1. Ngiyiphi enye indlela uJobho akghona ngayo ukwazi uJehova ngcono?

 UJOBHO wakhuluma nabantu abanengi ekuphileni kwakhe, kodwana ikulumiswano eyamkara khulu ngeyokukhuluma noJehova uZimu. Ekulumiswaneni leyo uJehova watjela uJobho bona aqale ezinye izinto ezikarisako azenzileko. Lokhu bekuzokusiza uJobho abone indlela uJehova ahlakaniphe ngayo begodu bekuzokuqinisa ukuthembela kwakhe kuJehova ukuthi angakghona ukunikela iinceku zakhe ezikutlhogako. Ngokwesibonelo, uZimu wakhumbuza uJobho ukuthi utlhogomela iinlwana, nje-ke naye angakghona ukumtlhogomela. (Job. 38:39-41; 39:1, 5, 13-16) Ngokuqala indalo, uJobho wafunda okukhulu ngobuntu bakaZimakhe.

2. Kubayini ngezinye iinkhathi singakufumana kubudisi ukuhlolisisa indalo kaJehova?

² Nathi singafunda okungeziweko ngoZimethu, nasiqalisisa izinto azidalileko. Kodwana ngezinye iinkhathi kubudisi ukwenza lokho. Nange sihlala edorobheni, angeze sakghona ukuzibona qobe langa izinto azidalileko. Ngitjho nanyana sihlala ngaphandle kwedorobho singabona ngasuthi asinaso isikhathi esaneleko sokufunda indalo. Nje-ke akhesicoce ngokuthi kubayini kuqakathekile ukuzipha isikhathi nokwenza imizamo yokufunda ngendalo. Sizokucoca nangendlela uJehova noJesu abasebenzise ngayo indalo ukusifundisa nokuthi khuyini esingayenza bona sifunde okungeziweko endalweni.

3. Khuyini etjengisa ukuthi uJehova bekafuna u-Adamu athabele indalo?

³ UJehova bekafuna umuntu wokuthoma athabele indalwakhe. UZimu nakadala u-Adamu wamnikela ipharadesi elihle  bona ahlale kilo begodu wamnikela umsebenzi wokobana alitlhogomele bekalikhulise. (Gen. 2:8, 9, 15) Akhumcabange u-Adamu athabile njengombana aqale imbewu ithoma ukuhluma namathuthumbo athoma ukukhula. Bekulilungelo elikhulu u-Adamu ebekanalo lokutlhogomela isimu ye-Edeni. UJehova wamnikela nomsebenzi wokuthiya iinlwana ezihlukahlukeneko amagama. (Gen. 2:19, 20) UJehova bekangazikhethela yena amagama kunalokho wanikela u-Adamu umsebenzi lo. Akunakuzaza ukuthi ngaphambi kokuthi u-Adamu azithiye amagama waziqalisisa, waqala imikghwazo nalokho ezijayele ukukwenza. U-Adamu bekakuthabela ukwenza umsebenzi lo. Kwamambala kwamsiza ukuthi azwisise indlela uJehova ahlakaniphe ngayo nokuthi zihle kangangani izinto azidalileko.

4. (a) Ngiliphi ibanga elisenza sihlolisise indalo? (b) Ngimiphi imisebenzi ekarisako oyithabela ngokukhethekileko?

⁴ Elinye ibanga elisenza sihlolisise indalo kukuthi uJehova ufuna senze njalo. Uthi kithi, “phakamiselani amehlwenu ezulwini nibone.” Abuze athi: “Ngubani odale izintwezi?” Ipendulo isebaleni. (Isa. 40:26) UJehova wadala zoke izinto ezulwini, ephasini nelwandle begodu zoke izintwezi zisifundisa ngaye. (Rhu. 104:24, 25)Akhucabange ngendlela uZimu asenze ngayo. Usenze sakghona ukuthabela ukuqala izinto ezihle endalweni. Usiphe amakghono wokubona, wokuzwa, wokunambitha, wokuthinta newokunukelela okuzizinto ezisenza sikghone ukuthabela izinto ezihlukahlukeneko azidalileko.

5. NgokwebeRoma 1:20, sizuza njani ngokufunda ngendalo kaJehova?

⁵ IBhayibheli lisitjela elinye ibanga eliqakathekileko lokobana kubayini kufuze sihlolisise indalo. Lisifundisa ngobuntu bakaJehova. (Funda kwebeRoma 1:20.) Ngokwesibonelo, akhuqale izinto uJehova azidalileko ukuthi zenziwe kuhle kangangani. Kghani azitjengisi ukuhlakanipha kwakaZimu? Cabanga nangokudla okuhlukahlukeneko esikuthabelako. Lokhu kutjengisa ngokukhanyako ukuthi ubathanda kangangani abantu. Nasiqala ubuntu bakaJehova ezintweni azidalileko, sizomazi kuhle begodu lokhu kuzosenza sitjhidele kuye. Nje akhesiqale ezinye iindlela uJehova azisebenzisileko endalweni bona afundise abantu iimfundo eziqakathekileko.

6. Ngisiphi isifundo esingasifunda ngokuqalisisa ukufuduka kweenyoni?

⁶ UJehova uhlele isikhathi izinto ezizokwenzeka ngaso. Qobe mnyaka hlangana nokuphela kwenyanga kaFebherbari nahlangana  nenyanga kaMeyi, ama-Israyeli bewabona abodoyi baphapha phezulu baya ngetlhagwini. UZimu watjela ama-Israyeli wathi: “Ngitjho nodoyi ophapha emkayini uyasazi isikhathi sakhe.” (Jor. 8:7) Njengombana uJehova abeke isikhathi lapho iinyonezi zizokusuka kwenye inarha ziye kwenye, ngendlela efanako ubeke isikhathi azokukhipha ngaso izahlulelo zakhe. Nathi namhlanjesi njengombana siqale ukufuduka kweenyoni ziya kwenye inarha, siyakhunjuzwa bona singamthemba uJehova ukuthi ‘unesikhathi esibekiweko’ sokuqeda iphasi elimbeli.—Rhab. 2:3.

7. Khuyini esingayifunda endleleni ikhozi eliphapha ngayo? (Isaya 40:31)

⁷ UJehova upha iinceku zakhe amandla. Ngo-Isaya uJehova wathembisa ukuthi uzobanikela amandla abantu bakhe begodu “bazokuphapha ngeempiko njengamakhozi” nabazizwa babogaboga namkha badanile. (Funda u-Isaya 40:31.) Ama-Israyeli bewajayele ukubona amakhozi aphaphela phezulu ngaphandle kokubetha khulu iimpiko zawo lokhu bekakwenza asizwa mumoya. Nathi kuyasikhumbuza ukuthi uJehova angakghona ukunikela iinceku zakhe amandla njengombana anikela iinyonezo. Nawubona inyoni enamandla iphaphela phezulu emkayini ingasebenzisi khulu iimpiko zayo, khumbula ukuthi nawe uJehova angakunikela amandla ukghone ukuhlula imirarwakho.

8. Khuyini uJobho ayifundako ngokuhlolisisa imisebenzi kaZimu begodu singafundani?

⁸ UJehova uyakufanelekela ukuthi simthembe. UJehova wasiza uJobho bona akhulise indlela amthanda ngayo. (Job. 32:2; 40:6-8) Nakakhuluma noJobho uZimu wakhuluma ngezinto ezinengi azidalileko, ezifaka hlangana iinkwekwezi, amafu nombani. UJehova wakhuluma nangeenlwana ezinjengekunzi yommango nenjomani. (Job. 38:32-35; 39:9, 19, 20) Zoke izintwezi zibufakazi, ingasi bamandla amangalisako kaZimu kwaphela kodwana zibufakazi bethando lakhe nokuhlakanipha kwakhe okukhulu. Ngebanga lekulumiswano le, uJobho wakghona ukuthemba uJehova ukudlula phambilini. (Job. 42:1-6) Ngokufanako, nathi nasifunda indalo sikhunjuzwa bona uJehova unokuhlakanipha okungapheliko begodu unamandla kunathi. Angaziqeda zoke iinlingo zethu begodu uzoziqeda. Iqinisweli lingasisiza siqinise indlela esimthemba ngayo.

9-10. Ilanga nezulu lisitjelani ngoJehova?

⁹ UJesu bekazi okunengi ngendalo. ‘Njengesisebenzi esinekghono,’ wabanelungelo lokusebenza noYise nakadala izulu nephasi. (IzA. 8:30) Ekukhambeni kwesikhathi, lokha nakasephasini uJesu wasebenzisa indalo bona afundise abafundi bakhe ngoYise. Akhesicoce ngezinto ezimbalwa abafundisa zona.

¹⁰ UJehova uthanda woke umuntu. ETjumayelweni yeNtabeni, uJesu wakhuluma nabafundi bakhe ngelanga nangezulu okuzizinto abantu abanengi abangacabangi khulu ngazo. Zombili izintwezi ziqakathekile bona sikghone ukuphila. UJehova bekangakhetha ukungabanikeli zona abantu abangamlotjhiko. Kunalokho, ngebanga lethando unikela boke abantu ilanga nezulu. (Mat. 5:43-45) UJesu wasebenzisa isifundwesi bona afundise abafundi bakhe ukuthi uJehova ufuna sithande boke abantu. Nanyana kunini nasibona ubuhle bokutjhinga kwelanga namkha sibona izulu elina kamnandi, kufuze sicabange ngethando lakaJehova elingakhethiko. Isibonelo sakhe singasenza bona sitjengise ithando elifanako ngokuthi sitjhumayele kibo boke abantu.

11. Ukuqala iinyoni kungasikhuthaza njani?

 ¹¹ UJehova usinikela izinto esizitlhogako bona siphile. Etjumayelweni efanako uJesu wathi: “Qalisisani iinyoni eziphapha phezulu; azitjali, azivuni namkha zibeke ngeenlulwini kodwana uYihlo wezulwini uyazondla.” Kungenzeka iinlaleli zakaJesu bezizibona iinyoni ebeziphapha phezulu, lokha nakazazibuza ukuthi: “Nina anikaqakatheki khulu na ukudlula zona?” (Mat. 6:26) Le yindlela yethando esiqinisekisa ngokuthi uJehova uzositlhogomela. (Mat. 6:31, 32) Isifundo esisifunda endalwenesi, siyazikhuthaza iinceku ezithembekileko. Udadwethu osesemutjha oliphayona e-Spain, wazizwa adanile ngebanga lokungafumani indawo esebujamweni obuhle angahlala kiyo. Kodwana ngemva kokubona iinyoni zidla imbewu, wakhuthazeka khulu. Uthi, “Iinyonezi zangikhumbuza ukuthi uJehova uyazitlhogomela nokuthi nami uzongitlhogomela.” Msinyana ngemva kwalokho, udadwethu lo wafumana indawo yokuhlala.

12. NgokwakaMatewu 10:29-31, khuyini abotunwana abasifundisa yona ngoJehova?

¹² UJehova uqala umuntu ngamunye njengoqakathekileko. UJesu ngaphambi kokuthi athume abapostoli bakhe bayokutjhumayela, wabasiza bona bangabasabi abantu ababaphikisako. (Funda uMatewu 10:29-31.) Wenza lokho ngokukhuluma ngeenyoni ebezijayeleke khulu kwa-Israyeli, utunwana. Iinyonezo ngesikhathi sakaJesu bezithengiswa ngemali encani khulu. Watjela abafundi bakhe wathi: ‘Ayikho nayinye yazo ezokuwela phasi uYihlo angazi.’ Ngemva kwalokho wangezelela wathi: “Nina niqakatheke khulu ukudlula abotunwana abanengi.” UJesu waqinisekisa abafundi bakhe ngokuthi uJehova uqala ngamunye wabo njengoqakathekileko, nje-ke abanalo ibanga lokusaba ukuhlunguphazwa. Lokha nabatjhumayela emadorobheni neendaweni zemakhaya, abafundi bakhumbula amezwi kaJesu nababona abotunwana. Nanyana kunini nawubona inyoni encani, khumbula ukuthi uJehova uqala umuntu ngamunye njengoligugu, nawe ‘uqakatheke khulu ukudlula abotunwana abanengi.’ Ngokusekelwa nguye ungakghona ukuhlula ukuphikiswa.—Rhu. 118:6.

13. Khuyini ezosisiza sifumane iimfundo endalweni?

¹³ Zinengi iimfundo esingazifunda ngoJehova endalweni. Njani? Kokuthoma, kufuze siziphe isikhathi sokuqalisisa indalo. Okulandelako, kufuze sicabange ngalokho esifundisa khona ngoJehova. Angeze kwaba lula ngaso soke isikhathi ukuthatha amagadango la. U-Géraldine udadwethu we-Cameroon, uthi, “Ngakhulela edorobheni, nje-ke kwafuze ngisebenze budisi bona ngiqalisise indalo.” Umdala ekuthiwa ngu-Alfonso uhlathulula uthi, “Ngafunda ukuthi kufuze ngibeke isikhathi sokuba ngedwa ngiqale indalo kaJehova,  ngicabangisise ngalokho engifundisa khona ngaye.”

14. Khuyini uDavida ayifundako lokha nakacabangisisa ngendalo kaZimu?

¹⁴ UDavida wacabangisisa ngendalo kaZimu. Wathi kuJehova: “Nangiqala umkayi, imisebenzi yeminwakho, inyanga neenkwekwezi ozenzileko, uyini-ke umuntu ofako bona umcabange?” (Rhu. 8:3, 4) Lokha uDavida nakaqala emkayini ebusuku, wenza okungaphezu kokubukela iinkwekwezi. Wacabangisisa nangalokho iinkwekwezi ezimfundisa khona ngoZimu. Wafunda ngendlela uJehova amkhulu ngayo. Ngezinye iinkhathi uDavida wacabangisisa ngendlela umzimbakhe owakheka ngayo ngesibelethweni sakanina. Nakacabangisisa ngendlela umzimbakhe owakheka ngayo, wathokoza khulu ngendlela uJehova ahlakaniphe ngayo.—Rhu. 139:14-17.

15. Nikela iimbonelo zendlela obone ngayo ubuntu bakaJehova endalweni. (IRhubo 148:7-10)

¹⁵ Kubulula ngathi njengombana bekulula ngoDavida, ukufumana okuthileko endalweni esingacabanga ngakho. Zinengi izinto ezingasisiza simazi ngcono uJehova. Ngokwesibonelo, ungatjhejisisa amandla kaJehova emtjhisweni welanga owuzwa esikhumbeni sakho. (Jor. 31:35) Cabanga ngokuhlakanipha kwakaZimu nawubona inyoni yakha isidleke. Cabanga ngendlela uJehova athabe ngayo nawubona injana igijimisa umsilayo. Thokoza uJehova ngethando lakhe nanyana kunini nawubona umma adlala nomntwanakhe. Sinamathuba amanengi wokufunda ngoJehova endalwenakhe, kungaba zizinto ezikulu, ezincani, izinto ezikude namkha eziseduze zoke ziyamdumisa.—Funda iRhubo 148:7-10.

16. Kufuze sizimisele ukwenzani?

¹⁶ UZimethu uhlakaniphile, unethando, unamandla begodu koke akwenzako kuhle. Ubuntobu nobunye obunengi sizobubona endalweni, nange singazipha isikhathi sokubufuna. Kwanga soke singazipha isikhathi sokuthabela indalo begodu sicabangisise ngalokho esifundisa khona ngoJehova. Nasenza njalo, sizokutjhidelana khulu noMdalethu. (Jak. 4:8) Esihlokweni esilandelako, sizokubona ukuthi ababelethi bangayisebenzisa njani indalo bona basize abantwana babo batjhidele kuJehova.