1. Ano an usa nga nakabulig kan Job nga mas makilala hi Jehova?

 HA NGATANAN nga pakiistorya ni Job ha iya bug-os nga kinabuhi, may usa nga sigurado nga waray niya hingalimti—an iya pakiistorya kan Jehova nga Dios. Basi maparig-on an pagsarig ni Job ha kinaadman ni Jehova ngan ha Iya abilidad ha pag-ataman han Iya mga surugoon, gin-unabi ni Jehova an pipira han Iya urusahon nga mga linarang. Pananglitan, napahinumdoman hi Job nga an Dios nagtatagana para ha mga hayop, salit maaataman liwat Niya hi Job. (Job 38:39-41; 39:1, 5, 13-16) Pinaagi ha pag-usisa ha pipira nga linarang, damu an nahibaroan ni Job parte ha mga kalidad han iya Dios.

2. Kay ano nga bangin makurian kita pag-usisa ha mga linarang ni Jehova?

² Kita liwat mas mahibabaro pa parte ha aton Dios kon uusisahon ta an iya mga linarang. Pero danay bangin diri ito masayon buhaton. Kon naukoy kita ha syudad, bangin pipira la nga linarang ni Jehova an aton nakikita kada adlaw. Bisan kon naukoy kita hirayo ha syudad, bangin abaton ta nga gutiay la an aton panahon nga usisahon ito. Salit hisgotan ta kon kay ano nga sulit tagan hin panahon ngan pangalimbasog an pag-obserbar ha mga linarang. Kikitaon ta kon paonan-o gin-gamit ni Jehova ngan ni Jesus an mga linarang ha pagtutdo ngan kon ano an puydi ta buhaton basi mas mahibaro pa hin mga leksyon tikang ha mga linarang.

3. Ano an nagpapakita nga karuyag ni Jehova nga ma-enjoy ni Adan an mga linarang?

³ Karuyag ni Jehova nga ma-enjoy han siyahan nga tawo an Iya mga linarang. Han ginhimo han Dios hi Adan, Iya gintagan hiya  hin mahusay nga paraiso nga urukyan ngan ginsugo hiya nga kultibaron ngan pahaluagon ito. (Gen. 2:8, 9, 15) Imadyina kon ano kaeksayted hi Adan samtang ginkikita niya an pagturok han mga liso ngan pamukad han mga tanom. Daku gud an iya pribilehiyo nga atamanon an garden han Eden! Ginsugo liwat ni Jehova hi Adan nga ngaranan an iba-iba nga hayop. (Gen. 2:19, 20) Kaya unta ni Jehova manngaran; lugod igintapod niya ito kan Adan. Sigurado nga antes magdesisyon hi Adan kon ano an itatawag ha mga hayop, gin-adman niya hira hin maopay ngan gin-obserbaran an ira mga hitsura ngan kinaiya. Waray ruhaduha nga na-enjoy ni Adan an pagbuhat hito. Sigurado nga naghatag ito ha iya hin oportunidad nga mas maapresyar an kinaadman han iya Amay ngan an kahusay ngan pagkamakaruruyag han Iya mga linarang.

4. (a) Ano an usa nga rason kon kay ano nga angay ta usisahon an mga linarang? (b) Ano nga mga linarang an gin-aapresyar mo gud?

⁴ Usa nga rason kon kay ano nga angay ta usisahon an mga linarang kay karuyag ni Jehova nga buhaton ta ito. Gin-aghat kita niya: “Hangad kamo ha langit ngan pagkita.” Katapos, hiya nagpakiana: “Hin-o an naglarang hini nga mga butang?” Klaro an baton. (Isa. 40:26) Ginpuno ni Jehova diri la an langit kondi pati an tuna ngan dagat hin damu nga urusahon nga linarang nga makukuhaan ta hin leksyon. (Sal. 104:24, 25) Ngan hunahunaa la an pagkahimo han Dios ha aton. Gintagan kita niya hin abilidad nga maapresyar an kahusay han iya mga linarang. Ginhimo liwat niya nga posible nga ma-enjoy ta an pagkaiba-iba hito pinaagi ha aton lima nga sentido—pagkita, pagpamati, pag-abat, panrasa, ngan panhamot.

5. Sumala ha Roma 1:20, paonan-o kita magpapahimulos ha pag-aram han mga linarang ni Jehova?

⁵ Ginsusumat han Biblia an usa pa nga importante nga rason kon kay ano nga angay ta usisahon an mga linarang. Nagtututdo ito ha aton parte ha mga kalidad ni Jehova. (Basaha an Roma 1:20.) Pananglitan, pansina an mahusay nga pagkadisenyo han mga linarang. Diri ba iginpapakita hito an kinaadman han Dios? Ngan hunahunaa an iba-iba nga pagkaon nga aton nai-enjoy. Klaro ito nga ebidensya han iya gugma ha mga tawo. Kon nasasabtan ta an personalidad ni Jehova pinaagi han mga butang nga iya ginhimo, mas nakikilala ta hiya ngan napapagios kita nga magin mas duok ha iya. Kitaon ta yana an pipira nga paagi nga gin-gamit ni Jehova an mga linarang ha pagtutdo ha mga tawo hin importante nga mga leksyon.

6. Ano nga leksyon an mahibabaroan ta ha pag-obserbar ha mga tamsi nga nabalhin?

⁶ Hi Jehova may eskedyol para ha mga panhitabo. Kada tuig butnga han kataposan han Pebrero  ngan kabutngaan han Mayo, an mga Israelita nakita hin mga sigwenya nga nalupad samtang nabalhin tipa-norte. “An tamsi nga sigwenya ha langit maaram han mga kapanahonan hito,” siring han Dios ha mga Israelita. (Jer. 8:7) Sugad la nga hi Jehova naghimo hin eskedyol para hini nga mga tamsi, may eskedyol liwat hiya ha pagpadapat han iya mga paghukom. Yana kon gin-oobserbaran ta an mga tamsi nga nabalhin, nagpapahinumdom ito ha aton nga makakasarig kita nga hi Jehova may “itinanda nga panahon” basi tapuson inin maraot nga kalibotan.—Hab. 2:3.

7. Ano nga leksyon an mahibabaroan ta kon ginkikita naton an paglupad han tamsi? (Isaias 40:31)

⁷ Gintatagan ni Jehova hin kusog an iya mga surugoon. Pinaagi kan Isaias, nagsaad hi Jehova nga Iya papakusgon an Iya katawohan kon nanluluya hira o nasusubo basi ‘lumupad hira hin hitaas nga sugad hin may mga pako han mga agila.’ (Basaha an Isaias 40:31.) An mga Israelita hiara makakita hin mga agila nga haros diri na nagkakampay han ira mga pako kay napadára hira ha hangin nga natipaigbaw. Maopay gud ito nga pahinumdom nga sugad la nga gintatagan ni Jehova hin kusog ito nga mga tamsi, mahahatagan liwat niya hin kusog an iya mga surugoon! Kon nakita ka hin makusog nga tamsi nga nalupad tipaigbaw nga haros diri ginkakampay an mga pako, hinumdumi nga mahahatagan ka ni Jehova hin kusog basi makaya an imo mga problema.

8. Ano an nahibaroan ni Job ha pag-usisa ha mga linarang han Dios, ngan ano an aton mahibabaroan?

⁸ Hi Jehova angay han aton pagsarig. Ginbuligan ni Jehova hi Job nga mas sumarig ha Iya. (Job 32:2; 40:6-8) Ha pakiistorya kan Job, damu nga linarang an gin-unabi han Dios, upod na an mga bitoon, dampog, ngan kidlat. Nag-unabi liwat hi Jehova hin mga hayop, sugad han ihalas nga todo nga baka ngan kabayo. (Job 38:32-35; 39:9, 19, 20) Ini ngatanan ebidensya diri la han urusahon nga gahum han Dios kondi pati liwat han iya gugma ngan daku nga kinaadman. Tungod hini nga pag-istorya, nahibaro hi Job nga mas sumarig pa gud kan Jehova. (Job 42:1-6) Kon aadman ta liwat an mga linarang, mapapahinumdoman kita nga hi Jehova mas maaramon ngan mas gamhanan gud kay ha aton. Kaya liwat niya wad-on ngan wawad-on gud niya an ngatanan ta nga kakurian. Makakabulig ini nga impormasyon nga maparig-on an aton pagsarig ha iya.

9-10. Ano an igintututdo ha aton han adlaw ngan han uran parte kan Jehova?

⁹ Damu gud an nahibabaroan ni Jesus ha mga linarang. Sugad nga “eksperto nga magburuhat,” nagkaada hiya pribilehiyo nga bumulig ha iya Amay ha paglarang han uniberso. (Prob. 8:30) Ha urhi, han nakanhi hi Jesus ha tuna, iya gin-gamit an mga linarang ha pagtutdo ha iya mga disipulo parte ha iya Amay. Pansina an pipira nga leksyon nga iya igintutdo.

¹⁰ Iginpapakita ni Jehova ha tanan an iya gugma. Ha Sermon ha Bukid, gin-unabi ni Jesus ha iya mga disipulo an duha nga linarang nga ginbabalewaray la han damu nga tawo: an adlaw ngan uran. Pariho ini kinahanglan basi magpabilin kita nga buhi. Puydi unta diri ihatag ini ni Jehova ha mga tawo nga diri nag-aalagad ha iya. Lugod, mahigugmaon nga igintatagana niya ha ngatanan an adlaw ngan uran. (Mat. 5:43-45) Gin-gamit ni Jesus ini nga leksyon basi tutdoan an iya mga disipulo nga karuyag ni Jehova nga ipakita naton ha tanan an gugma. Ha kada panahon nga nag-i-enjoy kita hin mahusay nga pagtunod han adlaw o nakita hin makarepresko nga uran, puydi ta hunahunaon an waray pinaurog nga gugma ni Jehova. An iya ehemplo makakapagios ha aton nga ipakita liwat ito nga gugma pinaagi ha pagsangyaw ha ngatanan.

11. Paonan-o kita madadasig ha pag-obserbar ha mga tamsi?

¹¹ Igintatagana ni Jehova an aton pisikal nga panginahanglan. Ha amo gihapon nga sermon,  nagsiring liwat hi Jesus: “Obserbari hin maopay an mga tamsi ha langit; diri hira nagsasabwag hin binhi o nag-aani o nagtitirok han mga inani ngadto ha mga bodega, pero ginpapakaon hira han iyo Amay ha langit.” Posible nga nakikita han mga mamarati ni Jesus an mga tamsi nga nalupad ha bawbaw nira han nagpakiana hiya: “Diri ba mas birilhon kamo kay ha ira?” (Mat. 6:26) Mahigugmaon gud ito nga paagi han pagpasarig ha aton nga itatagana ni Jehova an aton pisikal nga panginahanglan! (Mat. 6:31, 32) Ini nga leksyon nga nahibabaroan ha mga linarang padayon nga nagdadasig ha matinumanon nga mga surugoon. Usa nga batan-on nga payunir nga sister ha Spain an nasusubo kay diri hiya nakakabiling hin tuhay nga urukyan. Pero katapos niya makakita hin mga tamsi nga nakaon hin mga liso ngan mga berry, nadasig hiya. Siring niya, “Napahinumdoman ako hito nga mga tamsi nga gin-aataman hira ni Jehova ngan iya liwat ako aatamanon.” Waray pag-iha katapos hito, nakabiling hiya hin mauukyan.

12. Sumala ha Mateo 10:29-31, ano an aton mahibabaroan ha mga maya mahitungod kan Jehova?

¹² Importante kita kan Jehova sugad nga mga indibiduwal. Antes sugoon ni Jesus an iya mga apostol nga magsangyaw, ginbuligan niya hira nga malamposan an ira kahadlok ha pagkontra. (Basaha an Mateo 10:29-31.) Ginbuhat niya ito pinaagi ha pag-unabi han usa han pinakakomon nga mga tamsi ha Israel: an maya. Ito nga mga tamsi barato gud ha panahon ni Jesus. Pero nagsiring hiya ha iya mga disipulo: “Waray bisan usa ha ira an mahuhulog ha tuna nga diri hinbabaroan han iyo Amay.” Katapos, nagsiring liwat hiya: “Mas birilhon kamo kay ha damu nga maya.” Hito nga paagi, ginpasarig ni Jesus an iya mga disipulo nga importante hira kan Jehova sugad nga mga indibiduwal, salit waray hira rason nga mahadlok ha pagtimaraot. Sigurado nga nahinumdoman han mga disipulo an mga pulong ni Jesus han nakakita hira hin mga maya samtang nagsasangyaw ha mga bungto ngan baryo. Ha kada panahon nga nakita ka hin gutiay nga tamsi, hinumdumi nga importante ka kan Jehova sugad nga indibiduwal kay ikaw liwat “mas birilhon . . . kay ha damu nga maya.” Ha bulig niya, diri mo kinahanglan mahadlok ha pagkontra.—Sal. 118:6.

13. Ano an mabulig ha aton nga mahibaro hin mga leksyon tikang ha mga linarang?

¹³ Damu pa nga leksyon an mahibabaroan ta parte kan Jehova tikang ha mga linarang. Paonan-o? Siyahan, kinahanglan maghatag kita hin panahon ha pag-obserbar ha mga linarang. Sunod, kinahanglan hunahunaon ta kon ano an igintututdo hito ha aton parte kan Jehova. Bangin diri pirme masayon an pagbuhat hito. Hi Géraldine, nga sister nga taga-Cameroon, nagsiring, “Nagdaku ako ha syudad, salit kinahanglan ko mas mangalimbasog basi maobserbaran an mga linarang.” An tigurang nga hi Alfonso nagsiring, “Nahibaroan ko nga kinahanglan ko mag-eskedyol hin panahon nga mag-usahan basi obserbaran an mga linarang ni Jehova ngan pamalandungon kon ano an igintututdo hito ha akon parte ha iya.”

14. Ano an nahibaroan ni David han ginpamalandong niya an mga linarang han Dios?

 ¹⁴ Ginhunahuna hin maopay ni David an mga linarang han Dios. Nagsiring hiya kan Jehova: “Kon akon nakikita an imo langit, an mga buhat han imo mga tudlo, an bulan ngan an mga bitoon nga imo ginhimo, ano ba an mortal nga tawo nga pirme mo hiya nahinunumdoman?” (Sal. 8:3, 4) Oo, samtang ginkikinita ni David an langit ha gab-i, diri la kay gin-apresyar niya an kahusay han uniberso. Iya liwat ginpamalandong kon ano an igintututdo ha iya han mga bitoon parte ha Dios. Nahibaro hiya kon ano kaharangdon hi Jehova. Ha iba nga mga panahon, ginpamalandong ni David kon paonan-o an iya lawas naporma ha tagoangkan han iya nanay. Samtang iya ginpapamalandong inin urusahon nga mga detalye, mas naapresyar niya an kinaadman ni Jehova.—Sal. 139:14-17.

15. Paghatag hin mga ehemplo kon paonan-o mo nakita an mga kalidad ni Jehova ha mga linarang. (Salmo 148:7-10)

¹⁵ Pariho kan David, diri mo kinahanglan kumadto ha hirayo basi makaagi hin linarang nga papamalandungon. Kon magkikita ka la ha palibot, damu nga kalidad ni Jehova an masasabtan mo. Pananglitan, hibaroi an gahum ni Jehova kon inaabat mo an kapaso han adlaw ha imo panit. (Jer. 31:35) Pamalandonga an kinaadman han Dios kon nakita ka hin tamsi nga naghihimo hin salag. Hunahunaa an abilidad ni Jehova ha pagpatawa kon nakita ka hin gutiay pa nga ayam nga ginlalanat an ikog hito. Ngan pasalamati hi Jehova ha iya gugma ha kada panahon nga nakita ka hin nanay nga nakikig-uyag ha iya minasus-an nga anak. Damu gud an aton higayon nga mahibaro parte kan Jehova kay an tanan niya nga linarang—daku man o gutiay, hirani man o hirayo—nagdadayaw ha iya.—Basaha an Salmo 148:7-10.

16. Ano an dapat naton magin determinasyon?

¹⁶ An aton Dios waray kapariho ha pagin maaramon, mahigugmaon, maopay gud magdisenyo, ngan gamhanan. Hibabaroan ta ini ngan an damu pa nga kalidad kon kikitaon ta la hin maopay an mga linarang ha palibot. Hinaot kita ngatanan regular nga maghatag hin panahon nga ma-enjoy an mga linarang ngan hunahunaon kon ano an igintututdo hito ha aton parte kan Jehova. Ha pagbuhat hito, magigin mas duok gud kita ha aton Maglalarang. (San. 4:8) Ha sunod nga artikulo, hihisgotan ta kon paonan-o magagamit han mga kag-anak an mga linarang ha pagbulig ha ira mga anak nga magin duok kan Jehova.