1. Kova tano jekh ando načinija sar o Jov šaj hine pana pošukar te penđari e Jehova?

 O VERNO manuš o Jov vaćerđa bute manušencar. Ama, jekh razgovor but utičinđa upro leste – o razgovor kova hine le e Jehovaja. Tegani, o Jehova phenđa lese te posmatrini o buća kola ov stvorinđa. Odova šaj hine te pomožini e Jovese te đanel kobor tano o Jehova mudro hem te zorjaćeri oleso poverenje so ov uvek ka del pe slugenđe odova so valjani lenđe. Na primer, o Jehova phenđa lese so sar brinini pe ando životinje, ađahar šaj te brinini pe hem olestar (Jov 38:39-41; 39:1, 5, 13-16). Đi posmatrinđa odova so o Jehova stvorinđa, o Jov sikljilo but buća ando odova savo tano o Devel.

2. Sose disavo puti šaj te ovel pharo te sikljova ando odova so o Jehova stvorinđa?

² Sar o Jov, hem amen šaj but buća te sikljova ando Devel ked dikhaja odova so stvorinđa. Ama, disavo puti nane lokho te ćera odova. Ako živinaja ki diz, našti svako dive te dikha but buća kola o Jehova stvorinđa. Čak iako živinaja ko gav, šaj nane amen uvek vreme te ćera odova. Akana ka dikha sose tano šukar te arakha vreme odolese. Isto ađahar, ka dikha sar o Jehova hem o Isus sikavena amen prekalo odova soj tano stvorimo hem so valjani te ćera te šaj pana pobuter te sikljova andi priroda.

3. So mothovi amenđe so o Jehova manglja o Adam te uživini ko odova so ov stvorinđa?

³ O Jehova manglja o prva manuša te uživinen ko odova so ov stvorinđa. Ked ćerđa e Adame, ov ćhivđa le te živini ko raj  hem phenđa lese te brinini pe olestar (Post. 2:8, 9, 15). Zamislin sar o Adam osetinđa pe đi dikhlja sar cvetonena o luluđa. Savi bari čast hine le te brinini pe ando edensko vrt! O Jehova phenđa lese te del anava e životinjenđe (Post. 2:19, 20). Iako šaj hine kokri te ćerel odova, ov ipak odova zadatko dinđa e Adamese. Angleder te ćerel odova, o Adam šukar posmatrinđa sar o životinje izgledinena hem so ćerena. Sigurno uživinđa đi ćerđa odova. Sa akava pomožinđa lese te haljol kobor tano o Jehova mudro hem kobor tane zanimljiva hem šuže o buća kola ov stvorinđa.

4. (a) Kova tano jekh ando razlogija sose valjani te posmatrina odova soj tano stvorimo? (b) So tuće najviše sviđini pe ando odova soj tano stvorimo?

⁴ Jekh razlog sose valjani te posmatrina odova soj tano stvorimo tano sose o Jehova rodela amendar te ćera odova. Ov phenela amenđe: „Vazden tumare jaćha hem dikhen! Ko ćerđa sa odova?“ O odgovor tano jasno (Is. 40:26). O Jehova ćerđa but buća ko nebo, ki phuv hem ko more kolendar šaj te sikljova savo tano ov (Ps. 104:24, 25). Razmislin samo sar ćerđa amen. Amen hijam stvorime te uživina ki priroda hem te ova zahvalna aso sa odova so dikhaja. Isto ađahar, ov ćerđa amen te dikha, te šuna, te pipina, te osetina razna ukusija hem te mirišina. Sa akala buća pomožinena amen te uživina ko razna buća kola ov stvorinđa.

5. Premalo Rimljanima 1:20, sar pomožini amenđe odova ked razmislinaja odolestar so o Jehova stvorinđa?

⁵ Isi pana jekh važno razlog sose valjani te posmatrina odova soj tano stvorimo. Ko sa soj tano stvorimo dikhaja e Jehovase osobine. (Čitin Rimljanima 1:20.) Na primer, posmatrin o buća kola o Jehova ćerđa hem dikh kobor tane šukar ćerde. Odova sikavi amen kobor tano o Jehova mudro. Isto ađahar, razmislin andi razno ukusno hrana ki koja šaj te uživina. Akava jasno mothovi amenđe kobor o Jehova mangela amen. Ked ko odova sar ćerđa diso dikhaja e Jehovase osobine, amen pana pošukar šaj te penđara le hem odova podstaknini amen te ova pana popaše oleja. Akana ka dikha sar o Jehova prekalo odova so ćerđa sikavi amen disave važna buća.

6. So šaj te sikljova ando odova so o rode selinena pe?

⁶ O Jehova tačno odredini o vreme ked ka ovel diso. Svako berš ko kraj ando februar  hem ki sredina ando maj, o Izraelcija dikhlje sar o rode letinena hem selinena pe premalo sever. O Jehova phenđa e Izraelcenđe: „I roda đanela po vreme“ (Jer. 8:7). Sar so odredinđa tačno vreme ked akala ćiriklja valjani te selinen pe, ađahar odredinđa o vreme ked ka anel pi presuda. Ked avdije dikhaja sar o ćiriklja selinena pe, odova setinćeri amen so šaj te ovel amen poverenje upro Jehova so isi le „odredimo vreme“ ked ka uništini sa o lošnipe kova isi ko sveto (Avak. 2:3).

7. So šaj te sikljova ando način sar jekh orao letini? (Isaija 40:31)

⁷ O Jehova dela snaga pe slugenđe. Prekalo prorok Isaija, o Jehova obećinđa so ka zorjaćeri pe narodo te „vazden pe ko phakha sar o orlija“ ked ka oven obeshrabrime. (Čitin Isaija 40:31.) Ko purano vreme, o Izraelcija but putija dikhlje sar o orlija, sebepi o vazdušna struje, letinena sa poupre hem poupre bizo te ćeren but putija phakhencar. Akava mothovi amenđe so o Jehova šaj hem amenđe te del snaga sar so dela akale ćiriklenđe. Aver puti ked ka dikhe sar disavi bari ćirikli letini sa poupre hem poupre, tegani setin tut so o Jehova šaj hem tuće te del snaga te ikljove ko krajo te problemencar.

8. So o Jov sikljilo ked razmislinđa ando odova so o Jehova stvorinđa hem so šaj amen te sikljova?

⁸ O Jehova zaslužini amaro poverenje. Ov pomožinđa e Jovese te ovel le pana pobaro poverenje upro leste (Jov 32:2; 40:6-8). Đi vaćerđa e Joveja, o Jehova pominđa lese but buća kola stvorinđa, sar soj tane o ćerenja, o oblakija hem i munja. Isto ađahar, vaćerđa lese ando divljo biko hem ando grasta (Jov 38:32-35; 39:9, 19, 20). Sa odola buća na mothovena samo kobor tano o Devel moćno, već hem kobor tano baro oleso mangipe hem olesi mudrost. Sebepi odova, e Joveso poverenje upro Jehova hine sa pobaro (Jov 42:1-6). Odolese, ked proučinaja diso ando odova so o Jehova stvorinđa, amen dikhaja so o Jehova tano but pomudro hem pomoćno amendar. Ov šaj te cidel sa amare pharipa hem pana hari ka ćerel odova. Ked haljovaja odova, amaro poverenje upro leste ovela pana pobaro.

9-10. So o kham hem o boršim mothovena amenđe ando Jehova?

⁹ O Isus đanđa but buća andi priroda. Sar „vešto graditelj“, ov ćerđa buti pe Dadeja ked stvorinđa o svemir (Posl. 8:30). Kasnije, ked hine ki phuv, ov prekalo odova soj tano stvorimo sikavđa pe učenikonen ando po Dad. Akana ka dikha nekobor buća kola sikavđa len.

¹⁰ O Jehova mothovi po mangipe svakonese. Ki Propoved ki gora, o Isus vaćerđa pe učenikonenđe ando kham hem ando boršim, buća ando kola but manuša na razmislinena odobor. O solduj buća tane but važna aso amaro životi. O Jehova šaj hine te na del akala duj buća okolenđe kola na služinena lese. Ama, ov sarinenđe dela kham hem boršim (Mat. 5:43-45). O Isus koristinđa akala duj buća te sikavi pe učenikonen so o Jehova mangela te mothovi mangipe sarinenđe. Svako puti ked dikhaja sar o kham ikljola ja sar đala boršim, amen šaj te setina amen ko odova kobor o Jehova mangela amen. Oleso primer šaj te podstaknini amen te mothova mangipe e manušenđe ki služba.

11. So šaj te sikljova đi dikhaja e ćiriklen?

¹¹ O Jehova dela amen odova so valjani amenđe. Ki odija isto Propoved, o Isus pana phenđa: „Dikhen e ćiriklen, on na  sejinena, ni na ćedena, ni na anena ko žitnice, ama palem tumaro nebesko Dad parvari len.“ Verovatno o manuša kola šunđe e Isuse šaj hine te dikhen e ćiriklen sar letinena upro olengo šero ked pućlja len: „Na hijen li tumen povredna olendar?“ (Mat. 6:26). Ađahar, o Isus pomožinđa amenđe te haljova so o Jehova ka brinini pe amendar (Mat. 6:31, 32). Odova ohrabrini hem amen avdije. Jekh terni phen andi Španija koja služini sar pionir hine but obeshrabrimi sose našti hine te arakhi pese stan. Ama, palo odova so dikhlja sar o ćiriklja hana semenke hem zrnija, oj ohrabrinđa pe. Oj phenela: „Akala ćiriklja setinćerđe man so ako o Jehova brinini pe olendar, ka brinini pe hem mandar.“ Sigate palo odova, akija phen arakhlja pese stan.

12. Premalo Matej 10:29-31, so o vrapcija mothovena amenđe ando Jehova?

¹² E Jehovase tano svako manuš vredno. Angleder te bićhali e apostolen te propovedinen, o Isus pomožinđa lenđe te na daran ando okola so ka protivinen pe lenđe. (Čitin Matej 10:29-31.) Ov vaćerđa lenđe andi jekh but penđardi ćirikli ko Izrael, ando vrapco. Ked o Isus hine ki phuv, odola ćiriklja hine najjeftina. Ama, ov phenđa pe učenikonenđe: „Nijekh olendar na perela ki phuv, a tumaro Dad te na đanel odolese.“ Pana phenđa: „Tumen vredinena pobuter ando but vrapcija.“ O Isus uverinđa pe učenikonen so e Jehovase tano važno svako oleso sluga, odolese nane sose te daran ando progonstvo. E Isusese učenikija sigurno setinđe pe ko odova so o Isus sikavđa len ked dikhlje odole ćiriklen ki služba. Ked god dikheja odole tikne ćiriklen, setin tut so o Jehova but cenini tut odolese so hem tu „vredineja pobuter ando but vrapcija.“ Odolese, nane sose te dara ked avera protivinena pe tuće (Ps. 118:6).

13. So šaj te pomožini amenđe te sikljova ando odova soj tano stvorimo?

¹³ Amen šaj te sikljova but buća ando odova so o Jehova stvorinđa. Sar? Najangleder, valjani te odvojina vreme te posmatrina odova soj tano stvorimo. Palo odova, valjani te razmislina so odova sikavi amen ando Jehova. Na ka ovel amenđe lokho uvek te ćera odova. Amari phen i Žeraldin ando Kamerun, phenela: „Bariljum ki diz, odolese valjani but te trudinav man te šaj te posmatrinav odova soj tano stvorimo.“ Jekh starešina kova vićini pe Alfonso, phenela: „Haljiljum so valjani te odvojinav vreme te ovav kokri te šaj te posmatrinav odova so o Jehova stvorinđa hem te razmislinav so odova sikavi man olestar.“

14. So o David sikljilo ked razmislinđa ando odova so o Devel stvorinđa?

¹⁴ O David but razmislinđa ando odova so o Devel stvorinđa. Ov phenđa e Jehovase: „Ked dikhava o nebo, kova tu ćerđan te vastencar, o mesec hem o ćerenja kola tu  ćerđan, ki godi avela maje: Soj tano jekh obično manuš te misline upro leste?“ (Ps. 8:3, 4). Raćate, đi posmatrinđa o nebo, ov na uživinđa samo ko odova te dikhel o ćerenja. Ov razmislinđa so odola ćerenja sikavena le ando Devel. Sikljilo kobor tano o Jehova baro. Isto ađahar, ov razmislinđa hem odolestar sar oleso telo barilo ko oleso dajako vođi. Ked razmislinđa ando odova sar tano ćerdo, pana pobuter hine zahvalno e Jehovase sebepi olesi bari mudrost (Ps. 139:14-17).

15. Vaćer jekh primer sar šaj te dikha e Jehovase osobine ko odova so stvorinđa. (Psalam 148:7-10)

¹⁵ Sar o David hem tu šaj te arakhe diso ki priroda sostar šaj te razmisline. Isi but buća kola šaj te pomožinen tut pana pošukar te penđare e Jehova. Na primer, šaj te osetine e Jehovasi moć đi o kham taćari ti koža (Jer. 31:35). Razmislin andi Jehovasi mudrost ked dikheja sar jekh ćirikli ćerela pese gnezdo. Isto ađahar, razmislin ando odova so o Jehova isi le smisao aso humor ked dikheja sar disavo tikno đućel vrtini pi porik. Zahvalin tut e Jehovase aso oleso mangipe svako puti ked dikheja jekha daja sar ćhelela pese pe bebaja. Isi amen but prilike te sikljova diso ando Jehova odolese so sa odova so ćerđa hvalini le, bizo obzir da li tano tikno ja baro, dur ja paše. (Čitin Psalam 148:7-10.)

16. So valjani te ova odlučna te ćera?

¹⁶ Amaro Devel tano mudro, pherdo mangipe, moćno hem sa so ćerela tano but šukar. Šaj te sikljova ando sa akala osobine hem ando pana but buća ako pažljivo posmatrinaja sa odova soj tano stvorimo. Sare valjani te odvojina vreme te uživina ko odova so stvorinđa o Jehova hem te razmislina so odova sikavi amen olestar. Ked ka ćera odova, amen ka ova pana popaše amare Stvoriteljeja (Jak. 4:8). Ko aver članko, ka dikha sar šaj o roditeljija te pomožinen pe ćhavenđe te oven pana popaše e Jehovaja prekalo odova soj tano stvorimo.