مطالعے دا مضمون نمبر 12
یہوواہ دِیاں بنائیاں ہوئیاں چیزاں توں اوہدے بارے ہور سکھو
جدوں توں دُنیا بنائی گئی اے اوہدوں توں خدا دِیاں صفتاں اوہدیاں بنائیاں ہوئیاں چیزاں توں صاف صاف نظر آندیاں نیں۔—رومیوں 1:20۔
گیت نمبر 6: خلقت ودھاؤندی یہوواہ دی شان
مضمون تے اِک نظر a
1. اوہ کیہڑا طریقہ اے جدے ذریعے ایوب یہوواہ نُوں چنگی طرحاں جان سکیا؟
ایوب نے اپنی زندگی چ بوہت سارے لوکاں نال گل بات کیتی سی۔ پر جیہڑی گل بات اوہنے یہوواہ نال کیتی سی، اوہ سب توں خاص سی۔ ایس گل بات دے دوران یہوواہ نے ایوب نُوں کہیا کہ اوہ اوہدیاں بنائیاں ہوئیاں چیزاں وچوں کجھ تے غور کرے۔ اِنج کرن نال ایوب ویکھ سکیا کہ یہوواہ کِنّاں حکمت والا اے تے اوہدے چ اپنے بندیاں دی ہر ضرورت نُوں پورا کرن دی طاقت اے۔ مثال لئی، یہوواہ نے ایوب نُوں یاد دَوایا کہ جے اوہ جانوراں دِیاں ضرورتاں نُوں پورا کر سکدا اے تے اوہ اوہدیاں ضرورتاں نُوں وی پورا کر سکدا اے۔ (ایوب 38:39-41؛ 39:1، 5، 13-16) یہوواہ دِیاں بنائیاں ہوئیاں چیزاں تے غور کرن نال ایوب نے اوہدیاں خوبیاں بارے بوہت کجھ سکھیا۔
2. یہوواہ دِیاں بنائیاں ہوئیاں چیزاں تے غور کرنا مشکل کیوں ہو سکدا اے؟
2 یہوواہ دِیاں بنائیاں ہوئیاں چیزاں تے غور کرن نال اَسی اوہدے بارے بوہت کجھ سکھ سکنے آں۔ پر اِنج کرنا ہمیشاں اسان نئیں ہوندا۔ جے اَسی شہر چ رہنے آں تے شاید سانوں ہر روز یہوواہ دِیاں بنائیاں ہوئیاں چیزاں نُوں ویکھن دا موقع نہ ملے۔ تے جے اَسی کسے پِنڈ چ رہنے آں تے فیر وی ہو سکدا اے کہ ایہدے لئی سانوں وقت کڈھنا مشکل لگے۔ ایس لئی آؤ ویکھئے کہ جے اَسی یہوواہ دِیاں بنائیاں ہوئیاں چیزاں تے غور کرن لئی وقت کڈھاں گے تے سانوں کیہہ فائدہ ہوئے گا۔ اَسی ایہہ وی ویکھاں گے کہ ایہناں دے ذریعے سانوں یہوواہ تے یسوع بارے کیہہ پتہ چلدا اے۔ نالے اَسی کیہہ کر سکنے آں تاکہ اَسی ایہناں چیزاں توں اوہدے بارے ہور سکھدے رہیے۔
سانوں یہوواہ دِیاں بنائیاں ہوئیاں چیزاں تے غور کیوں کرنا چاہی دا اے؟
یہوواہ چاہندا سی کہ آدم اوہدیاں بنائیاں ہوئیاں چیزاں توں خوشی حاصل کرے تے جانوراں دے ناں رکھے۔ (پیراگراف نمبر 3 نُوں ویکھو۔)
3. ایہہ کیویں پتہ چلدا اے کہ یہوواہ چاہندا سی کہ آدم اوہدیاں بنائیاں ہوئیاں چیزاں توں خوشی حاصل کرے؟
3 یہوواہ چاہندا سی کہ آدم اوہدیاں بنائیاں ہوئیاں چیزاں توں خوشی حاصل کرے۔ خدا نے آدم نُوں بنا کے اِک سوہنے باغ چ رکھیا تے اوہنوں کہیا کہ اوہ ایہدی دیکھبھال کرے تے پوری زمین نُوں ایس سوہنے باغ وانگوں بنا دَوے۔ (پیدایش 2:8، 9، 15) ذرا سوچو کہ جدوں آدم نے کسے بیہہ نُوں ودھدے تے کلیاں نُوں پُھل بن دے ویکھیا ہوئے گا تے اوہنوں کِنّی خوشی ہوئی ہوئے گی۔ خدا دے بنائے اوس باغ دی دیکھبھال کرنا اوہدے لئی بڑا وڈا اعزاز سی۔ یہوواہ نے آدم نُوں جانوراں دے ناں رکھن لئی وی کہیا۔ (پیدایش 2:19، 20) خدا ہر جانور دا ناں آپ وی رکھ سکدا سی پر اوہنے ایہہ کم آدم نُوں دِتا۔ یقیناً آدم نے جانوراں دے ناں رکھن توں پہلاں اوہناں دِیاں حرکتاں نُوں ویکھیا ہوئے گا نالے اوہناں دی شکلصورت تے وی غور کیتا ہوئے گا۔ ایہہ سارے کم کر کے اوہنوں بڑا مزہ آیا ہوئے گا۔ اِنج اوہنوں پتہ لگیا ہوئے گا کہ یہوواہ کِنّاں حکمت والا اے تے اوہدی بنائی ہوئی ہر چیز کِنّی سوہنی تے دلچسپ اے۔
4. (الف) یہوواہ دِیاں بنائیاں ہوئیاں چیزاں تے غور کرن دی اِک وجہ کیہہ اے؟ (ب) توانوں یہوواہ دِیاں بنائیاں ہوئیاں چیزاں وچوں سب توں چنگی چیز کیہڑی لگدی اے؟
4 یہوواہ دِیاں بنائیاں ہوئیاں چیزاں تے غور کرن دی اِک وجہ ایہہ وے کہ اوہ چاہندا اے کہ اَسی اِنج کریئے۔ یہوواہ نے سانوں کہیا اے کہ اَسی اپنیاں اَکھاں اُتے چُکیے تے ویکھئے کہ ایہناں ساریاں چیزاں دا خالق کون اے۔ ایس سوال دا جواب بالکل صاف اے۔ (یسعیاہ 40:26) یہوواہ نے اسمان، زمین تے سمندر چ بوہت ساریاں شاندار چیزاں بنائیاں نیں۔ اوہناں توں اَسی اوہدے بارے بوہت کجھ سکھ سکنے آں۔ (زبور 104:24، 25) ذرا سوچو کہ اوہنے سانوں کیس طرحاں بنایا اے۔ اوہنے سانوں ویکھن، چُھون، سُنن، چکھن تے سونگھن دی حس دِتی اے جنہاں دی وجہ توں اَسی اوہدیاں بنائیاں ہوئیاں چیزاں توں خوشی حاصل کر پانے آں۔
5. رومیوں 1:20 دے مطابق یہوواہ دِیاں بنائیاں ہوئیاں چیزاں تے غور کرن نال سانوں کیہہ فائدہ ہوندا اے؟
5 بائبل توں یہوواہ دِیاں بنائیاں ہوئیاں چیزاں تے غور کرن دی اِک ہور وجہ پتہ چلدی اے۔ اوہ ایہہ کہ اوہناں چیزاں توں یہوواہ دِیاں خوبیاں نظر آندیاں نیں۔ (رومیوں 1:20 نُوں پڑھو۔) مثال لئی، ذرا یہوواہ دِیاں بنائیاں ہوئیاں چیزاں دی بناوٹ تے غور کرو۔ ایہناں توں یہوواہ دی حکمت نظر آندی اے۔ نالے کھان پین دِیاں اوہناں چیزاں بارے سوچو جنہاں دا اَسی ہر روز مزہ لینے آں۔ ایہناں توں پتہ چلدا اے کہ یہوواہ سانوں کِنّاں پیار کردا اے۔ جدوں اَسی یہوواہ دِیاں بنائیاں ہوئیاں چیزاں چ اوہدیاں خوبیاں نُوں ویکھنے آں تے اَسی اوہنوں ہور چنگی طرحاں جان جانے آں۔ اِنج ساڈے دل چ اوہدے ہور نیڑے جان دی خواہش پیدا ہوندی اے۔
یہوواہ اپنیاں بنائیاں ہوئیاں چیزاں توں سانوں اپنے بارے سکھاندا اے
6. پرندیاں دے اِک خاص موسم چ سفر کرن توں اَسی یہوواہ بارے کیہہ سکھنے آں؟
6 یہوواہ ہر کم اپنے وقت تے کردا اے۔ بنیاِسرائیل نے ویکھیا ہوئے گا کہ کیویں ہر سال فروری دے آخر توں لے کے مئی دے درمیان تک بگلے شمال وَل سفر کردے نیں۔ یہوواہ نے بنیاِسرائیل نُوں دَسیا سی کہ بگلا اپنے اُڈن دے موسم نُوں جان دا اے۔ (یرمیاہ 8:7) جیویں یہوواہ نے ایہناں پرندیاں لئی اِک جگہ توں دُوجی جگہ جان دا اِک وقت طے کیتا ہویا اے، اونویں ای اوہنے عدالت کرن دا وی اِک وقت طے کیتا ہویا اے۔ اَج وی جدوں اَسی ایہو جہے پرندیاں نُوں ویکھنے آں جیہڑے اِک جگہ توں دُوجی جگہ سفر کردے نیں تے ساڈا ایس گل تے بھروسا ودھدا اے کہ یہوواہ اپنے طے کیتے ہوئے وقت تے ایس بھیڑی دُنیا نُوں ختم کرے گا۔—حبقوق 2:3۔
7. پرندیاں دے اُڈن دے طریقے نُوں ویکھ کے اَسی کیس گل تے بھروسا رکھ سکنے آں؟ (یسعیاہ 40:31)
7 یہوواہ اپنے بندیاں نُوں طاقت دیندا اے۔ یسعیاہ نبی دے ذریعے یہوواہ نے وعدہ کیتا کہ جدوں اوہدے بندے بوہت کمزور محسوس کرن گے یاں بےحوصلہ ہون گے تے اوہ اوہناں نُوں عقاباں وانگوں اُڈن دی طاقت دَوے گا۔ (یسعیاہ 40:31 نُوں پڑھو۔) بنیاِسرائیل اکثر عقاباں نُوں ویکھدے سن جیہڑے زیادہ محنت کیتیاں بغیر گرم ہوا دے سہارے اسمان تے اُڈ رہے ہوندے سن۔ اِنج اوہناں نُوں یاد رہندا سی کہ یہوواہ اپنے بندیاں نُوں وی ایہناں پرندیاں ورگی طاقت دے سکدا اے۔ جدوں تُسی کسے پرندے نُوں زیادہ محنت کیتیاں بغیر اسمان دِیاں اُنچائیاں تے اُڈدیاں ویکھو تے ایس گل نُوں یاد رکھو کہ جے یہوواہ ایس پرندے نُوں اینی طاقت دے سکدا اے تے اوہ توانوں وی طاقت دے سکدا اے تاکہ تُسی اپنیاں مشکلاں نال نبڑ سکو۔
8. یہوواہ دِیاں بنائیاں ہوئیاں چیزاں توں ایوب نے کیہہ سکھیا تے اَسی ایہناں توں کیہہ سکھ سکنے آں؟
8 اَسی یہوواہ تے بھروسا کر سکنے آں۔ یہوواہ نے ایوب دی مدد کیتی تاکہ اوہ اوہدے اُتے اپنا بھروسا ودھا سکے۔ (ایوب 32:2؛ 40:6-8) ایوب نال گل کردے ویلے یہوواہ نے اپنیاں بنائیاں ہوئیاں بوہت ساریاں چیزاں دا ذکر کیتا۔ اوہنے ستاریاں، بدّلاں تے بجلی دا ذکر کیتا۔ ایہدے علاوہ یہوواہ نے کئی جانوراں دا وی ذکر کیتا جیویں کہ جنگلی سنڈا تے گھوڑا۔ (ایوب 38:32-35؛ 39:9، 19، 20) ایہناں ساریاں چیزاں تے غور کرن نال سانوں نہ صرف یہوواہ دی طاقت نظر آندی اے سگوں اوہدی حکمت تے اوہدا پیار وی نظر آندا اے۔ ایس گل بات توں بعد ایوب دا یہوواہ تے بھروسا ودھ گیا۔ (ایوب 42:1-6) ایسے طرحاں جدوں اَسی وی یہوواہ دِیاں بنائیاں ہوئیاں چیزاں تے غور کرنے آں تے اَسی سمجھ جانے آں کہ یہوواہ چ ساڈے نالوں کِتے زیادہ حکمت تے طاقت اے۔ اوہدے چ اینی طاقت اے کہ اوہ ساڈی ہر مشکل نُوں ختم کر سکدا اے تے اوہ اِنج کرے گا وی۔ ایس وجہ توں یہوواہ تے ساڈا بھروسا ہور ودھ جاندا اے۔
یسوع نے یہوواہ دِیاں بنائیاں ہوئیاں چیزاں توں اوہدے بارے سکھایا
9، 10. سورج تے بارش توں سانوں یہوواہ بارے کیہہ پتہ چلدا اے؟
9 یسوع، یہوواہ دِیاں بنائیاں ہوئیاں چیزاں بارے بوہت کجھ جان دا سی۔ اوہنوں ایہہ اعزاز ملیا سی کہ اوہ ماہر کاریگر دے طور تے ایس پوری کائنات نُوں بنان چ اپنے باپ دا ساتھ دَوے۔ (امثال 8:30) بعد چ جدوں یسوع زمین تے سی تے اوہنے یہوواہ دِیاں بنائیاں ہوئیاں چیزاں دے ذریعے اپنے شاگرداں نُوں اوہدے بارے سکھایا۔ آؤ، یسوع دِیاں سکھائیاں کجھ گلاں تے غور کریئے۔
10 یہوواہ سب انساناں نال پیار کردا اے۔ پہاڑ تے تقریر کردے ویلے یسوع نے اپنے شاگرداں نال سورج تے مینہ بارے گل کیتی۔ ایہناں چیزاں تے شاید لوک ایناں غور نئیں کردے۔ پر ایہہ دونویں چیزاں زندہ رہن لئی بوہت ضروری نیں۔ جے یہوواہ چاہندا تے اوہناں لوکاں نُوں ایہہ چیزاں نہ دیندا جیہڑے اوہدی عبادت نئیں کردے۔ پر اوہ ساریاں تے سورج چمکاندا اے تے ساریاں تے مینہ ورساندا اے۔ (متی 5:43-45) ایس گل دے ذریعے یسوع نے اپنے شاگرداں نُوں سمجھایا کہ یہوواہ چاہندا اے کہ اَسی وی سارے انساناں نال محبت کریئے۔ جدوں وی اَسی سورج ڈُبن دے زبردست نظارے نُوں ویکھنے آں یاں بارش دا مزہ لینے آں تے سانوں سوچنا چاہی دا اے کہ یہوواہ ہر انسان نال کِنّاں پیار کردا اے۔ اِنج کرن نال ساڈے دل چ ایہہ خواہش پیدا ہوئے گی کہ اَسی یہوواہ دی مثال تے عمل کردیاں ہوئیاں ہر طرحاں دے لوکاں نُوں مُنادی کریئے۔
11. پرندیاں نُوں ویکھ کے سانوں کیہہ حوصلہ مِلدا اے؟
11 یہوواہ اپنے بندیاں نُوں ہر اوہ چیز دیندا اے جیہڑی زندہ رہن لئی ضروری اے۔ پہاڑ تے تقریر کردے ویلے یسوع نے ایہہ وی کہیا: ”ذرا اسمان تے اُڈن والے پرندیاں تے غور کرو۔ اوہ نہ تے بیہہ بوندے نیں، نہ واڈھی کردے نیں تے نہ ای گوداماں چ جمع کردے نیں۔ پر فیر وی تواڈا اسمانی باپ اوہناں نُوں کھانا دیندا اے۔“ اوتھے بیٹھے لوکاں نُوں شاید اوس ویلے اسمان تے اُڈدے ہوئے پرندے نظر آ رہے ہون گے جدوں یسوع نے اوہناں نُوں پچھیا: ”کیہہ تُسی اوہناں نالوں بوہتے اہم نئیں او؟“ (متی 6:26) اِنج یسوع نے بڑے پیار نال ایس گل دا یقین دَوایا کہ یہوواہ ساڈا خیال رکھ سکدا اے۔ (متی 6:31، 32) اَج وی یہوواہ دے بندیاں نُوں اوہدیاں بنائیاں ہوئیاں چیزاں تے غور کر کے حوصلہ مِلدا اے۔ ذرا سپین چ رہن والی اِک پہلکار بھین دی مثال تے غور کرو۔ اوس بھین نُوں رہن لئی کوئی چنگی جگہ نئیں مِل رہی سی جدی وجہ توں اوہ بڑی پریشان سی۔ پر اِک واری جدوں اوہنے پرندیاں نُوں دانہ چگدیاں تے پھل کھاندیاں ویکھیا تے اوہنوں بڑا حوصلہ ملیا۔ اوہنے کہیا: ”اوہناں پرندیاں نُوں ویکھ کے فوراً میرے ذہن چ آیا کہ جے یہوواہ ایہناں دا خیال رکھ سکدا اے تے اوہ میرا خیال وی رکھے گا۔“ چھیتی ای اوس بھین نُوں رہن لئی اِک چنگی جگہ مِل گئی۔
12. متی 10:29-31 چ چڑیاں بارے جیہڑی گل دَسی گئی اے، اوہدے توں سانوں یہوواہ بارے کیہہ پتہ چلدا اے؟
12 یہوواہ ہر انسان دی قدر کردا اے۔ یسوع نے اپنے شاگرداں نُوں مُنادی تے گھلن توں پہلاں ایس گل دا یقین دَوایا کہ اوہناں نُوں اپنے دُشمناں توں ڈرن دی لوڑ نئیں اے۔ (متی 10:29-31 نُوں پڑھو۔) اِنج کرن لئی اوہنے اِسرائیل دے سب توں عام پرندے یعنی چڑی دی مثال دِتی۔ اوس زمانے چ چڑی دی قیمت بوہت گھٹ ہوندی سی۔ پر یسوع نے اپنے شاگرداں نُوں دَسیا: ”اِنج کدی نئیں ہو سکدا کہ اوہناں وچوں اِک چڑی زمین تے ڈِگے تے تواڈے اسمانی باپ نُوں پتہ نہ لگے۔“ فیر یسوع نے کہیا: ”تُسی تے بوہت ساریاں چڑیاں نالوں زیادہ قیمتی او۔“ ایس طرحاں یسوع مسیح نے اپنے شاگرداں نُوں یقین دَوایا کہ یہوواہ اوہناں وچوں ہر اِک دی قدر کردا اے۔ ایس لئی اوہناں نُوں اپنے دُشمناں توں ڈرن دی کوئی لوڑ نئیں سی۔ جدوں شاگرد شہراں تے پِنڈاں چ مُنادی کردے ویلے چڑیاں نُوں ویکھدے ہون گے تے اوہناں نُوں یسوع دی ایہہ گل یاد آندی ہوئے گی۔ جدوں وی تُسی کسے چھوٹے پرندے نُوں ویکھدے او تے ایس گل نُوں یاد رکھو کہ یہوواہ تواڈی بوہت قدر کردا اے کیونکہ تُسی ”بوہت ساریاں چڑیاں نالوں زیادہ قیمتی او۔“ اِنج تُسی بغیر ڈرے کسے وی دُشمن دا مقابلہ کر سکو گے۔—زبور 118:6۔
اَسی یہوواہ دِیاں بنائیاں ہوئیاں چیزاں توں اوہدے بارے ہور کیویں سکھ سکنے آں؟
13. اَسی یہوواہ دِیاں بنائیاں ہوئیاں چیزاں توں اوہدے بارے ہور سکھن لئی کیہہ کر سکنے آں؟
13 اَسی یہوواہ دِیاں بنائیاں ہوئیاں چیزاں توں اوہدے بارے ہور وی بوہت ساریاں گلاں سکھ سکنے آں۔ کیویں؟ سب توں پہلاں سانوں یہوواہ دِیاں بنائیاں ہوئیاں چیزاں تے غور کرن لئی وقت کڈھن دی لوڑ اے۔ ایہدے بعد سانوں سوچن دی لوڑ اے کہ اَسی ایہناں توں یہوواہ بارے کیہہ سکھنے آں۔ اِنج کرنا ہمیشاں اسان نئیں ہوندا۔ کیمرون چ رہن والی اِک بھین جدا ناں گیرلڈائین اے، کہندی اے: ”مَیں اِک شہر چ جمی پلی آں ایس لئی مینوں لگدا اے کہ یہوواہ دِیاں بنائیاں ہوئیاں چیزاں تے غور کرن لئی ہمیشاں کوشش کرنی پیندی اے۔“ بھرا الفونسو جیہڑا اِک کلیسیا چ بزرگ اے، کہندا اے: ”مَیں سمجھ گیا واں کہ مینوں پہلاں توں ای اپنے روز دے کماں وچوں اِک وقت طے کرن دی لوڑ اے جدے چ مَیں یہوواہ دِیاں بنائیاں ہوئیاں چیزاں تے غور کر سکاں تے سوچوچار کر سکاں کہ ایہناں توں مَیں یہوواہ بارے کیہہ سکھنا واں۔“
داؤد نے یہوواہ دِیاں بنائیاں ہوئیاں چیزاں تے غور کر کے اوہدے بارے سکھیا۔ (پیراگراف نمبر 14 نُوں ویکھو۔)
14. جدوں داؤد نے یہوواہ دِیاں بنائیاں ہوئیاں چیزاں تے سوچوچار کیتا تے اوہنے کیہہ سکھیا؟
14 داؤد یہوواہ دِیاں بنائیاں ہوئیاں چیزاں بارے بڑی گہرائی نال سوچوچار کردا سی۔ اوہنے یہوواہ نُوں کہیا: جدوں مَیں تیرے اسمان نُوں ویکھنا واں جیہڑا تیرے ہتھاں دی کاریگری اے تے چن تے ستاریاں نُوں ویکھنا واں جیہڑے تُوں بنائے نیں تے فیر انسان کیہہ اے کہ تُوں اوہنوں یاد رکھیں؟ (زبور 8:3، 4) جدوں داؤد نے ستاریاں نال بھرے اسمان نُوں ویکھیا تے اوہنے نہ صرف ایہنوں بنان والے دی تعریف کیتی سگوں ایس بارے وی سوچوچار کیتا کہ اوہ ایہناں ستاریاں توں یہوواہ بارے کیہہ سکھدا اے۔ اوہنے سکھیا کہ یہوواہ بوہت ای عظیم اے۔ ایہدے علاوہ داؤد نے ایس گل تے وی سوچوچار کیتا کہ جدوں اوہ اپنی ماں دے پیٹ چ سی تے اوہدا جسم کِنّے حیران کر دین والے طریقے نال بن رہیا سی۔ ایہناں گلاں تے سوچوچار کرن نال داؤد دے دل چ یہوواہ دی حکمت لئی قدر ہور وی ودھ گئی۔—زبور 139:14-17۔
15. کجھ مثالاں دے کے دَسو کہ یہوواہ دِیاں بنائیاں ہوئیاں چیزاں توں اوہدیاں خوبیاں کیویں نظر آندیاں نیں۔ (زبور 148:7-10)
15 یہوواہ دِیاں بنائیاں ہوئیاں چیزاں تے سوچوچار کرن لئی توانوں کِتے دُور جان دی لوڑ نئیں۔ داؤد وانگوں تُسی وی اپنے آلے دوالے موجود چیزاں تے غور کرن نال یہوواہ دِیاں خوبیاں بارے جان سکدے او۔ مثال لئی، جدوں تُسی سورج دی گرمی نُوں اپنی جلد تے محسوس کردے او تے یہوواہ دی طاقت بارے سوچو۔ (یرمیاہ 31:35) جدوں تُسی کسے پرندے نُوں اپنا آلنا بناندے ویکھدے او تے یہوواہ دی حکمت بارے سوچو۔ جدوں تُسی کسے کتے نُوں اپنی پوشل نال کھیڈدے ویکھدے او تے ذرا سوچو کہ یہوواہ نُوں ہاسامذاق وی پسند اے۔ تے جدوں تُسی اِک ماں نُوں اپنے چھوٹے بچے نال کھیڈدے ویکھدے او تے یہوواہ دی محبت لئی اوہدا شکریہ ادا کرو۔ ساڈے کول یہوواہ نُوں جانن دے بوہت سارے موقعے نیں کیونکہ اوہدی بنائی ہوئی ہر چیز اوہدی وڈیائی کردی اے۔ فیر بھانویں اوہ چھوٹی ہووے یاں وڈی یاں ساڈے نیڑے ہووے یاں بوہت دُور۔—زبور 148:7-10 نُوں پڑھو۔
16. سانوں کیہہ عزم کرنا چاہی دا اے؟
16 ساڈا خدا بڑا حکمت والا، شفیق تے طاقتور اے۔ اوہدیاں بنائیاں ہوئیاں چیزاں بوہت ای سوہنیاں نیں۔ جدوں اَسی اپنے آلے دوالے ایہناں چیزاں تے غور کرنے آں تے اَسی اوہدیاں خوبیاں نُوں صاف ویکھ سکنے آں۔ آؤ، اَسی عزم کریئے کہ اَسی باقاعدگی نال وقت کڈھ کے یہوواہ دِیاں بنائیاں ہوئیاں چیزاں تے غور کراں گے تے ویکھاں گے کہ ایہناں توں سانوں یہوواہ بارے کیہہ پتہ چلدا اے۔ اِنج کرن نال اَسی اپنے خالق دے ہور نیڑے ہو جاواں گے۔ (یعقوب 4:8) اگلے مضمون چ اَسی ویکھاں گے کہ ماں پیو یہوواہ دِیاں بنائیاں ہوئیاں چیزاں دے ذریعے اوہدے نیڑے جان چ اپنے بچیاں دی مدد کیویں کر سکدے نیں۔
گیت نمبر 5: خدا دے شاندار کم
a یہوواہ نے ہر چیز بڑے زبردست طریقے نال بنائی اے۔ سورج ورگی طاقتور چیز توں لے کے پُھلاں دِیاں نازک پتیاں تک، یہوواہ دی بنائی ہوئی ہر چیز سانوں حیران کر دیندی اے۔ ایہناں چیزاں تے غور کر کے سانوں اوہدے بارے بوہت کجھ پتہ چلدا اے۔ ایس مضمون چ اَسی سکھاں گے کہ سانوں یہوواہ دِیاں بنائیاں ہوئیاں چیزاں تے غور کرن لئی وقت کیوں کڈھنا چاہی دا اے تے اِنج کرن نال اَسی یہوواہ دے نیڑے کیویں جا سکنے آں۔
