1. Savi si i buchi cai ajutisardea le Iovos te prinjianel mai mișto le Iehovas?

 ANDE peschi viața, o Iov dea duma bute jenența. Tha o mai baro Jeno saveia dea duma sas o Iehova Del. Caște zuriarel le Iovosco pachiamos ande Lesco goghiaverimos, tha vi ande Lesco zuralimos te lel sama pe pesche slujitori, o Iehova ortosardea lesco dichimos caring chichiva șucar buchia cai Vo cărdea-le. Sar exemplo, andea lesche amintea că Vo lelas sama pe sea le animalea, cadea că daștilas te lel sama vi pe leste. (Iov 38:39-41; 39:1, 5, 13-16) Cana gândisardea-pe ca sea so cărdea o Iehova, o Iov sichilea mai but buchia anda le șucar calități le Devlesche.

2. Sostar daștil te avel pharo anda amende te dichas i creația le Iehovaschi?

² Vi amen daisaras te prinjianas mai mișto amare Devles cana dichas le buchia cai cărdea-le. Tha poiechdata si pharo te cheras cadaia. Dacă beșas ande iech foro, ci daisaras te dichas ande fiesavo ghies i natura. Vi cana beșas ande iech gav, daisaras te das amari sama că ci si amen cadea de but timpo caște dichas mai atento i natura. Anda codoia, mai dur, va avela te das duma anda sostar si importanto te cheras amenghe timpo hai te das amari zor caște dichas i creația. Va avela te dichas sar o Iehova hai o Isus folosisarde-pe catar i creația caște sicaven-ame hai so mai daisaras te cheras caște țârdas vi aver sicaimata andai natura.

3. So sicavel că o Iehova camlea ca o Adam te bucuril-pe catar i creația?

³ O Iehova camlea ca o iechto manuș te bucuril-pe catar Leschi creația. Cadea, cana o Iehova cărdea le Adamos, vo șiutea-les ande iech șucar bar, pe savi vo trebulas te lel sama hai te bariarel-la vi mai but. (Gen. 2:8, 9, 15) Te imaginisaras amenghe sar  hutelas o ilo le Adamosco bucuriatar cana dichelas le semințe cai barionas hai le cașta cai lulughionas. So bari pachiv sas le Adamos te lel sama pe cado șucar than, i bar Eden! Mai but, o Iehova phendea le Adamosche te șiol anava le animalenghe. (Gen. 2:19, 20) O Iehova daștilas te cherel corcoro cadaia, tha vo mechlea le Adamos te cherel cadai buchi. Si ciaces, angla te șiol lenghe anava, o Adam trebulas te dichel atento sar si le animalea hai sar phiraven-pe von. O Adam trebulas te avel zurales bucurime te cherel cadaia. Si ciaces, cadai buchi ajutisardea-les te hachiarel chichi de goghiaver si o Iehova hai chichi de șucar hai bare si le buchia cai vo cărdea-le.

4. a) Sostar trebul te dichas atento i creația? b) So buchia cai cărdea-le o Iehova placian-tu o mai but?

⁴ Iech motivo anda savo trebul te dichas atento i creația si că o Iehova camel te cheras cadaia. Vo phenel amenghe: „Vazden tumare iacha caring o cerii hai dichen!”. Pala codoia pușel-ame: „Con cărdea cadal buchia?”. O răspunso si claro. (Is. 40:26) O Iehova pherdea na numai o cerii tha vi i phuv hai i marea le șucar buchianța cai cărdea-le, ca amen te daisaras te sichioas anda lende sar silo vo ciaces. (Ps. 104:24, 25) Sa cadea, te gândisaras-ame so șucar cărdea-ame o Iehova. Vo șiutea ande amende o zuralimos te dichas o șucarimos andai natura. Mai but, vo dea-ame panji simțurea caște bucurisaras-ame cu sea catar leschi creația: te dichas, te așunas, te simțosaras le vastența, te zumavas so has sau pias hai te simțosaras sar chanden le buchia de pașa amende.

5. Cadea sar phenel-pe ando Romani 1:20, save si le miștimata cai si amen dacă dichas atento i creația le Iehovaschi?

⁵ Andi Biblia arachas vi aver motivo importanto anda savo trebul te dichas atento i creația. Voi sicavel amenghe le calități le Iehovasche. (Citisar Romani 1:20.) Sar exemplo, dich le buchia cai cărdea-le o Iehova hai chichi de șucar sile cărde von. Cadala sicaven o goghiaverimos le Devlesco. Sa cadea, te gândisaras-ame ca so but feluri habena cărdea o Iehova. Cadaia sicavel chichi de but iubil vo le manușen. Cana dichas sar silo o Iehova prin le buchia cai cărdea-le, arăsas te prinjianas-les mai mișto hai te pașioas lestar vi mai but. Mai dur, va avela te dichas chichiva exemplea andai creația save o Del folosisardea-le caște sicavel le manușen buchia importanto.

6. So sichioas catar le ciriclea cai tiliaren ande aver thema mai tate?

⁶ Le Iehovas siles iech timpo alosardo anda sea le buchia. Ande fiesavo bărș, catar o sfârșito  le șionesco februaria ji ca o dipaș le șionesco mai, le israeliți dichenas sar le berze tiliarenas ande le thema mai tate caring o nordo. O Del phendea lenghe: „I barza de opral anda o cerii prinjianel mișto le anotimpuri”. (Ier. 8:7) Cadea sar alosardea o mai lașio timpo ca le ciriclea te tiliaren ande aver thema mai tate, sa cadea o Iehova alosardea o mai lașio timpo caște cherel peschi cris. Aghies, cana dichas le ciriclea sar tiliaren ande aver thema mai tate, te gândisaras-ame că le Iehovas siles iech „timpo alosardo” cana va anela o sfârșito cadala lumeaco nasul. (Hab. 2:3)

7. So daisaras te sichioas cana dichas sar vazden-pe caring o cerii le ciriclea? (Isaia 40:31)

⁷ O Iehova del zuralimos pesche slujitorenghe. Prin o profeto Isaia, o Iehova promitisardea pesche slujitorenghe că, cana va simțona-pe covle sau perade, vo va dela-len zuralimos ‘te vazden-pe sar le ciriclea’. (Citisar Isaia 40:31.) Le israeliți sas-le sicade te dichen le acvile, cai si bare ciriclea, sar vazdenas-pe caring o cerii hai bi te den prea but andal pacha mechenas-pe îngărde catar i barval. Cadai buchi ajutil-ame te hachiaras că dacă o Iehova daștil te del zuralimos cadale ciricleanghe, vo daștil te zuriarel vi pesche slujitoren. Cana diches iech bari ciricli cai vazdel-pe sea mai but opre caring o cerii bi te del prea but andal pacha, încăr ande chi goghi că o Iehova daștil te del vi tut o zuralimos te vazdes-tu opral che pharimata.

8. So sichilea o Iov cana dichlea le buchia cai cărdea-le o Iehova hai so daisaras te sichioas amen?

⁸ O Iehova silo demno pachiamasche. O Iehova ajutisardea le Iovos te pachial-pe vi mai but ande Leste. (Iov 32:2; 40:6-8) Caște cherel cadaia o Iehova dea lesche duma anda mai but șucar buchia andai creația, sar avenas le cerhaia, le nori hai le fulgerea. Vo phendea lesche vi anda le animalea, sar avenas o guruv sau o grast. (Iov 38:32-35; 39:9, 19, 20) Sea cadal buchia sicade le Iovosche na numai o baro zuralimos le Iehovasco, tha vi leschi bari iubirea hai goghiaverimos. Pala cadaia o Iov sichilea te pachial-pe vi mai but ando Iehova. (Iov 42:1-6) Sa cadea, vi amen, cana dichas atento i creația, încăras ande amari goghi că o Iehova silo but mai goghiaver hai mai zuralo sar amen. Vo daștil te duriarel cu sea amare pharimata hai chiar va cherela cadaia. Cadai buchi zuriarel-ame te pachias-ame vi mai but ande leste.

9, 10. So sicavel amenghe o cham hai o brâșând anda o Iehova?

⁹ O Isus cărdea buchi ande iech than pesche Dadeia sar „meștero lașio” cana sas cărdo o universo. Cadea că vo prinjianel zurales mișto i natura. (Prov. 8:30) Cana sas-lo pi phuv, o Isus folosisardea i creația caște sicavel pesche discipolen sar si lesco Dad. Te dichas chichiva sicaimata.

¹⁰ O Iehova iubil sea le manușen. Andi Predica pa o plain, o Isus dea duma pesche discipolența anda dui buchia anda i creația: o cham hai o brâșând. Chiar cana but manușa ci gândin-pe prea but cadale buchiande, bi lengo amen ci daisaras te traisaras. O Iehova daisardea te alosarel te na del le manușen nasul cadal daruri. Tha, anda codoia că vo silo iubitorii, vo cherel te avel o cham hai te del o brâșând opral sea le manușa. (Mat. 5:43-45) So camlea o Isus te sicavel pesche discipolen? Că o Iehova camel te iubisaras sea le manușen. Ori chichivar dichas so șucar mechel-pe tele o cham sau sar del o brâșând, daisaras te gândisaras-ame că o Iehova iubil savore manușen. Lesco exemplo zuriarel-ame te sicavas vi amen sa codoi iubirea hai te phenas i vestea lași savorenghe.

11. Sar sam zuriarde cana dichas le ciriclea?

 ¹¹ O Iehova lel sama te avel amen sea so trebul amenghe. Andi Predica pa o plain, o Isus mai phendea: „Dichen atento ca le ciriclea le cerosche: von ci șion nici andi phuv, nici na secerin hai ci chiden nici ande hambarea, cu sea cadala, tumaro Dad cerisco del-le te han”. Cana o Isus pușlea-le: „Ci san tumen mai cuci sar von?”, daștil-pe că le manușa cai sas-le code dichenas sar le ciriclea zburinas opral lende. (Mat. 6:26) Pherdo iubirea, o Isus ajutisardea-ame te dichas că o Iehova va lela sama te avel amen sea so trebul amenghe. (Mat. 6:31, 32) Cado sicaimos andai creația zuriarel vi aghies le slujitoren loialo le Iehovasche. Iech pioniera tărni andai Spania sas-li peradi anda codoia că ci daștilas te arachel pesche iech lașio than cai te beșel. Tha, pala so dichlea chichiva ciriclea sar hanas semințea hai fructea, voi sas-li zuriardi. I phei phenel: „Cadal ciriclea ajutisarde-ma te na bâstrav că o Iehova lel sama lendar hai că va lela sama vi mandar”. Țâra timpo pala codoia, voi arachlea pesche iech lașio than cai te beșel.

12. Cadea sar phenel-pe ando Matei 10:29-31, so sichioas catar le țâne ciriclea anda o Iehova?

¹² O Iehova dichel cuci fiesaves mașcar amende. Angla te bișialel pesche apostolen andi predicarea, o Isus ajutisardea-le te na daran cana le manușa avenas te așen lenghe contra. (Citisar Matei 10:29-31.) Vo dea lenghe duma anda iech ciricli cai sas zurales prinjiandi ando Israelo: i vrabia. Andel ghiesa le Isusosche, cadal ciriclea ci sas-le zurales cuci. Tha vo phendea pesche discipolenghe: „Niciech anda lende ci perel pi phuv bi ca tumaro Dad te jianel”. Hai pala codoia mai phendea: „Tumen san mai cuci sar but țâne ciriclea”. O Isus ajutisardea pesche discipolen te hachiaren că o Iehova dichelas cuci fiesaves mașcar lende. Cadea că, ci sas-len sostar te daran cana le manușa avenas te așen lenghe contra. Le discipoli siguro andine ande penghi goghi so phendea lenghe o Isus cana dichenas le vrăbii ando timpo so predichinas andel forurea hai gava. Ori chichivar diches iech țâni ciricli, na bâstăr că o Iehova iubil-tu zurales but anda codoia că vi tu ‘san mai cuci sar but țâne ciriclea’. Lesche vasteia, daștis te naches pherdo tromai părdal sea le zumaimata. (Ps. 118:6)

13. So va ajutila-ame te sichioas mai but buchia anda o Iehova andai creația?

¹³ Amen daisaras te sichioas vi aver but buchia anda o Iehova andai creația. Sar? Mai anglal, trebul te cheras amenghe timpo caște dichas atento le șucar buchia cai cărdea-le o Del hai, pala codoia, te gândisaras-ame so sicaven amenghe von anda leste. Daștil-pe te na avel amenghe sea o timpo ușoro te cheras cadaia. I Géraldine, iech phei anda Camerun, phenel: „Barilem ando foro, cadea că hachiardem că trebul te dav vi mai but mânri zor te dichav atento i natura”. Hai iech phuro de congregație po anav Alfonso phenel: „Dem mânri  sama că si importanto te rodav te cherav manghe timpo te beșav corcoro caște dichav i creația le Iehovaschi hai te gândisarav-ma ca so phenel manghe voi anda leste”.

14. So hachiardea o David cana gândisardea-pe ca i creația le Devleschi?

¹⁴ O David gândisardea-pe but ca i creația le Devleschi. Vo phendea le Iehovasche: „Cana dichav che ceruri, le buchia cai cărde-le che naia, o șionoto hai le cerhaia cai cărdean-le, phenav manghe: So si o manuș cai merel te anes tuche amintea lestar?”. (Ps. 8:3, 4) Ando timpo so dichelas o cerii pherdo cerhaia ando mașcar la ratiaco, o David ci sas-lo uimime numai anda chichi de baro sas o universo. Vo gândisardea-pe vi ca so sicavenas-les le cerhaia anda o Del. Cadea că, vo hachiardea chichi de baro si o Iehova. Aver data, o David gândisardea-pe vi ca so șucar barilea vo ando păr pesca deiaco. Cana hachiardea sea cadal buchia, vo arăslea te dichel vi mai cuci o goghiaverimos le Iehovasco. (Ps. 139:14-17)

15. De chichiva exemplea andai creația cai ajutin-ame te prinjianas mai mișto le Iehovas. (Psalmo 148:7-10)

¹⁵ Cadea sar o David, ci trebul te rodas prea dur caște arachas șucar buchia andai creația savende te gândisaras-ame. Dacă dichas pașa amende, si but buchia cai daștin te ajutin-ame te prinjianas mai mișto le Iehovas. Sar exemplo, hachiaras chichi de baro si o zuralimos le Iehovasco cana simțosaras o tachimos le chamesco pe amari morci. (Ier. 31:35) Gândisaras-ame co goghiaverimos le Devlesco cana dichas sar iech ciricli cherel pesco cuibo. Sichioas că vi le Iehovas placial-les te asal cana dichas iech țâno jucăl sar nașel pala peschi pori. Hai mulțumisaras le Iehovasche anda peschi iubirea ori chichivar dichas sar iech dei chelel-pe pesche șiavorreia. Si amen but ocazii te sichioas anda o Iehova anda codoia că sea le buchia cai vo cărdea-le – țâne hai bare, de pașă hai de dural – așaren-les. (Citisar Psalmo 148:7-10.)

16. So trebul te cheras?

¹⁶ Cana dichas le șucar buchia cai cărdea-le o Iehova, daisaras te prinjianas-les mai mișto hai hachiaras că vo silo goghiaver, zuralo, iubitoro hai că sea so cărdea si zurales șucar. Cadea că, si importanto te cheras amenghe timpo mai butivar te dichas i creația hai te gândisaras-ame so sicavel amenghe voi anda o Iehova. Cadea, va avela te pașioas vi mai but catar amaro Del, cai cărdea-ame. (Iac. 4:8) Ando articolo cai avel, va avela te dichas sar daștin le dada te ajutin penghe șiaven, te pașion le Iehovastar prin i creația.