1. Di kal manera ku Jo pasa kunsi Jeova minjor?

 JO TENE manga di kombersas ku utrus jintis na si vida, ma kombersa mas importanti ki tene i ku Jeova Deus. Nes kombersa, Jeova fala Jo pa i jubi alguns kusas bonitu ki kumpu. Es na juda Jo sibi kuma ku Jeova jiru, tambi i na aumenta konfiansa di Jo di kuma Jeova pudi da si servus tudu ke ke pirsisa del. Pur isemplu, Deus lembranta Jo di kuma i ta kuida di limarias, asin tambi i pudi kuida del. (Jo 38:39-41; 39:1, 5, 13-16) Oca ku Jo jubi manga di kusas ku Deus kumpu, i aprindi manga di kusas aserka di maneras di sedu di si Deus.

2. Pabia ki pudi sedu difisil jubi kusas ku Jeova kumpu?

² No pudi tambi aprindi manga di kusas aserka di no Deus, ora ku no na jubi diritu kusas ki kumpu. Ma utrora, i pudi sedu difisil pa no fasil. Si no mora na un sidadi, i pudi sedu ki i ka tudu ora ku no na oja kusas ku Jeova kumpu. Mesmu si no mora fora di sidadi, i pudi sedu ki no tene puku tempu pa jubi diritu kusas ku Jeova kumpu. Pa kila, no na jubi pabia ki bon toma tempu i fasi sforsu pa jubi diritu kusas ku Deus kumpu. No na bin jubi kuma ku Jeova ku Jesus usa kusas ku kumpudu pa nsinanu, i ke ku no pudi fasi pa aprindi mas di kusas ku kumpudu.

3. Ke ku ta mostra kuma Jeova misti pa Adon kontenti ku kusas ki kumpu?

³ Jeova misti pa purmeru pekaduris tene kontentamentu ku kusas ki kumpu. Oca Deus kumpu Adon, i dal un paraísu bonitu pa i vivi nel, tambi i dal un tarbaju di labra i aumenta paraísu. (Kum 2:8, 9, 15) Imaẑina kontentamentu di Adon oca ki oja simenteras na kirsi i floris na yabri. I seduba un privileẑiu garandi pa Adon kuida di jardin di Eden! Jeova tambi fala Adon pa i da nomi di diferentis limaria. (Kum 2:19, 20) Jeova pudiba kuji nomi di diferentis limaria, ma i da es tarbaju pa Adon. Sin duvida, antis di disidi kuma ki na coma kada limaria, Adon studa elis diritu, i jubi kuma ke sedu i kal ki se komportamentu. Adon dibi di kontenti di fasi es tarbaju. Sin duvida, kila judal ntindi kuma ku Jeova sedu jiru, tambi kuma ku kusas ki kumpu sedu interesanti i bonitu.

4. (a) Kal ki un di motivus ku pui no dibi di jubi diritu kusas ku Deus kumpu? (b) Kal kusas ku Deus kumpu ku mas ta dimirau?

⁴ Un di motivus ku pui no dibi di jubi diritu kusas ku Deus kumpu i pabia Jeova misti pa no fasil. I falanu sin: “Bo yalsa bo uju pa riba, bo jubi”. Dipus i puntanu: “Kin ku kumpu ki kusas”? Resposta des purgunta i klaru. (Isa 40:26) Jeova kumpu tudu kusas na seu, na Tera i na mar, i tudu e kusas ta nsinanu aserka del. (Sal 104:24, 25) Pensa so na kuma ku Deus kumpunu. I fasi pa no gosta di jubi kusas bonitu ki kumpu. I danu kapasidadi di oja, obi, toka, sinti gustu i cera, es orgons di sintidu ta judanu tene kontentamentu na diferentis kusas ku Jeova kumpu.

5. Di akordu ku Romanus 1:20, kuma ku no pudi benefisia di studa kusas ku Jeova kumpu?

⁵ Biblia kontanu utru motivu importanti ku pui no dibi di jubi kusas ku Deus kumpu. I ta nsinanu maneras di sedu di Jeova. (Lei Romanus 1:20.) Pur isemplu, jubi kusas ku Jeova kumpu, i kuma ke kumpudu bonitu. Sera ke ka ta mostra jiresa di Deus? Pensa na diferentis kumida ku no pudi kume. Es ta mostra di manera klaru di kuma Deus ama pekaduris. Ora ku no jubi maneras di sedu di Jeova na kusas ki kumpu, no ta kunsil minjor, i kila ta lebanu pertusi mas del. Gosi no jubi di kal manera ku Jeova usa kusas ki kumpu pa nsina pekaduris lisons importanti.

6. Kal lison ku no pudi aprindi ora ku no jubi diritu kacus ku ta imigra?

⁶ Jeova fiksa tempu pa kada kusa. Kada anu, entri fin di Fevereru ku metadi di Maiu, israelitas pudiba oja segoñas ku ta pasa na se tera pa bai pa norti. Deus fala israelitas: “Te segoña kunsi si tempu”. (Jer 8:7) Suma ku Jeova fiksa tempu pa es kacus, asin tambi ki fiksa tempu pa tisi si julgamentus. Aos, ora ku no oja es kacus na imigra, no ta lembrantadu ki no pudi konfia di kuma Jeova tene un “tempu markadu” pa kaba ku es mundu mau. — Aba 2:3.

7. Ke ku no pudi aprindi di manera ku kacu ta bua? (Isaias 40:31)

⁷ Jeova ta da si servus puder. Atraves di Isaias, Jeova purmiti si povu di kuma i na fortalisi elis pa e “subi ku asas suma agia” ora ke sta fraku o disanimadu. (Lei Isaias 40:31.) Israelitas kustuma oja agias ku ta bua riba sin fasi manga di sforsu. E ta fasil ora ke disa pa bentu ku ta subi, leba elis. Es ta lembrantanu di kuma, Jeova pudi danu puder suma ki da es kacus puder! Ora ku bu oja un kacu garandi na bua la riba na seu i na bati asas lentu, lembra di kuma Jeova pudi dau forsa pa lida ku bu purblemas.

8. Ke ku Jo aprindi oca ki jubi kusas ku Deus kumpu, i ke ku no pudi aprindi?

⁸ Jeova mersi no konfiansa. Jeova juda Jo pa i aumenta si konfiansa nel. (Jo 32:2; 40:6-8) Na kombersa ki tene ku Jo, Jeova mostra manga di kusas ki kumpu, suma strelas, nuvens ku raius. Jeova fala tambi aserka di limarias, suma turu brabu ku kabalu. (Jo 38:32-35; 39:9, 19, 20) Tudu es kusas ka ta mostra so puder garandi di Deus, ma tambi si amor ku si jiresa garandi. Pabia des kombersa, Jo aprindi konfia mas na Jeova. (Jo 42:1-6) Di mesmu manera, ora ku no studa kusas ku Deus kumpu, no ta lembrantadu di kuma Jeova mas jiru i mas tene puder di ki nos. I pudi, tambi i na bin kaba ku tudu no purblemas. Sibi es, pudi judanu aumenta no konfiansa nel.

9-10. Ke ku sol ku cuba ta nsinanu aserka di Jeova?

⁹ Jesus kunsi naturesa diritu. Suma ‘ajudanti’, Jesus tarbaja ku si Pape oca i na kumpu seu ku Tera. (Dit 8:30) Dipus, oca Jesus staba na Tera, i usa kusas ku Deus kumpu pa nsina si disipulus aserka di si Pape. No jubi alguns lisons ki nsina.

¹⁰ Jeova mostra si amor pa tudu jintis. Na nsinamentu na monti, Jesus coma atenson di si disipulus pa dus kusa ku Jeova kumpu ku manga di jintis ka ta pensa kuma e sedu spesial, ku sedu, sol ku cuba. Tudu es kusas i importanti pa no pudi kontinua vivi. Jeova pudiba nega da es kusas pa jintis ku ka ta sirbil. En ves di kila, ku amor i da tudu jintis sol ku cuba. (Mat 5:43-45) Jesus usa es lison pa nsina si disipulus kuma, Jeova misti pa no mostra amor pa tudu jintis. Ora ku no oja cuba na kai ku kaida di sol bonitu, no pudi pensa na amor di Jeova pa tudu jintis. Si isemplu pudi lebanu mostra mesmu amor, ora ku no na prega tudu jintis.

11. Kal nkoraẑamentu ku no pudi tene ora ku no jubi kacus di seu?

¹¹ Jeova ta danu kusas ku no pirsisa del pa vivi. Na mesmu nsinamentu na monti,  Jesus fala tambi: “Bo jubi pa kacus di seu; e ka ta sumia, e ka ta kebra, e ka ta junta na bemba, ma bo Pape ku sta na seu i ta alimenta elis.” Talves kilis ku staba na obi Jesus pudiba oja kacus ku na bua la riba oca i punta elis: “Nta abos bo ka mas bali di ki kacus?” (Mat 6:26) Ku amor, Jesus judanu oja di kuma Jeova na kuida di nos! (Mat 6:31, 32) Es lison ku no aprindi di kusas ku Deus kumpu kontinua nkoraẑa servus fiel di Jeova. Un irma joven ku sedu pioneru na Spaña, staba disanimadu pabia i ka konsigi oja bon kau di mora. Ma dipus di oja kacus na kume simenteras ku frutas, i sinti mas animadu. I fala sin: “Es kacus ta lembrantan di kuma Jeova ta kuida delis, tambi i na kuida di mi.” Puku tempu dipus, irma oja kau di mora.

12. Di akordu ku Mateus 10:29-31, ke ku jambas ta nsinanu aserka di Jeova?

¹² Jeova da balur pa kada un di nos. Antis di manda si disipulus pa prega, Jesus juda si disipulus pa e ka medi jintis ku na pirsigi elis. (Lei Mateus 10:29-31.) I fasi kila oca ki papia di un di kacus ku mas kunsidu na Israel: Jamba. Es kacus tene puku balur na tempu di Jesus. Ma i fala si disipulus: “Nin un delis ka ta kai na con sin bo Pape ka seta.” (Anos ku pui letras karegadu ku italiku) Dipus i fala mas: “Bo ten mas balur di ki manga di kacu.” Asin, Jesus garanti si disipulus di kuma Jeova da balur pa kada un delis, pa kila, e ka tene motivu di medi pirsigison. Ku sertesa, disipulus ta lembra di palabras di Jesus ora ke oja jambas nkuantu e na prega na sidadis ku tabankas. Kada bias ku bu oja un kacu pikininu, lembra di kuma Jeova dau balur, pabia abo tambi bu “ten mas balur di ki manga di kacu.” Ku si ajuda, bu ka pirsisa di medi ora ku utrus na pirsigiu. — Sal 118:6.

13. Ke ku na judanu aprindi lisons di kusas ku Deus kumpu?

¹³ No pudi aprindi utrus lisons aserka di Jeova na kusas ki kumpu. Kuma ku no pudi fasil? Purmeru, no pirsisa di toma tempu pa jubi diritu kusas ku Deus kumpu. Dipus, no pirsisa di pensa na ke ke ta nsinanu aserka di Jeova. I ka tudu ora ki ta sedu fasil pa no fasil. Géraldine un irma di Kamerun fala sin: “N kirsi na prasa, pa kila N nota di kuma i pirsis manga di sforsu pa jubi kusas ku Deus kumpu.” Un ansion comadu Alfonso fala sin: “N aprindi di kuma N pirsisa di ranja tempu pa sta ami son, pa jubi kusas ku Jeova kumpu i pensa fundu na ke ke ta nsinan aserka del.”

14. Ke ku Davi aprindi oca ki pensa fundu na kusas ku Deus kumpu?

¹⁴ Davi ta pensa fundu na kusas ku  Deus kumpu. I fala Jeova asin: “Ora ku N jubi pa seu, tarbaju di bu mon, lua ku strelas ku bu koloka na se lugar, N ta punta: Kin ki omi, pa bu lembra del?” (Sal 8:3, 4) Ora ku Davi na jubi seu di noti, i ka ta fika so dimiradu di jubi tudu strelas. Ma tambi i ta pensa fundu na ke ku strelas ta nsinal aserka di Deus. I aprindi di kuma Jeova i garandi. Na utrus mumentu, Davi pensa na kuma ku si kurpu disenvolvi na bariga di si mame. Oca i pensa aserka di kuma ku si kurpu kumpudu di manera dimiradu, kila lebal da mas balur pa jiresa di Jeova. — Sal 139:14-17.

15. Da un isemplu di kuma ku bu pudi oja maneras di sedu di Jeova na kusas ki kumpu. (Salmu 148:7-10)

¹⁵ Suma Davi, bu ka pirsisa di bai lunju pa oja kusas ku Deus kumpu i pensa fundu nel. I ten manga di kusas ku pudi judanu kunsi Jeova minjor. Pur isemplu, bu pudi nota puder di Jeova ora ku bu sinti sol na yardi. (Jer 31:35) Pensa na jiresa di Deus ora ku bu oja un kacu na kumpu niñu. Pensa na kuma ku Jeova sedu alegri ora ku bu oja un kacur na tenta paña si rabu. I gardisi Jeova pa si amor kada bias ku bu oja un mame na brinka ku si fiju. No tene manga di oportunidadi di aprindi aserka di Jeova, pabia tudu kusas ki kumpu ta ngabal, kusas garandi ku pikininu, kilis ku sta pertu ku kilis ku sta lunju. — Lei Salmu 148:7-10.

16. Ke ku no dibi di sta disididu pa fasi?

¹⁶ No Deus jiru dimas, i amanu, i tene puder, tambi tudu kusas ki fasi i bonitu. No pudi aprindi aserka des maneras di sedu, ku utrus tambi, si no jubi diritu kusas ku Deus kumpu. Anos tudu no dibi di ranja tempu sempri pa jubi diritu kusas ku Deus kumpu, i pensa na ke ke ta nsinanu aserka di Jeova. Si no fasi kila, no na pertusi mas di kin ku Kumpunu. (Tiagu 4:8) Na studu ku na bin, no na oja kuma ku papes pudi usa kusas ku Deus kumpu pa pudi nsina se fijus pertusi di Jeova.