1. Иов Йегови хуӕздӕр цӕй фӕрци базудта?

 ИОВӔН еу хабар ӕ зӕрди уӕлдай арф ниххизтӕй. Е адтӕй, Йеговӕ Хуцауи хӕццӕ ку дзурдта, уӕд. Еци дзубандий рӕстӕг Йеговӕ Иови ӕргом е сфӕлдистадӕмӕ раздахта. Фӕндадтӕй ӕй, цӕмӕй Иов мабал гурусхӕ кодтайдӕ, Йеговӕ устур зунд ӕма хъаури хецау ке ӕй ӕма ӕ лӕггадгӕнгутӕбӕл ӕнӕмӕнгӕй ке батухсдзӕй. Ӕ зӕрдӕбӕл ин ӕрлӕуун кодта, цӕрӕгойтӕбӕл куд тухсуй, уой. Уотемӕй ин бавдиста ӕхе дӕр ин ке нӕ ниууадздзӕй (Иов 38:39–41; 39:1, 5, 13–16). Иов уобӕл ку расагъӕс кодта, уӕд хуӕздӕр базудта, Йеговӕ цӕхуӕн Хуцау ӕй ӕма имӕ цӕхуӕн менеугутӕ ес, уой.

2. Хатгай нӕ ци фӕхъхъор кӕнуй, Йеговӕ ци сфӕлдиста, уобӕл сагъӕс кӕнун?

² Мах бон дӕр ӕй нӕ Хуцауи туххӕй фулдӕр базонун, ци сфӕлдиста, уомӕ ку кӕсӕн ӕма ибӕл ку сагъӕс кӕнӕн, уӕд. Фал е алкӕд ӕнцон нӕ фӕууй. Горӕти ка фӕццӕруй, етӕ ӕрдзӕ арӕх уингӕ дӕр нӕ фӕккӕнунцӕ. Ӕма гъӕуи цӕргӕй дӕр хатгай рӕстӕг нӕ фӕффагӕ кӕнуй, цӕмӕй Йеговӕ ци сфӕлдиста, уомӕ ӕрлӕмбунӕг уӕн. Гъӕйдӕ мадта радзубанди кӕнӕн, ӕхсидзгӕ цӕмӕн ӕй уомӕн рӕстӕг хецӕн кӕнун. Мах радзубанди кӕндзиан, Йеговӕ ӕма Киристе иннети ахур кӕнгӕй се ’ргом сфӕлдистадӕмӕ куд ӕздахтонцӕ, уобӕл. Удта ма базондзиан, цӕбӕл ӕй нӕ бон исахур ун.

3. Цӕмӕй бӕрӕг ӕй, Йегови уотӕ ке фӕндадтӕй, цӕмӕй Адам ӕ алливарс цитӕ уидта, уомӕ кӕсгӕй цийнӕ кодтайдӕ?

³ Йегови фӕндадтӕй, цӕмӕй фиццаг адӕймаг ӕ алливарс цитӕ уинуй, уомӕ кӕсгӕй цийнӕ кодтайдӕ. Адами ку  сфӕлдиста, уӕд ӕй ӕрцӕрун кодта хъӕбӕр рӕсугъд дзенети ӕма ин баихӕс кодта, цӕмӕй имӕ зела ӕма ин ӕ арӕнтӕ устурдӕр кӕна (Райд. 2:8, 9, 15). Муггӕгтӕ бенцъутӕ куд рауадзунцӕ ӕма аллихузи зайӕгойтӕ куд радидинӕг кӕнунцӕ, уой уингӕй, ӕвӕдзи, Адамӕн ӕ бауӕр ниббизирдтӕ уидӕ. Едеми дзӕхӕрадонӕмӕ зелун фиццаг адӕймагӕн ӕцӕгӕйдӕр устур кадӕ адтӕй. Уомӕй уӕлдай ма ин Йеговӕ баихӕс кодта, цӕмӕй цӕрӕгойтӕн дӕр нӕмттӕ равардтайдӕ (Райд. 2:19, 20). Еци гъуддаг Хуцауӕн ӕхе бон дӕр адтӕй бакӕнун. Фал ӕй Адами барӕ бакодта. Ести цӕрӕгоййӕн ном раттуни размӕ Адам лӕмбунӕг фӕккӕсидӕ, ӕхе куд даруй, уомӕ. Еци куст ӕ зӕрдӕмӕ хъӕбӕр цудайдӕ. Дзубанди дӕр ибӕл нӕййес, уой фӕрци ’й уидта, Йегови зунд куд ӕнӕкӕрон ӕй ӕма алцидӕр куд дессаг ӕма рӕсугъд сфӕлдиста, уой.

4. а) Йеговӕ ци сфӕлдиста, уобӕл сагъӕс кӕнун цӕмӕн гъӕуй? б) Йеговӕ ци сфӕлдиста, уонӕй дӕ зӕрдӕмӕ тӕккӕ хъӕбӕрдӕр ци цӕуй?

⁴ Мах ба цӕмӕн гъӕуй, Хуцау ци сфӕлдиста, уобӕл сагъӕс кӕнун? Уомӕн ӕма нӕ уомӕ ӕхуӕдӕг разӕнгард кӕнуй. Библий финст ӕй: «Уӕ цӕститӕбӕл хӕрдмӕ исхуӕцайтӕ ӕма бакӕсайтӕ». Уой фӕсте ба си уӕхӕн фарста ес: «Уони еугурейдӕр ка сфӕлдиста?» (Ис. 40:26). Дзуапп бӕрӕг ӕй. Хуцауи къохти хъиамӕт ирдӕй зиннуй уӕлӕрвтӕ, зӕнхӕ ӕма денгизмӕ кӕсгӕй. Уони фӕрци нӕ бон ӕй Йегови туххӕй берӕ цидӕртӕ базонун (Пс. 104:24, 25). Уомӕй уӕлдай ма расагъӕс кӕнӕ, адӕймаги куд сфӕлдиста, уобӕл дӕр. Хуцау нӕ уотӕ искодта, цӕмӕй ӕрдзӕ уарзӕн, удта цӕмӕй нӕ бон уа уинун, адӕ ӕма смаг лӕдӕрун, удта естӕбӕл бамбӕлгӕй дӕр цидӕртӕ лӕдӕрун. Еци фондз сӕйраг ӕнкъарӕней фӕрци нӕ бон ӕй цийнӕ кӕнун, нӕ алливарс дуйней цӕйбӕрцӕ цидӕртӕ ес, уобӕл.

5. Ромӕгтӕмӕ 1:20 финст дзурдтӕмӕ гӕсгӕ Йеговӕ ци сфӕлдиста, уобӕл сагъӕс кӕнун пайда цӕмӕн ӕй?

⁵ Йеговӕ ци сфӕлдиста, уобӕл сагъӕс кӕнун хуарз цӕмӕн ӕй, уой туххӕй ма Библий еу гъуди дӕр финст ӕй. Уотемӕй Йегови менеугути туххӕй нӕ бон уодзӕй фулдӕр базонун. (Бакӕсӕ Ромӕгтӕмӕ 1:20.) Зӕгъӕн, ӕрдзи ци ес, етӕ куд конд ӕнцӕ, уомӕ кӕсгӕй адӕймаг балӕдӕруй, ка сӕ искодта, е ӕцӕгӕйдӕр дессаги зунди Хецау ке ӕй. Уомӕй уӕлдай ма расагъӕс кӕнӕ, цӕйбӕрцӕ аллихузи хуӕруйнӕгтӕ ес ӕма нин цӕйбӕрцӕ цийнӕ хӕссунцӕ, уобӕл дӕр. Уомӕй дӕр бӕрӕг ӕй, Йеговӕ ӕ адӕни хъӕбӕр берӕ ке уарзуй. Йеговӕ ци сфӕлдиста, уомӕ кӕсгӕй ин ӕ менеугутӕ ку фӕууинӕн, уӕд цӕхуӕн Хуцау ӕй, уой хуӕздӕр базонӕн ӕма нӕ фӕффӕндуй, цӕмӕй имӕ никки хӕстӕгдӕр исуӕн. Уомӕй уӕлдай ма Йеговӕ ӕ лӕггадгӕнгути ӕргом е сфӕлдистадӕмӕ арӕх раздахидӕ, цӕмӕй сӕ ӕхсидзгӕ цӕбӕлдӕрти исахур кодтайдӕ. Гъӕйдӕ уобӕл фулдӕр радзорӕн.

6. Гъар бӕстӕмӕ ка фӕттӕхуй, еци мӕргътӕмӕ кӕсгӕй нӕ бон ци ӕй базонун?

⁶ Йеговӕ алцӕмӕндӕр ӕхе рӕстӕг иснисӕн кодта. Израилӕгтӕн дӕр уотӕ загъта: «Къадзӕ дӕр ма уӕларвбӕл ӕ нисангонд рӕстӕгутӕ зонуй» (Йер. 8:7). Алли анз дӕр, феврали кӕронӕй маййи уӕнгӕ израилӕгтӕ уидтонцӕ, еци мӕргътӕ цӕгатӕрдӕмӕ куд тахтӕнцӕ, уой. Йеговӕ еци мӕргътӕн рӕстӕг куд иснисан кодта, гъе уотӕ рӕстӕг иснисан кодта, ӕ тӕрхӕнттӕ кӕд ӕнхӕст кӕндзӕй, уомӕн дӕр. Абони дӕр мӕргътӕ гъар бӕстӕмӕ тӕхгӕ ку фӕууинӕн, уӕд нӕ зӕрдӕбӕл еу ӕхсидзгӕ гъуди ӕрлӕууй: Йеговӕ ци бон иснисан кодта, раст еци бон аци фуддуйнейӕн кӕрон искӕндзӕй (Ав. 2:3).

7. Цӕргӕс арви бӕрзӕндти куд тӕхуй, уомӕ кӕсгӕй цӕбӕл ахур кӕнӕн? (Исай 40:31).

⁷ Йеговӕ ӕ лӕггадгӕнгутӕн хъауритӕ дӕттуй. Пахампар Исаййи фӕрци Йеговӕ ӕ лӕггадгӕнгутӕн зӕрдӕ байвардта, ӕнӕхъаурӕ ӕма нифссаст ку уонцӕ, уӕд сӕ ке бафедар кӕндзӕй ӕма сӕбӕл цума «цӕргӕси базуртӕ» ес, уоййау бӕрзонд ке истӕхдзӕнцӕ. (Бакӕсӕ Исаййи 40:31.) Израилӕгтӕ арӕх уидтонцӕ, цӕргӕстӕ бӕрзонд уӕларви куд зелунцӕ, уой. Еци мӕргътӕ, зӕнхӕй уӕлӕмӕ ци гъар уӕлдӕф иссӕуй, уомӕ сӕ базуртӕ рауадзунцӕ ӕма сӕ еци уӕлдӕф хӕрдмӕ исесуй. Уой фӕрци тӕхгӕ-тӕхгӕй хъӕбӕр нӕ бафӕллайунцӕ. Кӕд Йеговӕ цӕргӕстӕн уойбӕрцӕ хъаурӕ раттуй, уӕд ӕ бон ӕй ӕ лӕггадгӕнгути дӕр бафедар кӕнун. Мадта иннӕ хатт ку фӕууинай, еци маргъ бӕрзӕндтӕмӕ куд ӕнцонтӕй истӕхуй уой, уӕд дӕ гъудий дарӕ, Йегови бон дин ке ӕй уойбӕрцӕ хъаурӕ раттун, цӕмӕй бӕрзонд истӕхай, дӕ зиндзийнӕдтӕ ба кӕмидӕр бунӕй байзайонцӕ.

8. Хуцау ци сфӕлдиста, уонӕбӕл сагъӕс кӕнгӕй Иов цӕбӕл исахур ӕй? Махӕн дӕр ӕхсидзгӕ цӕмӕн ӕй уонӕбӕл сагъӕс кӕнун?

⁸ Йеговӕбӕл нӕ бон ӕй ӕууӕндун. Иов Йегови хӕццӕ ку радзурдта, уӕд ибӕл ӕ зӕрдӕ хъӕбӕрдӕр дарун райдӕдта (Иов 32:2; 40:6–8). Хуцау ин е ’ргом раздахта стъалутӕмӕ, мегътӕмӕ, денгизмӕ, удта аллихузи цӕрӕгойтӕмӕ, зӕгъӕн, гъӕддаг галмӕ ӕма бӕхмӕ (Иов 38:32–35; 39:9, 19, 20). Уони фӕрци Иов Хуцауӕн айдагъ е ’нӕкӕрон хъаурӕ нӕ фӕууидта, фал ма ӕ зунд ӕма ӕ уарзондзийнадӕ дӕр, ӕма ибӕл ӕ зӕрдӕ никки хъӕбӕрдӕр дарун райдӕдта (Иов 42:1–6). Уотӕ мах дӕр Йегови ’сконд гъуддӕгтӕбӕл ку сагъӕс кӕнӕн, уӕд ӕй лӕдӕрдзиан, махӕй дзӕвгарӕ зундгиндӕр ӕма хъаурӕгиндӕр ке ӕй. Е ба уобӕл дзорӕг ӕй, ӕма ӕ бон ӕй, не ’гас тухститӕ ӕма зиндзийнӕдтӕн кӕрон искӕнун, ӕма кӕнгӕ дӕр уотӕ бакӕндзӕй. Уой нӕ гъудий ку дарӕн, уӕд ибӕл нӕ зӕрдӕ никки хъӕбӕрдӕр дардзиан.

9, 10. Хори рохс ӕма уарунӕй нӕ бон ци ӕй Йегови туххӕй базонун?

⁹ Ӕрдзӕ куд конд ӕй, уой Киристе хуарз зудта. Йеговӕ дун-дуйне ку фӕлдиста, уӕд е дӕр ӕ хӕццӕ адтӕй куд «дӕсни косӕг», уотӕ (Ӕмб. 8:30). Фӕстӕдӕр зӕнхӕбӕл ку адтӕй ӕма адӕнӕн ӕ Фиди туххӕй ку фӕдздзоридӕ, уӕд син, ӕрдзи ци уидтонцӕ, уонӕй цӕветтонтӕ ӕрхӕссидӕ. Гъӕйдӕ ӕркӕсӕн, цӕбӕл сӕ ахур кодта, уомӕ.

¹⁰ Йеговӕ уарзуй ӕгас адӕни дӕр. Киристе адӕни хонхбӕл ку ахур кодта, уӕд син се ’ргом раздахта, адӕн ахур кӕбӕл ӕнцӕ, еци гъуддӕгтӕмӕ – хори рохс ӕма уарунмӕ. Ӕнӕ уонӕй цардӕн гӕнӕн н’ адтайдӕ. Йегови бон адтӕй, ка ин нӕ лӕггадӕ кӕнуй, уонӕн еци хуарздзийнӕдтӕ ма бахай кӕнун. Фал е хори рохс ӕма уарунтӕ дӕттуй алкӕмӕндӕр. Уотемӕй Киристе ӕ ахуркӕнуйнӕгтӕн ӕхсидзгӕ гъуддаг балӕдӕрун кодта: Йегови фӕндуй, цӕмӕй алли адӕймаги дӕр уарзӕн. Хор  рӕсугъд ку ранигулуй кенӕ фӕлмӕн уарун ку фӕууаруй, уӕд нӕ бон фӕууй сагъӕс кӕнун, Йеговӕ ӕгас адӕни дӕр ке уарзуй, уобӕл (Матф. 5:43–45). Е нӕ баразӕнгард кӕндзӕй, цӕмӕй мах дӕр алли адӕймагмӕ дӕр уӕхӕн зӕрдӕ дарӕн ӕма алкӕмӕндӕр игъосун кӕнӕн.

11. Уӕларвон мӕргътӕмӕ кӕсгӕй нӕ нифс куд бафедар уодзӕй?

¹¹ Цӕрунмӕ нӕ ци гъӕуй, уой нин Йеговӕ дӕттуй. Киристе адӕни хонхбӕл ку ахур кодта, уӕд ма син уотӕ дӕр загъта: «Бакӕсайтӕ уӕларвон мӕргътӕмӕ – етӕ нӕдӕр итаугӕ кӕнунцӕ, нӕдӕр кӕрдгӕ ӕма нӕдӕр хуардӕнтти хуар ӕфснайунцӕ, фал сӕ уӕ уӕларвон Фидӕ ӕфсадуй». Еци рӕстӕг имӕ ка игъуста, етӕ ’й уидтонцӕ, мӕргътӕ куд ратӕх-батӕх кодтонцӕ. Уой фӕсте ба сӕ Киристе бафарста: «Ӕма уӕд сумах уонӕй хъазардӕр нӕ айтӕ?» (Матф. 6:26). Йеговӕ нин зӕрдӕ ӕвӕруй, цардӕн нӕ ӕнӕмӕнгӕй ци гъӕуй, уобӕл ке батухсдзӕй (Матф. 6:31, 32). Киристе ци цӕветтон ӕрхаста, е абони дӕр Хуцауи еузӕрдон лӕггадгӕнгутӕн сӕ нифс федар кӕнуй. Испаний еу ӕригон пионер хуӕрӕ хъӕбӕр тухстӕй, цӕрӕнбунат иссерун ӕ бон ке н’ адтӕй, уобӕл. Фал еу уӕхӕни, цъеути нӕмгутӕ едзгӕ ку фӕууидта, уӕд ӕ нифс бафедар ӕй. Е зӕгъуй: «Ӕз ӕй фӕууидтон, Йеговӕ еци минкъий цъеутӕбӕл куд тухсуй, уой. Ӕма мин е мӕ нифс бафедар кодта, Йеговӕ ӕнӕмӕнгӕй мӕнбӕл дӕр ке батухсдзӕй». Ӕма ӕцӕгӕйдӕр уотӕ рауадӕй. Берӕ нӕ рацудӕй, ӕма еци хуӕрӕ цӕрӕнбунат иссирдта.

12. Сирдонцъеутӕмӕ кӕсгӕй Йегови туххӕй нӕ бон ци ӕй базонун? (Матфеййи 10:29–31).

¹² Йеговӕ ӕ лӕггадгӕнгутӕй алкӕмӕндӕр аргъ кӕнуй. Цалинмӕ Киристе ӕ апостолти игъосун кӕнунмӕ нӕ рарвиста, уӕдмӕ син сӕ нифс бафедар кодта, цӕмӕй сӕ фӕдбӕл ке зелдзӕнцӕ, уомӕй ма тӕрсонцӕ. (Бакӕсӕ Матфеййи 10:29–31.) Кутемӕй? Киристе син се ’ргом раздахта сирдонцъеумӕ. Уӕхӕн цъеутӕ Израили хъӕбӕр берӕ адтӕй ӕма хъӕбӕр аслан адтӕнцӕ. Фал уӕд дӕр Киристе ӕ ахуркӕнуйнӕгтӕн загъта: «Уонӕй еу дӕр зӕнхӕмӕ, уӕ Фидӕ ’й ма зона, уотемӕй не ’рхаудзӕй». Уой фӕсте ба ӕ дзурдтӕмӕ бафтудта: «Сумах берӕ сирдонцъеутӕй дӕр хъазардӕр айтӕ». Уотемӕй син балӕдӕрун кодта, Йеговӕ си алкӕмӕндӕр ке аргъ кӕнуй ӕма сӕ фӕдбӕл ке зелдзӕнцӕ, уомӕй сӕ тӕрсун ке нӕ гъӕуй. Аллихузи горӕттӕ ӕма гъӕути игъосун кӕнгӕй сирдонцъеути ку фӕууиниуонцӕ, уӕд, ӕвӕдзи, сӕ зӕрдӕбӕл Киристей дзурдтӕ ӕрлӕууиуонцӕ. Мадта ду дӕр минкъий цъеуи ку фӕууинай, уӕд дӕ зӕрдӕбӕл ӕрлӕуун кӕнӕ, Йеговӕ дин ке аргъ кӕнуй, уомӕн ӕма ду дӕр берӕ сирдонцъеутӕй хъазардӕр дӕ. Дӕ фӕдбӕл ку зелонцӕ, уӕд дӕр Хуцауи ӕнхуси фӕрци нӕ фӕттӕрсдзӕнӕ (Пс. 118:6).

13. Цӕмӕй сфӕлдистадӕй Йегови туххӕй еститӕ базонай, уой туххӕй ци кӕнун гъӕуй?

¹³ Йегови туххӕй ма берӕ цидӕртӕ ӕй нӕ бон базонун е ’сконд гъуддӕгтӕй. Уой туххӕй нӕ ци кӕнун гъӕуй? Фиццагидӕр гъӕуама  рӕстӕг хецӕн кӕнӕн, цӕмӕй ци сфӕлдиста, уомӕй ахур кӕнӕн. Дуккаги ба гъӕуама сагъӕс кӕнӕн, Йегови туххӕй нӕ цӕбӕл ахур кӕнунцӕ, уобӕл. Фал е алкӕд ӕнцон нӕ фӕууй. Камерунӕй еу хуӕрӕ Джеральдинӕ зӕгъуй: «Ӕз устур горӕти исирӕзтӕн, ӕма ’й уомӕ гӕсгӕ лӕдӕрун, цӕмӕй ӕрдзӕ куд рӕсугъд конд ӕй, уой фӕууинай, уой туххӕй байархайун фӕгъгъӕуй». Еу хестӕр нӕлгоймаг Альфонсо ба зӕгъуй: «Ӕз ӕй балӕдӕрдтӕн, цӕмӕй Йеговӕ ци сфӕлдиста, уомӕй цӕбӕл ахур кӕнун, уобӕл сагъӕс кӕнон, уой туххӕй мӕ рӕстӕг хецӕн кӕнун ке гъӕуй».

14. Хуцау ци сфӕлдиста, уомӕ кӕсгӕй Давид ци базудта?

¹⁴ Паддзах Давид арӕх фӕссагъӕс кӕнидӕ, Хуцау ци сфӕлдиста, уобӕл ӕма загъта: «Ку фӕккӕсун арвмӕ, дӕ къохти хъиамӕтмӕ, де ’сконд мӕйӕмӕ ӕма стъалутӕмӕ, уӕд ци ӕй зӕнхон адӕймаг, цӕмӕй ӕй ду гъуди кӕнай?» (Пс. 8:3, 4). Давид стъалутӕй идзаг арвмӕ ку искӕсидӕ, уӕд Дун-дуйне куд ӕнӕкӕрон ӕй, уобӕл дес куд нӕ кӕнидӕ. Фал ӕй уомӕй фулдӕр ба деси бафтауидӕ, ка сӕ сфӕлдиста, уомӕ цӕйбӕрцӕ зунд ӕма хъаурӕ ес, е. Давид ма сагъӕс кодта, сувӕллон ӕ мади губуни куд равзуруй, удта ӕ бауӕр куд дессаги конд ӕй, уобӕл дӕр, ӕма уой туххӕй Йеговӕй хъӕбӕр боз адтӕй (Пс. 139:14–17).

15. Сфӕлдистадӕмӕ кӕсгӕй Йегови менеугутӕ нӕ бон куд ӕй фӕууинун? (Псалом 148:7–10).

¹⁵ Ӕвӕдзи, дӕуӕн дӕр Давиди хузӕн зин нӕй, ӕрдзи дӕ цӕстӕ цӕмӕ ӕрдарай ӕма цӕбӕл расагъӕс кӕнай, уӕхӕн ести иссерун. Дӕ алливарс ку ракӕсай, уӕд ӕй фӕууиндзӕнӕ, Йеговӕмӕ цӕхуӕн менеугутӕ ес, уой. Зӕгъӕн, хор ку ӕрбатава, уӕд расагъӕс кӕнӕ, Йеговӕмӕ цӕхуӕн хъаурӕ ес, уобӕл (Йер. 31:35). Кенӕ цъеу астъонӕ куд кӕнуй, уомӕ кӕсгӕй ба расагъӕс кӕнӕ Йегови ӕнӕкӕрон зундбӕл. Къӕбуци ӕ къӕдзелӕ куд фӕссоруй, уомӕй ба бӕрӕг ӕй, Йеговӕ раходун дӕр ке уарзуй. Мадӕ ӕ сувӕллони куд фӕррӕвдауй, уомӕ кӕсгӕй ба Йеговӕн арфӕ кӕнӕ ӕ уарзондзийнади туххӕй. Йегови базонунмӕ нин берӕ фадуӕттӕ ес, уомӕн ӕма Дун-дуйней цидӕриддӕр сфӕлдиста, етӕ ӕ кадӕбӕл дзорӕг ӕнцӕ. (Бакӕсӕ Псалом 148:7–10.)

16. Нӕ рази цӕхуӕн нисан гъӕуама исӕвӕрӕн?

¹⁶ Йеговӕмӕ ес ӕнӕкӕрон зунд ӕма хъаурӕ, удта нӕ уарзгӕ дӕр берӕ кӕнуй. Ӕма еци менеугутӕ бӕрӕг ӕнцӕ, ци сфӕлдиста, уомӕй. Гъӕйдӕ мадта рӕстӕг хецӕн кӕнӕн, цӕмӕй Йегови ’сконд гъуддӕгтӕбӕл сагъӕс кӕнӕн. Уой фӕрци Йегови хуӕздӕр базондзиан ӕма имӕ никки хӕстӕгдӕр кӕндзиан (Иак. 4:8). Иннӕ статьяй ӕркӕсдзиан, ниййергути бон куд ӕй, сӕ сувӕллӕнтти ӕргом сфӕлдистадӕмӕ ӕздахун ӕма уотемӕй Йеговӕмӕ хӕстӕгдӕр кӕнун.