STÙDIO 12
Impara de pi sora Geovà par meso dela creassion
“Le qualità de Dio che le persone no le vede . . . le ze mostrade de maniera ciara in quel che el ga fato, dela cression del mondo avanti.” — ROM. 1:20.
CÀNTICO 1 Le qualità de Geovà
COSSA CHE NDAREMO IMPARAR? a
1. Cossa che ga giutà Giò a imparar de pi sora le qualità de Geovà?
DE TUTE le robe che ga sucedesto nela so vita, sicuro che Giò no’l se ga mai desmentegà de quando Geovà el ga parlà con lu. Dio el ghe ga dito de vardar le bele robe che el gavea creà. Cossita, Giò l’è stà ancora pi sicuro che Geovà el ga tanta sabedoria e che l’è bon de tender dei so servi. Par esémpio, lu el ga capio che, cossita come Geovà el tende dele bèstie, el ndaria tender anca de lu. (Giò 38:39-41; 39:1, 5, 13-16) Alora, Giò l’è stà bon de imparar sora le qualità de Geovà quando el ga vardà la creassion.
2. Parché che pol esser fadiga vardar quel che Geovà el ga creà?
2 Anca noantri podemo imparar de pi sora Geovà quando vardemo quel che lu el ga creà. Ma pol esser che no sìpia tanto fàcile farlo. Parché? Parché se te sì de star nte una cità, fursi no ghen’è tante robe dela naturesa intorno a ti. E anca se te sì de star in colònia, pol esser che te par che no te ghè mia tempo de studiar la creassion. Alora, ndaremo veder parché che l’è importante sforsarse par vardar le robe che Geovà el ga creà. Anca vederemo come che Geovà e Gesù i ga doperà la creassion par insegnar so servi, e cossa che noantri podemo far par imparar ancora de pi dela naturesa.
PARCHÉ CHE L’È IMPORTANTE VARDAR LA CREASSION?
Geovà el volea che Adon el restesse contento col laoro de dar nome ale bèstie e anca con tute le so creassion (Varda el paràgrafo 3.)
3. Come che savemo che Geovà el volea che Adon el vardesse tuto quel che el gavea creà?
3 Geovà el volea che Adon el vardesse le bele robe che el gavea creà. Come che lo savemo? Geovà el ghe ga dato a Adon un bel paradiso par viver, cognosser e tender. (Gén. 2:8, 9, 15) Pensa come Adon l’è restà maraveià de veder tuti quei fiori, le semense che le butea, e de darghe nome ale bèstie. (Gén. 2:19, 20) Prima de dar nome a tute le bèstie che ghen’era in Paradiso, Adon ghe ga tocà vardarle ben. L’è vera che Geovà el podaria gaverlo fato lu sol, ma el ghe ga dato questo bel laoro a Adon. Sicuro che l’è stà bel far tuti questi laori. Cossita, Adon el ga podesto veder la sabedoria de Geovà e tute le bele robe che lu el gavea creà.
4. (a) Parché che ghemo de vardar la creassion? (b) Cossa che te piase de pi de tuto quel che Geovà el ga creà?
4 Geovà el vol che vardemo tuta la creassion. Lu el ga dito: “Levé su i oci al cielo e vardé. Chi che ga creà queste robe?” (Isa. 40:26) Savemo che l’è stà Geovà che el ga fato tuto quel che ghen’è nel cielo, nela Tera e nel mar, e imparemo tanto con queste robe. (Sal. 104:24, 25) E Dio el ne ga fato de una maniera che ne piase veder quel che l’è bel. Alora, podemo goderse con tuta la creassion parché semo boni de veder, scoltar, tocar, tastar e snasar.
5. De acordo con Romani 1:20, parché che ghemo de vardar la creassion de Geovà?
5 La Bìblia anca la mostra che ghemo de vardar la creassion par imparar sora le qualità de Geovà. (Ledi Romani 1:20. b) Par esémpio, quando vedemo come la naturesa la ze bela, imparemo dela sabedoria de Dio. Quando pensemo sora tuti tipi de magnar che ghen’è, imparemo che lu el ne vol tanto ben. Alora, cognossemo meio a Geovà e volemo deventar ancora pi amighi soi quando vedemo le so qualità par via de quel che lu el ga creà. Adesso, ndaremo studiar come Geovà el dopera la creassion par insegnarne arquante robe importante.
GEOVÀ EL DOPERA LA CREASSION PAR INSEGNARNE SORA LU
6. Cossa che imparemo dele segogne?
6 Geovà el fà tute le robe suceder nela ora giusta. Tuti ani, intrà i mesi de febraro e maio, i israeliti i vedea le segogne che le zolea al nort. Geovà el ga dito ai israeliti: ‘La segogna nel cielo la sà le so staion.’ (Ger. 8:7) Questi osei i sà quando che i ga de zolar par nantro posto parché Geovà li ga fati cossita. Cossa che imparemo? Geovà anca el ga scoliesto la ora giusta par far i so giulgamenti. Alora, quando pensemo sora questi osei, restemo ancora pi sicuri che Geovà el ga belche scoliesto la ora giusta par finir con questo bruto mondo. — Aba. 2:3.
7. Cossa che imparemo cole àghie? (Isaia 40:31)
7 Geovà el dà forsa ai so servi. Par meso del profeta Isaia, Geovà el ga dito che, quando so servi i fusse strachi o sensa forsa, lu li giutaria a ‘zolar alto come le àghie’. (Ledi Isaia 40:31. c) I israeliti sempre i vedea le àghie che le zolea quasi che sensa bater le ale. Questi osei i dopera el vento par zolar. Cossa che imparemo? Compagno Geovà el giuta le àghie a zolar cossita, lu el pol giutarte cola so forsa. Alora, quando te vedi un osel zolar cada volta pi alto quasi sensa bater le ale, ricòrdate che Geovà el pol darte la forsa che te ocore par dàrghene fora coi to problemi.
8. (a) Cossa che Giò el ga imparà sora la creassion de Dio? (b) Cossa che imparemo?
8 Geovà l’è pròpio de fidarse. Geovà el ga giutà Giò a far ancora pi forte la so confiansa in lu quando el ga parlà sora diverse robe che el ga creà. (Giò 32:2; 40:6-8) Par esémpio, Eliù el ga discoresto con Giò sora le stele, le nùvole, i sciantisi e anca el ga parlà sora bèstie, come el toro e el caval. (Giò 38:32-35; 39:9, 19, 20) Tute queste robe le ga giutà Giò a veder el poder, la sabedoria e el amor de Dio. Par quela, Giò el se ga fidà ancora de pi in Geovà. Cossa che imparemo? (Giò 42:1-6) Quando studiemo sora la creassion, vedemo la sabedoria de Geovà e el poder che el ga de finir fora cole nostre dificoltà. Par quela, se fidemo ancora de pi in lu.
GESÙ EL GA DOPERÀ LA CREASSION PAR INSEGNAR SORA SO PARE
9-10. Cossa che imparemo de Geovà quando pensemo sora el Sol e la piova?
9 Gesù el cognossea tanto ben la naturesa parché el ga giutà so Pare a crear el universo. (Pro. 8:30) Dopo, quando l’era qua nela Tera, lu el ga parlà de arquante robe dela creassion par insegnarghe so dissìpoli sora el so Pare. Adesso, ndaremo imparar arquante de queste robe.
10 Geovà el mostra so amor a tuti. In Mateo capìtolo 5, vedemo parte de un discorso che Gesù el ga fato. Quela volta, lu el ga parlà ai so dissìpoli sora el Sol e la piova. Cossita, Gesù li ga giutadi a capir che Geovà el ama a tute le persone parché ghe dà a tuti queste robe importante. Geovà el podaria dar el Sol e la piova sol a quei che i lo serve. Ma lu no’l fà mia cossita. (Mat. 5:43-45) Cossa che imparemo? Restemo maraveiadi de veder el Sol ndar do o una bela spiovada, e imparemo che Geovà el mostra so amor a tute le persone. Alora, anca noantri volemo mostrar amor e predicar a tuti.
11. Cossa che podemo imparar de vardar i osei del cielo?
11 Geovà el ne dà tuto quel che ghemo de bisogno. Pol esser che quele persone che le scoltea el discorso de Gesù le podea veder i oseleti che i zolea in cielo. Alora, lu el ghe ga dito: “Vardé con atension i osei del cielo. Lori no i semena, gnanca i tol su e gnanca i mete via ntel paiol, ma el vostro Pare, che l’è ntei cieli, el ghe dà de magnar. Sarà che valtri no valé de pi che lori?” (Mat. 6:26) Cossa che imparemo? Geovà el tende de tuti i so servi! (Mat. 6:31, 32) Quel che Gesù el ga dito ne incoraia fin ancoi. Varda quel che ga sucedesto con una sorela che la ze pioniera nela Spagna. Ela la era desanimada parché no la era mia bona de catar un posto de star. Ma la se ga sentio meio quando la ga visto arquanti oseleti che i magnea. Ela la ga dito: “Vardar quei oseleti me ga giutà ricordarme che Geovà el ndarà tender de mi compagno el tende de lori.” Suito dopo, ela la ga catà un posto de star.
12. Cossa che imparemo sora Geovà in Mateo 10:29-31?
12 Geovà el dà valor a cada un de noantri. Vanti de mandar i so apòstoli predicar, Gesù li ga giutadi a dàrghene fora cola paura dela perseghission. (Ledi Mateo 10:29-31. d) Lu el ga parlà de pìcoli oseleti che i valea poco gnente e che ghen’era da par tuto in Israel. Lu el ga dito: ‘Gnanca un de questi el va cascar par tera sensa che el vostro Pare el sàpia. Valtri valé de pi che tanti pardai.’ Cossita, Gesù el ga insegnà i so dissìpoli che no ghe ocorea gaver paura dela perseghission parché Geovà el ghe dà valor a cada un dei so servi. Sicuro che i dissìpoli de Gesù i ga bio ancora pi coraio par predicar in tuti posti. Cossa che imparemo? Quando vedemo un pìcolo oseleto, ghemo de ricordarse che Geovà el ghe dà valor a cada un de noantri. Alora, semo boni de infrontar la perseghission con coraio. — Sal. 118:6.
COME CHE PODEMO IMPARAR ANCORA DE PI SORA GEOVÀ?
13. Cossa ghemo de far par imparar sora Geovà par meso dela creassion?
13 Podemo imparar tante robe de Geovà par meso dela so creassion. Come? Prima, ghemo de torse el tempo par vardar quel che lu el ga creà. Seconda, ghemo de pensarghe sora cossa la creassion la ne insegna sora Geovà. Ma pol esser fadiga far questo. Una sorela de nome Geraldine, la ga dito: “Come son stata slevada nela cità, me toca sforsarme par vardar la creassion.” E un ansiano de nome Alfonso, el ga dito: “Go capio che me toca catar fora tempo par star mi sol, vardar la creassion de Geovà e pensarghe sora cossa la me insegna sora lu.”
El rè Davi el ghe pensea sora quel che el vedea, e cossita, el ga imparà tanto sora Geovà (Varda el paràgrafo 14.)
14. Cossa che Davi el ga imparà quando el ga pensà sora la creassion de Geovà?
14 El rè Davi el pensea tanto sora quel che Geovà el ga creà. Par esémpio, una volta lu el ga dito: “Quando vedo i to cieli, laoro dei to dei, la luna e le stele che te ghè fato, cossa che l’è el omo par ricordarte de lu e el fiol del omo par ténderlo?” (Sal. 8:3, 4) Davi el fea de pi che sol vardar le bele stele in cielo. Lu el ghe pensea sora Geovà, e el ga capio che Dio el ga tanto poder. Davi anca el ga pensà sora come l’è stà fato rento la so mama, e l’è restà maraveià cola sabedoria de Geovà. — Sal. 139:14-17.
15. Parla de esempi dela creassion che mostra le qualità de Geovà. (Salmo 148:7-10)
15 Compagno a Davi, podemo imparar de pi sora le qualità de Geovà quando vardemo intorno e pensemo sora tuto quel che Lu el ga creà. Par esémpio, te pol veder el poder de Geovà quando te senti el caldeto del sol. (Ger. 31:35) Te pol pensar sora la so sabedoria quando te vedi un osel far su el gnaro. Quando te vedi un cagneto corerghe drio la so coa, te pol capir che Dio l’è felice. E te ndarè darghe pi valor al amor de Geovà quando te vedi una mama rider con so bambin. Alora, podemo imparar de pi sora Geovà cole robe che ghen’è nel cielo e nela Tera, sia pìcole o grande. Sicuro che tuta la creassion la loda a Geovà e la ne giuta a imparar de pi sora lu. — Ledi Salmo 148:7-10. e
16. Cossa che tuti noantri ghemo de far?
16 Nostro Dio l’è sàbio, amoroso, poderoso e tuto quel che lu el fà l’è bel. No l’è mia fadiga veder queste e tante altre qualità de Geovà. Ma ne toca star atenti a tuto quel che lu el ga creà. Par quela, sempre ghemo de torse el tempo par vardar la creassion e pensarghe sora cossa la ne insegna sora Geovà. Cossita, ndaremo deventar ancora pi amighi del nostro Creador. (Tia. 4:8) Nel pròssimo stùdio, ndaremo imparar come che un pare e una mare i pol doperar la creassion par giutar i so fioi a deventar amighi de Geovà.
CÀNTICO 5 Le maraveiose òpere de Dio
a Tuto quel che Geovà el ga creà l’è pròpio bel. Restemo maraveiadi de veder quel che ghen’è nela naturesa, sia la luce del Sol o un pìcolo fior. Quando vardemo la creassion, podemo imparar sora le qualità de Geovà. In questo stùdio, ndaremo veder parché che l’è importante torse el tempo par vardar la naturesa, e come che vardar la creassion ne giutarà a esser ancora pi amighi de Geovà.
b (Romani 1:20) Le qualità de Dio che le persone no le vede, o sia che el ga un poder eterno e che lu l’è pròpio Dio, le ze mostrade de maniera ciara in quel che el ga fato, dela creassion del mondo avanti. Par quela, lori no i ga mia scusa.
c (Isaia 40:31) Ma quei che i speta in Geovà i gavarà forsa nantra volta. I zolarà alto come le àghie. I corerà e no i restarà sensa forse. I caminarà e no i restarà strachi.
d (Mateo 10:29-31) No se vende due pardai par una moneda de poco valor? Ma, gnanca un de questi el va cascar par tera sensa che el vostro Pare el sàpia. 30 Ma fin tuti i cavei dela vostra testa i ze contadi. 31 Alora no sté gaver paura; valtri valé de pi che tanti pardai.
e (Salmo 148:7-10) Tuti nela tera i ga de lodar a Geovà: tute le creature che le vive nel mar e tute le àque profonde, 8 i sciantisi e la tempesta, la neve e le nùvole grosse, e el vento che el fà suceder quel che lu el dise, 9 le montagne e tuti i monti, le frutere e tuti i cedri, 10 le bèstie de mato e quele che le vive intrà le persone, le bèstie che se rasta par tera e i osei.
