1. Ninzila nzi imwi iyakagwasya Jobu kumuzyiba kabotu Jehova?

 AKATI kamibandi yoonse Jobu njaakaba anjiyo mubuumi bwakwe boonse, kweelede kuti mubandi ngwaakajisi a Jehova Leza wakalilibedelede. Mumubandi ooyu, Jehova wakaambila Jobu kulanga zintu zimwi zibotu nzyaakalenga. Eeci cakali kukonzya kugwasya Jobu kuzyiba mbwali musongo Jehova alimwi akuba masimpe kuti ulakonzya kupa babelesi bakwe zintu zyoonse nzyobayandika. Mucikozyanyo, Leza wakayeezya Jobu kuti ulabalanganya banyama, aboobo takonzyi kwaalilwa kumulanganya. (Job. 38:39-41; 39:1, 5, 13-16) Kwiinda mukulanga-langa zikozyanyo eezyi zyazilenge, Jobu wakaiya ziiyo zinji kujatikizya bube mbwajisi Leza.

2. Nkaambo nzi ncocikonzya kutukatazya zimwi ziindi kulangilila zilenge zya Jehova?

² Andiswe tulakonzya kwiiya zinji kujatikizya Leza kwiinda mukubikkila maano kuzintu nzyaakalenga. Pele zimwi ziindi tacili cuuba-uba kucita boobo. Ikuti katukkala mudolopo, ambweni inga tiitwakonzya kuzibona zilenge zya Jehova buzuba abuzuba. Pele nokuba kuti tukkala muminzi, zimwi ziindi tulakonzya kwaalilwa kujana ciindi cakulangilila zilenge. Aboobo amuleke tubandike kaambo ncotweelede kusolekesya kujana ciindi cakulangilila zilenge. Tulalanga-langa Jehova a Jesu mbobakabelesya zilenge mukuyiisya alimwi ancotweelede kucita kutegwa tugwasyigwe kapati azilenge.

3. Ncinzi citondezya kuti Jehova wakali kuyanda kuti Adamu kajana lukkomano muzilenge?

³ Jehova wakali kuyanda kuti Adamu kajana lukkomano kwiinda mukulangilila zilenge. Aboobo ciindi naakamulenga, wakamupa munzi waparadaiso weebeka kuti kakkala mumo alimwi wakamupa amulimo wakucita. (Matl. 2:8, 9, 15) Amweezeezye buyo mbwaakali kukkomana Adamu kulangilila mbuto kazimena amaluba kaafwulula. Eelo kaka Adamu wakajisi coolwe citaliboteli cakulanganya muunda wa Edeni! Kunze lyaboobo, Jehova wakaambila Adamu kubaulika mazina banyama bayindene-indene. (Matl. 2:19, 20) Jehova wakali kukonzya kumuulika zina munyama umwi aumwi, pele wakasala kupa Adamu mulimo ooyu. Tacidoonekwi buya kuti katanasala kubaulika mazina banyama, Adamu wakali kusaanguna kubalangilila mbobakali kuboneka ambobakali kucita zintu. Alimwi kweelede kuti eeci cakali kumukkomanisya kapati. Tacidoonekwi kuti cakali kumupa coolwe cakubona mbwali musongo Jehova alimwi ambozili zibotu zilenge zyakwe.

4. (a) Nkaambo nzi kamwi keelede kutupa kulangilila zilenge? (b) Ino nzilenge nzi nzyomukkomanina kapati?

⁴ Kaambo kamwi keelede kutupa kujana ciindi cakulangilila zilenge nkakuti, Jehova uyanda kuti katucita oobo. Utwaambila kuti: “Amulungumane kujulu mubone.” Kumane ubuzya kuti: “Ino nguni wakalenga zintu eezyi?” Bwiinguzi bulisalede. (Is. 40:26) Jehova nguwakalenga zintu zyoonse zigambya zili kujulu, anyika alimwi amulwizi, kumane zyoonse kuli ncozituyiisya kujatikizya nguwe. (Int. 104:24, 25) Amuyeeye buyo Leza mbwaakatulenga. Wakatulenga munzila yakuti katucikonzya kukkomana kulangilila zintu zibotu nzyaakalenga. Kuyungizya waawo, wakatulenga munzila yakuti katucikonzya kubona, kumvwa, kujata, kulabila zintu alimwi akununkizya.

5. Kweelana a Baroma 1:20, ino inga twagwasyigwa buti kwiinda mukulangilila zilenge?

⁵ Bbaibbele lilaamba kaambo kambi keelede kutupa kujana ciindi cakulangilila zilenge. Zilatugwasya kwiiya bube bwa Jehova. (Amubale Baroma 1:20.) Mucikozyanyo, amubone zintu nzyaakalenga Jehova mbozipangidwe munzila iikkomanisya kapati. Eeci cituyiisya kuti Leza musongo kapati. Alimwi amuyeeye kujatikizya zyakulya ziindene-indene nzyotulya. Eeci ncitondezyo caluyando ndwajisi kubantu. Ciindi notubona bube bwa Jehova kwiinda muzintu nzyaakalenga, cilatugwasya kumuzyiba kabotu alimwi akuyanda kuyumya cilongwe cesu anguwe. Lino atulange-lange nzila zimwi Jehova mbwabelesya zilenge kuyiisya bantu ziiyo ziyandika kapati.

6. Ncinzi ncotukonzya kwiiya kubayuni balonga?

⁶ Jehova ulibikkide ciindi zintu nozyeelede kucitika. Mwaka amwaka kumamanino aamwezi wa February alimwi aakati-kati kamwezi wa May, bana Israyeli bakali kwaabona matongola kaawuluka kutozya kunyika. Leza wakaambila bana Israyeli kuti: “Tongola wakujulu ulizizyi kabotu ziindi zyakwe.” (Jer. 8:7) Mbubwenya Jehova mbwaakabikka ciindi ncobeelede kulonga bayuni aaba, wakabikka kale ciindi nayooleta lubeta. Ciindi notubona bayuni kabalonga mazuba aano, cituyeezya kuti tweelede kusyoma kuti Jehova ulijisi ‘ciindi cibikkidwe’ nayooleta mamanino aabweende bwazintu oobu bubyaabi.—Hab. 2:3.

7. Ncinzi ncotukonzya kwiiya twalanga mbobauluka bayuni? (Isaya 40:31)

⁷ Jehova ulabapa nguzu babelesi bakwe. Kwiinda muli Isaya, Jehova wakasyomezya kuti unoobapa nguzu bantu bakwe kutegwa ‘bauluke kuya mujulu amababa mbuli basikwaze’ ciindi nobatyompwa. (Amubale Isaya 40:31.) Bana Israyeli bakalizyibide kubona basikwaze kabauluka kakunyina kubelesya nguzu zinji kuvwukaula mababa. Muciindi caboobo, muwo iwakali kuunga ngowakali kubagwasya kuzumanana kuuluka. Eeci cituyeezya kuti Jehova ulakonzya kutupa nguzu mbubwenya mbwabapa nguzu bayuni aaba. Ciindi nomubona muyuni mupati kauluka kuya mujulu kakunyina kwaavwukaula kapati mababa aakwe, mweelede kuyeeya kuti Jehova ulakonzya kumupa nguzu kutegwa mucikonzye kuliyumya kumapenzi ngomujisi.

8. Ncinzi Jobu ncaakayiya kwiinda mukulanga-langa zintu nzyaakalenga Leza, alimwi twiiya nzi?

⁸ Tweelede kumusyoma Jehova. Wakamugwasya Jobu kuba alusyomo luyumu mulinguwe. (Job. 32:2; 40:6-8) Ciindi naakali kubandika a Jobu, Leza wakaamba kujatikizya zilenge zyakwe ziindene-indene, kubikkilizya anyenyeezi, makumbi alimwi andabo. Kuyungizya waawo, wakaamba zyabanyama mbuli mupoho wamusyokwe alimwi abbiza. (Job. 38:32-35; 39:9, 19, 20) Zintu zyoonse eezyi zitondezya kuti Leza ulijisi nguzu, ngusiluyando alimwi musongo kapati. Eelo kaka ooyu mubandi wakamugwasya kapati Jobu nkaambo wakayiya kusyoma Jehova cakumaninina! (Job. 42:1-6) Mbubwenya buyo, ciindi notwiiya kujatikizya zilenge, tulabona kuti Jehova musongo kapati alimwi ulaanguzu kwiinda ndiswe. Uyakwaamana mapenzi oonse ngotujisi. Kaambo aaka kalakonzya kuyumya lusyomo ndotujisi mulinguwe.

9-10. Ino zuba amvwula zituyiisya nzi kujatikizya Jehova?

⁹ Jesu wakalizizyi kabotu zilenge. Kali “mubelesi uucibwene,” wakabeleka a Bausyi ciindi nobakali kulenga bubumbo. (Tus. 8:30) Kumbele, ciindi Jesu naakali anyika, wakabelesya zilenge kuyiisya basikwiiya bakwe kujatikizya Bausyi. Amubone zintu zimwi nzyaakayiisya.

¹⁰ Jehova ulatondezya luyando kubantu boonse. Mu Mulumbe wakwe Waacilundu, Jesu wakabandika abasikwiiya bakwe kujatikizya zuba amvwula, izintu bantu banji nzyobatabikkili maano kapati. Zintu eezyi zyoonse zyobilo zilayandika kapati kutegwa tuzumanane kupona. Ikuti Jehova naali kuyanda, nokunga tabapi aabo batamubelekeli. Pele caluyando, ulapa zuba amvwula kubantu boonse. (Mt. 5:43-45) Jesu wakabelesya ciiyo eeci kuyiisya basikwiiya bakwe kuti Jehova uyanda kuti katutondezya luyando kubantu boonse. Kufwumbwa leelyo notwabona mboliboneka kabotu zuba ciindi nolibbila naa mvwula iisunsumuna, tweelede kuyeeya luyando ndwajisi Jehova kubantu boonse. Cikozyanyo cakwe ceelede kutukulwaizya kutondezya luyando luli boobu kwiinda mukukambaukila bantu boonse.

11. Ino kulangilila bayuni inga kwatugwasya buti?

 ¹¹ Jehova ulatupa zintu nzyotuyandika kumubili. Mumulumbe waacilundu nguwenya, Jesu wakaamba kuti: “Amulangisye bayuni bauluka mujulu; tabasyangi mbuto naa kutebula nokuba kuyobola mumatala, nokuba boobo Uso wakujulu ulabasanina.” Ambweni bantu ibakali kumuswiilila bakali kukonzya kubabona bayuni kabauluka ciindi naakababuzya kuti: “Sena tamuyandiki kwiinda mbabo?” (Mt. 6:26) Kwiinda mukubelesya nzila eeyi yaluyando, Jesu wakatugwasya kubona kuti Jehova unootupa zintu nzyotuyandika kumubili. (Mt. 6:31, 32) Ciiyo eeci ncotwiiya kuzwa kuzilenge, cazumanana kubakulwaizya babelesi ba Jehova basyomeka. Mucikozyanyo, mucizyi umwi waku Spain alimwi mupainiya uucili mukubusi, wakalityompedwe akaambo kakwaalilwa kujana busena buli kabotu bwakukkala. Pele naakamana kulangilila bayuni kabalya nseke amicelo, wakakulwaizyigwa kapati. Wakaamba kuti: “Bayuni aaba bandiyeezya kuti Jehova ulababikkila maano, aboobo andime ulandibikkila maano kapati.” Kalitanalampa, mucizyi ooyu wakajana busena bwakukkala.

12. Kweelana a Matayo 10:29-31, ino tutiiti tutuyiisya nzi kujatikizya Jehova?

¹² Jehova ulatubikkila maano umwi aumwi kumugama. Katanatuma baapostolo bakwe kuyookambauka, Jesu wakabagwasya kutabayoowa bantu ibakali kuyoobakazya. (Amubale Matayo 10:29-31.) Wakacita oobo kwiinda mukubelesya tuyuni itwakazyibidwe kapati mu Israyeli: tutiiti. Mumazuba aa Jesu, tuyuni ootu twakajisi mpindu nsyoonto kapati. Pele wakaambila basikwiiya bakwe kuti: “Kunyina nokaba komwe kayoowida ansi Uso katakonzyi kuzyiba.” Kumane wakayungizya kwaamba kuti: “Nywebo mulayandika kwiinda tutiiti tunji.” Kwiinda mukwaamba boobu, Jesu wakatondezya basikwiiya bakwe kuti Jehova ulamubikkila maano umwi aumwi kumugama, aboobo tiibakeelede kuyoowa kupenzyegwa. Kweelede kuti basikwiiya aaba bakali kwaayeeya majwi aa Jesu ciindi nobakali kubona tutiiti mumadolopo amuminzi mobakali kukambaukila. Aboobo kufwumbwa mwabona kayuni kasyoonto, amuyeeye kuti Jehova ulamubikkila maano kapati nywebo kumugama nkaambo “mulayandika kwiinda tutiiti tunji.” Kwiinda mukugwasyigwa anguwe, mulakonzya kuliyumya ciindi nomukazyigwa.—Int. 118:6.

13. Ncinzi ncotweelede kucita kutegwa twiiye kuzwa kuzilenge?

¹³ Tulakonzya kwiiya ziiyo zimbi zinji kujatikizya Jehova kwiinda muzilenge. Mubuti? Cakusaanguna, tweelede kujana ciindi cakulangilila zilenge. Cabili, tweelede kuzinzibala kuyeeya ncozituyiisya kujatikizya Jehova. Zimwi ziindi, cilakonzya kutukatazya kucita boobo. Ba Géraldine, mucizyi uukkala ku Cameroon wakaamba kuti: “Ndakakomenena mudolopo, aboobo ndakeelede kusolekesya kujana ciindi cakulangilila zilenge.” Mwaalu umwi uutegwa Alfonso wakaamba kuti: “Ndakabona kuti ndakali kuyandika kuzandula ciindi cakuba endikke kutegwa  kandeebelela zilenge zya Jehova alimwi akuzinzibala kuyeeya ncozindiyiisya kujatikizya nguwe.”

14. Ncinzi Davida ncaakayiya naakali kuzinzibala kuyeeya zilenge zya Leza?

¹⁴ Davida wakali kuzinzibala kuyeeya kujatikizya zilenge zya Leza. Mboobu mbwaakaamba kuli Jehova: “Nendibona majulu aako, imilimo yaminwe yako, imwezi anyenyeezi nzyookabamba, ino muntu ninzi ooyo ngobikkila maano?” (Int. 8:3, 4) Masimpe, ciindi Davida naakali kulanga julu masiku, tanaakali kwiile kulanga buyo nyenyeezi zyoonse. Pele alimwi wakali kuzinzibala kuyeeya ncozyakali kumuyiisya kujatikizya Jehova. Wakazyiba kuti Jehova ngusinguzu kapati. Zimwi ziindi, Davida wakali kuzinzibala kuyeeya kujatikizya mubili wakwe mbowaakali kukomena, ciindi naakali mwida lyabanyina. Kucita boobu kwakapa kuti amulumbe kapati Jehova akaambo kabusongo bwakwe.—Int. 139:14-17.

15. Amupe zikozyanyo zitondezya mbomwalibonena bube bwa Jehova kwiinda muzilenge. (Intembauzyo 148:7-10)

¹⁵ Mbubwenya mbuli Davida, tamuyandiki kuunka kulamfwu buya kutegwa mujane cilenge ncomukonzya kuzinzibala kuyeeya. Ikuti naa mwalanga buyo zintu zimuzingulukide, mulakonzya kwiiya bube bunji mbwajisi Jehova. Mucikozyanyo, amusole kubona nguzu zya Jehova ciindi nomumvwa kukasaala kwazuba acikanda canu. (Jer. 31:35) Ciindi nomwabona kayuni kayaka citeente, amusole kuzinzibala kuyeeya busongo bwa Leza. Amuyeeye Jehova mbwali Leza uukkomene ciindi nomwabona kabwa kasobanya mucila wankako calo icipa kuti museke. Alimwi amumulumbe Jehova akaambo kaluyando ndwajisi ciindi nomwabona mutumbu kasobana amwanaakwe. Aboobo tulijisi zyoolwe zinji zyakwiiya kujatikizya Jehova nkaambo zintu zyoonse nzyaakalenga zilamutembaula, tacikwe makani naa zipati naa zisyoonto, akuti zilaafwaafwi naa zili kule.—Amubale Intembauzyo 148:7-10.

16. Ncinzi ncotweelede kusolekesya kucita?

¹⁶ Leza wesu ngowiinda busongo, ngusiluyando, singuzu alimwi zintu zyoonse nzyaakapanga nzibotu kapati. Tulakonzya kububona bube oobu alimwi abumbi bunji kwiinda mukulangilila zilenge zyakwe akuzinzibala kuyeeya. Toonse atusolekesye kujana ciindi cakulangilila zilenge alimwi akuzinzibala kuyeeya ncozituyiisya kujatikizya Jehova. Kwiinda mukucita boobo, tuyoozumanana kuyumya cilongwe cesu a Mulengi wesu. (Jak. 4:8) Mucibalo citobela, tuyoobona bazyali mbobakonzya kubelesya zilenge kugwasya bana babo kuba acilongwe a Jehova.