1. Chyum myihtoi ga hkaja ai hta pyaw hkra hpa gaw karum ya lu ai kun?

 “CHYUM Laika myihtoi ga hkaja ai hpe ngai grai ra ai” ngu ramma hpunau Ben tsun ai. Nang mung dai hku sha kun? Shing nrai, Chyum Laika myihtoi ga ni gaw grai chye na yak ai ngu nang hkamsha ai kun? Myihtoi ga ni hpe hkaja ai gaw lagawn na zawn re ngu na pyi hkamsha chye ai. Raitim, Chyum Laika hta myihtoi ga ni hpe Yehowa hpa majaw ka shalawm da ai hpe chye yang, dai hpe nang ra sharawng wa na re.

2. Ndai sumhpa hta hpa lam hkaja na kun?

² Chyum Laika myihtoi ga ni hpe hpa majaw hkaja ging ai hpe sha n-ga, gara hku hkaja mai ai lam hpe mung ndai sumhpa hta bawngban mat na re. Dai hpang Daniela laika hta lawm ai myihtoi ga 2 hpe anhte hkaja nna, dai hpe chye na ai gaw ya aten hta anhte hpe gara hku karum ya lu ai lam chye lu na re.

3. Chyum Laika myihtoi ga ni hpe chye na mayu yang hpa galaw ra ai kun?

³ Chyum Laika myihtoi ga hpe chye na mayu yang, anhte karum hpyi ra ai. Ndai ga shadawn hpe myit yu u. Nang gaw, atsawm n chye ai shara de bu hkawm ai. Raitim, nang hte rau hkawm ai manang gaw, dai shara hpe atsawm chye ai. Nang gara kaw du nga ai, lam langai hpra gaw gara de du mat shangun ai hpe shi chye ai. Shi hkan wa ai majaw grai kabu na re. Dai manang zawn sha, Yehowa gaw, anhte asak hkrung nga ai aten ladaw, anhte a htawm hpang hpe atsawm chye ai. Dai majaw, Chyum Laika myihtoi ga hpe chye na na matu, shagrit shanem let Yehowa kaw karum hpyi ra ai.—Dan 2:28; 2 Pe 1:19, 20.

4. Chyum Laika hta myihtoi ga ni hpe Yehowa hpa majaw bang da ai kun? (Yeremia 29:11) (Sumla hpe mung yu u.)

⁴ Kaja ai kanu kawa ni zawn sha, Yehowa gaw shi a kasha ni hpe ngwi pyaw ai htawm hpang prat lu shangun mayu ai. (Yeremia  29:11 hpe hti u.) Shinggyim kanu kawa ni hte n bung ai sha, Yehowa gaw htawm hpang hte seng nna tup hkrak tsun dan lu ai. Chyum Laika hta myihtoi ga ni hpe ka da ai majaw, garai n byin shi ai ahkyak ai lam ni hpe anhte chye lu ai. (Esa 46:10) Myihtoi ga ni gaw sumsing Kawa kaw na kumhpa re. Gaja wa byin wa na ngu ai hpe gara hku kam lu ai kun?

5. Mek a mahkrum madup kaw na ramma ni hpa sharin la lu ai kun?

⁵ Jawng hta anhte a ramma ni gaw, Chyum Laika hpe n hkungga ai ni a lapran hta nga ra ai. Shanhte tsun ai, galaw ai lam ni gaw, Sakse Hkam ramma ni a myit hta ntsen ai myit ni nga wa shangun lu ai. Hpunau Mek a mahkrum madup hpe yu yu ga. Shi ndai hku tsun ai: “Ngai brang ram aten hta, Chyum Laika gaw Karai Kasang shung ya ai ngu ai lam, jet ai nawku htung hte seng nna kanu kawa ni sharin ya ai lam ni hpe ntsen ai myit nga wa ai.” Shi kanu kawa ni hpa galaw wa ai kun? Shi ndai hku tsun ai: “Shanhte myit tsang nga ai hpe ngai chye ai. Raitim, myit azim sha hte shanhte bai htang wa ai.” Mek a kanu kawa ni gaw, shi a ga san hpe Chyum Laika kaw na mahtai jaw wa ai. Shi maga hku na galaw wa ai lam hpe ndai hku tsun dan ai: “Ngai mung Chyum Laika myihtoi ga ni hpe hkaja ai. Chye wa ai lam ni hpe kaga ramma ni hte bawngban ai.” Hpa akyu lu ai kun? Shi ndai hku tsun ai: “Dai hpang, Chyum Laika gaw Karai Kasang kaw na re ai hpe ngai kam wa ai.”

6. Nang hta ntsen ai myit nga wa yang hpa galaw ra ai kun? Hpa majaw kun?

⁶ Mek zawn, nang mung Chyum Laika hta lawm ai tengman lam ni hpe ntsen ai myit nga wa yang, mara nga ai ngu n hkamsha ra ai. Raitim, ahkyak ai lam hpe gaw lawan galaw ra ai. Ntsen ai myit gaw nhkan hte bung ai. Nhkan sha taw ai hpe dai hku sha kabai da yang, manu dan ai lama ma hpe angwi ngwi jahten kau lu ai. Makam masham hpe jahten kau lu ai “nhkan” hpe yen kau na matu, na hkum nang ndai hku san ra ai: ‘Htawm hpang hte seng nna Chyum Laika hta tsun da ai lam ni hpe ngai kam ai kun?’ Nau n kam ai nga yang, hpring tsup ngut sai myihtoi ga ni hpe hkaja ra ai. Gara hku hkaja lu na kun?

7. Myihtoi ga hkaja ai hte seng nna Daniela gara kasi ningli madun wa ai kun? (Daniela 12:10) (Sumla hpe mung yu u.)

⁷ Myihtoi ga hkaja ai hte seng nna, Daniela gaw kaja ai kasi ningli madun wa ai. Shi gaw myihtoi ga hkaja ai shaloi, tengman ai hpe chye na matu ngu ai jaw ai myit jasat hte hkaja ai. Shagrit shanem lam mung nga ai. Yehowa gaw shi hpe chye ai ni, shi a tsang madang ni hte maren asak hkrung ai ni hpe, chye na lu ai atsam jaw ai hpe Daniela chye ai. (Dan 2:27, 28; Daniela 12:10 hpe hti u.) Yehowa a karum shingtau lam hpe kamhpa ai hku nna, shagrit shanem ai lam shi madun wa ai. (Dan 2:18) Daniela gaw atsawm hkaja ai. Shi lu la ai Chyum Laika ni kaw na tam sawk sagawn ai. (Yer 25:11, 12; Dan 9:2) Daniela hpe gara hku kasi la mai ai kun?

8. Masha nkau gaw Chyum Laika myihtoi ga ni gaja wa byin wa na ngu ai hpe hpa majaw n kam ai kun? Raitim, anhte hpa galaw lu ai kun?

⁸ Na a myit jasat hpe san jep yu u. Tengman ai hpe chye na matu ngu ai myit jasat hte myihtoi  ga ni hpe nang hkaja nga ai kun? Rai yang, Yehowa nang hpe karum ya na re. (Yhn 4:23, 24; 14:16, 17) Raitim, nkau gaw kaga yaw shada lam hte myihtoi ga ni hpe hkaja ma ai. Nkau rai yang, Chyum Laika gaw Karai Kasang shung ya ai n re ngu ai madi madun lam hpe tam na matu hkaja ai rai na re. Chyum Laika gaw Karai Kasang kaw na n rai yang, jaw ai, shut ai hte seng ai tsang madang ni hpe tinang nan dawdan lu ai ngu shanhte myit ai. Raitim, anhte gaw jaw ai myit jasat hte hkaja ra ai. Dai sha n-ga, Chyum Laika myihtoi ga hpe chye na na matu, ahkyak ai atsam ningja langai ra ai.

9. Chyum myihtoi ga chye na na matu gara atsam ningja ra ai kun? Sanglang dan u.

⁹ Shagrit shanem u. Shagrit shanem ai ni hpe karum ya na ngu Yehowa ga sadi jaw ai. (Yak 4:6) Dai majaw, chyum myihtoi ga hpe chye na hkra karum ya na matu shi kaw akyu hpyi ra ai. Aten dep wenyi malu masha lu la na matu, Shi jailang nga ai uhpung a karum shingtau ra ai hpe mung anhte hkap la ra ai. (Luk 12:42) Yehowa gaw kashuk kashak n re ai. Dai majaw, Chyum Laika hta lawm ai tengman lam ni hpe chye na hkra karum ya na matu, shi a uhpung hpe sha jailang na re.—1 Ko 14:33; Ehp 4:4-6.

10. Esta a mahkrum madup kaw na hpa sharin la lu ai kun?

¹⁰ Atsawm hkaja u. Myit lawm ai myihtoi ga langai hpe lata nna shawng sawk sagawn u. Nauna Esta dai zawn galaw wa ai. Meshia du wa na hte seng ai myihtoi ga ni hpe shi myit lawm ai. “Dai myihtoi ga ni hpe Yesu garai n shangai shi yang ka wa ai ngu ai madi madun lam ni hpe, ngai sak 15 ning hta tam hpang wa ai” ngu shi tsun ai. Panglai Si Laika Katsu ni a lam hti hkrup ai shaloi kam mat ai. “Laika katsu nkau gaw Yesu n shangai shi yang ka da ai ni re. Dai majaw, dai laika katsu hta lawm ai lam ni gaw Karai Kasang kaw na rai na re” ngu shi tsun ai. Dai ni hpe chye na na matu, chyahkring hkring hti ra ai ngu Esta tsun ai. Shi shakut shaja hti ai majaw grai akyu lu la ai. Chyum Laika myihtoi ga law law hpe atsawm hkaja ngut ai hpang shi ndai hku tsun ai: “Chyum Laika hta lawm ai lam ni gaw jaw ai hpe ngai nan atsawm kam mat ai.”

11. Chyum Laika gaw tengman ai hpe tinang nan kam ai kaw na hpa akyu lu ai kun?

¹¹ Chyum myihtoi ga nkau gara hku hpring tsup wa ai hpe anhte chye ai shaloi, Yehowa hte shi a lam matsun ni hpe grau kam wa ai. Dai sha n-ga, Chyum myihtoi ga ni gaw, ya aten hta hpa mayak mahkak mi hkrum tim, htawm hpang hte seng nna kaja ai ningmu matut nga na matu karum ya ai. Ya aten hta hpring tsup nga ai, Daniela ka da ai myihtoi ga 2 hpe hkaja yu ga. Dai ni hpe chye na ai gaw, hpaji rawng ai dawdan lam ni jahkrat lu hkra karum ya lu ai.

12. ‘Hpri hte madi ai ga kagam kayau ai’ lagaw lahpan hte lagaw latsang gaw hpa hpe malai tsun ai kun? (Daniela 2:41-43)

¹² Daniela 2:41-43 hpe hti u. Hkawhkam Nebuhkadneza a matu Daniela htai ya wa ai yup mang hta lawm ai sumla kaba a lagaw lahpan hte lagaw latsang gaw, ‘hpri hte madi ai ga kagam kayu’ nga ai. Dai myihtoi ga hpe Daniela Laika hte Shingran Laika hta lawm ai  kaga myihtoi ga ni hte shingdaw yu ai shaloi, lagaw lahpan hte lagaw latsang gaw, dai ni aten hta n-gun ja dik htum re ai Inglik-Amerikan mungkan daru magam hpe malai tsun ai lam chye lu ai. Dai mungdan gaw “daw mi ja ai, daw mi kya ai, rai na ra ai” ngu Daniela tsun ai. Hpa majaw daw mi kya ai kun? Madi ai ga kagam hte shingdaw da ai mung masha ni a majaw, hpri hte bung ai ahkang aya hpe lang mayu ai daram n lu lang ai majaw re. b

13. Ndai myihtoi ga kaw na gara ahkyak ai lam ni hpe chye lu ai kun?

¹³ Sumla kaba, laksan hku nna lagaw lahpan hte lagaw latsang hte seng ai Daniela sanglang dan ai lam kaw na ahkyak ai lam law law hpe chye lu ai. Langai, Inglik-Amerikan mungkan daru magam gaw, shi n-gun ja ai lam hpe sakse madun wa sai. Ga shadawn, Nambat 1 Mungkan Majan hte Nambat 2 Mungkan Majan hta, awng padang hkam lu ai mungdan ni hta Amerikan hte Britin lawm ai. Raitim, Mung masha shada da gasat ai, asuya hpe gasat ai majaw, dai mungkan daru magam gaw n-gun kya nga ai. Dai hta mung naw kya wa na re. Lahkawng, shinggyim asuya ni hpe Karai A Mungdan n jahten kau shi ai aten du hkra, ahkang aya lu nga na hpang jahtum mungkan daru magam gaw Inglik-Amerikan mungkan daru magam re. Kalang lang, kaga mungdan ni sa shingjawng tim, shara kashun lu na n re. Karai A Mungdan hpe malai tsun ai nlung gaw, Inglik-Amerikan mungkan daru magam hpe malai tsun ai sumla a lagaw hpe agrawp kau sana re ai majaw re.—Dan 2:34, 35, 44, 45.

14. Hpri hte madi ai ga kagam kayau ai lagaw lahpan hte lagaw latsang hte seng ai myihtoi ga hpe chye na ai gaw, hpaji rawng ai dawdan lam ni jahkrat lu hkra gara hku karum ya ai kun?

¹⁴ Hpri hte madi ai ga kagam kayau ai lagaw lahpan hte lagaw latsang hte seng ai myihtoi ga jaw ai ngu nang kam ai kun? Kam yang, na a asak hkrung hkawm sa lam hta madun na re. Kade n na yang jahten hkrum sana mungkan hta, arung arai ni hpe ladu lai tam nga sana n re. (Luk 12:16-21; 1 Yh 2:15-17) Ndai myihtoi ga hpe chye na ai gaw, hkaw tsun bungli hte sharin achyin ai bungli gaw grai ahkyak ai hpe chye shangun ai. (Mat 6:33; 28:18-20) Ndai myihtoi ga hpe hkaja ngut ai hpang, tinang hkum tinang ndai hku san u, ‘Shinggyim asuya yawng hpe kade n na yang Karai a Mungdan jahten kau na ngu ai hpe kam ai lam, nye a dawdan lam ni gaw madun nga ai kun?’

15. Dai ni aten hta “dingdung hkawhkam” hte “dingda hkawhkam” gaw kadai ni kun? (Daniela 11:40)

¹⁵ Daniela 11:40 hpe hti u. Mungkan hta n-gun ja htum byin na matu shada da gasat nga ai hkawhkam 2 (sh) asuya 2 a lam Daniela daw kaba 11 hta tsun da ai. Chyum Laika hta lawm ai kaga myihtoi ga ni hte shingdaw yu ai shaloi, dingdung hkawhkam gaw Rasha hte jinghku mungdan re ai lam, dingda hkawhkam gaw Inglik-Amerikan mungkan daru magam re ai lam chye lu ai. c

16. “Dingdung hkawhkam” up ai shara hta nga ai Karai a masha ni gaw hpa mayak mahkak ni hkrum ai kun?

¹⁶ “Dingdung hkawhkam” up ai npu hta nga ai Karai a masha ni gaw, dai hkawhkam a dingtawk zingri zingrat ai hpe hkrum ai. Sakse Hkam nkau gaw, makam masham a majaw kayat hkrum ai, htawng jahkrat hkrum ai. “Dingdung hkawhkam” a zingri zingrat ai lam a majaw, hpunau ni hkrit mat na malai, shanhte a makam masham grau ngang kang wa ai. Hpa majaw kun? Karai a masha ni zingri zingrat hkrum ai gaw, Daniela a myihtoi ga  hpring tsup nga ai hpe chye ai majaw re. d (Dan 11:41) Dai hpe chye da ai gaw, anhte a myit mada lam hpe grau shangang shakang ya nna, Yehowa ntsa matut sadi dung na matu karum ya ai.

17. “Dingda hkawhkam” up ai npu hta nga ai Karai a masha ni gaw hpa mayak mahkak ni hkrum ai kun?

¹⁷ Lai wa sai aten hta “dingda hkawhkam” gaw, Yehowa a masha ni hpe dingtawk hku nna mung gasat wa ai. Ga shadawn, Nambat 1 Mungkan Majan hte Nambat 2 Mungkan Majan laman, Hkristan lapran nga ai lam a majaw, hpunau law law htawng jahkrat hkrum ai. Sakse Hkam ma nkau jawng shapraw hkrum ai. Raitim, kade n na shi ai shaning ni hta, Hkristan sadi dung ai lam gaw, kaga lam ni hku nna chyam dinglik hkrum wa ai. Ga shadawn, ra lata poi laman Hkristan langai gaw mung masa pati langai (sh) dat kasa langai ngai hpe madi shadaw na matu chyam dinglik hkrum chye ai. Sin dan pa n sa bang tim, myit hta gaw, kadai dang yang kaja na re ngu myit hkrup chye ai. Anhte a lailen hta  sha n-ga, myit ai hkamsha ai lam ni hta mung, mung masa lam hta lapran nga na matu grai ahkyak ai.—Yhn 15:18, 19; 18:36.

18. “Dingdung hkawhkam” hte “dingda hkawhkam” a htim gasat ai lam hpe anhte gara hku bai htang ging ai kun? (Sumla hpe mung yu u.)

¹⁸ Chyum myihtoi ga hpe n kam ai ni gaw, “dingdung hkawhkam” hte “dingda hkawhkam” a “htim gasat” ai lam hpe mu ai shaloi grai myit tsang chye ai. (Dan 11:40) Hkawhkam lahkawng yan hta, mungkan ting na hkrung mahkrung hpe jahten kau lu ai atsam kaba ai nyukaliya (nuclear) laknak nga taw ai majaw re. Raitim, dai zawn jahten na ahkang Yehowa jaw na n re ai hpe anhte chye ai. (Esa 45:18) Dai majaw, “dingdung hkawhkam” hte “dingda hkawhkam” htim gasat ai hpe mu ai shaloi, htawm hpang hpe myit nna myit tsang na malai, anhte a makam masham grau ngang kang wa ai. Ndai nhkru ai mungkan htum sana ngu ai hpe madun dan nga ai majaw re.

19. Chyum myihtoi ga ni hte seng nna hpa hpe hkap la ging ai kun?

¹⁹ Chyum myihtoi ga nkau, gara hku hpring tsup wa na hpe anhte n chye ai. Myihtoi Daniela pyi, shi ka wa ai lam yawng a lachyum hpe n chye na wa ai. (Dan 12:8, 9) Myihtoi ga langai gara hku hpring tsup wa na hpe atsawm n chye ai gaw, dai myihtoi ga n hpring tsup wa sai ngu ai lachyum n re. Moi aten hta galaw wa ai zawn sha, anhte chye ra ai aten hta aten hkrak chye hkra, Yehowa tsun dan na hpe anhte kam mai ai.—Amo 3:7.

20. Gara myit kahpra hpa Chyum Laika myihtoi ga ni kade n na yang hpring tsup wa na kun? Anhte hpa matut galaw ging ai kun?

²⁰ “Ngwi pyaw ai hte asan apan rai nga ai” ngu mungdan ni ndau shana na re. (1 Ht 5:3) Mungkan a n-gun ja ai mung masa uhpung ni gaw, shut shai ai nawku hpung hpe jahten kau na re. (Shr 17:16, 17) Dai hpang, Karai a masha ni hpe gasat na re. (Eze 38:18, 19) Dai hku nna, hpang jahtum majan re ai Hara Magedon majan hpang wa na re. (Shr 16:14, 16) Dai mabyin ni kade n na yang byin wa sana ngu ai hpe kam mai ai. Ndai laman, chyum myihtoi ga ni hpe myit maju jung ai, kaga ni hpe mung myit maju jung lu hkra karum ya ai hku nna, tsawra myit nga ai sumsing Kawa hpe chyeju dum ai lam matut madun mat ga.