1. Мар юрттӥз Иовлы Иеговаез умойгес тодыны?

 ОДӤГ вераськонэз Иов вань улытозяз ӧз вунэты, дыр. Со вераськиз Иегова Инмарен. Иовлы юнгес осконо вал, Инмар визьлыко но аслаз ужась-тыршисьёсыз сярысь сюлмаськыны быгатэ шуыса. Соин ик Иегова Иовлэсь саклыксэ висъяз паймымон кылдытэмъёсызлы. Кылсярысь, Инмар Иовлы тодаз вайытӥз, со пудо-животъёс сярысь сюлмаське бере, со сярысь но сюлмаськыны быгатоз шуыса (Иов 38:39—41; 39:1, 5, 13—16). Иеговалэн кылдытэмъёсыз сярысь малпаськыса, Иов Инмарлэн сямъёсыз сярысь эшшо но тросгес тодыны быгатӥз.

2. Мар милемлы люкетыны быгатэ Иеговалэсь кылдытэмъёссэ чакланы?

² Ми но Инмарен умойгес тодматскыны быгатӥськомы, солэн кылдытэмъёсыз шоры учкыса. Но со котьку ик капчи ӧвӧл. Бадӟым карын улыса, куддыръя ми инкуазез но ум адӟиське. Гуртын улыса но, куддыръя дыр уг тырмы Иеговалэн кылдытэмъёсыз шоры учкыны. Соин ик ойдолэ эскеромы, малы дыр висъяно но тыршоно Инмарлэсь кылдытэмъёссэ чакланы. Ми адӟомы, кызьы Иегова но Иисус, адямиосты дышетыкузы, кылдытэмъёслы саклыксэс висъяллязы. Озьы ик ми тодомы, малы ми дышетскыны быгатӥськомы, инкуазь шоры учкыса.

3. Потэ вал-а Иеговалэн, кылдытэмъёсыз Адамлы шумпотон мед ваёзы шуыса? Валэктэ.

³ Иеговалэн потэ вал, кылдытэмъёсыз нырысетӥ адямилы шумпотон мед ваёзы шуыса. Инмар Адамез чебер рае улыны интыяз. Со косӥз сое раез утялтыса возьыны но сое  паськытатыны (Ул.-выл. 2:8, 9, 15). Адам туж шумпотӥз, дыр, адӟыны, кызьы будосъёс будо но сяськаос сяськаясько. Едем садэз утялтыны нырысетӥ адями понна туж бадӟым дан вал! Со сяна, Иегова Адамез куриз вань пудо-животъёслы ним поныны (Ул.-выл. 2:19, 20). Та ужез Инмар ачиз быдэстыны быгатэ вал ке но, сое со Адамлы сётӥз. Кыӵе ке пудо-животлы ним сётон азяз Адам сое сак чаклаз. Та уж Адамлы бадӟым шумпотон вайиз, дыр. Талы луыса Адам эшшо но умойгес адӟиз Атаезлэсь визьлыксэ но паймымон быгатонлыкъёссэ.

4. а) Малы милемлы Иеговалэсь кылдытэмъёссэ чаклано? б) Иеговалэн кыӵе кылдытэмъёсыз тӥледлы тужгес но кельшо?

⁴ Нош малы милемлы Иеговалэсь кылдытэмъёссэ чаклано? Одӥгез муг — со ачиз милемыз куре: «Инъёслэн вылӥязы, синъёстэс ӝутыса, учкелэ». Собере со юа: «Кин соосты кылдытӥз?» Валэктонзэ ми тодӥськомы (Ис. 40:26). Но инмын гинэ ӧвӧл, музъем вылын но, зарезьёсын но туж трос Иеговалэн паймымон кылдытэмъёсыз. Соос пыр ми туж трос Иегова сярысь тодыны быгатӥськомы (Пс. 103:24, 25). Со сяна, малпалэ, кызьы Инмар адямиез кылдытӥз. Со милемлы пӧртэм быгатонлыкъёс сётӥз. Кылсярысь, ми быгатӥськомы адӟыны, кылыны, мае ке кутылыны, шӧмъёсты но зынъёсты валаны. Ваньмыз та юрттэ милемлы Иеговалэн кылдытэмъёсызлы шумпотыны.

5. Кыӵе пайда вае Иеговалэсь кылдытэмъёссэ чаклан? (Римъёслы 1:20).

⁵ Библиын вераське на эшшо одӥг муг сярысь, малы милемлы Иеговалэсь кылдытэмъёссэ чаклано. Соос валаны юртто, кыӵе сямъёсыз Иеговалэн вань. (Лыдӟе Римъёслы 1:20.) Кылсярысь, инкуазь шоры учкыса, ми валаськомы, ваньмыз туж паймымон кылдытэмын шуыса. Татысь адӟиське, Инмар туж визьлыко шуыса. Озьы ик малпаське пӧртэм сиён сярысь, кудӥз милемлы шумпотон вае. Та возьматэ, Инмар адямиосты яратэ шуыса. Кылдытэмъёс шоры учкыса, ми Иеговалэсь сямъёссэ адӟиськомы. Нош та юрттэ милемлы Инмарен эшшо но умойгес тодматскыны. Озьы ик милям мылкыдмы ӝутске солы матэгес кариськыны. Нош али ойдолэ эскеромы, кызьы Иегова, адямиосты кулэ луись зэмлыкъёслы дышетон понна, аслаз кылдытэмъёсызлы саклыксэс висъялляз.

6. Малы ми дышетскиськомы, кошкылӥсь тылобурдоос шоры учкыса?

⁶ Иегова котьмалы дыр пуктӥз. Котькуд ар тулыспал толэзьлэн пумысеныз куартолэзьлэн  шорозяз израиль калык адӟиз аистъёсты, кудъёсыз соослэн шаерзы вадьсытӥ уйпала лобо вал. Инмар израиль калыклы шуиз: «Инбам улын улӥсь аист тылобурдо но тодэ солы сётэм дыръёсты» (Иер. 8:7). Иегова дыр пуктӥз, та тылобурдоослы кошкон понна. Ӵапак озьы ик со дыр тупатӥз, аслэсьтыз судъян приговоръёссэ быдэстон понна. Туннэ кошкылӥсь тылобурдоос тодамы вайыто: Иегова нунал бырйиз, кудаз со та лек дуннеез быдтоз (Авв. 2:3).

7. Кызьы тӥледыз юнматыны быгатэ ӧрӟилэн лобамез? (Исаия 40:31).

⁷ Иегова аслаз ужась-тыршисьёсызлы кужым сётэ. Исаия пророк пыр Иегова ужась-тыршисьёсызлы кылзэ сётӥз, соос катьтэммизы ке яке соослэн мылкыдзы куашказ ке, Инмар соослы кужым сётоз но соос «ӧрӟи музэн бурдъёссэс ӝутозы» шуыса. (Лыдӟе Исаиялэсь 40:31.) Израиль калык ӵем адӟе вал туж вылӥын лобась ӧрӟиосты. Та тылобурдоос ӝутскись омыръя вылӥе лобо но кужымзэс трос уг быдто. Та туж умой тодамы вайытэ, Иегова ӧрӟиослы кужым сётыны быгатэ бере, со ужась-тыршисьёссэ но юнматыны быгатэ шуыса. Куке тӥ адӟиськоды, кызьы та кужмо тылобурдо, бурдъёсыныз шонатэк, вылӥе но вылӥе ӝутске, тодады возе: Иегова тӥледлы но юрттоз шуг-секытъёстэс вормыны.

8. Малы дышетскиз Иов, Инмарлэн кылдытэмъёсыз сярысь малпаськыса, но малы милемлы но соос сярысь малпаськыны кулэ?

⁸ Иеговалы оскыны луэ. Иеговаен вераськемез бере Иов солы эшшо но золгес оскыны кутскиз (Иов 32:2; 40:1—3). Инмар Иовлэсь саклыксэ висъяз пӧртэм кылдытэмъёсызлы, кылсярысь, кизилиослы, пилемъёслы но зарезьлы. Озьы ик Иегова вераз пӧртэм пудо-животъёс сярысь, кылсярысь, кыр ош но вал сярысь (Иов 38:32—35; 39:9, 19, 20). Соос вылын Инмар возьматӥз аслэсьтыз кужымзэ, яратонзэ но бадӟым визьлыксэ. Иеговаен вераськыса, Иов солы эшшо но золгес оскыны кутскиз (Иов 42:1—6). Ӵапак озьы ик кылдытэмъёс сярысь малпаськон милемлы тодамы вайытэ, Иегова милесьтым трослы визьмогес но кужмогес шуыса. Озьыен, Инмар вань шуг-секытъёсмес одно ик быдтоз. Та малпан Иеговалы осконмес юнматыны быгатэ.

9, 10. Мае ми тодӥськомы Иегова сярысь, шунды но зор шоры учкыса?

⁹ Иисус инкуазез туж умой тодӥз. Атаеныз ӵош со ваньзэ кылдытӥз но «кибашлы пуктӥськись-лэсьтӥськись» вал (Мад. 8:30). Берлогес, куке Иисус музъем вылын улӥз, кылдытэмъёслы саклыксэ висъяса, со дышетскисьёсызлы Атаез сярысь вералляз. Учкомы, малы со дышетӥз.

¹⁰ Иегова вань адямиосты яратэ. Гурезь йылын тодытыкуз, Иисус дышетскисьёсызлэсь саклыксэс висъялляз шундылэн пиштэмезлы но зорлы. Соостэк дунне вылын улон уз луы. Иегова быгатэ вал шундызэ но зорзэ аслаз ужась-тыршисьёсызлы гинэ сётыны. Но со соосты ваньмызлы сётэ (Матф. 5:43—45). Тазьы Иисус дышетскисьёсызлы валэктӥз: Иеговалэн потэ, ми котькуд адямиез мед яратомы шуыса. Шундылэн пуксемез яке зор шоры учкыса, ми малпаськыны быгатӥськомы Иеговалэн адямиосты яратэмез сярысь. Солэсь адӟем карыса, милям мылкыдмы ӝутске вань адямиосты яратыны но котькинлы тодытыны.

11. Кызьы ми юнматскыны быгатӥськомы, тылобурдоос шоры учкыса?

¹¹ Иегова милемлы улон понна ваньзэ кулэзэ сётэ. Гурезь йылын тодытыкуз, Иисус вераз: «Учкелэ инмысь тылобурдоос шоры: соос уг кизё, уг арало, кеносазы но уг люкало;  но Инмысь Атайды сюдэ соосты». Ӵапак соку адямиос, кудъёсыз Иисусэз кылзӥзы, инмысь тылобурдоосты адӟизы, вылды. Собере Иисус шуиз: «Тӥ соослэсь трослы умоесь ӧвӧл-а?» (Матф. 6:26). Адӟиськиз, Иисус адямиосты туж яратӥз шуыса. Иегова оскытэ, со милемлы улон понна ваньзэ кулэзэ сётоз шуыса (Матф. 6:31, 32). Та малпан туннэ но Иеговалэсь ужась-тыршисьёссэ юнматэ. Испаниысь егит сузэр, кудӥз пионер луыса ужа-тырше, сюлмаськиз, тупась улон инты шедьтыны уг быгаты шуыса. Но куке со адӟиз тылобурдоосты, кудъёсыз кидысъёсты но мульыосты кокчало вал, солэн мылкыдыз ик ӝутскиз. Со вера: «Мон адӟи, кызьы Иегова та пичи тылобурдоос сярысь сюлмаське. Та тодам вайытӥз, Инмар мон сярысь но сюлмаськоз шуыса». Озьы ик луиз. Ӝоген сузэр улон инты шедьтӥз.

12. Мае ми тодӥськомы Иегова сярысь, ӟольгыриосты чакласа? (Матфей 10:29—31).

¹² Иегова ми пӧлысь котькудмес дунъя. Апостолъёссэ тодытыны ыстэмез азьын Иисус юрттӥз соослы пумитъяськонъёслэсь кышканзэс вормыны. (Лыдӟе Матфейлэсь 10:29—31.) Кызьы? Иисус дышетскисьёсызлэсь саклыксэс висъяз Израильын одӥг туж вӧлмем тылобурдолы — ӟольгырилы. Иисус улон нуналъёсы ӟольгыриос туж дунтэмесь вал. Но Иисус дышетскисьёсызлы шуиз: «Атайдылэн эрикезтэк соос пӧлысь одӥгез но музъем вылэ уз усьы». Собере ватсаз: «Тӥ тросэзлэсь векчи тылобурдоослэсь умоесьгес». Тазьы Иисус дышетскисьёссэ оскытӥз, Иегова котькудзэс дунъя шуыса. Соин ик соослы пумитъяськонъёслэсь кышкано ӧй вал. Куке Иисуслэн дышетскисьёсыз тодытыкузы каръёсын но гуртъёсын ӟольгыриосты адӟылӥзы, соос Дышетӥсьсылэсь кылъёссэ тодазы вайылӥзы, луоз. Куке тон пичи тылобурдоосты адӟиськод, тодад вай, Иегова тонэ дунъя шуыса, малы ке шуоно тон но тросэзлэсь ӟольгыриослэсь дуногес. Иеговалэн юрттэменыз тон вань пумитъяськонъёсты чиданы быгатод (Пс. 117:6).

13. Мар кароно, кылдытэмъёс пыр Инмар сярысь эшшо но тросгес тодон понна?

¹³ Кылдытэмъёс Иегова сярысь эшшо но тросгес вераны быгато. Мар со понна кароно? Нырысетӥез, дыр висъяно, кылдытэмъёсты чаклан понна. Кыкетӥез, малпаськоно, мае соос верало Иегова сярысь. Та котьку ик капчи ӧвӧл. Камерунысь Жеральди́на сузэр вера: «Мон будӥ бадӟым карын. Соин ик мон валасько, инкуазез чаклан понна, тыршыны кулэ шуыса». Альфо́нсо нимо тӧро вера: «Мон валай: мыным юри дыр висъяно кылдытэмъёсты чакланы но малпаськыны, мае соос мыным Иегова сярысь верало».

14. Малы дышетскиз Давид, Инмарлэн кылдытэмъёсыз сярысь малпаськыкуз?

¹⁴ Давид мур малпаськиз Инмарлэн кылдытэмъёсыз сярысь. Со Иеговалы вераз: «Тынад киосыдлэн ужъёссы шоры учкыкум — инбамъёсыд, толэзь но кизилиос  шоры, кудъёссэ Тон пуктылӥд,— малпасько: Ма со адями, кудзэ Тон тодад возиськод?» (Пс. 8:4, 5). Уйин инбам шоры учкыкуз, Давид кылдытэмъёс сярысь гинэ ӧз малпаськы. Солэн валамез потэ вал, мае верало та кизилиос Инмар сярысь. Тазьы малпаськыса, Давид тодӥз, Иегова туж визьмо но кужмо шуыса. Озьы ик Давид малпаськиз, кызьы со анаез пушкын будӥз. Куке со малпаськиз, макем паймымон кылдытэмын солэн мугорыз, солэн туж потэ вал Иеговалы тау каремез (Пс. 138:14—17).

15. Вералэ куд-ог примеръёсты, кызьы ми адӟыны быгатӥськомы Иеговалэсь сямъёссэ, солэн кылдытэмъёсыз шоры учкыса (Псалтирь 148:7—10).

¹⁵ Оло нош, тӥледлы но, Давидлы сямен ик, секыт ӧвӧл инкуазьысь шедьтыны сое, мар вылын мур малпаськыны луэ. Котыр учкиды ке, тӥ адӟыны быгатоды Иеговалэсь трос паймымон сямъёссэ. Кылсярысь, пӧсь куазен, куке шунды пыже, малпаське Иеговалэн кужымез сярысь (Иер. 31:35). Тӥ адӟиды ке, кызьы тылобурдо кар лэсьтэ, малпаське Иеговалэн визьлыкез сярысь. Куке тӥ адӟиськоды кучапиез, кудӥз быжыз сьӧры уйиське, тодады вае, Иегова серекъяны яратэ шуыса. Нош куке адӟиськоды, кызьы анай нылпизэ утялтэ, тау каре Иеговаез яратэмез понна. Милям трос луонлыкъёсмы вань Иегова сярысь тодыны, малы ке шуоно солэн кылдытэмъёсыз — бадӟымъёсыз но пичиосыз, кыдёкысьёсыз но матысьёсыз — сое данъяло. (Лыдӟе Псалтирез 148:7—10.)

16. Кыӵе ужпум ас азямы пуктоно?

¹⁶ Милям Инмармы туж визьмо, яратӥсь но кужмо. Ваньмыз, мае со лэсьтэ, туж умой. Иеговалэсь та но мукет сямъёссэ адӟыны луэ, солэн кылдытэмъёсыз шоры учкыса. Ойдолэ ялан дыр висъяломы кылдытэмъёсты чакланы но малпаськыны, малы соос дышето милемыз Иегова сярысь. Та юрттоз милемлы Кылдытӥсьмылы эшшо но матэгес луыны (Иак. 4:8). Вуоно статьяысь ми адӟомы, кызьы анай-атайёс нылпиоссылэсь саклыксэс висъяны быгато кылдытэмъёслы, соослы Иеговаен матэ кариськыны юрттон понна.