ALATIKE AKO 12
Tou Iloʼi Lelei Age Ia Sehova ʼAki Tana Fakatupu
“ ʼE ha lelei ʼona kalitate talu mai te fakatupu ʼo te malamanei, he ʼe feala ke tou mahino ki ai ʼi te ʼu meʼa ʼae neʼe ina fai.”—LOMA 1:20.
KATIKO 6 ʼE Kalagaʼi e Te Lagi Te Kololia ʼo Te ʼAtua
TE ʼU MANATU FAKANOUNOU a
1. Kotea ʼae neʼe tokoni kia Sopo ke ina iloʼi lelei age ia Sehova?
ʼI TE maʼuli ʼo Sopo neʼe faipalalau mo ni hahaʼi tokolahi. Kae ʼe mahino ia, neʼe ko tana faipalalau mo Sehova ʼAtua ʼae neʼe maʼuhiga ʼaupito age. Neʼe ui age e Sehova kia Sopo ke mamata ki ʼihi meʼa taulekaleka neʼe ina fakatupu. Neʼe fakamalohi ai te falala ʼa Sopo ki te toe poto lahi ʼo Sehova pea ʼe ina lava foaki te ʼu meʼa fuli ʼae ʼe ʼaoga ki ʼAna kaugana. Ohage la, neʼe fakamanatuʼi age e Sehova kia Sopo, kapau ʼe tokaga ki te ʼu manu pea ʼe toe tokaga anai kia Sopo. (Sopo 38:39-41; 39:1, 5, 13-16) ʼI tana mamata ki te ʼu meʼa ʼae neʼe fakatupu e Sehova, neʼe iloʼi ai e Sopo te tahi ʼu kalitate ʼo tona ʼAtua.
2. He koʼe ʼe lagi faigataʼa hatatou mamata ki te ʼu meʼa ʼae neʼe fakatupu e Sehova?
2 ʼE toe feala mo tatou ke tou iloʼi lelei age totatou ʼAtua moka tou mamata ki te ʼu meʼa ʼae neʼe ina fakatupu. Kae ʼe lagi faigataʼa ʼi ʼihi temi tatatou fai te faʼahi ʼaia. Ka tou maʼuʼuli ʼi he loto kolo, ʼe mole lagi tou sisio ʼi te ʼaho fuli ki te natula. Peʼe lagi tou nonofo ovi ki te ʼulu ʼakau, kae ʼe tou manatu ʼe mole hotatou temi ke tou mamata ai ki te natula. Koia, tou vakaʼi te ʼu fua lelei ʼe tou maʼu moka tou toʼo he temi pea mo tou faiga ke tou sioʼi fakalelei te fakatupu. ʼE tou vakaʼi anai pe neʼe fakaʼaogaʼi feafeaʼi e Sehova mo Sesu te fakatupu moʼo akoʼi ia te hahaʼi. Pea ʼe tou toe vakaʼi anai pe kotea ʼae ʼe feala ke tou fai ke tou taʼofi he tahi ʼu ako mai te natula.
TE ʼU TUPUʼAGA KE TOU MAMATA AI KI TE FAKATUPU
Neʼe loto e Sehova ke fiafia ia Atama ʼi te ʼu meʼa ʼae neʼe ina fakatupu pea ke ina foaki he ʼu higoa ki te ʼu manu (Vakaʼi te palakalafe 3)
3. He koʼe ʼe tou iloʼi neʼe loto e Sehova ke fiafia ia Atama ʼi te ʼu meʼa ʼae neʼe ina fakatupu?
3 Neʼe loto e Sehova ke fiafia te ʼuluaki tagata ʼi te ʼu meʼa ʼae neʼe ina fakatupu. ʼI te fakatupu e te ʼAtua ia Atama, neʼe ina foaki age he palatiso taulekaleka ke nofo ai, mo ina gaueʼi pea mo fakalahi. (Sen. 2:8, 9, 15) Fakakaukauʼi age muʼa te fiafia ʼo Atama ʼi tana sio ki te maʼuli ʼo te magisi pea mo te matala ʼo te ʼu fisiʼi teu. Neʼe maʼuhiga ʼaupito kia Atama tana tokaga ki te ʼoloto ʼo Eteni! Neʼe toe kole e Sehova kia Atama ke ina foaki ni higoa ki te ʼu manu kehekehe. (Sen. 2:19, 20) Neʼe feala pe ke foaki e Sehova totonu te ʼu higoa ʼo te ʼu manu, kae neʼe ina tuku kia Atama te gaue ʼaia. Lagi ʼi muʼa ʼo tana foaki ni higoa, neʼe sioʼi fakalelei e Atama te agaaga ʼo te ʼu manu. ʼE mahino ia, neʼe leleiʼia e Atama te gaue ʼaia. Neʼe lagi mahino lahi age ai ki te poto ʼo tana Tamai pea mo te matalelei ʼo te ʼu meʼa ʼae neʼe ina fakatupu.
4. (1) He koʼe ʼe tonu ke tou mamata ki te fakatupu? (2) Kotea ʼae ʼe ke leleiʼia ʼi te ʼu meʼa ʼae neʼe fakatupu e Sehova?
4 ʼE tonu ke tou mamata ki te fakatupu koteʼuhi ʼe loto ia Sehova ke tou fai te faʼahi ʼaia. ʼE ina ui fenei mai: “Kotou hiki ake ʼokotou mata ki te lagi pea kotou sisio.” Pea ʼe ina fehuʼi fenei: “Ko ai ʼae neʼe ina fakatupu te ʼu meʼa ʼaia?” ʼE tou iloʼi lelei tona tali. (Esa. 40:26) Neʼe fakatupu e Sehova ia meʼa fuli ʼae ʼi te lagi, mo te kele pea mo te tai. Pea ʼaki te ʼu meʼa ʼaia ʼe tou iloʼi lelei age ia ia. (Pes. 104:24, 25) Pea fakakaukauʼi age muʼa te fakaofoofo ʼo totatou faʼu. Neʼe ina fakatupu tatou ʼaki te fealagia ʼae ke tou fiafia ʼi te mamata ki he ʼu aluʼaga matalelei ʼi te natula. ʼE toe feala foki ke tou sio, mo logo, mo fāfā ki he meʼa, mo ʼahiʼahi he meʼa kai pea mo mamanu ki he meʼa. ʼAki te ʼu fealagia ʼaia, ʼe tou fiafia ai ʼi te ʼu meʼa fuli ʼae neʼe ina fakatupu.
5. ʼO mulimuli kia Loma 1:20, kotea te ʼu lelei ʼe tou maʼu moka tou sioʼi fakalelei te fakatupu ʼa Sehova?
5 ʼE fakaha mai ʼi te Tohi-Tapu te tahi tupuʼaga maʼuhiga ke tou sioʼi fakalelei ai te fakatupu. ʼE tou ako ai te ʼu kalitate ʼo Sehova. (Lau ia Loma 1:20.) Ohage la, ka ke mamata ki te ʼu meʼa ʼae neʼe fakatupu e Sehova ʼe ke tokagaʼi ai te lelei ʼo tonatou faʼu. ʼE tou ako ai ko Sehova ʼe poto. Pea fakakaukauʼi age muʼa te meʼa kai kehekehe mo kano lelei ʼae ʼe feala ke tou kai! ʼE ha ai te ʼofa ʼo te ʼAtua kia tatou. Ka tou sisio ki te ʼu kalitate ʼo Sehova ʼi te ʼu meʼa ʼae neʼe ina fakatupu, ʼe tou iloʼi lelei age ia ia, pea mo tou fia fakaovi kia te ia. Tou vakaʼi leva pe neʼe fakaʼaogaʼi feafeaʼi e Sehova tana fakatupu moʼo akoʼi ki te tagata he ʼu manatu maʼuhiga.
ʼE FAKAʼAOGAʼI E SEHOVA TANA FAKATUPU KE TOU ILOʼI IA IA
6. Kotea ʼae ʼe tou ako mai te temi ʼae ʼe mavae ai te ʼu manulele ʼo olo ki he tahi koga meʼa?
6 ʼE fakahoko e Sehova ni aluʼaga ʼi te temi kua ina fakatuʼutuʼu ki ai. ʼI te taʼu fuli, mai te fakaʼosi ʼo Fepualio ki Maio, neʼe sisio te kau Iselaele ki te mavae ʼo te ʼu motuku ʼo olo ki te potu noleto. Neʼe ui e te ʼAtua ki te kau Iselaele: “ ʼE iloʼi e te motuku te temi ʼae ʼe tonu ke alu ai.” (Sel. 8:7) Neʼe kua fakatuʼutuʼu e Sehova te temi ke mavae ai te ʼu manulele ʼaia. ʼO toe feia aipe, kua ina fakatuʼutuʼu he temi ka ina fakahoko ai ʼana fakamau. Ia ʼaho nei, ka hoko mai te temi ke mavae ai te ʼu manulele ʼo olo ki he tahi koga meʼa, ʼe tou manatuʼi ai ʼe feala ke tou falala kua fakatuʼutuʼu e Sehova te temi ke ina pulihi ai te malama agakovi ʼaeni.—Hap. 2:3.
7. Kotea ʼae ʼe tou ako mai te faʼahiga lele ʼa te akuila? (Esaia 40:31)
7 ʼE foaki e Sehova te malohi ki ʼana kaugana. ʼAki ia Esaia, neʼe fakapapau e Sehova ki tana hahaʼi, ʼe ina foaki age anai te malohi moka natou lotovaivai. ʼAki te malohi ʼaia, ʼe feala anai ke natou “malaga ake . . . ohage ʼe natou maʼu te ʼu pakakau ʼo ni akuila.” (Lau ia Esaia 40:31.) Neʼe tau sisio te kau Iselaele ki te lele ʼo te ʼu akuila ʼi te lagi, kae mole lahi te tapata ʼo ʼonatou pakakau. Neʼe fakatau tanatou lele ki te malaga ake ʼo te matagi. ʼE tou manatuʼi ai, ʼe feala ke foaki mai e Sehova te malohi ʼae ʼe ʼaoga kia tatou, ohage pe ko tana fai maʼa te ʼu manulele ʼaia. Ka ke sio ki he manulele malohi ʼe malaga ake ʼi te lagi kae mole pe la lahi te tapata ʼo ʼona pakakau, pea ke manatuʼi ʼe lava foaki atu e Sehova te malohi ke ke ʼutakiʼi ʼou fihifihia.
8. Kotea ʼae neʼe ako e Sopo ʼi tana fakakaukauʼi te ʼu meʼa ʼae neʼe fakatupu e te ʼAtua, pea kotea te ako kia tatou?
8 ʼE tuha ia Sehova mo te falala. Neʼe tokoni ia Sehova kia Sopo ke lahi age tana falala kia te ia. (Sopo 32:2; 40:6-8) ʼI tana faipalalau mo Sopo, neʼe talanoa te ʼAtua ki he ʼu meʼa neʼe ina fakatupu ohage ko te ʼu fetuʼu, te ʼu ʼao pea mo te ʼu hila. Neʼe toe talanoa ia Sehova ki he ʼu manu ohage ko te vitulo vao pea mo te hosi. (Sopo 38:32-35; 39:9, 19, 20) Neʼe fakamoʼoni e te ʼu meʼa fuli ʼaia te mafimafi, ʼo feia mo te ʼofa pea mo te poto lahi ʼo te ʼAtua. Neʼe feala, ʼaki tanā faipalalau ʼaia, ke lahi age te falala ʼa Sopo kia Sehova. (Sopo 42:1-6) ʼO toe feia pe, ka tou fakakaukauʼi te fakatupu, ʼe tou manatuʼi ai ʼe lahi age te poto mo te malohi ʼa Sehova ia tatou. Pea ʼe feala pe anai ke ina pulihi ʼotatou faigataʼaʼia fuli. ʼI tatatou iloʼi te faʼahi ʼaia, ʼe lahi age ai tatatou falala kia te ia.
NEʼE FAKAʼAOGAʼI E SESU TE FAKATUPU KE ILOʼI E TE HAHAʼI TANA TAMAI
9-10. Kotea ʼae ʼe tou ako mai te laʼa pea mo te ʼua ʼo ʼuhiga mo Sehova?
9 Neʼe iloʼi lelei e Sesu te natula. Neʼe kau ki te fakatupu ʼo te ʼatulaulau, ʼo gaue mo tana Tamai ohage ko “he tufuga faiva.” (Taag. 8:30) Ki muli age, ʼi te maʼuli ʼa Sesu ʼi te kele, neʼe ina fakaʼaogaʼi te fakatupu moʼo akoʼi ki ʼana tisipulo ke natou iloʼi ia tana Tamai. Tou vakaʼi he ʼu manatu neʼe ina akoʼi age kia natou.
10 ʼE ʼofa ia Sehova ki te hahaʼi fuli. ʼI tana Akonaki ʼi te Moʼuga, neʼe palalau ia Sesu ki ʼana tisipulo ʼo ʼuhiga mo te laʼa pea mo te ʼua, ʼae ʼe kau ki te fakatupu ʼa Sehova. Tokolahi ʼe mole kei natou tokagaʼi te ʼu faʼahi ʼaia ʼe lua, kae ʼe maʼuhiga ki totatou maʼuli. Neʼe feala pe ke mole foaki e Sehova te laʼa mo te ʼua kia natou ʼae ʼe mole tauhi kia te ia. Kae, ʼuhi ko tona ʼofa, ʼe ina haga foaki pe ki te hahaʼi fuli te laʼa pea mo te ʼua. (Mat. 5:43-45) Neʼe fakaʼaogaʼi e Sesu te manatu ʼaia moʼo akoʼi ki ʼana tisipulo ʼe loto e Sehova ke tou ʼoʼofa ki te hahaʼi fuli. Ka malave kia tatou te matalelei ʼo te to ʼo te laʼa peʼe ko te mokomoko ʼo te ʼua, tou manatuʼi ʼe ʼofa ia Sehova ki te hahaʼi fuli. ʼE uga tatou e tana faʼifaʼitaki ke tou toe fakaha mo tatou te ʼofa, ʼo tou faifakamafola ki te hahaʼi fuli.
11. Kotea te fakalotomalohi ʼe tou maʼu moka tou mamata ki te ʼu manulele?
11 ʼE foaki mai e Sehova te ʼu meʼa ʼae ʼe ʼaoga ki totatou maʼuli. ʼI te Akonaki ʼi te Moʼuga, neʼe toe ui fenei e Sesu: “Kotou tokagaʼi fakalelei ia te ʼu manulele, ʼe mole natou tūtū te pulapula peʼe utu peʼe tanaki ʼi te fale tanakiʼaga taʼukai, kaʼe ʼe fafaga natou e takotou Tamai ʼae ʼe ʼi selo.” Neʼe lagi sisio te hahaʼi ʼae neʼe fakalogo kia Sesu ki te lele ʼo he ʼu manulele ʼi te fai age leva e Sesu te fehuʼi ʼaeni: “ ʼE mole kotou maʼuhiga age koa la ia natou?” (Mat. 6:26) Ko te faʼahiga tokoni ʼofa ʼaia ʼa Sesu, ke mahino ai ʼana tisipulo ʼe tokaga anai ia Sehova kia natou. (Mat. 6:31, 32) ʼE kei fakalotomalohiʼi e te manatu ʼaia ia te ʼu kaugana ʼa te ʼAtua ia ʼaho nei. Ko te tuagaʼane pionie kei finemui ʼi Sepania, neʼe lotovaivai he neʼe mole ina maʼu hona nofoʼaga lelei. Kae ʼi tana sio ki te togi e te ʼu manulele tanatou meʼa kai, neʼe lotomalohi ai. ʼE ina ui: “Neʼe fakamanatuʼi mai e te ʼu manulele ʼaia, kapau ʼe tokaga ia Sehova kia natou, ʼe toe tokaga anai kia au.” Mole fualoa ki ai, neʼe maʼu leva e te tuagaʼane tona nofoʼaga lelei.
12. ʼO mulimuli kia Mateo 10:29-31, kotea ʼae ʼe tou ako mai te ʼu faga misi ʼo ʼuhiga mo Sehova?
12 ʼE ke maʼuhiga kia Sehova. ʼI muʼa ʼo te fekauʼi e Sesu ʼana apositolo ke olo ʼo faifakamafola, neʼe tokoni age kia natou ke ʼaua naʼa natou matataku ki te hahaʼi ʼae ka fakafeagai age kia natou. (Lau ia Mateo 10:29-31.) Neʼe palalau age ʼo ʼuhiga mo te ʼu misi ʼae neʼe lahi tona maʼu ʼi Iselaele. Neʼe mole faʼa maʼuhiga te ʼu kiʼi misi ʼi te temi ʼo Sesu. Kae neʼe ina ui ki ʼana tisipulo: “ ʼE iloʼi e takotou Tamai moka to he misi ki te kele.” Neʼe ina hoko atu fenei: “ ʼE kotou maʼuhiga age ʼi he faga misi.” Neʼe akoʼi age ai e Sesu ki ʼana tisipulo ʼe ʼofa ia Sehova kia natou takitokotahi, ʼo mole ʼaoga ai ke natou tuʼania tonatou fakatagaʼi. ʼE mahino ia, neʼe manatuʼi e te ʼu tisipulo te ʼu palalau ʼaia ʼa Sesu moka natou sisio ki he faga misi ʼi tanatou faifakamafola ʼi te ʼu kolo lalahi mo liliki. ʼI he temi pe ʼe ke sio ai ki he kiʼi misi, manatuʼi ʼe ʼofa ia Sehova ia koe, he ʼe ke toe maʼuhiga age mo koe ʼi he faga misi. ʼE mole ʼaoga anai ke ke mataku moka fakafeagai atu he tahi, he ʼe tokoni atu te ʼAtua.—Pes. 118:6.
KE TOU ILOʼI LELEI AGE IA SEHOVA ʼAKI TANA FAKATUPU
13. Kotea ʼae ka tokoni mai ke tou maʼu ni ako mai te fakatupu?
13 ʼE lahi te tahi ʼu faʼahi ʼe feala ke tou ako ʼo ʼuhiga mo Sehova ʼaki tana fakatupu. ʼO feafeaʼi? ʼE tonu muʼa ke tou toʼo he temi ke tou mamata ki te ʼu meʼa ʼae neʼe ina fakatupu. Pea tou fakakaukau leva pe kotea ʼae ʼe tou ako mai ai ʼo ʼuhiga mo Sehova. ʼE lagi faigataʼa ʼi ʼihi temi hatatou fai te faʼahi ʼaia. ʼE ui e te tuagaʼane ko Géraldine, ʼe maʼuli ʼi Cameroun: “Neʼe au lahilahi ake ʼi te loto kolo, koia neʼe tonu ke au faiga lahi ai ke au mamata ki te fakatupu.” Pea ʼe ui e te tagata ʼafea ko Alfonso: “Neʼe au mahino neʼe tonu ke au toʼo he temi ke au nofo tokotahi ai ʼo mamata ki te fakatupu ʼa Sehova, pea ke au metitasio ki te ʼu meʼa ʼae ʼe au ako mai ai ʼo ʼuhiga mo Sehova.”
ʼI te mamata ʼa Tavite ki te fakatupu neʼe metitasio ki te ʼu meʼa ʼae neʼe ina ako mai ai ʼo ʼuhiga mo Sehova (Vakaʼi te palakalafe 14)
14. Kotea ʼae neʼe ako e Tavite ʼi tana metitasio ki te fakatupu ʼa te ʼAtua?
14 Neʼe fakakaukauʼi loloto e Tavite te fakatupu ʼa Sehova. Neʼe ina ui kia Sehova: “Ka au sio ki te ʼatu lagi, te ʼu gaue ʼo ʼou nima, te mahina mo te ʼu fetuʼu ʼae neʼe ke teuteuʼi, ʼe au ui ai: ‘Kotea te ʼuhiga ʼo te tagata ke tupu ai hau manatuʼi ia ia?’ ” (Pes. 8:3, 4) Ka sioʼi e Tavite te lagi ʼi te poʼuli, neʼe mole fiafia pe ʼi tana mamata ki te ʼu fetuʼu. Kae neʼe toe metitasio ki te ʼu meʼa ʼae neʼe ina ako mai te ʼu fetuʼu ʼo ʼuhiga mo Sehova. Neʼe mahino ai ki te maʼoluga ʼaupito ʼo Sehova. Neʼe toe fakakaukau ia Tavite ki tana tuputupu ʼi te loto fatu ʼo tana faʼe. ʼI te temi ʼae neʼe fakakaukau ai ki te fakaofoofo ʼo tona sino, neʼe lahi age tana lotofakafetaʼi ki te poto ʼo Sehova.—Pes. 139:14-17.
15. Kotea he ʼu faʼahi ʼi te fakatupu neʼe tokoni atu ke ke iloʼi te ʼu kalitate ʼo Sehova? (Pesalemo 148:7-10)
15 ʼE lagi faigafua kia tatou, ohage ko Tavite, ke tou metitasio ki he faʼahi neʼe fakatupu e Sehova. Pea ʼe lahi te ʼu faʼahi ʼe lava tokoni atu ke ke iloʼi te ʼu kalitate ʼo Sehova. Ohage la, ʼe ke mahino ki te mafimafi ʼo Sehova moka ke logoʼi te mafana ʼo te laʼa. (Sel. 31:35) Pea ʼe ke manatu ki te poto ʼo Sehova moka ke sio ki he manulele ʼe ina faʼu tona fataʼi. Peʼe ka ke sio ki te gaoʼi ʼa he kiʼi kuli mo tona hiku, ʼe ke ako ai ko Sehova ʼe ko he ʼAtua fiafia. Pea ʼe uga koe ke ke fakamalo ki te ʼofa ʼo Sehova moka ke sio ki he faʼe ʼe gaoʼi mo hana kiʼi toe. ʼE lahi te ʼu faʼahi ʼi te fakatupu ʼe feala ke tou iloʼi lelei ai ia Sehova. Koteʼuhi ko te ʼu meʼa ʼae neʼe fakatupu e Sehova, te ʼu meʼa ʼae ʼe lalahi mo liliki ʼo feia mo te ʼu meʼa ʼe ovi mai mo ʼae ʼe mamaʼo, ʼe natou vikiʼi fuli ia ia.—Lau ia Pesalemo 148:7-10.
16. Kotea ʼae ʼe tou fakatotonu ke tou fai?
16 Ko totatou ʼAtua ʼe poto, mo ʼofa mo mafimafi pea ko te ʼu meʼa fuli ʼe ina fai ʼe taulekaleka. ʼE lahi te ʼu kalitate mo te tahi ʼu faʼahi ʼo ʼuhiga mo Sehova ʼe feala ke tou ako moka tou sioʼi fakalelei tana fakatupu. ʼOfa pe ke tou toʼo tuʼumaʼu he temi ke tou fiafia ʼi te ʼu meʼa ʼae neʼe fakatupu e Sehova, pea mo fakakaukauʼi te ʼu meʼa ʼae ʼe tou ako mai ai ʼo ʼuhiga mo ia. ʼI tatatou fai feia, ʼe tou fakaovi lahi age ki totatou Tupuʼaga. (Sakp. 4:8) ʼI te alatike ka hoa mai, ʼe tou vakaʼi anai pe ʼe lava fakaʼaogaʼi feafeaʼi e te ʼu matuʼā te fakatupu moʼo tokoni ki ʼanatou fanau ke natou fakaovi kia Sehova.
KATIKO 5 Te ʼu Gaue Fakaofoofo ʼa Te ʼAtua
a ʼE taulekaleka te fakatupu ʼa Sehova. ʼE tou punamaʼuli moka tou tokagaʼi te ʼu meʼa ʼae neʼe ina fakatupu, mai te malohi ʼo te laʼa ki te fakaʼeteʼete ʼo he matalaʼi ʼakau. ʼE tou toe ako mai ai te tahi ʼu faʼahi ʼo ʼuhiga mo Sehova. ʼE tou vakaʼi anai ʼi te alatike ʼaeni te ʼu tupuʼaga ʼae ke tou toʼo he temi moʼo mamata ki te fakatupu. ʼE tou toe vakaʼi anai pe ʼe tokoni feafeaʼi mai te faʼahi ʼaia ke tou fakaovi ki te ʼAtua.