jehovha waizomutajavo. (Jobe 38:39-41; 39:1, 5, 13-16) Jobe wakajijira maningi ngo mugariro jina Jehovha ngo kuvona zviro zvakasikwa.

2. Ngenyi zvinganesa kusotesesa zviro zvakasikwa?

² Itusu tingajijira zvakawanda ngo pamusoro pa Jehovha ngo kunasa kusotesesa zviro zvaakasika. Asi azvizivi kureruka kuita izvi mukuvo wese. Zvinganesa maningi kuvona zviro zvakasikwa ndi Jehovha njiku no njiku, kudari tecigara mu dhorobha. Pikija munogara ku ndau ino zviro zvakawanda zvakasikwa, nguva jimweni mungatorangarira kuti amuna nguva yo kusotesesa zviro izvi. Ngatende tivone kuti ngenyi zvinosisira kupsaka nguva yo kusotesesa zviro zvakasikwa. Tinozovonazve kuti kuitisa kudini Jehovha na Jesu vakashandisa zviro zvakasikwa kuti vajijise vandhu no kuvona kuti ngozvapi zvatingajija kuvha ku zviro zvakasikwa.

3. Ngenyi tingananga kuti Jehovha waida kuti Adhamu adakajihwe ngo zviro zvaakasika?

³ Jehovha waida kuti Adhamu ashamaisike maningi ngo zviro zvaakasika. Jehovha paakasika Adhamu, wakamudira mu  paradhiso no kumupa basa ro kurima no kuita kuti ndauyo ikure. (Genesi 2:8, 9, 15) Amborangariranyi Adhamu ecishamaisika ngo kuvona mbeu jecimera no kuvona kutumbuka ko mafirori. Kunasirira munda wo Edheni kwakava makomborero akakura maningi kuna Adhamu. Jehovha wakavhunja Adhamu kuti adure mazina zvinyama. (Genesi 2:19, 20) Jehovha waizokwanisa kudura ega mazina zvinyama, kusiyapo kuita zvondhozvo, iyena wakapekeja Adhamu basa iri rinodakajisa. Pacina kukana-kana, acito adura zina cinyama cimwe nga cimwe, Adhamu waidikana kunasa kusotesesa mugariro wo cinyama cimwe nga cimwe. Iyena wakadakara maningi ngo kuita basa iri. Zvese izvi zvakamubesera kuvona Jehovha inga mundhu ano uzivi no kuvona kudakajisa no kuseja ko zviro zvaakasika.

4. (a) Ngorapi thangwe rimwe rinotiita kuti tide kusotesesa zviro zvakasikwa? (b) Pamunovona zviro zvakasikwa ngozvapi zvinomushamaisa maningi?

⁴ Thangwe rimwe rinotiita kuti tisotesese zviro zvakasikwa ngo rokuti Jehovha anoda kuti itusu tiite zvonazvo. Iyena anotivhunja kudari: “Musanyi majiso nyezuru, muvone: Ndiani wakarura nyereji ijo?” Mupinguro wakona wakanasa kujeka. (Isaia 40:26) Jehovha ndiyena wakasika zviro zvese zvatinovona mudenga, pasi pano no mu jombe. Zvese izvi zvinotijijisa zvakawanda ngo pamusoro pake. (Nduyo 104:24, 25) Amborangariranyi izvi basi. Jehovha wakatisika mu njira yokuti tinokwanisa kuvona zviro zvakaseja zviri mu nyika. Cimwenizve, wakatisika mu njira yokuti tinokwanisa kuvona, kuzwa, kubata zviro, kuzwa kunaka ko zviro no kuzwa munuhi.

5. Mukuzwirana na Varoma 1:20, tinobesereka kudini ngo kujija kuvhira ku zviro zvakasikwa ndi Jehovha?

⁵ Bhaibheri rinotipa thangwe rimweni rinotiita kuti tide kusotesesa zviro zvakasikwa. Zviro zvakasikwa zvinotijijisa mugariro jina Jehovha. (Verenganyi Varoma 1:20.) Inga muezaniso, sotanyi zviro zvakasikwa ndi Jehovha zviri mu nyika, perapo vonanyi manera azvinoshamisa. Izvi zvinovonesa kamare kuti Mwari wedu ano uzivi. Vonanyi basi kusiyana-siyana ko zvokuha. Izvi zvinovonesa kamare kuti Jehovha anotida. Patinovona mugariro jina Jehovha kuvha ku zviro zvaakasika, tinonasa kumuziva ushoni no kuva phedo naye. Wari ngatende tivone kuti Jehovha wakashandisa kudini zviro zvakasikwa kuti atijijise zviro zvinosisira maningi.

6. Ngozvapi zvatinojija patinovona mathupu ecivha ku ndau imwe kwenda kumweni?

⁶ Jehovha wakagaja nguva kuti aite zvese zvaanoda. Makore ese kutangira ku mbhiri ko  mweji wa fevereiro mbhera pakati po mweji wa maio, zvainga zvo cirovejeso Vaiziraeri kuvona mathupu ecimburuka. Shiri iji jaimburuka kwenda kanjikazi. Jehovha wakati kuno Vaiziraeri: “Mathupu mu gore anoziva mukuvo wao.” (Jeremia 8:7) Jehovha wakagaja mukuvo kwawo kuti shiri iji jimburuke, kuvha ku ndau imwe kwenda ku ndau imweni. Mu njira yakafanana iyena wakagaja “mukuvo” kuti aviise rutongeso hwake. Pamunovona shiri jecimburuka kuvha ku ndau imwe kwenda kumweni, ceukijanyi kuti Jehovha wakagaja mukuvo wo kupeja nyika ino yakashata.—Habakuki 2:3.

7. Ngozvapi zvatinojija patinovona kumburuka kunoita hokotora? (Isaia 40:31)

⁷ Jehovha anopa simba vashandiri vake. Ecishandisa muporofita Isaya, Jehovha wakagondesa kuti waizopa simba vashandiri vake kuti vamburuke “inga hokotora” pavanonga vakasuruvara kana kuremba. (Verenganyi Isaia 40:31.) Zvainga zvocirovejeso kuno Vaiziraeri kuvona hokotora jecimburuka mumango wakareba jicikarembi nee kutotakanisana mapapiro ajo pikija jecienda mudenga kamare. Izvi zvinovonesa kamare kuti kudari Jehovha ecikwanisa kupa simba hokotora, iyena anokwanisavo kupa simba vashandiri vake. Ngo kudaro, mukuvo wese pamunovona shiri yecienda nyezuru kamare icikarembi nee kutotakanisa mapapiro ajo, ceujanyi kuti Jehovha anozomupa simba ro kuhwisana no zvineso zvamuri kusongana nazvo.

8. Jobe wakajijenyi ngo zviro zvakasikwa ndi Jehovha, itusu tinojijenyivo?

⁸ Tingathemba Jehovha. Jehovha wakabesera Jobe kuti azive kuti iyena angamuthemba. (Jobe 32:2; 40:6-8) Pa mabhuyo aakaita na Jobe, Jehovha wakananga zviro zvakasiyana-siyana zvaakasika, zvakadari inga ndhondho, makore no mbheni. Iyena wakabhuyavo ngo pamusoro po zvinyama, zvakadari inga nyati no haci. (Jobe 38:32-35; 39:9, 19, 20) Zviro zvese izvi zvakajijisa Jobe kuti Jehovha ndi Mwari ano simba, rudo no uzivi. Pasure po mabhuyo aya, Jobe wakatanga kuthemba Jehovha mu njira yokuti aazivi kumboitazve. (Jobe 42:1-6) Mukufananavo, patinojija ngo zviro zvaakasika, tinovona kuti Jehovha ano uzivi no simba kupinda ari wese hake. Iyena anokwanisavo kupeja zvineso zvedu zvese i anoda kuita zvondhozvo. Kuziva izvi kungatibesera kuti timuthembe maningi.

9-10. Nvura no zuva zvinotijijisenyi ngo pamusoro pa Jehovha?

⁹ Jesu wainasa kuziva ushoni zviro zvakasikwa. Bhaibheri rinonanga kuti Jesu wainga “mujijisi wo mabasa.” Ngokuti iyena wakava no makomborero o kushanda na Babake pa kusika zviro mundega no pasi pano. (Mazwi Akangwara 8:30) Jesu paainga pasi pano wakashandisa zviro zvakasikwa kuti ajijise vajiji vake ngo pamusoro pa Babake. Ngatende tivone zviro zvinganani zvaakajijisa.

¹⁰ Jehovha anokhombija rudo hwake kuna vese. Pa hurukuro yake yo pa dundhu, Jesu wakabhuya no vajiji vake ngo pamusoro po zviro zviviri zvakasikwa ndi Jehovha zvokuti vazinji avazvireremeji. Zviro izvi ndi zuva no nvura. Izvona zvinodikana maningi kuti tikwanise kupona. Jehovha anokwanisa kutama kunisa nvura kana kupa zuva ku vandhu vakashata. Asi ngo ndava yo rudo hwake, iyena anopa zviro izvi kuno vandhu vese. (Mateu 5:43-45) Jesu wakashandisa muezaniso wo zuva no nvura kuti ajijise vajiji vake kuti Jehovha anoda kuti itusu tikhombijire rudo kuno vandhu vese. Ngo kudaro, patinovona kuvira ko zuva kwakaseja, tinodikana kuceukija rudo una Jehovha kuno vandhu vese. Njira imwe yatingatevejera rudo una Jehovha ngo yo kucumaera kuno vandhu vese.

11. Ngozvapi zvatinojija ngo kusotesesa shiri?

 ¹¹ Jehovha anotipa zvatinoda kuti tikwanise kupona. Pa hurukuro yake yo pa dundhu Jesu wakanangazve kudari: “Ringisanyi shiri; ijona ajisimi mbeu, ajikotori, ajivigi ciro mu nyumbu, asi Baba wenyu vo kumatenga vanojihisa.” Zvingaita kuti Jesu paainga ecinanga magama aya, vandhu vainga vecimupurukira vaitosota mu gore vecivona shiri jecimburuka. Perapo Jesu wakavhunjisa kudari: “Imwimwi amusisiri kupinda ijona kani?” (Mateu 6:26) Ngo njira iyi yo rudo, Jesu wakakhombija kuti Jehovha anozotipa zvese zvatinoda kuti tipone. (Mateu 6:31, 32) Zvakanangari Jesu zviri kundovangisa vashandiri vakagondeka va Jehovha nyamasi uno. Hambzaji imweni inogara ku Shipanya inoshanda inga piyona, yainga yakasuruvara ngokuti aicaikwanisa kuwana ndau yaushoni kuti iyona igare. Asi poyakavona shiri jeciha mbeu no mucero, zvakaivangisa maningi. Iyona yakati: “Kuvona shiri jecitajwa ushoni ndi Jehovha zvakandiceukija kuti iyena anozonditajavo.” No papera mukuvo mushomani, hambzaji iyi yakazowana ndau yo kugara.

12. Mukuzwirana na Mateu 10:29-31, ngozvapi zvatinojija ngo pamusoro pa Jehovha patinovona ndaka?

¹² Jehovha anoreremeja umwe nga umwe wedu. Acito atumira vajiji vake kuti vaende kocumaera, Jesu wakavabesera kunyisa kuthya, ngo ndava yo kuteverehwa. (Verenganyi Mateu 10:29-31.) Iyena wakaita izvi ngo kushandisa muezaniso wo shiri doko yainasa kuzivika ushoni ku Iziraeri, yaizwi ndaka. Mu njiku ja Jesu shiri iyi aicaireremejwa maningi. Asi iyena wakananga kudari ku vajiji vake: “Apana na imwe yajo inowa pasi, Baba wenyu vacikaizivi.” Tevere wakanangazve kudari: “Imwimwi muno mutengo mukuru maningi kupinda ndaka.” Ngo magama aya Jesu wakavonesa ku vajiji vake kuti Jehovha anoreremeja umwe nga umwe wavo. Ngo kudaro, ivona avacainga no thangwe ro kuthya kuteverehwa. Vajiji va Jesu, mukuvo wese wovaivona shiri iya vecicumaera mu madhorobha no mu ndharaundha, vaiceukija magama a Jesu. Mukufananavo, pa mukuvo wese wamunovona shiri iyi, ceukijanyi kuti “imwimwi muno mutengo mukuru maningi kupinda ndaka.” Ngo besero ra Jehovha amuzothyi kuteverehwa kuri kwese.—Nduyo 118:6.

13. Ngozvapi zvinozotibesera kuti tijije zvakawanda kuvha ku zviro zvakasikwa ndi Jehovha?

¹³ Itusu tingajijazve zviro zvakawanda maningi ngo pamusoro pa Jehovha kuvha ku zviro zvakasikwa. Tingazviitisa kudini? Cokutanga, tinodikana kupsaka nguva kuti tisotesese zviro zvakasikwa. Perapo, tinodikana kurangarira kuti izvona zvinotijijisenyi ngo pamusoro pa Jehovha. Kuita izvi azvizivi kureruka mukuvo wese. Hambzaji imweni yo ku Kamaroni, inodanwa Géraldine, yakananga kudari: “Inini ndakakurira mu dhorobha, ngo kudaro ndaidikana kuvangisira maningi kuti ndijije ngo pamusoro po zviro zvakasikwa.” Mukuru umweni  anodanwa Afonso, wakati: “Inini ndakajijira kuti ndinodikana kuwana mukuvo wo kujija ngo zviro zvakasikwa no kuvona kuti zvinondijijisenyi ngo pamusoro pa Jehovha.”

14. Dhavhidhi wakajijenyi ngo kurangarijisisa ngo zviro zvakasikwa?

¹⁴ Dhavhidhi wakarangarijisisa maningi ngo zviro zvakasikwa. Iyena wakananga kudari ngo pamusoro pa Jehovha: “Ndikavona denga, basa ro nyara jenyu, mweji no nyereji bzomakarura, ndinoxamariswa ndeciti: Ndiani mundhu kuti mumucereceje, ndiani mwana wa Adamu, kuti muvie komuvona?” (Nduyo 8:4, 5) Paaisotesesa mudenga co usiku wovona ndhondho jakaseja, jakasikwa ndi Mwari, waishamaisika maningi. Zvaaivonari zvakakwanisa kumujijisa ngo pamusoro pa Jehovha. Cimwenizve, iyena wakajija kuti Jehovha wakakura maningi. Nguva jimweni, Dhavhidhi wairangarira pa mukuvo wokuti wainga ari mu ndani ma mai wake. Pacina kukana-kana, kurangarijisisa ngo pamusoro po zvese izvi, kubongesera kwaiita ngo uzivi huna Jehovha kwakaengejeka.—Nduyo 139:14-17.

15. Ipanyi muezaniso jo mugariro munganani ja Jehovha jatinojija kuvha ku zviro zvakasikwa. (Nduyo 148:7-10)

¹⁵ Inga ndi Dhavhidhi, kangaije azvingatineseri kuwana ciri cese kuti tirangarijisise ngo zviro zvakasikwa. Pano zviro zvakawanda maningi zvingatibesera kuti tinase kuziva mugariro ja Jehovha. Inga muezaniso, vonanyi simba rina Jehovha pamunovona kupisa ko zuva pa muviri penyu. (Jeremia 31:35) Vonanyi uzivi huna Jehovha pamunovona shiri jecivaka shake. Rangariranyi ngo kudakara kwa Jehovha pamunovona ciimbhwa cecitambisa mushe waco. Cimwenizve, bongeseranyi Jehovha pamunovona mai vecitamba no mwana wavo. Itusu tino mukana jakawanda jo kujijira zvizinji ngo pamusoro pa Jehovha kuvha ku zviro zvakasikwa. Pikija zviro zviri phedo kana ndhambo nesu, zvingatiita kuti timukuje.—Verenganyi Nduyo 148:7-10.

16. Ngozvapi zvatinodikana kuita?

¹⁶ Mwari wedu, ano uzivi, rudo no simba. Cimwenizve, zvese zvaanoita zvinobuda ushoni. Tinokwanisa kuvona mugariro jimweni jina Jehovha ngo kusotesesa zviro zvakasikwa. Ngo iyo ndava, tinodikana kuwana mukuvo kuti tisotesese zviro zvakasikwa no kurangarijisisa ngo pamusoro po zvisikwa zva Jehovha. Tikaita kudaro, zvinozoita kuti tikhwedere phedo no Musiki wedu. (Jakobo 4:8) Pa cijijo cinotevera tinozovona kuti kuitisa kudini vabari vangajijisa vana vavo kuvha ku zviro zvakasikwa ndi Jehovha.