1. Iyyoobi Yihowa albinni roore afanno gede kaaˈlinosi coyi giddo mittu maati?

 IYYOOBI mannu ledo duucha hige hasaawino; Maganu Yihowa ledo hasaawino hasaawi kayinni lowo geeshsha baxxinoho. Konni hasaawi yannara Yihowa Iyyoobi mito dhagge ikkanno kalaqama laˈˈanno gede kulinosi; tini Iyyoobi Yihowa hayyicha ikkinota huwatanno gedenna soqqamaanosira hasiisannonsare aannonsata albinni roore addaxxanno gede assitannosi. Lawishshaho, Maganu saada towaatannota Iyyoobi qaaganno gede assinosi; hakko daafira Maganu Iyyoobino towaatannosi. (Iyo. 38:39-41; 39:1, 5, 13-16) Iyyoobi kalaqama lae Maganisi akatta daafira lowore rosino.

2. Mito woyite Yihowa kalaqinore laˈneemmo faro afiˈra qarra ikkitankera dandiitannohu mayiraati?

² Ninkeno Yihowa kalaqinore xiinxalline isi daafira albinni roore rosa dandiineemmo. Ikkirono hatto assa woˈma woyite shota ikkitannonke yaa diˈˈikkino. Heeˈneemmohu katamaho ikkiro, barru baala Yihowa kalaqino kalaqama laˈneemmota gari faro afiˈra hoongammora dandiineemmo. Heeˈneemmohu katamaho ikka hoogiro nafa, kalaqama laˈˈate gari yanna dinonke yine hendammora dandiineemmo. Hakko daafira hanni yanna gaaˈmine kalaqama laˈˈate sharrama hasiissannonkehu mayiraatiro laˈno. Qoleno Yihowanna Yesuusi kalaqama horoonsidhe rosiissinohu hiittoonniitironna ninkeno kalaqama laˈne roore rosate maa assa dandiineemmoro laˈneemmo.

3. Yihowa, Addaami kalaqama lae hagiidhara hasiˈrannota leellishannori maati?

 ³ Yihowa umi manchi isi kalaqino kalaqama lae hagiidhara hasiˈrino. Maganu Addaami kalaqi woyite biifado gannatera worinosi; hattono gannate towaatannonna halashshanno gede looso uyinosi. (Kal. 2:8, 9, 15) Hanni Addaami muˈro mudhannanna daraaro daraartanna lai woyite mageeshshi geeshsha hagiidhinoro hedi. Edeni gannate towaata Addaamira lowo qoossooti! Qoleno Yihowa Addaami addi addi saadara suˈma fushshanno gede kulinosi. (Kal. 2:19, 20) Yihowa hasiˈroommero saadate suˈma umisi fushsha dandaanno; ikkirono konne looso Addaamira uyino. Addaami saadate suˈma fushshara albaanni saadanna akatansa seekke lainoti dihuluullissannote. Addaami konne looso lowo geeshsha baxinoti dihuluullissannote. Tini isi Yihowa hayyicha ikkinotanna isi kalaqino kalaqami baxisannohanna biifado ikkinota huwatanno gede kaaˈlitinositino dihuluullissannote.

4. (a) Kalaqama seekkine laˈneemmo gede assannonkehu mittu korkaati maati? (b) Yihowa kalaqinori giddo atera roore dhagge ikkannoheri maati?

⁴ Kalaqama seekkine laˈneemmo gede assannonkehu mittu korkaati Yihowa hatto assinammora hasiˈranno daafiraati. Isi, “Iimira gordo higgine laˈe!” yee koyisinonke. Hakkiinni, “Laˈinanni beeddahe kalaqinohu ayeti?” yee xaˈmino. Tenne xaˈmo dawaro diteeˈlitinote. (Isa. 40:26) Yihowa gordoho calla ikkikkinni, baattote aananna baaru giddono lowoha dhagge ikkanno kalaqama kalaqino; konne kalaqama laˈne isi daafira lowore ronseemmo. (Far. 104:24, 25) Hanni Maganu ninke kalaqinonke gara hedi! Isi kalaqamu biinfille laˈne hagiidhineemmo gede asse kalaqinonke. Qoleno isi kalaqinohu addi addi coyinni hagiidhineemmo gede, laˈˈate, macciishshate, kisate, qamasatenna suˈniissate dandoo oye kalaqinonke.

5. Roomu Sokka 1:20 kultanno garinni Yihowa kalaqinore seekkine laˈˈa kaaˈlitannonkehu hiittoonniiti?

⁵ Qullaawu Maxaafi kalaqama seekkine laˈneemmo gede assannonkeha wole korkaatano kulanno. Kalaqama laˈne Yihowa akatta daafira ronseemmo. (Roomu Sokka 1:20 nabbawi.) Lawishshaho Yihowa kalaqinore laˈe, isi hakkonne coye dhagge ikkanno garinni kalaqino gara hedi. Kuni kalaqami Yihowa hayyo dileellishanno? Qoleno hanni inteemmote addi addi sagale daafira hedi. Tinino Maganu mannu ooso mageeshshi geeshsha baxannoro leellishshanno. Kalaqino coyinni Yihowa akatta huwanteemmo woyite, albinni roore iso anfeemmo; hattono isiwa roore shinqeemmo. Hanni xa, Yihowa mannu oosora kaaˈlanno roso rosiisate  kalaqama horoonsiˈrinota mite doogga laˈno.

6. Bayichunni bayicho hadhanno cea laˈne maa rosa dandiineemmo?

⁶ Yihowara hirqino yanna noosi. Diru kiiro Ammajje agani jeeforanna Onkoleessu agani mereerimira Israeelete manni qoˈlaante aliyyera higge bubbanna laˈˈa dandaanno. Maganu Israeelete mannira, “Qoˈlaante, hawado darante hadhe, arro galagalte higganno yanna egentino” yiinonsa. (Erm. 8:7) Yihowa tenne ceara bayichunni bayicho buubbanno yanna hirqinonte gede, yoote barra abbateno yanna murino. Xaa yannara mittu bayichunni wole bayicho hadhanno cea laˈneemmo woyite, Yihowa hirqino ‘yannara’ tenne busha alame hunannota addaxxa dandiineemmo.—Imb. 2:3.

7. Cea buubbanno gara laˈˈanke maa buuxissannonke? (Isayaasi 40:31)

⁷ Yihowa soqqamaanosira wolqa aannonsa. Yihowa mannisi daafuranno woyite woy hexxo mudhanno woyite jawaante oye “allamurchu gede qoolunni buubbanno” gede assannonsata masaalaanchu Isayaasi widoonni kule qaale eino. (Isayaasi 40:31 nabbawi.) Israeele allamuru mittoreno qarramikkinni iima hige buuwanna duucha higge laˈanno; allamuru iima hige buuwannohu ayyare iima qolte dukkannonsa daafiraati. Tini, Yihowa tenne ceara wolqa uyinte gede ninkerano wolqa aannonketa qaangeemmo gede assitannonke! Jajjabba cea gordoho iima higge buubbanna laˈneemmo woyite, Yihowa iillinonke qarra dandiine saˈneemmo gede jawaante aannonketa qaangeemmo.

8. Iyyoobi Maganu kalaqinore lae maa rosino? Ninke tennenni maa ronseemmo?

⁸ Yihowa addaxxinanni Maganooti. Yihowa Iyyoobi iso albinni roore addaxxanno gede kaaˈlinosi. (Iyo. 32:2; 40:6-8) Maganu Iyyoobi ledo hasaawi woyite batinyu kalaqami daafira lawishshaho, beeddahete daafira, gomichu daafira hattono banqote daafira kulinosi. Qoleno Yihowa saadate daafira lawishshaho boowilchunna farashshu daafira kulinosi. (Iyo. 38:32-35; 39:9, 19, 20) Kuri coyibba baala Maganunnita dhagge ikkitanno wolqa calla ikkikkinni, baxillesinna hayyosi leellishshanno. Kuni hasaawi Iyyoobi albinni roore Yihowa addaxxanno gede assinosi. (Iyo. 42:1-6) Hatteente gede ninkeno kalaqama laˈneemmo woyite Yihowa taalle nookki hayyo noosihanna ninkenni roore wolqaataamo ikkinota qaangeemmo. Isi qarranke baala hoola dandaanno; qoleno hoolanno. Tini iso albinni roore addaxxineemmo gede kaaˈlitannonke.

9-10. Arrishshonna xeenu Yihowa daafira maa rosiisannonke?

⁹ Yesuusi kalaqamu daafira seekke afino. Isi “qara loosaasincho” ikkino daafira Annisi kalqete alame kalaqi woyite Iso kaaˈlate qoosso afiˈrino. (Law. 8:30, NW) Yesuusi uullate aana noo yannara rosaanosira Annisi daafira rosiisate kalaqama horoonsiˈrino. Hanni isi rosiisinoha mito roso laˈno.

¹⁰ Yihowa baalanka manna baxanno. Yesuusi Ilaalu Sibikate yannara rosaanosi batinyu manni mulluri gede asse laˈˈannoha lame kalaqama illachishshanno gede rosiisinonsa: insano arrishshotenna xeenaho. Kuri lamunku coyi heeshshotenni heeˈrate lowo geeshsha hasiisannoho. Yihowa kuri coyibba isira soqqamannokki mannira hoˈla dandaanno. Ikkirono isi shaqqillunni baalunku mannira xeenanna arrishsho aanno. (Mat. 5:43-45) Yesuusi konne roso horoonsiˈre rosaanosira Yihowa baalanka manna banxammora hasiˈrannota rosiisinonsa. Arrishsho eˈanno woyite heeˈranno biinfillenna xeena shoranna laˈneemmo woyite Yihowa  baalanka manna baxannota qaangeemmo. Isi lawishshi ninkeno baalunku mannira sabbanke baxille leellinsheemmo gede assannonke.

11. Iimi cea laˈˈa jawaachishshannonkehu hiittoonniiti?

¹¹ Yihowa hasiisannonkeha maalaamittete coye aannonke. Qoleno Yesuusi hakkiicho Ilaalu Sibikate yannara togo yiino: “Hanni Iima buubbanno cea laˈe; insa diwixidhanno; dimixxitanno; gootaaraho diwodhitanno. Ikkollana gordu Anniˈne itisannonsa.” Yesuusi, “Kiˈne cea lowo geeshsha diroortinanni?” yee xaˈmi yannara isi rosiisanna macciishshanni noo manni cea iimaanni buubbanna lainoha ikkara dandaanno. (Mat. 6:26) Tini Yihowa hasiisannonkeha maalaamittete coye aannonketa buuxissannonke! (Mat. 6:31, 32) Kalaqamu daafira kulannohu kuni rosi xaa yannara noore ammanantinore Yihowa soqqamaanono jawaachishannoho. Ispeenete gobbara heedhannoti mitte wedellitte suwisaancho heeˈrate injaanno mine afidhinokki daafira hexxo mudhitino. Kayinni ise cea gummanna gora xinqidhanna laˈuhu gedensaanni jawaante afidhino. Ise togo yitino: “Yihowa tenne cea towaatannota afaˈya isi aneno towaatannoeta qaageemma gede assitinoe.” Tini rodoo mulenni heedhanno mine afidhinoti dihuluullissannote.

12. Maatewoosi 10:29-31 kultanno garinni gurrae laˈne Yihowa daafira maa rosa dandiineemmo?

¹² Ninke mittu mittunku Yihowa albaanni waagu noonkereeti. Yesuusi soqqamaasinesi sabbakkara soyara albaanni, mannu giwannonsata waajjitannokki gede kaaˈlinonsa. (Maatewoosi 10:29-31 nabbawi.) Isi insa jawaachishate Israeelete gobbara batinyu manni afino cea yaano gurraichote daafira kulino. Hatte yannara tenne cea shiimu waagira hirranni. Isi kayinni rosaanosira togo yiinonsa: “Gordu Anniˈne afikkinni kayinni mitticho gurraicho nafa uulla diubbanno.” Isi lede, “Batinye gurrae kiˈne roortinanni” yiino. Konni garinni Yesuusi insa mittu mittunku Yihowa albaanni waagu noonsare ikkitinota huwattanno gede kaaˈlinonsa; hakko daafira insa darte waajjitanno gede assannonsari dino. Yesuusi rosaano katamahonna qachuwate sabbakkanni gurrae laˈˈanno woyite isi rosiisinonsa roso qaaggannoti dihuluullissannote. Hakko daafira kiˈneno shiimmaadda cea laˈinanni woyite, mittu mittunku Yihowa albaanni waagu nooˈne daafira ‘batinye gurrae roortinannita’ qaagge. Yihowa kaaˈlannoˈne daafira kiˈneno mannu giwannoˈneta waajja dihasiissannoˈne.—Far. 118:6.

13. Kalaqama laˈne ronseemmo gede kaaˈlannonkeri maati?

¹³ Kalaqama laˈne Yihowa daafira wole batinye roso rosa dandiineemmo. Hiittoonni? Umihunni kalaqama seekkine laˈˈate yanna gaaˈma hasiissannonke. Hakkiinni, kalaqama laˈne Yihowa daafira maa ronseemmoro heda hasiissannonke. Hatto assa woˈmanka woyite shota ikkitanno yaa diˈˈikkino. Kaamerooni gobbara heedhannoti Geeraaldini yinanni rodoo togo  yitino: “Lophoommahu katamaho ikkino daafira kalaqama seekke laˈˈate sharrama hasiissannoeta huwatoomma.” Alfonso yinannihu mittu cimeessino togo yiino: “Yihowa kalaqinore seekke laˈˈatenna kalaqamu Yihowa daafira maa rosiisannonkero hiincate yanna gaaˈma hasiissannoeta huwatoommo.”

14. Daawiti Yihowa kalaqinore hiince maa rosino?

¹⁴ Daawiti Maganu kalaqinori daafira seekke hedino. Isi Yihowa togo yiino: “Angakki looso gordo, basensara woroottore agananna beeddahe laˈnanni woyite, isire hedattora isi mannu ayeti?” (Far. 8:3, 4) Daawiti hashsha gordoho beeddahe lae calla dhagge assiˈre diagurino. Qoleno isi beeddahe lae Maganu daafira rosinore hiincino. Daawiti Yihowa bayira Magano ikkinota rosino. Wole yannara Daawiti amasi godowi giddo lophino gara hiincino. Isi kuri coyibba hiinciti Yihowa hayyo albinni roore dhagge assiˈrino.—Far. 139:14-17.

15. Kalaqama laˈe Yihowa akatta huwatootto gara leellishanno lawishsha kuli. (Faarso 148:7-10)

¹⁵ Ninkeno Daawiti gede kalaqama laˈne seekkine hiincineemmore afiˈra qarra diˈˈikkitannonke. Qooxeessinkera noore laˈnummoro batinye Yihowa akatta leellishannore wodanchineemmo. Lawishshaho arrishsho giwaadhinanni woyite arrishshote iibbilli Yihowa wolqa leellishanno gara huwatte. (Erm. 31:35) Cea mine miˈnitanna laˈinanni woyite Yihowa hayyo hedde. Woshichu buttuˈlichi farrisi ledo godoˈlanna laˈinanni woyite, Yihowa hagiirraamo Magano ikkinotanna ninkeno hagiidhinammora hasiˈrannota qaagge. Qoleno mitte ama qaaqqise ledo godoˈlitanna laˈinanni woyite baxillisi daafira Yihowa galatte. Yihowa kalaqinori baalu jawuno shiimuno, mule noohuno xeertote noohuno iso guwisanno daafira Yihowa daafira ronseemmo gede assannonkehu batinyu coyi noonke.—Faarso 148:7-10 nabbawi.

16. Maa assate murciˈra hasiissannonke?

¹⁶ Maganinke gedee hayyichi, baxillaanchinna wolqaataami dino; isi kalaqinohu baalunku coyi biifadoho. Kalaqama laˈne kurinna wole batinye akattasi wodancha dandiineemmo. Baalunku kalaqama laˈne hagiidhatenna Yihowa daafira rosate yanna gaaˈmino. Hatto assinummoro Kalaqaanchinkewa albinni roore shinqeemmo. (Yai. 4:8) Aananno birxichira, annuwunna amuuwu kalaqama horoonsidhe oosonsa Yihowawa shiqqanno gede kaaˈla dandiitanno gara ronseemmo.