1. Itshi yakuatesele Yobo ha gujiya Yehowa muabonga?

 HAKHALELE Yobo nu monyo, watele maga avula nu athu. Uvi maga atele muene nu Yehowa Nzambi akhalele nu ndando yavula. Tangua akhalele muta maga, Yehowa wawambelele Yobo ha gutala ima ya gushimana yafugile muene. Ndaga yene yakhalele naye gukuatesa Yobo ha gusha mutshima egi Yehowa udi nu ndunge jiavula, udi nji nu ngolo jia gubamba akombeledi enji. Ha gufezegesa, Yobo wakotelesele egi luholo Yehowa wana bamba shitu, mbawumumbamba nji. (Yobo 38:39-41; 39:1, 5, 13-16) Tangua Yobo watalele ima yafugile Nzambi, yamukuatesele ha gujiya makalegelo enji avula.

2. Mukunda natshi yajiya gukhala lamba ha gutala ima yafugile Nzambi?

² Esue nji tuajiya gujiya ndaga jiavula jiatadila Nzambi gula tudi mutala ima yafugile muene. Uvi matangua ako yajiya gukhala lamba ha gutshita ngenyi. Gula tudi mujinga mu ville yakoma yajiya gukhala lamba ha gumona ima yafugile Yehowa. Yajiya nji gukhala egi tuana khala nu luendu lua gumona ima yafugile Yehowa, uvi tuanago guheta tangua dia gulonguga ima yene. Henyaha tutadilenu mukunda natshi idi nu ndando yavula ha guzula tangua dia gutala ima yafugile Nzambi. Tuza mumona luholo Yehowa nu Yesu akalegele ima yafugile Nzambi ha gulongesa athu ako nu ndaga tuajiya gutshita ha guheta malongo mu ima yafugile Nzambi.

3. Itshi idi mumonesa egi Yehowa wakhalele mutshigina egi Adama asuanguluge nu ima yafugile muene?

³ Yehowa wakhalele mutshigina egi Adama asuanguluge nu ima yafugile muene. Tangua diafugile muene Adama, wamuhagele mu  phaladiso yabonga, wamuhanele nji mudimo wa gulondega mavu ha guabuisa phaladiso. (Gis. 2:8, 9, 15) Tangiza luholo Adama akhalele nu gusuanguluga tangua diamonele muene mitshi muzoga nu tangua yakhalele muhaga iyaji. Adama wakhalele diago nu luendu luakoma lua gubamba dihia dia Edene! Yehowa wamuhanele nji ginemo gia guhana shitu majina. (Gis. 2:19, 20) Yehowa wakhalele naye guhana shitu jiene majina muene hakhenji, uvi wahanele ginemo giene gudi Adama. Idi naye gukhala egi Adama wakhalele mutala shitu yagasue muabonga ha gujiya luholo idi mu muila nu makalegelo enji gutuama dia guyihana jina. Idi naye gukhala egi Adama wasuangulugile diago nu mudimo wamuhanele Nzambi. Ndaga yene yamuhanele luendu lua gumona egi Yehowa udi watema diago nu ha gumona egi ima yagasue yafugile muene idi yabonga diago.

4. (a) Ndaga itshi idi naye gututuma ha gutala ima yafugile Nzambi? (b) Ima itshi yafugile Nzambi wana suanguluga nayo?

⁴ Ndaga iko idi naye gututuma ha gutala ima yafugile Yehowa, idi egi muene wana gututoga ha gutshita ngenyi. Udi gutuwambela egi: ‘Zumbulenu meso gosa mutale.’ Gungima udi muhula egi: ‘Nanyi wafugile ima eyi yagasue?’ Mvutu idi haphelo. (Yesh. 40:26) Yehowa wafugile ima yagasue idi mu dilu nu ha mavu nu mu mita. Ima yene yana gutukuatesa ha gumujiya muabonga. (Ngi. 104:24, 25) Henyaha tangiza gale luholo Yehowa watufugile, watuhanele luendu lua gumona ima yafugile muene hagula tusuanguluge nayo. Yehowa watufugile nu luendu lua gumona, lua guvua, lua gukuata ima, lua gudia nu gunua nu lua guvua mavumba, hagula tusuanguluge nu ima yagasue yafugile muene.

5. Ha gutadila Roma 1:20, gubonga tshi tuana heta tangua tuana longuga ima yafugile Yehowa?

⁵ Biblia yana gutuwambela ndaga iko ya ndando yana gututuma ha gutala ima yafugile Nzambi. Idi handaga ima yene yana gutukuatesa ha gulonguga makalegelo a Yehowa. (Tanga Roma 1:20.) Ha gufezegesa, gula watala ima yafugile Yehowa mbawumona egi yalondewe diago mu luholo lua gushimana. Ima yene yana monesa diago ndunge jia Yehowa. Tangiza gale guvula gua ima ya gudia tuana khala nayo, ndaga yene idi mumonesa egi Yehowa wana gutuzumba diago muavula. Tangua tuana mona makalegelo a Yehowa mu ima yafugile muene, yana gutukuatesa ha gumujiya muabonga nu ha gusuena hehi n’enji. Henyaha tutadilenu luholo Yehowa wakalegele ima yafugile muene ha gulongesa athu ndaga jia ndando.

6. Longo ditshi tuajiya guzula gula tudi mutala mu luholo tunjila tudi mubalega gosa mu sungi yenji?

⁶ Yehowa wahagele tangua ndaga yagasue idi naye gukalegewa. Mu givo giagasue, gu suga ya mbeji ya Fevrier nu ha katshi na katshi ya mbeji ya Mai enya Isalele akhalele mumona luholo tunjila tuakhalele  mubalega gosa ha guya gu khanda ya nord. Nzambi wawambelele enya Isalele egi: “njila gosa jiana jiya sungi yajio.” (Yel. 8:7) Gifua luholo Yehowa wahagele tangua tunjila tuene tudi naye gubalega, wahagele gale nji tangua mbadisophesa muene athu. Mangino tangua tuana mona tunjila mubalega gosa mu sungi yenji, yana gutukuatesa ha gusha mutshima egi Yehowa ‘watombele gale tangua’ mbadishiya muene mavu awa abola.​—Hab. 2:3.

7. Longo ditshi tuajiya guzula gula tudi mutala luholo njila jia khuyi jiana zuga gosa? (Yeshaya 40:31)

⁷ Yehowa wana hana akombeledi enji ngolo. Yehowa walayele akombeledi enji mu njila ya profete Yeshaya egi, gula aleba muila mbawaahana ngolo jia ‘guzuga gifua njila ya khuyi.’ (Tanga Yeshaya 40:31.) Enya Isalele akhalele mumona luholo njila ya khuyi yakhalele mumagana mu muhehe matangua avula guphupha mahambu ndo. Yehowa wajiya guhana akombeledi enji ngolo gifua muana hana muene njila jiene! Gula wamona njila yakoma yamagana gosa matangua avula guphupha mahambu ndo, wugunguluga egi, Yehowa nji wajiya guguhana ngolo gifua njila yene ha gukolesela mu malamba udi mutagana nawo.

8. Longo tshi Yobo wazudile tangua dialongugile muene ima yafugile Nzambi? Ndaga yene idi gutulongesa itshi?

⁸ Tudi naye gushila Yehowa mutshima. Yehowa wakuatesele Yobo ha gulandula gumushila mutshima. (Yobo 32:2; 40:6-8) Tangua diakhalele muene muta maga nu Yobo wazuelele ima yavula yafugile muene gifua themua, matuta nu miandu. Yehowa wazuelele nji ndaga jiatadila shitu gifua ngombe nu phunda. (Yobo 38:32-35; 39:9, 19, 20) Ndaga eji jiagasue jiana monesa ngolo jia Nzambi, nu guzumba guenji nu ndunge jienji jiavula. Maga ene akuatesele Yobo ha gushila Yehowa mutshima muavula diago. (Yobo 42:1-6) Luholo lumoshi nji, tangua tuana longuga ima yafugile Yehowa tuana mona egi udi diago watema, udi nu ngolo jiavula gutubalega. Ndaga yene idi mumonesa egi udi nu ngolo jia gumanesele malamba agasue tudi mutagana nawo. Mbawuyikalagala diago. Gujiya ndaga eji guajiya diago gutukuatesa ha gulandula gumushila mutshima.

9-10. Muanya nu mvula yana gutulongesa itshi mukunda nu makalegelo a Yehowa?

⁹ Yesu wakhalele mujiya ima yavula yafugile Nzambi. Luholo Yesu wakhalele “gaphita ga mudimo,” wakhalele nu luendu lua gutshita mudimo hamoshi nu Sh’enji ha gufuga ima yagasue. (Ish. 8:30) Gungima, tangua diakhalele muene ha mavu wahanele ifezegeselo ya ima yafugile Nzambi ha gulongesa alandudi enji ndaga jiatadile Sh’enji. Tuzuelelenu malongo Yesu walongesele alandudi enji.

¹⁰ Yehowa wana monesela athu agasue guzumba. Tangua Yesu wakhalele mutshita diskur dienji holu dia mulundu, wazuelele ima mbadi yafugile Yehowa. Athu avula anago guzula tangua dia gutangigiza mukunda nu ima yene. Ima yene idi muanya nu mvula. Muanya nu mvula yana gutukuatesa ha gukhala nu monyo. Yehowa wakhalele naye gutuna guzola muanya nga gunogesa mvula gudi athu agasue anago gumukombelela. Uvi wana monesela athu agasue guzumba luholo luana zola muene muanya nu gunogesa mvula gudi athu agasue. (Mat. 5:43-45) Yesu wahanele gifezegeselo giene ha gulongesa alandudi enji egi Yehowa udi mutshigina egi tumonesele athu agasue guzumba. Tuajiya gutangiza luholo Yehowa wana monesela athu agasue guzumba, tangua tudi mutala gubonga gua tangua ha diana shuga diene nu tangua tudi musuanguluga nu muhehe wabonga hadi munoga mvula. Gifesegeselo gia Yehowa giajiya gututuma ha gulongesa athu agasue lukuma luabonga ha guamonesa egi, tuana guazumba.

11. Luholo lutshi tuajiya guheta gikhesa tangua tudi mutala tunjila tua gosa?

¹¹ Yehowa wana gutuhana ima tudi nayo funu ha gukhala nu monyo. Hakhalele Yesu mutshita diskur dienji holu dia mulundu, wazuelele egi: “Talenu muabonga tunjila tua gosa; tuanago gukuna, tuanago gukatula mbuto nga gujibungisa mu mikala. Uvi  Sh’enu wa mu dilu wana gutudisa.” Idi naye gukhala egi athu akhalele mutegelela diskur dia Yesu akhalele mutala luholo tunjila tuakhalele mubalega gosa, tangua Yesu waahudile egi: “Enue mushigo nu ndando yavula gubalega tunjila ba?” (Mat. 6:26) Ndaga eyi idi gutukuatesa ha gujiya egi Yehowa mbawutuhana ima yagasue tudi nayo funu ha gukhala nu monyo! (Mat. 6:31, 32) Gifezegeselo giahanele Yesu gidi mukuatesa athu ana gukombelela Yehowa nu mutshima umoshi ha gukhala nu gikhesa. Muvuala mumoshi wa mukhetu udi muvundji wa njila gu Espagne walebele muila handaga gakhalelego nu fundo diabonga dia gukhala. Uvi wahetele gikhesa hamonele muene tunjila mudia mbuto nu mabundu. Udi muzuela egi: “Ndaga yene yanguwunguluishile egi luholo Yehowa wana tagenesa nzala ya tunjila mbawunguhana nji ima ngudi nayo funu.” Gungima, phangi muene wa mukhetu wahetele fundo dia gukhala.

12. Ndaga jidi muzuela Matayo 10:29-31 mukunda nu mbodio jidi gutulongesa itshi mukunda nu Yehowa?

¹² Yehowa wana zula muthu wagasue mukatshi dietu nu ndando. Gutuama dia gutuma apostolo enji ha guya mulongesa, Yesu waakuatesele hagula avuigo woma wa athu mbaatuna gutegelela lukuma luabonga. (Tanga Matayo 10:29-31.) Ha guakuatesa ha gukotelesa muabonga ndaga yene, waahanele gifezegeselo gia mbodio tunjila tuakhalele mujiyiwa muavula gu Isalele. Hakhalele Yesu ha mavu mbodio jiakhalelego nu ndando yavula. Uvi Yesu wawambelele alandudi eji egi: “Gula imoshi mukatshi diawo yabua hashi sh’enu wana gujiya.” Waawambelele luko egi: “Mudi nu ndando yavula gubalega mbodio jiavula.” Yesu wakuatesele alandudi enji ha gujiya egi Yehowa wana zula muthu wagasue mukatshi diawo nu ndando yavula. Akhalelego naye guvua woma gula atagana nu usageshi. Idi mumonega egi alandudi a Yesu akhalele muwunguluga ndaga jiazuelele Yesu tangua akhalele mumona mbodio hakhalele ene mulongesa mu membo akoma nu azonda. Aye nji gula wamona ganjila, jiya egi Yehowa wana guguzula nu ndando yavula, handaga ‘udi nu ndando yavula gubalega mbodio jiavula’. Uvuigo woma gula watagana nu usagesegeshi, handaga Yehowa mbawugukuatesa.​—Ngi. 118:6.

13. Itshi yajiya gutukuatesa ha gulonguga ima yafugile Nzambi?

¹³ Luholo lutshi ima yafugile Yehowa yajiya gutukuatesa ha gujiya ndaga jiavula jidi gumutadila. Thomo, tudi naye guzula tangua dia gutala ima yene yafugile Nzambi. Gungima, tudi naye gutangiza ndaga ima yene idi gutulongesa mukunda nu Yehowa. Yana khalago yaleba tangua diagasue ha gukalagala ndaga eji. Phangi wa mukhetu Géraldine, wana khala gu Cameroun udi muzuela egi: “Ngakudile mu ville yakoma. Ngakotelesele egi ngudi naye gutshita ngolo ha gumona ima yafugile Nzambi.” Phangi Alfonso udi mukulu, udi muzuela egi: “Ngakotelesele egi ngudi naye guzula tangua dia gukhala hakhami ha gutala ima yafugile Nzambi nu gutangigiza ndaga ima yene idi gungulongesa mukunda nu muene.”

14. Malongo tshi Davidi wazudile hakhalele muene mutangiza ima yafugile Nzambi?

¹⁴ Tangua Davidi wakhalele mutala ima yafugile  Nzambi, wakhalele mutangiza muavula. Wawambelele Yehowa egi: ‘Tangua ngudi mutala dilu midimo ya mago aye nu mbeji nu themua walondele, muthu udi nanyi hagula ulandule gumutangiza?’ (Ngi. 8:3, 4) Tangua Davidi wakhalele mutala gosa mu phipha wakhalele musuanguluga nu ima ya gushimana yafugile Nzambi. Wakhalele nji mutangigiza ndaga themua jiajiya gumulongesa mukunda nu Nzambi. Wakotelesele egi Yehowa udi diago Nzambi wakoma. Matangua ako, Davidi wakhalele mutangigiza luholo muila wenji wakhalele gudilonda hakhalele muene mu vumo dia gin’enji. Tangua Davidi wakhalele mutangiza luholo muila wenji walondewe mu luholo lua gushimana, yamutumile ha guhana Yehowa mersi avula mukunda nu ndunge jienji.​—Ngi. 139:14-17.

15. Hana ifezegeselo idi mumonesa luholo tuajiya gumona makalegelo a Yehowa mu ima yafugile muene. (Ngimbo 148:7-10)

¹⁵ Esue nji tushigo nu funu ya guya gualeha ha gumona ima yafugile Nzambi nu ha gutangiza mukunda nu ima yene. Gula watala fundo wana khala wajiya gumona ima yavula yajiya gugukuatesa ha gumona makalegelo a Yehowa. Ha gufezegesa, gula wavua gubala gua muanya gu muila yajiya gugukuatesa ha gujiya egi Yehowa wakhala nu ngolo jiavula. (Yel. 31:35) Gula wamona ganjila mutunga kianzu yajiya gugukuatesa ha gumona ndunge jia Yehowa. Gula wamona gambua mukena nu mukila wago, yajiya gugukuatesa ha gukotelesa egi Yehowa wakhala nji nu ilelesa. Wajiya guhana Yehowa mersi mukunda nu guzumba guenji tangua udi mumona mama mumoshi mukena nu mun’enji wa gitebe. Tudi nu ba okazio avula a gulonguga ndaga jiatadila Yehowa, handaga ima yagasue yafugile muene yana gumutumbuisa.​—Tanga Ngimbo 148:7-10.

16. Itshi mukut’etu agasue tudi naye gutshita?

¹⁶ Nzambi wetu wakhala nu ndunge nu guzumba nu ngolo. Ima yagasue yafugile muene yakhala yabonga diago. Tuajiya gulonguga ndaga jiavula jiatadila makalegelo awa a Nzambi nu makalegelo enji ako avula gula tudi mutala ima yafugile muene. Mukut’etu agasue tuzulenu tangua dia gutala ima yafugile Nzambi nu gutangiza ndaga ima yene idi gutulongesa mukunda nu Yehowa. Gula tuatshita ngenyi mbayitukuatesa ha gukuata ufuta wakola nu Mufugi wetu. (Yak. 4:8) Mu longo dialandula mbatumona luholo mvuaji jiajiya gukalegela ima yafugile Yehowa ha gukuatesa an’awo ha gusuena hehi n’enji.