1. San na wan fasi fa Yob leri sabi Yehovah moro bun?

 YOB ben e taki furu nanga sma. Ma a moro prenspari takimakandra di a ben abi na ini en heri libi, ben de di a ben taki nanga Yehovah Gado. Na ini a takimakandra dati, Yehovah taigi Yob fu poti prakseri na wan tu fu den kefalek sani di a ben meki. Disi ben o yepi Yob fu si taki Yehovah abi bun furu koni èn taki a man sorgu gi den futuboi fu en trutru. Fu eksempre, Gado ben sori Yob taki efu a man sorgu gi den meti, dan a ben o man sorgu gi en tu (Yob 38:39-41; 39:1, 5, 13-16). Yob kon sabi furu fu en Gado Yehovah di a luku den sani di a meki.

2. Fu san ede a no makelek ala ten fu poti prakseri na den sani di Yehovah meki?

² Wi srefi kan leri sabi Yehovah moro bun te wi e poti prakseri na den sani di a meki. Ma a no ala ten a makelek fu du dati. Efu wi e libi na ini wan foto, dan a kan taki wi no e si so furu sani di Yehovah meki. Srefi efu wi e libi na wan boitipresi, a kan taki wi no abi ten fu poti prakseri na den sani dati. Dati meki wi o go luku fu san ede a prenspari fu meki ten èn fu du muiti fu poti prakseri na den sani di Yehovah meki. Wi o si fa Yehovah nanga Yesus gebroiki den sani disi fu leri wi prenspari tori èn san wi kan du fu leri moro fu den sani di Yehovah meki.

3. Fa wi du sabi taki Yehovah ben wani taki den sani di a meki ben musu gi Adam prisiri?

³ Yehovah ben wani taki den sani di a meki ben musu gi a fosi libisma prisiri. Di Gado meki Adam, a poti en na ini wan  paradijs di no ben mankeri noti èn di ben abi so furu sani fu si. A ben taigi Adam fu sorgu gi a dyari èn fu meki en kon moro bigi (Gen. 2:8, 9, 15). Prakseri fa Adam ben e prisiri te a ben e si fa den difrenti siri ben e sproiti èn fa den bromki ben e gro. Na wan bigi grani Adam ben abi fu sorgu gi a dyari fu Eden. Yehovah ben aksi Adam tu fu gi den difrenti meti wan nen (Gen. 2:19, 20). Yehovah srefi ben kan gi den meti wan nen, ma a bosroiti fu gi Adam a wroko dati. Wi kan frustan taki Adam ben musu fu luku den meti bun fosi a gi den wan nen. Kande a ben e luku a fasi fa den de èn a fasi fa den e libi fu man gi den wan nen. Wi kan de seiker taki Adam ben lobi du a wroko dati. A musu de so, taki a wroko disi yepi en fu frustan taki en Papa Yehovah na wan sma di abi bun furu koni èn den sani di a meki moi srefisrefi.

4. (a) San na wan sani di musu meki wi ondrosuku den sani di Gado meki? (b) Sortu sani di Gado meki yu lobi?

⁴ Wan sani di musu meki wi ondrosuku den sani di Yehovah meki, na taki Yehovah srefi wani wi fu du dati. A taki: „Opo un ede èn luku go na loktu.” Dan a aksi: „Suma meki ala den sani dati?” Wi alamala sabi a piki (Yes. 40:26). Yehovah no meki sani na hemel wawan, ma a meki ala sani na grontapu tu èn na ini a se. Ala den sani disi kan leri wi furu fu Yehovah (Ps. 104:24, 25). Èn prakseri a fasi fa Gado meki wi. Na luku wi abi fu luku den sani di a meki na wi lontu nomo, dan wi e prisiri kaba. A meki wi na so wan fasi taki wi man si, yere, firi, tesi èn smeri den sani disi.

5. Soleki fa Romesma 1:20 e sori, dan fu san ede a bun fu ondrosuku den sani di Yehovah meki?

⁵ Bijbel e sori wi wan tra sani di musu meki wi ondrosuku den sani di Yehovah meki. Wi e kon sabi Yehovah moro bun te wi e du dati. (Leisi Romesma 1:20.) Fu eksempre, te yu e luku son sani di Gado meki, dan yu e si taki a no gewoon sani. A de krin taki Yehovah na wan Gado di koni srefisrefi. Prakseri den difrenti switi sani di wi kan nyan. A de krin taki Gado lobi libisma. Te wi e ondrosuku den sani di Yehovah meki, dan wi o si fa a de. Na so wi o kon sabi en moro bun èn wi o wani tron moro bun mati fu en. Kow go luku wan tu fasi fa Yehovah gebroiki den sani di a meki fu leri libisma prenspari sani.

6. San wi kan leri fu den fowru di e frei go na wan tra presi na spesrutu ten fu a yari?

⁶ Yehovah poti o ten sani musu pasa. Ibri yari, na ini a pisi ten fu februari te go miti  mindri mei, den Israelsma ben kan si den nengrekopu e frei pasa na ini a kondre go na noordsei. Gado ben taigi den Israelsma: „A nengrekopu sabi o ten a musu frei go na wan tra presi” (Yer. 8:7). Neleki fa Yehovah poti wan ten gi den fowru disi fu frei go na noordsei, na so a poti wan ten tu fu krutu libisma. Te wi e prakseri den fowru di e frei go na wan tra presi na spesrutu ten fu a yari, dan dati e tranga wi bribi taki Yehovah o tyari wan kaba kon na a ogri grontapu disi, fu di a poti wan „spesrutu ten” fu du dati.​—Hab. 2:3.

7. San yu kan leri te yu e luku fa wan fowru e frei? (Yesaya 40:31)

⁷ Yehovah e gi den futuboi fu en krakti. Yehovah ben meki a profeiti Yesaya skrifi taki te den futuboi fu en firi swaki noso den brokosaka, a ben o gi den krakti fu „frei hei neleki den abi frei fu aka”. (Leisi Yesaya 40:31.) Den Israelsma ben gwenti si fa den aka ben e frei hei na loktu. Fu di aka e meki a winti opo den, meki den no abi fu naki den frei so furu èn na so den no abi fu gebroiki furu krakti. Neleki fa Yehovah e gi den aka krakti fu frei, na so a man gi den futuboi fu en krakti tu. Disi na wan moi sani fu hori na prakseri. Sobun, te yu e si so wan fowru e frei so hei sondro fu gebroiki furu fu en krakti, dan no frigiti taki Yehovah kan gi yu a krakti tu fu pasa iniwan problema.

8. San Yob leri di a poti prakseri na den sani di Gado meki, èn san wi kan leri fu dati?

⁸ Wi kan frutrow Yehovah nanga wi heri ati. Yehovah ben yepi Yob fu frutrow moro na en tapu (Yob 32:2; 40:6-8). Di Gado ben e taki nanga Yob, a taki fu furu sani di a ben meki. A taki fu den stari, den wolku nanga den faya di e koti na hemel. Yehovah taki tu fu meti soleki a mankaw fu a sabana nanga asi (Yob 38:32-35; 39:9, 19, 20). Ala den sani disi no e sori nomo taki Gado abi furu krakti, ma den sori tu taki Gado abi lobi èn a abi bun furu koni. A takimakandra disi ben yepi Yob fu frutrow moro tapu Yehovah (Yob 42:1-6). Na so a de tu taki te wi e poti prakseri na den sani di Gado meki, dan den e memre wi taki nowan libisma abi someni koni nanga makti leki Yehovah. A man tyari wan kaba kon na ala den problema di e miti wi èn a o du dati tu. Sobun, wi kan poti ala wi frutrow na en tapu.

9-10. San son nanga alen e leri wi fu Yehovah?

⁹ Yesus ben sabi furu fu den sani di Gado meki. Di Gado ben e meki hemel nanga grontapu, a gi Yesus a grani fu wroko makandra nanga en leki „wan tumusi bun wrokoman” (Odo 8:30). Bakaten di Yesus ben de na grontapu, a gebroiki den sani di Gado meki fu leri den disipel fu en fa en Papa de. Luku wan tu sani di a leri den.

¹⁰ Yehovah e sori lobi gi ala sma. Na ini a Bergitaki di Yesus hori, a taki fu tu sani di furu sma e si leki gewoon sani: son nanga alen. Ala den tu sani disi prenspari gi a libi na grontapu. Efu Yehovah ben wani, a ben kan sorgu taki den sma di no e dini en no e kisi alen nanga son. Ma fu di a abi lobi, meki a e gi ala sma den sani disi (Mat. 5:43-45). Yesus gebroiki a tori disi fu leri den disipel taki Yehovah wani taki wi musu sori lobi gi ala sma. Te wi e si fa a son e saka so moi noso fa wan switi alen e fadon, dan disi musu meki wi prakseri a lobi di Yehovah e sori gi ala sma. Na eksempre fu en musu meki taki wi wani sori lobi tu gi ala sma. Dati meki wi wani preiki gi ala sma.

11. Sortu deki-ati wi e kisi te wi e poti prakseri na den fowru?

¹¹ Yehovah e sorgu gi wi. Na ini a srefi  Bergitaki, Yesus taki: „Luku den fowru di e frei na loktu bun. Den no e sai siri, den no e koti nyanyan èn den no e kibri nyanyan na ini maksin. Toku un Tata na hemel e gi den nyanyan.” Kande den sma di ben e arki Yesus ben kan si den fowru e frei pasa na loktu di Yesus aksi den: „Unu no warti moro den?” (Mat. 6:26) Dati na wan moi fasi fa Yesus yepi wi fu si taki wi kan de seiker taki Yehovah o sorgu gi wi (Mat. 6:31, 32). Te nanga now futuboi fu Yehovah e kisi deki-ati te den e prakseri a moi sani disi di wi kan leri fu den sani di Gado meki. Wan yongu pionier sisa na ini Spanyorokondre, ben lasi-ati fu di a no ben man feni wan bun presi fu tan. Ma di a si fa den fowru e nyan siri nanga froktu, a ben e firi moro bun. A taki: „Efu Yehovah e sorgu gi den fowru, dan a o sorgu gi mi tu.” A no langa baka dati, a sisa feni wan bun presi fu tan.

12. Te yu luku san Mateyus 10:29-31 e taki fu den pikin fowru, dan san dati e leri yu fu Yehovah?

¹² Ibriwan fu wi prenspari gi Yehovah. Fosi Yesus seni den apostel fu en go preiki, a yepi den fu si taki den no abi fu frede te sma ben o gens den. (Leisi Mateyus 10:29-31.) A gi den na eksempre fu wan pikin fowru di furu sma na ini Israel ben sabi. Na ini a ten fu Yesus, den fowru dati no ben abi furu waarde. Ma Yesus taigi den disipel: „Nowan fu den fowru o fadon na gron sondro fu un Tata sabi.” Dan a taki moro fara: „Unu warti moro leki wan heri ipi pikin fowru.” Na so Yesus sori den disipel taki ibri futuboi fu Yehovah prenspari gi en. Dati meki den no abi fu frede te sma ben o gens den. A musu de so, taki te den disipel ben e preiki na ini den foto nanga den dorpu èn den ben e si den pikin fowru disi, den ben e prakseri a sani disi di Yesus ben taigi den. Te yu e si wan pikin fowru, dan prakseri tu taki yu srefi prenspari gi Yehovah, fu di yu „warti moro leki wan heri ipi pikin fowru”. A o yepi yu fu no frede te sma e gens yu.​—Ps. 118:6.

13. San wi musu du efu wi wani leri moro fu den sani di Gado meki?

¹³ Wi kan leri furu tra sani fu Yehovah te wi e poti prakseri na den sani di a meki. Fa wi kan du dati? Wi musu meki ten fu luku bun san Gado meki. Baka dati wi musu prakseri san den sani disi e leri wi fu Yehovah. A no ala ten a makelek fu du dati. Géraldine, wan sisa fu Kamerun, taki: „Fu di mi gro kon bigi na foto, meki mi musu du moro muiti fu poti prakseri na den sani di Gado meki.” Wan owruman di nen Alfonso taki: „Mi kon si taki mi musu meki ten fu de mi wawan, so taki mi kan poti prakseri na den sani di Yehovah meki èn luku san den e leri mi fu en.”

14. San David leri di a poti prakseri na den sani di Gado meki?

 ¹⁴ David ben e meki ten fu prakseri fu den sani di Gado meki. A taigi Yehovah: „Te mi e luku yu hemel, den sani di yu meki, a mun nanga den stari di yu meki, dan mi e aksi misrefi: ’San na wan libisma taki yu e prakseri en?’” (Ps. 8:3, 4) Iya, te David ben e luku hemel na neti, dan a no ben e si nomo fa den sani di Yehovah meki moi, ma a ben e prakseri tu san den sani dati ben e leri en fu Gado. A ben kon si taki Yehovah na wan bigi Gado. Wan tra leisi, David ben prakseri fa a ben e gro na ini en mama bere. Di a prakseri fa a meki na so wan wondru fasi, dan a kisi moro warderi gi a koni di Yehovah abi.​—Ps. 139:14-17.

15. Sortu sani di Yehovah meki, yepi yu fu kon sabi en moro bun? (Psalm 148:7-10)

¹⁵ Neleki David, yu no abi fu du furu muiti fu feni wan sani di Gado meki èn luku san yu kan leri fu dati. Efu yu luku lontu, yu kan si furu sani di kan yepi yu fu leri sabi Yehovah moro bun. Fu eksempre, te yu e firi a waran fu a son, dan prakseri a bigi krakti di Yehovah abi (Yer. 31:35). Te yu e si fa wan fowru e meki en nesi, dan prakseri a koni fu Gado. Te yu e si wan pikin dagu e pruberi fu grabu en tere, dan prakseri taki Yehovah na wan Gado di lobi prisiri. Taki Yehovah tangi gi a lobi di a e sori te yu e si fa wan mama e prei nanga en beibi. Furu sani de di kan leri wi moro fu Yehovah, fu di ala den sani di a meki e prèise en. Awinsi na bigi sani noso pikin sani, awinsi den de farawe noso krosibei, den alamala e prèise en.​—Leisi Psalm 148:7-10.

16. San yu wani du baka di yu studeri na artikel disi?

¹⁶ A Gado fu wi abi bun furu koni, a e sorgu gi wi, a abi furu krakti èn ala sani di a meki moi srefisrefi. Wi kan leri moro fu den fasi disi nanga furu tra fasi fu Yehovah te wi e poti prakseri na den sani di a meki. Fu dati ede wi alamala musu teki en leki wan gwenti fu luku den sani san Gado meki èn prakseri san den e leri wi fu en. Te wi e du dati, dan wi o tron moro bun mati fu wi Mekiman (Yak. 4:8). Na ini a tra artikel wi o si fa papa nanga mama kan gebroiki den sani di Yehovah meki, fu yepi den pikin fu den fu tron mati fu Yehovah.