1. Omomukalo gumwe guni Job a li a tseya Jehova?

 JOB okwa li a ningi oonkundathana odhindji nayalwe mokukalamwenyo kwe, ihe ndhoka dha li dha dhenga mbanda, oondhoka a li a ningi naJehova Kalunga. Opo Job a kale e na einekelo muunongo nosho wo moonkondo dhaJehova dhokusila oshimpwiyu aapiya Ye, Jehova okwa li a popi kombinga yiinima yimwe ya dhenga mbanda yomeshito. Pashiholelwa, Kalunga okwa li a dhimbulukitha Job kutya Oha sile oshimpwiyu iinamwenyo, onkee okwa li ta vulu okusila Job oshimpwiyu. (Job 38:39-41; 39:1, 5, 13-16) Sho Job a tala kiiholelwa mbyoka yomeshito, okwa li i ilongo oshindji kombinga yuukwatya waKalunga ke.

2. Omolwashike tashi vulika omathimbo gamwe tu mone oshidhigu okukonakona eshito lyaJehova?

² Natse otatu vulu okwiilonga oshindji kombinga yaKalunga ketu, uuna tatu konakona eshito lye. Ihe otashi vulika kaashi kale aluhe oshipu kutse oku shi ninga. Pashiholelwa, ngele otu li mondoolopa, otashi vulika tu kale ihaatu mono esiku kehe iinima oyindji mbyoka Jehova a shita. Nokuli nando otu kale tu li popepi neshito, otashi vulika tu kale tu uvite kutya katu na ethimbo lyoku li konakona. Onkee natu ka taleni kutya omolwashike oshiwanawa okukutha ethimbo nokuninga oonkambadhala tu konakone nawa eshito. Otatu ka tala nkene Jehova naJesus ya longitha eshito ye tu longe, naashoka tatu vulu okuninga, opo tu ilonge iinima yilwe meshito.

3. Oshike tashi ulike kutya Jehova okwa li a hala Adam a nyanyukilwe eshito?

³ Jehova okwa li a hala omuntu gwotango a nyanyukilwe eshito Lye. Sho Kalunga a shiti Adam, okwe mu tula moparadisa ombwanawa, a kale mo, e yi longe noku yi tamunune mo. (Gen. 2:8, 9, 15) Dhiladhila owala kenyanyu ndyoka Adam a li e na sho a li a tala oombuto tadhi mene nosho wo oongala tadhi sheneke. Osha li uuthembahenda uunene kuAdam okukala ta sile oshimpwiyu oshikunino shaEden. Jehova okwa li wo a lombwele Adam a luke iinamwenyo yi ili noyi ili omadhina. (Gen. 2:19, 20) Jehova okwa li ta vulu okuluka iinamwenyo mbyoka ye mwene, ihe pehala lyaashono okwa pe Adam oshinakugwanithwa shoka. Kapu na omalimbililo kutya Adam manga inaa tokola kutya iinamwenyo mbyoka ne yi luke omadhina geni, okwa li e yi nongonona nawa, ta tala komaukwatya gayo nosho wo komaihumbato gayo. Adam oku na okukala a li a nyanyukilwa okuninga ngaaka. Oshi na okukala sha li she mu kwathele a uve ko nkene He omunandunge nankene iinima mbyoka a shita yi li iihokithi yo iiwanawa lela.

4. (a) Etompelo limwe tu na lyokukonakona eshito olini? (b) Iinima yini yomeshito wa pandula unene?

⁴ Etompelo limwe kutya omolwashike tu na okukonakona eshito olyo kutya Jehova okwa hala tu shi ninge. Ohe tu lombwele ta ti: “Tala owala utale kegulu!” Opo nduno ohe tu pula ta ti: “Olye a shiti oonyothi ndhoka wa tala?” Eyamukulo kepulo ndyoka olya yela. (Jes. 40:26) Jehova okwa shita iinima iikumithi lela ayihe yomegulu nosho wo yokombanda yevi nomefuta, niinima ayihe mbyoka ohayi tu longo kombinga ye. (Eps. 104:24, 25) Shimwe ishewe, dhiladhila komukalo moka Kalunga e tu shita. Okwe tu shita hatu vulu okunyanyukilwa okutala iinima iiwanawa yomeshito. Okwe tu shita wo hatu vulu okutala, okuuva, okukwata, okulola nokuuva omazimba, iinima mbyoka hayi tu kwathele tu nyanyukilwe iinima ya yoolokathana mbyoka a shita.

5. Shi ikolelela kAaroma 1:20, ongiini tatu vulu okumona mo uuwanawa mokukonakona eshito lyaJehova?

⁵ Ombiimbeli otayi tu lombwele etompelo limwe lya simana kutya omolwashike tu na okukonakona eshito. Eshito ohali tu longo kombinga yomaukwatya gaJehova. (Lesha Aaroma 1:20.) Pashiholelwa, ngele owa tala kiinima mbyoka Jehova a shita, oto ka mona kutya oya shitikika. Mbela ihayi holola uunongo waKalunga? Dhiladhila wo kombinga yiikulya yomaludhi gi ili nogi ili mbyoka hatu vulu okunyanyukilwa. Shika otashi ulike kutya Jehova oku hole aantu. Uuna tu wete uukwatya waJehova miinima mbyoka a shita, ohatu mu tseya nawa nohashi tu inyengitha tu hedhe popepyeelela naye.  Ngashingeyi natu tale komikalo dhimwe moka Jehova a longitha eshito lye a longe aantu iiyilongomwa ya simana.

6. Oshike tatu vulu okwiilonga uuna tatu tala oondhila tadhi tembuka?

⁶ Jehova okwa tula po ethimbo lyokuninga iinima. Omumvo kehe lwopehulilo lyaFebuluali sigo omokati kaMei, Aaisraeli oya li haya mono oonkumbinkumbi tadhi tuka tadhi tembukile lwokuumbangalantu. Kalunga okwa li a lombwele Aaisraeli a ti: “Oonkumbinkumbi odhi shi ethimbo [lyadho] lyokushuna.” (Jer. 8:7) Ngaashi owala Jehova a tulila po oonkumbinkumbi ethimbo lyokutembuka, okwa tula po wo ethimbo lyokuhanagula po aakolokoshi. Kunena ngele tatu tala oondhila tadhi tembuka, ohashi tu dhimbulukitha kutya otatu vulu okwiinekela kutya Jehova oku na “ethimbo” ndyoka ta ka hanagula po uuyuni mbuka wa kolokosha. — Hab. 2:3.

7. Oshike tatu vulu okwiilonga kunkene ondhila hayi tuka? (Jesaja 40:31)

⁷ Jehova oha nkondopaleke aapiya ye. Jehova okwa uvaneka okupitila muJesaja kutya ota nkondopaleke aapiya ye ya fe “oontsa tadhi yelutha omawawa pombanda,” uuna ye uvite kaaye na oonkondo nenge ya teka omukumo. (Lesha Jesaja 40:31.) Aaisraeli oya li haya mono nkene oontsa hadhi tuka dha yalaleka omawawa gadho itaadhi longitha oonkondo odhindji. Shika otashi tu dhimbulukitha lela kutya Jehova ota vulu oku tu pa oonkondo ngaashi owala he dhi gandja koondhila ndhoka. Uuna wa mono ondhila tayi tengele ya uka mookathele mwiya noitaayi papameke omawawa gayo, dhimbulukwa kutya Jehova ota vulu oku ku pa oonkondo dhokuungaunga nomaupyakadhi goye.

8. Job okwa li i ilongo shike sho a tala keshito lyaKalunga, noshike tatu vulu okwiilonga?

⁸ Jehova okwa gwana okwiinekelwa kutse. Jehova okwa li a kwathele Job a kale e Mu inekela shi vulithe nale. (Job 32:2; 40:6-8) Moonkundathana ndhoka a li a ningi naJob, Kalunga okwa li a popi iinima oyindji yomeshito ngaashi oonyothi, iikogo nosho wo oombadhi. Jehova okwa li wo a popi kombinga yiinamwenyo, ngaashi ompugulu nonkambe. (Job 38:32-35; 39:9, 19, 20) Iinima ayihe mbyoka oya li ya gandja uumbangi kutya Kalunga ke na owala oonkondo dha shiga ko, ihe oku li wo omunahole noku na uunongo owundji. Oonkundathana ndhoka odha ningitha Job a kale i inekela Jehova shi vulithe nale. (Job 42:1-6) Sha faathana, uuna tatu konakona eshito, ohatu dhimbulukithwa kutya Jehova oku na lela oondunge noku na oonkondo e tu vule. Ota vulu wo okuhulitha po omaupyakadhi getu agehe note te ke shi ninga. Uushili mboka otawu vulu oku tu kwathela tu kokeke einekelo lyetu muye.

9-10. Etango nomvula ohayi tu ulukile shike kombinga yaJehova?

⁹ Jesus okwa li e shi nawa eshito. Okwa li e na uuthembahenda wokulonga pamwe naHe e li “engomba” sho a li a shiti uuyuni. (Omayel. 8:30) Lwanima, sho Jesus a li kombanda yevi, okwa li a longitha eshito a longe aalongwa ye kombinga yaHe. Tala kiiyilongomwa yimwe mbyoka a li e ya longo.

¹⁰ Jehova oha ulukile kehe gumwe ohole. MEuvitho lyokOndundu, Jesus okwa li a lombwele aalongwa ye iinima iyali yomeshito mbyoka aantu oyendji ihaaya kala ye na ko nasha nayo, etango nomvula. Iinima ayihe mbyoka oya simana, opo tu kale tu na omwenyo. Jehova okwa li ta vulu okutindila aantu mboka ihaaye mu longele iinima mbyoka. Ihe pehala lyaashono, oha pitithile pahole aantu ayehe etango nohe ya lokithile omvula. (Mat. 5:43-45) Jesus okwa li a longitha oshiilongomwa shoka a longe aalongwa ye kutya Jehova okwa hala tu ulukile  omuntu kehe ohole. Uuna twa tala etango tali ningine nenge omvula tayi loko nawa, ohatu vulu okudhiladhila kunkene Jehova e hole aantu ayehe. Oshiholelwa she otashi vulu oku tu inyengitha tu ulukile aantu ayehe ohole ndjoka moku ya uvithila.

11. Ongiini okutala koondhila dhokegulu taku vulu oku tu tsa omukumo?

¹¹ Jehova ohe tu pe iinima mbyoka twa pumbwa, opo tu kale tu na omwenyo. MEuvitho lyokOndundu olyo tuu ndyoka, Jesus okwa popi wo a ti: “Taleni oondhila dhokegulu. Nando ihadhi kunu, dho ihadhi teya, dho ihadhi pungula miigandhi, Ho yeni yomegulu ohe dhi palutha.” Otashi vulika mboka ya li taya pulakene kuJesus ya li ye wete oondhila tadhi tuka mombanda, sho e ya pula a ti: “Ano hane mboka mu dhi vule?” (Mat. 6:26) Momukalo nguka gwopahole, Jesus okwe tu kwathele tu mone kutya Jehova ote tu sile oshimpwiyu mwaashihe shoka twa pumbwa. (Mat. 6:31, 32) Shoka tatu vulu okwiilonga mwaashoka sha popiwa kuJesus kombinga yeshito, nokunena ohashi tsu omukumo aapiya yaJehova aadhiginini. Omumwameme gumwe omukokolindjila omugundjuka gwokoSpania okwa li e uvite a teka omukumo, molwaashoka ka li a vulu okumona ehala ewanawa lyokukala. Ihe konima sho a mono uudhila tawu li oombuto niiyimati, oshe mu tsu omukumo. Okwa ti: “Uudhila mboka owa li wa dhimbulukitha ndje kutya Jehova ohe wu sile oshimpwiyu nota ka sila ndje wo oshimpwiyu.” Konima yethimbo efupi, omumwameme ngoka okwa mono ehala lyokukala.

12. Shi ikolelela kuMateus 10:29-31, omanza otaga holola shike kombinga yaJehova?

¹² Jehova okwe tu lenga pauhandimwe. Manga Jesus inaa tuma aalongwa ye ya ka uvithe, okwa li e ya kwathele kaaya kale ya tila omapataneko. (Lesha Mateus 10:29-31.) Okwa li a ningi ngaaka mokupopya kombinga yuudhila mboka wa li apuhe muIsraeli, ano omanza. Uudhila mboka kawa li wu na ongushu pethimbo lyaJesus. Ihe okwa li a lombwele aalongwa ye a ti: “Kapu na nando olimwe lyomugo tali gwile pevi, Ho [“inee shi ndhindhilika,” NW].” Opo nduno okwa gwedha ko a ti: “One mu vule omanza ogendji.” Kungawo Jesus okwa li a shilipaleke aalongwa ye kutya Jehova okwe ya lenga pauhandimwe, onkee kaya li ye na etompelo lyokukala ya tila okuhepekwa. Aalongwa mboka oye na okukala ya li haya dhimbulukwa oohapu dhaJesus ndhoka uuna ya mono omanza sho taya uvitha moondoolopa nomomikunda. Uuna wa mono okadhila, dhimbulukwa kutya Jehova okwe ku lenga pauhandimwe, molwaashoka nangoye owu “vule omanza ogendji.” Ote ku kwathele kuu kale wa tila sho yalwe taye ku pataneke. — Eps. 118:6.

13. Oshike tashi tu kwathele tu ilonge iinima meshito?

¹³ Otatu vulu okwiilonga iiyilongomwa yilwe oyindji kombinga yaJehova meshito. Ngiini mbela? Shotango, otwa pumbwa okukonga ethimbo tu nongonone eshito. Oshitiyali, otwa pumbwa okudhiladhila kombinga yaashoka tali tu longo shi na ko nasha naJehova. Otashi vulika  kaatu mone aluhe oshipu okuninga iinima mbika. Omumwameme Géraldine gwokoCameroon okwa ti: “Onda putukila mondoolopa, onkee onda li ndi na okuninga oonkambadhala dha mana mo ndi nongonone eshito.” Omukuluntugongalo gwedhina Alfonso okwa popi a ti: “Ondi ilongo kutya onda pumbwa okwiitulila po ethimbo ndi kale ongame awike, ndi konakone eshito lyaJehova nokutedhatedha kombinga yaashoka tali longo ndje kombinga ye.”

14. David okwi ilongo shike sho a tedhatedha keshito lyaKalunga?

¹⁴ David okwa li a dhiladhila muule kombinga yeshito lyaKalunga. Okwa li a lombwele Jehova a ti: “Ngele te tala kegulu ndyoka we li shiti, komwedhi noonyothi mbyoka we yi uthile omahala gayo — Omuntu omushike, sho ho mu dhimbulukwa?” (Eps. 8:3, 4) Eeno, sho David a li a tongolola kegulu uusiku, ka li owala a hokwa okutala oonyothi adhihe ndhoka dhi li ko. Okwa li wo a tedhatedha kombinga yaashoka oonyothi ndhoka tadhi mu longo kombinga yaKalunga. Okwa li i ilongo kutya Jehova omunene. Omathimbo galwe, David okwa li a tedhatedha kunkene a umbwa mela lyayina. Sho a tedhatedha komukalo ngoka omukumithi, olupandu lwe lwokupandula uunongo waJehova olwa koko. — Eps. 139:14-17.

15. Gandja iiholelwa yankene wa mona uukwatya waJehova meshito. (Episalomi 148:7-10)

¹⁵ Otashi vulika oshipu kutse ngaashi sha li kuDavid okumona oshinima shontumba meshito e tatu dhiladhila muule kombinga yasho. Ngele owa tala momudhingoloko, omu na iinima oyindji mbyoka tayi vulu oku tu kwathela tu tseye nawa Jehova. Pashiholelwa, oto vulu okumona kutya Jehova omunankondo, uuna wa uvu okamuyenye ketango koshipa shoye. (Jer. 31:35) Dhiladhila kuunongo waKalunga, uuna wa mono okadhila taka tungu oshihandhila shako. Dhiladhila kunkene Jehova ha nyanyudha aantu, uuna to tala okambwa taka tidha omushila gwako. Shimwe ishewe, pandula Jehova omolwohole ye, uuna wa mono omuvalakadhi ta dhana nokanona ke. Otu na oompito odhindji lela dhokwiilonga kombinga yaJehova, molwaashoka iinima mbyoka a shita, kutya nduno iinene, iishona, oyi li popepi nenge oyi li kokule, ohayi mu tanga. — Lesha Episalomi 148:7-10.

16. Otu na okukala twa tokola toko okuninga shike?

¹⁶ Kalunga ketu, omunandunge, omunahole, omunankondo kaaku na we, naashihe shoka a shita oshiwanawa. Uukwatya mboka nawulwe owundji ohawu imonikila meshito ngele otwe li tala nawa. Onkee ano, natu kale hatu kongo ethimbo pandjigilile tu nyanyukilwe eshito nokudhiladhila kwaashoka tali tu longo kombinga yaJehova. Mokuninga ngawo, otatu ka hedha popepyeelela nOmushiti gwetu. (Jak. 4:8) Moshitopolwa tashi landula, otatu ka kundathana nkene aavali taya vulu okulongitha eshito ya kwathele oyana ya hedhe popepi naJehova.