1. Ke’ng seo se ilego sa thuša Jobo gore a tsebe Jehofa gakaone?

 JOBO o ile a boledišana le batho ba bantši kudu bophelong bja gagwe. Eupša poledišano yeo a bilego le yona e kgahlišago ke ya ge a be a boledišana le Jehofa Modimo. E le gore Jehofa a kgone go thuša Jobo go bona gore ke yo bohlale e bile o hlokomela bahlanka ba gagwe, o ile a mmontšha dilo tše dingwe tše di makatšago tša tlhago. Ka mohlala, Modimo o ile a gopotša Jobo gore o kgona go hlokomela diphoofolo, e lego seo se ilego sa gopotša Jobo gore le yena a ka kgona go mo hlokomela. (Jobo 38:39-41; 39:1, 5, 13-16) Jobo o ile a ithuta ka dika tše dintši tša Jehofa ka go lebelela tlholo.

2. Ke ka baka la’ng ka dinako tše dingwe re ka hwetša go le thata go ithuta ka tlholo ya Jehofa?

² Le rena re ka ithuta mo gontši ka Modimo wa rena ka go lebelela dilo tšeo a di bopilego. Eupša ka dinako tše dingwe go ka ba thata go dira bjalo. Ge e ba re dula toropong, re ka palelwa ke go bona dilo tše dintši tšeo Jehofa a di bopilego. Le ge re dula magaeng re ka bona eka ga re na nako ya go ithuta ka dilo tšeo Jehofa a di bopilego. Ka gona, a re kweng gore ke ka baka la’ng go le bohlokwa gore re iphe nako le gore re dire maiteko a go ithuta ka tlholo. Re tlo ithuta gore Jehofa le Jesu ba dirišitše tlholo bjang go re ruta, le gore re ka dira eng gore re ithute ka yona ka mo go oketšegilego.

3. Ke’ng seo se bontšhago gore Jehofa o be a nyaka gore Adama a thabele tlholo?

³ Jehofa o be a nyaka gore motho wa mathomo a thabele  tlholo. Ka morago ga gore Modimo a bope Adama, o ile a mmea paradeiseng e botse a mo nea mošomo wa gore a e hlokomele le gore a e oketše. (Gen. 2:8, 9, 15) Nagana gore Adama o be a thaba bjang ge a bona dimela di gola gomme matšoba a hloga. Adama o be a na le tokelo e kgolo kudu ya go hlokomela serapa sa Edene. Jehofa o ile a kgopela Adama gore a reele diphoofolo maina. (Gen. 2:19, 20) O be a ka di reela maina ka boyena, eupša o ile a nea Adama mošomo woo. Ga go pelaelo gore pele Adama a reela diphoofolo maina o be a di lebeledišiša gabotse, a bona gore di phela bjang le gore di dira dilo bjang. Adama o swanetše go ba a ile a thabela mošomo woo kudu. Mohlomongwe o ile a hwetša sebaka sa go bona gore Tatagwe ke yo bohlale le gore o bopile dilo tše di makatšago le tše dibotse.

4. (a) Ke ka baka la’ng re swanetše go ithuta ka tlholo? (b) Ke dilo dife tšeo Modimo a di bopilego tšeo wena o di ratago kudu?

⁴ Re swanetše go ithuta ka tlholo ka gobane Jehofa o nyaka re dira bjalo. O re, “Emišetšang mahlo a lena godimo le bone.” Ke moka a botšiša gore: “Ke mang yo a hlodilego dilo tše?” Ka moka ga rena re tseba karabo. (Jes. 40:26) Jehofa o bopile dilo tše dintši tšeo di lego magodimong, lefaseng le ka lewatleng tšeo di dirago gore re kgone go ithuta ka yena. (Ps. 104:24, 25) Nagana kamoo Modimo a re bopilego ka gona. O dirile gore re thabele go lebelela dilo tše dibotse tša tlhago. O re neile dikwi tše hlano, e lego go bona, go kwa, go kgoma, go latswa le go dupa, e le gore re kgone go thabela dilo tše dintši tšeo a di bopilego.

5. Go ya ka Baroma 1:20, re holega bjang ge re ithuta ka tlholo ya Jehofa?

⁵ Beibele e re nea lebaka le lengwe la gore re ithute ka mo go tseneletšego ka tlholo. E re ruta ka dika tša Jehofa. (Bala Baroma 1:20.) Ka mohlala, nagana ka dilo tšeo Jehofa a di bopilego ka tsela e kgahlišago. Dilo tše ka moka di bontšha gore Modimo o bohlale kudu. Nagana le ka dijo tša mehutahuta tšeo re ka di thabelago. Se se tloga se bontšha gore Modimo o a re rata. Ge re bona dika tša Jehofa dilong tšeo a di bopilego, se se dira gore re nyake go mo tseba gakaone le go ba le segwera sa kgauswi le yena. Ga bjale a re boneng ditsela tše dingwe tšeo ka tšona Jehofa a dirišago tlholo go ruta batho dithuto tšeo tše bohlokwa.

6. Re ka ithuta’ng ge re bona dinonyana di huduga?

⁶ Jehofa o na le nako ya go dira dilo. Ngwageng o mongwe le o mongwe go tloga mafelelong a kgwedi ya February go fihla gare ga  kgwedi ya May, Baisiraele ba be ba bona dinonyana tšeo di bitšwago mogolodi di hudugela lefelong le lengwe. Modimo o ile a botša Baisiraele gore: “Mogolodi magodimong o tseba gabotse dinako tša wona tše di beilwego.” (Jer. 8:7) Go swana le ge Jehofa a beetše dinonyana tše nako, o beile le nako ya go tlo ahlola. Lehono ge re bona dinonyana di huduga se se re gopotša gore Jehofa o ‘beile nako’ ya go tlo fediša lefase le le lebe.—Habak. 2:3.

7. Tsela yeo nonyana e fofago ka yona e re ruta’ng? (Jesaya 40:31)

⁷ Jehofa o nea bahlanka ba gagwe matla. Jehofa o ile a tshepiša batho ba gagwe a diriša Jesaya gore ge ba felelwa ke matla goba ba nyamile, ba tla “hlatlogela godimo ka diphego go etša dintšhu.” (Bala Jesaya 40:31.) Baisiraele ba be ba tlwaetše go bona dintšhu di fofa ntle le gore maphego a tšona a phuphusele gantši. Se se re gopotša gore ge e ba Jehofa a kgona go nea dinonyana tšeo matla, le rena a ka kgona go re nea wona! Ge e ba o bona nonyana e fofela godimodimo ntle le gore e phuphusele gantši, gopola gore le wena Jehofa a ka kgona go go nea matla a go kgotlelela mathata a gago.

8. Ke’ng seo Jobo a ithutilego sona ka dilo tšeo Modimo a di bopilego, gona rena re ka ithuta’ng?

⁸ Re swanetše go tshepa Jehofa. Jehofa o ile a thuša Jobo gore a mo tshepe. (Jobo 32:2; 40:6-8) Ge Modimo a be a boledišana le Jobo o ile a mmotša ka dilo tše dintši tšeo a di bopilego, tše bjalo ka dinaledi, maru le magadima. Jehofa o ile a bolela le ka diphoofolo tša go swana le poo ya naga le pere. (Jobo 38:32-35; 39:9, 19, 20) Dilo tše ka moka e be e no ba bohlatse bja gore Modimo ga a no ba le matla feela, eupša o na le lerato le bohlale. Poledišano ye e ile ya thuša Jobo gore a tshepe Jehofa le go feta. (Jobo 42:1-6) Le rena ge re ithuta ka tlholo re kgona go bona gore Jehofa ke yo bohlale kudu e bile o na le matla go re feta. Le gona o tlo fediša mathata ao re nago le wona. Se se dira gore re mo tshepe le go feta.

9-10. Letšatši le pula di re ruta’ng ka Jehofa?

⁹ Jesu o be a tseba tlholo gabotse. Ka ge e le “mošomi yo a nago le bokgoni,” o ile a šoma gotee le Tatagwe ge a be a bopa legohle. (Die. 8:30) Ka morago ge Jesu a be a le mo lefaseng o ile a diriša tlholo go ruta barutiwa ba gagwe ka Tatagwe. Ekwa tše dingwe tša dilo tšeo a ilego a ba ruta tšona.

¹⁰ Jehofa o rata batho ka moka. Thutong ya gagwe ya thabeng, Jesu o ile a ruta barutiwa ba gagwe ka dilo tše pedi tšeo Jehofa a di bopilego tšeo batho ba di tšeelago fase, e lego letšatši le pula. Dilo tše ka moka di bohlokwa ka gore di re thuša gore re phele. Jehofa o be a ka kgetha gore a se ke a nea batho bao ba sa mo hlankelego dilo tše. Eupša ka ge a na le lerato o nea batho ka moka letšatši le pula. (Mat. 5:43-45) Jesu o ile a diriša thuto ye go ruta barutiwa ba gagwe gore Jehofa o nyaka gore re rate batho ka moka. Thapama ge re ipshina ka go bona mahlasedi a letšatši goba re bona pula e e na, re gopola gore Jehofa o rata batho ka moka. Mohlala wa gagwe o ka re thuša gore re bontšhe batho ka moka gore re a ba rata ka go ba botša ditaba tše dibotse.

11. Go lebelela dinonyana tšeo di fofago magodimong go ka re kgothatša bjang?

¹¹ Jehofa o re nea dilo tšeo re di hlokago gore re phele. Thutong ya thabeng, Jesu o ile a bolela le gore: “Šetšang ka kelohloko dinonyana tša legodimo; ga di bjale peu goba go  buna goba go kgobela dintlong tša polokelo. Lega go le bjalo, Tatago lena wa legodimong o a di fepa.” Go ka direga gore ka morago ga gore Jesu a botšiše batheetši ba gagwe gore: “Na ga le bohlokwa go di feta?” ba ile ba bona dinonyana di fofa. (Mat. 6:26) Ye e be e le tsela e lerato ya go re kgonthišetša gore Jehofa o tlo re nea dilo tšeo re di hlokago gore re phele! (Mat. 6:31, 32) Seo re ithutago sona ka tlholo se tšwela pele se kgothatša bahlanka ba Jehofa bao ba botegago. Kgaetšedi wa mofsa wa mmulamadibogo kua Spain o be a ikwa a nyamile ka ge a be a palelwa ke go hwetša lefelo le lekaone leo a ka dulago go lona. Eupša o ile a kgothatšwa ke go bona dinonyana di eja peu le dienywa. O re: “Dinonyana tšeo di ile tša nkgopotša gore Jehofa o a di hlokomela gomme le nna o tlo ntlhokomela.” Ka moragonyana ga moo kgaetšedi yoo o ile a hwetša madulo ao a bego a a nyaka.

12. Go ya ka Mateo 10:29-31, dithaga di re ruta’ng ka Jehofa?

¹² Jehofa o na le taba le yo mongwe le yo mongwe wa rena. Pele Jesu a roma baapostola ba gagwe, o ile a ba thuša gore ba se ke ba boifa batho bao ba ka ba ganetšago. (Bala Mateo 10:29-31.) O ile a ba thuša ka go bolela ka e nngwe ya dinonyana tšeo di bego di tlwaelegile kudu kua Isiraele, e lego thaga. Dinonyana tšeo di be di tšeelwa fase mehleng ya Jesu. Eupša o ile a botša barutiwa ba gagwe gore: “Ga go le e tee ya tšona yeo e tlago go wela fase Tatago lena a sa tsebe.” O ile a oketša ka gore: “Le ba bohlokwa go feta dithaga tše dintši.” Jesu o ile a kgonthišetša barutiwa ba gagwe gore Jehofa o na le taba le yo mongwe le yo mongwe wa bona, ka gona ga ba na lebaka la go boifa go tlaišwa. Go ka direga gore barutiwa ba Jesu ba ile ba gopola mantšu a gagwe ge ba bona dithaga ge ba dutše ba bolela ditaba tše dibotse ditoropong le magaeng. Nako e nngwe le e nngwe ge o bona nonyana e nyenyane, gopola gore Jehofa o na le taba le wena ka gobane le wena o “bohlokwa go feta dithaga tše dintši.” Ge Jehofa a go thekga o ka se boife go ganetšwa.—Ps. 118:6.

13. Tlholo e ka re thuša bjang gore re ithute ka mo go oketšegilego ka Modimo?

¹³ Re ka dira’ng gore tlholo e re rute dilo tše dintši ka Jehofa? Sa pele re swanetše go ipha nako ya go lebeledišiša tlholo, ke moka re naganišiše gore e re ruta eng ka Jehofa. Ka dinako tše dingwe go ka no se be bonolo go latela megato ye. Kgaetšedi Géraldine yo a tšwago Cameroon o re, “Ke goletše toropong. Ka gona ke ile ka lemoga gore go nyakega gore ke dire maiteko a magolo gore ke ithute ka tlhago.” Mogolo yo a bitšwago Alfonso o re, “Ke ithutile gore ke swanetše go beela nako ka thoko gore ke be noši, e le gore  ke kgone go ithuta ka tlholo ya Jehofa le go naganišiša gore e nthuta eng ka yena.”

14. Dafida o ile a ithuta’ng ge a be a naganišiša ka dilo tšeo Modimo a di bopilego?

¹⁴ Dafida o ile a naganišiša kudu ka dilo tšeo Modimo a di bopilego. O boditše Jehofa gore: “Ge ke bona magodimo a gago, mediro ya menwana ya gago, kgwedi le dinaledi tšeo o di dirilego, gona motho wa nama le madi ke eng moo o bilego o dula o nagana ka yena?” (Ps. 8:3, 4) Ge Dafida a be a lebeletše legodimong bošego, o be a sa no thabela go bona dinaledi ka moka, eupša o be a naganišiša le ka seo di mo rutago sona ka Modimo. O ithutile gore Jehofa ke yo mogolo. Ka dinako tše dingwe, Dafida o ile a naganišiša kamoo a ilego a bopega ka gona ka popelong ya mmagwe. Ge a be a naganišiša kamoo a bopilwego ka tsela e makatšago, o ile a leboga gore Modimo ke yo bohlale kudu.—Ps. 139:14-17.

15. Nea mehlala ya kamoo o ilego wa bona dika tša Jehofa go dilo tšeo a di bopilego. (Psalme 148:7-10)

¹⁵ Go swana le Dafida, le rena re ka lebelela kgauswi le rena go bona dilo tšeo re ka naganišišago ka tšona. Go na le dilo tše dintši tšeo di re dikologilego tšeo di ka re thušago go tseba Jehofa gakaone. Ka mohlala, re ka nagana ka matla a Jehofa ge re ekwa letšatši le re ruthetša. (Jer. 31:35) Nagana ka bohlale bja Jehofa ge o bona nonyana e aga sehlaga. Ge o bona mpšanyana e kitimiša mosela wa yona, nagana kamoo Jehofa a nyakago gore re fele re sega. Ge o bona mma a bapala le ngwana wa gagwe, leboga gore Jehofa o a re rata. Re na le dibaka tše dintši tša go ithuta ka Jehofa, ka gobane dilo tšeo a di bopilego, tše dikgolo le tše dinyenyane, tšeo di lego kgole le tšeo di lego kgauswi di a mo tumiša.—Bala Psalme 148:7-10.

16. Re swanetše go ikemišetša go dira’ng?

¹⁶ Modimo wa rena ke yo bohlale kudu, o na le lerato, o na le matla e bile dilo ka moka tšeo a di bopilego ke tše dibotse. Re ka kgona go bona dika tše le tše dingwe tše dintši ge re ithuta ka tlholo. Eka ka moka ga rena re ka dula re ipha nako ya go ithuta ka tlholo le go nagana ka seo e re rutago sona ka Jehofa. Ge re dira bjalo, re tlo kgona go batamela kgauswi kudu le mmopi wa rena. (Jak. 4:8) Sehlogong se se latelago re tlo bona gore batswadi ba ka diriša bjang tlholo go thuša bana ba bona gore ba rate Jehofa kudu.