1. Кова тано јекх начин преку колесте со о Јов пошукар запознајнѓа е Јехова?

 О ЈОВ керѓа буте џененцар лафи ко пло живото ама јекх разговор сине леске нешто посебно, адава сине о разговор е Јеховаја. Ко адава разговор о Јехова вакерѓа е Јовеске те дикхел несаве таро бут шуже буќа со створинѓа лен. Адава поможинѓа леске те дикхел кобор тано мудро о Јехова хем те бајрарел лескири доверба кај ов шај те грижинел пе пле слугенге. На пример сине леске вакердо кај ако о Девел шај те грижинел пе е животненге, значи шај исто аѓаар те грижинел пе леске да (Јов 38:39-41; 39:1, 5, 13-16). О Јов шај сине бут те сикљол башо е Јеховаскере особине таро адава со размислинѓа башо некобор буќа со створинѓа о Јехова.

2. Соске шај те овел аменге пхаро те одвојна време башо буќа со створинѓа о Јехова?

² Амен да шај бут те сикљова башо амаро Девел ако шукар дикхаја о буќа со створинѓа лен. Ама понекогаш шај те овел аменге пхаро те кера адава. Ако живинаја ки диз шај нане амен бут прилике те дикха буќа со створинѓа о Јехова. Чак ако живинаја ко тхан коте со иси природа шај те мислина аменге кај нане амен бут време те размислина баши лате. Адалеске те дикха соске тано корисно те одвојна аменге време хем те трудина амен те дикха о створиме буќа хем те размислина баши ленде. Ка кера лафи башо адава сар о Јехова хем о Исус користинѓе о створиме буќа те сикавен е јаверен хем саве поуке шај те сикљова тари природа.

3. Со сикавела кај о Јехова мангља о Адам те уживинел ко створиме буќа?

³ О Јехова створинѓа бут буќа хем ов мангља о прво мануш те уживинел ки ленде. О Девел чхивѓа е Адаме те живинел ко  јекх бут шужо рај хем денѓа ле и задача те грижинел пе баши лесте хем хари по хари те керел о јавер да дело тари пхув рај (1. Мој. 2:8, 9, 15). Шај те замислина аменге кобор о Адам сине воодушевимо џикоте дикхела сине сар о растенија похари икљона тари пхув хем сар о лулуѓа пхравѓона. Која бари предност сине е Адаме те грижинел пе баши Еденско градина. О Јехова исто аѓаар денѓа е Адамеске задача те чхивел анава е животненге (1. Мој. 2:19, 20). Ов шај сине коркори те чхивел анава е животненге, ама наместо адава ов денѓа адаја задача е Адамеске. Англедер те чхивел несаве животноске анав, о Адам сигурно испитинела сине хем внимателно дикхела сине сар изглединела хем со керела адава животно. Ов веројатно бут уживинела сине ко адава. Акава сигурно поможинѓа леске те хаљовел кобор тано мудро о Јехова хем кобор тане интересна хем шуже о буќа со створинѓа лен.

4. а) Која тани јекх причина соске ваљани те дикха хем те размислина башо створиме буќа? б) Башо кола буќа со створинѓа о Јехова сиан посебно благодарно?

⁴ Јекх причина соске ваљани те одвојна аменге време те дикха о створиме буќа хем те размислина баши ленде тани адалеске со о Јехова мангела те кера адава. Ов вакерела аменге: „Вазден тумаре јакхја упре хем дикхен“. Пало адава пучела: „Кој створинѓа акала буќа?“ О одговор тано јасно (Иса. 40:26). О Јехова створинѓа са со постојнела ко небо, ки пхув хем ко море, хем таро са адала буќа амен шај бут те сикљова баши лесте (Пс. 104:24, 25). Размислин башо начин сар сием створиме. Ов створинѓа амен аѓаар, те шај те уживина ко шуже буќа со аракхљовена ки природа. Ов исто аѓаар денѓа амен сетилија сар сој те дикха, те шуна, те пипина, те вкусина, хем те миришина. Акала буќа поможинена амен те уживина ко са адава со керѓа о Јехова.

5. Спрема Римјаните 1:20, сави корист ка овел амен ако дикхаја о буќа со створинѓа лен о Јехова хем размислинаја баши ленде?

⁵ И Библија вакерела аменге панда јекх важно причина соске ваљани те дикха о створиме буќа хем те размислина баши ленде. Лендар шај те сикљова башо е Јеховаскере особине. (Читин Римјаните 1:20.) На пример, размислин башо буќа со створинѓа о Јехова хем дикх кобор тане шукар керде. Лендар шај те сикљова кај о Девел тано бут мудро. Размислин само кобор бут хајбе створинѓа о Јехова ко кова со шај те уживина. Акава јасно сикавела кобор бут о Јехова мангела е манушен. Ако дикхаја е Јеховаскере особине преку о буќа со створинѓа лен тегани ка запознајна ле пошукар хем ка ова поттикниме те ова леа паше. Акана те дикха сар о Јехова користинѓа о створиме буќа те шај те сикавел е манушен важна поуке.

6. Со шај те сикљова таро птице со селинена пе?

⁶ О Јехова одрединѓа време башо са. Секова берш почминдор таро крајо таро февруари џи ки средина таро мај, о Израелција шај сине те дикхен сар о штркија летинена спрема север. О Девел вакерѓа е Израелцонге: „Чак о штрко џанела пло време“ (Ерем. 8:7). Исто сар со одрединѓа време кеда о штрко те селинел пе, аѓаар о Јехова одрединѓа време кеда ка извршинел пле осуде. Кеда дикхаја сар о птице селинена пе, адава бајрарела амари доверба кај е Јехова иси ле одредимо време кеда ка анел крајо акале лошно светоске (Авак. 2:3).

7. Со шај те сикљова таро начин сар о орло летинела? (Исаија 40:31).

⁷ О Јехова дела сила пле слугенге. Преку о Исаија, о Јехова ветинѓа пле народоске кај кеда ка осетинен пе слаба хем разочариме ов ка дел лен сила те шај те „уштен пле пакенцар сар орлија“. (Читин Исаија 40:31.) О Израелција бут пути шај сине те дикхен орлија кола со летинена уче бизо бут те мучинен пе. Ола шај те летинен добором уче аѓаар со користинена и сила е тате воздухоскири која со ваздела лен упре. Акава сетинкерела амен кај исто сар со о Јехова дела сила е орлоске, аѓаар шај те дел сила пле слугенге. Кеда јавер пути ка дикхе сар несави бари птица летинела са поупре хем поупре, бизо бут те мучинел пе, тегани сетин тут кај о Јехова шај те дел тут сила те накхаве тле проблемија.

8. Со сиклило о Јов таро адава со размислинѓа башо е Девлескере створиме буќа, хем со шај амен те сикљова?

⁸ О Јехова заслужинела те овел амен доверба ки лесте. О Јехова поможинѓа е Јовеске те овел ле побари доверба ки лесте (Јов 32:2; 40:6-8). Кеда о Девел керѓа лафи е Јовеа, ов спомнинѓа бут буќа со створинѓа лен сар сој о ѕвезде, о облакија хем о громија. О Јехова исто аѓаар керѓа лафи башо животне сар сој о диво бико хем о грас (Јов 38:32-35; 39:9, 19, 20). Са акала буќа на само со сикавена кај е Девле иси ле бари моќ, него хем исто аѓаар мангипе хем бари мудрост. Пало акава разговор, е Јове сине ле доверба ко Јехова сар никогаш англедер (Јов 42:1-6). Слично, кеда дикхаја хем истражинаја о створиме буќа, адава сетинкерела амен кај о Јехова тано бут помудро хем помоќно амендар. Ов на само со шај, него исто аѓаар ка анел крајо амаре мукенге. Акава шај те поможинел аменге те бајрара амари доверба ки лесте.

9-10. Со сикавена амен о кхам хем о бршим башо Јехова?

⁹ О Исус бут шукар џанела сине и природа. Сар вешто градители, ов поможинѓа пле Даде кеда створинѓа о универзум (Изр. 8:30). Покасно, кеда сине ки пхув ов користинѓа о створиме буќа те шај те сикавел пле следбеникон башо пло Дад. Те дикха некобор поуке со сикавѓа.

¹⁰ О Јехова сикавела мангипе сариненге. Машкар о јавера буќа со спомнинѓа о Исус ки Проповед ки гора, ов исто аѓаар керѓа лафи башо кхам хем башо бршим — буќа баши коленде со о мануша на размислинена бут. О солдуј буќа тане бут важна башо амаро живото. О Јехова шај сине те дел акала буќа само е манушенге со служинена леске. Ама наместо адава ов љубезно дела о кхам хем о бршим сариненге (Мат. 5:43-45). О Исус користинѓа акаја поука те сикавел пле следбеникон кај о Јехова очекујнела те сикава мангипе сариненге. Секогаш кеда дикхаја сар перела о кхам или сар дела бршим ваљани те размислина башо е Јеховаскоро мангипе спрема са о мануша. Лескоро пример шај те поттикнинел амен те сикава слично мангипе аѓаар со ка проповедина са е манушенге.

11. Сар шај те охрабринел амен адава со ка дикха е чириклен?

 ¹¹ О Јехова грижинела пе башо амаре материјална потребе. Ки исто проповед о Исус вакерѓа: „Дикхен шукар е чириклен ко небо, ола ни сејнена, ни жнејнена, ни ко амбарија кхедена, а палем тумаро Дад сој ко небо дела лен хајбаске“. Веројатно џикоте о мануша шунена сине е Исусе, шај сине те дикхен сар летинена чирикља кеда ов пучља лен: „Зарем тумен на врединена повише лендар?“ (Мат. 6:26). Акале шуже лафенцар о Исус уверинела амен кај о Јехова ка грижинел пе аменге (Мат. 6:31, 32). Акаја поука со сикљоваја ла тари природа шај авдиве да те охрабринел е верна слуген. Јекх терни пионерка тари Шпанија сине обесхрабрими соске нашти сине те аракхел песке соодветно тхан живибаске. Ама откеда дикхља сар о чирикља хранинена пе таро семе хем бобинке, почминѓа те осетинел пе пошукар. Ој вакерела: „Адала чирикља сетинкерѓе ман кај о Јехова грижинела пе ленге хем кај исто аѓаар манге да ка грижинел пе“. Кратко пало адава ој аракхља тхан кај те живинел.

12. Спрема Матеј 10:29-31, со сикљоваја таро чирикља башо Јехова?

¹² Секова јекх амендар врединела англо е Јеховаскере јакхја. Англедер о Исус те бичхалел пле апостолен те проповединен, ов поможинѓа ленге те на даран таро противибе. (Читин Матеј 10:29-31.) Ов керѓа адава аѓаар со спомнинѓа е најобична чириклен ко Израел. Ко е Исусескоро време ола на врединена сине бут, ама ов вакерѓа пле учениконге: „Нијекх лендар на перела ки пхув бизо те џанел тумаро Дад“. Пало адава вакерѓа: „Тумен врединена повише таро бут чирикља“. Акале лафенцар о Исус уверинѓа пле ученикон кај секова јекх лендар врединела англо е Јеховаскере јакхја хем адалеске на сине соске те даран таро прогонство. Кеда о ученикија сине ки служба ки диз или ко гав хем дикхена сине чирикља сигурно сетинена пе сине ко е Исусескере лафија. Секогаш кеда ка дикхе јекх тикни чирикли, сетин тут кај о Јехова ценинела тут лично, соске ту да врединеа повише таро бут чирикља. Адалеске со о Јехова тано аменцар нане соске те дара кеда о јавера противинена пе аменге (Пс. 118:6).

13. Со ка поможинел аменге те извлечина поуке таро створиме буќа?

¹³ Таро створиме буќа шај панда бут поуке те сикљова башо Јехова. Сар? Прво, ваљани те одвојна аменге време шукар те дикха о створиме буќа. Пало адава, ваљани те размислина со сикљоваја таро адава башо Јехова. Шај нане секогаш те овел аменге локхо те кера акава. И Жералдин, јекх пхен таро Камерун, вакерела: „Ме бариљум ки диз, адалеске халиљум кај мора свесно те теринав ман те дикхав хем те размислинав баши природа“. О Алфонсо, јекх старешина објаснинела: „Халиљум кај ваљани те одвојнав манге време те овав коркори те шај те дикхав о створиме буќа  хем те размислинав со ола сикавена ман башо Јехова“.

14. Со сиклило о Давид џикоте размислинела сине башо буќа со створинѓа лен о Јехова?

¹⁴ О Давид хор размислинела сине башо буќа со створинѓа лен о Јехова. Ов вакерѓа е Јеховаске: „Кеда дикхава тло небо, кердо таро тле васта, и месечина хем о черења со керѓан лен, сој тано о мануш кова со мерела, па те мислине ки лесте?“ (Пс. 8:3, 4). Кеда о Давид дикхела сине раќате ко небо, ов на само со уживинела сине те дикхел о ѕвезде него исто аѓаар размислинела сине со шај те сикљовел лендар башо Девел. Сиклило кобор тано баро о Јехова. Ко јавера прилике о Давид исто аѓаар размислинела сине башо адава сар лескоро тело развинѓа пе џикоте сине пе дајаке ко воги. Кеда размислинела сине башо адава ко саво чудесно начин сине кердо, лескири благодарност баши е Девлескири мудрост бајрола сине са повише (Пс. 139:14-17).

15. Вакер сар ту дикхеа е Јеховаскере особине преку о створиме буќа (Псалм 148:7-10).

¹⁵ Слично сар о Давид амен да шај локхе те аракха несаве буќа ки природа баши коленде со шај те размислина. Ако дикхаја околу аменде шај те открина бут таро е Јеховаскере особине. На пример, размислин баши е Јеховаскири моќ кеда таќарела тут о кхам (Ерем. 31:35). Приметин е Девлескири мудрост кеда дикхеа сар јекх чирикли керела песке гнездо. Дикх е Јеховаскири смисла башо хумор кеда ка дикхе сар јекх тикно џукел прастала пали пли порик. Хем благодарин е Јеховаске башо лескоро мангипе секогаш кеда ка дикхе сар јекх дај галинела пле бебе. Иси амен бут прилике те сикљова башо Јехова соске са о створиме буќа фалинена ле, бизи разлика дали баре или тикне дали паше или дур. (Читин Псалм 148:7-10.)

16. Со сием одлучна те кера?

¹⁶ Амаро Девел тано мудро, љубезно, моќно хем са со керела тано шужо. Шај те сикљова башо акала хем бут јавера особине ако внимателно дикхаја о створиме буќа околу аменде. Ваљани редовно те одвојна аменге време те уживина ко створиме буќа хем те размислина со шај лендар те сикљова башо Јехова. Адава ка поможинел аменге те ова панда попаше амаре Створителеа (Јак. 4:8). Ки следно статија ка дикха сар о родителија шај те користинен о створиме буќа, те шај те поможинен пумаре чхавенге те овен попаше е Јеховаја.