1. მუქ მეხვარ იობის, უმოსო გეჩინებაფუკო იეჰოვა ღორონთ?

 ᲘᲝᲑᲘᲡ დღას ვა გაჭყორდუდ თი შემთხვევა, მუჟამსით იეჰოვაქ დურაგადუ. თენა თიშ ცხოვრებას არძაშ უმოს მნიშვნელოვან ჩიება იჸუაფუდ. იეჰოვაქ თის, მუშ გუნაჭყეფ მუსხირენ ქმნილებაშა მიოქციებაფუ ყურადღება, მუშენდა დარწმუნკო, ნამდა ქიანაშმადიდა სიბრძნე უღჷ დო შეულებ იზრუნას მუშ მსახურეფშა. მაგალთო, იეჰოვაქ იობის ქუგაშინ, ნამდა თინა ცხოველეფშე ქოზრუნენდჷ-და, შეიალებედ იობშა ხოლო ქიზრუნკო (იობ. 38:39—41; 39:1, 5, 13—16). გუნაჭყეფუეფიშ მაგალითშე დაფიქრებაქ იობის მეხვარ, უჯგუშო ქოძირკო იეჰოვაშ თვისებეფ.

2. მუშენ შილებე მინშა რთულ რდას იეჰოვაშ გუნაჭყეფუეფშა დაკვირება?

² გუნაჭყეფუეფშე დაკვირებათ ჩქი ხოლო შემლებნა უმოსო გეფჩინებაფუათ ღორონთ, მარა თეშ კეთება შილებე ირო ვა რდას ადვილ. მაგალთო, შილებე დიდ ქალაქის ფცხოვრენდათ, სოდეთ ნაკლებო შემლებნა ქობძირათ ღორონთიშ გუნაჭყეფუეფ ვარდა შილებე თიცალ ადგილს ფცხოვრენდათ, სოდეთ გოხოლუას მანგარ სქვამ ბუნება რე, მარა გუნაჭყეფუეფშა დაკვირებელო დრო ვა მოსქიდუდან. ათეშენ, მორთ გუვარჩუათ, მუშენ რე მნიშვნელოვან, დრო გიმურთათ დო მონდომა ვადვარკათ, ნამდა დევეკვირათ ღორონთიშ გუნაჭყეფუეფს. თე სტატიას ქობძირუნთ, მუჭო გიმირინუეს გუნაჭყეფუეფ იეჰოვაქ დო იესოქ ადამიანეფშა დაგურაფალო დო ქიგებგენთ, ჩქი მუშ გურაფა შემლებნა გუნაჭყეფუეფშე.

3. სოვრეშე იძირე, ნამდა იეჰოვას ოკოდ ადამქ ქისიამოვნუკო გუნაჭყეფუეფით?

³ იეჰოვას ოკოდ, პირველ ადამიანქ ისიამოვნუკო გუნაჭყეფუთ. ათეშენ, მუჟამსით ღორონთიქ ადამ გაჭყჷ, სამოთხეს ქუდახორუ დო დავალ, ნამდა იზრუნკო, ქიმკაჯინკო დო  უმოსო გასქვამკო თინა (დაბ. 2:8, 9, 15). ადამშა მანგარო იმოქმედენდჷ თიშ ძირაფა, მუჭო ეშმეშ თას დიხაშე დო მუჭო პირანდჷ ყვავილ. მუშმადიდა პატი რდჷ თიშო, ქიმკაჯინკო ედემიშ ბაღის! ხვალე თენა ვარინ, ღორონთიქ ადამს უწუ, ნამდა ცხოველეფს სახელეფ ქიგიოდვუკო (დაბ. 2:19, 20). მართალ რე, იეჰოვას ხოლო შეულებუდ თეშ კეთება, მარა თეშ საშვალება ადამს ქიმეჩ. მუშო ოკო რაგად, ონდო ცხოველეფშო სახელეფს გიშაგორუნდჷ, ადამ ყურადღებათ დეკვირებუდ თინეფიშ თვისებეფს დო მოქმედებას დო თეშ უკულ გეგნოჭყვიდუნდჷ, მუ გიოდვუკო თინეფს. არგამა რე, თე ირფელიშ კეთება ადამშო მანგარ სასიამოვნო იჸუაფუდ. თენა ქიმეჩანდჷ შესაძლებლობას, უმოსო დაფასკო მუშ ზეციერ მუმაშ სიბრძნე დო ქიმეხვარებუდ თიშ ძირაფას, მუნერ საინტერესოთ დო სქვამას აფუდ გოჭყაფილ ღორონთის ირფელ.

4. ა) მუ რე თი ართ-ართ მიზეზ, მუდგაშ გურშენ ოკო დევეკვირათ გუნაჭყეფუეფს? ბ) არძაშ უმოსო მუ მორწონა თი ირფელშე, მუთ ღორონთიქ გაჭყჷ?

⁴ ართ-ართ მიზეზ, მუდგაშ გურშენ გუნაჭყეფუეფს ოკო დევეკვირათინ თინა რე, ნამდა იეჰოვას ოკო, თენა ვაკეთათ. მაგალთო, თინა მირაგადნა: „ქეიჯინით ცაშა დო ქიდეკვირით. მიქ გაჭყჷ თე ირფელ?“. პასუხ არგამა რე (ეს. 40:26). იეჰოვაქ გუნაჭყეფუეფით ხვალე ზეცა ვარინ, დედამიწა დო ზღვა ხოლო გეიოფშჷ დო თინეფშე ბრელ მუდგარენს ბგურაფლენთ ღორონთიშ გურშენ (ფსალმ. 104:24, 25). დეფიქრით, იეჰოვაქ თეშ გუმოჭყეს, ნამდა ბუნებრივო მიღნა თიშ სურვილ, იფსიამოვნათ გუნაჭყეფუეფიშ სისქვამეთ. თენა ღორონთიქ შეიოლებერო გინაშქვჷ თი ხუთ შეგრძნებაშ ჭყოლოფათ, ნამუთ მუჩეს. თენეფ რე: მხედველობა, რჩქილა, შეხება, გემო დო ყნოსვა.

5. რომაელეფიშ 1:20-იშ თანახმას, მუ ჯგირობუა შემლებნა მიბღათ გუნაჭყეფუეფშე დაკვირებათ?

⁵ ბიბლიაშე ბგებულენთ ხოლო ართ მნიშვნელოვან მიზეზის, მუშენ ოკო დევეკვირათ გუნაჭყეფუეფს. მიზეზ თინა რე, ნამდა თე ირფელ იეჰოვაშ თვისებეფს მოგებაფუანა (წეკითხით რომაელეფიშ 1:20). მაგალთო, ქიდეკვირით იეჰოვაშ გუნაჭყეფუეფს, მუ სარკოთ რე თინეფ გოჭყაფილ. თინეფშე ღორონთიშ სიბრძნე იძირე. შხვა ირფელს დუდ დუვანებათინ, მიღნა შესაძლებლობა, იფსიამოვნათ შხვადოშხვანერ ოჭკუმალით. თენა არგამათ ოძირანს, მუჭო უჸორს იეჰოვას ადამიანეფ. მუჟამსით გუნაჭყეფუეფშე იეჰოვაშ თვისებეფს ვორწყეთ, უჯგუშო იფჩინებაფუანთ თის დო სურვილ მირჩქინდუნა, უმოსო დევეახლოვათ. მორთ ქიგებგათ, მუჭო ოგურუანდჷ გუნაჭყეფუეფიშ საშვალებათ იეჰოვა ადამიანეფს.

6. მუს ბგურაფლენთ თი ფრინველეფშე, ნამუთ ართ ადგილშე მაჟიაშა გინმოფურინნა?

⁶ იეჰოვას ირფელშა მუშ დრო აფჷ მერჩქინელ. ირ წანას ფრევალიშ ბოლოშე მესიშ შქა  რიცხვეფშახ, ისრაელეფს შეულებდეს ძირესკო, მუჭო მეფურინუნდეს ყარყატეფ ჩრდილოეთშა. ღორონთიქ ზუსტას თეშა გუმახვილ თინეფს ყურადღება დო უწუ: „ცას ყარყატის ხოლო უჩქჷ მუშ დრო“ (იერ. 8:7). მუჭოთ თე ფრიველეფშო აფჷ იეჰოვას დოდგინელ გინოფურინუაშ დრო, თეშ მუშ განზრახვეფიშ შეიოსრულებერო ხოლო დანიშნჷ დრო. თაშ ნამდა, მუჟამსით ვორწყეთ, მუჭო გინმოფურინნა ფრინველეფ შხვადო, თენა გუმოშინანა, ნამდა შემლებნა ბჯერდან, იეჰოვას მერჩქინელ აფჷ დრო თე უბადო ქვეყნიერებაშ განადგურებელო (აბაკ. 2:3).

7. მუშა მარწმუნენა თიშ ძირაფა, მუ თავისფალო გილაფურინუნა ფრინველეფ? (ეს. 40:31)

⁷ იეჰოვა ძალას არზენს მუშ მსახურეფს. ესაიაშ საშვალებათ იეჰოვაქ მუშ ხალხის დეპირ, ნამდა გამანგარენდჷ დო მუჟამსით დოშურდუდეს ვარდა გურ გუტირხუდეს, მეხვარებუდ, არწივცალო გოფაჩესკო ფსუალეფ (წეკითხით ესაიაშ 40:31). ისრაელეფს ბრელშა აჸიდეს ძირაფილ, მუჭო მეფურინუნდჷ არწივ მაღალას, ფსუალეფს ხშირას ვამოძრავენდუნ დო ნაკლებ ენერგიას ირინუანდუნ თეშ, მუშენდა ჰავაშ ნაკადის ეშმაჸუნდჷ ჟი. თიშე დაფიქრება, ნამდა იეჰოვაქ თე ფრინველს თეცალ ძალა მეჩჷ, მარწმუნენა, ნამდა მუშ მსახურეფს ხოლო გამანგარენს. თაშ ნამდა, მუჟამსით ორწყეთ ფრინველს, ნამუთ ბრელ ენერგიას ვახარჯენსინ თეშ უმოსო დო უმოსო მაღალას მეფურინუნს, რშუდან, იეჰოვას შეულებ თქვა ხოლო გუგამანგარან პრობლემეფიშ დროს დო ქიმგეხვარან, გიორჯგინათ თინეფს.

8. მუ დიგურუ იობიქ ღორონთიშ გუნაჭყეფუეფშე დო მუს ბგურაფლენთ ჩქი?

⁸ იეჰოვა იმსახურენს ჩქინ ნდობას. იეჰოვაქ მეხვარ იობის, გემანგარკო თიშ მიმართ ნდობა (იობ. 32:2; 40:6—8). მუჟამსით ღორონთიქ იობის დურაგადუ, მუშ მუსხირენ გუნაჭყეფუშ გურშენ ეჩუ. მაგალთო, მუნერით რე: მურიცხეფ, მუნაფა დო ცას გოვალაფა. თეს გეძინელ, მიშინუ ცხოველეფ ხოლო, მუნერით რე: ტყარ ხოჯ დო ცხენ (იობ. 38:32—35; 39:9, 19, 20). თე ირფელ ღორონთიშ ხვალე ულიებ ძალას ვარინ, თის ხოლო ოძირანს, მუნერ მოჸოროფე დო ბრძენ რე იეჰოვა. თე ჩიებაშ ჭყოლოფათ იობიქ ქიდიგურუ, უმოსო მიენდკო იეჰოვას (იობ. 42:1—6). თეშნერო, მუჟამსით ფიფქრენთ ღორონთიშ გუნაჭყეფუეფშე, თენა გუმოშინანა, ნამდა ჩქი ხოლოშა ხოლო ვემმართენა ღორონთიშ სიბრძნე დო ძალიერებაშა. იეჰოვას შეულებ არძა ჩქინ პრობლემას მუღას ბოლო დო ქოთ გაკეთენს თეს. თეშ რჩქინა მოხვარნა, გუვამანგარათ თიშ მიმართ ნდობა.

9, 10. მუს ბგებულენთ ჩხანა დო ჭვემაშე იეჰოვაშ გურშენ?

⁹ იესოს ბრელ მუდგარენ უჩქუდ თი ირფელშე, მუთ იეჰოვაქ გაჭყჷ, მუშენდა თინა მუამუშის ელურდჷ „მუჭოთ ოსტატ“, მუჟამსით თინა სამყაროს ოჭყანდჷ. ხვალე თენა ვარინ, უღუდ პატი, მუქ ხოლო მიღუკო თეს მონაწილება (იგავ. 8:30). მუჟამსით იესო დედამიწას რდჷ, გუნაჭყეფუეფიშ საშვალებათ მოწაფეეფს ზეციერ მუმას ოჩინებაფუანდჷ. მორთ გუვარჩუათ თეშ მუსხირენ შემთხვევა.

¹⁰ იეჰოვა არძაშ მიმართ გიმირჩქინანს ჸოროფას. გვალას ქადაგებაშ დროს, იესოქ მუშ მოწაფეეფს ყურადღება გუმახვილ იეჰოვაშ გუნაჭყეფ ჟირ მუდგარენშა. თენა რე, ჩხანა დო ჭვემა, მუდგას ბრელ ვაფასენს დო უბრალო მუდგარენო მიორჩქ, მარა სინამდვილეს სიცოცხლეშო მანგარ საჭირო დო აუცილებერ რე. იეჰოვას შეულებუდ ჩხანა დო ჭვემა ვემეჩკო თი ადამიანეფს, მით ვემსახურენს თეს, მარა თენა ვა უკეთებ დო ჸოროფათ იზრუნ არძაშო (მათ. 5:43—45). იესოქ თე მაგალითით მუშ მოწაფეეფს დაგურუ, ნამდა იეჰოვას ოკო, არძაშ მიმართ გიმიფრჩქინათ ჸოროფა. მუჟამსით ბჟაშ ინულას ვარდა ჭვემას ვუჯინეთ შემლებნა დეფიფქრათ, მუნერ ღორონთ რე იეჰოვა; თინა ვეგმირჩქინანს გიშაკერძაფას დო არძა უჸორს. თიშ მაგალითშე დაფიქრებას შეულებ გომრჩქინან სურვილ, ჩქი ხოლო გიმიფრჩქინათ თიცალ ჸოროფა, მუნერსით იეჰოვა გიმირჩქინანს დო ვუქადაგათ არძა ადამიანს.

11. მუჭო შილებე გურშა ელამკინან ცაშ ფრინველეფშე დაკვირებაქ?

 ¹¹ იეჰოვა ჩქინ აუცილებერ საჭიროებეფშე ზრუნენს. გვალას ქადაგებაშ დროს იესოქ ხალხის თეცალ მუდგარენ ხოლო უწუ: „ქიდეკვირით ცაშ ფრინველეფს: თინეფ ვართ თასნა, ვართ ეჭოფნა, ვართ მაღაზეფს შაყარანა, მარა თქვან ზეციერ მუმა ოდიარუანს თინეფს“. შილებე, მუჟამსით იესოქ თე სიტყვეფ თქუ, ხალხ მუნეფიშ თოლით ორწყედ, მუჭო გილაფურინუნდეს ჩიტეფ გოხოლუას. უკულ იესოქ თეცალ კითხვა დუსვჷ: „თქვა თინეფშე უმოს ძვირფასეფ ვა რეთო?!“ (მათ. 6:26). თეშნერო, იესოქ ჸოროფათ ქუმოძირეს, ნამდა იეჰოვა აუცილებერო იზრუნენს ჩქინ საჭიროებეფშე (მათ. 6:31, 32). თიშე დაფიქრება, მუჭო ზრუნენს იეჰოვა ფრინველეფშე, თიშ ბრელ ართგურ მსახურს ელუკინანს გურშა. მაგალითო, ესპანეთის მახორუ ართ პიონერ ახალგაზრდა და გურგოტახილ რდჷ, მუშენდა ნორმალურ ოცხოვრებელ ადგილქ ვაშუ. ართშა თიქ ქოძირ, მუჭო ჭკუმუნდეს ჩიტეფ ოჭკუმალს, მუდგაქ მანგარო ელუკინ გურშა. თინა იჩიებ: „თე ჩიტეფიშ ძირაფაქ ქუგმოშინ, ნამდა იეჰოვა ზრუნენს თინეფშე დო შეულებ ჩქიმდე ხოლო იზრუნას“. თე შემთხვევაშე ბრელ დროს ვემკურთუმ, მუჟამსით თე დაქ ოცხოვრებელ ქიშუ.

12. მათეშ 10:29—31-იშ თანახმას, მუს ბგურაფლენთ იეჰოვა გურშენ ბეღურეფშე?

¹² იეჰოვა თითოულ ადამიანს აფასენს. ონდო მოციქულეფს ოქადაგებშა გუტენდკონ, იესოქ მეხვარ, გიორჯგინესკო წინააღმდეგობაშ შიშის (წეკითხით მათეშ 10:29—31). იესოქ თინეფს ბეღურაშ მაგალით ქუმუჸონ, ნამუთ ისრაელს არძაშ უმოს გავრცელებურ ფრინველ რდჷ დო კაპიკეფშა გიმოჩანდეს. უკულ მოწაფეეფს თეცალ სიტყვეფ უწუ: „თინეფშე ნამთინ ვაგთოლუ დიხაშა თეშ, ნამდა თქვან მუმას ვა უჩქუდას“. უკულ გეუძინ: „ანაყუ ბეღურაშე უმოს ძვირფასეფ რეთ“. იესოქ თე სიტყვეფით დარწმუნ მოწაფეეფ, ნამდა იეჰოვაშო თითოულ მანგარ ძვირფას რდჷ დო მუთუნნერ მიზეზ ვა უღდეს, აშქურნესკო თხოზინშა. მუჟამსით მოწაფეეფ ქალაქეფს დო სოფელეფს ქადაგებაშ დროს ბეღურეფს ქოძირუნდეს, ქუგაშინედეს იესოშ სიტყვეფ დო გემანგარებდეს. ათეშენ თქვა ხოლო, მუჟამსით ჭიჭე ჩიტის ორწყეთ, რშუდან, ნამდა იეჰოვა პირადო თქვა მანგარო გაფასენა, მუშენდა ანაყუ ბეღურაშე ძვირფას რეთ. იეჰოვაშ ელარნათ ვა გაშქურნენა, მუჟამსით წინააღმდეგობას ქეშეხვადუთ (ფსალმ. 118:6).

13. მუ ოკო ვაკეთათ, ნამდა გუნაჭყეფუეფშე იეჰოვაშ გურშენ დიბგურუათ?

¹³ გუნაჭყეფუეფშე ბრელ მუდგარენიშ გურაფა შემლებნა იეჰოვაშ გურშენ. მარა მუშ კეთება რე თეშო საჭირო? პირველ: დრო ოკო გიმურთათ გუნაჭყეფუეფშე დაკვირებას დო მაჟია: ოკო დეფიფქრათ, მუს მოგურუანა თინეფ იეჰოვაშ გურშენ. თეშ კეთება შილებე ირო ვა რდას ადვილ. კამერონს მახორუ ართ და, ჟერალდინ იჩიებ: „ქალაქის ფცხოვრენქ, ათეშენ ჩქიმ მხარეშე მანგარ მონდომა რე საჭირო, ნამდა ბუნებას დევეკვირე“. ართ უხუცეს ჯიმა, სახელო ალფონსო იჩიებ: „ქიმეფხვად, მინშა ხვალე ოკო ქუდოფსქიდე, ნამდა დევეკვირე იეჰოვაშ გუნაჭყეფუეფს დო დეფიფქრე, მუს მოგურუანს თინეფ ღორონთიშ გურშენ“.

14. მუ დიგურუ დავითიქ ღორონთიშ გურშენ გუნაჭყეფუეფშე დაფიქრებათ?

 ¹⁴ დავით ბრელს ფიქრენდჷ თი ირფელშე, მუთ ღორონთიქ გაჭყჷ. თიქ იეჰოვას თეცალ სიტყვეფ უწუ: „მუჟამსით ვუჯინექ ცას, სქან ნახელუანს, თუთას დო მურიცხეფს, ნამუთ სი გაჭყჷ, ფიფქრენქ: მი რე ღურა მოძუნ ფერ კოჩ, ნამდა რშჷ, ვარდა თიშ სქუა, ნამდა ზრუნენქ თიშე?!“ (ფსალმ. 8:3, 4). მუჟამსით თინა მურიცხეფით მოჭკადილ სერიშ ცას ელაჯინედ, ხვალე თინა ვაკვირენდჷ, მუ დიდებულო რე სამყარო გოჭყაფილ. დავით თიშე ხოლო ფიქრენდჷ, მუშ გურაფა შეულებუდ მურიცხეფშე იეჰოვაშ გურშენ. თიქ ჯგირო ქოძირ, მუ დიდებულ რე იეჰოვა. ხვალე თენა ვარინ, დავითშა მანგარო მოქმედენდჷ თიშე დაფიქრება, მუჭო ირდუდ დიდაშ ქვარას. მუჟამსით თე სასწაულ დეტალეფშე ფიქრენდჷ უმოსო აფასენდჷ იეჰოვაშ სიბრძნეს (ფსალმ. 139:14—17).

15. თქვა მუჭო ძირით გუნაჭყეფუეფშე იეჰოვაშ თვისებეფ? (ფსალმ. 148:7—10)

¹⁵ დავითცალო ჩქი ხოლო შემლებნა დევეკვირათ ღორონთიშ გუნაჭყეფუეფს დო დეფიფქრათ თიშე. სოდგა ვემკიბჯინათინ, ირფელს შემლებნა ბძირათ იეჰოვაშ თვისებეფ. მაგალთო, მუჟამსით ჩქინ სხეულს ბჟაშ სხივეფიშ სიტიბას ქიბგინანთ, შემლებნა დეფიფქრათ იეჰოვაშ ძალაშენ (იერ. 31:35). ვარდა მუჟამსით ვორწყეთ, მუჭო აშენენს ჩიტ ბუდეს, შემლებნა დეფიფქრათ იეჰოვაშ სიბრძნეშენ. თეს გეძინელ, თიშ ჯინაშ დროს, მუჭო გილათხოზ ლაკვ მუშ კუდელს, იეჰოვაშ იუმორიშ გრძნობაშ ძირაფა შემლებნა. ხვალე თენა ვარინ, იეჰოვაშ გიმორჩქინელ ჸოროფაშ მიმართ გურ მარდულობათ ემაფშაფნა, მუჟამსით ვორწყეთ, მუჭო ულაჸაფ დიდა მუშ ჭიჭე ბაღანას. თაშ ნამდა, ბრელ შესაძლებლობა მიღნა, დიბგურუათ იეჰოვაშ გურშენ არძა თიშ გუნაჭყეფუეფშე, იჸუაფ თენა დიდ დოვარ ჭიჭე დო ჩქინდე შორს რენ ფერ დოვარ ხოლოს რენ ფერ, მუშენდა თე ირფელ განადიდენს იეჰოვას (წეკითხით ფსალმუნიშ 148:7—10).

16. მუშ კეთება ოკო მაფდან გინოჭყვიდილ?

¹⁶ ჩქინ ღორონთის უღჷ თიშ განსაკუთრებულ უნარ, ნამდა მუდგას ხეს მეთხუნს ირფელ სქვამაშო გაკეთას. ხვალე თენა ვარინ, თინა მანგარ მოჸოროფე, ძალიერ დო ბრძენ რე. თე დო თიშ ბრელ შხვა თვისებეფიშ ძირაფა შემლებნა გუნაჭყეფუეფშე, უბრალოთ საჭირო რე, დევეკვირათ თინეფს. ჯგირ იჸუაფ, რეგულარულო გიმურთათ დრო გუნაჭყეფუეფშე დაკვირებას დო თიშე დაფიქრებას, მუს მოგურუანა თინა იეჰოვაშ გურშენ. თეშ კეთება მიმეხვარებნა, უმოსო დევეახლოვათ ჩქინ დიდებულ გუმაჭყაფალს (იაკ. 4:8). უკულიან სტატიას გუვარჩიენთ, მუჭო შეულებნა მშობლეფს გუნაჭყეფუეფიშ საშვალებათ დაგურუან მუნეფიშ სქუალეფს დო თეშნერო ქიმეხვარან იეჰოვაწკუმა დაახლოებას.