1. Wat nao wanfala samting wea helpem Job for savve gud lo Jehovah?

 LO FULL laef blo Job, hem story witim staka pipol, bat wantaem hem garem spesol chance for story witim Jehovah God. Jehovah storyim samfala nambawan samting lo creation. Hem duim datwan for strongim wei wea Job trustim hao Hem wise and savve lukaftarem pipol blo Hem. For example, Jehovah remindim Job hao hem savve provaed for olketa animal, so hem savve lukaftarem Job tu. (Job 38:39-41; 39:1, 5, 13-16, SIPB) Taem Job ting raonem olketa samting hia, hem lane abaotem olketa wei blo God.

2. Why nao maet iumi faendem hem hard for spendem taem for lukluk lo creation?

² Iumi tu savve gohed lane abaotem God taem iumi lukluk lo creation blo hem. Bat samfala taem maet iumi faendem hem hard for duim datwan. If iumi stap lo wanfala big city, maet evriday iumi no lukim staka creation blo Jehovah. And nomata iumi stap lo rural area, maet iumi no garem taem for lukluk lo creation. So bae iumi storyim why hem gud for spendem taem and traem best for duim datwan. Bae iumi storyim hao Jehovah and Jesus iusim creation for teachim iumi, and wanem iumi savve duim for lane from creation.

3. Wat nao showim Jehovah laekem Adam for enjoyim creation?

³ Jehovah laekem first man, Adam, for enjoyim creation blo Hem. So God wakem hem and putim hem  insaed wanfala beautiful paradaes and givim hem waka for lukaftarem and expandim paradaes hia. (Gen. 2:8, 9, 15) Adam mas hapi tumas taem hem watchim olketa seed grow and flaoa open. Hem spesol samting for Adam lukaftarem garden blo Eden! Jehovah talem Adam tu for nemim olketa animal. (Gen. 2:19, 20) Hem isi nomoa for Jehovah chusim nem for olketa animal, bat hem givim waka hia for Adam. Bifor Adam chusim nem for each animal, hem mas studyim gud wei and lukluk blo olketa animal hia. Adam mas barava enjoyim datwan. Iumi sure datwan helpem hem for luksavve lo wisdom blo Jehovah and hao creation blo Hem interesting and barava luk naes.

4. (a) Wat nao wanfala reason why iumi shud lukluk lo creation? (b) Wat nao samfala samting lo creation wea iu laekem tumas?

⁴ Wanfala reason why iumi shud lukluk lo creation hem bikos Jehovah laekem iumi for duim datwan. Hem sei lo iumi: “Iufala luk go ap lo skae and lukim.” Then hem ask olsem: “Hu nao creatim evri samting hia?” Ansa hem klia. (Isa. 40:26) Jehovah wakem evri samting lo skae and lo earth and lo sea tu, wea savve teachim iumi abaotem hem. (Sams 104:24, 25, SIPB) And tingim hao God wakem iumi. Hem wakem iumi for enjoyim creation wea luk naes tumas. And tu, hem givim iumi faevfala sense, olsem for lukim, herem, tasim, teistim, and smelem samting mekem iumi savve enjoyim olketa difren samting wea hem wakem.

5. Olsem Rome 1:20 storyim, hao nao wei for studyim creation blo Jehovah savve helpem iumi?

⁵ Bible storyim nara important reason why iumi shud lukluk lo creation. Hem teachim iumi abaotem olketa wei blo Jehovah. (Readim Rome 1:20.) For example, tingim olketa design blo creation wea spesol tumas. Olketa design hia teachim iumi abaotem wisdom blo God. Tingim tu olketa difren kaen kaikai wea iumi savve enjoyim. Datwan showimaot hao Jehovah lovem iumi tumas. Taem iumi luksavve lo olketa wei blo Jehovah from creation, iumi bae savve gud lo hem and laek for fren gud witim hem. Distaem bae iumi storyim samfala wei wea Jehovah iusim creation for teachim iumi.

6. Wanem nao iumi lanem from olketa bird wea savve migrate?

⁶ Jehovah markem taem for olketa samting happen. Olsem example, evri year between  February and midol lo May olketa Israelite savve lukim olketa bird wea nem blo hem stork savve migrate go lo north. God sei lo olketa Israelite: “Stork bird lo skae savve lo season blo hem.” (Jer. 8:7) Olsem Jehovah markem taem for olketa bird hia for migrate, hem markem tu taem for karem aot olketa judgment blo hem. Taem iumi lukim olketa bird migrate distaem, datwan mekem iumi sure hao Jehovah markem finis taem for finisim disfala nogud world.​—Habakuk 2:3, SIPB.

7. Wat nao iumi savve lanem taem iumi lukluk lo hao wanfala bird hem flae? (Isaiah 40:31)

⁷ Jehovah strongim pipol blo hem. Jehovah iusim Isaiah for promisim hao taem pipol blo Hem wikdaon or discourage, Hem bae strongim olketa for “flae hae lo olketa wing, olsem olketa eagle.” (Readim Isaiah 40:31.) Olketa Israelite getius for lukim olketa eagle flae go ap hae lo skae from warm air liftim olketa. So olsem Jehovah givim strong lo olketa bird hia, hem bae strongim iumi tu! Taem iumi lukim hao hem isi nomoa for wanfala maeti bird flae go ap hae lo skae, tingim, Jehovah savve strongim iumi for deal witim eni problem wea iumi feisim.

8. Wat nao Job lanem taem hem ting raonem creation blo God, and wat nao iumi savve lanem from datwan?

⁸ Iumi fit for trustim Jehovah. Jehovah helpem Job for barava trustim hem. (Job 32:2; 40:6-8, SIPB) God storyim lo Job staka samting lo creation, olsem olketa star, cloud, and laetning. Jehovah storyim tu olketa animal, olsem wild buluka and horse. (Job 38:32-35; 39:9, 19, 20, SIPB) Evri samting hia helpem iumi for luksavve lo bigfala paoa, love, and wisdom blo God. Datfala story hem strongim go moa trust blo Job lo Jehovah. (Job 42:1-6, SIPB) Lo sem wei, taem iumi studyim creation bae iumi luksavve Jehovah hem barava wise and garem bigfala paoa winim iumi. Hem savve finisim tu eni hard taem wea iumi feisim and bae hem duim datwan. Taem iumi luksavve lo diswan, bae iumi barava trustim Jehovah.

9-10. Wat nao sun and rain teachim iumi abaotem Jehovah?

⁹ Jesus savve tumas abaotem creation. From hem “nambawan wakaman,” hem garem privilege for helpem Dadi blo hem for creatim universe. (Prov. 8:30) Taem Jesus stap lo earth, hem iusim creation for teachim olketa disaepol blo hem abaotem Jehovah. Tingim samfala example wea hem iusim.

¹⁰ Jehovah showimaot love lo evriwan. Lo Sermon lo Maunten, Jesus storyim sun and rain lo olketa disaepol, wea staka taem pipol no savve ting abaotem. Bat iumi barava needim tufala samting hia for stap laef. Jehovah savve stopem olketa samting hia from pipol wea no worshipim hem, bat hem willing for provaedem datwan for evriwan. (Matt. 5:43-45) Jesus storyim datwan for helpem olketa disaepol for luksavve hao Jehovah laekem iumi for showim love lo evriwan. Taem iumi enjoyim naes sunset or rain wea mekem iumi feel gud, iumi savve tingim hao Jehovah lovem evriwan. Olsem Jehovah, iumi savve showimaot semkaen love taem iumi preach lo evriwan.

11. Hao nao wei for lukluk lo olketa bird savve encouragem iumi?

¹¹ Jehovah provaedem samting iumi needim. Lo datfala sermon Jesus sei tu: “Lukluk gud long olketa bird. Olketa  no wakem garden and harvestim kaikai. Olketa no keepim kaikai long eni foodsafe tu. Nomata olsem, Dadi bilong iufala long heven feedim olketa.” Maet olketa wea lisin lo Jesus savve lukim olketa bird flae go pas taem Jesus sei: “Iufala important winim olketa bird!” (Matt. 6:26) Disfala naes example mekem iumi barava sure hao Jehovah bae provaedem wanem iumi needim! (Matt. 6:31, 32) Wanem iumi lanem from disfala story encouragem olketa faithful brata and sista distaem tu. Wanfala young pioneer sista lo Spain barava discourage bikos hem no savve faendem eni ples for stap. Bat bihaen hem watchim olketa bird kaikaim olketa seed and berry frut, hem no wari nao. Hem sei: “Olketa bird hia remindim mi hao Jehovah lukaftarem olketa, so hem bae lukaftarem mi tu.” No longtaem bihaen, hem faendem ples for stap.

12. Olsem Matthew 10:29-31 storyim, wat nao iumi lanem abaotem Jehovah from olketa sparrow?

¹² Jehovah tingim each wan lo iumi. Taem Jesus redi for sendem olketa aposol for go preach, hem helpem olketa for no fraetem persecution. (Readim Matthew 10:29-31.) Hem iusim example blo olketa sparrow, wea hem bird wea stap evriwea lo Israel. Lo datfala taem value blo olketa bird hia hem smol tumas. Nomata olsem, Jesus sei lo olketa disaepol: “Dadi bilong iufala hem savve taem wanfala smol bird olsem hem dae.” Then hem sei: “Iufala barava important winim evri smol bird hia.” Jesus showimaot lo olketa disaepol hao Jehovah tingim each wan lo olketa, so olketa no need for fraetem persecution. Masbi taem olketa disaepol go preach lo olketa taon and vilij and lukim olketa sparrow, olketa evritaem tingim toktok blo Jesus. If enitaem iu lukim eni smol bird, remember hao Jehovah tingim iu bikos iu “barava important winim evri smol bird.” Jehovah bae helpem iu for no fraet taem iu feisim persecution.​—Sams 118:6, SIPB.

13. Wat nao iumi savve duim for gohed lane abaotem Jehovah from creation?

¹³ Iumi savve lanem staka nara samting abaotem Jehovah from creation. Hao nao iumi savve duim datwan? First samting, iumi need for spendem taem for lukluk lo creation. Then, iumi need for ting raonem wanem datwan teachim iumi abaotem Jehovah. Samfala taem maet hem no isi for duim datwan. Géraldine, wanfala sista from Cameroon sei: “Mi growap lo big city, so mi need for lukaotem chance for lukluk lo creation.” Wanfala elder, nem blo hem Alfonso sei: “Mi luksavve mi need for markem taem for stap seleva for lukluk lo creation blo Jehovah and ting raonem hao datwan teachim mi abaotem hem.”

14. Taem David ting raonem creation blo God, wat nao hem lanem?

 ¹⁴ David barava ting raonem creation blo God. Hem sei lo Jehovah: “Taem mi lukap go long skae wea yu bin mekem, an mi lukim mun an olketa sta . . . mi save tingting olsem, ‘Mifala pipol i samting nating nomoa ya. . . . Fo wanem nomoa yu lukaftarem gudfala long mifala?’” (Sams 8:3, 4, SIPB) Taem David luk ap lo skae lo naet, hem no just enjoy for lukluk lo olketa star, bat hem ting raonem tu wanem olketa star teachim hem abaotem God. Hem luksavve Jehovah barava nambawan. David ting raonem tu hao hem grow insaed bele blo mami blo hem. Taem hem ting raonem nambawan wei wea Jehovah wakem hem, David tinghae go moa lo wisdom blo Jehovah.​—Sams 139:14-17, SIPB.

15. Storyim samfala creation wea iu lukim wea teachim iu abaotem olketa wei blo Jehovah. (Sams 148:7-10, SIPB)

¹⁵ Olsem David, for ting raonem creation iu savve lukluk lo olketa samting wea stap raonem iu. If iu luk raon, bae iu lukim staka samting wea savve teachim iu abaotem olketa wei blo Jehovah. For example, taem iu feelim hot blo sun, iu lane abaotem bigfala paoa blo Jehovah. (Jer. 31:35) If iu lukim bird wakem nest, datwan mekem iu tinghae lo wisdom blo God. Taem iu lukim smol puppy plei and luk fani tumas, iu luksavve hao Jehovah laekem iumi for hapi and enjoyim laef. And love blo Jehovah showaot tu taem iu lukim mami plei witim baby blo hem. So iumi garem staka chance for lane abaotem Jehovah bikos evri creation nomata hem big or smol, hem klosap or farawe, evriwan praise hem.​—Readim Sams 148:7-10, SIPB.

16. Wat nao iumi shud disaed strong for duim?

¹⁶ God garem bigfala savve and paoa, hem lovem iumi, and evri creation blo hem luk naes tumas. If iumi lukluk lo creation bae iumi savve lane abaotem olketa wei hia and staka nara wei blo hem tu. Hem bae barava gud if iumi evriwan markem taem for enjoy for lukluk lo creation and ting raonem wanem hem teachim iumi abaotem Jehovah. Taem iumi duim datwan, bae iumi fren gud witim Creator blo iumi. (Jas. 4:8) Lo next article, bae iumi lukim hao parents savve iusim creation for helpem pikinini for fren gud witim Jehovah.