1. Yobu akabaasa ata kumanya gye Yehova?

 YOBU akagaaniira n’abantu baingi, kwonka okugaaniira okwabaire okw’omutaano n’oku yaagizire na Yehova Ruhanga. Yehova kubaasa kuhamiza Yobu ngu aine obwengye kandi ngu naabaasa kureeberera abaheereza be, akagamba aha bintu bimwe ebirikutangaaza ebi yaahangire. Nk’eky’okureeberaho, Ruhanga akaijutsya Yobu naareeberera enyamaishwa n’ahabw’ekyo nawe naabaasa kumureeberera. (Yob. 38:39-41; 39:1, 5, 13-16) Yobu ku yaayetegyereize ebi Ruhanga yaahangire akabaasa kumanya gye emitwarize ye.

2. Ahabw’enki nikibaasa kutugumira kwetegyereza ebi Yehova yaahangire?

² Naitwe nitubaasa kwongyera kwega ebirikukwata ahari Ruhanga waitu twayetegyereza ebi yaahangire. Kwonka obumwe, ekyo tikirikutworobera. Twaba nitutuura omu tauni, butoosha nitubaasa kutareeba ebi Yehova yaahangire. Kandi n’obu twakuba twetoroirwe ebyahangirwe, nitubaasa kuburwa obwire bw’okubyetegyereza. Hati ka tureebe ahabw’enki twine kuteeraho kugira obwire bw’okwetegyereza ebyahangirwe. Nituza kureeba oku Yehova na Yesu baakoreise ebyahangirwe omu kwegyesa n’eki turikubaasa kukora kwongyera kubyegyeraho.

3. Niki ekirikworeka ngu Yehova akaba naayenda ngu Adamu ayesiimire omu bihangirwe?

³ Yehova akaba naayenda ngu omuntu ow’okubanza ayesiimire omu bi yaahangire. Ruhanga ku yaahangire Adamu, akamuta omu paradiso kutuuramu, kandi yaamuha  obujunaanizibwa bw’okugireeberera n’okugihangustya. (Kut. 2:8, 9, 15) Teebereza okushemererwa oku Adamu yaagizire arikureeba embibo zirikumera n’ebimuri birikurabya. Adamu ka yaahairwe omugisha gw’omuhendo ogw’okureeberera omusiri Edeni! Yehova akagambira Adamu kuha amaziina enyamaishwa zoona. (Kut. 2:19, 20) Yehova akaba naabaasa kuha enyamaishwa amaziina, kwonka obujunaanizibwa obwo akabukwatsa Adamu. Hatariho kubangaanisa, Adamu atakacwiremu amaziina g’okuzeeta akaba abanza kuzireeba, kuzeetegyereza akamanya oku zirikutwaza n’emicwe yaazo. Adamu aine kuba yaakunzire omurimo ogwo. Buzima ekyo kikamubaasisa kumanya obwengye bwa Ishe n’oku ebi Yehova yaahangire biri birungi kandi ebirikushemeza.

4. (a) Ni nshonga ki emwe eine kutureetera kwetegyereza ebyahangirwe? (b) Ni byahangirwe ki ebirikukushemeza?

⁴ Enshonga emwe ahabw’enki twine kwetegyereza ebihangirwe n’ahabw’okugira ngu Yehova naayenda tukikore. Naagira ati: “Mwimutsye amaisho gaanyu ahaiguru, mureebe.” Reero abuuza ati: “N’oha owaahangire biriya?” Eky’okugarukamu kyorobi. (Isa. 40:26) Yehova akahanga ebintu bingi ebirikutangaaza eby’omu iguru, omu nsi, n’omu nyanja ebi turikubaasa kwegyeraho. (Zab. 104:24, 25) Kandi teekateeka aha muringo ogu Ruhanga yaatuhangiremu. Akatuhanga turikubaasa kukunda kureeba ebintu birungi. Kandi yaatuhanga turikubaasa kureeba, kuhuurira, kukwata, kuroza n’okukaga.

5. Kurugiirira aha Abarooma 1:20, nitugasirwa tuta twayegyera aha bi Yehova yaahangire?

⁵ Baibuli neeyoreka enshonga endiijo nkuru ahabw’enki twine kwetegyereza ebyahangirwe. Nitubyegyeraho emitwarize ya Yehova. (Shoma Abarooma 1:20.) Nk’eky’okureeberaho, teekateeka aha ku ebyahangirwe bikozirwe omu muringo ogurikutangaaza. Mbwenu shi tibirikworeka ngu Ruhanga aine obwengye? Kandi teekateeka aha by’okurya by’emiringo mingi ebi twine. Ekyo nikituhamiza ngu naakunda abantu. Twareeba emitwarize ya Yehova erikureebekyera omu bi yaahangire, nikituhwera kumumanya gye n’okwongyera kumwirira haihi. Hati ka tushwijume emiringo etari emwe oku Yehova arikukoresa ebyahangirwe kwegyesa abantu amashomo makuru.

6. Nitwegyera ki aha binyonyi ebirikufuruka?

⁶ Yehova ataireho obwire bwa buri kimwe. Buri mwaka Okwakabiri kurikuhendera kuhika  aha gati y’Okwakataano, Abaisraeli bakaba bareeba enkongoro zirikufurukira bukiizi-bwa bumosho bwa Israeli. ‘Enkongoro ez’omu mwanya nizimanya obunaku bwazo,’ nikwo Ruhanga yaagambiire Abaisraeli. (Yer. 8:7) Nk’oku Yehova yaateeraireho ebinyonyi ebyo entebeekanisa, ataireho obwire obu araacwereho orubanja. Obunaku obu twareeba ebinyonyi nibifuruka, nitwijuka ngu Yehova akataho “obunaku” bw’okucwekyererezaho ensi egi embi.​—Hab. 2:3.

7. Okureeba ekinyonyi kirikutumbiika nikituhamiza ki? (Isaaya 40:31)

⁷ Yehova naaha amaani abaheereza be. Kurabira omuri Isaaya, Yehova akaraganisa ngu naija kuha abantu be amaani “batumbiikye ahaiguru n’amapapa nk’amashamba” baaba bataine maani nari beinamiriire. (Shoma Isaaya 40:31.) Abaisraeli bakaba nibakira kureeba empungu nizitumbiika ahaiguru zitarikukoresa amaani maingi. Ekyo kikaba kibaijutsya ngu nk’oku Yehova arikuha amaani ebinyonyi ebyo, naabaasa kuha abaheereza be amaani. Waareeba ekinyonyi kihango kitumbiikire aha iguru omu mwanya kitarikuhuuba amapapa gakyo, ijuka ngu Yehova naabaasa kukuha amaani kusingura oburemeezi bwawe.

8. Yobu akeega ki ku yaayetegyereize ebi Ruhanga yaahangire, kandi itwe nitubaasa kwega ki?

⁸ Yehova niwe twine kwesiga. Yehova akahwera Yobu kwongyera kumwesiga. (Yob. 32:2; 40:6-8) Obu Ruhanga yaabaire naagaaniira na Yobu, akagamba aha byahangirwe nk’enyonyoozi, ebicu, n’emirabyo. Kandi Yehova akagamba n’aha nyamaishwa, nk’embogo n’embaraasi. (Yob. 38:32-35; 39:9, 19, 20) Ebi byona nibyoreka rukundo ya Yehova, amaani ge, n’obwengye bwe. Bwanyima y’okugaaniira okwo, Yobu akoongyera kwesiga Yehova. (Yob. 42:1-6) Naitwe, twayetegyereza ebyahangirwe nibitwijutsya ngu Yehova aine obwengye bwingi, n’amaani maingi agarikukira agaitu. Naabaasa kandi naija kumariraho kimwe oburemeezi bwaitu bwona. Okumanya ekyo, nikituhwera kumwesigira kimwe.

9-10. Omushana n’enjura nibitwegyesa ki ahari Yehova?

⁹ Yesu akaba naamanya gye ebyahangirwe. Yesu ‘nk’omukozi mukuru,’ akatunga omugisha gw’okukora na Ishe obu baabaire nibahanga eiguru n’ensi. (Enf. 8:30) Kandi obu Yesu yaabaire ari omu nsi, akakoresa ebyahangirwe kwegyesa abeegi be ebirikukwata ahari Ishe. Teekateeka aha mashomo gamwe agu yaayegyeise.

¹⁰ Yehova naayoreka ngu naakunda buri omwe. Omu Rubazo rwa Yesu orw’aha Rushozi, akahwera abeegi be kuta omutima aha byahangirwe ebi abantu baingi batarikukira kuteekateekaho nk’omushana n’enjura. Ebyahangirwe ebyo byombi nibyetengyesa kubaisaho amagara. Yehova akaba naabaasa kwanga kubiha abatarikumuheereza. Kwonka, ahabwa rukundo naaha abantu boona omushana n’enjura. (Mat. 5:43-45) Yesu akakoresa ebyahangirwe ebyo kwegyesa abeegi be ngu Yehova naayenda tworekye ngu nitukunda abantu boona. Twareeba eizooba nirirenga nari enjura neegwa, nitubaasa kuteekateeka ahari rukundo ya Ruhanga otarikushoroora. Eky’okureeberaho kye, nikibaasa kutuhiga kworeka rukundo nk’eye turikubuurira abantu boona.

11. Nitubaasa kugasirwa tuta twayetegyereza ebinyonyi by’omu mwanya?

¹¹ Yehova naatuha eby’omubiri ebirikwetengyesa. Omu rubazo orwo, Yesu akagira ati: ‘Mwetegyereze ebinyonyi by’omu mwanya;  tibirikubiba, tibirikugyesha, n’obu kwakuba okuhunika omu bitara, kwonka Shoimwe ow’omu iguru naabiriisa. Mbwenu imwe timurikubikira.’ Obundi, abaabaire baahurikiize Yesu bakaba nibareeba ebinyonyi nibiguruka omu mwanya obu yaababuuza ati: “Mbwenu imwe timurikubikira?” (Mat. 6:26) Ogwo ka n’omuringo murungi gw’okutuhamiza ngu Yehova naija kutuha ebirikwetengyesa eby’omubiri! (Mat. 6:31, 32) Ebi turikwegyera aha byahangirwe nibigumizamu kugumya abaheereza ba Yehova abeesigwa. Munyaanyazi-itwe omuto ori payoniya omuri Spain akaba naayehurira kubi ahabw’okugira ngu akaba atarikubaasa kutunga omwanya murungi gw’okutuuramu. Kwonka ku yaareebire ebinyonyi nibirya enjuma n’enkyerere, akeehurira gye. Naagira ati: “Ebinyonyi ebyo bikanyijutsya ngu Yehova naabireeberera kandi naanye naija kundeeberera.” Kandi omu bwire bukye, munyaanyazi-itwe akatunga ah’okutuura.

12. Kurugiirira ahari Matayo 10:29-31, ebiteera nkumba nibitwegyesa ki ahari Yehova?

¹² Yehova naareeba buri omwe nk’ow’omuhendo. Yesu atakoohereize entumwa ze kubuurira, akabahwera kutatiina okuhakanisibwa. (Shoma Matayo 10:29-31.) Ekyo akakikora arikubagambira aha biteera-nkumba, ebinyonyi ebyabaire nibimanywa gye omuri Israeli. Omu bwire bwa Yesu ebinyonyi ebyo bikaba nibigura esente nkye. Kwonka akagambira abeegi be ati: ‘Tihariho na kimwe ekirikugwa ahansi Shoimwe atakimanyire.’ Kandi akongyeraho ati: “Nimukira ebiteera-nkumba bingi.” Yesu akahamiza abeegi be ngu Yehova naatwara buri omwe aharibo nk’ow’omuhendo, n’ahabw’ekyo tihaine ekyabaire kiine kubareetera kutiina okuhiiganisibwa. Abeegi ba Yesu bakaba baijuka ebigambo ebyo ku baabaire baareeba ebiteera nkumba barikubuurira omu tauni n’omu byaro. Waareeba akanyonyi, ijuka ngu ori ow’omuhendo ahari Yehova ahakuba ‘nookira ebiteera-nkumba bingi.’ Ahabw’obuhwezi bwa Yehova, torikwija kutiina okuhiiganisibwa.​—Zab. 118:6.

13. Niki ekiraatuhwere kwegyera aha byahangirwe?

¹³ Nitubaasa kwegyera aha bihangirwe amashomo agandi mingi agarikukwata ahari Yehova. Tuta shi? Eky’okubanza, twine kutunga obwire bw’okwetegyereza ebyahangirwe. Reero, tukateekateeka eki birikutwegyesa ahari Yehova. Butoosha nikibaasa kutooroba kukora ebintu ebyo. Géraldine, munyaanyazi-itwe kuruga Cameroon, naagira ati: “Nkakurira omu rurembo, n’ahabw’ekyo nimba nyine kuteeraho munonga kwetegyereza ebyahangirwe.” Omureeberezi orikwetwa Alfonso naashoboorora ati: “Nkeega ngu nyine kutaho obwire bw’okwehereera kureeba ebihangirwe bya Yehova kandi nkateekateeka eki birikunyegyesa ahariwe.”

14. Daudi akaba ayega ki ku yaabaire ateekateeka aha bi Ruhanga yaahangire?

 ¹⁴ Daudi akaba naateekateeka munonga aha bi Ruhanga yaahangire. Akagamba ahari Yehova ati: “Ku nteekateeka aha iguru ryawe eri waahangire n’engaro zaawe, okwezi n’enyonyoozi ebi waataireho, omuntu ni kintu ki iwe kumwijuka?” (Zab. 8:3, 4) Daudi ku yaabaire areeba omu kaabunga nyekiro, akaba akora ekirikukira aha kukunda kubireeba. Akaba ateekateeka eki enyonyoozi zirikumwegyesa ahari Ruhanga. Akeetegyereza ngu tihaine orikwingana na Yehova. Obumwe, Daudi akaba ateekateeka oku yaabaasize kukurira omunda ya nyina. Ku yaabaire ateekateeka aha ku ahangirwe omu muringo gurikutangaaza, akaba ayongyera kusiima Yehova ahabw’obwengye bwe.​—Zab. 139:14-17.

15. Ha eby’okureeberaho ebikuhweraire kureeba emitwarize ya Yehova omu bi yaahangire. (Zaaburi 148:7-10)

¹⁵ Nka Daudi, hariho ebyahangirwe bingi ebi turikubaasa kuteekateekaho. Waareeba ebikwetooroire, nibikuhwera kumanya emitwarize mingi ya Yehova. Nk’eky’okureeberaho, teekateeka aha amaani ga Yehova waahurira obutagatsi bw’eizooba. (Yer. 31:35) Teeraho kureeba obwengye bwa Ruhanga waareeba ekinyonyi kirikwombeka ekyashuri. Teekateeka aha kushemererwa kwa Yehova waareeba ekibwana nikizaanisa omukira gwakyo. Kandi siima Yehova ahabwa rukundo ye waareeba omukazi naazaana n’omwereere we. Twine emiringo mingi oku turikubaasa kwega ebirikukwata ahari Yehova ahabw’okuba byona ebi yaahangire ebihango n’ebikye, ebiri haihi n’ebiri hare nibimuhimbisa.​—Shoma Zaaburi 148:7-10.

16. Twine kumariirira kukora ki?

¹⁶ Ruhanga waitu aine obwengye bwingi, amaani, naafayo, kandi naakora bintu birikushemeza. Emitwarize egyo n’endiijo mingi nitubaasa kugimanya twayetegyereza ebyahangirwe ebitwetooroire. Twena ka tuteereho butoosha kwetegyereza ebyahangirwe kandi tuteekateekye eki birikutwegyesa ahari Yehova. Twakora tutyo, nitwija kwirira haihi Omuhangi waitu. (Yak. 4:8) Omu kicweka ekirikukurataho, nituza kureeba oku abazaire barikubaasa kukoresa ebyahangirwe kuhwera abaana baabo kwirira haihi Yehova.