1. Moota heeni Yobi aaxuttenre awe itthu sintxipale woohima sa Yehova?

 ATTHU ootheene Yobi aatthekunlaaweno mweekumini mwawe, otthekula woothanleya waari otthekula owo araaweno ni Yehova Muluku. Emaara Yehova aatthekulaawe ni Yobi aamweerela weera awehexexeke soopattuxiwa, oweha soopattuxiwa waamukhavihera Yobi ororomela osuwela wa Muluku ni owera wa Yehova woowaakosoopa arumeyi awe. Mwa ntakihero, Yobi aaxuttera weera Yehova onnaakosoopa asinama, nto eyo yaamweeriha Yobi ororomela weera Yehova ammukosoopa owo. (Yobi 38:39-41; 39:1, 5, 13-16) Yobi aaxuttera vantxipale woohima sa mikhalelo sa Yehova moorweela mwa soopattuxiwa.

2. Etthu heeni ekina enneriha ohiwehexexa soopattuxiwa sa Yehova?

² Hiyo-tho ninnaxuttera itthu sintxipale woohima sa Yehova emaara yeeyo ninwehexexaahu itthu owo opattunxaawe. Mene opaka eyo pooti okhala wooxupa, wakhala weera nyuwo munkhala ocidade munnawera woona soopattuxiwa iyo nenne nxiinye. Nave nnaamweera nyuwo mukhalaka nipuro noowaattamela otuphini pooti woonyoonyani orowa oweha soopattuxiwa iyo sa Yehova. Nto va, ninkela woona mwaha wa heeni ontthuneyaaya wiivaha etempu ni wiilipihera weera niwehexexeke soopattuxiwa sa Yehova, nave-tho ninkela woona moota Yehova ni Yesu yaavarenlaaya muteko matakihero a soopattuxiwa weera yaaxuttihe atthu, ni etthu heeni hiyo nintthuneyaahu opaka weera nixuttere etthu moorweela mwa soopattuxiwa sa Yehova.

3. Mathowa heeni anneeriha ohima weera Yehova aatthuna weera Adamu atikhineke soopattuxiwa?

³ Yehova aatthuna weera Adamu atikhiniheyeke ni soopattuxiwa owo opankaawe. Emaara ampattunxaiye Adamu, owo amuhela mparadiso anvaha muteko wookosoopa ni wunnuwiha eJardim ya o wEdeni. (Eph. 2:8, 9, 15) Nkuupuwelelani moota Adamu aahakalanlaawe emaara yeeyo oonaawe imelaka inuku nave-tho oonaawe ifiloori ihuleyaka. Okosoopa eJardim ya o wEdeni yaari eparakha etokweene, nave-tho Yehova anvekela Adamu weera aavaheke asinama masina. (Eph. 2:19, 20) Ekhaikhai weera Yehova anwera othanla nsina na yoole ori mwaamunama, mene eparakha eyo anvanhe Adamu. Moohihovela, emaara yeeyo Adamu anvahaawe mwaamunama nsina, annawehexexa moomaaleleya mikhalelo ni mapakelo awe etthu mwaamunama owo, muteko ola wamphwanyiha ohakalala Adamu. Nave-tho waamukhavihera Adamu omoona Yehova okhala mutthu oowera opaka itthu ni ookhalano osuwela otokotoko.

4. (a) Mathowa heeni anneeriha owehexexa soopattuxiwa? (b) Itthu heeni nyuwo muntikhinaanyu mwaawehaka soopattuxiwa?

⁴ Nthowa nimoha ninneeriha hiyo owehexexa soopattuxiwa sa Yehova ori weera Yehova onntthuna weera hiyo nipakeke eyo. Yesaya 40:26 oneera: “Mwèmexere osulú maitho anyu, nwehexexe: tani opattunxe itthu seiye?” Waakhula ti wooweera Yehova oosariha itthu sootikhiniha wiirimu ni elapo ya vathi ni mphareya itthu sootikhiniha owo opattunxaawe, ni itthu iyo owo opattunxaawe sinnanixuttiha itthu sintxipale woohima sa owo. (Nsal. 104:24, 25) Nkuupuwelani ha: Yehova oonipattuxa ni owera woona oreera wa soopttuxiwa, ni hiyo ninwera woona oreera wa soopattuxiwa iyo moorweela mwa mikhalelo ithanu owo onivanhaawe—woona, wiiwa, osuwela weera ookhala onkitava, woona osiva ni woona winkhela.

5. Moovarihana ni Aroma 1:20 mwaha wa heeni oraaya wootthuneya owehexexa soopattuxiwa?

⁵ Biblya ookhalano mathowa makina ootthuneya anneeriha hiyo owehexexa soopattuxiwa. Soopattuxiwa sinnanixuttiha woohima sa mikhalelo sa Yehova. (Mmusome Aroma 1:20.) Mwa ntakihero, itthu sootheene Yehova opattuxaawe ti sootikhiniha. Eyo enoonihera weera Muluku ahu toosuwela, ni nkuupuwelani ovirikana wa sootxa sikhanle, eyo enoonihera weera Yehova okhalano nsivelo ni hiyo. Emaara yeeyo hiyo ninwehexexaahu mikhalelo sa Yehova moorweela wa itthu owo opattunxaawe hiyo ninnamusuwela owo vantxipale ni ninnamwaattamela. Vano nrowe noone moota Yehova onvarihelaawe muteko soopattuxiwa weera anixuttihe itthu sootepa otthuneya.

6. Othaama wa apalame onninxuttiha eheeni woohima sa Yehova?

⁶ Yeele eri etthu Yehova oohelela etempu aya. Iyaakha sootheene ovinyeera okhwipi wa mweeri wa Fevereiro mpaka variyari va mweeri wa Maio, ana a israeli yannawoona amuttiki evavaka ethamelaka ota. Yehova aaweerela ha ana a Israeli: “Hatá muttiki wirimu onnasuwela ehuhu awe.” (Yer. 8:7) Yehova aahelela etempu weera amuttiki ala ethaameke. Vamoha-moharu, owo-tho oohelela etempu weera awiihe emalihero ya elapo ela. Emaara yeeyo nyuwo munaawehaanyu apalame ethaamaka, muupuweleleke weera hiyo-tho onnatthuneya omuroromela Yehova weera ookhalano “ehuhu yothanliwa” weera amalihe elapo ela yoonanara.—Hab. 2:3.

7. Axaaka ennixuttiha eheeni? (Yesaya 40:31)

⁷ Yehova onnaavaha ikuru arumeyi awe. Moorweela mwa mprofeti Yesaya, Yehova aalaihera weera aamwaavaha ikuru arumeyi awe weera ewere ‘ovava osulú ntoko a xaaka’ emaara yeeyo yeeraaya eviriheke ottettheya. (Mmusome Yesaya 40:31.) Waari woohixupa ana a Israeli owoona axaaka evavaka woohiilipihera naari neere emuhiñyeene nankelele eyo enoonihera weera antoko hiihaale Yehova onaavahaawe ikukru axaaka owo-tho onoonivaha hiyo ikuru. Ikwaha sootheene nyuwo mummoonaanyu mwaapalame avavaka iithomeñyene osulú ahiilipiheraka, naari neere, amuhiñyeene nankelele muupuweleke weera Yehova pooti wookhaviherani weera nvirihe maxupo anyu.

8. Yobi axuttenre heeni ni soopattuxiwa sa Yehova, ni etthu heeni ninxutteraahu?

⁸ Nimuroromeleke Yehova. Yehova aamukhavihera Yobi weera owo annatthuneya omuroromela Yehova. (Yobi 32:2; 40:6-8) Otthekula iwe Yehova aaraaweno ni Yobi, Yehova aahuuluma itthu sintxipale woohima sa soopattuxiwa ntoko ithenyeeri, mahutte ni etari. Nave-tho Yehova aahuuluma woohima sa inama ntoko imombe ya mutuphini ni ikavalo. (Yobi 38:32-35; 39:9, 19, 20) Itthu sootheene Yehova uulummaawe saamuxuttiha Yobi weera ohiya paahi Yehova okhalano owera, owo-tho ookhalano nsivelo ni osuwela. Emalakaru otthekula Yobi aapatxera omuroromela Yehova moohihovela. (Yobi 42:1-6) Vamoha-moharu, emaara yeeyo hiyo ninwehexexaahu soopattuxiwa, ninnoona tthiri weera osuwela wa Yehova ti woohimala ni weera tho owo ookhalano owera woonipwaha hiyo, ni weera tho Yehova ookhalano owera woomaliha maxupo ootheene, osuwela eyo enoonikhavihera omuroromela vantxipale Yehova.

9-10. Nsuwa ni epula ennixuttiha eheeni woohima sa Yehova?

⁹ Yesu aasuwela nnene soopattuxiwa. Mbiblyani Yesu onniitthaniwa okhala “muratxi” mwaha wooweera owo aakhalano eparakha yoowaakhavihera apapawe opattuxa itthu sootheene siri valaponi. (Mir. 8:30) Ni emaara yeeyo Yesu aaraawe elapo ela ya vathi, owo aavarela muteko soopattuxiwa iyo weera aaxuttihe atthareli awe woohima sa Yehova. Nrowe noone itthu ikina owo aaxuttinhaawe.

¹⁰ Yehova onnawoonihera nsivelo nawe atthu ootheene. Mwaha Yesu aapankaawe va mwaako, Yesu aahuuluma ni atthareli awe woohima sa itthu piili Yehova opattunxaawe ni atthu antxipale khanvaha mwiitti. Itthu seene seiya tiiya: nsuwa ni epula. Itthu iya piili sinnanikhavihera okhala akumi. Yehova anwera ohirupiha epula naari ohikumiha nsuwa wa atthu ale ari onanara murima, mene mwaha wa nsivelo, Yehova owo onnaavaha atthu itthu iya ahithaanlaka. (Math. 5:43-45) Yesu aavarela muteko matakihero a epula ni nsuwa weera aaxuttihe atthareli awe weera Yehova ontthuna weera hiyo niwoonihereke nsivelo atthu ootheene.  Tivawonto ikwaha sootheene hiyo ninkelaahu woona nsuwa nneelaka, naari neeraka epula eriki nyeenyeenyeenye, niphimeleke nsivelo Yehova onwooniheraawe atthu ootheene woohikhala nthalu. Ni moota hiyo ninkela olikanxa nsivelo na Yehova ori waalaleera atthu ootheene.

11. Etthu heeni ninxutteraahu emaara nnaawehexexaahu apalame?

¹¹ Yehova onnanivaha itthu sootheene sa weerutthuni hiyo ninhaawelaahu. Mwaha Yesu aapankaawe va mwaakoni, Yesu aahima ha: “Mwàweheni asipalame a wirimu: khanàla, khanahepha ni khanìyathi mukhokweni, nto atith’inyu a wirimu annàtxiha.” Emaara Yesu uulumaawe mwaha ola, atthu yaannaaweha asipalame avavaka wiirimu. Voottharana Yesu aakoha ha: “Vano nyuwo ni asipalame, mutokwene tani?” (Math. 6:26) Mwa moota ola wooxuttiha mwansivelo, Yesu oonikhavihera oxuttera weera Yehova onkela onivaha itthu sootheene ninhaawelaahu. (Math. 6:31, 32) Masu ala a Yesu annaalipiha arumeyi a Yehova olelo va. Piyoneiru mmoha onkhala wEspanha, aakhulumuwa mwaha wooweera khaaphwanya nipuro nooreera okhala. Mene aawehakaru apalame akina etxaaka inuku sa soowiima ni sa ifruta wammalela okhulumuwa. Murokora ola ohimme ha: “Owoona apalame ale waakikhavihera wuupuwelela weera Yehova onnaakosoopa awo.” Evirakaru etempu murokora ola aaphwanya nipuro nookhala.

12. Moovarihana ni Matheyo 10:29-31 atxirikhu annixuttiha eheeni woohima sa Yehova?

¹² Yehova onnamuhela mwiitti mutthu ti mutthu a hiyo. Yesu ahinaaye waaruma atthareli awe weera yavare muteko woolaleera, Yesu aahaakhavihera awosa owina ottharatthariwa. (Mmusome Matheyo 10:29-31.) Owo aapaka eyo aavarihelaka muteko ntakihero na apalame yaawo yaari osuweliwa ni ana a Israeli eyo tiiyo, txirikhu. Mahiku a Yesu mwaapalame ola aari a musurukhu vakhaaneene. Mene Yesu aahaalela aatthareli awe: “Vano nari mmosà a yale khamorela vathi, Atith’inyu ehitthunne.” Avinyaka Yesu aahima-tho eeraka: “Nyuwo munnàpwaha atxirikhu antxipale.” Mwa masu ala, Yesu aahaaroromeliha atthareli awe weera Yehova annavaha mwiitti mutthu ti mutthu a yaawo ni weera awo khiyaatthuneya okhala owoova ottharatthariwa. Ikwaha sootheene atthareli ale yaawoonaaya atxirikhu emaara yaalaleeraaya ecidade ni ecidade ,muttetthe ti muttetthe, awo moohihovela yannuupuwelela masu a Yesu. Vamoha-moharu, vaavo munrowaanyu owoonaka apalame ala, muupuweleleke weera nyuwo tootthuneyaaxa va maithoni va Muluku mwaha wooweera nyuwo tootthuneyaaxa wapwaha atxirikhu. Mukhaviheriwaka ni Yehova nyuwo munoowera oviriha maxupo a osonttiwa ni nroromelo.—Nsal. 118:6.

13. Etthu heeni nintthuneyaahu opaka weera nixuttere vantxipale woohima sa Yehova moorweela mwa soopattuxiwa?

¹³ Hiyo pooti oxuttera itthu sintxipale morweela mwa soopattuxiwa. Ninkela opaka moota heeni eyo? Yoopatxera, nintthuneya wiivaha etempu weera niwehexexeke soopattuxiwa. Avinyaka,  nintthuneya ophimelela etthu yoopattuxiwa eyo ennixuttihaaya woohima sa Yehova. Mene opaka eyo khaiyene ti wookhweya. Murokora mmoha onkhala oCamarões oneeriwa Géraldine ohimme ha: “Miyo kunnuuwe ocidade, nto miyo ontthuneya wiilipihera vantxipale weera kiwehe soopattuxiwa sa Yehova.” Mutokweene mmoha a mmulokoni oneeriwa Alfonso ohimme ha: “Miyo kooxuttera weera onnatthuneya wiivaha etempu weera kiwehe soopattuxiwa ni ophimelela itthu heeni sinkixuttihaaya soopattuxwa iyo sa Yehova.”

14. Emaara Davidi aaphimelelaawe soopattuxiwa sa Yehova aaxuttenre eheeni?

¹⁴ Va salmu 8:4, 5 [8:3, 4, NM] Davidi olempe ha: “Vanwehexexaka sa wirimu, miteko sa ikatha sanyu, mweri ni itheneri mulipihalanyu’wo, vano mutthu tani wera mmùpuwelele ni mwana Àdamu tani wera mmusamarye?” Davidi annaphimelela soopattuxiwa ni Yehova emaara yeeyo owo aawehaawe wiirimu ohiyu woosareya ithenyeeri, khaiyeene oona paahi ooreera wa ithenyeeri owo annawera woona itthu heeni ithenyeeri iyo saamuxuttihaawe woohima sa Yehova. Owo aaxuttera moota Yehova aaraawe mutokweene, Davidi tho annaphimelela moota owo aapakinwaiye mootikhiniha mmirimani mwa ameyawe. Moohihovela, wuupuwela itthu sootheene iya waamweeriha Davidi otikhina osuwela wa Yehova.—Nsal. 139:14-17.

15. Muhime mikhalelo sa Yehova ninxutteraahu naawehaka soopattuxiwa sawe. (Nsalmu 148:7-10)

¹⁵ Ntoko Davidi hiyo khonnixupa ophwanya itthu soophimelela woohima sa soopattuxiwa. Hiyo pooti woona mikhalelo sa Yehova mapuro ninkhalaahu. Mwa ntakihero, nwehe owera wa Yehova emaara yeeyo nyuwo munoonaanyu oviha wa nsuwa. (Yer. 31:35) Nave muupuwele osuwela wa Yehova emaara yeeyo mummoonayu palame apakaka epuru awe. Ni muupuwele ohakalala wa Yehova vaavo ommonaiye mwalapwa athelihaka mwiilaawe. Ni emaara mummoonaanyu maaye atheelaaka ni mwanawe. Mmuxukureleke Yehova mwaha wa nsivelo nawe. Hiyo nookhalano iparakha sintxipale sooxuttera vantxipale woohima sa Yehova. Itthu sootheene opattunxaawe, ikhale itokweene, ikhaani, sirakamele, sikhuvele sinnavuwiha Yehova.—Musome Nsalmu 148:7-10.

16. Etthu heeni nintthuneyaahu opaka?

¹⁶ Muluku ahu toosuwela, tansivelo, toowera ni itthu sootheene owo opankaawe ti sooreera. Hiyo pooti woona mikhalelo sa Yehova ni itthu ikina owo opankaawe niwehaka soopattuxiwa sawe. Ti vawonto, mwiivaheke etempu veeli-veeli weera nwehexexe soopattuxiwa sa Yehova ni mphimeleleke etthu enooxuttihaayani woohima sa Yehova. Napaka eyo, nnoorowa omwaattamela Mpattuxa ahu. (Yak. 4:8) Yoosoma enttharelana nnoorowa woona moota asipaapa akhanlaaya oovarela muteko soopattuxiwa sa Yehova weera yaakhavihere anamwane aya omwaattamela Yehova.