1. De ɗen ma hon ga Job da’ wer ne Jeofa go de woore là?

 JOB hay ndal de jare nen naw ɓen deɓaŋ, amaa ndalge ɓe maa de wããre nen debaŋn diŋ maaga á ndal de Jeofa Baa ɓen mono. Nen ndalge se no, Jeofa wii Job ga á mo ko fẽẽre maa de woore maaga se joŋ ra mo deŋ no. Sen kay Job debaŋ maa koge ga Jeofa de koge re debaŋ. Lan se ya’ hãge ɓil Job ciŋ ti maaga Jeofa bag jag ɗiggi jar maaga joŋ wo joŋre ne hẽn mono. Sen doo maaga Jeofa bo’ sug Job ga se hã fẽẽre maaga horog wo de sãy ɓe ti ɓuy ne hara, kaŋ nen ga se ɗaw ge Job yaŋ do lay. (Job 38:39-41; 39:1,5,13-16) De maaga á ko fẽẽre maaga Baa joŋ ra mono, Job had fẽẽre ti Baa ɓen debaŋ.

2. Wer mayse ga maa po se de gayri maaga naa mo kiɗ wer ne fẽẽre maaga Baa joŋ ra mo là?

² Doo sen no lay, naa ya’ wer ko Jeofa go de woore de maaga naa yaŋ kiɗ wer fẽẽre maaga á caa ra mono. Amaa á bay gus wa. Hayga naa yaŋ ɓi leege maa kluu no, maa po ga naa ko fẽẽre maaga Jeofa joŋ ra debaŋ ga. Koh naa mo hay ba yoo fẽẽre maaga Baa caa ra, maapo naa kal ɗiggi ga wur bay do naa maa kiɗ wer ne hara wa. Naa ko we wer mayse ga á de woore maaga naa mo kiɗ wuri lan naa mo dur maa kiɗ wer fẽẽre maaga Baa caa ra mo là. Naa ko wer yaŋ ne ɗeŋ maaga Jeofa wo de Yeso joŋ wo joŋre de fẽẽre maaga Baa caa ra maa had jar téebeere wo; lan fẽn maaga naa joŋ maa da’ hadge se ɓaara mono.

3. Mayse ngaɓ ga Jeofa hay de da ge ga Adam mo fruy ti fẽẽre maaga Se caa ra mo là?

³ Jeofa hay da ga jar téebeere maa taŋgun mo fruy wo de fẽẽre maaga se joŋ ra mono. De maaga á joŋ Adam mono, Se ɓo’ ne ɓil paradis maaga á mo jee ne, mo gor ne, blam mo see de ɓe peel ni. (Tĩĩgi were 2:8, 9, 15) Ɗig we mbay ti fruygi maaga Adam joŋ de maaga á ko mbeere fẽẽre wo de tĩĩgi, fuɗgi koore wo de gẽẽge mo ɗa. Gorge ti paradis hay diŋ togoɗge maa Adam! Jeofa hã joŋre kaŋge ɗuu nayre wo ne Adam do. (Tĩĩgi were 2:19, 20) Jeofa hay mbe nen kaŋ ɗuu nayren wo diŋ Se de see ɓe tu, amaa Se men joŋre sen ne Adam. Taŋgu maaga Adam ɗig ga se kaŋ ɗuu ne nayren wo mono, á oo deŋ ko joŋre ɓaara go de woore ɗa. Joŋre sen fruy Adam debaŋ. Sen go tinoo tu ga joŋre sen kay Adam maa ko ge ga Jeofa de ko re debaŋ, lan maa ko ge ga fẽẽre maaga á joŋ ra ɓuy wo de woore, day wo de el lay.

4. (a) Wer mayse ga naa mo kiɗ wer fẽẽre maaga Baa joŋ ra là? (b) Yoo fẽẽre maaga Jeofa joŋ ra ma hõn coo jag ɓo debaŋ là?

⁴ Wãã ne naa ga naa mo hay kiɗ wer ne fẽẽre maaga Jeofa joŋ ra diŋ Se de see ɓe tu. Á wãã ne naa ga “Hoo we nen bay ciŋ ni nday ko we ɗa la.” Blam Se wãã pa ga: “Wose joŋ fẽẽre sen wo mo là?” Yiŋgi jagn bay de yoŋre wa. (Esay 40:26) Jeofa joŋ fẽẽre maa ciŋ wo de maa gesiŋ wo la, de maa nen bii wo. Saara ɓuy had wo naa ti ɓe. (Siŋ wora 104:24, 25) Ɗig we ti ɗeŋ maaga Jeofa joŋ naa mo ɗa la. Á joŋ naa nen maaga naa mo hay ko woore fẽẽre maaga Se caa ra mono. Á joŋ naa de kããge maa ko fẽẽre, maa coo’ sug fẽẽre, maa sad fẽẽre, maa gus fẽẽre day maa fõõ fẽẽre; day saara kay naa maa fruy gi wer fẽẽre maaga á joŋ ra mo ɓuy.

5. Doo maaga naa da’ ɓil Rom wo 1:​20, kiɗge wer fẽẽre maaga Jeofa joŋ ra kay naa na kay ge là?

⁵ Bible wãã ne naa ti fẽn maa tigriŋ maaga naa mo kiɗ wer ne fẽẽre maaga Baa joŋ ra mono: á had naa ti joŋre Jeofa. (Jaŋ Rom wo 1:20.) Ko ba mbo fẽẽre maaga Jeofa joŋ ra mo ɗa: á wo de joŋge de woore debaŋ. Á had wo naa ti koge re Jeofa. Ɗig we ti rege maa wer sar sar wo mo deŋ ga wo de cõõre jag naa mo ɗa. Sen ngaɓ go ne naa ga Jeofa da naa debaŋ. De maaga naa ko joŋre Jeofa see fẽẽre maaga á joŋ ra mono, se kay naa maa ko ge ɓe go de woore, lan se kay naa maa ya’ ge see ɓe lay. Patala naa ko we ɗeŋ po wo ga Jeofa joŋ joŋre de ɓaara maa had jar téebeere wo de wããre maa de woore wo see fẽẽre maaga se joŋ ra mono.

6. Ya’ge dweere wo had mayse ne naa là?

⁶ Jeofa joŋ fẽẽren wo ɓuy ti wur ɓaara. Nen kiŋgi tum ti tĩĩgi wer few darge hãã wo ti gisiɗgi few jo’ge mono, jar Israyel hay wo ko sasiya maaga hay wo urgi, raw wo ɓaŋ gloŋ hwede. Baa wãã ne jar Israyel wo ga: “Sasiya le ciŋ dra’ le de ko wur ɓe no”. (Jeremi 8:7) Jeofa joŋ ra nen maaga á mo ko wo wur urgi ɓaara no. Doo sen no lay, á go de maŋ naw wur kiida ɓen lay. Wara de maaga naa ko weere dweere wo de ya’ge ti ngeel tigriŋ mono, naa mo hã ɓil ti Jeofa, werga “wur ɓe go de ngaɓge” maa caa wer tamsir maa de ɓlaggen go.​—Habakug. 2:3.

7. Puɗgi dweere wo bay ma’ graŋ had mayse ne naa là? (Esay 40:31)

⁷ Jeofa hã ẽgre ne jar maa wer ɓen wo no. Jeofa ɓo’ Esay wãã ge ne jar ga se hã ẽgre ne hara maa ga á mo “puɗ wo doo gebeg” de maaga yaŋ wo ko see ɓaara go de gayrin no. (Esay 40:31.) Jar israyel hay wo tum ko gebege puɗgi bay ma’ graŋ. Á men wo see ɓaara ɗeege wer leege. Hayga Jeofa yaŋ hã ẽgre ne weere dweere wo no, á hã ge ne jar maa wer ɓen wo dosen no lay! De maaga ndo ko we dwee puɗge ciŋ hãã caw bay ma’ graŋ mono, kaŋ go ti ɓo ga Jeofa de kããge maa hã ẽgre ne ndo maa daŋ re maa se ɓon wo lay.

8. Job had mayse ti maaga se hay kiɗ wer ne fẽẽre maaga Baa joŋ ra mo la, day fẽẽre sen had wo mayse ne naa lay là?

⁸ Jeofa diŋ jobo maaga naa nen kaŋ ɗiggi ti ɓe. Jeofa hay kay Job maaga á mo ya’wer kaŋ ɗiggi ti se. (Job 32:2; 40:6-8) Nen ndalge ɓe maaga á ndal de Job mono, Baa wãã ne hẽn debaŋ ti fẽẽre maaga se joŋ ra doo gere, doo swaare, lan sagge-baa. Jeofa hay wãã ne hẽn ti nayre wo pa, doo cay wo de piiri. (Job 38:32-35; 39:9, 19, 20) Fẽẽre sen wo mo deŋ ɓuy naa wo go bay diŋ nen ẽgre Baa tawa wa. Amaa, á naa wo nen dage ɓe wo de ko re ɓen go ni lay. Ndalge ɓaaran hay kay Job maa kaŋ ɗiggi ti Jeofa de daŋ maa ɓaan ɓuy. (Job 42:1-6) Doo seŋ no lay, de maaga naa yaŋ kiɗ wer ne fẽẽre maaga Baa joŋ ra ɓuy no, se ɓo’ sug naa ga Jeofa de ko re de daŋ naa, lan de ẽgre de daŋ naa pa. Á de kããge maa maŋ jag re maa de gayri maa se e naa wo go. Day se joŋ ge ne. Cwãy wããre sen kay naa maa ya’ wer kaŋ ɗiggi naa ti Baa.

9-10. Wur wo de bii Baa had wo mayse ne naa ti Jeofa là?

⁹ Yeso hay de ko fẽẽre maaga Baa joŋ ra de woore. Á joŋ joŋre ti jeŋ pan ɓe doo ‘Jee joŋ joŋre maa ti ngeel ɓe’, de maaga Baa hay joŋ fẽẽren wo ɓuy mono. (Jag jõõ wo 8:30, NWT) Blam de maaga á ndu go gesiŋ la mono, Yeso hay joŋ joŋre de fẽẽre maaga Baa caa ra maa had jar maa wer ɓen wo maa ko pan ɓe. Ko we hadge ɓe maa po wo ɗa.

¹⁰ Jeofa naa nen dage ɓen go se jar ɓuy. Nen wããre ɓe maaga á sii ciŋ ti húulì mono, Yeso ɓo’ sug jar maa wer ɓen wo ti wur wo de bii Baa, ga wo diŋ fẽẽre maaga jar debaŋ bay ɗiggi ti ɓaara wa. Fẽẽre sen wo de el ɓog ɓuy maaga naa mo hay tenen ti’i. Jeofa hay mbe nen maaga se hã fẽẽre se ɓogn wo la ne jar téebeere maaga bay wo joŋ joŋre ne hẽn wa ga. Nen maaga á de hay joŋ doo sen nono, se hã wur wo de bii Baa go ne jar téebeere wo ɓuy de dage. (Matiye 5:43-45) Yeso joŋ joŋre de wããre sen maa had jar maa wer ɓen wo ga Jeofa da ga naa mo naa nen dagen go see wosela ɓuy. Tum de maaga naa ko woore le’ge wur gesiŋ, noga wooge bii Baa mono, naa mo hay ɗig ti dage maaga Jeofa naa nen ɓe go see jar ɓuy mono. Saɓlaŋ ɓen jor glog naa maa naa nen tee dage sen go de sii wããre Baa go ne jar ɓuy.

11. Koge weere dweere jor glog naa na jor ge là?

 ¹¹ Jeofa hã fẽẽre maaga naa desãy ɓaara ti ne naa ɓuy. Nen wããre ɓe maa ciŋ ti húulìn Yeso wãã ni pa ga: “Ko we dweere maga wo de puɗ gi ciŋ mo deŋ ɗa la. Á bay wo kab mopo wa, bay wo we mopo wa, bay wo tay ti mopo ɓi boole wa lay, ama hã re ge ne ha ra diŋ Pan ɓay Baa.” Maapo jar maaga hay wo co’ sug Yeso hay wo ko weere dweere wo puɗ gi ciŋ ti ɓaara de maaga Yeso hay wããge ne hara ga : “Day nday de daŋ dweere wo yaw.” (Matiye 6:26) Sen diŋ ɗeŋ dage may ga Yeso kay naa maa ko ge ga Jeofa ɗaw naa yaŋ do mo kay ne! (Matiye 6: 31, 32) Hadge se maaga naa da’ see saɓlaŋ weere dweeren wo jor wo glog jar maaga goŋ wo Jeofa de deele tum. Maygeman naa po piyoniye ɓil sir Espãy hay nen lawge werga á hay bay da’ tiŋ maa de woore ga se mo hay hay ni wa. Amaa blam maaga á ko dweere wo re mbeere fẽẽre wo de le’ge fẽẽre wo mono, se kal ko see ɓe de coɓge. A wãã ga, “Saɓlaŋ weere dweere sen ngaɓ wo me ga Jeofa ɗaw ra do, day se ɗaw ge me do lay.” Blam sen maŋ se da’ ge tiŋ maa hay ge.

12. Saɓlaŋ jir maa ɓil Matiye 10:​29-31 had mayse ne naa ti Jeofa là?

¹² Jeofa de sãy naa ti boŋ boŋ ɓuy. Taŋgu maaga á laa jar peele ɓen wo sii wããre Baa mono, Yeso kay ra maa ɗii gi go ne hẽẽne jar maaga giŋ wo ra mo ti. (Jaŋ Matiye 10:29-31.) Maa kay ra ge mono, Yeso maŋ saɓlaŋ ti dweere maaga jar hay go de ko rage ɓil sir Israyel ɓuy mono: jiri. Weere dweere sen hay bay wo de yoo ti debaŋ ti wur maa ni Yeson wa. Amaa Yeso wãã ne jar maa wer ɓen wo ga: “Boŋ yoo ɓaara le’ go gesiŋ ga Pan ɓay Baa bay de hã faage ɓe wa gà.” Blam se wãã ga: “Nday de daŋ jir wo nen Baa debaŋ yaw.” De wããre sen Yeso hay hã bawge jag jiili go ne jar maa wer ɓen wo ga Jeofa kee ra boŋ boŋ ɓuy. Diŋ wersen so ga á hay bay wo de hẽẽne do bon maaga à hay joŋ ra ge de ɓe mo wa. Jar maa wer Yeson hay wo ɗig ti ti wããre Yeson de maaga á hay wo ko jiri ɓi leege wo de progren wo de maaga saara hay sii wããre Baa mono. Tum de maaga ndo ko weel wee dwee we no, ɗig ga Jeofa de sãy naa ti boŋ boŋ ɓuy, werga ndo “de daŋ jir ngaɓa.” Wer kayge maa ni Jeofan, ndo joŋ ge hẽẽne do jar maaga giŋ wo ndo mo ga so.​—Siŋ wora 118:6.

13. Mayse kay wo naa maa da’ hadge see fẽẽre maaga Baa joŋ ra mo là?

¹³ Naa da’ hadge maa tigriŋ wo debaŋ ti Jeofa see fẽẽre maaga á joŋ ra mono. De ɗeŋ maa hõn ne? Taŋgu ɗa, naa mo kiɗ wur go de woore maa ko fẽẽre maaga á joŋ ra mono. Blam, naa mo ɗig go de woore ti fẽẽre maaga á had wo naa ti Jeofa mono. Maapo se bay doo naa tum gus maa joŋ ra ge wa. Maygeman naa po, Jeraldine, ɓi sir Kamerun wãã ga: “Ndi gẽẽ ɓi sir maa kluu, ndi wo ko ge so ga ndi hay dur maa ko fẽẽre maaga Baa caa ra  mono.” Jee maa peel tiŋ-Baa po ga à ɗen ga Alfonso wãã ga: “Ndi hay de sãy program ti maaga ndi mo hay boŋ ɓi maa ko fẽẽre maaga Jeofa joŋ ra, lan maa ɗig gi ti hadge maaga á had wo naa ti ɓe mono.”

14. Dafid hay da’ mayse ti maaga á hay ɗig gi ti fẽẽre maaga Baa caa ra mo là?

¹⁴ Dafid hay ɗig gi debaŋ ti fẽẽre maaga Baa joŋ ra mono. Á wãã ne Jeofa ga: “De maaga ndi ko ngeel ma ciŋn we, fẽẽre maga ndo joŋ ra de do ɓo mono, few de gér wora maaga ndo cor ra mono, jee táabay bà diŋ wose maga ndo joŋ nen ɗiggi ti ɓe là? Day wel je tabayn bà diŋ wose maga ndo kaŋ ɗiggi ti ɓe là?” (Siŋ wora 8:4, 5) Kiɗolgi, Dafid hay da ko ge bay diŋ ger wo tawa wa. Á hay ɗig gi debaŋ diŋ ti hadge maaga se da’ ti Baa see ɓaara mo lay. Á ko ga kluu Baa gemãy là. De wur maapo wo pa, Dafid hay ɗig gi ti maaga hõõgesee se hay gẽẽ ge le ɓil man se gẽẽ ge là mono. De maaga á hay ɗig gi ti ɗeŋ maaga Jeofa joŋ se de woore mono, ɓil ɓe fruy debaŋ ti koge re maa ni Jeofa.​—Siŋ wora 139:14-17.

15. Ngaɓ saɓlaŋ po wo ga ngaɓ wo ga ndo hay ko joŋre Jeofa ti fẽẽre maaga caa ra mo ɗa la. (Siŋ wora 148:7-10)

¹⁵ Doo Dafid no lay mono, maa po se go gus maaga naa mo da’ fẽẽre maaga Baa joŋ ra maaga naa ɗig ti ɓaara. Hayga ndo ko fẽẽre maa ti jeŋ ɓo ga Baa caa ra mo deŋ we, se kay mo yaŋ maa ko Jeofa go de woore. Ko ba ɗa, de maaga ceg hã põõre we go ne ndo de woore no, ndo ko yaŋ ga Jeofa de ẽgre. (Jeremi 31:35) Ɗig ti koge re Jeofa de maaga ndo ko weere dweere wo kne’ tiŋ ɓaara mo ɗa. Ɗig ti maaga Jeofa da fẽẽre maa joŋ feg wo de maaga ndo ko weel way kiɗgi ga se baa waale se mo ɗa. Day joŋ suse’ ne Jeofa ti dage ɓe tum de maaga ndo ko maabe po we joŋ hrag de mbaarga ɓe no. Nen maaga naa da’ maa had fẽẽre ti Jeofa mɓaara ngaɓa deŋ, werga fẽẽre maaga á joŋ ra​—kluu, klee ɓuy; maa mbaŋ de maa hãã wo ɓuy​—togoɗ wo ɗuu ɓe. Jaŋ Siŋ wora 148:7-10.

16. Naa go de bag jag see naa maa joŋ mayse là?

¹⁶ Baa naan de ko re debaŋ, de dage, de ẽgre, day fẽẽre maaga á joŋ ra ɓuy daŋ wo go do woore. Naa da’ joŋre ɓe sen wo la, de maa tigriŋ wo pa, see fẽẽre maaga á joŋ ra hayga naa yaŋ kiɗ wer ɓaara no. Nen daga naa mo hay tum kiɗ wer ne fẽẽre maaga Jeofa joŋ ra, lan daga naa mo ɗig ti maaga á had wo naa ti ɓe mono. Hayga naa joŋ sen we no, naa joŋ yaŋ tum ya’ ge see Jee caa naa no. (Jag 4:8) Ti hadge maa peeln lam no, naa ko yaŋ diŋ ɗeŋ maaga pããrebe joŋ wo joŋre de fẽẽre maaga Baa caa ra maa had weere ɓaara maaga á mo ya’ wo see Jeofa.