1. Ịyẹ à tị́ ka dahị ụbwọ ká ọmwụ ọyẹyẹ ịla ịBayịbụụ ọjẹ́jẹ ka kpụhị ịpyọ?

 ỌỌNAHỊ okolobya ọhẹ ká ẹnyị nyamwụ ri Ben yẹkẹẹ: “Ọ kaa hám la ọ-ka jẹ́ ang u-uhye nya ọmwụ ọyẹyẹ ịla ịBayịbụụ.” Ọ kaa lang ịịwẹ ịnyịnyị? Lee ọmwụ ọyẹyẹ ịla ịBayịbụụ tị́ kaa lang ujwọ la ọ-ka wo etu nyaa? Ọ dọmwụ ka lang lala o-ri ang ọjẹ́jẹ u-uhye nya ọmwụ ọyẹyẹ ịla ịBayịbụụ nyị chaga myị́. Ma ụka ká jẹ́ ang u-uhye nya ang odudu ká iJihova ya ẹga da kị da ọmwụ ọyẹyẹ ju Omyi Ẹla nyamwụ, ị ka dọmwụ nyọka kpụng ịpyọ la ọjẹ́jẹ myị́.

2. Ang ọjẹ́jẹ ọlẹ tị́ ka ya ẹla u-uhye nya ẹlịyẹ?

² Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ang odudu kahị ka jẹ́ ang u-uhye nya ọmwụ ọyẹyẹ ịlẹpwụ nya ịBayịbụụ bala abwọlẹ kahị ka bwu họ ịnyị. Ọọwa lẹ, ahị ka kụ ẹhị yẹ ọmwụ ọyẹyẹ imiiye bwu ụpwụ nya ịDanẹlụ nyọka yẹ jaabwọ ká etu nyaa o-wowo ka dahị ụbwọ lẹẹlẹẹ lẹlẹ.

3. Ịyẹ ahị tị́ baba nyọka họ kori kahị ka wo etu nya ọmwụ ọyẹyẹ ịla ịBayịbụụ?

³ Kori kahị ka wo etu nya ọmwụ ọyẹyẹ ịla ịBayịbụụ aalẹ, ahị baba nyọka bịlẹ ká Ohe ka dahị ụbwọ. Kụ ẹhị yẹ ọ-chụ pwokwita ọlẹ wẹẹ. Kụ irya nyori à wẹẹ ka ẹga ọlẹ ká jẹ́ ẹnẹnẹhẹ lẹka, ma oligu nyang ọlẹ kọ jẹ́ ụwa yẹẹyẹẹ wẹẹ bajẹ balang. Ọ jẹ́ ẹga ọlẹ kanụ ji kpangga bala ẹga ọlẹ ká ụgbẹyị ọnyọnyọọnyị da ka. Ịwẹẹ ọdada á juwa ka, ọ ka kpụng ịpyọ nyọlẹ ká oligu nyang ọọwa myị kpang chị. IJihova lala oligu nyahị ọlẹ kọ wẹẹ dahị ụbwọ. Ọ jẹ́ ijuju nyahị yẹẹyẹẹ. Lẹ nyọka jẹ́-ẹ wo etu nya ọmwụ ọyẹyẹ ịla ịBayịbụụ, ahị ka kpịlọhị keji bịlẹ iJihova kọ ka dahị ụbwọ.—Dan. 2:28; 2 Pit. 1:19, 20.

4. Ịyẹ tị́ du ká iJihova da ọmwụ ọyẹyẹ juwa ẹ-ẹpwụ nya Omyi Ẹla nyamwụ? (IJeremaya 29:11) (Yẹ ifoto ịnyịnyị.)

 ⁴ Lala adịda ọnyịịla, iJihova tịtọ ká ijuju nya anyị nyamwụ ka myị la ọkẹkẹnị. (Wa iJeremaya 29:11.) Ma iJihova tị datị hi adịda ilodehe, chajị ọ ka jẹ́-ẹ ya ẹla ọlẹ kọ ka họ ijuju kpẹẹkpẹẹ. Ọ chụ angịnyị ehe ịhyẹ nyọka da ọmwụ ọyẹyẹ neeji chajị kahị ka jẹ́ ẹla ịkpọnchị ịlẹ kị baba ene kị ka họ. (Ayị. 46:10) Ọmwụ ọyẹyẹ ịla ịBayịbụụ ri āhị ịnyịịla bwu ẹga nya Adahị olepwoohe. Ma ányị ahị tị́ ka bwu jẹ́ myị̀myị̀ nyori ẹla ọlẹ ká ịBayịbụụ ya neeji ka họ jịra ịnyịlẹhị?

5. Ẹlịyẹ angịlẹ kị ri anjwo à tị́ ka jẹ́ bwu oja nya Max?

⁵ Uube-ụpwụ, anjwo nyahị kaa juwa bala angịlẹ kị kaa ju ihi nya ẹla ọlẹ ká ịBayịbụụ ya gbuu ka, lee ọ-dọmwụ kaa ju ka lichi-lichi. Ẹla ọlẹ kị kaa ya bala ọhọhọ ụka ọhẹ ka du ká anjwo ịlẹ kị ri Alibeenu nya iJihova ka la ịwẹẹ ọdada u-uhye nya ẹla ọlẹ kị myị la myị́. Kụ ẹhị yẹ oja nya ọọnahị ọhẹ ká ẹnyị nyamwụ ri Max lẹẹ wẹẹ. Ọ yẹkẹẹ: “Ụka kam gu ẹka iwo-kụrụ, m̀ dọmwụ nyọka da ịwẹẹ kori ká ẹla ọlẹ ká adam bala ịnam wẹẹ mẹjẹ́m á ri ịgba ọgbagba nyịlẹhị bala o-ri kori ká ịBayịbụụ á ri Omyi Ẹla nya Ohe ịnyịlẹhị.” Ịyẹ adamwụ bala ịnamwụ à tị́ họ? Max yẹkẹẹ: “Ị wẹm ụ-ụgbẹyị ọkpẹnẹẹ nanana nyori ẹla ọọwa ri olo nyaa.” Adamwụ bala ịnamwụ kpa ịBayịbụụ wẹ ịtọ ẹla ịlẹ kọ la. Max ọwa tị họ ẹlẹhẹ ịnyịnyị. Ọ yẹkẹẹ: “M̀ jẹ́ ang u-uhye nya ọmwụ ọyẹyẹ ịla ịBayịbụụ la ịlọm, m̀ tị ya ẹla ọlẹ kam jẹ́ bwu ụwa je anjwo ịkịla ịla ọjịra-jịra ịnyịnyị.” Ịyẹ à tị́ ri ocheju nyọọwa mẹ? Max yẹkẹẹ: “Nyọlẹ kam họ ịnyị kpá, m̀ wẹ ka jẹ́ myị̀myị̀ nyori ịBayịbụụ ri Omyi Ẹla nya Ohe ịnyịlẹhị.”

6. Ẹlịyẹ a tị́ baba nyọka họ kori ká la ịwẹẹ ọdada? Ịyẹ à tị́ du?

⁶ Jaabwọ kọ la ẹ-ẹga nya Max, kori ká dọmwụ nyọka da ịwẹẹ kori ká ẹla ọla ịBayịbụụ á ri ẹlịlẹhị aalẹ, a nwụ ịlọng la abyị ka. Ma a tị́ baba nyọka họ ẹlẹhẹ u-uhye nyamwụ ịnyịnyị. Ịwẹẹ ọdada lala abwọ ká ang kaa chị ega. Kori ká yọọ chịng, ega ọọwa ka bịrị ang ọlahịchịng myị́. Nyọka jẹ́-ẹ gba ịwẹẹ ọlẹ kọ ka bịrị ọmyịmyị nyang daarụ, à baba ká ka tọ ịlọng wo nyori, ‘M̀ myọnụ ju ẹla ọlẹ ká ịBayịbụụ ya u-uhye nya ijuju?’ Kori ká jẹ́ myị̀myị̀ ka aalẹ, à baba nyọka jẹ́ ang u-uhye nya ọmwụ ọyẹyẹ ịla ịBayịbụụ ịlẹ kị họ jịra ene-ene lẹ. Ányị a tị́ ka bwu dọmwụ nyọọwa?

7. Ịyẹ à tị́ da ịDanẹlụ ụbwọ nyọka jẹ́ ang u-uhye nya ọmwụ ọyẹyẹ? (ỊDanẹlụ 12:10) (Yẹ ifoto ịnyịnyị.)

⁷ ỊDanẹlụ ya ọgụ-ẹpẹtẹ ọnyịịla deeji hahị wuu u-uhye nya abwọlẹ kahị ka bwu jẹ́ ang u-uhye nya ọmwụ ọyẹyẹ. Ọ jẹ́ ang u-uhye nya ọmwụ ọyẹyẹ la irya ọnyịịla. Ọ tịtọ nyọka jẹ́ ẹlịlẹhị. ỊDanẹlụ kpịlọmwụ keji ịnyịnyị. Ọ jẹ́ nyori iJihova ka dọọ ụbwọ kọ ka wo etu nya ọmwụ ọyẹyẹ kori kọ kịnyaa la ọ-tụ́ ju Ohe chwẹẹ bala o-jwoo ihi. (Dan. 2:27, 28; wa ịDanẹlụ 12:10.) ỊDanẹlụ mẹjẹ nyori ọ kpịlọmwụ keji bwula ọ-kpụnịrọ ụbwọ ọdada nya iJihova. (Dan. 2:18) ỊDanẹlụ kaa jẹ́ ang kpori-kpori ịnyịnyị. Ọ kaa wụla Apwụ Ịgọgọ ịlẹ kị ji lụka nyamwụ yẹ. (Jer. 25:11, 12; Dan. 9:2) Ányị a tị́ ka bwu gbịla ịDanẹlụ?

8. Ịyẹ tị́ du ká angịhyẹ kaa pwa nyori ọmwụ ọyẹyẹ ịla ịBayịbụụ nyị́ họ jịra ka? Ẹlịyẹ ahị tị́ ka họ?

 ⁸ Wụla irya nyang yẹ. Irya nyọka jẹ́ ẹlịlẹhị à du ká kaa jẹ́ ang u-uhye nya ọmwụ ọyẹyẹ ịla ịBayịbụụ lẹ? O ri ịnyi aalẹ, iJihova ka dang ụbwọ. (Jọn. 4:23, 24; 14:16, 17) Ang ọkịla ọhẹ ka du myị ká ọngịnyị ka jẹ́ ang u-uhye nya ọmwụ ọyẹyẹ ịla ịBayịbụụ? Angịhyẹ ka họ ịnyị myị́ la ahị ọdahile nyori ị ka yẹ ang-ẹjẹẹ ọlẹ kọ mẹjẹ nyori ịBayịbụụ á ri Omyi Ẹla nya Ohe ka. Bwula ụgbẹyị ọlịnyị, ị kaa kụ irya nyori kori ká ịBayịbụụ á ri Omyi Ẹla nya Ohe kaka lẹ aalẹ, ị ka jẹ́-ẹ chụ ang ọlẹ kọ ri ọnyịịla bala ọtịpyọ lịlaa myị́ lẹ. Ma ahị baba nyọka jẹ́ ịBayịbụụ la irya ọnyịịla. Da ọọwa u-uhye, abwẹla ọnyịịla ọhẹ juwa kahị baba nyọka la chajị kahị ka jẹ́-ẹ wo etu nya ọmwụ ọyẹyẹ ịla ịBayịbụụ.

9. Abwẹla oyina ahị tị́ baba nyọka la chajị kahị ka jẹ́-ẹ wo etu nya ọmwụ ọyẹyẹ ịla ịBayịbụụ? Ịyẹ tị́ du kahị ya ịnyị?

⁹ Kpịlọng keji. IJihova myọnụ nyọka da angị kpịlaa keji ụbwọ. (Jem. 4:6) Lẹ, ahị baba nyọka bịlọọ kọ ka dahị ụbwọ wo etu nya ọmwụ ọyẹyẹ ịla ịBayịbụụ. Kori kahị kpịlọhị keji, ahị ka myọnụ nya ụbwọ ọdada nya ọnchẹ ọ-jẹ́ ẹla ọlẹ ká iJihova wẹẹ kpa ya ang oriri nya olegu hahị lụka ọlẹ kọ baba. (Luk. 12:42) IJihova ri Ohe ọlẹ kọ kaa họ ang kẹm-kẹm, lẹ ọ la kpakpa nyọlẹ kọ wẹẹ kpa ogu ookpokpo dahị ụbwọ nyọka wo etu nya ẹlịlẹhị ịla Omyi Ẹla nyamwụ.—1 Kọr. 14:33; Efe. 4:4-6.

10. Ẹlịyẹ a tị́ jẹ́ bwu oja nya Esther?

¹⁰ Jẹ́ ang kpori-kpori. Dọmwụ bwula ọ-jẹ́ ang u-uhye nya ọmwụ ọyẹyẹ ọlẹ kọ kaa kpụng ịpyọ. Ịnyị ọọnahị ọhẹ ká ẹnyị nyamwụ ri Esther à họ lẹ. Ọmwụ ọyẹyẹ ịlẹ kị ya ẹla u-uhye nya ọwẹwẹ nya iMesaya kaa kpọọ ịpyọ. Ọ yẹkẹẹ: “Ụka kam gu ẹka 15, m̀ jẹ́ ang kpori-kpori u-uhye nya ang-ẹjẹẹ ịlẹ kị mẹjẹ nyori ị da ọmwụ ọyẹyẹ ịwẹ ju ene ká iJisọsị wẹ odehe ịlẹhị.” Ang ọlẹ kọ jẹ́ u-uhye nya ụpwụ ọlẹ kọ ri Dead Sea Scrolls ya ọ-jẹ́ myị̀myị̀ họọ. Ọ yẹkẹẹ: “Ị da ịhyẹ lẹpwụ nyaa ene nya ọwẹwẹ nya ịKịrayịsị, lẹ ọmwụ ọyẹyẹ ịlụwa ka bwu ẹga nya Ohe ịlẹhị.” Esther myọnụ yẹkẹẹ: “M̀ kaa wa ụpwụ ụka lụmẹ-lụmẹ nyọka wo etu nyamwụ.” Ma ọ tị kaa chị ọkẹkẹnị nyọlẹ kọ họ ịnyị. Ụka ọlẹ kọ jẹ́ ang kpori-kpori u-uhye nya ọmwụ ọyẹyẹ ịla ịBayịbụụ ịhyẹ kpá, ọ yẹkẹẹ: “M̀ yẹ gede-gede la ịlọm nyori ịBayịbụụ ri ẹlịlẹhị!”

11. Ịyẹ tị́ du kọ há nyọka jẹ́ myị̀myị̀ nyori ịBayịbụụ ri ẹlịlẹhị?

¹¹ Ụka kahị yẹ jaabwọ ká ọmwụ ọyẹyẹ ịhyẹ ịlẹpwụ nya Omyi Ẹla nya Ohe họ jịra ene-ene lẹ, ahị kaa dahịhile iJihova yẹẹyẹẹ bala ẹla myị́ ẹla kọ mẹjẹ́ẹhị. Ịnyịnyị, nyọlẹ ká ọmwụ ọyẹyẹ ịla ịBayịbụụ ya ẹla u-uhye nya ijuju nyahị wẹẹ, ụka kahị jẹ́ ang u-uhye nyaa, ahị kaa chị ọkẹkẹnị kori kahị la akama wẹwẹ. Ahị kụ ẹhị yẹ ọmwụ ọyẹyẹ imiiye ịhyẹ ịlẹ ká ịDanẹlụ da ju kị wẹẹ họ jịra lẹẹlẹẹ wẹẹ. Etu nyaa o-wowo ka dahị ụbwọ kahị ka jẹ́-ẹ cheje ịnyịịla.

12. Ẹpẹtẹ nya “oje bala ume” ọlẹ kị ya “kpịla lawụlẹ” tị́ ku ọmwakpa nya ịyẹ? (ỊDanẹlụ 2:41-43)

¹² Wa ịDanẹlụ 2:41-43. Ẹ-ẹpwụ nya ụlaa ọlẹ ká ịDanẹlụ wụlẹ je Adịrahụ iNebukadinesa, ị “ya oje bala ume kpịla lawụlẹ” họ ẹpẹtẹ  nya ukpeku ọtụka ọlẹ ká adịrahụ yẹ. Bwula ọ-chụ ọmwụ ọyẹyẹ ọwẹ ka pwoku ịkịla ịla ụpwụ nya ịDanẹlụ bala Ọwụrụụ-wụrụ, ahị ka jẹ́-ẹ ya nyori ẹpẹtẹ ọwẹ ku ọmwakpa nya United States bala Britain, kị yẹ jula awụlẹ ri eji ọkpakpa ọlẹ kọ la ọngịrị gụ́ wuu odehe alẹ. ỊDanẹlụ ya ẹla rụ eji ọkpakpa ọwẹ yẹkẹẹ: “Ụpa ọhẹ nya ẹpwụma ọọwa ka la ọngịrị, ụpa nyamwụ ọkịla ka la dẹwụ-dẹwụ.” Ịyẹ tị́ du ká ụpa ọhẹ ka la dẹwụ-ḍewụ? Ang odudu ri, alekpeleji nyamwụ ịlẹ kị ku ọmwakpa nya ume ka ya ẹhị da ọngịrị ọ-lala ịnya oje ọlẹ kọọ kpa họ ang bwee. b

13. Ẹlịlẹhị ịkpọnchị iyina ahị tị́ jẹ́ bwu ọmwụ ọyẹyẹ ọwẹ?

¹³ Ẹla i-ju apyobwuna lụmẹ-lụmẹ ji kahị ka jẹ́ u-uhye nya ukpeku ọlẹ ká ịDanẹlu chabwọ, ọgụgụ ri apatẹ nyamwụ. Ọhọhẹ, Anglo-American World Power mẹjẹ nyori ọ la ọngịrị pwụ ẹgẹhẹ lẹ. Ọ-chụ pwokwita, United States bala Britain ji ẹpwụ nya ẹpwụma ịlẹ kị kụrụ Ẹwụ nya Odehe Wuu Ọhọhẹ bala Ẹwụ nya Odehe Wuu Oheeye. Ma ọngịrị nyaa wẹẹ la dẹwụ-dẹwụ gụ́ olene chajị angịnyị nyaa kaa bá ẹla ta awụlẹ bala igomenti. Oheeye, ẹpwụma imiiye ịwẹ à ka yẹ jula awụlẹ kpa ọngịrị nya odehe ụ-ụbwọ hyẹẹkpẹ ene ká Ịpyị-Adịrahụ nya Ohe ka ta eji ọkpakpa nya angịnyị ehe wuu ayịreji lẹ. Nanana nyori ẹpwụma ịkịla ka da Anglo-American World Power uya ụka ọhẹ myị́, ma ị́ ka jẹ́-ẹ ye ọngịrị bwu ụbwọ nyamwụ myị́ kaka. Ahị jẹ́ ịnyị chajị “ẹjwọ ọhẹ,” kọ ku ọmwakpa nya Ịpyị-Adịrahụ nya Ohe ká ta ẹpẹtẹ nya ukpeku ọọwa, kọ ri ụpa ọlẹ kọ ku ọmwakpa nya Anglo-America ayịreji.—Dan. 2:34, 35, 44, 45.

14. Ányị o-wo etu nya ọmwụ ọyẹyẹ u-uhye nya ẹpẹtẹ nya oje bala ume à tị́ ka dahị ụbwọ cheje ịnyịịla?

¹⁴ À jẹ́ myị̀myị̀ nyori ọmwụ ọyẹyẹ nya ịDanẹlụ u-uhye nya ẹpẹtẹ ọla oje bala ume nya ukpeku ọwẹ ri ẹlịlẹhị? Ó ri ịnyị aalẹ, ọ ka gu abwọlẹ ká kaa kpa ọhịhị nyang. Á ka myị-ị̀ kpa ọhịhị nyang ku okpoko bala ang-ụdụ ka, chajị à jẹ́ nyori odehe onyobyi ọlẹ ja ka ta ayịreji lẹ. (Luk. 12:16-21; 1 Jọn. 2:15-17) Etu nya ọmwụ ọyẹyẹ ọwẹ o-wowo ka dang ụbwọ ká ka jẹ́ nyori ụkụrwọ nya ẹrụ ọnyịịla ọ-kpa pyẹ bala ang ọ-mẹjẹ baba yẹẹyẹẹ. (Mat. 6:33; 28:18-20) Ụka ká jẹ́ ang u-uhye nya ọmwụ ọyẹyẹ ọwẹ kpá, tịlọng wo yẹkẹẹ: ‘Eje nya ẹla ịlẹ kam kaa chị mẹjẹ nyori m̀ jẹ́ ká Ịpyị-Adịrahụ nya Ohe ja ka ta igomenti nya angịnyị ehe wuu ayịreji lẹ?’

15. Owo anyị à tị́ ri ‘adịrahụ nya oye ẹte’ bala ‘adịrahụ nya oye edii’ alẹ? (ỊDanẹlụ 11:40)

¹⁵ Wa ịDanẹlụ 11:40. ỊDanẹlụ egbeju 11 ya ẹla rụ ịdịrịhụ imiiye, lee ọngịrị nya eje ọkpakpa ịlẹ kị ka ju awụlẹ ju nya ọngọ ka kpa ọngịrị nya odehe ọlẹ ụ-ụbwọ. Bwula ọ-chụ ọmwụ ọyẹyẹ ọwẹ ka pwoku ịkịla ịlẹpwụ nya ịBayịbụụ, ahị ka jẹ́-ẹ ya nyori Russia bala angị chẹkpẹ jwoo à ri ạdịrahụ nya oye ẹtẹ lẹ, Anglo-American World Power à tị ri adịrahụ nya oye edii ịnyịnyị lẹ. c

16. Ányị ‘adịrahụ nya oye ẹtẹ’ à tị́ kaa kpa angịnyị nya Ohe Oluhye?

¹⁶ ‘Adịrahụ nya oye ẹtẹ’ kaa ta angịnyị nya Ohe ịlẹ kị kụ́ ẹga ọlẹ kọ kaa kpeji pyịpyị. Ị kaa nyi aanahị ịhyẹ enyiri bala o-waa ju agba ọọlajị nya ọmyịmyị nyaa. Ma, ọkọkọ ká ọtụpyịpyị o-bwu ẹga nya ‘adịrahụ nya oye ẹtẹ’ ka chị uhi ju aanahị lẹ, ọ kaa ju ọmyịmyị nyaa ọngịrị ẹ-ẹga nya iJihova. Ịyẹ à tị́ du? Chajị aanahị jẹ́ nyori ọtụpyịpyị nya angịnyị nya Ohe Oluhye ri ọ-họ jịra nya ọmwụ ọlẹ ká ịDanẹlụ  yẹ. d (Dan. 11:41) Ahị ọ-jẹ́ ịnyị ka dahị ụbwọ nyọka ju ẹhị ọrịrịị-rịrị nyahị ọngịrị bala ọ-ka godayị giri-giri ha iJihova.

17. Akama iyina angịnyị nya Ohe à tị́ chịpwụrụ bwu e-ekpeleji nya eji ọkpakpa nya ‘adịrahụ nya oye edii’?

¹⁷ ‘Adịrahụ nya oye edii’ tụ angịnyị nya Ohe Oluhye pyịpyị lụka ọ-kẹkpẹ ịnyịnyị. Ọ-chụ pwokwita, lụka nya Ẹwụ nya Odehe Wuu Ọhọhẹ bala Ẹwụ nya Odehe Wuu Oheeye, ị wu iru nya aanahị ju agba bala ọ-gba anyị nya Alibeenu nya iJihova kpehe hi ube-ụpwụ chajị nyọlẹ kị kaa chẹkpẹ ju ụpa ọhẹ datị ka. La ẹka ịkpanjẹ, anchẹ nya iJihova ịlẹ kị kụ oye ọlẹ ká eji ọkpakpa nya ‘adịrahụ nya oye edii’ pwụ la ọmayẹ a-agbẹyị ịkịla u-uhye nya ogodayị giri-giri ha iJihova. Ọ-chụ pwokwita, ụka ká alupe á ja kpa ẹla nya ụbwọ ọ-kpa ka akpa pyẹ, ọngịnyị nya ịKịrayịsị ka la ọmayẹ nyọka chẹkpẹ ju ebwo nya upe ọhẹ lee ọngọhẹ datị hi ọngọkịla myị́. Ịlẹhị lẹ, ọ́ ka kpa ụbwọ ka akpa ka myị́, ma ọ tị ka chẹkpẹ ju ọngọhẹ datị hi ọngọkịla ẹ-ẹpwụ nya irya bala ọkịlẹtụ nyamwụ  myị́. Ma, chajị nyọka chẹkpẹ ju ọngọhẹ datị ka lẹ, ahị baba nyọka dụmwọ-dụmwọ ẹ-ẹga nya ẹla ọlẹ kahị kaa họ bala irya ọlẹ kahị kaa kụ!—Jọn. 15:18, 19; 18:36.

18. Ányị ahị tị́ kaa họ u-uhye nya ẹla ọmwọmwọ nya ‘adịrahụ nya oye ẹtẹ’ bala ‘adịrahụ nya oye edii’? (Yẹ ifoto ịnyịnyị.)

¹⁸ Angịlẹ kị la ọmyịmyị u-uhye nya ọmwụ ọyẹyẹ ịla ịBayịbụụ ka kaa juhi kpoye-kpoye ụka kị ja yẹ jaabwọ ká ‘adịrahụ nya oye ẹtẹ’ bala ‘adịrahụ nya oye edii’ wẹẹ mwẹla. (Dan. 11:40) Ịdịrịhụ imimiiye ịwẹ la ang-abwọ nya ẹwụ ịlẹ kị la ịngịrị nwà nyọka ta ang myị́ ang ayịreji odehe ọlẹ. Ma ahị jẹ́ nyori iJihova á ka ya iwe nyọọwa da ka. (Ayị. 45:18) Lẹ, ọkọkọ ká uji ọla ẹpwarịrị nya ‘adịrahụ nya oye ẹtẹ’ bala ‘adịrahụ nya oye edii’ ka ri olo hahị lẹ, ọ kaa ju ọmyịmyị nyahị ọngịrị. Ọ họ kahị jẹ́ myị̀myị̀ nyori ocheju nya odehe ọlẹ ju chwẹẹ lẹ.

19. Ẹlịyẹ ahị tị́ jẹ́ myị̀myị̀ u-uhye nya ọmwụ ọyẹyẹ ịla ịBayịbụụ ka?

¹⁹ Áhị jẹ́ jaabwọ ká ọmwụ ọyẹyẹ ịlẹpwụ nya ịBayịbụụ ịhyẹ ka bwu họ jịra kpangga lẹka. Ọlọmwụ ịDanẹlụ ịnyịnyị á dọmwụ jẹ́ etu nya ang ịlẹ kọ da neeji wuu ka. (Dan. 12:8, 9) Ma, ahị ọ-jẹ́ jaabwọ ká ọmwụ ọyẹyẹ ka bwu họ jịra kpá ka, á mẹjẹ nyori ọ́ ka họ jịra ka lẹ ka. Ịwẹẹ ọdada á ji ka, ahị ka jẹ́-ẹ dahịhile iJihova nyori ọ ka ya etu nya ẹla ọlẹ kahị baba nyọka jẹ́ lụka ọlẹ kọ pwoku, jaabwọ kọ họ lụka ọkẹkpẹ.—Emọ. 3:7.

20. Ọmwụ ọyẹyẹ ịkpịpyọ-kpịpyọ ịla ịBayịbụụ iyina ahị tị́ ka yẹ ọ-họ jịra nyaa lụka o-kpii? Ịyẹ ahị tị́ baba nyọka họ kịnyaa?

²⁰ Ị ka ya dodehe nyori “okpunyi ji lẹ, ahị ka hụhụ la o-kem le.” (1 Tẹs. 5:3) Lụka o-kpii, igomenti nya odehe ọlẹ ka ta ịgba ọgbagba nya ọnọọkịla wuu ayịreji. (Ọwụ. 17:16, 17) Ọọwa lẹ, ị ka gba mịla angịnyị nya Ohe Oluhye lẹlẹ. (Isi. 38:18, 19) Ẹla ịwẹ à ka kpahị ju ka ẹpwụ nya ẹwụ nya Amagẹdọn lẹlẹ. (Ọwụ. 16:14, 16) Ahị jẹ́ myị̀myị̀ nyori ẹla ịwẹ ja ka họ lụka o-kpii lẹ. Gbee da ụka ọọwa, ahị mẹjẹ nyori ẹla nya Adahị olepwoohe myịhị lẹhị, bwula ọ-ya ẹhị reeji nya ọmwụ ọyẹyẹ ịlẹpwụ nya ịBayịbụụ bala ọ-da angịkịla ụbwọ kị ka họ ịnyị ịnyịnyị mẹ.