1. Yopo imɔtshi yɛkɔnge yɛ Djɔbɔ ndeewaka akambo efula walendana la Yehova?

 LÁ WAMBA ankfumɔ wa Djɔbɔ ndaambe nya anto ankina lá lowiko lɔnde, djelekisá ndokamoyɛ nde, djɛ ndaambe nya Yehova Ndjambe. Lá djamba djɛsɔ Yehova ashimelaka Djɔbɔ djɛ nde ndenda la nkɔmɛ nkfumɔ nkete mɔtshi djɛ wɔlɔ lombombe djɛ ndatonge. Kɛsɔ kekokaka nkotshɛ́ Djɔbɔ djɛ nkembɛ djawo djɛnde tá balo l’akoka walekɔ́ la Yehova wa nama enkambi wɛnde. Ndjɔmbɔmba, nkambo djɛsɔ djevungolaka Djɔbɔ ente Ndjambe nkotshɛka ehomba w’anyama, lasɔ Nde nkoka nkotshɛ kaanga ehomba wɛ Djɔbɔ. (Djɔ. 38:39-41; 39:1, 5, 13-16) Má nshishima nkete mɔtshi djɛ ndatonge, Djɔbɔ ekaka akambo efula walendana la wekeka wa Ndjambe kɛnde.

2. Lamo okokaso ndjala l’okakasano djɛ nshishima etongelo kɛ Yehova?

² Edjinge iso tokoka ndjeka akambo efula walendana la Ndjambe kɛso má shishimaka elemo wɛnde w’etongelo. Koko, ape winá enkfumɔ ndeke nkambo djɛsɔ okokawɔ ndjala wɔdju leso. Ntsha owikaso nde l’angando yɛ nkekete tokoka ndjala l’okakasano wɔ nyɛna nkete djɛ Yehova ndatonge lá lowiko lɔso lɔ lofu la lofu. Kaanga owikaso nde l’ambandja y’ekonda tokoka nyɛna ente topalekɔ la winá efula wɔ ndjeka etongelo. Djɛkondeke nyontshɔ toshishime lamo oyɛwɔ djonyi efula ndjilaka welo la ndɔsaka winá djɛ nshishima etongelo la nkɔmɛ nkfumɔ. Tongoshishima wopo wɔ Yehova nya Yeso yakambe l’etongelo djɛ ndakanyɛ la kɛnɛ k’okokaso nangha djɛ mba elakanyelo efula má etongelo.

3. Kɛkɔnge kɛnyɛ ente Yehova akɔpaka djɛ Adama nsasanga la nkete djɛ ndatonge?

³ Yehova akɔpaka djɛ mpame kɛ ntondo nsasanga la etongelo kɛnde. Winá wɔ Ndjambe ndatonge Adama, Nde ɔpɛyɛka paradiso kɛ wɔlɔ lombombe djɛ nde ndjala l’eteyi edjinge ɔpɛyɛka olemo wɔ nama la nanola paradiso kɛkɔ. (Ewa. 2:8, 9, 15) Kokanela osasa woyalaki l’Adama winá wɔ ndɛnaka etamba wetafule edjinge ansoso wamɔngha. Ɔsɔngo lomo l’ekekete lowisa Adama djɛ nama bedji dj’Ɛdɛna! Yehova ashimelaka Adama lonkina djɛ mpɛyɛ anyama wiina. (Ewa. 2:19, 20) Yehova akoka ndaasɔnɛla wiina nyɔmɛlɛ; koko l’edjena kɛ nangha nghɔsɔ, nde apɛyɛka Adama odjito wɔsɔ. Ape l’ehamo, lá ntondo kɛ nde nshikikɛ wiina wa ndaapɛyɛ, Adama ekaka anyama yɛsɔ la nkɔmɛ nkfumɔ má ndenda nkete dj’ɔkɔpawɔ la wopo w’onanghawɔ akambo. Nsɔsɔlɔ, Adama ayalaka ladjɛ nkɔpa olemo wɔsɔ. Lá nsɔsɔlɔ olemo wɔsɔ w’ɔpɛyɛka mbamba kɛ mfudjɛ djedjɛ djɛnde tá balo djɛ Yehova la tá nkete djɛ wɔlɔ lombombe djɛ ndatonge.

4. a) Elonga kɛmɔtshi kɛkɔnge k’oyɛso ladjɛ nshishima etongelo? b) Nkete mɔtshi djɛkɔnge djɛ Ndjambe ndatonge djeleka nkosasangɛ?

⁴ Elonga kɛmɔtshi k’oyɛso ladjɛ nshishima etongelo nde, Yehova nyɔmɛlɛ nkɔpaka iso nangha nkambo djɛsɔ. Nde ntoshimelaka ante: ‘Nyowadjɛ wiso t’olongo ndeke nyolende.’ Masɔ nde ndjopolaka ante: ‘Kanga lotongisá nkete nkfumɔ djɛnɛ na?’ Nsakiso kelekɔ papoo. (Iza. 40:26) Yehova atongaka nkete djel’olongo, djelá looko, la djelá ndjale, djɛ ntolakanyɛka akambo efula lá nkambo djɛnde. (Yee. 104:24, 25) Kokanela lonkina wopo wɔ Ndjambe ndatonanghe iso anto. Nde atotongaka la mposɛ kɛ nsasanga la nkete djɛ wɔlɔ lombombe djɛ ndatonge. Nde atɔpɛyɛka akoka wa nyɛna, ndjoka, nkota, ndɛta, la ndjoka nsolo, akoka wasɔ ntokotshɛka djɛ nsasanga la nkete nkfumɔ djetshikitanyi djɛ ndatonge.

5. Lá nkilika Ɔrɔma 1:20, wapɔ wɛkɔnge wowaso má ndjeka etongelo kɛ Yehova?

⁵ Bible ntoshimelaka elonga kenkina k’oyɛso ladjɛ nshishima etongelo. Etongelo ntolakanyɛka wekeka wa Yehova. (Wala Ɔrɔma 1:20.) Ndjɔmbɔmba, ntsha wɛ ndenda nkete djɛ Yehova ndatonge ɔngɛna ente djetongamaka wɔlɔ efula edjinge lá yopo yɛ nkamɔ. Nkambo djɛsɔ mpatɛnyɛ ente Ndjambe alekɔ la balo lombombe? Kokanela lonkina lá nkete djɛ ndɛ djetshikitanyi dj’okotshɛso. Kɛsɔ nyɛnyɛka papoo ente Ndjambe nkɔpaka anto lá lɛdji l’efula. Winá wɛnaso wekeka wa Yehova má nkete djɛ ndatonge, iso ndekaka ndowewa wɔlɔwɔlɔ edjinge iso ntshindamaka djɛ ndeka ndasukanyɛ lande. Winá wɔsɔ nyontshɔ tolendake topo tɔmɔtshi tɔ Yehova okambande l’etongelo djɛ ndakanyɛ anto elakanyelo wɛ djonyi efula.

6. Olakanyelo wɔkɔnge wokokaso mba má ndenda tofulu tolekɔ́ l’enkfumbo kɛ nsɛkɔ?

⁶ Yehova alekɔ la winá wɔnde wonanghande akambo. Ɛnɔnyi enkfumɔ l’antenyɛ ekomo kɛ Ngɔndɔ k’ape la k’atano, ase Isariyɛlɛ wɛnaki ɛntɔntɔdji watafumbɔ djɛ nsɛkɔ t’onkoko wɔ nɔrdɛ. Ndjambe ashimelaka ase Isariyɛlɛ ante: ‘Kaanga ɛntɔntɔdji wel’olongo ndjewaka deko djɛwɔ.’ (Jɛr. 8:7) Ngo ngete Yehova ndashikikɛ eleko kɛ tofulu tɔsɔ yɔngɔsɛkɔka, nde ashikikɛka edjinge lofu lɔ ndongokotshɛ dombo djɛnde. Lɔɔko kɛnɛ, winá wolendaso tofulu tolekɔ́ l’enkfumbo kɛ nsɛkɔ tá ndjena nkina, kɛsɔ tovungolaka ente Yehova ‘ashikikɛka winá’ wɔ ndongoyakala ekomo k’andja wapɔlɔ wanɛ.—Aba. 2:3.

7. Olakanyelo wɔkɔnge w’okokaso mba winá wɛnaso ofumbwelo wɔ mfulu? (Izaya 40:31)

⁷ Yehova mpɛyɛka enkambi wɛnde nkfulu. Má lotshimbo lɔ Izaya, Yehova alakaka ante angɔpɛyɛ enkambi wɛnde wolo wɔ ‘mfumbɔ la apafu etengo mpongo’ winá woyawokawɔ ambɔ wambɔlɛmba. (Wala Izaya 40:31.) Ase Isariyɛlɛ wɛnaki mbala la mbala wopo wɔ mpongo ndasɔngaká tá djiko ipa la mpopa apafu efula. Kɛsɔ ntovungolaka ente ngo ngete ɔpɛyɛnde tofulu tɔsɔ wolo, Yehova nkoka mpɛyɛ enkambi wɛnde wolo! Winá wɛnɛ mfulu kɛmɔtshi kɛ wolo atasɔngɛ tá djiko, mbala imɔtshi má mpopa apafu ngo mbala imangha, vungɔ ente Yehova nkoka nkɔpɛyɛ wolo wɔ ndongela ekakasano wɛko.

8. Olakanyelo wɔkɔnge Djɔbɔ ndawa má nshishima etongelo kɛ Ndjambe, ko olakanyelo wɔkɔnge w’okokaso mba?

⁸ Yehova nkokaka dj’iso ndowilelá oloko. Yehova akotshɛka Djɔbɔ djɛ nde ndeka ndawɛkɛ tende. (Djɔ. 32:2; 40:6-8) Lá djamba djɛ ndaambe nya Djɔbɔ, Ndjambe atepelaka nkambo djɛ efula kɛ nkete djɛ ndatonge, ndjɔmbɔmba tɔɔtɔ, awonde, la amayimo. Yehova atepelaka lonkina nkambo dj’anyama, ndjɔmbɔmba ndjate la mpunda. (Djɔ. 38:32-35; 39:9, 19, 20) Nkete nkfumɔ djɛsɔ djɛpɛnyɛ ngo nkfulu kepawɔs’ɔdjɔmba kelekɔ́ la Ndjambe toko, koko djɛnyɛ edjinge ngandji la balo djɛnde dj’ekekete. Mpeyi má djamba djɛsɔ, Djɔbɔ ayɛka ndoyawɛkɛ té Yehova ndeka wopo wɔ ndoyawɛkɛka ntondo. (Djɔ. 42:1-6) Wopo wɔk’ɔmɔ ndeke, winá woshishimaso etongelo, kɛsɔ ntokotshɛka djɛ nyɛna ente Yehova alekɔ la balo dj’ipa l’ekomo edjinge la nkfulu k’efula ntoleka. Nde alekɔ l’akoka edjinge angokomɛ ekakasano wɛso enkfumɔ. Kɛsɔ ntokotshɛ́ká djɛ ndeka ndawɛkɛ tende.

9-10. Kɛkɔnge kɛ yaane l’amvula otolakanyɛwɔ lá nkambo djɛ Yehova?

⁹ Yeso ewaki etongelo wɔlɔ wɔlɔ. Etengo oyɛnde ‘onkambi wɔ wɔlɔ,’ nde ayalaka la mpeyi kɛ nkamba nya Papa kɛnde winá wɔ ndatongaka andja. (Woo. 8:30) M’ɔkɔngɔ, winá wɔ ndoyɛka lanɛ lá looko, Yeso akambaka l’etongelo djɛ ndakanyɛ ambeki wande akambo walendana la Papa kɛnde. Nyontshɔ tokoshishima ngo elakanyelo emangha wɛ ndalakanyɛ.

¹⁰ Yehova nyɛnyɛka ngandji kɛnde le onto onkfumɔ. Lá Djamba djɛnde djel’onkókó, Yeso asepaka ikanyi y’ambeki wande tá nkete mpe dj’anto efula yopaleke ndjila yimba: yaane l’amvula. Nkete mpe djɛsɔ dekɔ djonyi efula lá lowiko lɔso. Yehova alekɔ l’akoka wa mpekala anto wapokambela nkete mpe djɛsɔ. Koko l’edjena kɛ nangha nghɔsɔ, la ngandji kenkfumɔ nde mbadjɛka yaane la ntɔngɛka amvula le onto onkfumɔ. (Mat. 5:43-45) Yeso akambaka l’olakanyelo wɔsɔ djɛ ndakanyɛ ambeki wande ante Yehova nkɔpaka iso ndjoka onto onkfumɔ ngandji. Winá enkfumɔ wɛnaso esase w’edjimbelo kɛ winá kana wɔtɔngɛlaso ivavula yɛ vwavwa, iso nkoka mvungɔ ngandji kɛ Yehova k’ipa l’isɔnɔdji. Ndjɔmbɔmba kɛnde nkoka ntoshinda djɛ nyɛnyɛ wopo wɔ ngandji kɛ nghɔsɔ má mpoposanyɛ le onto onkfumɔ.

11. Lokembo lɔkɔnge lokokaso mba má nshishima tofulu tel’olongo?

 ¹¹ Yehova ntoseeyɛka ehomba wɛso welá demba. Ngo lá djamba djɛkɔ djɛ l’onkókó, Yeso atepelaka lonkina ante: ‘Nyolende tofulu tel’olongo la nkɔmɛ. Topakonaka, topavukaka, edjinge topawombaka nkete djɛ ndɛ l’odjiko, koko Papa kɛnyo kel’olongo ndaalesɛka.’ Mbala imɔtshi, weekameyɛki Yeso wɛnaki tofulu tofumbɔ t’olongo winá wɔ ndaawopolaka ante: ‘Nyo nyopaleke tofulu ntshina?’ (Mat. 6:26) Ɔsɔngo yopo yɛ la ngandji yɛ Yeso ndakambe la yɛkɔ djɛ ntoshikikɛ ante Yehova angotoseeyɛ ehomba wɛso welá demba! (Mat. 6:31, 32) Olakanyelo wowaso m’etongelo wokindjɛ nkembɛ enkambi wɛ Ndjambe wɛ nkɔmano. Nkaana kɛmɔtshi kɛ y’at’ekalo k’imá Espagne alɛmbaka demba ladjikɛnde atawaki mvulu kɛ nyintasɛ. Koko m’ɔkɔngɔ wɔ nde nyɛna tofulu walɛ djɛɛlɛ la mbambo, oloko wɔnde wokitaka. Nde atepelaka ante: “Tofulu tɔsɔ mvungolaka lemi ente, ntsha Yehova ndaaseyɛka ehomba wɛwɔ, mbɔ koko nde angonseyɛ edjinge lemi ehomba wɛmi.” Lako mpeta ilá masɔ, nkaana kɛsɔ awaka mvulu kɛ wɔlɔ kɛ nyintasɛ.

12. Lá nkilika Mateo 10:29-31, nsɔlɛ otolakanyɛwɔ nge lá nkambo djɛ Yehova?

¹² Yehovah ndɔsaka onto l’onto wɔ l’anteyi kɛso la ntshina. Lá ntondo kɛ nde ntoma apɔstɔlɔ wande ntopoposanyɛ, Yeso aakotshɛka dj’ipa iwɔ ndjoka anto waananyɛki wɔma. (Wala Mateo 10:29-31.) Nde ananghaka nghɔsɔ má ndaashimela nkambo djelendana la tofulu tɔmɔtshi tewamaki efula l’Isariyɛlɛ: nsɔlɛ. Tofulu tɔsɔ tɔtɔsamaki la ntshina efula l’etsho wɛ Yeso. Koko nde ashimelaka ambeki wande ante: ‘Lako kaanga kɛmɔ l’ateyi kɛwɔ kekoka nkfɔ lá looko ipa la Papa kɛnyo ndjewa.’ Masɔ nde akotshɛka ante: ‘Nyo ndeka kaanga oloyi wɔ nsɔlɛ ntshina.’ Má etepela wɛsɔ Yeso ashikikɛka ambeki wande ante Yehova ndɔsaka onto l’onto wɔ l’anteyi kɛwɔ la ntshina, djɛkondeke wapalekɔ l’elonga kɛ ndjoka onanyelo wɔma. Lá nsɔsɔlɔ winá wɔ ambeki yapoposanyɛka l’angando kana l’ambandja y’ekonda iwɔ wavungɔki etepela wɛ Yeso wɛsɔ winá enkfumɔ wɔ yɛnaka nsɔlɛ. Winá enkfumɔ wɛ ngɔngɛnaka ifulu yɛ daambi, mvungɔ ente Yehova kɔsaka wɛ la ntshina ladjikɛnde edjinge wɛ ‘ndeka oloyi wɔ nsɔlɛ ntshina.’ M’okotshɔ wɔnde, wɛ nkoka ndongela onanyelo l’eshikikelo k’enkfumɔ.—Yee. 118:6.

13. Kɛkɔnge kengotokotshɛ́ djɛ mba elakanyelo má etongelo?

¹³ Iso nkoka mba elakanyelo enkina efula walendana la Yehova má etongelo. Lá wopo wɔkɔnge? Ntondontondo, iso ladjɛ ndɔsaka winá djɛ nshishima etongelo. Másɔ, iso ladjɛ ntɔnɔla lá kɛnɛ kɛ etongelo kɛkɔ otolakanyɛwɔ lá nkambo djɛ Yehova. Apangoyalaka winá enkfumɔ wɔdju leso djɛ nangha akambo wasɔ. Géraldine, nkaana kɛmɔtshi kemá Cameroune, atepelaka ante: “Mafule nde lá ngando, djɛkondeke ayalaka okakasano le lemi djɛ nshishima etongelo.” Ikokolo imɔtshi yetawɔ Alfonso mpakisolaka ante: “Ndjekaka ente Iemi ladjɛ nonghanyɛ winá wɔ lemi ndjalaka mɔmɛlɛ djɛ nshishimaka etongelo  kɛ Yehova la ntɔnɔlaka lá kɛnɛ kɛ etongelo kɛkɔ ondakanyɛwɔ lá nkambo djɛnde.”

14. Kɛkɔnge kɛ Davidɛ ndeeke winá wɔ ndatɔnɔlaka lá etongelo kɛ Ndjambe?

¹⁴ Davidɛ atɔnɔlaki efula lá etongelo kɛ Ndjambe. Nde ashimelaka Yehova ante: “Winá wolendakami olongo wɔkɔ, elemo w’akɔla wako, ngɔndɔ la ntɔɔtɔ tɔ ngalɔngɔsɔla, onto wongovɔ́ oyɛnde na djɛ wɛ ndowila yimba?’ (Yee. 8:3, 4) Ee, winá wɔ Davidɛ ndawadjɛka wiso t’olongo l’otsho, nde atakomá ngo lá nsasanga la nkete djɛndɛnaka toko. Nde atɔnɔlaki l’onkina lá kɛnɛ kɛ tɔɔtɔ olakanyɛwɔ lá nkambo djɛ Ndjambe. Nde ɛnaka lonkfunda lɔ Yehova. Lá mbamba inkina, Davidɛ atɔnɔlaki lá wopo wɔ demba djɛnde yaafulaka lá kfundu djɛ nyɔ kɛnde. Winá wɔ ndatɔnɔlaka tá nkete djɛ nkamɔ djɛsɔ, djedjɛ djɛnde tá balo djɛ Yehova djefulaka.—Yee. 139:14-17.

15. Pɛyɛ ndjɔmbɔmba yɛ ngɛnyi wekeka wa Yehova l’etongelo kɛnde. (Yee. 148:7-10)

¹⁵ Ngo ngete Davidɛ, topalekɔ la djonyi djɛ ntshɔ ngo tá ndjena dj’etale djɛ ntɛna etongelo kɛ Yehova la ntɔtɔnɔla l’eteyi. Ntsha tolenda nkete djetodjingi la nkɔmɛ nkfumɔ, tokoka ndjisola wekeka efula wa Yehova. Ndjɔmbɔmba tokoka ntɔnɔla lá nkfulu kɛ Yehova winá w’okaso wolo wɔ yane lá loposo lɔso. (Jɛr. 31:35) Wɛ nkoka ntɔnɔla lá balo djelekɔ́ la Ndjambe winá wɛnɛ ifulu ipika djɛɛfu djɛnde. Wɛ nkoka ntɔnɔla lá wopo wɔ Yehova ɔkɔpande iso ndjala l’osasa winá wɛnɛ wɔna mvɔ atshimbatshimba djɛ namata wela wɔnde. Edjinge kawoyɛka Yehova lokasa má ngandji kɛnde winá enkfumɔ wɛnɛ nyɔ atomba nya wɔnande w’ilɛngɛ. Tolekɔ la mbamba efula yɛ ndjeka akambo walendana la Yehova ladjikɛnde ntongami djɛnde nkfumɔ, ayale djɛ nkekete kana djɛ daambi, djelekɔ́ entshupa laso kana imbango laso, ndoolumɛka.—Wala Yeembo 148:7-10.

16. Kɛkɔnge k’oyɛso ladjɛ ndashikikɛ djɛ nanghaka?

¹⁶ Ndjambe kɛso alekɔ la balo dj’ipa wɔs’ɔdjɔmba, ngandji, nkfulu edjinge nkete nkfumɔ djɛ ndananghe dekɔ wɔlɔ lombombe. Iso nkoka nyɛna wekeka ankfumɔ wasɔ edjinge ankina efula má nkete djɛ ndatonge ntsha iso nshishimaka nkete djɛkɔ la nkɔmɛ nkfumɔ. Nyontshɔ isankfumɔ tɔsake winá mbala la mbala djɛ nsasangaka l’etongelo edjinge ntɔnɔlaka lá kɛnɛ ketolakanyɛwɔ lá nkambo djɛ Yehova. Má nanghaka nghɔsɔ, tongoyasukanyɛ l’Otongi wɔso. (Dja. 4:8) Lá djamba djeyaye, tɔngɛna wopo wɔ ambotshi okokawɔ nkamba la etongelo djɛ nkotshɛ́ wana wawɔ djɛ ndasukanyɛ la Yehova.