1. Yini lenye leyasita Jobe kutsi amati kancono Jehova?

 TINYENTI tincociswano Jobe laba nato nalabanye bantfu ekuphileni kwakhe, kodvwa lehamba embili ngulena laba nayo naJehova Nkulunkulu. Kuleyo ncociswano, Jehova watjela Jobe kutsi abuke letinye tintfo letimangalisako latidalile. Loko bekutawusita Jobe abone kutsi Jehova uhlakaniphe kakhulu futsi bekutawumenta aciniseke kakhulu kutsi Jehova utawutinakekela tikhonti takhe. Sibonelo nje, Nkulunkulu wakhumbuta Jobe kutsi uyatinakekela tilwane, ngako bekatamnakekela naye. (Jobe 38:39-41; 39:1, 5, 13-16) Ngekubuka indalo, Jobe wafundza lokunyenti ngebuntfu baNkulunkulu wakhe.

2. Yini lengahle yente kube matima kubukisisa indalo yaJehova?

² Natsi singafundza lokunyenti ngaNkulunkulu wetfu ngekutsi sibukisise tintfo latidalile. Nanobe kunjalo, loko kungahle kungabi melula kukwenta. Nangabe sihlala edolobheni, ingahle ibe mbalwa kakhulu indalo lesiyibona onkhe malanga. Ngisho nobe sihlala dvute nendalo, singahle singasitfoli kahle sikhatsi sekuyibukisisa. Ngako asesicoce ngekutsi kubaluleke ngani kutinika sikhatsi sekubukisisa indalo nekutsi setame kukwenta loko. Sitawucoca nangekutsi Jehova naJesu bayisebentisa njani indalo kuze basifundzise nekutsi yini lesingayenta kuze sitfole letinye tifundvo endalweni.

3. Yini lekhombisa kutsi Jehova bekafuna Adamu ayijabulela indalo?

³ Jehova bekafuna kutsi Adamu ayijabulele indalo.  Ngesikhatsi amdala, wamnika lipharadisi lelihle kutsi ahlale kulo, wamnika nemsebenti wekutsi alinakekele aphindze alandzise. (Gen. 2:8, 9, 15) Cabanga nje kutsi Adamu bekajabula kangakanani nakabona tinhlanyelo tihluma netimbali tichakaza. Bekungumsebenti lokhetseke kakhulu kunakekela ingadze yase-Edeni! Jehova waphindze wamcela kutsi etse tilwane. (Gen. 2:19, 20) Jehova bekangatetsa letilwane kodvwa wawunika Adamu lomsebenti. Siyaciniseka kutsi ngaphambi kwekutsi atetse, Adamu bekatibukisisa kuze abone kutsi tibukeka njani nekutsi titenta njani tintfo. Siyaciniseka nekutsi Adamu bekawujabulela lomsebenti. Wamsita wacondza kutsi Jehova uhlakaniphe kakhulu nekutsi tintfo latidalile tiyakhanga futsi tinhle.

4. (a) Kubaluleke ngani kubukisisa indalo? (b)Nguyiphi indalo loyitsandza kakhulu?

⁴ Lesinye sizatfu lesisenta sibukisise indalo kutsi Jehova ufuna sente kanjalo. Naku lakushoko: “Phakamiselani emehlo enu ezulwini nibone.” Ubese utsi: “Ngubani lodale letintfo?” Imphendvulo isebaleni. (Isa. 40:26) Jehova udale tonkhe tintfo letisezulwini naletisemhlabeni naselwandle futsi tonkhe letintfo tiyasifundzisa ngaye. (Hla. 104:24, 25) Cabanga nje nangendlela Nkulunkulu lasidale ngayo. Usente sakhona kutijabulela tintfo letinhle letisendalweni. Usiphe nelikhono lekubona, lekuva, lekutsintsa, lekunambitsa nelekuhogela, lokutintfo lesitidzingako kuze siyijabulele indalo.

5. Ngekusho kwembhalo waKubaseRoma 1:20, kusisita ngani kubukisisa indalo yaJehova?

⁵ LiBhayibheli lisitjela ngalesinye sizatfu lesibalulekile sekubukisisa indalo. Isifundzisa ngebuntfu baJehova lobehlukahlukene. (Fundza KubaseRoma 1:20.) Sibonelo nje, buka tintfo letidalwe nguJehova futsi ubone kutsi tentiwe ngendlela lemangalisako. Atikuveti yini kuhlakanipha kwaNkulunkulu? Cabanga nangekudla lokwehlukahlukene lesikujabulelako. Kubufakazi lobusebaleni bekutsi uyabatsandza bantfu. Nasibona buntfu baJehova etintfweni latidalile, simati kancono futsi sisondzelana kakhulu naye. Nyalo asesibuke letinye tindlela Jehova lasebentise ngayo indalo kuze afundzise bantfu tifundvo letibalulekile.

6. Ngusiphi sifundvo lesingasifundza nasibuka tinyoni letisuka kulenye indzawo tiye kulenye?

⁶ Jehova ubeke sikhatsi sekwenta tintfo letitsite. Njalo ngemnyaka kusukela ekupheleni kwaFebruary kuye emkhatsini waMay, ema-Israyeli  bekabona bodvoye bandiza baya ngasenyakatfo njengobe baya kulenye indzawo. Nkulunkulu watjela ema-Israyeli watsi: ‘Ngisho nadvoye uyatati tikhatsi letibekiwe.’ (Jer. 8:7, umbhalo longentasi) Njengobe Jehova abeke sikhatsi sekutsi letinyoni tisuke kulenye indzawo tiye kulenye, ubeke nesikhatsi sekuletsa sehlulelo sakhe. Lamuhla njengobe sibuka tinyoni letisuka kulenye indzawo tiya kulenye, loku kusikhumbuta kutsi singametsemba Jehova kutsi ubeke sikhatsi sekubhubhisa lelive lelibi.​—Hab. 2:3.

7. Ngusiphi sicinisekiso lesisitfolako nasibuka inyoni indiza? (Isaya 40:31)

⁷ Jehova unika bantfu bakhe emandla. Asebentisa Isaya, Jehova wetsembisa bantfu bakhe kutsi utawubenta ‘bakhuphuke ngetimphiko njengetinsweti’ nabete emandla nobe nabadvumatekile. (Fundza Isaya 40:31.) Ema-Israyeli bekavamile kubona tinsweti tindizela etulu kamelula nje. Loku kusikhumbuta kutsi njengobe Jehova anika letinyoni emandla, angabanika nebantfu bakhe emandla. Nawubona inyoni lenkhulu indiza futsi iphakamela etulu esibhakabhakeni ngaphandle kwekushaya timphiko kangako, khumbula kutsi Jehova angakunika nawe emandla ekubhekana netinkinga takho.

8. Yini Jobe layifundza ngekubuka indalo yaNkulunkulu, futsi yini tsine lesingayifundza?

⁸ Singametsemba Jehova. Jehova wasita Jobe kutsi ametsembe kakhulu. (Jobe 32:2; 40:6-8) Nakasakhuluma naJobe, Nkulunkulu wakhuluma ngetintfo letinyenti latidalile, letifaka ekhatsi tinkhanyeti, emafu nemibane. Jehova waphindze wakhuluma nangetilwane letifaka ekhatsi inkhomo yesiganga nelihhashi. (Jobe 38:32-35; 39:9, 19, 20) Konkhe loku akugcinanga nje ngekuveta kutsi Nkulunkulu unemandla lamakhulu, kodvwa kwaveta nekutsi unelutsandvo futsi uhlakaniphe kakhulu. Lencociswano yasita Jobe wametsemba kakhulu Jehova kunakucala. (Jobe 42:1-6) Ngendlela lefanako, nasibukisisa indalo sikhumbula kutsi Jehova uhlakaniphe kakhulu futsi unemandla lamakhulu kunatsi. Iphindze isifundzise kutsi angaticedza tinkinga tetfu nekutsi utawuticedza nakanjani. Loku kungasenta kutsi simetsembe kakhulu.

9-10. Lilanga nemvula kusitjelani ngaJehova?

⁹ Jesu bekati lokunyenti ngendalo. Njengobe ‘ayingcweti yekwakha,’ wasebenta naBabe wakhe nabadala tintfo. (Taga 8:30) Ngesikhatsi Jesu alamhlabeni, wasebentisa indalo kuze afundzise bafundzi bakhe ngaBabe wakhe. Cabanga nganati tifundvo letimbalwa latifundzisa.

¹⁰ Jehova ubatsandza bonkhe bantfu. ENshumayelweni yakhe yaseNtsabeni, Jesu wakhuluma nebafundzi bakhe ngelilanga nemvula, lokutintfo bantfu labanyenti labatitsatsela phansi. Kokubili loku kuyadzingeka kuze sichubeke siphila. Jehova bekangahlala angabaniki imvula nelilanga labo labangamkhonti. Kodvwa ngenca yekutsi ubatsandza bonkhe bantfu, uyabanika imvula nelilanga. (Mat. 5:43-45) Jesu wasebentisa lesifundvo kuze afundzise bafundzi bakhe kutsi Jehova ufuna sikhombise bonkhe bantfu kutsi siyabatsandza. Njalo nawubona buhle belilanga naliyotilahla kunina nobe nawubona imvula lecabulako, cabanga ngekutsi Jehova ubatsandza bonkhe bantfu. Sibonelo sakhe singasisita kutsi sikhombise lutsandvo lolufanako ngekutsi sishumayele bonkhe bantfu.

11. Kungasisita njani kubuka tinyoni?

¹¹ Jehova usinika loko lesikudzingako. Enshumayelweni lefanako, Jesu waphindze watsi: “Nakisisani tinyoni; atilimi, ativuni  futsi tite netinyango. Kodvwa Babe wenu losezulwini uyatondla.” Kusenekwenteka bantfu lebebalalele Jesu bebatibona tinyoni tindiza ngesikhatsi ababuta atsi: “Nine anikabaluleki yini kwendlula tona?” (Mat. 6:26) Ngalendlela lenelutsandvo, Jesu wasisita sabona kutsi Jehova utasinakekela! (Mat. 6:31, 32) Lesifundvo lesisitfola endalweni siyachubeka nekukhutsata bantfu baNkulunkulu labetsembekile. Lomunye dzadze lolihlahlandlela losemusha waseSpain bekadvumatekile ngobe bekangayitfoli indzawo lekahle yekuhlala. Kodvwa ngemuva kwekubuka tinyoni tidla, wabese utiva ancono. Utsi: “Letinyoni tangikhumbuta kutsi Jehova uyatinakekela futsi nami utanginakekela.” Ngekushesha nje ngemuva kwaloko, lodzadze wayitfola indzawo lekahle yekuhlala.

12. Ngekuvumelana naMatewu 10:29-31, yini bojolwane labasifundzisa yona ngaJehova?

¹² Jehova unendzaba nemuntfu ngamunye. Ngaphambi kwekutsi Jesu atfume bafundzi bakhe kutsi bayoshumayela, wabasita kutsi bancobe kwesaba kuphikiswa. (Fundza Matewu 10:29-31.) Loko wakwenta ngekutsi akhulume nabo ngenyoni lebeyivamile ka-Israyeli, lokungujolwane. Ngaleso sikhatsi, lenyoni beyingakabaluleki kangako. Kodvwa watjela bafundzi bakhe watsi: “Ngisho munye wabo angawela emhlabatsini, Babe wenu ngeke ahlale angamboni.” Wengeta watsi: “Nine nibaluleke kwendlula bojolwane labanyenti.” Ngalamavi, Jesu wacinisekisa bafundzi bakhe kutsi Jehova unendzaba nemuntfu ngamunye ngako bekute sizatfu sekutsi besabe kuphatfwa kabi. Kusenekwenteka labafundzi bebakhumbula emavi aJesu nababona bojolwane nabasashumayela emadolobheni nakuletinye tindzawo. Ngaso sonkhe sikhatsi nawubona inyoni lencane, khumbula kutsi Jehova unendzaba nawe ngobe ‘ubaluleke kwendlula bojolwane labanyenti.’ Ngekusitwa nguye, ungakhona kubeketelela nobe ngukuphi kuphikiswa ngesibindzi.​—Hla. 118:6.

13. Yini lengasisita kuze sitfole tifundvo endalweni?

¹³ Singatfola letinye tifundvo letinyenti ngaJehova endalweni. Kanjani? Kwekucala, kufanele sitinike sikhatsi sekubukisisa indalo. Ngemuva kwaloko, kufanele sicabange kutsi isifundzisani ngaJehova. Kungahle kungabi melula ngaso sonkhe sikhatsi kukwenta loko. Lomunye dzadze waseCameroon lokutsiwa nguGéraldine utsi: “Ngakhulela edolobheni, ngako bekufanele ngetame kamatima kuze ngibukisise indalo.” Lomunye lomdzala welibandla lokutsiwa ngu-Alfonso utsi: “Ngabona kutsi kufanele ngitibekele sikhatsi sekuba ngedvwa kuze ngibukisise indalo yaJehova futsi ngicabangisise ngekutsi ingifundzisani ngaye.”

14. Yini Davide layifundza nakacabangisisa ngendalo yaNkulunkulu?

¹⁴ Davide wacabangisisa ngendalo yaNkulunkulu. Watjela Jehova watsi: “Nangibuka  emazulu, lokungumsebenti wetandla takho, inyanga netinkhanyeti lotentile, umuntfu abeyini-ke kutsi ungahlale umkhumbula, nendvodzana yemuntfu beyiyini kutsi ungayinakekela?” (Hla. 8:3, 4) Ngesikhatsi Davide abuka esibhakabhakeni ebusuku, akagcinanga nje ngekuchazwa tinkhanyeti letinyenti latibona. Waphindze wacabangisisa ngaloko betimfundzisa kona ngaNkulunkulu. Wafundza kutsi Jehova mkhulu kakhulu. Ngaletinye tikhatsi, Davide bekacabanga ngendlela umtimba wakhe lowakheka ngayo esiswini samake wakhe. Nakasacabangisisa ngaloko, wabamba wangentasi ngekuhlakanipha kwaJehova.​—Hla. 139:14-17.

15. Shano tibonelo tekutsi ububone njani buntfu baJehova endalweni. (Tihlabelelo 148:7-10)

¹⁵ NjengaDavide, akudzingeki sibuke khashane kuze sitfole indalo lesingacabangisisa ngayo. Nawubuka edvute nawe, tinyenti tintfo letingakusita kutsi ufundze lokunyenti ngaJehova. Sibonelo nje, wabone emandla akhe nawuva kufutfumala kwelilanga esikhunjeni sakho. (Jer. 31:35) Cabanga ngekuhlakanipha kwakhe nawubona inyoni yakha sidleke sayo. Cabanga ngekutsi Jehova unguNkulunkulu lojabulako nawubona umdlwane wetama kubamba umsila wawo. Ngetulu kwaloko, mbonge ngelutsandvo lwakhe ngaso sonkhe sikhatsi nawubona make adlala neluswane lwakhe. Sinematfuba lamanyenti ekufundza ngaJehova kuko konkhe lakudalile futsi simdvumise ngisho nobe kukukhulu nobe kukuncane, kudvute nobe kukhashane.​—Fundza Tihlabelelo 148:7-10.

16. Yini lokufanele sitimisele kuyenta?

¹⁶ Nkulunkulu wetfu uhlakaniphe kakhulu, unelutsandvo, unemandla futsi konkhe lakwentako kuhle. Lobuntfu lobu kanye nalobunye lobunyenti, buyabonakala endalweni nangabe sitinika sikhatsi sekuyibukisisa. Shengatsi sonkhe singahlale sitinika sikhatsi sekubukisisa indalo futsi sicabange ngekutsi isifundzisani ngaJehova. Nasenta njalo, sitawusondzelana kakhulu neMdali wetfu. (Jak. 4:8) Esihlokweni lesilandzelako, sitawucoca ngekutsi batali bangayisebentisa njani indalo kuze basite bantfwana babo basondzelane naJehova.