1. How Jehovah help Job know-am well?

 JOB talk to plenty people when e dey alive, but the one wey Job no go ever forget na when e talk with Jehovah. Jehovah tell-am say make e look the things wey E don make. This one go help Job know say Jehovah really get sense and make Job trust Jehovah more say E fit provide everything wey people wey de worship-am need. Jehovah remind Job say as E de care for animals, na so Jehovah fit still care for-am. (Job 38:39-41; 39:1, 5, 13-16) Job learn plenty things about Jehovah from some of the things wey Jehovah make.

2. Why e dey hard sometimes to find time look wetin Jehovah don make?

² We too fit learn more about Jehovah when we sofri look the things wey e don make. Na true say sometimes e no easy to do this one. If we de stay for big town, e fit no dey easy to see plenty things wey Jehovah don make. Even if we de stay for village where we fit see plenty things wey Jehovah make, we fit de feel say we no get time to sofri look them. So make we talk about why e dey important to find time sofri look the things wey God don make. We go still talk about how Jehovah and Jesus use the things wey Jehovah make teach people. And we go see wetin we fit do to learn more from things wey Jehovah don make.

3. Wetin show say Jehovah be want make Adam enjoy the things wey e don make?

³ Jehovah be want make Adam enjoy the things wey e don make. When God make Adam, e put-am for Paradise wey everything for there really good and e tell-am say make Adam care for the garden so that the whole earth go be Paradise. (Gen. 2:8, 9, 15) Think of how Adam go don happy as e de see how seed de grow and flowers de come out fine. Na really better chance Adam get to care for the garden of Eden! Jehovah still tell Adam make e give animals name. E for dey easy for Jehovah to give the animals name but e no do-am, instead e give Adam the work. Before Adam go fit give the animals name, e go don sofri look the character for the different-different animal and how them be. This work go don make Adam really happy. This one go don make Adam see say the things wey Jehovah make really dey wonderful and say Jehovah get plenty sense.

4. (a) Wetin be one reason why we suppose take time look wetin Jehovah don make? (b) Which things wey Jehovah make you really like?

⁴ One reason why we suppose take time look wetin Jehovah don make na because Jehovah want make we do-am. Jehovah tell us say ‘Make we raise our eye up look heaven and see.’ Then E ask say “Who make all this things?” The answer no hard at all. (Isa. 40:26) We fit learn plenty things about Jehovah from the things wey e don make for heaven, earth and even inside water. (Ps. 104:24, 25) Just think about the way God make us. E make-am possible for us to fit enjoy to de look the fine-fine things wey e don make. Jehovah make us to fit see, hear, touch, taste and smell things. And all this na wetin we need to fit enjoy different-different things wey Jehovah don make.

5. As e dey for Romans 1:20, wetin we go gain when we take time look the things wey Jehovah make?

⁵ Bible tell us another reason why e dey important for us to take time look the things wey Jehovah don make. E go help us learn about Jehovah fine-fine character. (Read Romans 1:20.) For example, look the things wey Jehovah make and see the fine way e take arrange them. E de teach us say Jehovah really get sense. And think about the different-different food wey we de enjoy, e de show us say Jehovah really love us. When we learn about Jehovah fine-fine character from the things wey e don make, we go know Jehovah more, and this one go make us  want near Jehovah more-more. Now, make we talk about some ways wey Jehovah don use the things wey e make, teach us important things.

6. Wetin we fit learn from birds wey get time wey them de leave their area fly go another place go stay for some time?

⁶ Jehovah get time wey e don set for different things. From February ending go reach middle of May every year, Israel people de see one bird wey them de call stork as them de fly go North. God tell Israel people say: “Stork for sky, know the correct time wey e suppose fly go another place.” (Jer. 8:7) Just as Jehovah don set time for this birds to fly go another place, na so e don set time wey e go judge people for this world. Today too, as we de see different-different birds wey get time wey them de leave their area fly go another place go stay for some time, e de remind us say Jehovah get time wey e don set to end this wicked world.—Hab. 2:3.

7. Wetin we fit learn when we see bird de fly go up? (Isaiah 40:31)

⁷ Jehovah de give e servants power. Jehovah use prophet Isaiah promise e people say e go give them power to“fly go up with wing like eagle” when them dey weak or them no dey happy. (Read Isaiah 40:31.) Israel people be de see eagle plenty time as them de fly for up wey they no shake their wings plenty. Them de do this one when they open their wing and allow air wey de go up to carry them go up. This one de remind us say, Jehovah go give us power just as e de give eagle power. When you see bird de fly go up-up wey e no shake e wing plenty, make you remember say, Jehovah fit give you power to face your problems.

8. Wetin Job learn as e think about the things wey Jehovah don make and wetin we fit learn from-am?

⁸ We suppose trust Jehovah. Jehovah help Job to fit trust-am more. (Job 32:2; 40:6-8) As Jehovah de talk with Job, e talk about plenty things wey e don make, like star, cloud, and lightning. Jehovah still talk about some animals like bush cow and horse. (Job 38:32-35; 39:9, 19, 20) This things no only show say Jehovah get plenty power, but e still show say, Jehovah really get sense and e love us. This one help Job to fit trust Jehovah more-more. (Job 42:1-6) When we too take time look the things wey Jehovah don make, e go remind us say Jehovah sense and power pass our own by far. And say e fit and e go end all the problems wey we de face. This one fit help us trust Jehovah more.

9-10. Wetin we learn about Jehovah when we see sun and rain?

⁹ Jesus know plenty things about the things wey Jehovah make. Like “master worker,” Jesus work with e Papa when e de make things. (Prov. 8:30) When Jesus come this earth, e use the things wey e Papa make, to teach e disciples about e Papa. Make we talk about some things wey Jesus teach.

¹⁰ Jehovah de show say e love everybody. When Jesus de teach for mountain, e talk to e disciples about sun and rain wey na things wey many people no de too think about, and we need this things to dey alive. Jehovah for fit decide say e no go give this things to people wey no de serve-am. But e no do like that, e give sun and rain to everybody. (Matt. 5:43-45) Jesus use this one teach e disciple say Jehovah want make we show love for everybody. Anytime we see sun as e de go down or  rain wey de fall, make we remember say Jehovah de show love for everybody. This Jehovah better example fit make us want preach to everybody to show say we love them.

11. Wetin we fit learn as we de look birds?

¹¹ Jehovah de give us wetin we need to dey alive. When Jesus de teach for the mountain, e still talk say: “Look the birds for heaven well; they no de plant seed or harvest or gather food keep, but wuna Papa for heaven de give them food.” E fit be say the people de see as birds de fly when Jesus ask them say: “Wuna no dey important pass them?” (Matt. 6:26) This na better way to help us know say Jehovah go give us wetin we need. (Matt. 6:31, 32) This better lesson wey we learn from birds continue to de encourage Jehovah servant. One young sister wey de pioneer for Spain be dey sad because e no see better place to stay. After the sister see as bird de chop seed and fruit, this one make e mind calm down. E talk say: “As I de see the way Jehovah care for birds, e remind me say Jehovah go care for me too.” E no tey after this one, the sister see better place to stay.

12. As e dey for Matthew 10:29-31, wetin we learn about Jehovah from sparrows?

¹² Each one of us dey important for Jehovah eye. Before Jesus send e disciples to go preach, e help them to stop to de fear people wey go try stop them. (Read Matthew 10:29-31.) E use one bird for Israel wey them de call sparrow do this one. For Jesus time, people no de see this bird as anything. But Jesus tell e disciples say: ‘One of them no go fall for ground, wey wuna Father no go know.’ E still talk say: “wuna get value pass plenty sparrow.” So Jesus help them see say Jehovah value them one by one and they no need to fear people wey go try to stop them. We dey sure say anytime wey Jesus disciples see sparrow when them de preach, they go remember wetin Jesus don tell them. So anytime wey you see one small bird, remember say you dey important for Jehovah eye because you “get value pass plenty sparrow.” You no need to fear when people de suffer you because of your faith.—Ps. 118:6.

13. Wetin go help us learn from the things wey Jehovah don make?

¹³ We fit learn plenty other things about Jehovah from the things wey e don make. How? The first thing to do na to take time look the things wey God don make. After that one, we need to think deep about wetin them de teach us about Jehovah. E fit no dey easy for us to de do this one. One sister for Cameroon wey e name na Géraldine talk say, “I grow for city, so I come see say I need to try hard to fit take time look wetin Jehovah don make.” One elder wey e name na Alfonso talk say, “I don see say I need to de find time look wetin Jehovah  don make and de think deep about wetin them de teach me about Jehovah.”

14. Wetin David learn when e think about the things wey Jehovah don make?

¹⁴ David think deep about wetin Jehovah don make. E tell Jehovah say: “When I see your heavens, the things wey your fingers make, the moon and the stars wey you don make, who be man wey you de think about, and son of man wey you de take care of?” (Ps. 8:3, 4) True-true, as David look the sky for night, e no only enjoy the stars wey e de see, e still think deep about wetin the stars de teach-am about God. E learn say na Jehovah high pass. For some other time them, David think about the way e grow for e mama belle. When e think about the wonderful way wey Jehovah make e body, e even thank Jehovah more for the kind sense wey Jehovah get.—Ps. 139:14-17.

15. Give some example of how you don see Jehovah better character from the things wey e don make. (Psalm 148:7-10)

¹⁵ Like David, you no need to travel go far to fit see something wey Jehovah don make for you to think deep about Jehovah. We get plenty things around us wey fit help us know Jehovah more. For example, think about Jehovah power when sun de warm your body. (Jer. 31:35) Think about the kind sense wey God get when you see as birds de build their house. Think about how Jehovah want make we de happy when you see how small dog de turn round as e de try to catch e own tail. When you see woman wey de play with e pikin, thank Jehovah for the way e love us. We get plenty chance to learn about Jehovah, because everything wey e make, whether big or small, near or far de talk more about-am.—Read Psalm 148:7-10.

16. Wetin we suppose make up our mind to de do?

¹⁶ Our God get power, e get sense and e love us pass any other person and everything wey e make really fine. We fit learn about Jehovah better character if we take time look the things wey e don make. Make we always find time to look wetin God don make and think about wetin e de teach us about Jehovah. If we de do this one, we go de near Jehovah more-more. (Jas. 4:8) For the article wey go follow, we go talk about how papa and mama fit use things wey Jehovah don make help their children near Jehovah.