1. Ino nan̈ampy Joba hahay tsarabe Jehovah?

 MARO koran̈a nataony Joba taminolo, fa araiky ten̈a miavaka. Izio koran̈andro roeny Jehovah Zan̈ahary. Tamy koran̈a io, Jehovah nan̈iraka Joba handiniky sasany tamy raha niasainy fotony tiany ho hainy Joba karakory habezany fahendrenanany. Zen̈y koa han̈ampy Joba hatoky fa Jehovah mahavita man̈amia raha ilainy panomponany. Jehovah, ohatra, nampahatsiaro Joba fa Izy mamelon̈o biby aby io, ke vitany koa hikarakara Joba. (Joba 38:39-41; 39:1, 5, 13-16) Maro raha nianarany Joba momba toetriny Zan̈aharinany izikoa izy fa nandiniky zavaboary.

2. Nan̈ino mety ho sarotro amintsika handiniky zavaboary?

² Afaka mianatra raha maro momba Zan̈aharintsika koa atsika izikoa mandiniky raha niasainy. Fa ndraikindraiky, tsy mora man̈ano zen̈y. Izikoa atsika mipetraka antanàmbe, mety tsy maro zavaboary hitantsika isanandra. Fa ndray atsika mipetraka ambanivolo, mety tsy hahita fotoan̈a koa atsika handinihan̈a iro io. Ke alo atsika handiniky nan̈ino atsika mila miezaka manokana fotoan̈a handinihan̈a zavaboary. Hizahavantsika koa fomba nampiasany Jehovah ndreky Jesosy iro io koa fa nampianatra, avio akory angalantsika fianaran̈a baka amy raha niasainy Jehovah.

3. Akory ahitan̈a fa tiany Jehovah hankafy zavaboary i Adama?

³ Tiany Jehovah hankafy zavaboary olombelon̈o niasainy voanalohany. Zan̈ahary koa fa niasa Adama, izy napetrany tan̈aty paradisa tsara. Tsy zen̈y fo, nirahiny nikarakara ndreky  nan̈itatra paradisa io koa Adama. (Gen. 2:8, 9, 15) Iritrireta hely mety karakory haravoan̈any Adama koa fa nahita voandraha nitsiry ndreky folera namelan̈a. Tombontsoa ankitin̈y ninany nikarakara zaridainy Edena! Izy koa nirahiny Jehovah nan̈amia an̈aran̈a iro biby aby io. (Gen. 2:19, 20) Azony Jehovah natao nifidy an̈aran̈a biby tsiaraikiaraiky, fa Adama fo nirahiny nan̈ano zen̈y. Azo antoko fa tsy maintsy nidinihiny Adama tsarabe biby aby io alohany izy hametaka an̈arandro. Nidinihiny pozipoziny biby aby io ndreky raha fataondro. Evandraha tiany mare asanany io. Fotony izio nahavy izy nahainankasitraka fo fahendrenany Babany, fahaizany miasa raha, avio nahitany tsarabe hatsaran̈any zavaboary.

4. a) Ino antony mahavy atsika tôkony handiniky zavaboary? b) Ino zavaboary ten̈a tianao?

⁴ Nan̈ino atsika tôkony handiniky zavaboary? Fotony tiany Jehovah atsika han̈ano zen̈y. Hoizy: ‘Misan̈andrà lan̈itry baka anaro, avio mizahava. Azovy niasa raha aby io?’ Mazava valinizen̈y. (Isaia 40:26) Izy niasa raha jiaby amy lan̈itry an̈y, ambony tany, ndreky firaka raha andranomasin̈y. Zavaboary aby io mampianatra atsika raha momba Jehovah. (Sal. 104:24, 25) Diniha hely koa baka fomba niasany atsika. Atsika nataony tia mankafy hatsaran̈any zavaboary. Baka io, atsika koa namiany maso, sofin̈y, lela, oron̈o avio hoditry, ke afaka mankafy tsarabe raha aby niasainy.

5. Koa Romanina 1:20 zahan̈a, nan̈ino mahatsara atsika mandiniky zavaboariny Jehovah?

⁵ Misy antony maventy hafa koa ambarany Baiboly mahavy atsika tôkony handiniky zavaboary. Iro io mampianatra atsika toetriny Jehovah. (Vakia Romanina 1:20.) Diniha baka zavaboary aby io. Tsy maharikian̈a anao fomba niasany Jehovah iro io? Tsy hitanao man̈aboaka fahendrenanany iro io? Diniha koa hanin̈y isankarazany mety hoanintsika aby io. Tsy hitanao baka amindro io fa tiany Jehovah ankitin̈y olombelon̈o? Atsika koa fa mahita toetriny Jehovah baka amy zavaboary aby io, atsika loso mahay izy tsarabe sady tihan̈aton̈o izy. Jehovah nampiasa zavaboarinany aby io hampianaran̈a leson maventy aminolombelon̈o. Alo atsika hizaha fomba sasany nan̈anaovany zen̈y.

6. Ino raha ianarantsika koa fa mandiniky voron̈o pifindra monin̈y?

⁶ Jehovah manan̈a fandaharampotoan̈a. Isaka taon̈o, koa fa an̈elan̈elan̈any farany fanjava Fevrie firaka misasaka fanjava May, Israelita aby io mahita kilandibe mitilitilin̈y man̈eran̈a tanindro. Amy fotoan̈a io baka kilandibe  aby io mifindra man̈avaratra. Karaha ty nivolan̈iny Zan̈ahary taminy Israelita aby io: ‘Kilandibe amy lan̈itry mahay tsarabe fotoan̈a tôkony handihanany.’ (Jer. 8:7) Efa nasiany Jehovah fotoan̈a voafaritry andihanany voron̈o aby io mifindra monin̈y. Miran̈a zen̈y koa, izy efa namaritry fotoan̈a araiky han̈anaovany didipitsaran̈anany. Ke atsika koa fa mahita voron̈o mifindra monin̈y, direkty tsaroantsika fa atsika afaka matoky tsarabe fa Jehovah efa misy “fotoan̈a voatondro” hamaran̈any donia ratsy ty.​—Hab. 2:3.

7. Ino toky anan̈antsika koa fa mandiniky fomba fitilin̈any voron̈o? (Isaia 40:31)

⁷ Jehovah man̈amia angovo panomponany. Amy bokiny Isaia ao, Jehovah mampan̈anten̈a olonany fa lera iro kajo na kivy, izy han̈amia iro angovo hahavitandro “hitilin̈y an̈abo, karaha raha misy elatrany voromahery in̈y.” (Vakia Isaia 40:31.) Iro Israelita aby io matetiky nahita voromahery man̈emban̈a an̈abo. Elatranizio tsy mikopaka mare aby, fa izy aposiposiny tsiko fo. Raha zen̈y mampatsiaro atsika fa Jehovah mahavita man̈amia angovo atsika, karaha ataony amy voron̈o aby io. Ke lera anao mahita voromahery mitilin̈y an̈abo, kanefa elatranany tsy mikopaka mare, tsarova fa Jehovah mahavita man̈amia anao angovo hiatrefan̈a problemonao.

8. Ino raha nianarany Joba izikoa izy fa nandiniky raha niasainy Jehovah, avio ino koa raha ianarantsika?

⁸ Vain̈y atokisantsika Jehovah. Jehovah nan̈ampy Joba hampitombo fatokisany Izy. (Joba 32:2; 40:6-8) Tamy koran̈a nataony tamy Joba, Zan̈ahary nikoran̈a momba raha niasainy isankarazany. Tan̈atinizen̈y lakintan̈a, rondro, avio tselatra. Nikoran̈a momba biby koa Izy, an̈isanizen̈y aomby dy ndreky sevaly. (Joba 38:32-35; 39:9, 19, 20) Raha aby io samby man̈aboaka habezany angovony Zan̈ahary, fitiavan̈a avio koa fahendrenanany tsy hay lan̈ilan̈iny. Koran̈a nataondroroe io, nan̈ampy Joba nahainatoky Jehovah lombolombony taloha. (Joba 42:1-6) Karaha zen̈y koa, izikoa atsika mandiniky zavaboary, ho hitantsika fa Jehovah be fahendrena ndreky matanjaka lavitry mandilatra atsika. Zen̈y koa hampahatsiaro atsika fa izy mahavita man̈adoso problemontsika jiaby, sady izy han̈ano zen̈y ankitin̈y. Fahaizantsika zen̈y hankafatatra fatokisantsika izy.

9-10. Ino raha ianarantsika momba Jehovah baka amy masoandra ndreky mahalen̈y?

⁹ Jesosy nahay raha maro momba zavaboary. “Piasa ten̈a mahay” izy koa fa niaraka tamy Babany namoron̈o raha jiaby. (Ohab. 8:30) Tafara tatỳ, lera Jesosy navy tambony tany teto, izy nampiasa zavaboary han̈ampiany pianatranany hahay momba Babany. Atsika iziô handiniky leson vitsivitsy nampianariny.

¹⁰ Olo jiaby tiany Jehovah. Tamy Toriteny Tan̈abony Bongo in̈y, Jesosy nikoran̈a tamy pianatranany momba masoandra ndreky mahalen̈y. Raha aroe io tsy jirijirenolo loatra, kanefa mila iro io atsika baka ho velon̈o. Azony Jehovah natao tsy nan̈amia masoandra ndreky mahalen̈y olo tsy manompo izy, fa tsy zen̈y nataony. Be fitiavan̈a izy, ke amezany iro io aby olo jiaby. (Mat. 5:43-45) Ino ma raha tiany Jesosy hampianarin̈y pianatranany aby io baka amy zen̈y? Tiany Jehovah atsika ho tia olo jiaby. Lera atsika mitazan̈a masoandra tsofotro, na lera misy mahalen̈y, aleva onon̈o fa Jehovah tsy man̈avakavaka fa tia olo jiaby. Modelinany mandrisiky atsika tsy han̈avakavaka, fa hitory aminolo jiaby.

11. Nan̈ino mankahery atsika mandiniky voron̈o?

¹¹ Jehovah man̈amia raha ilaintsika. Tamy toriteny in̈y koa Jesosy nivolan̈a karaha ty:  “Zahava tsarabe baka iro voron̈o mitilin̈y aby io: Iro io tsiary ndraiky mamafy na mangala vokatra na mamory hanin̈y an̈aty tran̈o famorian̈a vokatra, fa Babanaro andan̈itry an̈y fo man̈amia hanin̈y iro io.” Mety nahita voron̈o nitilitilin̈y tan̈abo lohandro iro olo nitandren̈y Jesosy aby io, taminizy nan̈ontany iro karaha ty: ‘Tsy mbala valera mandilatra iro io ma anaro?’ (Mat. 6:26) Tsara mare fomba nan̈amezany Jesosy toky atsika fa Jehovah tsy maintsy hikarakara atsika! (Mat. 6:31, 32) Firaka iziô, leson baka amy zavaboary zen̈y mbala man̈amia korazy panompony Jehovah tsy mivadiky fo. Karaha zen̈y, ohatra, ranabavy pisava lalan̈a tanora baka Espagne. Izy kivy mare fotony izy tsy nety nahita tran̈o. Fa izikoa izy efa nandiniky voron̈o nihina voandraha, izy loso nisy korazy. Hoizy: “Voron̈o aby io nampahatsiaro zaho fa Jehovah mikarakara iro sady tsy maintsy hikarakara zaho koa.” Tsy ela tafaranizen̈y, ranabavy io nahita tran̈o.

12. Araka Matio 10:29-31, ino raha ianarantsika momba Jehovah baka amy fody?

¹² Misy valera amy Jehovah atsika tsiaraikiaraiky. Talohany handifasany pianatranany aby io hitory, nampiany Jesosy antsendriky iro tsy havozo olo manohitry iro. (Vakia Matio 10:29-31.) Akory nan̈anaovany zen̈y? Izy nikoran̈a momba fody; voron̈o feno tan Israely. Tsy dia nisy valerany voron̈o io taminy andrany Jesosy. Fa hoizy tamy pianatranany aby io: “Nata araiky amindro io fo latsaka antany, hainy Babanaro fo.” Karaha ty koa hoizy: ‘Anaro mbala valera lavitry mandilatra fody maro.’ Namezany Jesosy toky pianatranany aby io fa valera amy Jehovah iro tsiaraikiaraiky. Dikanizen̈y, tsisy antony tôkony havozoandro fan̈injehan̈a. Hay be fa nahatsiaro volan̈a Jesosy in̈y iro isaka nahita fody tamy tany nitoriandro, na tantanàmbe na tambanivolo. Anao ke? Lera anao mahita voron̈o madiniky, tsarova fa anao valera mare amy Jehovah fotony anao koa ‘mbala valera lavitry mandilatra fody maro.’ Jehovah miaraka aminao, ke aza mavozo olo manohitry anao.​—Sal. 118:6.

13. Ino han̈ampy atsika hangala leson baka amy zavaboary?

¹³ Mbala maro leson afaka ianarantsika momba Jehovah baka amy zavaboary. Amy fomba karakory? Voanalohany, atsika antsendriky mila mangala fotoan̈a mandiniky zavaboary. Baka io, mila dinihintsika ino raha ampianarinizio atsika momba Jehovah. Mety tsy ho mora raha zen̈y. Nivolan̈a karaha ty Géraldine, ranabavy araiky baka Cameroun: “Zaho tombo tantanàmbe, ke mila miezaka mare zaho vo mahavita mandiniky zavaboary.” Nisy antipan̈ahy araiky kahian̈a Alfonso, nivolan̈a: “Hitako fa zaho mila man̈ano programo handinihako manokana zavaboariny Jehovah ndreky hisaintsain̈ako raha hampianarinizio momba izy.”

14. Ino raha nianarany Davida izikoa izy fa nisaintsain̈y raha niasainy Zan̈ahary?

 ¹⁴ Davida nandiniky lalin̈y momba zavaboariny Zan̈ahary. Izy nivolan̈a tamy Jehovah: ‘Koa tazan̈iko lan̈itrinao, asany rantsantan̈anao, baka io fanjava ndreky lakintan̈a niforon̈inao, mba ino ma olombelon̈o mety maty ke tsaroanao?’ (Sal. 8:3, 4) Davida koa fa nisan̈andra lan̈itry taminy alin̈y, izy tsy basiny ravoravo nizaha lakintan̈a aby io fo fa, izy nandiniky ino raha ampianarindro io izy momba Zan̈ahary. Hitany fa ten̈a be voninahitry ankitin̈y Jehovah. Tandraraiky koa, Davida nandiniky fomba nitombosany vatan̈anany tan̈aty kibony mamany. Izikoa izy fa nisaintsain̈y fomba mahagaga niasan̈a vatan̈anany, izy loso nahainankasitraka fahendrenany Jehovah fo.​—Sal. 139:14-17.

15. Ino, ohatra, zavaboary nan̈ampy anao hahita toetriny Jehovah? (Salamo 148:7-10)

¹⁵ Karaha Davida, atsika tsy voatery hitady lavitry be vo hahita zavaboary mety saintsain̈iny. Izikoa anao mizaha man̈odidin̈y anao, efa hahita raha maro afaka han̈ampy anao hahay toetriny Jehovah tsarabe. Ohatra, hafanan̈any masoandra ren̈inao efa hahaizanao karakory angovony Jehovah. (Jer. 31:35) Lera anao mahita voron̈o miasa tran̈onany koa, saintsain̈a karakory fahendrenany Zan̈ahary. Lera anao mahita zanaka amboa man̈ian̈a rambonany, aleva onon̈o fa Jehovah tia kidikidy. Avio aza hadin̈a koa man̈ano mersy Jehovah noho izy be fitiavan̈a, isaka anao mahita reny araiky misoma zanany. Raha jiaby niasainy Jehovah afaka ianarantsika momba toetrinany. Samby midera izy aby, rango amy farany madiniky firaka amy farany maventy, na marikitry na lavitry.​—Vakia Salamo 148:7-10.

16. Tôkony ho tapakevitry han̈ino atsika?

¹⁶ Zan̈aharintsika io be fahendrena, be fitiavan̈a, farany mahery, avio farandraha mahay miasa raha tsara eky. Ho hitantsika toetrinany aby zen̈y ndreky toetrinany maro hafa izikoa atsika mandiniky zavaboary. Ke atsika tôkony hanokana fotoan̈a tsy tapaka hankafizan̈a zavaboary ndreky hisaintsain̈ana ino raha ampianarinizio atsika momba Jehovah. Izikoa atsika man̈ano zen̈y, atsika hahaiharikitry Pamoron̈o fo. (Jak. 4:8) Raimandreny koa afaka mampiasa zavaboary han̈ampian̈a zanany hifandray marikitry amy Jehovah. Zen̈y raha hidinihintsika amy lahatsoratra man̈araka.