1. Okathi Yobi aaweha awe itthu Yehova opattunxe awe aixutta exeeni?

 ORI ENE mukumi Yobi aanivaanela ni atthu akina, masi waahikhala ovaanela wanvanre murima, eyo piiyo, ovaanela wawe ni Yehova. Okathi owo, Yehova aahimuleela Yobi wiira oweheke itthu opattunxe awe. Eyo yaahimukhaliherya Yobi okupali wiira Yehova ookhalana ankhili ni owerya wowaakhapelela arumeyi awe. Mwa ntakiheryo, Yobi aahiixutta wiira Yehova onniwerya okhapelela inama. Nave, yena anwerya omukhapelela Yobi. (Yob. 38:39-41; 39:1, 5, 13-16) Nto Yobi aahiixutta mikhalelo sa Yehova okathi aaweha awe itthu opattunxe awe.

2. Xeeni ikwaha sikina vanixankiha aya wiixutta etthu niwehaka itthu Yehova opattunxe awe?

² Ni hiyo-tho ninniixutta itthu sinceene okathi ninweha ahu ni ephoole itthu Yehova opattuxale awe. Masi ikwaha sikina opaka eyo khivanikhweya. Mwa ntakiheryo, akhala wiira munikhala vasitati aahiiso nnaari, khula nihiku nyuwo munniwerya oweha itthu Muluku opattunxe awe. Masi khivanikhweya wiivaha okathi wiira mwiixutte etthu nwehaka itthu iyo. Nto mwaha ola, nnimwiixutta mireerelo sinikhumelela akhala wiira nnimwiivaha okathi ni wiimananiha wiira niwehe itthu Muluku opattunxe awe. Nave nnooweha moota Yehova ni Yesu yaarumeelale aya itthu iyo wiira awiixuttihe atthu akina. Nave-tho nnooweha etthu nikhanle ahu oopaka, wiira niixutte etthu niwehaka itthu Muluku opattunxe awe.

3. Exeeni enooniherya wiira Yehova aaphavela wiira Adamu asiveliweke ni itthu opattunxe awe?

³ Yehova aaphavela wiira Adamu asiveliweke ni itthu opattunxe awe. Nuumala Yehova ompattuxa Adamu, owo aahimpweha  mparayiisu ni aahinvaha muteko wiira okhapeleleke ni onnuuheke exarti ya wEdeni. (Maph. 2:8, 9, 15) Adamu aahitikinihiwa vanceene okathi aaweha awe inuku simelaka ni ifilori sikhumaka. Okhapelela exarti ya wEdeni, yaari eparakha yuulupale aavahiwe awe Adamu! Yehova aahimuruma Adamu wiira ovaheke masina inama. (Maph. 2:19, 20) Tthiri Yehova aahikhalana owerya woovaha masina inama, masi aahinvaha eparakha eyo Adamu. Adamu ohinatthi ovaha nsina enama, owo aahaana osuwela mukhalelo wa enama eyo. Moohaanyiherya, Adamu ohinatthi ovaha nsina khula enama, owo aanitokosa wiira osuwele mukhalelo wa enama eyo. Nto muteko aavahiwe awe waanimuhakalaliha vanceene. Tthiri itthu iye Adamu aaweha awe saahimukhaliherya woona wiira Yehova mpattuxa ankhili ni oorattela miteko sawe.

4. a) Exeeni enniiriha owehaka itthu Muluku opattunxe awe? b) Itthu xeeni Yehova opattunxe awe valaponi sinoosivelani vanceene?

⁴ Nthowa nimosa ninniiriha otokosaka ni ephoole itthu Muluku opattunxe awe, okhala wiira Yehova onniruma wiira nipakeke eyo. Yesaya 40:26, onihimya so: “Muttukhulele maitho anyu wirimu; moneke: tʼani opattunxe itheneri iye sothene?” Nikoho nla ti nookhweya waakhula. Itthu sinceene Yehova opattunxe awe wiirimu, mphareya ni valaponi oniphavela wiira naawehaka niixutteke etthu voohimya sa yena. (Esal. 104:24, 25) Nkahaya muupuwele ela: Yehova onipattunxe wiira nisiveliweke itthu siri valaponi. Ninniwerya opaka eyo okhala wiira Yehova oonivaha eparakha ya owerya woona, wiiwa, woona wunkhela, woona osiva, ni owerya okwannya etthu, nnasuwela etthu ene.

5. Moovarihana ni aRoma 1:20, xeeni vari aya wa faita owehaka itthu Muluku opattunxe awe?

⁵ Biibiliya onninleela nthowa nikina ninniiriha wiixuttaka ni itthu Muluku opattunxe awe: Iyo sinniniixuttiha mikhalelo sa Yehova. (Mmusome aRoma 1:20.) Mwa ntakiheryo, nkahaya nwehe itthu sootikiniha Yehova opattunxe awe valaponi. Eyo ennooniherya wiira Yehova, Muluku a ankhili. Nave nkahaya muupuwele ovirikana wa iyoolya sikhanle. Itthu iyo sinooniherya wiira Yehova onniniphenta. Okathi ninweha ahu itthu Yehova opattunxe awe, ninnisuwela saana mikhalelo sawe ni omwaattamela. Vano nrowe niwehe moota Yehova onirumeela awe itthu opattunxe awe wiira oniixuttihe itthu sinceene sa faita.

6. Nniixutta exeeni okathi nnaaweha ahu axipalame avavaka arowaka ottaiwene?

⁶ Khula etthu Yehova opattunxe awe yookhalana okathi aya. Khula mwaakha, aisarayeli yaanaaweha anapiphi avavaka musulu, okhuma wanikisa wa Fevereiro ni eriyari ya Maio. Anapiphi awo yaanivava arowaka onorti. Yehova aahaaleela aisarayeli wiira: “Hata naphipi wiirimu, onnisuwela  okathi awe”. (Yer. 8:7, Piipiliya Emakhuwa) Yehova tothanlale okathi ole wiira anapiphi avavake arowaka ottaiwene. Mwa enamuna emosaru, Yehova oothanla okathi onrowa awe waaphukela apinaatamu. Khula okathi munaaweha ahu axipalame evavaka, eyo ehaana oniiriha okupali wiira Yehova oothanla “okathi”, wiira opwetexe olumwenku ola wootakhala. — Hab. 2:3.

7. Nniixutta exeeni okathi nnaweha ahu amurumaasi avavaka? (Yesaya 40:31.)

⁷ Yehova onnaavaha ikuru arumeyi awe. Omurumeelaka profeta Yesaya, Yehova aahaaleiherya arumeyi awe wiira aamwaavaha “mapupha ntoko murumasi wira evaveke” okathi yaarowa aya okhulumuwaka. (Mmusome Yesaya 40:31.) Ikwaha sinceene, aisarayeli yaanaaweha amurumaasi avavaka musulu masi yaatalenle ene mapupha aya paahi. Akhala wiira Yehova onnaavaha ikuru amurumaasi, nave nikupaliki wiira onoonivaha ikuru. Nto okathi muninweha anyu murumaasi ovavaka musulu ni aatalenle ene mapupha awe, mukupaliki wiira Yehova onimoovahani ikuru wiira nvilele mixankiho sanyu.

8. Itthu xeeni Yobi iixuntte awe ni itthu Muluku opattunxe awe? Nave hiyo nniixutta-ni?

⁸ Nimuroromeleke Yehova. Yehova aahimooniherya Yobi wiira aahaana omuroromelaka yena. (Yob. 32:2; 40:6-8) Okathi Yehova aavaanela awe ni Yobi, aahiromola itthu sinceene opattunxe awe, ntoko itheneeri, meeku ni overunya. Nave Yehova aahilavula voohimya sa inama, ntoko enari ni ikhavalo. (Yob. 38:32-35; 39:9, 19, 20) Itthu iya sootheene saahimwiixuttiha Yobi wiira Yehova khahiyo wiira orina owerya paahi, masi toophenta ni ankhili. Nuumala Yobi ovaanela ni Yehova, omuroromela wawe waahincerereya vanceene. (Yob. 42:1-6) Mwa enamuna emosaru, okathi ninweha ahu itthu Muluku opattunxe awe, ninnoona wiira Yehova okhalana osuwela ni owerya onivikana hiyo. Nave owo ookhalana owerya ni onoomaliha mixankiho sahu. Osuwela eyo onninikhaliherya wuncererya omuroromela wahu Yehova.

9-10. Nsuwa ni epula sinniixuttiha exeeni voohimya sa Yehova?

⁹ Yesu aanisuwela saana itthu Muluku opattunxe awe. Yesu aahimukhaliherya Tiithi awe opattuxa itthu siri valaponi. Ti maana aya Biibiliya onimwiitthana awe okhala ‘muratti’. (Mir. 8:30, BIBLYA EXIRIMA.) Nto okathi aari awe valaponi, Yesu aahirumeela itthu iyo wiira owiixuttihe atthareli awe voohimya sa Yehova. Vano nrowe niwehe itthu aawiixuttinhe awe.

¹⁰ Yehova onnaaphenta atthu ootheene. Okathi Yesu aalavula awe mwaha vamwaako, owo aahaaleela awiixutti awe wiira sookhala itthu piili Yehova opattunxe awe, anamunceene ahinivaha aya efaita, itthu sene tiiya: Nsuwa ni epula. Itthu iya ti sa faita yinceene wiira nikhale akumi. Yehova anwerya ohaavaha nsuwa ni epula atthu ootakhala murima, masi mwaha wowaaphenta, onnaavaha atthu ootheene itthu iya. (Math. 5:43-45) Nto Yesu aahirumeela ntakiheryo na nsuwa ni epula wiira owiixuttihe atthareli awe wiira Yehova oniphavela wiira naaphenteke atthu ootheene. Nto okathi ninweha ahu waarya wa nsuwa aahiiso epula, nihaana wuupuwelela wiira Yehova onnaaphenta atthu ootheene. Hiyo nnoowerya otakiha ophenta wa Yehova naalaleeryaka atthu ootheene.

11. Exeeni nniixutta ahu okathi nnaaweha ahu axipalame?

¹¹ Yehova onninivaha itthu sootheene sinnithowa. Nave okathi Yesu aalavula awe mwaha wa vamwaako, owo aahimmye so: “Nkaaweheeni saana axipalame: khanaala, nnakhala khanihepha, hata kharina ntatha. Vano, Tiithi inyu ori wiirimu, onnaaphwanyiha yoolya”. Woonasa wene okathi Yesu aalavula awe, atthu anceene yaanaaweha axipalame avavaka musulu. Nuumala-vo Yesu aahaakoha so: “Ankhi nyuwo, niireke khamurina efaita waavikana awo?” (Math. 6:26) Moolumo ala anniixuttiha exeeni? Anniixuttiha wiira khula okathi Yehova onoonivahaka itthu sinnithowa!  (Math. 6:31, 32) Nave moolumo awo a Yesu nlelo annaalipiha arumeyi a Yehova olelo-va. Mwa ntakiheryo, murokora mmosa pioneera a wEspanha, aahikhulumuwa okhala wiira khaaphwanya opuro wookhala. Nihiku nimosa owo aahaaweha axipalame alyaaka inuku ni ifuruta, nto eyo yaahimwiiriha okhalana moonelo wooloka. Exeeni yaamukhalihenrye murokora ole oturuka moonelo awe? Owo onihimya so: “Waaweha axipalame ale alyaaka waahikikhaliherya woona wiira Yehova nave onookikhapelela”. Nuuvira okathi vakhaani, murokora ole aahiphwanya opuro wookhala.

12. Moovarihana ni Matheyo 10:29-31, iphera sinniixuttiha exeeni voohimya sa Yehova?

¹² Yehova onnimuthokorerya khula mmosa a hiyo. Ohinatthi waaruma awiixutti awe wiira yalaleerye, Yesu aahaakhaliherya oxintta woova olupatthiwa. (Mmusome Matheyo 10:29-31.) Owo aahirumeela ntakiheryo na iphera, axipalame yaawo yaasuwelaxiwa wIsarayeli. Okathi wa Yesu, iphera khisaatumihiwa musurukhu munceene. Hata vari siiso, Yesu aahaaleela awiixutti awe wiira: “Hata emosa emorelaka vathi, Tiithi anyu onoosuwela”. Nuumala Yesu aahaaleela wiira: “Nyuwo mookhalana efaita yuulupale ovikana iphera sinceene”. Ni moolumo ala, Yesu aahaalipiherya atthareli awe wiira Yehova, aanaavaha efaita ni wiira khiyaareerela woova olupatthiwa. Nto okathi yaarowa aya olaleeryaka mmittettheni anaweha iphera, awo yaamurowa wuupuwelelaka moolumo a Yesu. Mwa enamuna emosaru, khula okathi nyuwo munaaweha anyu axipalame, muupuweleke wiira “mookhalana efaita yuulupale ovikana iphera sinceene”. Mukupaliki wiira mukhaliheriwaka ni Yehova, nyuwo munoowerya oxintta okathi munilupatthiwa anyu. — Esal. 118:6.

13. Okathi ninweha ahu itthu Muluku opattunxe awe, exeeni ninreerela ahu opaka wiira niixutte etthu voohimya sa Yehova?

¹³ Niwehaka itthu Muluku opattunxe awe, nnoowerya wiixutta itthu sikina voohimya sa Yehova. Masi sookhala itthu ninreerela ahu opaka. Yoopacerya, nihaana wiivaha okathi wiira niwehe itthu Muluku opattunxe awe. Ya nenli, nihaana wuupuwelela ele enniixuttiha aya voohimya sa Yehova. Masi ikwaha sikina opaka eyo khivanikhweya. Mwa ntakiheryo, murokora onikhala oCamarões oniitthaniwa Géraldine ohimmye so: “Okhala wiira kiyariwe ositati, wiira kiwehe itthu Muluku opattunxe awe kihaana wiimananiha vanceene”. Nave mutokweene mmosa oniitthaniwa Alfonso ohimmye so: “Kihiixutta wiira kihaana oviriha okathi kiwehaka itthu Muluku opattunxe awe ni wuupuwelela ele kiniixutta aka voohimya sa Yehova”.

14. Okathi uupuwelela awe itthu Muluku opattunxe awe, Davidi iixutta exeeni?

¹⁴ Esalimo 8:4, 5, Davidi olempe so: “Vanwehaka erimu, muteko wa matatʼanyu kònaka mweri nʼitheneri sipwehalyanyu-vo kinnithamala wiira: ʻomphwanela-ni mutthu wiira ùpuweliwe ni nyuwo?ʼ” Masu ala, anooniherya wiira Davidi aanuupuwelela itthu Yehova opattunxe awe. Maana okathi aaweha awe wiirimu sisareyale ene itheneeri, khaaweha oreera waya paahi masi aniixutta itthu sikina. Owo aaniwerya oweha itthu Muluku opattunxe awe iyo ni etthu yaamwiixuttiha aya voohimya a Yehova. Owo aahiixutta wiira Yehova  ookhalana owerya wuulupale. Nave Davidi aanuupuwelela mootikiniha enamuna annunwa awe mmirimani mwa amamawe. Nto okathi uupuwelela awe itthu iya sootheene, aaniwerya oweha wiira Yehova, Muluku a ankhili. — Esal. 139:14-17.

15. Okathi muniweha anyu itthu Muluku opattunxe awe, mikhalelo xeeni sa Yehova muniixutta anyu? (Esalimo 148:7-10.)

¹⁵ Sintoko Davidi, nave sookhala itthu Muluku opattunxe awe sikhanle ahu ooweha ni wuupuwelela. Nnoowerya osuwela mikhalelo sa Yehova niwehaka itthu Muluku opattunxe awe. Mwa ntakiheryo, oviha wa nsuwa niireke khonooniherya wiira Yehova toowerya? (Yer. 31:35) Nave khamunoona wiira Yehova Muluku a ankhili okathi muninweha anyu mwaapalame otekaka epuru awe? Niireke khamunoona wiira Yehova Muluku oohakalala okathi muninweha anyu mwalapwa othweelihaka mwiila awe? Niireke khamunoona wiira Yehova onniniphenta okathi muninweha anyu maama othweelaka ni mwanawe? Tthiri sookhala itthu sinceene sinnikhaliherya wiixutta etthu voohimya sa Yehova. Itthu sootheene Yehova opattunxe awe, sikhale saamukhaani aahiiso suulupale, sikhale sinwerya ahu woona aahiiso sihinwerya ahu woona, sinninvuwiha Yehova. — Musome Esalimo 148:7-10.

16. Etthu xeeni mulakenle anyu opaka?

¹⁶ Muluku ahu Yehova ta miruku, toophenta, tooweryaxa, ni itthu sootheene onipaka awe ti sooreera. Mikhalelo iyo ni sikina, nnoowerya osuwela niwehaka itthu Muluku opattunxe awe. Khula nihiku nihaana wiivahaka okathi wiira niwehe ni wuupuwelela itthu sinniixuttiha aya itthu Muluku opattunxe awe. Okathi nimpaka ahu eyo ninnitepa omwaattamela Mpattuxa ahu Yehova. (Yak. 4:8) Mwaha onittharelana, nnooweha moota anamuyari akhanle aya oorumeela itthu Muluku opattunxe awe, wiira yaakhaliherye anaaya omwaattamela Yehova.