1. Unsay makatabang aron mag-enjoy ta sa atong pagtuon sa mga tagna sa Bibliya?

 “GANAHAN kaayo kong magtuon sa mga tagna sa Bibliya,” miingon ang batan-ong brader nga si Ben. Parehas ba mog gibati? O para ba nimo, lisod sabton ang mga tagna sa Bibliya? Tingali laayan pa gani kang magtuon bahin ana. Pero kon mas masabtan nimo kon nganong gipasulat kana ni Jehova sa iyang Pulong, basin mausab ang imong opinyon.

2. Unsay hisgotan niining artikuloha?

² Hisgotan niining artikuloha dili lang kon nganong angay natong tun-an ang mga tagna sa Bibliya, kondili kon unsaon pod nato ni pagtuon. Dayon susihon nato ang duha ka tagna sa basahon ni Daniel aron atong makita kon sa unsang paagi ni makatabang nato karon.

3. Unsay kinahanglan natong himoon aron masabtan ang mga tagna sa Bibliya?

³ Kinahanglang mangayo tag tabang aron masabtan nato ang mga tagna sa Bibliya. Konsideraha ni nga ilustrasyon. Imadyina nga miadto ka sa usa ka lugar nga dili ka pamilyar. Pero kauban nimo ang imong higala nga suheto kaayo sa lugar. Kabalo siya kon asa na mo dapita ug kon asa padulong ang matag dalan. Seguradong nalipay ka nga giubanan ka sa imong higala. Sa samang paagi, nahibalo si Jehova kon asa na ta sa dagan sa panahon ug kon unsay naa sa unahan. Busa aron masabtan ang mga tagna sa Bibliya, kinahanglang mapainubsanon tang mangayog tabang kang Jehova.—Dan. 2:28; 2 Ped. 1:19, 20.

4. Nganong gipasulat ni Jehova ang mga tagna diha sa Bibliya? (Jeremias 29:11) (Tan-awa sab ang hulagway.)

⁴ Sama sa usa ka maayong ginikanan, gusto ni Jehova nga ang  iyang mga anak makabaton ug malipayong kaugmaon. (Basaha ang Jeremias 29:11.) Pero dili sama sa tawhanong ginikanan, nahibalo si Jehova kon unsay mahitabo sa umaabot, ug dili gyod siya masayop. Iyang gipasulat ang mga tagna sa Bibliya aron mahibalo ta bahin sa importanteng mga hitabo sa dili pa kini moabot. (Isa. 46:10) Ang mga tagna sa Bibliya maoy mahigugmaong regalo gikan sa atong langitnong Amahan. Pero unsaon nimo pagseguro nga matuman gyod ang mga tagna sa Bibliya?

5. Unsay makat-onan sa mga batan-on sa eksperyensiya ni Max?

⁵ Sa eskuwelahan, ang mga batan-on sagad napalibotan ug mga tawo nga wala kaayoy pagtahod o wala gyod magtahod sa Bibliya. Ang ilang mga komento ug binuhatan makapatunghag pagduhaduha sa hunahuna sa mga batan-ong Saksi. Matikdi ang eksperyensiya sa brader nga si Max. Siya miingon, “Niadtong tin-edyer pa ko, nagsugod kog duhaduha kon ang ginatudlo ba sa akong ginikanan mao ang tinuod nga relihiyon, ug kon ang Bibliya gikan ba gyod sa Diyos.” Unsay gihimo sa iyang ginikanan? Siya miingon, “Wala sila masuko, bisag kabalo ko nga nabalaka sila nako.” Gitubag sa mga ginikanan ni Max ang iyang mga pangutana gamit ang Bibliya. Ug naa poy gihimo si Max. “Gitun-an nako ang mga tagna sa Bibliya,” siya miingon, “ug akong gisulti sa ubang batan-on ang akong nakat-onan.” Unsay resulta? Si Max miingon, “Human ana, nakombinsir ko nga ang Bibliya gikan gyod sa Diyos!”

6. Unsay kinahanglan nimong himoon kon naa kay mga pagduhaduha, ug ngano?

⁶ Kon, sama ni Max, nagduhaduha ka kon tinuod ba ang giingon sa Bibliya, dili ka angayng makonsensiya. Pero naa kay kinahanglang buhaton. Ang pagduhaduha samag taya. Kon pasagdan, anam-anam niining daoton ang butang nga bililhon. Aron matangtang ang bisan unsang “taya” sa imong pagtuo, kinahanglan una nimong pangutan-on ang imong kaugalingon, ‘Nagtuo ba ko sa giingon sa Bibliya bahin sa umaabot?’ Kon dili ka segurado, kinahanglan nimong tun-an ang mga tagna sa Bibliya nga natuman na. Unsaon nimo na paghimo?

7. Unsay atong makat-onan kang Daniel kon bahin sa pagtuon sa mga tagna? (Daniel 12:10) (Tan-awa sab ang hulagway.)

⁷ Si Daniel naghatag ug maayong ehemplo kon unsaon pagtuon ang mga tagna. Nagtuon siya uban ang hustong motibo, aron mahibalo sa kamatuoran. Mapainubsanon pod si Daniel, ug giila niya nga ang hatagan lang ni Jehova ug pagsabot mao kadtong nakaila Niya ug nagsunod sa Iyang taas nga mga sukdanan. (Dan. 2:27, 28; basaha ang Daniel 12:10.) Gipakita ni Daniel nga mapainubsanon siya pinaagi sa pagpangayog tabang kang Jehova. (Dan. 2:18) Nag-research pod si Daniel. Gitun-an niya ang mga basahon sa Bibliya nga mabatonan sa iyang panahon. (Jer. 25:11, 12; Dan. 9:2) Unsaon nimo pagsundog si Daniel?

8. Nganong ang uban dili gustong motuo nga matuman ang mga tagna sa Bibliya, pero unsay angay natong buhaton?

⁸ Susiha ang imong mga motibo. Nagtuon  ba ka sa mga tagna sa Bibliya kay gusto gyod nimong mahibalo sa kamatuoran? Kon oo, tabangan ka ni Jehova. (Juan 4:23, 24; 14:16, 17) Unsa kahay motibo sa uban sa ilang pagtuon sa mga tagna? Ang uban nagtuon kay gusto nilang makakitag ebidensiya nga ang Bibliya dili gikan sa Diyos. Gusto nilang pamatud-an nga dili ra daotan nga naghimo silag kaugalingon nilang sukdanan sa husto ug sayop ug nagkinabuhi sumala sa ilang gusto. Pero sa atong bahin, kinahanglang husto ang atong motibo. Dugang pa, naay importanteng hiyas nga gikinahanglan aron masabtan nato ang mga tagna sa Bibliya.

9. Unsang hiyas ang gikinahanglan aron masabtan nato ang mga tagna sa Bibliya? Ipatin-aw.

⁹ Magmapainubsanon. Si Jehova nagsaad nga iyang tabangan ang mga mapainubsanon. (Sant. 4:6) Busa kinahanglang moampo ta niya alang sa tabang aron masabtan nato ang mga tagna sa Bibliya. Angay pod natong ilhon nga kinahanglan nato ang tabang sa matinumanong ulipon, nga maoy iyang gigamit sa paghatag natog espirituwal nga pagkaon sa hustong panahon. (Luc. 12:42) Si Jehova ang Diyos sa kahapsay, maong haom lang nga ang matinumanong ulipon mao ray iyang gigamit sa pagtabang nato nga masabtan ang mga kamatuoran sa iyang Pulong.—1 Cor. 14:33; Efe. 4:4-6.

10. Unsay imong nakat-onan kang Esther?

¹⁰ Pag-research. Pagpilig tagna nga nakapainteres nimo, ug unaha kana pag-research. Mao nay gihimo sa sister nga si Esther. Interesado siya sa mga tagna bahin sa pag-abot sa Mesiyas. Siya miingon, “Niadtong 15 anyos ko, nagsugod kog research bahin sa mga ebidensiya nga kini nga mga tagna gisulat sa wala pa matawo si Jesus.” Ang iyang mga nabasa bahin sa Linukot nga mga Basahon sa Patayng Dagat nakakombinsir niya. Siya miingon, “Ang uban niini gisulat sa wala pa ang Kristo, maong ang mga tagna nga nasulat niini klaro nga gikan gyod sa Diyos.” Si Esther miangkon, “Kadaghan ko nagbasa aron ako ning masabtan.” Ug nalipay siya sa iyang mga paningkamot. Human niya matun-i pag-ayo ang daghang tagna sa Bibliya, nakaingon siya, “Nakita nako nga tinuod gyod ang giingon sa Bibliya!”

11. Unsay kaayohan kon kombinsido ta nga tinuod ang giingon sa Bibliya?

¹¹ Dihang makita nato kon sa unsang paagi natuman ang ubang tagna sa Bibliya, molig-on pag-ayo ang atong pagsalig kang Jehova ug sa iyang paagi sa paggiya kanato. Ang mga tagna sa Bibliya makatabang pod nato nga padayong molaom ug maayong kaugmaon, bisag unsa pang pagsulay ang atong giatubang karon. Hisgotan nato ang duha ka tagna nga gisulat ni Daniel nga nagakatuman karon. Kon masabtan nato ni, makatabang ni nato nga mohimog maalamong mga desisyon.

12. Unsay girepresentahan sa tiil nga “puthaw [nga] naay sagol nga humok nga kulonon”? (Daniel 2:41-43)

¹² Basaha ang Daniel 2:41-43. Sa damgo nga gihubad ni Daniel kang Haring Nabucodonosor, ang tiil sa estatuwa nga nakita sa hari maoy  “puthaw [nga] naay sagol nga humok nga kulonon.” Pinaagi sa pagtandi niini nga tagna sa ubang tagna sa basahon sa Daniel ug Pinadayag, makaingon ta nga ang tiil nagrepresentar sa Anglo-Amerikanong alyansa, ang pinakagamhanang mga gobyerno sa kalibotan karon. Bahin niini nga gahom sa kalibotan, si Daniel miingon nga “ang gingharian lig-on sa usa ka bahin ug huyang sa laing bahin.” Nganong huyang kini sa laing bahin? Kay gipahuyang sa ordinaryong mga tawo, nga gisimbolohan sa humok nga kulonon, ang awtoridad sa Anglo-Amerika sa pagpatuman sa mga polisiya niini. b

13. Unsang importanteng mga kamatuoran ang atong makat-onan niini nga tagna?

¹³ Sa deskripsiyon ni Daniel bahin sa estatuwa ilabina sa tiil niini, makakat-on tag pipila ka importanteng kamatuoran. Una, gipakita sa Anglo-Amerikanong Gahom sa Kalibotan kon unsa kini ka gamhanan. Pananglitan, dako kinig nahimo aron modaog sa Gubat sa Kalibotan I ug II. Pero kini nga gahom sa kalibotan mihuyang ug padayon pang mohuyang tungod sa pagkontrahay sa mga sakop niini. Ikaduha, kini nga alyansa mao ang kataposang gahom sa kalibotan dihang laglagon sa Gingharian sa Diyos ang tanang gobyerno sa tawo. Bisan pag ang ubang nasod makig-away usahay sa Anglo-Amerikanong Gahom sa Kalibotan, dili nila kini mapulihan. Nahibalo ta ana kay “ang bato” nga nagrepresentar sa Gingharian sa Diyos magdugmok sa tiil, ang parte sa estatuwa nga nagrepresentar sa Anglo-Amerikanong alyansa.—Dan. 2:34, 35, 44, 45.

14. Dihang masabtan nato ang tagna bahin sa tiil nga puthaw ug kulonon, sa unsang paagi ni makatabang nato sa paghimog maalamong mga desisyon?

¹⁴ Kombinsido ba ka nga tinuod ang tagna ni Daniel bahin sa tiil nga puthaw ug kulonon? Kon oo, makaapektar ni sa imong paagi sa pagkinabuhi. Dili ka mangagpas ug materyal nga mga butang kay nahibalo ka nga hapit nang laglagon kining kalibotana. (Luc. 12:16-21; 1 Juan 2:15-17) Kon masabtan nimo ni nga tagna, makita pod nimo kon unsa ka importante ang buluhatong pagsangyaw ug pagpanudlo. (Mat. 6:33; 28:18-20) Human sa pagtuon niini nga tagna, pangutan-a ang imong kaugalingon, ‘Ang ako bang mga desisyon nagpakita nga kombinsido ko nga hapit nang taposon sa Gingharian sa Diyos ang tanang gobyerno sa tawo?’

15. Kinsa ang “hari sa amihanan” ug “hari sa habagatan” karon? (Daniel 11:40)

¹⁵ Basaha ang Daniel 11:40. Ang Daniel kapitulo 11 naghisgot ug duha ka hari, o politikal nga gahom, nga nag-ilogay kon kinsa ang magdominar sa kalibotan. Pinaagi sa pagtandi niini nga tagna sa ubang tagna sa Bibliya, masabtan nato nga ang “hari sa amihanan” mao ang Russia ug ang mga kaalyado niini, ug ang “hari sa habagatan” mao ang Anglo-Amerikanong Gahom sa Kalibotan. c

16. Giunsa pagtratar sa “hari sa amihanan” ang mga alagad sa Diyos nga nagpuyo sa iyang teritoryo?

¹⁶ Ang katawhan sa Diyos nga nailalom sa pagmando sa “hari sa amihanan” gilutos niini nga hari. Ang ubang Saksi gikulata ug gipriso tungod sa ilang pagtuo. Pero imbes mahadlok sa ginahimo sa “hari sa amihanan,” nakapalig-on hinuon ni sa ilang pagtuo. Ngano? Kay ang atong mga igsoon nahibalo nga ang paglutos sa katawhan sa Diyos maoy katumanan sa mga tagna ni Daniel. d (Dan. 11:41) Ang pagkahibalo niana makatabang nato nga mahuptang lig-on  ang atong paglaom ug makapabiling matinumanon.

17. Unsang mga kalisdanan ang giatubang sa katawhan sa Diyos ubos sa pagmando sa “hari sa habagatan”?

¹⁷ Kaniadto, ang “hari sa habagatan” mihimo pod ug direktang mga pag-atake sa katawhan ni Jehova. Pananglitan, panahon sa Gubat sa Kalibotan I ug II, daghang igsoon ang gipriso tungod sa ilang neyutral nga baroganan ug ang ubang anak sa mga Saksi gitangtang sa eskuwelahan tungod sa mao gihapong rason. Pero sa milabayng katuigan, ang katawhan ni Jehova nga nagpuyo ubos sa pagmando niana nga hari nakaeksperyensiyag dili direktang mga pagsulay sa ilang pagkamaunongon sa Gingharian sa Diyos. Pananglitan, panahon sa mga kampanya sa eleksiyon, ang usa ka Kristohanon basin matental sa pagsuportar sa usa ka partido o kandidato. Dili tingali siya mobotar, pero sa iyang hunahuna ug kasingkasing, naa na siyay gidapigan. Importante gyod nga magpabilin tang neyutral sa politika dili lang sa atong binuhatan kondili sa ato pong hunahuna ug pagbati!—Juan 15:18, 19; 18:36.

18. Unsay atong reaksiyon sa pagkontrahay sa “hari sa amihanan” ug “hari sa habagatan”? (Tan-awa sab ang hulagway.)

 ¹⁸ Kadtong walay pagtuo sa mga tagna sa Bibliya mabalaka tingali pag-ayo dihang makita nila ang “hari sa habagatan” nga ‘nakigsinungayay’ sa “hari sa amihanan.” (Dan. 11:40, footnote) Kining duha ka hari naay igong nukleyar nga hinagiban nga makapatay sa tanang kinabuhi sa yuta. Pero nahibalo ta nga dili tugotan ni Jehova nga mahitabo na. (Isa. 45:18) Busa, imbes mabalaka sa pagkontrahay sa “hari sa amihanan” ug “hari sa habagatan,” makapalig-on hinuon ni sa atong pagtuo. Nagpamatuod ni nga hapit na ang kataposan niining sistemaha.

19. Unsay angay natong ilhon bahin sa mga tagna sa Bibliya?

¹⁹ Wala ta mahibalo kon sa unsang paagi matuman ang ubang tagna sa Bibliya. Bisan si propetang Daniel wala mahibalo sa kahulogan sa tanan niyang gisulat. (Dan. 12:8, 9) Pero bisag wala ta bug-os mahibalo kon sa unsang paagi matuman ang usa ka tagna, wala na magpasabot nga dili kana matuman. Seguradong makasalig ta nga ipadayag ni Jehova kanato kon unsay kinahanglan natong mahibaloan sa hustong panahon, sama sa iyang gihimo kaniadto.—Amos 3:7.

20. Unsang kulbahinam nga mga tagna sa Bibliya ang hapit nang matuman, ug unsay padayon natong himoon?

²⁰ Dunay mahitabong proklamasyon sa “kalinaw ug kasegurohan.” (1 Tes. 5:3) Dayon, atakehon sa mga gobyerno sa kalibotan ang bakak nga relihiyon ug wagtangon kini. (Pin. 17:16, 17) Human ana, ilang atakehon ang katawhan sa Diyos. (Ezeq. 38:18, 19) Kini nga mga panghitabo mosangko sa kataposang gubat, ang Armagedon. (Pin. 16:14, 16) Makaseguro ta nga kining tanan hapit nang mahitabo. Sa pagkakaron, padayon natong ipakita ang atong apresasyon sa atong mahigugmaong langitnong Amahan pinaagi sa pagbantay sa katumanan sa mga tagna sa Bibliya ug pagtabang sa uban nga himoon kana.