1. Kiko a yuda Yòb konosé Yehova mihó?

 DI TUR e kòmbersashonnan ku Yòb tabatin den su bida, esun ku nunka lo el a lubidá ta esun ku e tabatin ku Yehova Dios. Durante e kòmbersashon ei, Yehova a pidié pa opservá kreashon. Dikon? Pasó esei lo a yuda Yòb mira kon sabí Yehova ta. Ademas lo el a haña mas konfiansa ku Yehova por perkurá pa su sirbidónan. Por ehèmpel, Yehova a kòrda Yòb ku E ta perkurá pa e bestianan, pues E por perkurá pa Yòb tambe. (Yòb 38:39-41; 39:1, 5, 13-16) Yòb a siña hopi tokante Dios dor di djis opservá kreashon.

2. Dikon tin biaha ta difísil pa nos opservá kreashon?

² Nos tambe por siña hopi tokante nos Dios ora nos opservá kreashon. Pero, no ta tur ora ta fásil pa hasi esei. Si nos ta biba den un stat, tin dia apénas nos ta mira algu di naturalesa. Anto asta si nos no ta biba den stat, nos por sinti ku nos no tin tempu pa opservá kreashon. Pues, laga nos ban mira dikon ta bale la pena pa saka tempu i hasi esfuerso pa opservá kreashon. Nos lo wak kon Yehova i Hesus a usa kreashon pa siña hende i kiko nos por hasi pa siña mas for di naturalesa.

3. Kon nos ta mira ku Yehova tabata ke pa Adam disfrutá di kreashon?

³ Ora Yehova a krea Adam, e tabata ke pa e disfrutá di kreashon. El a dun’é un bunita paradeis pa biba aden i a  dun’é e tarea pa kuid’é i hasié mas grandi. (Gén. 2:8, 9, 15) Imaginá kon Adam a sintié ora el a mira simianan sprùit i matanan saka flor. E tarea pa kuida e hòfi na Eden tabata un bunita privilegio ku Adam a haña! Ademas, Yehova a pidié pa duna e diferente bestianan nòmber. (Gén. 2:19, 20) Yehova mes por a duna nan nòmber, pero el a preferá di laga Adam hasi esei. Klaru ku promé ku Adam a duna nan nòmber, el a opservá nan aparensia i kiko tur nan tabata hasi. Sin duda, el a gusta hasi esei. E tarea ei sigur a yud’é komprondé kon sabí Yehova ta i kon bunita i interesante su kreashon ta.

4. (a) Dikon nos mester analisá kreashon? (b) Menshoná algu den kreashon ku bo gusta.

⁴ Un motibu dikon nos tin ku analisá kreashon ta pasó Yehova ke pa nos hasi esei. E ta bisa nos: “Hisa bo wowo wak ariba.” Kaba e ta sigui bisa: “I mira ta ken a krea e streanan akí.” (Isa. 40:26) Yehova a krea tantu e kosnan den shelu komo e kosnan riba tera i tambe den laman. I tur e kosnan ei ta siña nos tokante dje. (Sal. 104:24, 25) Anto wak e manera ku Dios a traha nos. El a krea nos ku e abilidat di apresiá e bunitesa ku tin den naturalesa. Tambe el a duna nos e abilidat di mira, skucha, mishi, purba i hole. E sentidonan ei ta pone ku nos por disfrutá di e kosnan ku el a krea.

5. Segun Romanonan 1:20, dikon ta bon pa nos studia kreashon?

⁵ Beibel ta menshoná un otro motibu importante dikon nos tin ku opservá kreashon. Kreashon ta siña nos tokante Yehova su kualidatnan. (Lesa Romanonan 1:20.) Por ehèmpel, wak e kosnan ku Yehova a krea i mira kon maravioso nan ta diseñá. Ora nos hasi esei, nos ta realisá kon sabí Yehova ta. Anto no lubidá e variedat di kuminda ku nos por disfrutá di dje. Esei ta proba bon kla kuantu Yehova stima nos. Ora nos mira Yehova su kualidatnan den e kosnan ku el a krea, nos ta siña konos’é mihó i nos lo ke hala mas serka di dje. Awor, laga nos wak algun manera ku Yehova a usa kreashon pa siña hende lèsnan importante.

6. Ki lès nos ta siña for di e paranan ku ta migra?

⁶ Yehova a stipulá un tempu pa tur kos. Tur aña, entre fin di febrüari i mitar di mei, e israelitanan lo tabata mira kon e  oyevarnan ta migra bai direkshon nort. Yehova a bisa e israelitanan: “Asta oyevar ku ta bula na shelu konosé su temporadanan.” (Yer. 8:7) Yehova a stipulá e tempu pa e paranan akí migra. Asina tambe el a stipulá un tempu pa trese su huisio. Pues, ki ora ku nos mira paranan ta migra, esei ta kòrda ku nos por konfia ku Yehova tin un “tempu stipulá” pa trese fin na e mundu malbado akí.—Hab. 2:3.

7. Kiko nos ta siña ora nos mira para ta bula? (Isaías 40:31)

⁷ Yehova ta duna su sirbidónan forsa. Pa medio di Isaías, Yehova a primintí ku ora su sirbidónan ta sinti nan suak òf desanimá, lo e duna nan forsa pa “bula bai ariba ku ala manera águila.” (Lesa Isaías 40:31.) E israelitanan tabatin kustumber di mira águila zueif den laira kasi sin ku nan tin ku bati nan alanan. Nan ta hasi esei dor di probechá di e kolumnanan di aire kayente ku ta bai laira. Esaki ta kòrda nos ku meskos ku Yehova ta duna e águilanan forsa, e por duna nos tambe forsa. P’esei, tur biaha ku bo mira un para asina subi bai mas i mas haltu kasi sin ku e tin ku bati su alanan, kòrda ku Yehova por duna bo e forsa pa trata ku bo problemanan.

8. Kiko Yòb a siña for di kreashon, i kiko nos por siña?

⁸ Yehova ta digno di nos konfiansa. Yehova a yuda Yòb mira ku e por konfia den dje. (Yòb 32:2; 40:6-8) Den e kòmbersashon ku e tabatin ku Yòb, Yehova a papia tokante vários kos ku el a krea, manera strea, nubia i welek. El a papia tambe tokante toro salbahe i kabai. (Yòb 38:32-35; 39: 9, 19, 20) Tur esei a yuda Yòb mira no solamente kuantu poder Yehova tin, pero tambe su amor i sabiduria. Danki na e kòmbersashon ei, Yòb a siña konfia Yehova asta mas. (Yòb 42:1-6) Di mes manera, ora nos opservá kreashon nos ta mira ku Yehova ta hopi mas sabí i mas poderoso ku nos. Tambe nos ta mira ku e por i lo trese fin na tur nos pruebanan. Ora nos kòrda esei, nos lo konfi’é asta mas.

9-10. Kiko solo i áwaseru ta siña nos tokante Yehova?

⁹ Hesus tabatin bon konosementu di naturalesa. Komo un “trahadó eksperto,” e tabatin e privilegio di traha huntu ku su Tata ora El a krea universo. (Pro. 8:30) Tempu ku Hesus tabata riba tera, el a usa kreashon pa siña su disipelnan tokante su Tata. Ban wak algun kos ku el a siña nan.

¹⁰ Yehova stima tur hende. Den e Sermon riba Seru, Hesus a papia ku su disipelnan tokante dos kos ku hopi hende no ta para ketu i pensa riba dje: solo i áwaseru. Pero, sin e dos kosnan ei no por tin bida. Yehova por a prevení esnan ku no ta sirbié di disfrutá di solo i áwaseru. Ma komo ku e ta stima tur hende, e ta sòru pa solo sali i awa kai pa tur hende. (Mat. 5:43-45) Ku esei Hesus a siña su disipelnan ku Yehova ke pa nos stima tur hende. Ki ora ku nos mira un bunita bahada di solo òf disfrutá di un dushi áwaseru, nos por pensa riba kuantu Yehova stima hende. Esei por motivá nos pa imitá su amor i prediká na tur hende.

11. Ki animashon nos por haña ora nos opservá e paranan?

¹¹ Yehova ta perkurá pa nos nesesidatnan. Den e mesun sermon, Hesus a bisa  tambe: “Opservá e paranan di shelu bon; nan no ta sembra ni kosechá ni warda kuminda den mangasina. Tòg boso Tata selestial ta alimentá nan.” Kisas, e hendenan tabata mirando para ta bula den shelu ora el a puntra nan: “Boso no ta bal mas ku nan?” (Mat. 6:26) E manera ei ku Hesus a splika ku Yehova ta perkurá pa nos ta hopi amoroso! (Mat. 6:31, 32) Te awe e lès ei di e paranan ta sigui animá Dios su sirbidónan. Un ruman muhé pionero na Spaña tabata desanimá pasó e no por a haña un lugá adekuá pa biba. Pero despues ku el a mira algun para ta kome simia i fruta, el a sintié mas trankil. El a bisa: “E paranan ei a kòrda mi ku Yehova ta perkurá pa nan i lo e perkurá pa mi tambe.” No muchu despues di esei, e ruman a haña un lugá di biba.

12. Segun Mateo 10:29-31, kiko mòfi ta siña nos tokante Yehova?

¹² Yehova ta balorá kada un di nos. Promé ku Hesus a manda su apòstelnan bai prediká, el a yuda nan komprondé ku nan no mester tin miedu di hende ku lo oponé nan. (Lesa Mateo 10:29-31.) El a papia ku nan tokante un di e paranan mas komun na Israel: mòfi. Aunke ku den tempu di Hesus mòfi no tabata bal kasi nada, el a bisa su disipelnan: “Ni ún di nan lo no kai na suela sin ku boso Tata sa.” Djei, el a agregá: “Boso ta bal mas ku hopi mòfi.” Ku e palabranan ei Hesus a sigurá su disipelnan ku Yehova ta balorá kada un di nan, pues nan no mester tin miedu di persekushon. Kada biaha ku e disipelnan a mira mòfi ora nan tabata prediká, nan lo a kòrda riba Hesus su palabranan. Pues, ki ora ku bo mira un para chikitu, kòrda ku Yehova ta balorá bo pasó bo tambe ta “bal mas ku hopi mòfi.” Ku Yehova su yudansa lo bo no mester tin miedu ora hende oponé bo.—Sal. 118:6.

13. Kiko nos tin ku hasi pa siña mas tokante Yehova for di kreashon?

¹³ Nos por siña hopi kos mas tokante Yehova for di kreashon. Pero kon nos por hasi esei? Promé, nos tin ku saka tempu pa opservá kreashon. Despues, nos tin ku puntra nos mes: ‘Kiko esei ta siña mi tokante Yehova?’ No ta semper fásil pa hasi tur esei. Géraldine, un ruman di Kamerun a bisa: “M’a lanta den stat, pues mi mester hasi hopi esfuerso pa opservá naturalesa.” Anto, un ansiano ku yama Alfonso a bisa: “M’a realisá ku mi mester a hinka den mi agènda tempu pa opservá kreashon i meditá riba loke e ta siña mi tokante Yehova.”

14. Kiko David a siña ora el a meditá riba kreashon?

¹⁴ David a tuma tempu pa sinta pensa  tokante kreashon. El a bisa Yehova: “Ora mi mira shelu, e obra di bo man, i mi mira e luna i e streanan ku bo a traha, mi ta puntra mi mes: Kiko hende ta ku bo ta kòrda riba dje?” (Sal. 8:3, 4) Ora David tabata wak e streanan, el a hasi mas ku djis disfrutá di nan. El a meditá riba loke nan a siñ’é tokante Dios. Tur esei a yud’é mira kon maravioso Yehova ta. Pero tabatin biaha ku David a meditá tambe riba kon el a ser formá den barika di su mama. Ora el a pensa kon maravioso su kurpa tabata hinká den otro, el a haña mas apresio pa Yehova su sabiduria.—Sal. 139:14-17.

15. Duna ehèmpel di loke abo a siña tokante Yehova for di kreashon. (Salmo 148:7-10)

¹⁵ Meskos ku David, probablemente bo no tin ku hasi hopi esfuerso pa haña algu den naturalesa pa meditá riba dje. Si bo wak rònt, tin hopi kos ku por yuda bo siña konosé Yehova mihó. Por ehèmpel, ora bo ta opservá solo, meditá riba kuantu poder Yehova tin. (Yer. 31:35) Ora bo mira un para ta traha su nèshi, meditá riba Yehova su sabiduria. Anto ora bo wak un yu di kachó ta kore tras di su rabu, pensa riba Yehova su humor. I ki ora ku bo mira un mama ta hunga ku su yuchi, yama Yehova danki pa su amor. Tin masha hopi kos den kreashon ku por siña nos tokante Yehova, pasó tur loke el a krea ta alab’é. Sí, sea nan ta kos grandi, kos chikitu, algu serka òf algu leu, tur ta alabá Yehova.—Lesa Salmo 148:7-10.

16. Kiko nos tur mester hasi?

¹⁶ Nos Dios ta sumamente sabí, amoroso i poderoso. Tur kos ku el a krea ta bunita. Si nos djis tuma tempu i opservá kreashon, nos por siña tokante e kualidatnan ei i hopi mas. P’esei, saka tempu regularmente pa opservá kreashon i meditá riba loke e ta siña bo tokante Yehova. Asina ei, lo bo hala mas serka di nos Kreador. (Sant. 4:8) Den e siguiente artíkulo, nos lo siña kon mayornan por usa kreashon pa yuda nan yunan bira amigu di Yehova.