1. Καλέ τροπόσαρ σικλιλό ο Ιώβ πο λατσσές ι Ιεχωβάς;

 ΣΑΡΕ κατά συζητήσεις σο κερντάς ο Ιώβ πι ζωγιάτε, εκ τανί ξεχωρίνελα πο μπουτ​—η συζήτηση σο κερντάς ι Ιεχωβά Ντεβλέσαρ. Κι συζήτηση ανταγιά, ο Ιεχωβά βακερντάς κο Ιώβ τι ντικχέλ χάνικ κατά μπουτ σουκάρ πράγματα κι δημιουργία. Ανταβά κα βοηθίνελας ι Ιωβίς τι αγαβέλ καζόμ γκοντιαβέρ ισί ο Ιεχωβά ντα κα κερέλας-λες πο σίγουρος ότι ο Ιεχωβά μπορίνελα τι ντελ πι υπηρετόν σο-ντα χρειαζίντιβενα. Για παράδειγμας, ο Ντεβέλ βακερντάς κο Ιώβ ότι ντέλα χαμπέ κο ζώα, άρα μπορίνελας τι αρακχαβέλ ι Ιωβίς-ντα. (Ιώβ 38:​39-41· 39:1, 5, 13-16) Αντράλ κατά δημιουργία, ο Ιώβ σικλιλό μπουτ πράγματα για το ιδιότητες ι Ντεβλέσκε.

2. Σόσκε μπορεί τι αβέλ δύσκολος τι ντικχάς προσεκτικά ι δημιουργία ι Ιεχωβάσκι;

² Μπορίνασα αμέν-ντα τι σικλιάς πο μπουτ αμαρέ Ντεβλέσκε καζόμ ντικχάσα προσεκτικά οντουλά σο κερντάς. Όμως, ανταβά μπορεί μα τι αβέλ πάντα εύκολος. Άμα τζουβντιάσα κι πόλη, μπορεί μα τι ντικχάσα μπουτ ι δημιουργία κάθε ντιβές. Ατζέ-ντα άμα μπεσάσα αβρί κατά πόλη, μπορεί τι νιωθίνας ότι να τθεράσα μπερεκέτι σαάτι για τι ντικχάς ι δημιουργία προσεκτικά. Ακανά κα σικλιάς σόσκε αξίνελα τι ντας αμαρέ σαατίσταρ ντα τι κεράς προσπάθειες για τι ντικχάς προσεκτικά ι δημιουργία. Κα συζητίνας σαρ χρησιμοποιηντάς ο Ιεχωβά ντα ο Ιησούς ι δημιουργία για τι σικλιαρέν ντα σαρ μπορίνασα αμέν τι σικλιάς πο μπουτ πράγματα κατά δημιουργία.

3. Σο σικαβέλα ότι ο Ιεχωβά μανγκέλας τι μπεϊντίνελ ο Αδάμ ι δημιουργία;

³ Ο Ιεχωβά μανγκέλας τι μπεϊντίνελ ο πρώτος τζενό Λέσκι δημιουργία. Κάνα κερντάς ι Αδαμίς, ντινάς-λες εκ μπουτ σουκάρ παράδεισος για τι τζουβντιόλ ντα βακερντάς λέσκε τι καλλιεργίνελ-λες ντα τι μπαριαρέλ-λες. (Γέν. 2:8, 9, 15) Ανέν τουμαρέ γκοντιάτε ι χαρά ι Αδαμίσκι καζόμ ντικχέλας σπόρους τι μπαριόν ντα λουλούδια τι νικιόν. Σο μπαρό προνόμιος τθερέλας ο Αδάμ τι περιποιήνελ ο κήπος της Εδέμ! Ο Ιεχωβά βακερντάς επίσης κο Αδάμ τι ντελ ναβά κο ζώα. (Γέν. 2:​19, 20) Ο Ιεχωβά κα μπορίνελας τι τραμπίνελ βοβ ο ναβά. Αντίς όμως τι κερέλ-λες ανταβά, ντινάς κο Αδάμ ανταγιά μπουτί. Σίγουρα, πριν τι αποφασίνελ σο ναβά κα ντελ-λεν, ο Αδάμ ντικχλάς προσεκτικά ο ζώα, ντα τσσουντάς σημασία σαρ μοιάζενας ντα σο κερένας. Ο Αδάμ πρέπει τι μπεϊντίνελας-λες μπουτ ανταβά. Σίγουρα, ντινάς-λες ι ευκαιρία τι αγαβέλ καζόμ γκοντιαβέρ ισί ο Ιεχωβά ντα καζόμ ξεχωριστά ντα σουκάρ ισί ο πράγματα σο κερντάς λέσκο Ντατ.

4. (α) Καβά ισί εκ λόγος σο πρέπει τι ντικχάς προσεκτικά ι δημιουργία; (β) Καλά πράγματα κατά δημιουργία μπεϊντίνενα τουμέν πο μπουτ;

⁴ Εκ λόγος σο πρέπει τι ντικχάς προσεκτικά ι δημιουργία ισί ότι ο Ιεχωβά μανγκέλα τι κεράς-λες ανταβά. «Βάντεν τουμαρέ γιακχά κο ουρανός ντα ντικχέν», βακερέλα αμένγκε. Σοράν πουτσέλα: «Κον κερντάς-λεν ανταλά;» Η απάντηση ισί ξεκάθαρη. (Ησ. 40:​26) Ο Ιεχωβά πφερντάς, όχι σάντε ο ουρανός, αλλά ι πφουβ ντα ι ντεριάβ σαβέ τι μανγκές πραγματέντζαρ σο σικλιαρένα-αμέν λέσκε. (Ψαλμ. 104:​24, 25) Σκεφτίνεν επίσης ο τρόπος σο δημιουργιντάς-αμέν ο Ντεβέλ. Κερντάς-αμέν τι μπεϊντίνας τι ντικχάς σουκάρ πράγματα κι δημιουργία. Επίσης, κερντάς-αμέν τι ντικχάς, τι ασουνάς, τι αγγίνας, τι αγαβάς ο γεύσεις ντα τι ασουνγκάς​—ανταλά ισί ο παντς αισθήσεις σο κερένα-αμέν τι απολαμβάνας ο μπουτ πράγματα σο κερντάς.

5. Σαρ βοηθίντιβασα κάνα ντικχάσα προσεκτικά ι δημιουργία ι Ιεχωβάσκι, σαρ βακερέλα ο εδάφιος Ρωμαίους 1:20;

⁵ Η Γραφή βακερέλα αμένγκε ατζέκ εκ σημαντικός λόγος σο πρέπει τι ντικχάς προσεκτικά ι δημιουργία. Η δημιουργία σικλιαρέλα-αμέν για το ιδιότητες ι Ιεχωβάσκε. (Διαβάνεν Ρωμαίους 1:​20) Για παράδειγμας, σκεφτίνεν καζόμ σουκάρ τροπόσαρ ισί κερντέ ο πράγματα κι δημιουργία. Να σικαβένα καζόμ γκοντιαβέρ ισί ο Ντεβέλ; Σκεφτίνεν επίσης ο μπερεκέτι χαμπίματα σο απολαμβάνασα. Ανταβά σικαβέλα ξεκάθαρα καζόμ μπουτ μανγκέλα ο Ιεχωβά ι τζενέν. Κάνα αγαβάσα ο ιδιότητες ι Ιεχωβάσκε κατά πράγματα σο κερντάς, σικλιάσα-λες πο  λατσσές ντα μανγκάσα τι τζας πασέ λέστε ατζέ πο μπουτ. Για τι ντικχάς ακανά μερικούς τρόπους σο ο Ιεχωβά χρησιμοποιηντάς ι δημιουργία για τι σικλιαρέλ σημαντικά πράγματα ι τζενέν.

6. Σο σικλιάσα κάνα ντικχάσα τσιρικλέν σο νασένα εκ συγκεκριμέ εποχή;

⁶ Ο Ιεχωβά τραμπιντάς εκ συγκεκριμέ βακίτι για τι αβέν-πες ο πράγματα. Κάθε μπρες, κατά Φεβρουάριος μέχρι Μάιος, ο Ισραηλίτες ντικχένας λελεκίν τι πετάνεν ντα τι νασέν κάρινγκ κο βορράς. «Ο λελέκι κο ουρανός τζανέλα πο εποχές», βακερντάς ο Ντεβέλ κο Ισραηλίτες. (Ιερ. 8:7) Σαρ ο Ιεχωβά τραμπιντάς ο βακίτι για τι νασέν ανταλά τσιρικλέ, αντικάς τραμπιντάς ο βακίτι για τι κερέλ πο κρίσεις. Αντιβές, κάνα ντικχάσα τσιρικλέν τι νασέν εκ συγκεκριμέ εποχή, ισινάμ σίγουροι ότι ο Ιεχωβά “τραμπιντάς εκ βακίτι” για τι ανέλ ο τέλος ανταλέ πφιρνέ ντουνιάσκο.​—Αββακ. 2:3.

7. Σο σικλιάσα κάνα ντικχάσα εκχέ τσιρικλές τι πετάνελ; (Ησαΐας 40:31)

⁷ Ο Ιεχωβά ντέλα ζορ πι υπηρετόν. Αντράλ κατά Ησαΐας, ο Ιεχωβά ντινάς πο λάφι ότι κα ντέλας ζορ πι υπηρετόν κάνα κα νιωθίνενας μπίζουρανε ή πφανγκέ γκίσκε για τι μπορίνεν τι «πετάνεν οπρέ σαρ τι τθερένας αετόσκε πακά». (Διαβάνεν Ησαΐας 40:​31) Ο Ισραηλίτες ντικχένας συνέχεια αετόν σο νικλίνας οπρέ χωρίς τι κουνιαβέν μπουτ πουμαρέ πακά. Κερένας-λες ανταβά σόσκε χρησιμοποιήνενας ι μπαρμπάλ σο τζάλας οπρέ. Ανταβά ανέλα αμαρέ γκοντιάτε ότι, σαρ ο Ιεχωβά ντινάς ζορ ανταλέ τσιρικλέντε, μπορίνελα τι ντελ ζορ πι υπηρετόντε-ντα! Κάνα ντικχένα εκχέ μπαρέ τσιρικλές τι νικλίλ ατζέ πο οπρέ κο ουρανός χωρίς τι κουνιαβέλ πο πακά, ντεν-τουμέν γκοντί ότι ο Ιεχωβά μπορίνελα τι ντελ-τουμέν ι ζορ τι νακχαβέν τουμαρέ προβλήματα.

8. Σο σικλιλό ο Ιώβ κατά δημιουργία ι Ντεβλέσκι, ντα σο μπορίνασα τι σικλιάς αμέν;

⁸ Ο Ιεχωβά αξίνελα αμαρί μπέσα. Ο Ιεχωβά βοηθιντάς ι Ιωβίς τι μπαριαρέλ πι μπέσα Λέστε. (Ιώβ 32:2· 40:​6-8) Κι συζήτηση σο τθερέλας ι Ιωβίσαρ, ο Ντεβέλ βακερντάς μπουτ πράγματα κατά δημιουργία, σαρ ο τσεργανιά, ο σύννεφα ντα ο αστραπές. Ο Ιεχωβά κερντάς λάφι για το ζώα-ντα, σαρ ο άγριος γκουρούβ ντα ο γκρας. (Ιώβ 38:​32-35· 39:9, 19, 20) Σαρέ ανταλά πράγματα σικαβένας, όχι σάντε ι μπαρί ζορ ι Ντεβλέσκι, αλλά εμ ο μανγκιπέ ντα ι μπαρί σοφία λέσκι. Χάρη κι συζήτηση ανταγιά, ο Ιώβ σικλιλό τι ντελ μπέσα κο Ιεχωβά ατζέ πο μπουτ. (Ιώβ 42:​1-6) Αντικάς αμέν-ντα, κάνα ντικχάσα ι δημιουργία, ανάσα αμαρέ γκοντιάτε ότι ο Ιεχωβά ισί μπουτ πο γκοντιαβέρ ντα ζουρανό αμένταρ. Μπορίνελα επίσης τι τσσιναβέλ σαρέ αμαρέ δοκιμασίες, ντα κα τσσιναβέλ-λεν. Ανταβά κερέλα-αμέν τι ντας πο μπουτ μπέσα λέστε.

9, 10. Σο σικλιαρέλα-αμέν ο κχαμ ντα ο μπρισίμ ι Ιεχωβάσκε;

⁹ Ο Ιησούς τζανέλας μπουτ πράγματα για τη δημιουργία. Σαρ «μπουτ λατσσό εργάτης», τθερέλας ο προνόμιος τι βοηθίνελ πι Νταντές τι κερέλ ο σύμπαν. (Παρ. 8:​30) Σοράν, κάνα ο Ιησούς ισινέ κι πφουβ, χρησιμοποιηντάς ι δημιουργία για τι σικλιαρέλ πι μαθητέν πι Νταντέσκε. Ντικχέν μερικά πράγματα σο σικλιαρντάς ο Ιησούς.

¹⁰ Ο Ιεχωβά σικαβέλα πο μανγκιπέ σαριλένγκε. Κι Επί του Όρους Ομιλία, ο Ιησούς κερντάς λάφι ι κχαμέσκε ντα ι μπρισιμέσκε, πράγματα σο μπουτ τζενέ πακιάνα ότι τθερένα-λεν έτσι κι αλλιώς. Ο ντούι-ντα όμως ισί σημαντικά ι ζωγιάκε. Ο Ιεχωβά κα μπορίνελας μα τι ντελ-λεν κο τζενέ σο να αξίνενα-λεν. Βοβ όμως ντέλα λατσσιμάσαρ ο κχαμ ντα ο μπρισίμ σαριλέντε. (Ματθ. 5:​43-45) Ο Ιησούς βακερντάς-λες ανταβά για τι  σικλιαρέλ πι μαθητέν ότι ο Ιεχωβά μανγκέλα τι σικαβάς μανγκιπέ σαριλένγκε. Κάθε φαρ σο απολαμβάνασα εκ σουκάρ ηλιοβασίλεμας ή ντικχάσα τι ντελ ήρεμος μπρισίμ, μπορίνασα τι σκεφτίνας ο μανγκιπέ ι Ιεχωβάσκο σαρέ ι τζενένγκε. Λέσκο παράδειγμας τσσίντελα-αμέν τι σικαβάς ασακό μανγκιπέ κάνα μουτθαβάσα ο λατσσέ αμπέρια σαριλένγκε.

11. Σαρ λάσα ζορ κάνα ντικχάσα προσεκτικά ι τσιρικλέν σο ισί κο ουρανός;

¹¹ Ο Ιεχωβά ντέλα-αμέν ο αναγκαία. Κι ίδια ομιλία, ο Ιησούς βακερντάς ακαβά-ντα: «Ντικχέν με προσοχή ι τσιρικλέν σο ισί κο ουρανός· ούτε φυτίνενα ούτε γκίντενα καρπός ούτε τσσουβένα-λες κο αποθήκες, όμως τουμαρό Ντατ σο ισί κο ουρανός παρβαρέλα-λεν». Μάλλον ο τζενέ σο ασουνένας ι Ιησούς ντικχένας τσιρικλέν τι πετάνεν οπρά-λένταρ κάνα πουτσλάς-λεν: «Να τθερένα τουμέν πο μπαρί αξία ανταλένταρ;» (Ματθ. 6:​26) Καζόμ λατσσέ τροπόσαρ κερέλα-αμέν ο Ιεχωβά τι αβάς σίγουροι ότι κα ντελ-αμέν ο αναγκαία! (Ματθ. 6:​31, 32) Οντουβά σο σικλιάσα κατά δημιουργία συνεχίνελα τι ντελ ζορ ι Ντεβλέσκε πιστέ υπηρετόν. Εκ τερνί σκαπάνισσα κι Ισπανία χασαρντάας πι ζορ σόσκε ναστί αρακχέλας εκ λατσσό τθαν τι μπεσέλ. Αλλά κάνα ντικχλάς ι τσιρικλέν τι χαν σπόρους ντα καρπούς, αρακχλάς πάλι πι ζορ. Βόι βακερέλα: «Οντουλά τσιρικλέ αντέ μι γκοντιάτε ότι ο Ιεχωβά φροντίνελα-λεν ντα κα φροντίνελ μαν-ντα». Χάνικ πο σοράν ανταλέσταρ, η πφεν αρακχλάς κχερ.

12. Σο σικαβένα ι Ιεχωβάσκε ο τσιρικλέ, σαρ βακερένα ο εδάφια Ματθαίος 10:​29-31;

¹² Ι Ιεχωβάσκε ισί πολύτιμος ο κάθε εκ αμένταρ. Πριν τι μπουτσσαβέλ πι μαθητέν τι βακερέν ο λατσσέ αμπέρια, ο Ιησούς βοηθιντάς-λεν μα τι νταρέν κατά κόντρα σο κα τζάνας λέντζαρ ο τζενέ. (Διαβάνεν Ματθαίος 10:​29-31) Κερντάς-λες ανταβά κάνα κερντάς λάφι ι πο συνηθισμέ τσιρικλένγκε σο ισινέ κο Ισραήλ. Οντουλά τσιρικλέ να τθερένας μπουτ αξία κο ντιβεσά κι Ιησούσκε. Αλλά βοβ βακερντάς πι μαθητένγκε: «Ούτε εκ ανταλένταρ να κα περέλ κι πφουβ χωρίς τι τζανέλ-λες τουμαρό Ντατ». Σοράν βακερντάς: «Τουμέν αξίνενα πο μπουτ μπουτέ τσιρικλένταρ». Ανταλέ λαφίντζαρ ο Ιησούς σικαντάς πι μαθητένγκε ότι ι Ιεχωβάσκε ισινέ πολύτιμος ο κάθε εκ λένταρ, άρα να τθερένας καέκ λόγος τι νταρέν κατά κόντρα σο κα τζάνας λέντζαρ. Ο μαθητές σίγουρα ντένας-πες γκοντί ο λάφια ι Ιησούσκε κάνα ντικχένας τσιρικλέν καζόμ βακερένας ο λατσσέ αμπέρια κο πόλεις ντα κο γκαβά. Οτθάρ κάνα ντικχένα εκχέ χουρντέ τσιρικλές, τι ντεν-τουμέν γκοντί ότι ι Ιεχωβάσκε ισινέν πολύτιμοι σόσκε τουμέν-ντα «αξίνενα πο μπουτ μπουτέ τσιρικλένταρ». Λέσκε βοηθειάσαρ, να χρειαζίντιβελα τι νταρέν κάνα ο γιαβερά κα τζαν τουμέντζαρ κόντρα.​—Ψαλμ. 118:6.

13. Σο κα βοηθίνελ-αμέν τι σικλιαράς-αμέν κατά δημιουργία;

¹³ Μπορίνασα τι σικλιάς μπουτ γιαβερά-ντα πράγματα ι Ιεχωβάσκε κατά δημιουργία. Σαρ; Πρώτον, χρειαζίντιβελα τι αρακχάς σαάτι για τι ντικχάς λατσσές ι δημιουργία. Σοράν, χρειαζίντιβελα τι σκεφτίνας σο σικλιαρέλα-αμέν ι  Ιεχωβάσκε. Μπέκιμ μα τι αβέλ πάντα εύκολος τι κεράς-λες ανταβά. Η Ζεραλντίν, εκ πφεν κατά Καμερούν, βακερέλα: «Μπαριλόμ κι πόλη, οτθάρ αγαβάβα ότι μανγκέλα προσπάθεια για τι ντικχάβ προσεκτικά ι δημιουργία». Εκ πρεσβύτερος, ο Αλφόνσο, βακερέλα: «Σικλιλόμ ότι χρειαζίντιβελα τι αρακχάβ σαάτι για τι ατσσάβ κορκορό ντα αντικάς τι ντικχάβ προσεκτικά ι δημιουργία ι Ιεχωβάσκι ντα τι σκεφτίναβ σο σικλιαρέλα-μαν λέσκε».

14. Σο σικλιλό ο Δαβίδ καζόμ σκεφτίνελας λατσσές ι δημιουργία ι Ντεβλέσκι;

¹⁴ Ο Δαβίδ σκεφτίνελας λατσσές ι δημιουργία ι Ντεβλέσκι. Βακερντάς κο Ιεχωβά: «Κάνα ντικχάβα το ουρανός, ο πράγματα σο κερντάν τι βαστέντζαρ, ο τσσιμούτ ντα ο τσεργανιά σο ετοιμαντάν, σο ισί ο τζενό ντα ντέσα-λες γκοντί;» (Ψαλμ. 8:3, 4) Βα, κάνα ο Δαβίδ ντικχέλας ο ουρανός αρατί, να μπεϊντίνελας σάντε τι ντικχέλ ο τσεργανιά. Αλλά σκεφτίνελας λατσσές σο σικλιαρένας-λες ι Ντεβλέσκε ο τσεργανιά. Σικλιλό καζόμ μπαρό ισί ο Ιεχωβά. Γιαβερά φαρ, ο Δαβίδ ανέλας πι γκοντιάτε σαρ μπαριλόας πι νταγιάκε περέστε. Καζόμ σκεφτίνελας οντουλά σουκάρ πράγματα, λέσκι εκτίμηση για τη σοφία ι Ιεχωβάσκι μπαριόλας.​—Ψαλμ. 139:​14-17.

15. Βακερέν παραδειγματέντζαρ σαρ ντικχλέν ο ιδιότητες ι Ιεχωβάσκε κι δημιουργία. (Ψαλμός 148:​7-10)

¹⁵ Σαρ ο Δαβίδ, αντικάς αμέν-ντα, να χρειαζίντιβελα τι ρόντας μπουτ ντουρ για τι αρακχάς κάτι κι δημιουργία ντα τι σκεφτίνας-λες λατσσές. Άμα κα ντικχέν ντονταλάι τουμένταρ, μπορίνενα τι αγαβέν μπουτ ιδιότητες ι Ιεχωβάσκε. Για παράδειγμας, τι αγαβέν ι ζορ ι Ιεχωβάσκι κάνα τατιόνα κατά κχαμ. (Ιερ. 31:​35) Ντεν-τουμέν γκοντί ι σοφία ι Ντεβλέσκι κάνα ντικχένα εκχέ τσιρικλές τι κερέλ πι φωλιά. Σκεφτίνεν καζόμ μπουτ μπεϊντίνελα ο Ιεχωβά τι ασάς κάνα ντικχένα εκχέ χουρντέ τζουκλές τι κουλαντίνελ πι πορί. Ντα τι ευχαριστίνεν ι Ιεχωβάς λέσκε μανγκιμάσκε κάνα ντικχένα εκχέ νταγιά τι κχελέλ πέσκε πι χουρντέ μαξιμίσαρ. Τθεράσα μπερεκέτι ευκαιρίες για τι σικλιάς ι Ιεχωβάσκε επειδή σαρέ οντουλά σο κερντάς, είτε ισί χουρντέ είτε μπαρέ, είτε ισί πασέ αμέντε είτε ντουρ αμένταρ, δοξάνενα-λες.​—Διαβάνεν Ψαλμός 148:​7-10.

16. Σο πρέπει τι αβάς αποφασισμέ τι κεράς;

¹⁶ Αμαρό Ντεβέλ ισί ο πο γκοντιαβέρ, ο πο ζουρανό, μανγκέλα-αμέν μπουτ, ντα σο-ντα κερέλα ισί σουκάρ. Ανταλά ιδιότητες ντα μπουτ γιαβερά ντικχίντιβενα ξεκάθαρα κι δημιουργία, απλώς χρειαζίντιβελα τι ρόντας λένγκε. Οτθάρ, πρέπει σαρέ αμέν τι αρακχάς συνέχεια σαάτι για τι μπεϊντίνας ι δημιουργία ντα τι σκεφτίνας σο σικλιαρέλα-αμέν ι Ιεχωβάσκε. Αντικάς κα αβάς ατζέ πο πασέ Οντουλέστε σο κερντάς-αμέν. (Ιακ. 4:8) Κο γιαβέρ μάθημας, κα ντικχάς σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι τζαν πασέ κο Ιεχωβά.