1. Ngera ta er a rolel e a Job a mlo ungil medengelii a Jehovah?

 AIKE EL rokui el cheldechedechal a Job lobengterir a rebebil e ngngar ngii a ta er ngii el kmal mle ileakl er a rengul. Tiang a cheldechedechal lobengkel a Jehovah el Dios. Ngar tia el cheldechedecherir e a Jehovah milsaod a mengasireng el tekoi el le bileob lochotii a llomeserreng er ngii me a duch er ngii el omekerreu er a remesiungel. El ua tiang, ngulemeklatk er a Job el kmo ngomesterir a charm aike el lousbech me ngkmal dirrek el sebechel omekerreu er a Job. (Job 38:39-41; 39:1, 5, 13-16) A Job er a lorriter a blebelel a Jehovah e ngsiluub a kmal betok el kirel a blekerdelel a Dios.

2. Ngera uchul me nglocha mo meringel er kid a merriter a blebelel a Jehovah?

² Kid me ngdirrek el sebeched el suub a betok el kirel a Dios er kid sel dorriter a blebelel. Me nguaisei, engdi kede locha metik el kmo tia diak lebeot el tekoi. A lsekum e kede kiei er a city e ngmeringel er kid a mes a blebelel a Jehovah er a bek el sils. Mo lmuut me a dekiei el iliuekl er a betok el blebelel me nglocha diak el klou a temed el merriter. Me dosaod er a uchul e ngmo klungioled a dongoit a taem e demeringel loureor el mo omtab a blebelel a Jehovah. Kede mo mesaod er a rolel a Jehovah me a Jesus uluusbech a bleob lolisechakl me aike el sebeched el meruul el mo suub a lmuut el betok er a blebelel a Jehovah.

3. Ngera ochotii el kmo a Jehovah mle soal a Adam a loldeu a rengul er a blebelel?

³ A Jehovah mle soal ngike el kot el chad a loldeu a rengul er a blebelel. Sera lebebii a Adam e ngmilsa klebokel el baradis el  delengcheklel e milsa ngerachel el mo mengetmokl er ngii e menglou er a baradis. (Gen. 2:8, 9, 15) Molatk er a deuil a rengul a Adam er a lomes a tane el mukeroul el mo bung. Ngmera el mle ileakl el techall a lulebang el omekerreu er a sers er a Eden! A Jehovah dirrek lullengit er ngii me lomngakl a charm. (Gen. 2:19, 20) A Jehovah mle sebechel di ngii lomngakl a charm engdi ngmilsa tia el ngerachel er a Adam. Ngulterekokl a Adam el milengoit a taem el mesuub a omerellel me a blekerdelel a derta el charm er a uchei er a lomngakl. Nglocha kmal mle dmeu a rengul el meruul er tiang. Nglocha kmal ngilsuir el menglou er a omereng el saul er ngii el kirel a llomeserreng er a Jehovah me a rolel a lomeob aika el kmal betok el klebokel el tekoi.

4. (a) Ngera ta er a uchul me ngungil dorriter a blebelel a Dios? (b) Ngera el blebelel a Jehovah a kmal moba omereng el saul el kirel?

⁴ A ta er a uchul me ngkired el merriter a blebelel a Jehovah a ngii el soal a doruul er tiang. Ngdmu el kmo: “Momes el mor bab er a eanged!” E oker el kmo: “Ng techa ulemeob a ikel btuch el momes?” A nger er ngii a bleketakl. (Isa. 40:26) Jehovah dimlak di lebekekii a eanged er a blebelel e ngdirrek el milekekii a chutem me a daob er a betok el tekoi el sebeched el ngmai a klubeled er ngii. (Psa. 104:24, 25) E ka di molatk er a rolel e ngmilebid. Ngrirellid el sebeched loldeu a rengud er a klebokel el blebelel. Ngdirrek el milebid el sebeched el omes, orrenges, merutech, mengarm, e melungel me doldeu a rengud er aika el kakerous el blebelel.

5. A doltirakl er a Rom 1:20, e ngmekera mo uchul a klungioled sel dorriter a blebelel a Jehovah?

⁵ A Biblia dirrek louchais er a ta er a klou a ultutelel luchul me ngkired el merriter a blebelel a Jehovah. Ngosisecheklid er a blekerdelel. (Monguiu er a Rom 1:20.) El ua tiang, morriter a blebelel a Jehovah e mesa el kmo ngmera el ileakl a design er ngii. Aika ngdiak lochotii a llemesel a rengul a Dios? E molatk er a kakerous el bedengel a kall el ngar ngii. Tia bleketakl lochotii a bltkil a rengul el mora rechad. Sel domtab a blekerdelel a Jehovah el deues er a blebelel e kede lmuut el mo ungil medengelii e lmuut el mo kmeed er ngii. Chelecha e me domes a bebil rolel e a Jehovah mla ousbech a blebelel lolisechakl er a rechad a meklou a ultutelel el tekoi.

6. Ngera sebeched el suub er a suebek el charm el mesebesebek el mora kuk ta er a beluu?

⁶ Jehovah a ngar ngii a telutk el temel. Bek el rak er a delongelel a end er a February me a melengel a May, e a rechad er a Israel omes a  stork el suebek er bebul a beluu el merael bedul a diluches. A Dios a dilu er a rechad er a Israel el kmo, “a stork me ng medengei a belsechel a luut er ngii.” (Jer. 8:7) Ngdi ua Jehovah el mla tutkii a taem el kirel aika el charm el suebek me ngmla kutmeklii a taem el bo loltaut a kerrekerilel. Chelecha el taem e sel domes a charm el suebek el kuk mora ta er a beluu, e ngmekltkid el kmo ngkmal sebeched loumerang el kmo a Jehovah mla kutmeklii “sel taem” el bo lokngemedii tia el mekngit el beluulechad.​—Hab. 2:3.

7. Ngera ngsebechel lolterekokl a rengud er ngii a bo dorriter a rolel a le suebek a charm? (Isaia 40:31)

⁷ Jehovah omesterir a remesiungel a klisiich. A Jehovah tilbir loeak a Isaia el kmo ngmo smisicheterir a rechedal el “mo suebek el mor bab el ua uasi” sel bo lemesaul a bedengir me a lechub e ngmechitechut a rengrir. (Monguiu er a Isaia 40:31.) A rechad er a Israel a mle smau lomes a uasi el suebek el bedul bab lousbech a klisichel a eolt me ngdimlak lousbech lomerk osebekir el betok el taem. Ngmera el lungil uleklatk el kmo ngdi ua Jehovah lomsa klisichel a charm el suebek, ngii me ngsebechel mesterir a remesiungel a klisiich! Sel momes a charm el suebek el merael el bedul bab e diak lomerk osebekir, e lomeklatk er kau el kmo a Jehovah sebechel meskau a klisiich el outekangel a mondai er kau.

8. Ngera ngsilubii a Job er a lorriter a blebelel a Dios, e ngera sebeched el suub?

⁸ A Jehovah a rredemelel a klaumerang er kid. A Jehovah ngilsuir a Job el lmuut el mo dmolech a klaumerang er ngii er ngii. (Job 32:2; 40:6-8) Ngar er a cheldechedechal lobengkel a Job e ngmilsaod a betok el blebelel luldimukl er a btuch, eabed, me a bisebusech. Ngdirrek el milsaod el kirel a charm, el ua kerbou er a ked me a uos. (Job 38:32-35; 39:9, 19, 20, NW) Aika dimlak di lochotii a klisichel a Dios ngdirrek lochotii a bltkil a rengul me a llomeserreng er ngii. Ngoeak tia el cheldechedecherir e a Job a kmal mlo mesisiich a klaumerang er ngii er a Jehovah. (Job 42:1-6) Ngdi osisiu, sel dosuub el kirel a blebelel a Jehovah e ngomeklatk er kid el kmo, a Jehovah a lmuut el mellomes a rengul e mesisiich er kid. E kmal sebechel torrob a rokui el ringeled, e ngii a mo meruul er tiang. Sel bo dodengelii tiang e ngsebechel ngosukid el smisichii a klaumerang er kid er ngii.

9-10. Ngera ngouchais er kid el kirel a Jehovah a sils me a chull?

⁹ A Jesus a mle medengei a betok el kirel a charm me a dellomel. Ngii el “di ua chad er omelib el blai” a mla er ngii a ileakl el techellel loureor lobengkel a Demal er a lomeob a rokui el tekoi. (Osi. 8:30) Uriul er a lemei er tia el chutem, e nguluusbech a bleob el olisechakl er a redisaiplo er ngii el kirel a Demal. Ka molatk a bebil el tekoi lullisechakl.

¹⁰ A Jehovah olecholt er a bltikerreng el mora rokui el chad. Ngar er a cheldechedechal a Jesus el ngar er a rois e ngmilsaod el kirel a sils me a chull, el tekoi el rechad a diak leblechoel el melatk. Aika el teblong a kmal meklou a ultutelel el kired me dolemolem el ngar. A Jehovah mle sebechel diak lomesterir aikang el mora rechad el diak el rredemelel a melai. Engdi ngika omesterir a rokui el chad a sils me a chull. (Mt. 5:43-45) Jesus uluusbech er tiang lolisechakl er a redisaiplo er ngii el kmo a Jehovah kmal lolecholt er a bltikerreng el mora rokui el chad. Sel desa kmal klebokel el sunset me a lechub e domes er a chull el mereberebet, e ngsebeched el melatk er a bltkil a rengul a Jehovah el diak longetukel. A kerebai er ngii a sebechel lodbechid el mo olecholt er  a osisiu el bltikerreng loeak sel domerk er a klumech el mora rokui el chad.

11. Ngera el omelisiich a sebeched el ngmai sel domes a charm el suebek?

¹¹ Jehovah omeskid aike el dousbech. Ngar tia el osisiu el cheldechedechal a Jesus e ngdilu el kmo: “Ka momes a suebek el charm, ng diak lolalem a dellomel, el ka longudel a kall el mo melecha er a blil; me ng ua isei e a Demmiu el ngar er a eanged omekerreu er tir!” A rulerrenges er a Jesus a locha ulemes a suebek el charm el mesebesebek e ngii oker er tir el kmo: “Kemiu ng diak mkuk ngarbab er a suebek el charm?” (Mt. 6:26) Ngoeak tiang a Jesus a ngosukid el mo mesa el kmo a Jehovah mo meskid aike el dousbech! (Mt. 6:31, 32) Tia el tekoi el desuubii er a blebelel a Jehovah melisiich er a reblak a rengrir el mesiungel. Kekerei el odos el pioneer er a beluu er a Spain a kora mlo mechitechut a rengul le ngdimlak el sebechel metik er a blil. Engdi uriul er a lesa charm el suebek el menga tane me a rodech e ngmillisiich er a rengul. Ngmelekoi el kmo, “Aika el charm el suebek ulemeklatk er ngak el kmo a Jehovah omekerreu er tir me ngii a dirrek el kmal mo omekerreu er ngak.” Ngdi mle telkib el taem er uriul er tiang e a odos a miltik er a blil.

12. A doltirakl er a Mateus 10:29-31, e a chesisebangiau ngera ngouchais er kid el kirel a Jehovah?

¹² A Jehovah mengreos er a derta me a derta er kid. Uchei er a lodercheterir a rechapostol er ngii el mo omerk er a klumech a Jesus, e ngngilsuterir el mo diak lemedakt sel lomtok er tir a rechad. (Monguiu er a Mateus 10:29-31.) Ngmirruul er tiang er a losaod el kirel a charm el suebek el kmal mle betok er a Israel, el ngii a chesisebangiau. Aika el charm a dimlak a kerresel er a taem er a Jesus. Engdi ngdilu er a redisaiplo er ngii el kmo: “Diak a tal chesisebangiau el ruebet er a chutem a lak le kengei a Demmiu.” E dilechelir el kmo: “Kemiu a lmuut el ngar uchei er a rengul a Dios er a betok el chesisebangiau!” Me a Jesus ulelterekokl a rengrir el kmo a derta me a derta er tir a mekreos er osengel a Jehovah, me ngdiak a belkul bo lemedakt a odechelakl. A redisaiplo sel lorael a beluu lomerk er a klumech e te locha mo lmatk a tekingel a Jesus sel leues a chesisebangiau. Me sel mesa kekerei el suebek el charm e lak mobes el kmo ke kmal mekreos er osengel a Jehovah e le kau me ke dirrek el “lmuut el ngar uchei er a rengul a Dios er a betok el chesisebangiau!” Ngoeak a ngelsuil e ngsebechem el mo chobangel odechelakl loba ulterekokl el reng.​—Psa. 118:6.

13. Ngera mo ngosukid el suub aike el losisecheklid a blebelel a Jehovah?

¹³ Ngsebeched el suub a lmuut el betok el kirel a Jehovah loeak a blebelel. Ngoeak a ngera el rolel? A kot e ngkired el kutmeklii a temed el mo omtab a blebelel. A uriul e ngkired el melatk aike el losisecheklid el kirel a Jehovah. Ngdiak leblechoel el beot a doruul aika el tekoi. A Géraldine lodos er a Cameroon a  kmo, “Ngak a mlukeroul er a city, me ak mlo mtebengii el kmo ngmle kirek el meringel loureor el mo omtab a blebelel a Jehovah.” Alfonso el ta er a remechuodel a melekoi el kmo, “Ak mla mo medengei el kmo ngkirek el schedule er a taem el di ngak el tang e omtab a blebelel a Jehovah e melebedebek aike el losisecheklak er ngii el kirel.”

14. Ngera ngsilubii a David er a lolebedebek a blebelel a Dios?

¹⁴ A David a mle dmolech el melatk a blebelel a Dios. Ngdilu er a Jehovah el kmo: “Sel kumes er a melidiul el mrirellii, e kisa buil ma btuch el mlilechang er olsechelel, e ng ngera belkul a chad me ke kmal melatk er ngii.” (Psa. 8:3, 4) Chochoi, a David er a lomes el bedul a melidiul e ngdimlak di loldeu er a rengul lomes a btuch. Ngmillebedebek aike el losisecheklii a btuch el kirel a Dios. Ngsiluubii a klungiolel a Jehovah. Ngngar ngii aike el taem el lullebedebek er a omebelel er a omecherellel a delal. Sera lolebedebek er a mengasireng el rolel e ngulebeob e ngmlukeroul a omereng el saul er ngii el kirel a llomeserreng er a Jehovah.​—Psa. 139:14-17.

15. Momasech a bebil blekerdelel a Jehovah el bla mues er a blebelel. (Psalm 148:7-10)

¹⁵ Ngdi ua David, nglocha beot er kid a metik a blebelel a Jehovah el sebeched el mo dmolech el melatk el kirel. Sel momes el meliuekl e nglocha sebechem el mtab a betok el blekerdelel a Jehovah. El ua tiang, ke mtebengii a klisichel a Jehovah sel momelechesiu er a kleldelel a sils el me rutechii a bedengem. (Jer. 31:35) Molatk er a llomeserreng er a Jehovah sel mesa charm el suebek el meruul er a lukel. Molatk el kmo Jehovah dirrek el chad er a oltobedechur sel momes er a ngelekel a bilis loltoir er a kemril. E moureng a sulel a Jehovah el kirel a bltkil a rengul sel mesa chedil lousekool er a ngelekel tolechoi. Ngkmal betok a techall el sebeched el mesuub el kirel a Jehovah e le blebelel el meklou me a mekekerei, kmeed me a cheroid, a oldanges er ngii.​—Monguiu er a Psalm 148:7-10.

16. Ngera kired el rullii er a rengud el mo meruul er ngii?

¹⁶ A Dios er kid a mellomes a rengul, betik a rengul er kid, mesisiich, me a rokui el tekoi loruul a klebokel. Aika el blekerdelel me a lmuut el betok a deues el bleketakl er a blebelel el iliuekl er kid a lsekum e kede mo kerekikl el omtab. Mada bo deblechoel el mengetmokl a temed el oldeu a rengud er a blebelel a Jehovah e bo dolatk aike el losisecheklid el kirel. Sel doruul el uaisei e kede lmuut el mo kmeed er a Ulemeob er kid. (Jak. 4:8) Ngar er a ongingil suobel kede mo mesa rolel e a ruungalek a sebechir lousbech a blebelel a Jehovah lolengeseu er a rengelekir el mo kmeed er ngii.