1. Hadia zanolo Yobi enaʼö itugu aboto ba dödönia gamuata Yehowa?

 SANDROHU faʼaurinia, asese fahuhuo Yobi ba niha böʼö. Hizaʼi, so zi toröi-röi ba dödönia me fahuhuo ia khö Lowalangi Yehowa. Me luo daʼö, omasi Yehowa ba wamaduhuʼö ba dödö Yobi waʼatua-tuania ba tola ibönökhi zoguna ba nono mbanuania. Börö daʼö, ifatunö khö Yobi enaʼö inehegö ngawalö niwöwöinia sahöli-höli dödö. Duma-dumania, ifasugi ba dödö Yobi wa tola ibönökhi zoguna ba gurifö, tatu manö tola göi ibönökhi zoguna khö Yobi. (Yob. 38:39-41; 39:1, 5, 13-16) Börö me iʼangeragö ngawalö niwöwöi, oya ifahaʼö ia Yobi sanandrösa ba gamuata Lowalanginia.

2. Hana wa itaria abua khöda ba wonehegö niwöwöi?

² Simane Yobi, tola tafahaʼö ita khö Lowalangida na tanehegö niwöwöinia. Hizaʼi, itaria abua khöda wamalua daʼö. Na toröi ita ba mbanua segebua, itaria lö taʼila zi sökhi ba zi fasuida. Ba na toröi ita ba mbanua side-ide, itaria lö inötöda ba wonehegö zi sökhi ba zi fasuida. Börö daʼö, datatutunö hadia mbuania na tabeʼe ginötö hegöi famorege ba wonehegö niwöwöi Yehowa. Tatutunö göi dania hewisa Yehowa hegöi Yesu me laʼogunaʼö niwöwöi ba wamahaʼö yaʼita, ba hewisa enaʼö oya wamahaʼö nisöndrada moroi ba niwöwöi.

3. Hezo tola taʼila wa omasi Yehowa na omuso dödö Gadamo ba niwöwöinia?

³ Omasi Yehowa na omuso dödö niha siföföna sotöi Adamo ba niwöwöi Lowalangi. Me iwöwöi Gadamo, ibeʼe nahia  waʼatoröi si sökhi yaʼia daʼö Kabu Edena. Ibeʼe halöwö khö Gadamo ba wondrorogö hegöi ba wangeboloʼö kabu andrö. (1 Mo. 2:8, 9, 15) No halöwö si sökhi daʼö! Omuso dödö Gadamo me iʼila moliwiö zinanö ba teboka mbowo mbunga. Ba iʼandrö khönia Yehowa ba wamatörö töi gurifö. (1 Mo. 2:19, 20) Sindruhunia, tola ifalua samösa daʼö Yehowa, hizaʼi ibeʼe halöwö daʼö khö Gadamo. Fatua lö ifatörö döi ngawalö gurifö, ihaogö inehegö Adamo hewisa gurifö andrö hegöi lagura. Omuso sibai dödö Gadamo ba halöwönia. Daʼö zanolo yaʼia enaʼö aboto ba dödönia waʼatua-tua Namania. Fefu niwöwöi Namania no sadöni dödö ba si sökhi famaigi.

4. (a) Hadia sambua dane-dane wa moguna tanehegö niwöwöi? (b) Hadia zadöni sibai dödöu moroi ba niwöwöi?

⁴ Sambua dane-dane wa moguna sibai tanehegö niwöwöi yaʼia daʼö börö me omasi Yehowa na tafalua ia. Imane wangumaʼö, ”Faöga ndraʼugö si yawa ba faigi. Haniha zomböi daʼa fefu?” Tatu taʼila wanema linia. (Yes. 40:26) Oya niwöwöi Yehowa sahöli-höli dödö si so ba dalu mbanua, ba gulidanö, hegöi ba nasi. Tola tafahaʼö ita moroi ba niwöwöinia andrö fefu. (Si. 104:24, 25) Baero daʼö, angeragö hewisa wamazökhi Yehowa yaʼita. Ifazökhi ita enaʼö tola omuso dödöda ba waʼasökhi banua si yawa awö danö. Ibeʼe göi khöda waʼatua-tua enaʼö taʼila zi fasuida, tarongo, tababaya, taʼago, ba tola tarasoi waʼami gö irege tasöndra waʼomuso dödö moroi ba niwöwöinia soya sibai.

5. Moloʼö Roma 1:20, hadia mbuania na tanehegö niwöwöi Yehowa?

⁵ Ifatunö khöda Sura Niʼamoniʼö hadia dane-dane tanö böʼö wa moguna tanehegö niwöwöi: Tola tafahaʼö ita sanandrösa ba gamuata Yehowa. (Baso Roma 1:20.) Duma-dumania, nehegö ngawalö zahöli-höli dödö si no ifazökhi si so ba zi fasuida. Daʼö zangoromaʼö wa yaʼia andrö no fondrege zatua-tua. Ba tandraigö angeragö ngawalö gö si tola taʼogunaʼö, daʼö dandra wa iʼomasiʼö sibai niha gulidanö Lowalangi. Na tafahaʼö ita ba gamuata Yehowa moroi ba niwöwöinia, tola itugu aboto ba dödöda ia, ba tefarou dödöda enaʼö itugu ahatö khönia. Iadaʼa, datatutunö ösa hadia manö wamahaʼö nibeʼe Yehowa khöda moroi ba niwöwöinia.

6. Hadia wamahaʼö si tola tahalö na tanehegö waʼafindra-findra wofo ba mbanua böʼö?

⁶ So ginötö si no itatugöi Yehowa. Ero röfi, ba gangohorita baŵa si Dua hegöi ba dalu  mbaŵa si Lima, asese laʼila iraono Gizaraʼeli muhombo dumbao numalö ira tanö yöu. Imane Lowalangi ba ndraono Gizaraʼeli, ’Tumbao, iʼila hawaʼara ginötö waʼafindrania.’ (Yer. 8:7) Simane wotatugöi Yehowa hawaʼara findra wofo, no göi itatugöi hawaʼara ihori gulidanö daʼa. Börö daʼö, na taʼila waʼafindra wofo, tola itörö tödöda wa no göi itatugöi ginötö Yehowa hawaʼara gamozua götö danö andre.—Hab. 2:3.

7. Börö me tola alawa wohombo wofo, hadia nitörö tödöda? (Yesaya 40:31)

⁷ Ibeʼe waʼabölö ba nono mbanuania Yehowa. Iʼogunaʼö Yesaya Yehowa ba wangombakha mbuʼusa linia khö nono mbanuania si lö faʼabölö mazui side-ide tödö, wa hasambalö iʼabölöʼö ira enaʼö tola ’muhombo simane moyo’. (Baso Yesaya 40:31.) Asese laʼila iraono Gizaraʼeli waʼalawa wohombo moyo hewaʼae na lö asese ifangafo gafinia. Tola ifalua daʼö moyo börö me so nangi zolulugö yaʼia enaʼö alawa wohombonia. Simane me ibeʼe waʼabölö ba moyo Yehowa, tola göi ibeʼe khöda waʼabölö. Börö daʼö, ba ginötö öʼila hana wa tola alawa wohombo wofo ba dalu mbanua hewaʼae na lö asese ifangafo gafinia, törö tödömö wa hasambalö iʼabölöʼö ndraʼugö Yehowa ba wanaögö faʼabasaki salua.

8. Hadia wamahaʼö nihalö Yobi moroi ba niwöwöi Lowalangi, ba hadia wamahaʼö si tola tahalö?

⁸ Sindruhu-ndruhu wa tola mufaduhusi tödö Yehowa. Itolo Yobi Yehowa enaʼö itugu faduhu dödönia. (Yob. 32:2; 40:6-8) Ba ginötö fahuhuo Lowalangi khö Yobi, itötöi ösa niwöwöinia simane döfi, lawuo hegöi gari mbanua. Itötöi göi ösa gurifö simane sawi si matua hegöi kudo. (Yob 38:32-35; 39:9, 19, 20) Fefu daʼö zangoromaʼö wa so khö Yehowa kuaso, faʼatua-tua hegöi faʼomasi sahöli-höli dödö. Me no aefa irongo daʼö fefu, itugu faduhu dödö Yobi khö Yehowa. (Yob. 42:1-6) Simanö göi, na tanehegö niwöwöi, tola itörö tödöda wa abölö atua-tua Yehowa ba abölö ebua kuasonia moroi khöda. Tola göi iheta fefu gabula dödöda, ba hasambalö ifalua daʼö. Na lö tebulö itörö tödöda daʼö, tola itugu faduhu dödöda khönia.

9-10. Hadia wamahaʼö si tola tahalö sanandrösa khö Yehowa moroi ba haga luo hegöi teu?

⁹ Aboto ba dödö Yesu sanandrösa ba mbanua si yawa awö danö. Me ifazökhi banua si yawa awö danö Amania, itolo ia Yesu tobali ’tuka sonekhe’. (Amd. 8:30) Ba gafuriata me möi Yesu ba gulidanö, iʼogunaʼö niwöwöi ba wamahaʼö ndra nifahaʼönia sanandrösa khö Namania. Datatutunö ösa hadia manö wamahaʼö nibeʼenia.

¹⁰ Iforomaʼö waʼomasi Yehowa ba niha fefu. Ba huhuo ba Hili, itutunö Yesu sanandrösa ba niwöwöi Lowalangi yaʼia daʼö haga luo hegöi teu, hewaʼae na si toʼölö manö daʼö ba wamaigi niha. Moguna sibai khöda zi dombua ngawalö andre enaʼö lö tebulö auri ita. Sindruhunia, tola manö lö ibeʼe Yehowa haga luo hegöi teu ba niha si lö mamosumange yaʼia. Hizaʼi, börö me so khönia waʼomasi ibeʼe daʼö ba niha fefu. (Mat. 5:43-45) Itutunö daʼö Yesu ba wamahaʼö ira nifahaʼönia, wa iʼomasiʼö fefu niha Yehowa. Börö daʼö, ero taʼila hawaʼasökhi na aekhu luo, mazui na manoru-noru deu si möi fangokafu, tola taʼangeragö waʼomasi Yehowa si lö ebua dödö zambuana. Duma-dumania zamarou yaʼita ba wangoromaʼö faʼomasi si fagölö ba ginötö manuriaigö ita ba niha fefu.

11. Hadia mbua nitemada na tanehegö wofo ba dalu mbanua?

¹¹ Lö tebulö ibönökhi zoguna khöda Yehowa. Ba Huhuo ba Hili, imane göi Yesu wangumaʼö, ”Haogö wamaigi fofo andrö ba dalu mbanua.  Lö manaru ira ba lö mamasi, lö mangöhöna ira ba halasa, hizaʼi ibalazoi ira Amami andrö si so ba zorugo.” Dozi samondrongo Yesu, tola lafaigi wofo ba dalu mbanua me itohugö wangumaʼö imane, ”Hadia tenga no aröu faehu ami moroi ba wofo?” (Mat. 6:26) Si fao faʼomasi ifaduhuʼö ba dödöda Yesu wa hasambalö ibönökhi zoguna khöda Yehowa. (Mat. 6:31, 32) Lö tebulö möi fangabölöʼö nono mbanua Yehowa irugi iadaʼa wamahaʼö si sökhi andrö. Samösa dalifusöda perintis sawuyu boto si so ba Spanyol no irai irasoi waʼide-ide dödö börö me lö isöndra nahia waʼatoröi si sökhi. Hizaʼi, me no aefa iʼila wofo si manga bua geu, irasoi waʼahono dödö. Imane wangumaʼö, ”Me uʼila hewisa Yehowa wombönökhi soguna ba wofo, itugu faduhu dödögu wa hasambalö ibönökhi zoguna khögu Yehowa.” Lö ara aefa daʼö, isöndra nahia waʼatoröi si sökhi.

12. Simane nisura ba Mataiʼo 10:29-31, hadia wamahaʼö si tola tahalö sanandrösa khö Yehowa moroi ba wofo siliwi?

¹² No sebua böli ita ba wamaigi Yehowa ero zamösana. Fatua lö ifatenge ndra sinengenia Yesu weʼamöi manuriaigö, itolo ira enaʼö lö khöra faʼatau na so wolohi. (Baso Mataiʼo 10:29-31.) Itutunö sanandrösa ba wofo sasese laʼila iraono Gizaraʼeli yaʼia daʼö siliwi. Ba götö Yesu ide-ide sibai böli ziliwi andrö. Hizaʼi, imane Yesu khö ndra nifahaʼönia, ”Na so ziliwi satoru ba danö, hasambalö iʼila Amami.” Imane nasa wangumaʼö, ”Abölö tohude ami moroi ba wofo andrö.” Ifaduhuʼö ba dödö ndra nifahaʼönia Yesu wa iʼameʼegö tödö ira Yehowa ero zamösana, börö daʼö lö moguna ataʼu ira na alua wolohi. Ba ginötö manuriaigö ira ba mbanua segebua hegöi ba mbanua side-ide, tatu itörö tödöra wehede Yesu na laʼila ziliwi. Börö daʼö, ero na öʼila wofo side-ide, törö tödömö wa iʼameʼegö tödö ndraʼugö Yehowa, börö me ’abölö tohude ndraʼugö moroi ba wofo andrö’. Börö me ituhini ndraʼugö Yehowa, lö tebulö so khöu waʼabarani na so wolohi.—Si. 118:6.

13. Hewisa wa tola tafahaʼö ita sanandrösa khö Yehowa moroi ba niwöwöi?

¹³ Oya wamahaʼö tanö böʼö si tola tatema sanandrösa khö Yehowa moroi ba niwöwöi. Hewisa lalania? Si oföna, moguna tabeʼe ginötöda ba wonehegö niwöwöi. Aefa daʼö, taʼangeragö hadia wamahaʼö si tola tahalö sanandrösa khö Yehowa moroi ba niwöwöinia andrö. Itaria abua wamalua daʼö. Samösa dalifusöda ira alawe moroi ba Kamerun sotöi Géraldine, imane wangumaʼö, ”Börö me ba mbanua sebua teʼebuaʼö ndraʼo, andrö wa moguna uforege sibai enaʼö tola unehegö waʼasökhi banua si yawa awö danö.” Samösa zatua sokubaloi sotöi Alfonso, imane wangumaʼö, ”Aboto ba dödögu wa moguna ubeʼe ginötögu ha yaʼo-yaʼo enaʼö unehegö niwöwöi Yehowa, ba uʼangerönusi hadia wamahaʼö si tola  uhalö sanandrösa khönia moroi ba niwöwöinia andrö.”

14. Hadia wamahaʼö nihalö Dawido me iʼangerönusi niwöwöi Lowalangi?

¹⁴ Asese iʼangerönusi Dawido sanandrösa ba niwöwöi Lowalangi. Imane khö Yehowa, ”Me ufakhölö ndraʼo wamaigi talu mbanua, halöwö dangau, baŵa awö ndröfi nifazökhimö, umane: Haniha niha andrö irege itörö tödöu ia.” (Si. 8:3, 4) Me ifakhölö ia Dawido ba zi bongi ba wamaigi talu mbanua, tenga ha asala ahöli dödönia ba wamaigi ndröfi ba dalu mbanua. Hizaʼi, iʼangerönusi hadia wamahaʼö si tola ihalö sanandrösa khö Lowalangi moroi ba dröfi andrö. Aboto göi ba dödönia wa sindruhu-ndruhu mofaʼabölö Yehowa. No göi irai iʼangerönusi Dawido hewisa me so ia ba dalu ninania. Me iʼangerönusi daʼö Dawido, itugu iʼameʼegö tödö waʼatua-tua Yehowa sahöli-höli dödö.—Si. 139:14-17.

15. Hadia manö niwöwöi Yehowa si tola manolo yaʼugö enaʼö öfahaʼö ndraʼugö ba gamuatania? (Sinunö 148:7-10)

¹⁵ Simane Dawido, tola tafahaʼö ita moroi ba niwöwöi si so ba zi fasuida. Oya ngawalö zi tola manolo yaʼita enaʼö aboto ba dödöda gamuata Yehowa. Duma-dumania, angeragö sanandrösa ba kuaso Yehowa ba ginötö örasoi waʼaukhu zino. (Yer. 31:35) Angerönusi sanandrösa ba waʼatua-tua Yehowa me öʼila wofo si so ba gazuninia. Angeragö na ifaʼiki ndraʼugö Yehowa ba ginötö öʼila nono nasu solohi giʼonia samösa. Andrö saohagölö khö Yehowa ba waʼomasinia ero na öʼila zi samösa ina famai-mai ia khö nononia sawuyu. Oya ginötö ba wamahaʼö yaʼita sanandrösa khö Yehowa, börö me fefu niwöwöinia lasuno ia, he sebua, he side-ide, he sahatö hegöi saröu.—Baso Zinunö 148:7-10.

16. Hadia gangetula nihalöda?

¹⁶ Sindruhu wa no atua-tua sibai Lowalangida, so khönia faʼomasi hegöi faʼabölö. Sökhi fefu niwöwöinia. Tola tafahaʼö ita sanandrösa ba gamuatania na tanehegö niwöwöinia si so ba zi fasuida. Börö daʼö, yalötebulö tabeʼe ginötöda ba wonehegö niwöwöi, ba taʼangeragö hadia wamahaʼö si tola tahalö sanandrösa khö Yehowa. Na tafalua daʼö, tola itugu ahatö ita khö Zomböi yaʼita. (Yak. 4:8) Ba artikel aefa daʼa, tatutunö hewisa zatua ba wangogunaʼöra niwöwöi ba wanolo iraonora enaʼö ahatö khö Yehowa.