1. ¿Xí láani gocné Job par nimbutzaaybu Jehová?

 JOB biiy diitz né xidal buñ, per sigory más bidxin lainy xcalnabanybu mod biiybu diitz né Jehová. Jehová gochbu Job nabiʼ guirá cós rodann ni bisaʼbu. Ngú ñacné láabu nadudybu cuent que Jehová nap xiroʼ sabiduría né ñapbu confianz que Jehová labúu ran xpiin. Por ejemplo, Job labúu nabiʼ que pal Dios labúu radudy ni roo nimal, láaca labúu ñan Dios láabu (Job 38:39-41; 39:1, 5, 13-16). Órni bunybu pensary ló guirá ejemplos reʼ, bisuidybu xidal cós de cualidades xtuny Dios.

2. ¿Xigony rioʼ ór rasac naganno guibiʼno ni bisaʼ Jehová?

² Lóono láaca labúu guisuidyno más de Dios pal rabiʼno ni bisaʼbu. Per pentzi diti guirá ór labúu gonyno láani. Pal rabésno lainy toib gudxrop, sigory diti napno oportunida guibiʼno guirá ór cós ni bisaʼ Jehová. Dada pal rabésno lainy toib ranch, labúu guisacno que diti napno tiemp par guibiʼno ni bisaʼ Jehová. Por ngú, guisuidyno xigony non cueʼno tiemp par guibiʼno láani. Láaca guisuidyno ximod Jehová né Jesús biquiinyibu tipnés cós ni goyaʼ par bisuidyibu lóono cós ni rasac, né xi labúu gonyno par guisuidyrano de láani.

3. ¿Ximod nanno que Jehová goniiny láabu ñoʼ nakit Adán né guirá ni bisaʼbu?

³ Jehová goniiny que primer buñ ni goyoʼ ló Gudxlio  ñoʼ nakit né guirá ni bisaʼbu. Por ngú goloʼbu Adán ló toib lagary móz par nabiʼbu xi guirá noʼ loni, par ñonybu dxiin loni né ñonybu láani más xiroʼ (Gén. 2:8, 9, 15). Bunysi pensary ximod gosac Adán órni bibiʼbu calainy ni bisagaʼbu né cayaal guieʼ. Toib privilegio gocni ñanbu lagary mózcu. Jehová láaca gochbu Adán nabeʼbu laa guirá nimal (Gén. 2:19, 20). Jehová labúu ñony láani, per bidudybu dxiinreʼ Adán. Sigory Adán bibiʼbu mod nac nimalien né mod ronymu antes de nabeʼbu layimu. Gocni toib dxiin sacróyen, modcu labúu bibiʼbu balaati nap Bixiosbu sabiduría, balaati sacró né móz bisaʼbu guirá cós.

4. a) ¿Xigony non guibiʼno guirá ni bisaʼ Jehová? b) ¿Xí cós ni ma goyaʼ rioladxlo más?

⁴ Non guibiʼno guirá ni ma goyaʼ portín Jehová ranab láani lóono. Láabu nábu: «Colguiliskiaʼ lóto né colguibiʼ guibá». De ngú ranabdiitzbu: «¿Chú bisaʼ guirá cós reʼ?». Nayadit mod rarexani (Is. 40:26). Jehová diti nosi bisaʼbu cós sacróyen lainy guibá, láaca ló Gudxlio né lainy nisdaʼ, né labúu guisuidyno xidal cós de láani (Sal. 104:24, 25). Láaca, buny pensary ximod bisaʼ Dios lóono. Bisaʼbu lóono par guioladxno ni bisaʼbu. Láaca labúu rabiʼno, racadiagno, roono, racaxeʼno né raganno, guirá ndeʼ ragoʼ nakitni xcalnabanyno.

5. Mod ná Romanos 1:20, ¿xigony rasac guibiʼno ni goyaʼ?

⁵ La Biblia láaca raiby lóono guibiʼno ni goyaʼ portín racnéni lóono guimbutzaayno cualidades xtuny Jehová (bíil Romanos 1:20). Por ejemplo, guirá ni goyaʼ raslooyni sabiduría xtuny Dios. Xidal clas galrro ni noʼ, raslooyni que ronladxbu lóono. Órni rabiʼno cualidades xtuny Dios ló ni bisaʼbu racnéni lóono guimbutzaayno láabu né rachiinni lóono guibigaxno más láabu. Nigoreʼ guibiʼno ximod raquiin Jehová ni ma goyaʼ par guisuidybu lóono cós ni rasac.

6. ¿Xí labúu guisuidyno de nimal ni nan xi tiemp guisapy stoib lagary?

⁶ Jehová nap toib tiemp. Guirá íz ro ma calox beʼo febrero né galaʼ beʼo may, israelitas bibiʼyibu cigüeñas ni rasapy niis lad norte. Jehová góoch israelitas: «Cigüeña ni rasapy lainy guibá nan  xtiemp» (Jer. 8:7). Xomodca ma goloʼ Jehová toib tiemp par guiráyimu, láaca ma goloʼbu toib tiemp par guinitlóbu gudxliogoxreʼ. Órni rabiʼno que nimal ni rasapy nan ló xi tiemp tzee stoib lagary, racnéni lóono guisetnaladxno que Jehová «nap toib tiemp» par guinitlóbu gudxliogoxreʼ, né napno confianz que sonybu láani (Hab. 2:3).

7. ¿Xí rasuidyno mod rasapy nimal? (Isaías 40:31).

⁷ Jehová radudy fuers xpiin. Né xcalrracné Isaías, Dios bidudy xtiitz que órni xpiimbu nareʼgan, nadudybu fuers xpiimbu nasapy «xomod bisié» (bíil Isaías 40:31). Israelitas biaʼyibu bibiʼyibu bisié casapy né xcalrracné buu par diti nadzak. Ndeʼ racné lóono guienno, xomodca racné Jehová bisié guisapy láaca labúu sacnébu né sony nadipbu xpiimbu. Por ngú, órni guibiʼlo toib nimal casapy nigolú guiaʼ né nili rasis xiʼilmu, bisetnaladx que Jehová labúu guidudy fuers looy par guicalólo xcalnaganlo.

8. a) ¿Xí bisuidy Job de guirá ni bisaʼ Jehová? b) ¿Xí rasuidyni lóono?

⁸ Labúu gapno confianz Jehová. Órni Jehová biiy diitz né Job, gocnébu Job par ñap más confianz láabu (Job 32:2; 40:6-8). Goniʼbu xidal cós ni bisaʼbu, xomod vitzón, xcaay né guisioʼo. Láaca goniʼbu de nimal, xomod yós guiʼx né mainy (Job 38:32-35; 39:9, 19, 20). Guirá ejemplos reʼ gocnéni Job ñen que Jehová diti nosi napbu galnadip, láaca napbu galrronladx né sabiduría. Ngú buny que labúu ñapbu más confianz Jehová (Job 42:1-6). Scúca órni rasuidyno ni ma bisaʼ Jehová, rasetnaladxno que diti labúu rigaʼlno sabiduría xtunybu né xcalnadipbu. Láaca, labúu cueʼbu guirá galnagan ni napno né sonybu láani. Órni ronyno pensary loni racnéni lóono gapno más confianz láabu.

9, 10. ¿Xí rasuidyno de Jehová mod nac xtox Govitz né guié?

⁹ Jesús bimbutzaaybu guirá ni goyaʼ. «Xomod toib mextra ni nan rasaʼ», gocnébu Bixiosbu dzú goyaʼ guibá né Gudxlio (Prov. 8:30). Después, órni goyoʼbu ló Gudxlio, biquiimbu ni goyaʼ par bisuidybu xpiimbu xidal cós de Bixiosbu. Guisuidyno tipnésni.

¹⁰ Jehová raslooy xcalrronladx guiránac buñ. Ló Sermón del Monte, Jesús bisetlabu chop cós ni bisaʼ Jehová ni diti ragoʼ buñ cuent: láani ngú xtox Govitz né guié. Raquiinno guiropcani par guibanyno. Xalagary guiá Jehová láani par buñ ni diti nac xpiimbu, radudybu láani guiránac buñ portín napbu galrronladx (Mat. 5:43-45). Jesús biquiin ejemplos reʼ par bisuidybu xpiimbu que Jehová racladx guislooyno galnadxiʼ guiránac buñ. Órni guibiʼno balaati móz riaʼis Govitz o órni guiab toib guiéyen, guisetnaladxno mod ragobioo né ronladx Jehová guiránac buñ. Ejemplo xtunybu labúu guichiinni lóono guislooyno de clas galrronladx reʼ órni gony predicarno guiránac buñ.

11. ¿Ximod racné lóono guibiʼno manybiguin?

¹¹ Jehová radudy guirá ni caquiinno par guibanyno. Jesús láaca goniʼbu ló Sermón del Monte: «Colguicaa cuidad manybiguin ni rasapy  lainy guibá. Layimu diti ragoʼyimu binii, diti ronyimu cosech, né diti racuatzayimu cós lainy yee, per Bixiosto ni noʼ lainy guibá rayaʼan layimu». Pentzi buñ ni bicadiag a Jesús bibiʼyibu tipnés manybiguin ni casapy niscú órni gonabdiitzbu: «¿Xí diti más rasacto que layimu la?» (Mat. 6:26). Né galrronladx goniʼbu que Jehová guirá ór sadudy ni caquiinno par guibanyno (Mat. 6:31, 32). Ni bisetlaa Jesús rony animarni xpiin Jehová ló naareʼ. Toib precursora mbioxhlas de gudx España bireʼganbu portín diti bidzelbu ro nabésbu. Per órni bibiʼbu tipnés manybiguin cayó tipnés ladx né cuánnax, gosacbu sacró. Nábu: «Bisetnaladxi, pal Jehová ran layimu, láaca sanbu naʼ». Diti xidzú hermanacu bidzelbu lagary ro cuésbu.

12. Mod ná Mateo 10:29-31, ¿xí rasuidy manybiguinien lóono de Jehová?

¹² Tigaagano rasacno par Jehová. Antes de naxel Jesús xpiin predicación, gocnébu xpiimbu diti nadzuiby oposición (bíil Mateo 10:29-31). Goniʼbu de toib manybiguin ni goyogoluʼ lainy gudx Israel, ni laa gorrión. Ló tiempcu goyoʼmu nigolú barat. Per Jesús gochbu xpiimbu: «Ni toib de layimu riab layoo sin gan Bixiosto láani». Né goniʼbu: «Lóoto rasacto más que xidal manybiguinien». Modreʼ gochbu xpiimbu que Jehová rioʼ galrrasaʼ por tigaagayibu. Ngú gocné layibu par diti nadzuibyibu persecución. Sigory xpiimbu bisetnaladx diitzreʼ cada rabiʼyibu manybiguin reʼ laʼga caniʼyibu xtiitz Dios lainy gudx né ranch. Scúca órni guibiʼlo toib manybiguin, bisetnaladx que Jehová rioʼ galrrasaʼ por looy portín looy rasaclo «más que xidal manybiguinien». Né xcalrracné Jehová saplo balory guicalólo oposición (Sal. 118:6).

13. ¿Xí raquiin gonyno par guisuidyrano guirá ni bisaʼ Jehová?

¹³ Labúu guisuidyrano de Jehová ló guirá ni bisaʼbu. Por ngú non cueʼno tiemp guibiʼno ni nagoo lóono né gonyno pensary xi rasuidyni lóono de Jehová. Pentzi diti guirá ór sapno tiemp par gonyno ngú. Toib hermana de Camerún ni laa Géraldine ná: «Goniʼsa lainy toib gudxrop, por ngú nagan gocni par naʼ nabiʼya ni bisaʼ Jehová». Toib anciano ni laa Alfonso ná: «Ni racné naʼ la, ngú cueʼya tiemp ló xchiina par guireʼya tiplad né guibiʼya né goni pensary xi rasudi de Jehová ló guirá ni bisaʼbu».

14. ¿Xí bisuidy David órni bunybu pensary ló ni bisaʼ Jehová?

 ¹⁴ David guirá ór buny pensary ló ni bisaʼ Jehová. Gochbu Jehová: «Órni rabiʼya guibá ni bisaʼlo, guirá ni bisaʼlo né bicuñalo, beʼo né vitzón ni bisaʼlo, ¿chú buñgudxlio par guisetnaladxlo láabu?» (Sal. 8:3, 4). David diti nosi bidziguiaʼbu mod caa vitzón lainy guibá, xalagary ngú bunybu pensary xi rasuidy vitzón láabu de Jehová. Bidudybu cuent que Jehová nirodanbu. Stoib ór David bunybu pensary ximod goyaʼbu lainy xinaʼbu. Laʼga más bunybu pensary ló galrradziguiaʼcu más bidziguiaʼbu sabiduría xtuny Jehová (Sal. 139:14-17).

15. ¿Ma bibiʼlo cualidad xtuny Jehová ló ni bisaʼbu la? Bisetlaa tipnés ejemplos (Salmo 148:7-10).

¹⁵ Xomod David, diti fuerspa tzoʼno nigolú sit par gonyno pensary ló ni bisaʼ Jehová. Pal rabiʼlo ni nagoo looy, labúu sabiʼlo xidal cualidad ni nap Jehová. Por ejemplo, bibiʼ galnadip ni napbu órni ragoxidzaʼ Govitz looy (Jer. 31:35). Bibiʼ sabiduría xtunybu órni cabiʼlo toib manybiguin casaʼ xpicheʼz. Órni rabiʼlo toib bukien ná gualay xoban, bisetnaladx que Jehová bisaʼ láamu scú portín láaca rioʼ nakitbu. Né bidudy guixquix Jehová por xcalrronladxbu órni guibiʼlo toib buñgonaʼ caguit né xpadaʼ. Napno xidal oportunida guisuidyno de Bixiosno pal rabiʼno guirá ni bisaʼbu, portín guirá ni bisaʼbu —ná pal xiroʼni o mitienni, ná pal noʼni sit o noʼni gax— ronyxiroʼni láabu (bíil Salmo 148:7-10).

16. ¿Xí láani coʼno guicno gonyno?

¹⁶ Diti noʼ stoib ni más naní guic, ni nap más galrronladx, ni nan rasaʼ né ni nap xiroʼ galnadip xomod Dios xtunyno. Labúu guibiʼno cualidades reʼ né stipnés cualidades ló guirá ni bisaʼbu; nosi cueʼno tiemp guiyopyno láani. Guirá ór cueʼno tiemp par guibiʼno ni bisaʼbu né gonyno pensary xi rasuidyni lóono de Jehová. Pal ronyno láani, sabigaxno más ni Bisaʼ lóono (Sant. 4:8). Ló artículo ni sieed, sasuidyno ximod labúu guiquiin buñ guirá ni ma goyaʼ par guisuidy ximbiox guibigax ronoʼ Jehová.