1. ¿Ambe jarhuataspi Jobuni sánderu sési míteni Tata Diosï Jeobani?

 JOBU uánikuecha jingoni uandontskuarhespti enga tsípiti japka, peru kánikua ísku pakaraspti enga Tata Diosï Jeoba jingoni uandontskuarhepka. Tata Diosï Jeoba arhispti Jobuni eska exepiringa máru ambe enga ima kueraaka ka engajtsïni ísku pakatajka. Inde ambe jarhuatapirindi míteni Jobuni eska Tata Diosï Jeoba kánikua jánhastiiska ka mintsikani eska ima úsïnga kuidariuani imeeri marhuariichani. Pori ejemplu, Jobu exespti eska Tata Diosï íntsaasïnga animaliichani ambe engaksï xáni uétarhinchajka paraksï úni irekani ka eska imantu úpiringa íntskuni ambe enga uétarhinchapiringa (Job 38:39-41; 39:1, 5, 13-16). Enga Jobu eratsentapka ini ambe, uánikua ambe jorhenguarhispti na enga jásïika Tata Diosï.

2. ¿Andisï méni úkua juka kueraakatani exeni?

² Juchajtuchi uaaka sánderu ambe jorhenguarhini Tata Diosïiri ambe engachi kueraakatani exejka. Peru jamberi no méntkisï fásiliuati ísï úni. Engachi siudadirhu irekaka, jamberichi no uaaka pauani pauani exeni kueraakata ambe. Ístu engachi ireta sapichu ma jimbo irekaka, jamberichi ísï exejka eskachi no tiempu jatsiska parachi kueraakata ambe exeni jarhani. Ísï jimbo exeni jauakachi andisï uétarhijki eskachi arhutaaka tiempu parachi kueraakata ambe exeni. Ístuchi exeni jauaka na enga Tata Diosï Jeoba ka Jesúsi úrapka kueraakata ambe para jukaparhakua ambe jorhentpini, ka ambe engachi uaaka úni jucha parachi seguiriini jorhenguarhini kueraakateeri ambe.

3. ¿Nénachi míteski eska Tata Diosï Jeoba uékasïreenga eska Adáni tsípikua jingoni irekapiringa imani ambe jingoni enga kueraaka?

³ Tata Diosï Jeoba uékasïreendi eska Adáni tsípikua jingoni irekapiringa imani ambe jingoni enga kueraapka. Ísï jimbo, sési  jásï paraisu ma úspti paraka Adáni jima irekapiringa, jatsintapiringa ambe ma ka para sánderu kʼéri úntani paraisuni (Gén. 2:8, 9, 15). Eranhaska je na enga xáni sési pʼikuarherapka Adáni enga exepka eskaksï semiiecha tsikixapkia ka eskaksï tsïtsïkiicha tsïpaxapkia. Kʼéri kóntperata máespti jardini de Edénini kuidariini. Ístu, Tata Diosï Jeoba arhispti Adánini eska nombri jatsikuapiringa animaliichani (Gén. 2:19, 20). Tata Diosï úpirindi indeni ánchikuarhitani úni, peru Adánini arhispti eska ísï úpiringa. Seguru eska Adáni ante de nombri jatsikuani animaliichani, exepka na engaksï jásïipka ka na engaksï jámeenga para úni nombri jatsikuani. Adáni kánikua tsitipti ini ánchikuarhitani úni. I ambe jarhuataspti exeni na enga xáni jánhastiika Tata Diosï Jeoba, ka na enga xáni ambakiti ka sési jásï ambe kueraaka.

4. a) ¿Náki jindeeski ma ambe engachi jimbo jatsika para exeni kueraakata ambe? b) ¿Ambejtsï sánderu tsitisïni kueraakateeri ambe?

⁴ Ma ambe engachi jimbo jatsika para kueraakatani exeni, jindeesti jimboka Tata Diosï Jeoba uékasïnga eskachi ísï uaaka. Ima uandasïndi: “Eranchi je auandarhu ka exe je”. Ka tátsekua kurhamarpisïndi: “¿Né kueraaski iámindu inde ambe?”. Ka míteskachia mókuntskua (Is. 40:26). Tata Diosï Jeoba uánikua ambe kueraasti auandarhu, echerirhu ka marirhu engajtsïni kánikua ísku pakatajka ka engajtsïni uánikua ambe jorhendajka (Sal. 104:24, 25). Ístu, eratsenta je na engajtsïni kueraaka Tata Diosï. Ima ústi eskachi jucha tsitiaka sési jásï ambe enga naturalesarhu jaka. Ka ústi eskachi jucha uaaka exeni, kurhaani, tsʼémuni, sïpiruni ka úni p’arhini ambe ma parachi sési pʼikuarherani imani ambe jingoni enga ima kueraaka.

5. Eska na arhijka Roma 1:20, ¿andisï xáni sésii eskachi exeaka kueraakata ambe?

⁵ Ístujtsïni Biblia arhisïndi eskachi jatsiska para exeni kueraakatani jimbokajtsïni jarhuatasïnga sánderu sési míteni na enga jásïika Tata Diosï Jeoba (arhinta je Roma 1:20). Pori ejemplu, iámindu sési jásï ambe enga Tata Diosï Jeoba kueraaka, xarhatasïndi na enga xáni jánhastiika. Ka enga xáni mámaru jásï tʼirekua ambe jaka, xarhatasïndi eskajtsïni xénchasïnga. Imeeri kueraakata ambe jimbo, úsïngachi exeni na enga jásïika Tata Diosï ka inde ambejtsïni jarhuatasïndi sánderu sési míteni ka sánderu andarhierani imani. Iásï, ju je exeni na enga Tata Diosï Jeoba úraka kueraakata ambe parajtsïni jukaparhakua ambe jorhendani.

6. ¿Ambechi uaa jorhenguarhini ima pájaruecheeri engaksï máteru nanisï nirajka mótsini?

⁶ Tata Diosï Jeoba uaxastakata jatsistia káni enga úkuarhiaka ambe ma. Mándani uéxurhini enga febreru kʼamarani jarhengia ka maiuni teruanisï, israeliteechaksï exesïreendi eskaksï máru pájaruecha engaksï siguenia arhinhajka nortirhisïksï mótsisïreenga. Tata Diosï Jeoba arhiaspti israeliteechani: “Siguenia enga auandarhisï kárajka míteasti imeeri tiempuechani” (Jer. 8:7). Ísï eska  Tata Diosï Jeoba na uaxastakata jatsika parakaksï i pájaruecha máteru nanisï niuaka, ístu uaxastakata jatsistia káni enga úkuarhiaka ambe enga ima uandakia. Exeani ini pájaruechani engaksï máteru nanisï nirajka mótsini, miátantasïndijtsïni eska Tata Diosï Jeoba uaxastaskia káni enga kʼamajkuaka ini parhakpinini enga xáni no sési jánhaskuarhini jaka, ka uaakachi mintsikani eska ima ísï uaaka (Hab. 2:3).

7. ¿Ambechi jorhenguarhisïni na engaksï kárajka pájaruecha? (Isaías 40:31).

⁷ Tata Diosï Jeoba uinhaperantaasïndi imeeri marhuariichani. Isaíasini jimbo, Tata Diosï Jeoba aiakuaspti imeeri marhuariichani eska engaksï chkétakuarhitini japiringa, ima uinhaperantaapiringa paraksï úni ísï ‘kárani komueska águileecha’ (arhinta je Isaías 40:31). Israeliteechaksï pʼindespti exeni eskaksï águileecha úrasïreenga tarhiatani paraksï kárani ka engaksï kárani jarheengia, tarhiata marhuakuasïreendi paraksï no xáni manataani kʼésïichani. I ambejtsïni miátantasïndi eska ísï eska Tata Diosï Jeoba na jarhuataajka ini pájaruechani, eska ístu úsïnga jarhuataani ka uinhaperantaani imeeri marhuariichani. Ísï jimbo, engajtsï exeaka pájaruni ma enga iauanisï kárani jauaka ka no xáni manataani kʼésïchani, miá je eskaksïni Tata Diosï Jeoba uaaka íntskuni uinhapikua parajtsï chá úni orhepani uérakuani chaari uandanhiateechani.

8. a) ¿Ambe jorhenguarhispi Jobu kueraakateeri ambe? b) ¿Ambechi jorhenguarhisïni jucha?

⁸ Uaakachi mintsikani Tata Diosï Jeobani. Enga Tata Diosï uandontskuarhepka Jobu jingoni, jarhuataspti paraka Jobuni sánderu mintsikapiringa (Job 32:2; 40:6-8). Uandaspti uánikua ambeeri enga ima kueraaka, komu jóskuechani, nubechani ka piritakuani. Ístu uandontskuarhekuspti animaliicheeri ambe, komu juátarhu anapu torueri ka kabaiueri ambe (Job 38:32-35; 39:9, 19, 20). Iámindu i ejempluechaksï jarhuataspti Jobuni paraka exepiringa na enga xáni uinhapitiika Tata Diosï ka ístu eska xénchpesïnga ka jánhastiini. Enga Tata Diosï Jeoba uandontskuarhekupka Jobuni, úspti sánderu mintsikani Tata Diosïni (Job 42:1-6). Sáno májkueni, engachi jorhenguarhini jarhajka kueraakateeri ambe, miántasïngachi eska Tata Diosï Jeoba iauani sánderu jánhaskatiiska ka uinhapitiini eska jucha. Ístu, imajtsïni uaati kénditacheani iámindu juchaari uandanhiateechani ka meru ísï uaati. Eratsentani ini ambe jarhuatasïndijtsïni sánderu mintsikani Tata Diosïni.

9, 10. Tsánda ka janikua, ¿ambejtsïni jorhendasïni Tata Diosï Jeobaeri ambe?

⁹ Jesúsi sési mítespti kueraakateeri ambe. Ka jimboka “ánchikuarhiri jánhasti” máeska, úspti jarhuatani imeeri Taatini unibersuni kueraani (Prov. 8:30). Ísï tátsekua enga Echerirhu jámani japka, úraspti kueraakatani para jorhendaani imeeri chúxapatiichani uánikua ambe imeeri Taati jémbeeri. Ju je exeni máru ambe enga jorhentpipka.

¹⁰ Tata Diosï Jeoba iáminduechani xénchaasïndi. Enga Jesúsi Juátarhu arhijtsïkpipka, uandaspti tsándeeri ka janikueri ambe, tsimani ambeeri engaksï uánikua kʼuiripuecha no xáni jukaparharajka. Peru i ambe kánikua uétarhisïndi paraka tsípikua jauaka. Tata Diosï Jeoba úpirindi no íntskuani ini ambe imeechani engaksï no marhuakujka, peru ima kánikua xénchpetiisti ka úsïndi eskaksï iáminduecha jatsiaka ini ambe (Mat. 5:43-45). Jesúsi úraspti ini ejempluni para jorhendaani imeeri chúxapatiichani eska Tata Diosï Jeoba uékasïnga eskachi xénchauaka iámindu kʼuiripuechani. Ísï jimbo, jiáni engachi exeaka na enga xáni sési jánhaskuarhijka enga jurhiata inchajtsïkuni jarhajka o na enga xáni sési pʼikuarherakuarhijka enga janintserani jarhajka, ju je eratsentani na enga xáni xénchpetiika Tata Diosï ka eska iáminduechani májkueni kaasïnga. Imeeri ejemplu úsïndi eskachi májkueni xénchpeaka ka eskachi aianguauaka iámindu kʼuiripuechani imeeri ambe.

11. ¿Nénajtsïni uinhaperantasïni pájaruechani exeani?

¹¹ Tata Diosï Jeobajtsïni íntskusïndi ambe engachi uétarhinchajka. Enga Jesúsi Juátarhu arhijtsïkpipka ístu uandaspti: “Exea je pájaruechani.  Nóksï trigu jatsikusïndi ka niksï uarhotani, ka niksï tántani ambe paraksï patsakuarhini, peru chaari Taati auandarhu anapu tʼireraasïndi”. Jamberi imeecha engaksï kurhajchani japka Jesúsini, exeaptiksï máru pájaruechani jimeesïsï kárani jarhani enga Jesúsi uandapka: “¿Nójtsï iauani sánderu jukaparhaski chá ka eska imeecha?” (Mat. 6:26). Enga Jesúsi ísï uandapka miátantasïndijtsïni eskajtsïni Tata Diosï Jeoba méntkisï íntskuaka ambe engachi uétarhinchani jauaka (Mat. 6:31, 32). I ambe enga Jesúsi jorhentpipka kueraakateeri ambe, útasï uinhaperaantaxati iásï anapu Tata Diosïiri marhuariichani. España anapu prekursora ma enga sapichku jaka, no sési pʼikuarheraxapti jimboka no exentaxapka kʼumanchikua ma para pakarani. Peru enga exeapka máru pájaruechani semiiaksï arhani jarhani ka fruta ambe, sési pʼikuarherantaspti. Ima uandasïndi: “Inde amberini miátantaspti eska enga Tata Diosï Jeoba kuidariuajka pájaruechani, ístureni úpirindi jíndeni kuidariini”. Ísï tátsekua, pirenchi úspti exentani kʼumanchikua ma para pakarani.

12. Eska na arhijka Mateu 10:29-31, ¿ambejtsïni jorhendasïni pájaruecha Tata Diosï Jeobaeri ambe?

¹² Tata Diosï Jeobajtsïni mándani arhini jukaparharasïndi. Ante de Jesúsi axaani imeeri apostoliichani aianhpini, jarhuataspti paraksï no chéni engaksï no sési kánhapiringa (arhinta je Mateu 10:29-31). Para ísï úni, uandontskuarhekuaspti pájaru sapirhatiicheeri máru engaksï gorrioni arhinhajka ka engaksï kánikua jámeenga Israeli. Indeni tiempu jimbo inde pájaruechaksï no kánikua jukaparhaspti, peru Jesúsi arhiaspti imeeri chúxapatiichani: “No ma uarhisïndi enga chaari Taati no uékajka”. Ka ístu arhiaspti: “Sánderu[jtsï] jukaparhaska chá ka eska uánikua pájaruecha”. Ísï xarhatakuaspti eska Tata Diosï Jeoba mándani arhini jukaparharasïreenga. Ka inde ambe jarhuataaspti paraksï no chéni engaksï no sési kánhapiringa. Seguru eskaksï imeeri chúxapatiicha miánteenga ambe enga Jesúsi arhiapka méni engaksï exeenga pájaru sapichu ma engaksï aianhpini jarhenga ireteecharhisï. Sáno májkueni, méntkisï engajtsï exeaka pájaruni ma, miá je eskaksïni Tata Diosï Jeoba jukaparharasïnga chánksïni, jimbokajtsï chájtu ‘sánderu jukaparhaska eska uánikua pájaruechaʼ. Tata Diosïiri jarhuajperata jingoni uaakajtsï no chéni engajtsï no sési kánhani jauaka (Sal. 118:6).

13. ¿Ambechi jatsiski para úni parachi seguiriini jarhani jorhenguarhini kueraakateeri ambe?

¹³ Uaakachi seguiriini jarhani jorhenguarhini Tata Diosï Jeobaeri ambe engachi exeska kueraakatani. Parachi ísï úni, jatsiskachi para arhutani tiempu parachi exeni kueraakatani ka eratsentani ambe engajtsïni jorhendajka Tata Diosï Jeobaeri ambe. Jamberi no méntkisï fásiliuati ísï úni. Camerún anapu pirenchi ma enga Géraldine arhinhajka, uandasïndi: “Siudadirhu tʼarhexeska, ísï jimbo, jatsispka parani sánderuni jánguarhintani kueraakata ambe exeni”. Ka orhejtsïkuti ma enga Alfonso arhinhajka, uandasïndi: “Ambe engareni jarhuatapka jíndeni jindeesti arhutani tiempu parani jandiajku jarhani ka exeni kueraakata ambe ka eratsentani ambe engareni jorhendajka Tata Diosï Jeobaeri ambe”.

14. ¿Ambe jorhenguarhispi Dabidi enga kueraakateeri ambe eratsentapka?

 ¹⁴ Rei Dabidi kánikua eratsentasïreendi kueraakateeri ambe. Arhispti Tata Diosï Jeobani: “Engani exejka chiiti auandani, engari chiiti jájkiicha jingoni úka, lunani ka jóskuechani engari tʼu kueraaka, ¿ambeeski achamasï ma enga niárajka uarhini parari tʼu ísï méntku miáni jarhani […]?” (Sal. 8:3, 4). Dabidi no solu tsitisïreendi exeani jóskuechani, sino ístu eratsentani ambe engaksï jóskuecha jorhendeenga Tata Diosïiri ambe. Kuenta íntskukuarhespti na enga xáni kʼéri ambeeka Tata Diosï Jeoba. Ka máteru xanhari, Dabidi eratsentaspti na enga úkuarhipka imeeri kuerpu amambeeri matrisirhu. Enga eratsentapka ini xáni ambakiti ambe, sánderu ísku pakaraspti exeni na enga xáni jánhaskatiika Tata Diosï Jeoba (Sal. 139:14-17).

15. ¿Ambejtsï jorhenguarhisïni Tata Diosï Jeobaeri ambe engajtsï kueraakata ambe exejka? Uanda je máru ejempluecha (Salmo 148:7-10).

¹⁵ Ísï eska Dabidi, nóchi jatsiska para iauanisï nirani parachi eratsentani kueraakateeri ambe. Uánikua ambe jarhasti engajtsïni jarhuataaka sánderu sési míteni na enga jásïika Tata Diosï Jeoba. Pori ejemplu, eratsenta je na enga xáni uinhapitiika Tata Diosï Jeoba engajtsï pʼikuarheraaka tsándani (Jer. 31:35). Ístu eratsenta je na enga xáni jánhastiika Tata Diosï engajtsï exeaka pájaruni ma xerekua úni jarhani. Ka engajtsï exeaka uíchu sapichuni ma imeeri chʼéti jingoni chʼanani jarhani, eratsenta je na enga xáni felisiika Tata Diosï. Ka grasiasi íntskunta je Tata Diosï Jeobani imeeri uékperakua jimbo engajtsï exeaka naandini ma chʼanani jarhani imeeri charhaku jingoni. Naturalesarhu, uánikua ambe jarhasti engajtsïni uaaka jorhendani Tata Diosïiri ambe, jimboka iámindu ambe enga ima kueraaka kʼéri ambe arhisïnga, no arhiparini enga kʼéri ambeuaka o sapichu ambe, enga jimajkisï jauaka o iauanisï (arhinta je Salmo 148:7-10).

16. ¿Ambechi jatsipirini para úni?

¹⁶ Juchaari Tata Diosï kánikua jánhastiisti, sési kámpisïndi, uinhapitiisti ka iámindu ambe enga ima kueraaka sési jáxesti, ka no nema jarhasti enga ísïika eska ima. Uaakachi ini kualidadichani exeani ka ístu uánikua máteruechani engachi jánguarhintaska exeni kueraakata ambe. Iáminduechachi jatsipiringa para arhutani tiempu para exeni kueraakata ambe ka eratsentani ambe engajtsïni jorhendajka Tata Diosï Jeobaeri ambe. Engachi ísï úska, sánderuchi andarhieraaka juchaari Kueraajpirini (Sant. 4:8). Máteru jorhenguarhikua jimbo, exeakachi nénaksï uaa taatiicha úrani kueraakatani paraksï jarhuataani imeecheri uájpeechani sánderu andarhierani Tata Diosï Jeobani.