1. Djobo wakafundei ngezve mawara a Djehovha?

 KUCEDZA kwese kakaita Djobo mu upenyu wake, kunonyanya kukosha ndi—kucedza kaakaita na Djehovha. Paaicedza, Djehovha akamubvunza kuti anyase kuongorora zviro zvimweni zvinoshamisa zvaakasika. Kuita izvona kaizobetsera maningi Djobo kuti aziye kuti Djehovha ano ungwaru uye kaizobambisa rugondo ra Djobo rekuti Djehovha anokwanisa kupasa aseenzi Ake zvese zvaanoda. Ngo muezaniso, Djobo wakafunda kuti Djehovha anocengeta zvinyama, uye iyena waizokwanisa kumucengetawo. (Djobo 38:39-41; 39:1, 5, 13-16) Djobo wakafunda maningi ngezve mawara a Djehovha ngekuongorora zvisikwa.

2. Ngei zvingatishuphira kuongorora zvisikwa zva Djehovha?

² Isusuwo tinonyasa kufunda ngezva Djehovha patinoringisa zviya zvaakasika. Izvi pamweni pakhona azviripi nyore kuzviita. Kana imwimwi mecigara mu thaundi, munoona zvakasikwa zuwa no zuwa. Kunyazi mecigara kumbuto kuno zvisikwa zvakawanda, imwimwi munogara musina nguwa yekuzviongorora. Ngationei kuti ngei zvecikosha kutora nguwa uye kupeta masimba kuti tione zvisikwa. Ngationei kuti Djehovha na Djesu akaseenzesa kudini muezaniso we zvisikwa kuti afundise anhu uye kuti isusu tingafundei kubva pa zviro zvakasikwa.

3. Ngei tingabhuya kuti Djehovha aida kuti Adhamu apfadzwe no zvisikwa?

³ Djehovha aida kuti munhu wekutanga apfadzwe no zvisikwa Zvake. Djehovha paakasika Adhamu, akamukanda mu paraizo  omupasa basa rokuti acengete paraizo iyona uye oitawo kuti iyona ikure. (Gen. 2:8, 9, 15) Cimborangarirai kuti Adhamu akashamisika kudini eciona mbeu dzecimera uye eciona maruwa ecifununguka. Kucengeta munda wa Edheni ainga ari makomborero akakura kuna Adhamu! Djehovha akakumbira Adhamu kuti apase zvinyama mazina. (Gen. 2:19, 20) Djehovha waitokwanisa kusanangura ega mazina e zvinyama, asi iyena akapasa makomborero aya kuna Adhamu. Zvezvirokwazvo asati asanangura zina ro cinyama cimwe na cimwe, Adhamu wakaongorora muitiro we cinyama cimwe na cimwe. basa iri rakaunza mupfaro wakakura kuna Adhamu. Zvezvirokwazvo izvi zvakabetsera Adhamu kuona Djehovha hingana muzii akaita zvese no ungwaru.

4. (a) Cikonzero cipi catinaco cinoita kuti tiongorore zvisikwa? (b) Zviro zvipi zviri mu nyika zvinomushamisa?

⁴ Cikonzero cakanaka cokuti tiongorore zvisikwa ngecekuti Djehovha anoda kuti tiite izvona. Iyena anotipika eciti: “Mutsai madziso enyu muringise kudenga.” Pedzepo iyena anobvunzisa kuti: “Ndiyani wakasika zviro izvi?” Mhinduro yakadjeka. (Isa. 40:26) Djehovha akadzadza denga no nyika no bahari no zviro zaakasika zvinoshamisa zviro izvona zvinotifundisa maningi nge zvake. (Pis. 104:24, 25) Rangarirai zvinoteera, Djehovha wakatisika tecikwanisa kurangarira zviro zvakanaka zvakasikwa. Isusu tinokwanisa kuita izvona ngekuti Djehovha wakatipasa zviro zvishanu—kuona, kuzwa, kubata, kuraira uye kuzwa munuhwi.

5. Maererano na Aroma 1:20, ngei zvecikosha kufunda ngezve zviro zvakasikwa?

⁵ Bhaibheri rinotipasa zvikonzero zvimweni zvokuti tione zvakasikwa. Zvisikwa zvinotifundisa ngezve mawara a Djehovha. (Erengai Aroma 1:20.) Nge muezaniso, onai kuti zviro zvese zviri munyika zvakasikwa nge mushobo unoshamisa na Djehovha. Izvona azvipangidzi pamhene kuti Mwari wedu ano uzii? Uye rangarirai ngezve micero yakawanda iripo. Izvona zvinonyasa kupangidza kuti Mwari wedu unotida. Patinoongorora mawara a Djehovha kubva pa zviro zviya zvaakasika, tinonyasa kumuziya uye tinokwedera duze naye. Ngationei zvino kuti Djehovha wakaseenzesa kudini zvisikwa kuti akwanise kutifundisa zviro zvinokosha.

6. Tinofundei kubva pa shiri inozwi segonya?

⁶ Djehovha akapasa nguwa ku zviro zvese. Makore ese mukupera ka Fevrero uye pakati pa Mayo, zvainga zvakadjairika ku Aisraeri kuona shiri dzecimburuka mudenga dzinozwi segonya dzaimburuka dzecienda kakutsi. Djehovha akabvunza Aisraeri kuti: “Shiri idzi dzinozwi segonya  dzinoziya nguwa.” (Djer. 8:7) Djehovha wakadzipasa nguwa kuti dzifuruke dzecienda ku mbuto imweni, nge mushobo umwewo iyena wasanangurawo nguwa yekutonga kake. Pese patinoona shiri dzecimburuka kana kufuruka, edzurirai kuti Djehovha ano “nguwa yaakasanangura” kuti aunzise mugumo we nyika ino yakashata.—Abha. 2:3.

7. Kumburuka kunosoita shiri kunotipasa rugondo rei? (Isaya 40:31)

⁷ Djehovha anopasa simba aseenzi ake. Eciseenzesa muphorofita Isaya, Djehovha akagondesa kuti iyena anopasa simba aseenzi Ake “kuti amburuke hingana zvikodzi” paanozwa akaremba kana kuti akaora mwoyo. (Erengai Isaya 40:31.) Aisraeri ainga adjaira kuona zvikodzi zvecimburuka mudenga pambuto inopisa zvisikapondi mabaphiro. Izvi zvinopangidza kuti, hinga mushobo waanopasa simba zvikodzi, iyena anokwanisa kubetsera aseenzi ake! Pese pamunoona zvikodzi zvecimburuka zviri mudenga zvisikapondi ma baphiro, edzurirai kuti Djehovha angakwanisa kumupasa simba kuti mukwanise kushingirira matambudziko.

8. Djobo wakafundei ngezve zvisikwa zva Djehovha, uye ngazvipi zvatingafundawo?

⁸ Tinokwanisa kugonda na Djehovha. Djehovha wakabetsera Djobo kuziya kuti angakwanisa kugonda Naye. (Djobo 32:2; 40:6-8) Paaicedzesana na Djobo, Djehovha akabhuya ngezve zviro zvaakasika zvakaita hingana nyeredzi, makuta uye kupisa ke zuwa. Djehovha akabhuyawo ngezve zvinyama, n’ombe dze mushango no makavharo. (Djobo 38:32-35; 39:9, 19, 20) Pa zviro zvese izvi, Djobo wakafunda ngezve simba ra Djehovha, ngezve rudo rake uye uzii wake. Mumasure mekucedza uku, Djobo wakanyasa kugonda Djehovha zvaainga asati amboita kare. (Djobo 42:1-6) Nge mushobo umwewo, patinofunda ngezvakasikwa, zvinogara pamhene kuti Djehovha uno uzii wakawanda usikaperi. Uye iyena unokwanisa uye ucapedza matambudziko edu. Kuziya izvona kucatibetsera kuti tinyase kugonda na Djehovha.

9-10. Zuwa uye mvura zvinotifundisei ngezva Djehovha?

⁹ Djesu ainyasa kuziya zviro zvakasikwa. Bhaibheri rinodainza Djesu hinga “museenzi wakabetsera” Mwari pakusika zvekutoti iyena akagara no makomborero okubetsera Baba ake pakusika zviro zvese zviri pa nyika. (Zvie. 8:30) Uye Djesu paainga ari pa nyika, iyena akaseenzesa zviro zvakasikwa kuti afundise afundi ake ngezva Djehovha. Ngationei zviro zvinganani zvaakafundisa.

¹⁰ Djehovha anopangidza rudo ku anhu ese. Pa Mharidzo yake ye pa Dunhu, Djesu wakabhuya ngezve zviro zviiri zvakasikwa ndi Djehovha zvekuti anhu akawanda aazvikoshesi: Ayena wakareketa nge zve zuwa uye mvura. Zviro zviiri izvi zvinokosha maningi mu upenyu. Djehovha waizodai asikazi kutopasa zuwa no mvura ku anhu anoita zviro zvakashata. Asi, ngo rudo rake unopasa zviro izvi ku anhu ese. (Mat. 5:43-45) Djesu wakapasa muezaniso we zuwa no mvura kuti afundise afundi ake kuti tinodikana kupangidza rudo ku anhu ese. Hino pese patinonga teciona kurungama ke zuwa parinonga recidoka uye kutenderera ke mvura, tinokwanisa kunyasa kurangarira ngezve rudo risikasananguri ra Djehovha. Uye mushobo umweni wekuteedzera Djehovha ngewe kuparidzira anhu ese.

11. Tinofundei ngekuona shiri dze mudenga?

¹¹ Djehovha anotipasa zvese zvatinoda zvinocokuita no zve kurarama nazvo. Pa Mharidzo yake ye pa Dunhu, Djesu akabhuyawo kuti: “Nyasai kuona shiri dze kudenga; idzona adzisimi mbeu, kana kukorora, kana kuunganidza mumiturika, asi Baba enyu e  kudenga anodzipasa zvekurhya.” Pamweni anhu ainga aripo Djesu paaibhuya izvona aitoona shiri dzeimburuka mudenga uye Djesu akabvunzisa kuti: “Imwimwi amukoshi here kupinda idzona?” (Mat. 6:26) Ngo mushobo iwona, Djesu akatibetsera kuona kuti Djehovha nguwa dzese anotipasa zvese zvatinoda pakurarama! (Mat. 6:31, 32) Masoko aya a Djesu aciri kubambisa aseenzi a Djehovha akagondeka mazuwa ano. Mupionera umweni wecidjaha weku Espanha wainga ecidzirhya mwoyo nge ndaa yekutama mbuto yekugara. Asi mumasure mekuona shiri dzecirhya mbeu uye mucero, izvona zvakamubambisa. Hanzvadzi iyona yakati: “Shiri idzona dzakandibetsera kuona kuti kana Djehovha ecidzipasa zvokurhya, iyena anokwanisa kundiriritirawo.” Mumasure me nguwa doko, hanzvadzi iyona yakaona mbuto yekugara.

12. Maererano na Mateu 10:29-31, tinofundei ngezva Djehovha kubva ku shiri dzisikakoshi?

¹² Djehovha anokoshesa umwe na umwe wedu. Asati atuma afundi ake kooparidzira, Djesu akaabetsera kukunda kuthya ke kuteererhwa. (Erengai Mateu 10:29-31.) Iyena akaita izvona eciseenzesa shiri dzakawanda dzainga dziri ku Israeri. Mu nguwa ya Djesu shiri idzona dzainga dzisikakoshi. Asi iyena akati ku afundi ake: “apana kana imwe yadzo ingawira pasi Baba enyu asikazvizii.” Pedzepo Djesu wakatizve: “Imwimwi munokosha zvikuru kudarika zvishiri zvakawanda.” No masoko aya Djesu wakagondesa afundi ake kuti Djehovha unokoshesha umwe na umwe wawo, uye kuti awona ainga asina cikonzero cokuthya kuteererhwa. Pese paaiwona zvishiri izvi paaiparidzira mu mathaundi uye munharaunda zvezvirokwazvo awona aiedzurira masoko a Djesu. Nge mushobo umwewo pese pamunoona shiri, edzurirai kuti imwimwi munokosha maningi kuna Djehovha ngokuti imwimwi “munokosha zvikuru kudarika zvishiri zvakawanda.” No rubetso ra Djehovha, imwimwi mungakwanisa kukunda kuthya ke kuteererhwa kupi hako no rugondo.—Pis. 118:6.

13. Tinodikana kuitei kuti tifunde zviro zvakawanda ngezva Djehovha kubva ku zviro zvakasikwa?

¹³ Isusu tingafunda mafundo akawanda ngezva Djehovha kubva ku zvisikwa. Asi ngazvipi zvatinodikana kuita? Cekutanga, tinodikana kutora nguwa kuti tinyase kuona zviro zvakasikwa. Mumasure mazvo tinodikana kunyasa kurangarira kuti izvona zvinotifundisei ngezva Djehovha. Asi kuita izvona azviripi nyore. Hanzvadzi imweni yeku Camarões inozwi Géraldine, yakati: “Ndakakurira kuthaundi, hino ndinodikana kupeta masimba kuti ndiwone zviro zvakasikwa.” Mukuru umweni unozwi Alfonso wakati: “Inini ndakafunda kuti ndinodikana kutora nguwa kuti ndione zviro zvakasikwa uye kunyasa kurangarira kuti izvona zvinondifundisei ngezva Djehovha.”

14. Dhavhidhi wakafundei paainyasa kurangarira ngezve zviro zvakasikwa?

 ¹⁴ Dhavhidhi wainyasa kurangarira ngezve zvisikwa zva Djehovha. Iyena wakati kuna Djehovha: “Pandinoona matenga enyu, mabasa e nyara dzenyu, mwedzi no nyeredzi dzamakaita, kodi munhu ndiani kuti mumuedzurire?” (Pis. 8:3, 4) Paairingira kudenga cousiku kakadzara ngo nyeredzi, iyena waiona zvinodarika kurungama ke nyeredzi. Iyena waikwanisa kuona kuti izvona zvaimufundisei nge zva Djehovha. Iyena wakafunda kuti Djehovha mukuru zvakadini. Dhavhidhi, wakatorangarira ngemushobo unoshamisa ngekukura kaakaita aciri mundani ma mai ake. Zvezvirokwazvo kurangarira zvese izvi, kaitunhudzira kushamisika kaaita Dhavhidhi ngezve uzii wa Djehovha.—Pis. 139:14-17.

15. Pasai muezaniso we mawara a Djehovha atingafunda kubva ku zviro zvaakasika. (Pisarema 148:7-10)

¹⁵ Kuita hingana Dhavhidhi, azvitishuphiri kuona zviro zvakasikwa kuti tinyase kurangarira. Tinonyasa kuona zvakadjeka, mawara a Djehovha akatitenderera. Hinga muezaniso, onai simba ra Djehovha pamunozwa kupisa ke zuwa pa mwiri menyu. (Djer. 31:35) Rangarirai ngezve uzii wa Djehovha pamunoona shiri yecigadzira saki. Rangarirai ngezve mupfaro wakawanda wa Djehovha patinoona cituhwa cecigogomerera mushe waco. Uye tendai Djehovha nge rudo rake pese pamunoona mai ecitamba no mwana wawo. Isusu tino mikana yakawanda yekufunda ngezva Djehovha ngekuti zvese zvaakasika—zvikuru kana zvidoko, zviri kure kana zviri padhuze—zvinokudza Djehovha.—Erengai Pisarema 148:7-10.

16. Tinodikana kushinga kuitei?

¹⁶ Mwari wedu ano uzii, ano rudo, ano simba uye zvese zvaanoita zvakarungama. Tinokwanisa kuona zvakadjeka mawara aya a Djehovha uye no amweni akawanda patinoona zvakasikwa. Ndiyo ndaa tinodikana kupsvaka nguwa mazuwa ese yekuona zviro zvakasikwa uye kunyasa kurangarira kuti zvinotifundisei ngezva Djehovha. Nge mushobo iwona, tinonyasa kukhwedera dhuze no Musiki wedu Djehovha. (Tig. 4:8) Mu fundo inoteera, ticada kuona kuti abereki angaseenzesa kudini zvisikwa kuti afundise ana awo.